品格下流無關寄生

坊間影評對韓國電影《寄生蟲》評價，大多認為導演批判資本社會萬惡，刻劃韓國社會之貧富懸殊，為主角一家抱打不平，意見相當大路，如非友人極力推薦，我應該唔會去睇。然而，睇完之後，其實導演嘅訊息相當明確，就係窮人之所以窮係有原因，而窮人情緒爆發過後嘅結果，往往亦只係兩敗俱傷一場空。導演對人性醜惡之刻劃，以及階級秩序自然生成之理解，相當深刻，作品可以打動國際電影人，奪得金棕櫚獎，實至名歸。

首先，奉俊昊導演嘅思維，同佢前作《雪國列車》一脈相承，就係寄生蟲無分國界，都有佢地無法上流嘅致命理由。佢承認現代文明同資本主義邏輯，亦理解貧窮苦況，但佢想點出嘅係，人類要唔要成為寄生蟲，其實係有得揀，而以主角一家為代表嘅窮人心態出錯——不負責任、不務正業、規劃無度以及盲目仇富，正正係部分窮人最後自我毀滅嘅源頭，自食惡果，與人無尤。

戲中，有錢家庭夫妻角色性格討好，獲得社會地位，明顯係因為佢地處世有方。丈夫如何成為企業家，劇本未有交代，但從種種蛛絲馬跡可知，佢做人原則清晰，待人界線分明，引人詬病之處相當少。丈夫嘅對白，多次強調只要唔好逾越佢嘅界線，佢都可以接受，例如主角細妹用自己條底褲插贓嫁禍尹司機之後，佢只係話喺前座玩都還好，玩到去佢坐嘅後座就太誇張；主角阿爸行車時掛住同佢傾偈傾到唔望路面情況之時，佢亦有客氣提醒佢專心駕駛，做好本分；而佢客氣拜託主角阿爸同佢一齊扮演美洲原住民畀驚喜細仔，但主角阿爸態度奇怪，無心投入之時，佢嘅回應亦係嚴肅提醒對方要認真打好份工。加上導演多次強調丈夫係最佳企業家，可見就算佢本身贏喺起跑線，都有喺商場上盡己所能，至會勝過其他企業家。

而妻子雖然思想單純，亦略為昧於現實，但佢對家庭亦係絕對上心，處處自省，例如細仔小一曾經受驚，佢就份外緊張佢嘅心理成長，正係表現出佢對小朋友嘅關愛。當全家決定露營，長女唔情願去，佢都唔係用權力或物質去迫佢就範，而係話唔同一家人玩係佢損失，亦反映佢重視家庭。以上事例，所反映嘅都係導演無意貶損有錢家庭，因為有錢人絕對可以係心地善良，處事公道，唔靠作奸犯科致富，事業有成其實可以係精進自身嘅延伸。打破有錢即奸惡，窮苦即善良之刻板印象，正係作品嘅目的。

相反，主角一家倒果為因，認定對方係因為家境富裕至可以心地善良，正反映佢地對自身以及世界嘅認知都唔準確。主角一家趁有錢家庭出外露營入侵大宅之時，個阿媽講咗一句，如果佢係有錢，佢都可以心地善良，但隨後故事發展就已經即刻令佢自打嘴巴。前管家喺防空洞之中，跪地相求，懇請主角阿媽代為照顧避債丈夫，但主角阿媽聽完都係無動於衷，無意憐憫。直至對方發現自己把柄，用電話錄低主角一家如何以父子相稱，主客逆轉，佢又即刻求和，要求前管家網開一面。窮窮相遇，彼此理應互相理解，但可悲嘅係，前管家動之以情，說之以理，再奉上酬金拜託，主角一家都只係考量自身利益，多於共存共榮。最後，窮窮相遇演成窮窮相鬥，妥協無方，集體還原叢林法則，人多力壯一邊自動勝利，可謂突顯出唔講道理嘅窮人一旦掌權之恐怖，如同共產主義社會之縮影——主角兄妹較有人性，會追問前管家夫妻境況，但主角雙親之不擇手段，罔顧他人生死，完全係滅絕人性。

