【龔成問答信箱】（Q21821-Q21840）

Q21821：

hi，龔sir,一直都有留意開你嘅Facebook ,本人30歲，都有買開股票有好幾年，都成日比老婆笑係燈神，買襯啲股票都跌，但放曬就會升⋯

就好似金蝶國際，吉利汽車，碧桂園服務，移卡⋯哩啲，買入時其實都係低位、但經唔起考驗，好早就會放曬⋯想請教一下，應該要點樣調整好心態

仲想問下百富環球同微萌點睇，百富環球5蚊時買入，但跌到4.7時同樣放左～

龔成老師︰

如果你每次投資都是「輸」，即係你存在一些核心性問題。譬如一些錯誤的投資觀念。

記住，正確和正常，是完全不同的事，多人採用，並不代表係正確的方法。

首先﹐股票是企業﹐你要分析企業的本質去投資股票。買股票也不是「賺差價」，而是享受企業成長以及產生的股息。

現你的情況，買入股票唔係無質素。但你錯用短線投資，賺差價的思維去諗這件事。令你可能一見佢跌，你就以為有問題，即沽貨，才做成你過去出現的情況。

往後，你只要以「長線地，投資優質股」，作為你投資策略。

緊記，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

而且將來再投資前，要先做好估值。價格偏貴，就唔入貨。等佢回到合理，甚至平宜區，才分注吸納，或者利用月供去儲貨。

我好有信心，你會結束過往一直虧損的狀況。

百富環球（0327）係一家電子支付終端機解決方案供應商，主要在中國從事開發及銷售相關產品並提供相關服務。

佢產品及服務包括移動終端機、消費者操作設備、非接觸式讀卡設備及提供售後服務等。佢的客戶大致可分為收單機構（如支付交易處理商及金融機構）及商戶服務供應商。

質素都有的，但未算好強，同時業務與股價都有點波動。現價合理區上部，這股係有長線投資價值，但又未算好值得持有太多。如果小注長線可以的。

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平，所以，如果投資，這刻小注好了。

------------------------------------------------

Q21822：

你好龔Sir! 我係啱啱上完股票初階班嘅學生嚟，有野上向你請教一下。

福壽園(1448)，喺堂上龔Sir你話呢隻係水桶1。 我好簡單咁睇返佢嘅市盈率，我以佢最近7年(計埋2021)嘅市盈率揾返佢嘅中間3年
27.4 27.44 28.06

之後我再搵近平均5年每股盈利係$0.2226(人民幣), 即係$0.27(港幣)。

咁佢嘅合理股價就係
$0.27x27.4 - $0.27x28.06
=$7.4 - $7.6

而現時嘅股價係$7.4。咁我可唔可以推論現時喺合理區嘅低位?

同時我根據篩選三步法分析，第一二步都冇問題，但去到第三步，我想揾佢嘅同行比較時，又唔太揾到真係同福壽園類近嘅企業，咁嘅話我上面嘅推論會唔會唔穩陣? 定係我會睇漏左其他因素?

謝謝你

龔成老師︰

你用佢近7年市盈率，再取中間3年，和用每股盈利5年平均，係可以。

但取出相關數據之後，你要都睇翻，到底這些數據，係唔係足以反映現時企業和行業發展的真實狀況。

你見集團盈利持續都有唔錯增長，故用5年平均每股盈利時，應該再加上5年的年均增長率(約16%)去做指標。(即大約HKD0.37)

另外，由於近年中國政府，對行業有不少新指引，主要方向都係控制價值，避免殯儀業相關產品和服務，出現定價過高情況。相信未來，殯儀業盈利會回到較合理水平。

因此，你計出來的個市盈率，需要打折扣，來反映這些因素，你預大約合理市盈率係15-20倍。

合理價值︰HKD5.5 - 7.4，故現價算係合理區頂部，無貨可先小注。

殯儀業本身好分散，而福壽園係當中龍頭，故真的較難找到相近對手作比較。因此，你係做分析時，應較集中在企業本身和整個行業發展。

最後，係計出合理價值後，你要留意佢是否相距多於20%。

若好似你計出的答案$7.4-7.6，區間太窄，我地就要將合理價值上下限，再額外加多10%緩衝區，令佢更能反映合理區情況。

------------------------------------------------

Q21823：

龔先生你好!我是最近才開始接觸 貴專頁，也報了基礎班，很欣賞你對投資和教學的熱誠，也明白了為什麼你這樣成功！

單親媽媽 兩子就讀小學，每月支出$27000，沒有工作 要照顧兩子

賣樓後現存270萬，希望以投資作被動收入，請問哪種形式或組合較適合我？

謝謝解答

龔成老師︰

這筆錢點樣用，要視乎你實際生活狀況而定，當中考慮重點，係住屋和就業問題。

首先，如果你長線住屋無問題的話，這資金可以用增值。若你有再買自住屋的需要﹐而又要短期內進行，就要先扣起相關支出。

另外，你現時無工作，若只係短期，你可以預留一筆生活費，之後餘下部份，就可以投資「平穏增長股」 + 「潛力股」作增值。

若你預期會較長時間，都無法工作，或者只能有限度咁工作。你就可以考慮，將部份資金，買入「收息股」，去創造現金流(即係股息)，以舒緩日常開支的壓力。

但由於投資係一個長線計劃，我建議唔好急住行動。等你上完堂，有一個完整概念，才去進行會較好。
股票班見!

------------------------------------------------

Q21824：

老師，想問下653，見佢主席換左人，舊既大股東持股量都賣得7788，新人事新作風，股價可否睇好?

另外，請問點睇2148，可否長期持有?
謝謝

龔成老師︰

卓悅控股（0653）自更換主席後，加強了集團在電商方面發展，但長線有無成效，還有待觀察。

若用以往集團表現，只算是一般般。集團在過往的經營環境都唔算好好賺，經常出現虧損，近期面對疫情，情況更弱。

相信佢疫情過後會好翻D，但根據過往表現來分析，長遠的投資價值唔算高。

VESYNC（2148）有少少潛力的。

佢係美國小家電線上市場的市場參與者。根據報告，在小家電零售商中，佢係美國就通過亞馬遜產生的零售額而言排名第三及通過所有線上渠道產生的零售額而言排名第五。

係美國通過亞馬遜產生的零售額而言，其空氣淨化器於其類別中排名第一，空氣炸鍋於其類別中排名第二。

佢業務主要專注於線上營銷及銷售品牌下的自主設計開發的小家電及智能家居設備。主要通過電子商務交易市場，主要為美國最大的電子商務交易市場亞馬遜銷售其下的產品。

佢的產品主要銷往美國、加拿大、英國、德國、法國、西班牙、意大利及日本等數個國家的用戶。

業務不算差，發展有潛力，但企業規模始終較細，業務未穩定，加上現價略貴。整體都有風險。

這類股，小注投資都可以，但就要明白當中的風險。

------------------------------------------------

Q21825：

想向龔成老師發問：本人47歲，月入4萬。 與伴侶共同擁有一自住物業（樓按還有$4百萬）。互相財政獨立，對分日常開支包括供樓。

現在我每月花費$2萬（即日常開支包括供樓）和堅持貯蓄$2萬。

持有1,000股00016 和 3,000股00175, 現金流$50萬。

雖然工作穩定，但相信沒有打不破的飯碗。懇求龔老師的意見，我該如何策劃財務和投資以致可以盡快財務自由。 謝謝。

龔成老師︰

你現時已有自住屋，係財富組合上，物業類佔比重很高。所以，我地新資金應先投入優質股，令成個財富組合變得更平衡。

以你47歲，都有一定增值需要，你可以選擇一些「平穩增值股」+「潛力股」作投資目標。

我地投資前，先要做好防守部份，建議你先扣起12萬(即半年開支)作應急錢，才開始投資計劃，會較穏妥。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$10000)，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注(<2成)。此期間，你最好是努力提高投資知識，才慢慢增加翻潛力股比例(最多3-4成)。

另外，你現時組合中，新地(0016)佔比重好高，個別企業和行業不要佔組合15%和30%以上，否則會有過度集中性風險。

但你不用沽出，用新資金慢慢調整個比例就可以，但暫時不要再投資地產相關股票，去平衡風險。

現時大市只是合理區，你可以用多5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21826：

龔sir,早晨，請問京東sw有10萬蟹貨平均315蚊 先平價。 京東物流已上市，係咪如果阿媽京東sw算係高位，分拆業務，阿媽就會跌返最少50蚊出黎?

2～3年都返唔到300蚊？

另外，我排左你d書成幾個月（哈哈）

龔成老師︰

你這個計法不正確，其實分析上市，只係集團將部份業務上市去集資，從而得到發展資金之餘，又可以釋放內在價格。

就算京東物流（2618）上市，其價值依然存在係京東(9816)之內，因此唔會因為分拆上市，而出現你所講的情況。

另外，你要明白，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

京東（9618）業務有質素，發展仍是正面，不過現價就唔算平，算合理區上部。

至於幾時會上翻$300，我預計唔到。但此股有投資價值，長遠要回到$300，相信問題不大。

只要佢現時佔你組合，唔係好多，你照長線持有就可以。

至於書本，圖書館的確好多人在排。如果你有需要，建議你去買。因為用來做記號，抄筆記都會較方便。

------------------------------------------------

Q21827：

老師...你好! 本人39歲，有兩個小朋友，與先生月入8萬，現租住公司提供的房屋，持有三個物業，收租足夠供款，其中兩個十幾年前購入，

因為呎數太細(under300呎實用) 現在放賣中， 想用兩間細樓換一間大樓(700呎，千一萬，30年的二手港島樓地鐵上蓋，需借300萬)繼續收租，for 15~20年後退休一家人住，