由此可知，前管家雖窮，但品性相對良善，優於主角一家。前管家寄生於有錢家庭，雖有取巧，但佢堅持用自己錢援助自己丈夫，未有貪心，擅取大宅資源，堪稱窮得有底線而有骨氣。相反，主角接到友人介紹嘅補習之後，心生歪念，為咗自身家庭利益，不惜傷害盡忠職守嘅尹司機同前管家，自私自利，而主角一家趁有錢家庭出外露營入侵大宅之舉，亦反映佢地唔識珍惜機會，好好為僱主服務，改變生活，而係的確如同寄生蟲一樣，人心不足，見風使盡艃，禍及宿主。最後主角阿爸殺人而唔自首，更加唔覺自己需要接受法律制裁，思維之扭曲，亦係瘋狂至極。主角一家無藥可救，死不足惜，足證導演無意諷刺資本家壓榨勞工，而係志在探討緊社會寄生蟲為禍之現象。

劇情發展至中段，主角一家經歷暴雨水災避入社區中心。鏡頭對準主角阿爸，安排佢道出自己處世之道，絕對係導演心思所在。主角阿爸不知悔改，惹禍之後，體悟居然係「人生唔好有計劃，有計劃就會有意外」同埋「有期待就會有失望，所以就要隨波逐流」，呢種人生觀，其實正正就係佢地全家淪落街頭嘅原因。所謂天道酬勤，出身係唔可以改變，但心態同努力係絕對有可能改變命運。主角一家只睇到人地嘅成功，從來唔去思考人地背後付出幾多，難得有得為有錢家庭打工，但不論係補英文、教美術、做司機定做管家都做到一塌糊塗，可謂不思進取，自取其辱。窮酸氣味飄揚，的確無法控制，但向上流動，洗脫氣味，係視乎人有幾想擺脫現狀，認真生活。認真生活嘅人，係唔會兼職摺pizza外賣盒都摺到有四分之一係唔用得。有錢家庭多次提及主角一家有特殊氣味，但從來唔會當住對方面前露出嫌棄表情，正係因為佢地識得顧及他人感受，就算對方不如自己，但睇喺主角阿爸眼中，佢就認為呢啲係偽善同狗眼看人低，呢種因自卑而生嘅仇富心理，對社會嘅危害絕對比偽善嘅有錢家庭大。

主角一家家破人亡之後，主角幻想自己賺大錢買起大宅，同阿爸一家團聚，心態似乎有變，但導演不留情咁擊碎佢嘅不切實際，再次反映出佢希望大家唔好對主角一家心存寄望。呢類窮人之所以翻身無期，其中一個原因，正係諗多過做，更甚嘅係得個諗字，乜都唔做，到最後推卸責任於社會不公同出身清貧。不論貧富，任何人都應該要有自知之明，了解自己能力所及，先至再去講目標講理想，如果有目標但能力未及，就應該精進自身，為目標而奮鬥不息，萬不得已，都唔好諉過於人。偏偏，主角一家雖有目標，但全部都係用旁門左道去達成——主角想同有錢家庭長女結婚，打算請替身演員飾演父母瞞騙對方，而唔係諗住靠自己嘅能力去融入對方嘅世界，又係證明佢地得過且過嘅例子。主角一家集多種人性缺點於一身，僥倖得以寄生上流但只係識得殺雞取卵，而唔識長期利用，慢慢吸乾，或用時間證明自己真係可以做好一件事，又更反映佢地只睇到眼前利益，缺乏對未來嘅想像之短視。