如果換樓需付印花35萬，值得嗎？定等退休先換樓呢？ 層樓到時已經五十幾年樓齡，對於樓齡太大有問題嗎？

現金100萬，有少量股票，但懂選股，蝕過三十多萬，所以敢買多，麻煩老師比d意見我，感謝老師。

3033 $8.2 8400股
914 $47.1 1000股
3918 $9.28 2000股

龔成老師︰

由於你現有2個細單位，呎數太少，連一個基本家庭需要的大小，都未達到。長線投資價值較弱，建議你找機會將佢換其他較大單位，唔好到退休先去換。

地鐵上蓋樓盤，始終有一定潛力，但由於已有30年樓齡，你要睇翻佢幾時會做樓宇大維修，因為這個是其中一個較潛在成本。

到你入住時，都已經50年樓齡。就算保養得再好架樓，相信都會出現老化，你要預備一定維修預算，係你退休入住時，甚至之前就要動用。

除左以上2點，你還要了解佢現時租金回報率，和長線增長潛力(如附近未來發展、交通配套等)。如果這幾個因素都過到關，那就值得你多花35萬印花稅去投資。

當然，若你退休時真係太殘舊，你都可以用佢去換另一間較新的自住樓，但相信當中會有一定差價。

因此，你現時可以利用優質股去增值，為退休所需資金，和潛在可能換樓的成本，作準備。令自己到退休時候，有較多本錢在手，令可選擇的方法也會較多。

至於財富增值方面，你現時組合太偏重物業類，令成個組合十分不平衡。因此，你新資金要優先放入股市，去調整翻個財富組合比重，咁會較好。

我地開始新投資前，最好先要找出你過往虧損原因，以免再出現不利情況。

你現時持有股票，都係有質素和適合你。我估計都有一定選股能力，大致能判斷企業好壞。但你都蝕過30萬，若不是選股出問題，較大機會係未能定平貴，或者用左短炒模式去投資。

記住，我地投資股票，就等同投資一間企業。就算再好的企業，都要時間成長，故必須長線持有。中間可能有些波動，但只要佢長線質素無變，照持有就可以，唔好太在意中短期波動。

若你對定平貴，無乜信心，又或者經常比大市氣氛影響，見多人買就衝入市。我建議你用月供模式去儲股票，會較安全。

以你39歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

潛力股：安碩恒生科技（3067）、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814），但就要明白波動性比上述會高左，同時風險大左，你要自己平衡。

大市現處於合理水平，那100萬資金，你可以先用20-30萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q21828：

龔成老師，你好，我今年33歲，月入2.5萬，另有物業收租1萬 (已供滿，未來婚後會收回來住)，每月平均支出1.5萬。

現有現金 $60萬，現開始進行月供股票：

#2800 - $5000
#823 - $2000
#1398 - $1500
#270 - $1500
#3067 - 每個月買1-2手

目標: 穩定收息，提早退休 (或為興趣返工)

屋企人已經失業2年(現63)，再過2年可以拎出強積金 約$60萬，現在考慮有什麼方案可以令到佢每月有穩定收入($2500-$3500)：

1, 購買保險公司的每月派息基金;
2, 幫佢買高息股 (5-6%)如 #778, #941, #3988;
3, 未諗到

老師，想請問我屋企人的情況可以有什麼更好的選擇，希望可以給我意見。

龔成老師︰

先講你本人部份，我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」的組合。

現在時大市只在合理區，你每月儲蓄不要盡用，建議先用5成儲蓄做月供，其餘先儲起，用一邊月供一邊儲蓄的策略。

你現時月供股票都合適，但有少少保守。建議你可以增大潛力股部份，以你年紀計，可以佔5成。但若你投資經驗較淺，或者相保守d，就要向下調整。

另外，工行(1398)只係收息股，增長力好一般，唔建議你用來月供。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定資產，你就可以慢慢換成收息資產，透過其現金流，達至財務自由。

至於你家人部份，由於佢地已好近退休之年，投資目標會同你不一樣。以佢地人生階段，應集中係收息資產類，去創造現金流，來支援退休生活上的支出。

你所講的派息基金(我建議考慮用3110)，和高息股都係可以。

如果你家人希望每月有$3000現金流，以股息率6%計，需要本金60萬。

因此，你可以建立一個「收息股」的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金(3110)都可以。

如果你家人能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

(你可睇下我本《50穩健收息股》當中仲有好多)

但要留意，現時股價只是合理，未到平宜，因此買入時宜分注，同時不能用盡現金。要留有部份，等大跌市才入貨。

------------------------------------------------

Q21829：

龔老師你好，本人30歲全職主婦，老公今年41，月賺3萬，一個月大約草到6000左右，有兩個小朋友，冇物業冇供樓。

資產如下：

黃金暫存5粒一兩重
港股有大約12萬，
2手匯豐005「44$，打算收息」
1手小米「24.5」
1手中國人壽「16.08」（打算18$離場）
1手868信義玻璃「高價26.9」

流動現金有5萬，外幣有4萬「留著旅行用」

想問一問868今年可以一直長持嗎？定要止賺離場？今日由31.3跌到30.4，未來兩日派息！所以好困擾！如果止賺離場又應該轉碼邊啲岩我？

因為暫時不考慮加錢到股票帳號，其他現金先留，股市下跌先入市

龔成老師︰

以你30歲計，應以增值為主。匯控(0005)只是收息股，增長力好弱，唔適合你這個年紀。你可以減持部份或全部，轉至其他增長股，對你較有利。

中國人壽(2628)近年增長力弱左，質素只係中等。你可持有，但唔好再加注。若相換碼，都係可以。

至於小米(1810)和信義玻璃(0868)有質素，都適合你長線持有。

你要記住，當一隻股票股價下跌，你一定要了解當中原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

信義玻璃（0868）近年的增長力弱左，不過，佢在技術上的行業優勢仍在，相信長遠仍是正面，不過就未必是高增長的類別，潛力度比過往略有減少。

加上佢不斷將較高增長的業務分柝左上市，令現時的信義玻璃增加，只是平穩類。你預佢中短期會比較波動，要長期先見到收成，現貨照持有就可以。

而黃金無現金流，我地持有佢，主要係為左對沖金融市場的突發性事件。因此，唔需要太多，大約佔組合3%就可以，而且以實金持有最好。

現時大市只在合理區，資金不宜盡用。你5萬可以留待大跌市才出手，咁會較好。

但同時間，你可以用每月儲蓄，進行月供股票。每月先用$3000月供，其餘儲起，同樣等大跌市機會。

現時你們資金較少，可以先集中係優質股，來進行增值。但長線計，當你累積到一定財富，就要慢慢加入物業類，成個財富組合才算平衡。

------------------------------------------------

Q21830：

阿sir 關於第七課的年報問題，想問這個新的租貸會計制度好像有點兒扭曲左真正公司實際情況，當我們分析企業的情況又要不計才有真正的意義，那為什麼需要有這個新的會計準則？有什麼好處？謝謝你！

這個會計數字對企業的情況有什麼implications?

龔成老師：

這是一個新的會計準則，全香港都會用，能夠反映企業「租金」的風險，因為過往不當負債，現時已變成負債，就能更有效反映風險。

但對於零售企業，我地過往分析的指標，同現時最新指標，就會有所不同，所以我地在一些量度佢是否合格的財務指標時，最好有合理化的調整。

------------------------------------------------

Q21831：

Hello龔Sir！很高興認識你，我是你股票班學生，剛上完你最後第八堂，無論在心態、理念、技巧、智識都增進不少

在此再次衷心感激你的無私教咗我好多嘢，希望將來你能在財務自由路上更上一層樓和更加Succeed！

還有在你課堂及FB帖文上的教學, 令我清晰了解選股策略和重要性！

龔成老師︰

多謝讚賞！

我只是盡力，將我所學、所研究，投資及成功的方法、技巧、心得、經驗，教大家，這些方法好多成功人士都做過，我只是用翻這方法，並教翻大家。

你要保持進步，多溫書，多用評估表，加油！

------------------------------------------------

Q21832：

你好，想向你請教本人的投資問題。你好！本人仲有6年便退休，月入$3.5萬，每月約有$13000作儲蓄，希望在2年後可以資產增值至100萬，現時持貨如下：

1177 @8 / 4000sh
762 @4.82 / 6000sh
1972 @17.7 / 400sh
1810 @30.58 / 200sh

6060 @41.03 / 200sh
788 @1.37 / 4000sh
9988 @239.27 / 200sh
883 @8.56 / 3000sh

2382 @149 / 400sh
939 @6.79 / 1000sh
282 @0.192 / 30000sh
6993 @10.793 / 3000sh

提問1: 每月堅持儲蓄$13000，可否達至2年后資產$100萬？（連同現有現金約$15萬）

提問2: 上述持股配置是否合適？須刪減部份/增持其他呢？

提問3: 上述那些持股係水涌1、2、3？

多謝你不段為網民解答疑問，祝身體健康。

每年額外花紅約5萬

龔成老師︰

1) 假設你投資一些較有增長力股票，年均投資回報有10%（連股息再投資），你每月投資$13000 + 40萬現有資產(25萬股票和15萬現金)，2年後大約會增值至80萬。

但由於2年係一個好短時間，好易出現波動，令最終回報不確定性好高。而且，你都接近退休之年，我唔建議作太高風險投資。

以你年紀，只宜進行較保守的增值。

2) 你現時持有不少潛力股(1177, 1810, 6060, 0788, 9988, 2382, 6993)，佢地增長潛力高，但風險都好大。

由於你接近退休，應該要開始減持這類股票，換至較平穏的「平穩增值股」和「收息股」。

還要隨著年齡增加，慢慢將收息股的比例提升。到退休時，你收息股比例，應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

壹傳媒(0282)近期股價較波動，長線投資價值不算高，建議你換至其他股票較好。

中石油(0883)只係商品類股票，佢價值自主能力好低，投資價值只係中等，唔建議持有太多。

其餘持股，都係有質素。

3) 水桶1︰1177, 1810, 6060, 0788, 9988, 2382, 6993
水桶2︰0762, 1972, 0883
水桶3︰0939

你現在要做，就是將「潛力股」，慢慢換至「平穩增值股」和「收息股」。至於現有資金，就等大跌市才動用。

另外，每月$13000的儲蓄用一半去月供「平穩增值股」和「收息股」，另一半儲起，同樣等大跌市機會。

若你想增長力大少少，可以較集中「平穩增值股」。但緊記要慢慢將比重，轉去「收息股」部份。

雖然這樣做，不能達至你2年100萬的目標。但由於你快將退休，唔建議你太冒險。因為若你此時投資失利，你無足夠時間去再追回這筆資金，風險很高。

所以，我建議你考慮我上述策略，相信會對你較好。

------------------------------------------------

Q21833：

龔成老師，想請教你的理財意見。本人今年44歲,已婚,無細路, 兩公婆冢入大約$55K,自置物業完供, 一向由家人代為儲蓄, 近年開始自學一下,想為兩公婆退休作準確

本身自己都有些年金儲蓄(已完供,等多10年收$),手頭亦有些股票(樣樣有D), 但股票蝕多過賺(因個性心急,次次一買就跌,有點心灰)

現有現金:30萬左右
現有股票
買入價

已持有2年
0002 - 500股 70.7
0005 - 400股 72.5
0012 - 1000股 40.5
0939 - 1000股 6.5

近期亂入 (多數1-2手)
00992 - 2000股 9.89
1208 - 4000股 4.64
02158 -200股 47.95
01398 - 2000股 4.99
00762 -2000股 4.37
00384 - 400股 28.9

剛入
02618 -100股 45.9
01177 - 2000股 8.65

唉!感覺自己在股票方面是盲頭烏蠅, 想重新建立一個老師講的長期「財富組合」，所以希望老師俾D意見

1. 想問問需要沽出現時股票?