反觀前管家夫妻，同樣貧苦，但佢地識得飲水思源，對有錢家庭心存感激。前管家盡心盡力，連僱主養嘅三隻狗仔都會跟住佢出出入入，可見佢係有用心打工。而匿藏喺防空洞內嘅丈夫，以北韓民眾供奉金正恩嘅心態去供奉有錢家庭一家之主，亦可見佢係清楚知道自己係寄生上流，所以唔會仇視對方，而係如同佢自己所講，只有respect。直到主角一家害死前管家之後，佢生無可戀，衝上地面，想同主角一家同歸於盡，復仇目標明確，亦證明佢深明怨有頭而債有主之理，只係有仇報仇，而唔係無理取鬧。寄生蟲有唔同求生方式，蚊蚤之類，取食之後就會離開宿主，蠅蛆之類，則趁宿主傷口外露至乘機入侵，但主角一家不但名副其實寄生，更處心積慮，如同錐蟲一樣損害宿主神經系統，最終奪取宿主性命——劇本安排兩類寄生蟲作對比，用意顯而易見。

寄生上流，同樣可以識得愛人，前管家夫妻相依為命，明顯係願意共渡時艱嘅一對，但主角阿爸對家庭付出少之又少，根本豬狗不如。佢兩次問及有錢家庭丈夫關於愛嘅問題，正反映出佢自以為理解乜嘢係愛，但其實完全無知。第一次，有錢家庭丈夫聽到問題，略為遲疑，思考咗幾秒，至答應該算係愛，而第二次，二人隱身於草叢之內，主角阿爸則係以輕蔑態度去嘲諷對方嘅愛流於形式化。愛係人類想像之物，對於停留生物層嘅生物而言，相當抽象，此之所以，主角阿爸其實根本無法理解有錢家庭丈夫所想，問完都抽取唔到任何資訊，而有錢家庭丈夫之所以唔會不加思索就答愛，係因為佢會反思自己行為配唔配得上有愛。

主角雙親只係捱苦共同體，就算心存不滿都唔可以發脾氣，係因為發完日子都係咁樣過，多一事不如少一事，主角一家趁有錢家庭出外露營入侵大宅之時，二人有共識咁態度軟化，正係最佳證明。而有錢家庭丈夫即使日理萬機，都會抽時間同細仔玩，亦知道如何借助派對儀式去表達愛，就算勞累不堪都願意付出心思去令家人開心，呢啲都係超出主角一家認知範圍嘅家庭想像。而細仔喺花園露營，夫妻留守客廳所發生嘅性愛前戲，亦反映佢地係對對方有超越動物本能嘅慾望，因為佢地嘅性係有交流有想像，係人類性愛而非動物性交。兩相對比，又見思想差異。

普遍而言，中產出身者，的確會流於偽善，甚至脫離現實，但要糾正問題始終唔難。主角一家嘅問題則在於，佢地所受嘅教育都係經後期社教化而習得，而非自幼受家庭薰陶而成，最終發自內心。人類理應學習真誠待人同埋尊重秩序，再學識如何保護自己，而唔係一開始就懷疑他人，以小人之心度君子之腹，次序一錯，就會萬劫不復。人類社會一直進步，靠嘅就係建立呢種共識，如果認定人性本惡，人類就會無法想像同接受人性光輝，最後自然淪落到只識得猜忌努力善待他人嘅好人。概而言之，人嘅真正差異無關階級，成長中見識到嘅人性上限下限以至無限，至係品格嘅分水嶺。

最後不得不提嘅係，貫穿全劇嗰舊幸運石頭所承載嘅象徵意義。主角友人送石頭畀主角，係出於好意，而具體嘅好意，就係帶挈佢去有錢家庭短期代課。導演想表明嘅係，寄生上流之機會，由一開始就係他人借出，主角一家必須誠懇領受，至係對得自己對得人。偏偏，主角竟然背信棄義，明知友人想同有錢家庭長女交往，但都若無其事咁奪人所愛，甚至將等到對方入讀大學至正式交往嘅打算都據為己有，可謂無恥。而一人得道，妄想雞犬皆可升天，透支友人信任，無視是非曲直，德行之薄，令人心寒。

原名《寄生蟲》比譯名《寄生上流》更為貼切，係因為寄生對象唔一定要係上流，只要對方比寄生蟲稍為富裕，稍為顧及道德，就可以發動寄生。寄生係一種不勞而獲嘅心態，非關貧富，而在於如何看待生命嘅意義。主角一家的而且確係社會以至文明中嘅寄生蟲，但於我而言，所謂寄生蟲，並非韓國獨有，而係遍佈全球，不分種族國籍。權力至上，社會道德秩序形同虛設，設想人性至最壞則有利生存，都係寄生蟲最愛嘅棲息環境，經濟有成嘅韓國絕對唔係世界上最多寄生蟲嘅國度。唯有社會文化一直演進，共同體想像一直更新，各地寄生蟲數量至會得以改變，故此，要世界變得更加健康，首要就係盡力感化呢啲缺乏人性嘅生物，而若然感化不果，就唯有狠心懲教，嚴厲整治。資本主義人類文明受到拖累，大幅倒退，係全人類嘅浩劫，電影之人文關懷，因普世皆同而獲得嘉許，合情合理。面對人形寄生蟲威脅，所有人都有責任挺身對抗，捍衛自由，《寄生蟲》出現於如此年代，可謂時代精神之體現，號召戰鬥之呼聲，不可多得。

gnimmm.com/2019/10/10/parasite/

有兩個人想坐關愛座，一個係20歲嘅後生仔，一個係75歲長者。後生仔坐咗落去先，跟住俾人喪批鬥喪影相。

冇錯，表面上後生仔應該讓長者坐。但原來長者日日行山，身壯力健仲健康過啲後生。而後生仔啱啱做完腸手術，身體仲係好虛弱好辛苦，真係好需要坐低。

只是舉個例子而已。凡事，又點可能淨係睇表面？

雖然我成日講，傷殘真係好慘，唔開心想去自殺都唔得，但傷殘人士呢個身份，某程度令我哋比正常人佔優，亦係不能否認的事實。

我一直都話，正常人入到港大係好叻，不過我唔同㗎，我入到港大係特別叻的！點解？咁唔係因為我真係叻過其他港大學生，而係因為「我咁樣都入到港大」。你唔信唔緊要，但事實就係，隔離屋陳師奶個仔入港大真係乖仔又叻仔，至於我入港大呢，係會自動昇華去另一個層次，會俾人覺得係個勵志故事，是好應該上報紙接受訪問發放正能量的！

唔好同我講你唔會咁諗呀，我唔信㗎！咁諗唔係錯，係人性嚟，我亦唔係起晒鋼想批鬥啲正常人。我只係想指出，其實殘疾人真係唔好認為自己永遠都係弱勢，相反，喺好多時候呢，殘疾人，或者所謂「有需要的人」，是好着數的--雖然如果你俾我揀，我都係寧願做個付出多啲嘅正常人。

我見到網上有人話，殘疾人是自帶光環的，無論發生乜嘢事，只要一搬殘障出嚟，正常人都要立即收皮。例如係幾年前上晒報紙的殘疾大學生，有同學話覺得佢唔適合做groupmate，因為其實佢俾唔到有用嘅idea出嚟，諗嘢又慢。不過最後呢，佢哋都係一齊咗--如果你唔同個同學一組，個同學就會話你係歧視緊佢，教授就會認為係你錯。

我係同意㗎，現實情況的而且確可以係咁：你唔同我一組，因為覺得我哋根本唔夾，我仲要係freerider嚟。不過因為我本身係殘疾，所以我寫個email俾professor，然後你就變成歧視我的衰人了--嗱，你望吓我，係幾咁排除萬難刻苦耐勞先入到港大？我考DSE實係晚晚挑燈夜讀不停加時狂做pastpaper㗎啦，有乜可能會freeride先？殘疾人肯定是好人來的。