2. 月供股票是否適合我? 大約月供多少(本身預$2-3K)? 那些股會比較適合我?

謝謝你的指導。

龔成老師︰

如果你過往經常出現虧損，反映你有一此核心投資問題，建議你增加知識。同時，你最好用月供優質股的模式進行，相信會較為適合你的。

1) 五礦資源（1208）主要從事有色金屬經銷、製造及鋁、銅製品分銷。

過往有多年出現虧損，企業投資的價值不高，加上股價十分波動，炒作多過實際。這股不建議長線。

2) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你44歲，應以增值為主，建議你用「平穏增長股」 + 「潛力股」作組合，並以「平穏增長股」為主力。

你現時持有股票(除了1208)，都適合你。唔好太在意中短期波動，你要清楚這些股票質素所在。就算出現下跌，只要佢長線質素係無變，你照持有就可以。

月供方面，你可以每月先用5成儲蓄，其餘先儲起，用一邊月供一邊儲蓄的策略。

以你家庭每月入息55K計，月供只有3K係太少。由於你已有物業類資產，建議你每月閒錢，都用來月供增值，咁會較好。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

由於你投資知識不高，因此可較集中在平穩增長類股，至於潛力股，只宜小小注(不多於2成)。最好是你先提高投資知識，等到你有一定知識和經驗，才慢慢增加潛力股比例(大約4成)。

現時大市只是合理區，你現有30萬資金可以多用5-10萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q21834：

龔老師你好，本人今年52歲，想請教我現除了持有現金30萬。 每月可儲八千元。 計劃8年後退休。

還有以下股票數量

#763( 中興通訊)
7000股 21.5買入
4000股 20.3買入

#175(吉利汽車)
2000股 22.55買入

1. 請問我應否繼續持有或 止蝕？

2. 請問問怎樣可以將現有的現金價值8年內增加兩倍?

3. 請問你我的股票組合應該怎樣安排？

求指點

龔成老師︰

1) 我地是否持有一隻企業，主要係睇佢長線質素，唔好太著眼係「買入價」，佢純粹係一個心理因素。

除非你發現佢長線質素轉壞左，否則係唔需要賣出。

吉利(0175)有質素和潛力，此股可持有。

中興通訊（0763）從基本面分析，這股不差的，我亦相信5G的發展，會對佢長遠有正面影響，因此長遠不會太差。

佢本身係中國高科技通信設備主導供應商之一，通過提供客戶化的產品及解決方案，目前主要服務於中國及其他發展迅速的新興市場。

佢主要同中國電信、中國網通、中國聯通和中國移動等中國主導的電信運營商建立了長期穩定的合作關係。這部分是較穩定的。同時，佢亦向全球多個國家銷售產品，但之前同美國果邊，因政治問題而有影響。

不過，政治等因素令佢股價大上大落，從生意分析，長期仍會有發展的，只是有潛在的政治風險，這點不能忽視，而這個風險好難分析及預測。此股可長線，但不宜佔組合比重太高。

記住，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

因此﹐我建議你每有反彈，就慢慢分段沽出部份中興通訊（0763），換碼至其他優質股，咁會較理想。

2) 你要8年做到2倍增長，需要每年平均升幅達15%，才可以做到。

要達至這個升幅，你必須要投資一些增長力較高，但同時風險較大的股票，才有機會做到。

由於你只有8年就退休，不宜承受這樣高的風險。因為投資這類股票成功時，回報當然可觀。但不理想的時候，你損失都會較嚴重，你要明白這個風險。

我會建議你，最好集中係「平穏增長股」。這類股票升值能力雖然不算好高，但勝在有平穏增值效果，波動性無咁大，較適合你這個年紀的人士。

到你接近退休的年齡，應該開始投資一些收息類工具，例如收息股，以平衡組合，同時減少風險，到退休時，就宜將較大比例，持有收息類資產，減少平穩增長股比例。

3) 你52歲，可以用「平穏增長股」作組合。現在你每月先用5成儲蓄，即$4000做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、希慎(0014)、太古地產(1972)

至於持有30萬和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21835：

龔成老師你好，現時我28歲已每月月供股票$5000大約有2年，但係理財方面仲係好生疏，所以想請教你的意見。目標想係之後的2-3年內儲到70萬左右，並為將來可以有財富滾存同時達到財富自由。

現金:10萬左右,月入20K

手持:
100股(00823)領展
800股(00005)滙豐

現時月供組合：
$1500（02800）盈富
$1500（00066）港鐵
$2000（00388）港交所

1.月供股票有無邊隻股需要賣出?

2.如果要達到目標是是否需要更變投資組合方向?如果需要增加， 哪些股可以?

3.想請問(00945),(00001),(01810),(00012)現價是否合理,是否可以分注買入, 還是適合月供?

4.基金投資是否適合我?

謝謝！

龔成老師︰

1) 當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲計，應先做好增直部份。你現時月供股票和資金分配，係合適的。

但現時大市只在合理區，最好每月的資金不要用盡。要留有部份，等大跌市出現時，可用來掃貨。

另外，我建議你將$2000，加到盈富（2800），因為盈富本身是一個50隻股票的組合，就算資金多一點都無問題，可以令你的組合更為平衡。

2) 以大市過去年平均回報10%計（連股息再投資），你每月投資$5000再加上你現有10萬資金和持股，5年後(已計算已供的2年)大約會增值至52萬。

如果要達至你的財務目標，你可以增加投資年期，例如去到7年，就會滾存到$75萬，較接近你的目標。

或者，你可以選擇現時將月供金額，加大至$9000，都是一個方法。

又或者，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

3) 這4隻都適合月供，現價月供係無問題。

但若要直接入貨，小米(1810)現價偏貴，要回多1,2成，才開始算合理區頂。其餘3隻，現價合理，可以分注入貨。

4) 要視乎基金投資目標、質素等去考慮。以你年紀，盈富基金(2800)、安碩恒生科技（3067）這類有質素和增長力的ETF基金，就會適合你。

------------------------------------------------

Q21836：

龔老師，我大約兩年前開始拜讀你的文章，資產在這兩年大跌巿間，幸有聽從你的建議，不但沒有少了，還喜見增長，多謝你。現想請教你，我可以如何改善我的資產配置，早日達到第一個一百萬，

從而步向財務自由呢？

我現時36歲，文職公務員，月入4萬5左右，持有現金＄26000。另持有保險現金價值約有＄63500, 當中有50萬人壽，100萬意外和116萬危疾保障。

MPF現有約27萬7千，過多一年半就過probation, 屆時僱主供款會增至15％。

現時每月債務還款約＄12000, 2022年12月還完；交租及雜費＄15000；孝敬爹娘＄9500。

現時持股如下：
4手 3072 買入平均價＄162.4
2手 3187 買入平均價＄21.4
16單位(碎股 ) 0066 買入平均價$41.279
2手 0303 買入平均價$47.35
2手 0388 買入平均價$445.1
1手 1373 買入價$2.5

我對新上巿的2814有興趣，應否用來取代3072？還是可以同步進行？

謝謝賜教

龔成老師︰

首先，若你現時債務，貸款利息係較高。最好係開始投資前，先作清還，因為佢會拖低你長線回報。

以你36歲年紀，應先做好財富增值部份。

ETF三星亞太高息房地產信託(3187)和偉易達(0303)主要係收息，增長力唔高，唔建議持有太多。

其餘股票都有質素，你照持有就可以。

三星FANG ETF（2814）的投資目標，係追蹤NYSE FANG+指數的表現。是一個美股潛力股基金。

而日興環球聯網(3072)投資目標是尋求提供在扣除費用及開支前與iEdge-Factset Global Internet Index (“指數”)的表現緊密相關的投資回報。

當中包括不少環球有潛力企業，例如阿里巴巴、FACEBOOK、AMAZON、百度等。

相對之下，3072會較全球性，而2814會集中在美股。2隻都有增值潛力和投資價值。你可以睇翻佢10-15大持股，去決定邊隻較適合你。

3072和2814同步進行都可以，但當中有不少股票，都係重覆。因此，這2隻ETF佔組合比重唔可以太高，連同其他科技類股票，你要控制在3成佔比以下。

另外，我建議你用每月閒錢，去做月供，來進行一個長線的財富增值。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

餘下資金，我地就等機會，當大市出現較大回調，就加大力度掃貨，然後作長線投資。

------------------------------------------------

Q21837：

老師，請問 7226 同 3076性質是否一樣，7226是否一樣可以長期持有。

如果我早年半前睇到你page就好，年半前那時係低位入過金沙，舜宇，但都只係賺差價，甚至騰訊係186同439有貨，都沽咗，真係好後悔。

現在開始要慢慢調整手頭股票，將無質素換有質素去長期持有。早前33.7入了一手金沙，諗住分注入，

(我理想價係希望30左右先入，但今年好似比較難去到30，所以33.7都先入一手)長期持有，不過這之後已升，又要再等下。

龔成老師︰

你才40歲，只要現在學好正確投資方法，依然有充份時間，去做好增值。

你現時入金沙(1928)策略正確，好多時優質股，都唔會咁易回到較平水平，所以我地要分注，去平衡入唔倒貨架風險。

現要時$33.7入左首注，你預每回調10%左右加注，咁就可以。

ＸＬ二南方恒科（7226）產品之投資目標為追踪恒生科技指數每日表現兩倍（２ｘ）的投資業績。

雖然我長遠認為，恆生科技指數正面，但中短期可以較波動，由於這基金有槓杆，就會令價格更加波動，其實有風險。

雖然都係追蹤恒生科技指數，但我會較建議投資無槓杆的恆生科指ETF（3067），始終較好。

------------------------------------------------

Q21838：

阿sir 雖然距離1,000,000仲差好遠，但想同你講多謝你, 自從2018年尾同男朋友分手, 人生好似無咩目標！

但2019年初認識到你, 不停睇你fb, 我就由零知識開始不停儲錢同長線技資，供股etc. 2018年年尾由10幾萬努力儲錢投資到而家70幾萬（我知道雖然唔多錢, 比起好多80後既人)

呢兩年幾不停睇你既書同你介紹既書藉增值知識，然後2019年就報名上你堂, 更加明白價值投資法同長線投資嘅重要性....