親，我都曾經以為天下的正常人都係仆街，十個有九個都歧視我哋、僱主一定係戴有色眼鏡睇人的。直到我親身去見工同返工，先發現少年我實在太年輕了。話說我最近又想搵工，因為sem 2時間表出咗，睇個勢都是返唔到兩日full day，窮L必須搵多份工才能夠維持生計。但問題來了，搵工的話我要就時間地點工作性質，唔止就我自己，仲要就埋阿媽。其實我都想利用吓so-called大學生的優勢去搵啲時薪過百嘅工作的，只係我確實無辦法控制到上堂秩序，啲細路唔衝埋嚟撞死我已偷笑，再加上我不可能企同行成粒鐘去教小朋友做功課，所以都唯有睇住細佬返一個鐘等於我做兩至三個鐘。見UNICEF呢份工嗰陣，我問得好清楚「係咪真係唔使搬嘢」，做落我先發覺，即使係做paper work都唔知點解可以剩落幾斤要回收要掉的廢紙。同事們都對我好好，擺個紙箱係我隔離，叫我掉啲廢紙入去，佢哋就再拎去回收；有時有一大堆文件要碎，佢哋都會幫我拎啲過去，話碎完先再叫佢哋--但我當然不會使到人哋咁盡，通常都係自己逐少逐少拎去碎，走多幾轉，賺吓啲親力親為覺得自己好叻叻豬嘅成功感都幾開心㗎。

就連腦細有時拎一大棟文件過嚟要我幫手check，喂大佬成棟嘢我真係搬唔返去俾你，咁無㗎，咪打個電話同腦細講「我做完喇」，等佢自己過嚟我位度搬返棟嘢走囉。腦細佢都好明白事理嘅，一齊出去食飯仲主動成程幫我攞袋，我淆底話自己拎得喇佢都堅持唔俾返個袋我--我問你喇，如果當初見工嗰陣，腦細預視到入職之後係要搬吓呢啲濕碎嘢而喺明知我做唔到又唔想加重自己及其他同事嘅工作量嘅前提下決定唔請我，算唔算係「歧視」我嘅殘疾呢？

再舉多個例子，暑假嗰陣我馬不停蹄去見工，因為驚無人請吖嘛，就乜嘢都去見。其中有一份係做接待，要招呼學生同家長嗰啲。我有事先講明自己係行動不便，但佢都叫我照去。去到見到仲有幾個正常人同我爭，其實自己都打定輸數㗎喇。雖然把口就緊係話我係行得樣衰啲姐其他嘢都應付到，但當人哋問我電話響同細路急尿要帶去廁所你會做咗邊樣先，我諗都唔諗就答聽電話。我堆砌咗個理由嚟解釋點解係打電話先，無如實講我帶唔到小朋友去廁所。最後人哋當然無請我，而呢件事令我反思嘅係：殘疾人搵工真係好L難，但咁係基於自身能力嘅限制，而唔係我道聽途說嘅「人哋走嚟歧視我」。

即係咁，我相信佢唔請我，除咗係因為我見工嗰陣表現唔好之外，我身體嘅問題都的確係原因之一。咁算唔算係歧視呢？對我嚟講唔係。好老實講，咁份工就係要行行企企招呼人，你見到我行成咁，再加上當時有其他能力比我強嘅正常人喺度，你請佢唔請我，完全係好合理的。當然我可以話，我行得慢啲姐，扶住周圍一樣帶到小朋友去廁所，你唔應該因為我隻腳咁就唔請我云云。唔好忘記殘疾人係出嚟見工，我好好彩遇到好上司好同事，凡親要拎嘢已主動會幫手，但呢樣嘢唔係必然㗎，無人有義務體恤你嘅傷殘。尤其喺商業社會，而加人哋係請緊人，唔係開善堂，當然係以賺錢、以請到最幫到手的員工為先--雖然如果世上多幾個願意提供額外協助的僱主，我哋會易生存好多。