你既正量真係幫到好多人，岩岩睇完你既千萬富翁既書, 而家思考緊點樣可以用空閒時間去做副業, 我其實覺得keto desserts呢個market係有得做,

本身都鐘意baking, 而家仲思考緊點可以行出第一步, 始終要拎個食物牌先可以賣出去, 但拎一個正規既食物牌要投資好多錢, 而家就係stuck住係呢一步。

唔知阿sir你會唔會有d意見可以比到我？

PS 希望不久將來成為千萬富翁

我希望盡快可以cap screen到我第一個一百萬給你，多謝你。

同埋我2019年頭開始每個月供0003($2000) & 2800 ($3000)，因為當時無咩投資知識，因為你話供股最少要3-5年先可以平衡風險,

想請教你 我係唔係應該繼續供到去5年就停？ 到時就轉供潛力股？

定一話而家可以停供呢兩隻股轉供潛力股？

我今年34歲了

龔成老師︰

能夠有這樣成績，都是你自己努力學習和實踐的成果。記住，投資路上要一直保持學習，才會成功。

至於100萬，我相信你按部就班，可以好快會達成。

至於月供方面，我希望大家最少供3年，並持有5年以上。但當然，不論係月供年期，定持有時間，都係越耐會越好。

而幾時加入潛力股，這個係睇你人生階段作決定。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

較年青人士，可以用「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。

以你34歲年紀，應用「平穩增值股」+「潛力股」作組合。

潛力股︰可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）

如果你現時覺得，自已投資經驗都未算多，潛力股這類風險較高的股票，你就不要持有過多，最多維持2-3成好了，甚至先維持現狀。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，你要合法從事這門生意，這個成本始終都要投資。但若你覺得太貴，你可以睇下有無志同道合架朋友，一齊去開，去分擔成本。

但你要明白，當多一個生意合伙人，就會多一個變數，甚至係多一個麻煩，你要了解這個風險。

又或者，你最初可以到相關公司工作，最好是一些中小企，你要盡力了解該生意的營運，同老版傾計，這都是一個方向。

------------------------------------------------

Q21839：

呀sir,最近先有時間去買你嘅書睇,但係好似已經太遲,因為係3月左右係高位買左3690,9618,9988,已經蝕緊好多,呀sir想請教下依加應該止蝕定係轉買另一隻股呢？謝謝

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票，都係有質素。就算你買貴左，長線企業會增值，慢慢會重回你買入價，故可以守。

但當中美團(3690)有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可大跌。

因此，這類不確定性高的股票，只能小注。若佢佔你佔合較大比重，建議你沽少少，去平衡下個風險。

------------------------------------------------

Q21840：

您好 ! 龔成老師,

1. 本人2020年7月14日$8.12買入01114 華晨中國 ,但於2021年3月已停牌, 以你專業意見, 此股有無機會復牌呢?

2. 2021年 2月8日 $0.485購入#00451協鑫新能源, 可繼續持嗎?

3.2020年11、12份 分別$4.74, $4.59 (股數3萬)入00831 利亞零售 之後於12月份分別$0.69, $0.63 (股數7萬)

12月31 日已收了股息$114,900 你覺得應該繼續持有，還是放再賣其他股呢?

龔成老師︰

1) 華晨中國(1114)自2021年3月31日起停牌，集團由於未能完成2020年年報，故要待公司釐清當中資料後，相信會有機會復牌。

但由於暫時無佢太多資料，根據以往數據分析，集團只算係不過不失，投資價值一般。

現時你暫時無野可以做，你預復牌後，如果2020年數據較差，股價會有較大波動。

2) 協鑫新能源（0451）主要從事光伏電站之開發、建設、經營及管理。

生意增長力不強，可過盈利十分波動，股價上落大，高風險類，市場往往炒作多過實際。

要睇你承受風險的能力，股價有時會大升，但又可以跌得好快。整體的投資價值，未算高。長線計，換至其他優質股，會比較好。

3) 利亞零售（0831）賣左「ＯＫ便利店」業務資產後，就只剩餘集團的品牌（聖安娜、Ｍｏｎ　ｃｈｅｒ和Ｚｏｆｆ）。

預期發展只是一般，同埋之後好睇佢資金的運用情況，投資價值只是中等。

若你持貨佔組合比重不高，你持有都可以。但若佔比重較大，最好估出部份，換至其他優質股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18881-Q18900）

Q18881：

老師我係你學生，我想問分析ROE、毛利等財務數據時，是否不能單純數字分析，還需要很多長遠目光和對經濟的了解？我仍未能完全掌握。

龔成老師：

其實當我地分析財務比率時，你不能只睇數字，要同時配合「企業」、「大環境」。

例如今年盈利比上年度上升了10%，而ROE下跌了3%，你要分析，點解？

你首先要分析翻，佢收入點解會上升10%，分店多左？加價？大環境向好？其他行家的情況如何？

之後要睇翻ROE跌的原因，是盈利下跌，再投資方面的回報較弱，還是甚麼原因，當我地分析ROE時，往往要配合派息比率及負債因素去進行分析。當然，我會較建議分析長期的ROE情況，而不是個別的一年情況。

但你最重要記住，數字是死的，我地作為投資者，一定要將佢「意義化」，要配合當年的企業經營情況、大環境，去配合分析。

------------------------------------------------

Q18882：

Ar Sir, 1446鴻福堂，我研究過企業是有質素的(對員工好，今年又派特別息比小股東)，但打不入內地市場，今年上半年疫市竟然也賺了一些。

將來也衹可以主力本地市場，佢地話稍後會嘗試打開外地市，甘Ar sir你點睇佢地將來的發展和賺錢能力?

鴻福堂上市5年，但股價現在是0.450，你會否認為此企業被估值低左呢?

是否值得現在投資呢?

Ar sir, 甘有時會出現企業質素好，但唔代表賺錢能力強的情況嗎?

龔成老師：

鴻福堂（1446）質素算是不過不失，未算高質。產品都有一些支持者，但發展力卻不強。

睇翻財務數據，每年盈利不高，生意多年來無特別增長，反映佢在開發市場方面，只是做得一般。

現價算是合理，無低估，但就唔見到有好大的投資價值。

------------------------------------------------

Q18883：

老師你好，我一直不懂投資，直到幾年前在公司同事遊說下，嘗試接觸投資股票，但因為什麼都不懂，他說什麼好我就跟着買什麼，結果幾年下來買的一路下跌

以為等着等着就可能會上升，但似乎越跌越多，我就開始嘗試去看一啲投資書籍，才發現自己一直犯的錯誤，我想問問老師

我應該繼續擺股票一直等上升返，還是應該賣晒佢，換一啲有實力前景的公司，因為擺下擺下都已經蝕左唔少，我應該點處理？

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q18884：

老師你好:我今年27歲。持有以下股票，但不知道應不應該繼續持有，定沽左部分購入更有潛力如9988或1177？

2128中國聯塑 $15.79@2000股
3662奧園健康$8.1@3000股
1810小米集團$15.29@3000股
2013微盟集團$10.16@4000股
1448福壽園$6@4000股

感謝你繁忙中解答! 祝安好!

龔成老師：

上述都是有質素的股票，其實你可以長線持有，只是部分潛力股，可能風險度會高少少如微盟集團（2013），你佔組合的比例就不宜太多。

記住，買入價不是重點，重點是該股的質素、前景，你持有的比例。

至於阿里（9988）與中生（1177），你都可以加入的，阿里就最好回翻D，而中生現價就可以開始小注。

現時大市合理區，未算平，你都要留有一定的現金在手。

------------------------------------------------

Q18885：

Hi 我儲蓄唔多，家庭開支太大。我有14萬，如果拎呢舊錢去投資， 買收息股， 想穩年年收息， 揀邊隻好？

如果想買阿里巴巴其實咩價位入最好？美國大選係咪會影響股市會下跌架？

最後如果我想買你既書睇， 邊本比較好？ 因為我係新手學買股票

今日去買左3本你既書

我都好耐無睇過書。

想問9988，如果想長揸，依家個價買係咪會太高？
應該大約幾錢入？

仲有1810我都想長揸，依家呢個價入都可以嗎？

龔成老師：

首先，你要想清楚自己的投資方向，想收息，還是增長，自己的風險承受程度如何。

至於中短期因素，就唔需要太著重，最重要是期的財富配置。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

阿里（9988）是增長型的股票，風險較高，最好回翻少少先，至於小米（1810）都是潛力股類別，但最好都是回翻少少先買。

如果你較初階，建議你投資ETF。

例如盈富（2800）。如果想較高增長，就安碩恆生科技ETF（3067），不過現價唔平，如投資，只能小注慢慢入，或月供。

你保持閱讀，增加左基本知識先，投資唔好急。

------------------------------------------------

Q18886：

老師點睇303，我見佢都幾賺＄，派息都吾錯，但書中沒介紹

龔成老師：

偉易達（0303）作為收息股，可以，但增長力就不算強。因為佢近年有些業務正向下，這會令股價向下，所以無無介紹，去到現水平，算是合理，股價相信唔會再大跌，投資值博率開始出現。

雖然近年的股價較一般，但本質都未算差，但就唔叫好強。

佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

如果你目標係收息為主，此股可投資，但不能太過大注。

------------------------------------------------

Q18887：

龔sir，您好，今年年頭已經在Facebook專業看你關於投資的知識，還買了《80後百萬富翁》《50優質潛力股》學習，但我本人比較保守，遲遲都不肯動手，終於在今個月買入了幾隻股票。

本人23歲，有現金50萬，現持有：
2800 [email protected]
2382 100@130
1177 [email protected]
1928 [email protected]

還想入0027，現價合理區中部，我比較想直接入一手，你覺得可以嗎？

我唔係太想月供，因為我覺得月供回報好慢，但我明白可以平均買入價，所以好難做決擇。

還想入1211，但現價略貴，你覺得回到幾多可以直接入一手。

另外2382轉換去0285你覺得好嗎？這兩隻股你點睇？邊隻潛力會較高？謝謝龔Sir

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你現時23歲，唔需要太保守。而現金要適當運用，當然，現時大市未算平，唔能夠盡用現金的。

現時你持有的，都是有質素的，可長線。

至於現價加銀娛（0027），可以的，但要留意賭業佔你的組合比例會開始多。

如果唔想月供，就自行分注入，但就要留意現時股價未算平。

至於比亞迪（1211），最好去翻$80先入，當然，未必見到，如果好想入，最好都去翻$100以下先分注。

舜宇光學科技（2382）與比亞迪電子（0285）都有質素的，不過現時比亞迪電子，所以，你持有舜宇就得。

------------------------------------------------

Q18888：

龔sir, 小弟今年24歲，月入大概3萬至3萬5
每月有一個月供九千既15年基金計劃

到年頭先發現到咁係好傻既儲法，之前都試過炒牛熊結果輸左幾萬蚊，之後買左龔sir幾本書睇發覺要改變投資策略

然後而家扣曬家用洗費每月大概有五千蚊放係股票市場
而我而家拎有既股票係

港股
788 @1.5 16000股
981 @26.95 500股
1368 @3.09 3500股
1810 @10.4 2400股
2638 @7.43 500股

中國股票市場
601985 @4.39 600股
2665 @2.6 1200股

想請教一下呢個投資組合算吾算合理/合格，亦想了解一下有無繼續投資落去既遠景，唯一好岩心水既小米已經升到成18蚊，仲好吾好繼續買貨，定係等佢回一回？我自己對呢間公司既信心就好大下。

請龔sir俾啲意見賜教一下，多謝你

龔成老師：

衍生工具好難賺錢的，之後唔好再玩。

至於基金計劃，要具體分析先會知當中的質素。不過，月供$9000可能有點多。

至於現時持有，我無特別分析內地股市。港股方面，持有的相是有質素的股，大致上無問題，中芯（0981）唔建議大注。

中國鐵塔（0788）、小米（1810）可長線。小米開始貴，唔好心急加注，原有貨要長線持有。

特步國際（1368）都可以，但質素不算最高之列。

港燈（2636）只是收息股，未必適合你的年齡。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你的持有大致無問題，現時大市未算平，如果要入貨，要慢慢分注入，唔好太急，要留有現金。

------------------------------------------------

Q18889：

Hello, 本人有一物業，銀行估價300萬，現收每月租金6300，如果賣了，買股票收息，能達到財務自由嗎？

有推薦的收息股嗎？感謝

龔成老師：

假設套現得到$300萬現金，之後全部投資收息股，但到5%股息。

一年預期會收到股息，$15萬，每月平均會收到股息$12500。能夠財務自由，就要睇你的消費金額。

要留意，投資收息股，最好只作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q18890：

龔老師妳好，請問港鐵00066而家入算抵嗎？

同埋小米集團01810
係咪都屬於回落緊

感謝龔老師

龔成老師：

港鐵（0066）現價合理，可以分注投資，長線持有，這股有質素的。

至於小米（1810）有質素及增長力，不過，現價唔算平，去翻$18以下會較為合理。所以最翻落少少先開始分注。

------------------------------------------------

Q18891：

老師你好！ 家人之前幫我買了00136, 10萬股 已蝕了8k，00871, 10萬股蝕了35k, 02858, 一萬股蝕了60k, 還有02882, 10萬股蝕了38k， 現在 應該怎麼辦

龔成老師︰

恒騰網絡（0136）比較麻煩，因為暫時的業務賺錢能力仍弱，不確定性大，你唔好再加注。如果佔財富太多就減持，如果不算多，就持有先，到反彈到一定程度後就慢慢賣出。

中國疏浚環保（0871），業務不佳，5年有3年處於虧損狀態，投資價值不高，加上核數師意見中，曾經出現了修定報告，這反映當中有少少問題，但其後算是調整翻，但這都反映，這企業有些地方有古怪，要小心。

近期股價大幅波動，炒多過實際，風險高，因此對這股有保留，賣出會比較好。

易鑫集團（2858）企業仍處於燒銀紙的狀態，這類股風險較高，不過，我唔敢話佢完全無潛力。

這類股估值難，不確定性較高，只可以話，小注好了，暫時我未能確定佢業務真的向好。

香港資源控股（2882）主要透過全資附屬公司勝力經營電鍍化工品貿易業務。另外，透過收購香港珠寶零售連鎖店－金至尊品牌，去踏足珠寶零售業務。

此股連年虧損，再加上2019年在核數師意見中出現"保留意見"，代表盤數可能有問題。建議你沽出，轉至其他優質股。

睇翻你以上持股，質素上都比較唔理想。我建議你在再投資前，去多讀投資相關書本、年報，新聞和相關課程。提升自已選股能力後，才再出手。

------------------------------------------------

Q18892：

請問的士牌是一個好投資嗎？

龔成老師：

的士牌，現金流工具，好處係投資者可利用借貨，付首期購入的士牌，然後收取每月穩定的租金收入，原理與買樓收租一樣。

按揭成數高、管理不難、買賣成本低、限制少，所以都是一個不差的投資工具。

不過，近年出現的叫車程式，對佢有一定的影響。相信長遠，的士牌的增長有限，只是一個平穩及收息的工具，前景只是中等。

現價合理。我會認為，如果資金真的較多，作為整個財富配置的其中一部分，都可以的。

------------------------------------------------

Q18893：

你好 龔老師，我只持有三隻股票
分別係9988 300股平均價係$262.67

IGG 10000 股 平均價$9.37
303 偉易達集團 1500 股
平均價格係50.67$

個倉overall都有賺

但想減持股票數量/ 優化股票組合
要如何做好？唔捨得蝕放

龔成老師︰

首先，如果你個倉只有3隻股票，會有"過度集中"架問題。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

另外，當我地選擇投資項目時，會參照自已人生階段。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

你持股中的IGG（0799）和阿里（9988）係潛力股，而偉易達（0303）偏向收息股。

你應睇翻自己人生階段，去調節組合持股。

最後，IGG（0799）是有風險的類別，雖然佢財務數據不差，但業務本質的不確定性大，軟件及遊戲都是變化較大的行業，這種不確定性可以令企業好勁或好弱，因此你要明白這點。

這股可以有潛力，但投資時，不宜太大注。

------------------------------------------------

Q18894：

老師好,向你請教後經過一年多了
早前停工大半年,可惜錯過了3,4月時的大跌市
最近在閱讀你的年報勝經,希望能了解多點關於年報的訊息

回想1年半前的自己,發覺對投資認識更多後不知不覺心態更比以往只做定期較為進取得多,亦開始明白知識真正的重要性。

目前月入2萬8千,持有股票組合約28萬,定存30萬,現金約20萬

恒生銀行2手 成本197
金沙5手 其中2手成本47.6 月供部分約3手成本35.57 月供2000

盈富 4手 成本26.96 月供3000
比亞迪 325股 成本43.87 暫時停止月供
恒地 1手 成本34.7 月供2000
煤氣 3手 成本13.91 月供2000
長建 1手 成本50.29 月供2000

首先多謝老師介紹比亞迪並帶來不錯的回報

可惜早前月供期不長,持貨量不多,於80元時覺得價格稍貴停了月供,並採取了升一倍放一半的策略

如今只剩下不足一手

本來打算於60元左右價位時恢復月供
豈料「一升冇回頭」,現在更升至接近140元的價位
似乎較難期望回落至60元左右的價位

1.請問這情況下老師會建議採取甚麼策略?恢復月供還是應該繼續持貨並改為投資其他潛力股?

另外我打算在美股戶口開戶後月供約HKD$2000 ARKK及HKD$3000 VOO,分散地區投資風險

並於定存中抽取3-5萬轉移到即將推出的ibond賺取較高回報

2.請問我投放在月供部分金額會否太多,令將來持有現金不足?

3.目前持有煤氣3手,恒地1手。明白恒地及煤氣屬同系股票會有集中風險,有否需要調整目前的策略如停供增長力減弱了的煤氣?

4.現時月供部分除了盈富的成份股外均屬舊經濟股及平穩增值型。有感今年疫情經濟受創下舊經濟股表現差強人差,「升市無份、跌市一齊跌」。如今股票組合也是靠比亞迪一隻支撐著其他股票的虧損。

　請問有需要檢討及重整名單,新加1-2款潛力股或新經濟股以增加第1個水桶的佔比及作風險平衡嗎?

5.騰訊及阿里巴巴等科網股均升至歷史高位,市場亦出現針對新經濟股的過熱訊號。如果作重整股票組合名單,是否應該待回落至合理價才轉馬?

6.中國阻止外匯流失,對金沙的基本面有影響嗎?

7.老師對即將上市的螞蟻集團有何看法?記得你提過IPO一般以稍貴的價錢上市,但考慮到螞蟻集團的獨特性,是否應該抽這隻IPO?如否,哪個價位才算合理價?

8.同樣,港交所的合理價應為多少?我對港交所及必瘦站一直有興趣,尤其看到老師介紹及持有必瘦站後對它更有信心。但再購入這2隻股票後會否持有過多股票令組合變得混亂?

問題稍多不好意思,期待老師的賜教

龔成老師︰

1） 比亞迪（1211）現價偏貴，我建議回到$100以下，才再開始翻月供會較好。$80以下先正式買入。

此期間，你可以供住盈富（2800）先，或其他潛力股都可以。

安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）

投資美股去分散地區性風險，係可以。只要你對這些股票係了解，同埋佢地係適合你年紀，咁就無問題。

如果你未到退休之年，IBOND我就唔太建議投資。

2） 以現時大市在合理區計，每月儲蓄大約用一半做月供，一半儲起等大跌市機會，咁會較好。

3） 問題不大，煤氣（0003）近年係弱左，但長線投資價值依然存在，你可以維持月供策略。

4） 其實你月供股票，都係有質素。受大圍環境變差影響，難免會跟隨下跌。現時你月供的股票，反而因為調整而值博率高左，所以照月供就可以。

至於是否雖要加入一些潛力股，就視乎你年紀。如果你係較年青，長線的確應該加入1,2隻潛力股，去提升組合增長潛力。

5） 騰訊（0700）及阿里巴巴（9988）現價的確係偏高，如果直接1手手咁入貨，我就唔建議。但若以月供形式，去慢慢儲，現階段依然係可以進行。

6） 內地政府主要想防止太多資金外流，這樣難免影響到賭場收入。但由於金沙（1928）主要以中場客為主，影響預期相對其他以貴賓廰為主的賭場同業為少。

而且，這個只會係中短期因素，長線集團發展依然係正面。

7） 無錯，好多IPO上市價都會偏貴。但我地要考慮埋佢質素和潛力，去取得一個平衡點。

但由於螞蟻集團上市資料未公布，故現時很難說是否值得買入。

8） 港交所（0388）是壟斷企業是典型的優質股，值得長線持有。

在$300水平以上就開始貴，你最好等佢回到合理區附近，才開始慢慢入貨。此股算有一定潛力，加入組合係可以。

必瘦站（1830）有質素的，佢生意穩定，同時有平穩增長的情況，佢盈利都不錯，保持增長。

比較特別的是，佢的派息比率高達100%。代表佢有自我成長的能力，不用投資太多的資金，都能令企業成長，這是佢優質的地方。同時反映管理層重派息多過企業增值，因為管理層未無太大的發展意慾。

不過，近年管理層有所改變，表示有可能減少派息，投入更多在發展方面。雖然派息少左，但潛力就有所提升。

整體而言，佢業務有一定不確定性，未知之後的業務、盈利、派息會點發展。現價合理區頂。

------------------------------------------------

Q18895：

龔成老師你好! 本人39歲, 未婚, 未有結婚生小朋友打算

本人現與母親住在公屋兩房單位, 母親是主婦, 自己月入HKD65000-.