好似我上面咁講，我都好想去apply一啲教人做功課之類嘅工，特別係教SEN嗰啲，真係可以去到$200一個鐘的。我曾經以為智力正常係萬能，講學歷的話，我唔會係最差嗰堆。但現實就係，教人唔止要用腦，仲要用手腳，你要handle到班失控的細路，淨係得個腦係無用㗎。所以我一直無真係去apply，因為我覺得要請的話，人哋都請咗正常人先啦。人大咗，我慢慢發覺世上真係無咁多歧視，正如我識咗班正常嘅朋友，人哋一齊去旅行去玩但無預根本照顧唔到自己嘅我，咁難道又係歧視？無錯，朋友係可以照顧埋我，落手落腳幫我沖涼換衫，都係無問題的。但幫係人情，唔幫係道理，呢啲嘢從來都不是老奉㗎。又有幾多人諗過，點解你哋會覺得健全嘅人一定要幫殘疾人？點解因為你係殘障我就奉旨要同你一組、同你做朋友，否則就係無知冷血涼薄刻毒？點解傷殘就一定要求人哋幫自己？點解殘障好似大L晒，喺地鐵度撥開一個隻腳會踢到人嘅自閉小朋友都係錯--我阿媽或者同我出街的朋友都會咁撥開同埋擋住有機會整到我嘅人，但不是打，會講唔好意思的--點解只有弱者有資格保護自己，健全人反擊就係歧視兼法西斯？點解要設立關愛座去令殘疾人士優先，卻間接限制咗正常人使用嘅權利？唔通啱啱落街嘅我真係會攰過一個企咗十個鐘嘅sales？點解一搬傷殘出嚟就會得到支持，即使野蠻都變得合理？我唔明，我真係唔明。

社會一定會存在歧視，無可否認傷殘確實係弱勢，但對我嚟講，歧視係明明你知道我有能力勝任呢份工作，甚至比正常人做得更好，卻因為見到我嘅殘障而決定唔請我；歧視係明知我可以同你哋一齊去商場食飯，卻因為驚同我一齊行出街會俾人笑而唔預埋我。有錢人係可以做善事，但凡事都有個譜，你無可能叫佢哋捐晒成副身家出嚟，幫啲有需要嘅人；唔係只有窮人啲錢先充滿血汗，有錢人嘅金錢，都係一手一腳賺返嚟㗎。

我無特別清高，殘疾人有嘅福利，例如傷殘金同$2搭車優惠，我都一樣照拎緊用緊。就連去迪士尼，我都會拎傷殘證去換張卡，玩所有機動遊戲都唔使排隊。我想講嘅係，殘疾真係慘㗎，但都唔好恃住自己慘而橫行，唔好因為自己喺某啲事情上比唔上健全人，就認為全世界都要遷就你，更甚係用殘疾嚟開脫自己所犯嘅錯，一般人係未必要因為一個人嘅特殊需要而去忍讓佢的--社會係好好，見我哋慘，已經俾咗我哋一啲額外嘅好處：正常人會好慷慨咁對我哋投以讚賞，話我哋係學習榜樣，如果唔係都唔會有咁多勵志故事啦！SEN喺大學入面，攞獎學金都容易啲㗎！我唔係叫你歌頌殘疾，殘疾係仆街㗎喇，不過都要知道，去迪士尼之所以唔使排隊，係因為健全人體諒我哋、想我哋唔會因為無辦法等得太耐，而失去玩嘅權利，但正因為咁，我每個機動遊戲，都只會玩一次。要記住正常人都係人，同樣要留返啲資源同空間俾佢哋去使用。講到底，要消除歧視，達至真正的「傷健共融」，最好嘅唔係高呼要別人包容，而係盡量做好自己，不要過份強調自己嘅障礙，嘗試去融入呢個社會，喺有能力嘅時候，都主動分擔吓正常人嘅工作。

當你尊重健全人應有嘅權利，我發現其實佢哋好自然會接納你成為其中一份子，更加唔會介意分多啲資源俾你，佢哋真係會欣賞你嘅努力同明白背後嘅得來不易。