1-2年前開始閱讀你的文章, 增值投資認識不少. 現有現金180萬左右, 股票10萬元, 基金5萬元.

想提供更優質的生活給家人及增加家用空間, 有置業打算. 有兩個方向, 不知如何是好.

- 用綠表購入3房二手居屋, 700萬, 9成按揭25年, 首期開支HKD一百萬左右, 月供需 HKD28328左右. 預留50萬裝修, 餘下30萬再作投資. 但二手居屋已有20年, 怕日後轉售有困難

- 先用50萬以租置計劃買下現有公屋單位. 另外, 外出租用3房私樓住 HKD2-2.2萬. 餘下130萬先作投資.公屋單位現估價250萬, 禁售期後轉售獲利200萬.
待2年後,

不知樓價是否再有下調,加上自己的130萬以首置買入私樓3房, 裝修費用後餘下投入債券基金收息, 可協助供按揭

請問那個方案比較好? 或有其他建議? 謝謝!

龔成老師︰

從平衡與穩健角度考慮，方案一「用綠表購入3房二手居屋」較好。

雖然居屋在投資價值未必及私樓，但從自住角度，不差的，而你最大的目的是「優質的生活給家人及增加家用空間」，相信這一步較穩陣地去做到。

至於買公屋的方案，由於你的目的只是借公屋作跳板，期望樓價下跌並之後買私樓，由於樓價下跌存有不確定性，到2年後賣出較難確定樓市情況，因此存在未知數。

如果到時要再等，你就要持續支付租金，加上年齡漸大令按揭年期有可能受影響，所以不確定性較高。

另外，債券基金有好有壞，要留意，有不少網友同我分享，投資債券基金出9現了賺息蝕價的情況，所以唔好以為一定能依靠當中的現金流，唔好比佢的高息吸引。

------------------------------------------------

Q18896：

龔sir你好~機緣巧合下係fb見到你嘅分享，獲益良多~啱啱都買左你兩本著作（股票勝經和50優質潛力股，閱讀中）了解到時間是令財富增值的不二法門，想就住自己的情況問下意見~

我今年30歲，單身，月入將近2萬。扣除1/4家用，1/4生活花費，1/4雜項（先儲埋支付包括保險，或者家裡要換的家電或電子產品等等比較大的支出），剩下大概5000能用作每月投資。

個人的目標是希望45歲前能儲到250萬用作移民，並且之後能靠被動收入維持生活。

現時只有投資美股（半年前開始，因為可以一股股買，資金少易入手），投資左26000港幣左右。暫時睇有6%升幅（買得比較雜，有2/3都係大公司）你認為需要轉返d錢返黎嘛？定係繼續放？咁之後仲入唔入錢過去？

港股方面，有1手中生（1177），7.92買入打算長揸~另外有5萬左右現金，係咪應該拎一半黎投資？定揸住等個市跌返少少先？

另外睇到龔sir的分享，想開始月供股票的計劃。

打算每月供2500蚊盈富（2800），1500蚊比亞迪（1211），1000蚊阿里，（9988），依個配搭可以嗎？（假設唔再投資落美股果邊）雖然長期供股票可以平均成本，但係見到近日阿里同比亞迪都創新高...宜家開始供可以嘛？

本人係投資新手，都係今年先開始慢慢學習，問題比較多，唔該曬龔sir~

龔成老師︰

當我地選擇投資項目時，應參照自已人生階段。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

中生（1177）有質素和適合你，長線持有就可以。而美股方面，你可以睇翻你現有股票，是否有增長力、企業是否優質、行業前途如何、財務狀況等，去決定是否值得持有。

但我想你清晰翻2點，首先，唔好因為"入場費平"，就去投資一隻股票。我地選股重點係"企業質素"，一隻$50000入場費架優質股，長線可以繼續升。一隻入場費只要$500架劣質股，最終係可以跌到1蚊都無。

另外，大公司唔代表一定有投資價值，佢都可以係連年虧損。所以，投資前要了解清楚，唔好見係有名或者大公司，就盲目去投資。

以你年紀，投資策略可以比較進取。你現時月供選股可以，但由於現時比亞迪（1211）偏貴，你最好等佢回到$80左右，才開始月供，現時可以先用其他潛力股代替。

潛力股︰安碩恒生科技（3067）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）

學習方面，除左睇我架書，你可以多睇財經新聞、企業年報和上些相關課程。

本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。課程時間，你可以留意我FB。

------------------------------------------------

Q18897：

龔sir 2800 或者3067 之類既 ETF 或者基金增長會唔會比普通既股票慢?

因為我見到好多時你都係叫人穩陣d就買2800, 但佢真係比普通股穩陣? 但我以前睇過佢派息又唔會派得特別多,以新手入市又唔算好平,所以有呢個疑問。

我依家開始要慢慢了解下車股,其實車股係咪都係睇佢賣車同有無研發新產品之類?

好似以我所知內房就睇賣樓,有多負債,土地儲存,同國策之類。呢種分析方向是否正確? 你會唔會建議人同行業分開投資大同細既公司?

例如2333相對175係細隻d, 175買大份小小,2333小注咁樣?

原來係有人贊助佢地推介人買股票,難怪講呢d野既人好多時係咩基金董事之類既人。

龔sir之前話長線投資,咁我幾時先知道嗰個股票我應該要食糊?

因為我都有一個股票係咁,(3883)係美國總統一開始同中國玩貿易戰既時候5蚊左右買左2,3手,一路揸都揸左有2到3年,佢由5蚊跌左落4蚊

之後高位升到13蚊,但我都無放,依家落到7個幾,咁我係咪錯過左最好賺錢既時機? 因為有d後悔無係12蚊嗰陣放,覺得佢可以有能力升上去無放。

依家你建唔建議轉投其他板塊如車股,因為依家內房既國策收得有d緊,雖然人仔有升,但內房都無乜升。所以就想問咁算唔算長線投資錯過食糊機會?

我都買左本年報勝經睇,慢慢學下野先。

龔成老師：

盈富（2800）有平穩增長能力，不是高增長類，但由於有50隻股在其中，風險得以分散，以我地投資，一定要「先想風險，後想回報」，因此，先平穩風險，同時有平穩回報，這是好選擇。

至於安碩恒生科技（3067），原理相同，而當中是潛力股，不過，不少現價都唔平，所以買入時唔好一次過入，要慢慢分注，或月供。

至於汽車股，要睇佢的產品，客戶對象，品牌，過往賣車的數據，優勢，研發能力，有沒有與其他公司合作，長遠發展，財務數據等。

無論車還是內房，你分析時，重點是睇「這企業」，你現時是買入一間企業，就要用企業的角度，分析當刻及長遠的情況，同時買入價是否合理。

至於你話細隻大隻，你唔好比股價數字、入場費多少影響，最重要睇「企業」。

另外，唔好理中短期的股價波動，最重要是長期持有企業，如果企業有質素，可以一直唔放。如果升到貴，賣部分都是可以的。

你現時的想法，同一般散戶一樣：「著眼在短期升跌，以為自己能在高位賣出」，如果你繼續這樣想，結果只會與他們一樣（根據統計，香港散升，有9成在長期計是輸錢的）。

------------------------------------------------

Q18898：

龔老師您好，有事想請教，周不時睇到有啲所謂大行不斷作出或修改估價，這是為什麼呢？睇到有啲書話被某某機構阻擊，這又是什麼意思，唔明點解一隻股會有不同機構給予不同估價，咁會唔會被弄到停牌除牌架？

龔考師早晨，補充詢問這些曾被質疑評估及阻擊的股我們又應該如何分析應對？

龔成老師：

其實大行報告，都不能盡信，有時可以參考下，有時有佢地本身的目的。

例如本身佢沽空左某股，然後就發表報告，講這公司有問題，之後就會令股價大跌，佢地就可以從中獲利。

所以，這些報告，參考下好了。

其實好少會搞到停牌，除非該公司自己本身有問題。或者最多為澄清，而暫時停牌。

我地睇到這些報告時，唔好盡信，要自己睇翻財務數據的可信性，同埋這股票過往的獨立核數師意見。

------------------------------------------------

Q18899：

1) 我在32.4入了一手金沙，得知現時金沙處於合理區的低位，有意再入一手，但後來獲得更多資訊後覺得銀娛會相對更大潛力，如再入金沙好像會有點矛盾，我相信金沙和銀娛並不適合同時持有。我對金沙應採取甚麼方向？

2) 多謝你上次的回答建議我加大潛力股的比例，我之後閱讀了50倍升股，實在大開眼界，我對數間公司都有投資興趣，想請教應投資次序和現價是否處於合理區。

354 中軟國際
6869 長飛光纖
522 ASM Pacific
謝謝解答！

題外話，我之前去尖沙咀誠品購書時發現你的書在商業投資類都受歡迎，我在早上時發覺在短短十五分鐘已有人選購和閱讀。

龔成老師：

1）比較平衡的做法，是投資銀娛（0027），因為這可減少你集中風險。其實兩隻現價都合理的，金沙較適合收息及平穩，而銀娛則有增長力，兩隻同時長期持有，可以的。

2）在這3股中，中國軟件國際（0354）、ASM PACIFIC（0522）的優質度會較高，暫時可留意這兩股，中國軟件國際在合理區，而ASM PACIFIC在合理區中上部。但始終業務都會有少少波動，因此投資唔能夠過份大注。

哈哈，多謝報料！

------------------------------------------------

Q18900：

老師你好,我看了中國光大綠色環保(1257)既中期報告,咁就有以下既問題/分析,希望可指點一下!!

(1) 2020年收益同2019年收益好接近,但2020上半年係疫情較嚴重時候,咁如果2020都可以做到2019同期既收益,係咪算唔錯?

(2) 損益表入面既"財務費用"係咪指利息支出既意思?如果係既話,推測公司將收入既一部分去還錢,就會影響公司長遠發展,呢個推測合唔合理?

(3) 另外,"財務費用"高過上年,而且公司負債係高過上年,請教下兩者會唔會有關係?

(4) 現金流量表中, "經營活動所動用之現金"比上年高左幾倍,可以點解釋?謝謝老師！

龔成老師：

1）可以咁講，不過，我地分析時最好用較長期的角度分析，中期業績只是輔助，但不是分析的核心。我地要用長期的角度去了解左企業先，再因應中短期業務情況去調整。

2）對，即是融資方面的成本，我地會睇翻佢的成本多與少，佔盈利比例多少。以及分析佢的風險度。

3）兩者有關的，要睇翻佢高左是否到了危險水平，還是仍可接受。

4）當中涉及較多的會計因素，好難在這裡簡單解釋。但經營活動現金流保持正數並有向上情況，一般都是利好的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17561-Q17580）

Q17561：

你好 龔成老師 我是一位大學一年級生 之前閱讀過你幾本著作後 嘗試學習投資 現在每個月的兼職有$6000收入 自己有一份每月$2000的儲蓄保險 所以想用剩餘的$4000作投資

自己想比同年的人優勝 所以現在接觸投資 希望盡快有一個可觀的資金 以便我可以畢業後創業 自己亦傾向長期持有股票 因為覺得自己不適合投機

現在持有的股票分別有：
1137 @7.95
0006 @42.8
1099 @18.5
1810 @24.9

另外都有留意 幾隻股票 分別是： 1638 1772 2382 1199 同 1766 想請問你會從中推薦哪幾隻股票 謝謝你

龔成老師：

你的心態正確，你要保持一份進步的心，要同年的人優勝，這是成功的因素。

而你的投資方向同樣正確。

現時你持有的，都是有質素的股票，基本上可長線持有，不過，電能（0006）只是收息股，則未必適合你投資。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

舜宇光學（2382）適合你投資，這股有質素，現價合理區中上部，你可留意。

贛鋒鋰業（1772）都可留意，這是潛力股，不過風險度就比舜宇光學高，投資要控制注碼。現價略貴。

------------------------------------------------

Q17562：

你好老師，我想問財務自由的問題，

1）如果要月入2萬，應該要多少本金?

2），如果到了财務自由的本金，但只是4至50歲，應否轉投收息股?

3）如到7至80歲時，收息的購買力會否，不如現在?

龔成老師：

1）假設每月要收息$2萬，一年$24萬，以6%收息股來計算，就要「$400萬」的本金。

2）對，我地會用「先增值，後現金流」作策略。先將財富增加左先。

3）對，所以最好投資一些「股息會增加的收息股」，這就可以對抗通賬。

------------------------------------------------

Q17563：

你好呀, 想請教下你. 希望你有時間回覆我. 我36歲, 同先生2人月薪得4萬, 有15萬股票(月供+整手)另有25萬現金, 想係40歲前獲得100萬, 想問下有咩方法.

本人持有股票如下
1)0005 (匯豐控股) 1600股+191碎股, 現在已停止月供, 在55蚊入1600股
2)883 (中國海洋石油) 在11.2 入了4000股
3)其餘的都是月供 (供了一年 每月5000元)

組合有 006 (電能實業)290股, 823 (領展房產基金)有384 股，每月$2000 2800 (盈富基金)389股每月$2000.

想問我咁樣去投資有無問題, 同埋點樣再可以滾大筆錢到我目標. 盼覆. 謝謝!

龔成老師：

匯豐（0005）暫時持有住先，但預佢只是收息，增長不強，唔好再加。

中國海洋石油（0883）的質素，同樣不算好高，只是商品企業，持有可以，但未必值得增持。

至於月供的，都是有質素，但你要明白電能（0006）只是收息，無乜增長力。另外兩隻無問題。

如果你想加大組合增長力，就要調整策略，換入一些較高增長力的股票，當然，風險度會比原本略有增加，你可以睇下點平衡。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性比上述會高少少。你可以等回少少先入，又或月供。

------------------------------------------------

Q17564：

我係進階班學生，想問下隻1772, 819. 我今年年初19元買了1772, 35元沽出. 之前回到24,25便沒有買入. 因這隻股份只上市一年有多, 只得有一年的年報.

所以不能從年報當中找到有多資料. 但今年公司和寶馬公司簽訂了5年合約, 金額約每年49億左右. 已經等如前一年的收入.

今年合理價是31.2元, 安全邊際下20%-30%, 21.84-24.96 就是便宜區, 這樣理解我有沒有錯?

819 基本面都唔錯, ROE 5年都過20%, 收入和每股盈利都有增長, 這隻股合理價是多少? 這兩隻股, 那一隻增長潛力會較好?

龔成老師：

贛鋒鋰業（1772）在進階班有講過，這是潛力股，但估值較難，分析時的確資料較少。由於上市年份少，我地較難有比較的數據，你可以用一個預測盈利，例如3年後的盈利作基準去進行估值，這會較為好。由於不確定性較大，估值出來的數據只能參考，這股$3X合理區，如果要平，我會去到$20以下，這樣能有效反映風險。

至於天能（0819），有質素與增長力的，但企業規模唔算大，加上業務存有不確定性，因此這股估值時會較保守，唔建議太大注。你預現時在合理區中上部。

兩隻都有增長力，我相信贛鋒長遠發展會略好。

------------------------------------------------

Q17565：

老師 謝謝你.我已入手 1448. 868 1177

想問問. 868 9蚊入.1448 ： 7.1入. 如何

龔成老師：

上述持有的都是有質素的股票，可以持有。

信義玻璃（0868）買入價合理，這股有長線投資的價值，無問題。

至於福壽園（1448），買入價略貴，不過這股有增長力，如果買入的貨不過多，無問題，市場認為這股「貴得有道理」。

------------------------------------------------

Q17566：

老師，我睇完你幾本書之後我哋有決心可以買到樓 仲可以喺30歲之前買 簡直覺得充滿希望

我分開咗幾個部份去投資同埋儲錢

由於我計劃喺2022年可以儲到一筆錢上車

但係今年嘅六月開始做咗$5000嘅月供股票

我嘅問題就係：

1.繼續做月供股票到2022年
買樓嘅時候攞返出嚟用，會否有少許增長？

2.定還係而家就暫停月供股票會比較好，係咪因為年期太短同埋扣除費用都唔夠cover個本金

老師再次多謝你
我係一個90後從來都冇諗過可以買到樓 睇咗你嘅

Facebook同埋睇咗你幾本書之後開始改變左我嘅人生方向同思維 我同我嘅未來老公而家都充滿希望

真係好多謝你
希望將來書展或者其他你嘅講座可以同你影返張相

萬分感謝

龔成老師：

1）由於你目標是買樓，因為這是較前的目標，你月供都要配合這目標，月什的股票不能太進取，同時要留有一定現金。

所以，你可以月供一些較穩健類的股，增長力不會高，預佢有基本的。你可以考慮盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

2）你可以部分資金月供，部分儲現金，這是較穩陣的方法。當然，你要計清楚手續費等，是否值得供。

------------------------------------------------

Q17567：

老師，2013 ok 嗎
我6.85有貨

有甚麼高見

龔成老師：

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁，你有貨可以長線持有，但就不建議太大注。同時，由於估值較難，業務變化大，因此，唔建議心急加注。

------------------------------------------------

Q17568：

6978永泰生物前排$15.4買入，200新濠14個幾買入，可以繼續等？唔該曬

龔成老師︰

永泰生物（6978）為國內細胞免疫治療生物醫藥公司。佢主要從事Ｔ細胞免疫治療的研發及商業化，當中包括實體瘤治療及血液癌症治療。

此股唔敢話佢無潛力，但由於佢上市不久，要些時間才能見到真章。佢未有盈利，但市值到65億，很大程度上高估值係來自對佢"未來"估算。

若然藥物研發成功，可以好賺錢。但失敗，回報則變零。此股算有危有機，你可以投資，但只可小注。

至於新濠（0200）中短線走勢我估唔倒，但長線發展是正面的。但你要預佢增長力唔會好強，如果你持貨唔多，繼續持有係無問題。

------------------------------------------------

Q17569：

老師你好，我有人民幣大約十萬，幾年前匯率82買入，而家9x，想問應唔應該轉返港幣再投資股票？

龔成老師：

你預人民幣大致都是這個價，好難有大突破。

所以，從長遠來說，都要投資其他工具去進行增值，投資港股都是其中一個考慮方案。

------------------------------------------------

Q17570：

龔成老師您好, 近排經朋友介紹 想向你學習
大家同為80後, 我覺得你好犀利 身家過千萬

我而家已經40歲, 感覺好似浪費左人生十年咁
因為我對於資金係非常保守既人, 可以話唔敢投資股票/基金

以前跟人買過少少股票, 蟹左幾年之後 重返買入價就放左，自此之後就沒再買股票

所以我一直以來都係靠儲錢 不斷做定期賺息
直至到近期, 開始對香港未來感到迷茫
有考慮應否BNO移居英國的問題

所以更加不敢在香港亂咁投資
但係近來定期利率越來越低息

龔成老師, 咁我應該點做好呢? 應否把部份定期資金轉為其他投資策略呢?

我的背景如下:

目前單身, 工作穩定月入3萬, 每月大約儲到1.2萬
每月基本開支是屋租水電約1萬+不定期支出 飲食交通娛樂

我的資產大約有170萬, 分佈如下:
美金定期約12萬 (約等值港幣 92萬)
人民幣定期約33萬 (約等值港幣 37萬)
港幣定期約30萬
流動資金約港幣10萬
另外有MPF 48萬

萬分感謝老師的解答

補充多少少, 目前未決定去唔去英國, 至少未來這2-3年都會留係香港再儲多D錢先, 我希望可以用我現有的資金, 改變投資方針, 獲得更高的回報

龔成老師：

由於你有可能過英國，但未落實，所以在理財中，宜保守少少，始終如果過去，無論在部署上，又或到時進行中，你都要有現金去生活。所以，你這刻應該持有較多現金。

如果少未來這2-3年都會留係香港再儲多D錢先，都可以作一些中長線的投資，以3年為目標。投資就唔會太過進取，同時以基本的增長為主。

你可以考慮將$30萬-$50萬，投資平穩增長股，盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市波動，你要分注投資，慢慢用資金，唔好急，同時，這$50萬要一邊投資一部分留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17571：

你好，新手想請教你
1728正通汽車買入左

睇到佢要配股
都睇唔明啲日期，配股目的等等
可指教一下嗎？

龔成老師：

正通汽車（1728）計劃以先舊後新形式配售最多2.45億股，每股1.09元，由於配股價比之前的股價低，加上這動作會令總股數增加，每股價值減少左，自然下跌。

佢話所得款項淨額估計約2.63億元，用作一般營運資金。

這企業本質一般，業務有向下情況，不過現價就唔貴。這類股唔建議持有太多。

------------------------------------------------

Q17572：

大師您好，新手玩股票大約一個月，請問點睇1156, 9906, 6820, 302, 6808 同710？

呢啲買完之後都大跌，係唔係應該止蝕徹退？🙏

1156 $0.57入一手
9906 $2.5入一手
6820 $3.44入一手
302 $3.47入一手
6808 $12.54入一手
710 $2.52 同$2.47 入各一手
請指教大概咩價閃人？

龔成老師：

我地繼續持有一隻股票與否，最重要睇「質素、前景」，買入價只是一個心理因素。

另外你要記住，買股票就是買企業，一定要從企業長期發展去分析。

CHINANEWENERGY（1156），質素一般般
宏力醫療管理（9906），質素一般般
友誼時光（6820），可持有，但要留意股價上落較大
中手游（0302），可持有，但要留意股價上落較大
高鑫零售（6808）有質素，可持有
京東方精電0710）質素中等。

------------------------------------------------

Q17573：

你好成哥，好開心可以睇到你個page 同買左你d書之後，買股票開始有小小方向，想請教一下你：

本身32歲，月入$33K，每月可儲$18K，現金有5萬，股票有大約10萬

1. 之前月供開005，大約有2000股，平均價約6x，而家已經停左，請問應該賣出部分去買其他股票嗎？

2. 我想係3年內儲到$100萬，應該點樣月供股票有機會達到目標？唔該晒！

龔成老師：

1）這股只是收息股，其實並不適合你的年齡，因此唔應該再供，原有的貨暫時持有住先，到香港經濟好轉後，佢個價上翻多少少後，可轉其他股。

你現時可以供一些較有增長力的股。

2）你要加大儲蓄先有機會做到，因為3年不是一個很長的年期，投資要好高回報先做到。所以，你首先要從開發收入，同時加大儲蓄方面著手。

另外，你都可以加強投資潛力股，但這類的風險會較高，你要自己平衡風險。

阿里（9988）、騰訊（0700）、港交所（0388）、舜宇光學（2382）、比亞迪（1211）、中生製藥（1177），但就要明白波動性較大，同時風險大左，你要自己平衡。

同時，由於潛力股要求你有一定的投資知識，建議你多增加投資知識，在選股、企業估值、投資時機上落功夫，對你長遠財富有好大影響。

現時大市波動，你除了月供外，要同時留一定的現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17574：

你好 龔sir 我之前有買股 但依家冇收入 冇得返工 有幾個股票都係好高位入貨 我應該等再低位入貨？定高位賣小部分？如何可以快速穩陣搵到多d錢？要投資咩股好？我仲有三萬左右現金可以投資

788 1.78
939 6.0
1972 18.58
1870 0.495

龔成老師：

第一，你現時無收入，要留一定的現金，最好唔好投資。

第二，過往我做了10年銀行與證券行，見了大量客的買賣成績，發現短炒者是輸得最多的一群。

上述的股，除了益美國際控股（1870）外，其實都可以守住先。

如果你有資金利，想投資，建議投資一些較穩健的股，例如盈富（2800），會較適合你。

------------------------------------------------

Q17575：

老師最近我多聽你的分享。我想聽你建議月供 盈富基金3000元。但我想知道如果幾年後。

我想分次提取出來。再換其他股票。如何處理月供購入剩下的碎股？

有無銀行係可以處理到的。因為我怕處理唔到剩下的碎股。所以我仍未決定去銀行開月供盈富基金3000元

如果處理唔到剩下來的碎股。
我便會有損失

龔成老師：

盈富（2800）可長期進行月供，你可以開始。

至於碎股，唔需要擔心，第一，碎股都可賣，只是比正股價低少少，可以1%、2%。其實無所謂，影響好少。

另外，有些銀行比你月供得來的碎股，以正股價出售，例如中銀，不過你問清楚先。

------------------------------------------------

Q17576：

你好，想問下點睇 9906 1415 947 719呢4隻股票？

龔成老師：

宏力醫療管理（9906）質素中等。

高偉電子（1415）都不差的，但業務有點波動。

摩比發展（0947）質素中等，增長力不強。

山東新華製藥股份（0719）都有增長力，不過規模較少，唔好太大注。

------------------------------------------------

Q17577：

阿Sir，有啲關於海外投資嘅嘢想問問你，希望你可以幫我confirm一下我嘅概念。

事緣我媽媽同我講起投資問題，佢話屋企可以借錢畀我做首期賣樓。

我話，而家我嘅人工不足以供樓，所以未有打算，加上香港局勢太亂，又擔心國安法對於個人財產會有影響，買香港樓、擺錢喺香港都有被充公嘅隱憂。

所以我話，不如我借屋企一啲錢，放去海外做投資，例如開離岸戶口放去美國買美股。

但係我阿媽一向對投資股票好抗拒，成日都覺得買投資保險或者基金好啲。

加上阿媽又話，美國量化寬鬆得好犀利，瘋狂印銀紙去頂住個市，唔化算。

我記得阿Sir你教過，投資性保險、基金，去到最尾都係一個數字，唔係資產，所以嚴格嚟講只可以算係防守性投資，股票、物業、的士牌，呢啲有價值，獨立於貨幣價格以外，先至係真資產。

而美國印銀紙，根本係十幾年不斷做嘅事，而影響範圍不限於美金，因為世界上大部分貨幣都係美元債本位，美元系統倒塌嘅一日，全世界都會陪葬，起碼銀碼上會一齊出事。

我想問我呢啲投資概念啱唔啱？

當然，如果我拗贏咗屋企，將資金放去海外投資美股或者其他工具，分段入手去減低高位/貴價入、先了解企業/工具性質再考慮買，就基本啦。

仲有冇其他注意事項？

龔成老師：

你的概念方向正確，但又不用過份擔心，美國不斷印銀紙，而全球的貨幣系統，都以美元作為中心，所以美元只會不斷貶值，持有外幣、港幣、現金都無乜用，而「資產」則不斷升值。

另外，香港的情況，都唔需要太過擔心。但如果你擔心，可以買美股，或投資一些美股的ETF，追蹤一些美股或全8球的股市指數，其實已好穩健。

你家人只擔心你風險高，而你擔心香港。因此，只要你投資一些外國指數基金，已同時處理到這兩個問題。如果有選股能力，就可投資美股。

------------------------------------------------

Q17578：

老師你好！想請問1093和1177合理價是多少？兩隻股票最近都有送紅股的舉動，合理價應該怎樣調整？還有送紅股其實有什麼作用？

0823股價回落了不少，我手上有貨平均買入價約74蚊，因為最近股價一直下跌所以我入多了貨，但比例已經佔我現在持有的股票的四份一。現階段應該繼續掃貨嗎？約60蚊的水平算是合理或是便宜嗎？

另外，我替我媽媽在約60蚊的時候買了0005，現在全成了蟹貨，股價更加每況越下。

老師說過企業質素不變可以繼續持有，但0005連續兩次不派息，現價40蚊不到，要重回60蚊水平還有可能嗎？還值得繼續持有嗎？謝謝！

龔成老師：

中生製藥（1177）之前進行了2送1紅股，因此股價自然下調，新的合理區大約在$8以下（我同時調整左佢的估值）。

至於石藥（1093），你預現價在合理區中上部。

送股的計法，例如2送1，調整就是（2÷（2+1））=0.67，例如中生製之前的股價$15，新的股價會調整至$10。

領展（0823）有質素，但你預中短期都會較弱，要長線。這股$60是合理區中下部，已經可以分注投資。

至於匯豐（0005），賺鐵能力與質素都有向下。你暫時只能視佢為收息股，增長力唔好有太大期望。如果想組合增長力提高，可考慮等經濟好翻D，佢股價上翻D時賣出。

------------------------------------------------

Q17579：

老師，麻煩你，已有一手1038，買00823，1972，會否唔太好？如果只選一隻（非月供），邊隻好d，現價應該ok?

另外，港交所，阿里同騰訊，現價如一手買，仍貴，但如果去到合理價，你會建議邊一隻？都係一手

1211去到咩價可入（一手買）
現時一手買，又冇邊幾隻可推介？

龔成老師：

長建（1038）可持有，這股要時間先慢慢向好。至於另外兩隻，都是有質素的股，都有投資價值，領展（0823）這刻的投資值博率略高。

至於港交所（0388）與騰訊（0700），兩隻都好質，要選好難選，如果你想增長高D，就騰訊。

另外，比亞迪（1211）在$8X是初步貴的水平，如果一手手入，較好的價位是$70以下，同時要小注分注模式進行。

------------------------------------------------

Q17580：

龔sir 你好,今次亦係問返投資組合，希望吾會麻煩到你

現在計劃左既組合
水桶1
1211 (10%) 等回先買，未有
1177 (10%) 等回先買，未有
1810 (10%) 等回先買，未有
XXXX(15%) 計劃中

水桶2
1928 (10%) 少量，分注進行中
788 (10%) 少量，分注進行中
823 (10%) 少量，分注進行中
9988 (10%) 等回先買，未有
2800 (10%) 等回先買，與月供一同進行

水桶3
941 (5%) 已有

現月供2800, $5000一個月
(現在90%現金，10%股票)

想問下2013, 3319同1833其中一兩隻加入組合，當部份水桶1投資 (15%)

2013 開始有盈利，雲業務有前景，但競爭不少。想問下現在PE太高，如果要考慮，等PE回落到30,是否相對合理？

3319 每年盈利有慢慢增長，以前抽新股有抽過，但平手就走左。
現在 P/E 42 太貴，如果要考慮合理價是否P/E約20-25,而平價在P/E 15?

1833 雖然未有盈利支持，但認為網上醫療有前景，想問$80 以下是否合理價 可考慮？

小弟知道大部份股票相對貴，亦不想太貴買入未算合理既股票，會睇住書，慢慢等機會。謝謝

龔成老師：

你計劃的水桶分配比例，基本上無問題，同時當中都是有質素的股，可以長線。這個方向可以進行。

當然，部分股現唔平，你投資時要注意。

但同時，永遠等跌先入，又有可能入唔到，因此，你可以利用策略，例如先小注，等跌先正式入，這樣可以確保就股股價向上，你都有一些貨在手。

至於想加入的股票，你可以考慮平安好醫生（1833）、雅生活服務（3319），這都是有質素的股，同時實際業務在不斷增長。

平安好醫生長遠有發展的，潛力股，去翻$80當然最好，但如果去到近$100，你都可以考慮。

至於雅生活服務，現時在合理區頂，其實可以小注慢慢入，入貨後等跌再入。由於佢有增長力，可以調高少少估值。

等機會是大方向，但都時，都要有一些平衡的策略。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。