【龔成問答信箱】（Q22281-22300）

Q22281：

龔成老師你好，我現有[email protected]大概佔我45%既股票
呢排再跌因為其下衞星場鑽石娛樂場停運
長遠黎講係咪都唔需要太擔心?

而家再跌,應唔應該再吸納呢?
先多謝你既意見!

龔成老師：

對佢會有中短期不利，但長遠，仍是有質素的。澳博控股（0880）有質素的，雖然中短期有點弱，但長遠無問題，仍是一間不差的企業。不過，你單一股佔佔45%，是高風險！

你要在反彈時減持，去翻佔股票組合比例15%以下較穩健。

------------------------------------------------

Q22282：

老師，請問建設銀行仲值唔值得長揸？

我6.07買入，萬咗2萬股，打算收息，但佢最近不斷跌，，目前應該係繼續持有定止蝕？ 應唔應該趁依家低位再吸納？謝謝

龔成老師：

建行（0939）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

前景不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但不是高增長型。

而長遠，會慢慢穩定的，不過，增長力不強。

你有貨可持有，如果目標是收息，可持有。但如果你想增長，就未必適合。至於是否加注，要睇這股佔你組合比例多唔多，以及你的投資目標。

------------------------------------------------

Q22283：

請問522同6869, 285 那一隻值博率高的，6869已經就快52週低位，請問此刻價位是便宜區嗎？

請問2158醫渡科技幾錢可入，現價都是略貴嗎，幾錢為合理區，因上年都要3x ,現在已接近

請問1833同2158比較，邊隻優質的呢

龔成老師︰

唔好用"52週低位"這種短炒分析，去決定一隻股票平貴。我地應從佢質素、行業發展、財務狀況等，去做估值。

因為過去股價，未必有效反映今天狀，特別係企業本質已經有改變，或者行業已有一定變動。你用過去股價作評估，好易出問題。

現價值博率計，現時長飛光纖光纜（6869）會較高，算係合理區。但佢質素有少少質轉弱的情況，唔建議大注。

而質素上，比亞迪電子(0285)會較好，但現價偏貴，回到$40以下，才好考慮。

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價算是略貴，最好回翻多D先考慮。

至於質素上，平安好醫生（1833）會好少少。現價算合理區頂位，最多只宜小注，或可以用月供去儲貨。

------------------------------------------------

Q22284：

老師，如果買樓，以下地區應該選那一區，我打算自住:

1. 荃灣區
2. 元朗YOHO series
3. 屯門瓏門
4. 將軍澳中心
5. 康城
6. 深水埗四小龍

Burget大约700-800萬, 想買較新樓齡, 地鐵上蓋/交通方便, 未來1-2年要BB, 所以希望有400-500呎, 以上選擇那區較好? 或另有建議嗎？

如考慮借按揭, 借幾多成會較好? 你建議男友將所有積蓄放晒落首期, 之後月供較輕鬆(但就冇$再做其他投資), 你建議借幾多成?

龔成老師︰

地區上，其實現時投資價值差唔多。但將軍澳這個典型的住宅區，雖然現時缺乏就業機會，投資價值較中等。

但未來交通配套會日漸完善，如將軍澳跨海連接路日後落成後有助改善交通，利用跨海連接路及將藍隧道，10分鐘便可到九龍區，會提高了這區的價值。

一般來說，市區的長遠價值會好D，荃灣區、四小龍算是這類。

但由於係自住樓，我建議你從生活角度做主要考慮。你要睇下邊個地區和單位，較配會你餘下幾年生活需要，又有一定投資價值(至少同大市同步)，就可以考慮。

現時按揭息口低，我建議盡借。用空出來資金，做投資增值，效果會較好。

------------------------------------------------

Q22285：

老師老師

7.8入1177
$28入1810
$44入左941

近日跌左我應再入D貨定唔理佢？？因我聽你講睇長線的

我仲有0001都係想長線收息的，現在佢又係跌左，其實現在咁嘅時世，應該點儲錢？？？唔通儲金？？

龔成老師︰

只要佢地長線投資價值不變，你照持有就可以。但是否加注，要睇佢平貴水平。

中生(1177)和中移動(0941)現價合理，但你已有貨，再等回多10-15%左右，才再加注會較好。

而小米(1810)現價依然略貴，回多1,2成才加注，值博率會高一點。

長和(0001)都有質素，但已經好大間，增長力唔會太高，但用來收息係無問題。現價算合理區中上部，可分注入貨。

但再提你一次，我地投資選股，會因應年紀和風險承受力去做決定。

中生(1177)和小米(1810)係潛力股，若你較年青，持有這類股票係可以。但若你較近退休，這類波動性大的股票，就不太合適。反而中移動(0941)這類收息股，會較適合。

而長和(0001)有平穏增長力，再加一定股息，基本上你是任何年紀，都可以考慮。

------------------------------------------------

Q22286：

1. 龔老師，收到你的回覆，好感動啊！我因為股市下跌好擔心提早退休的計劃受影響，心情極差。我這個人比較重感情，買香港寬頻，不買香港電訊，

是因為之前個女在那裡上班。太傻了，對嗎？現在，她剛轉工了，哈哈！

請問老師我現價應該加注嗎？我上次入了10000股。

我放工去港島可能太趕，請問上課地點會去九龍嗎？

2. 當然，退休後就不是問題。老師，我擔心的原因是公積金1半放股票，而且2成是2星期前才加碼的。其實，因為我從未投資，所以目前計劃是一半錢留俾基金經理繼續投資，

選均衡組合，其中一半全球股票，另外債卷等。一半由自己購入本港的收息股，當然分段購入，以候理想價格。

請問老師認為以上計劃可行嗎？基金經理JP Morgan, Fidelity 之類收費年息1.25%，你覺得我應該花這筆錢嗎？

靜候老師的寶貴意見。非常感謝！

龔成老師︰

1) 明白，但投資唔好太感情用事，我地真的要理性分析。可能你個女從工作角度，係一個好公司。但從投資角度，又可以能另一回事。

當然，香港寬頻（1310）投資價值都不差，你照保留用來收息，係無問題。現價合理，但若佢已佔你組合一定比重，就唔好加注住。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

至於上課地點，暫時都係香港島個邊，但我間中都會開星期六班的，通常一年開1、2次，星期六下午時間。

下次可能在今年年尾。你或者可以預早留位，只要whatsapp 55457212我同事，打「留位星期六班」就得。我地有具體資料就會 whatsapp。

2) 其實你已快要退休的話，所以投資都應該係相對保守。股票上，我之前提過的收息股，係適合你的選擇。

基金方面，都係一些收息型保守基金會較好。但由於基金有一定管理費，所以我比較建議係自行買收息股。

如果你唔識選擇，你可以買一籃子收息股的ETF，X恒生高股息率（3110）。它是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合。

而債券，都係可以，但必須係一些A級債券，才好考慮。

------------------------------------------------

Q22287：

呀Sir～ 我沽出了0968～我相信佢係潛力股，我本人對太陽能發電有好大興趣，但佢價位太浮動，我年紀係大，但心智未夠定，所以用呢筆小資金準備購入一手2800

好彩得你鼓勵，我身邊有好多人都覺得女性一到左32歲就年紀好大，潛移默化都令我覺得到左呢個年紀又結唔成婚，事業又無起息好失敗⋯⋯但自從過左期之後

（好多凡人都定義女性過左30就是過期，所以我初頭都咁諗，所有野都想趕在這條線完成）過左期後，好多野都看開了，其實仲有好多路可以行……天無絕人之路，

(現在首要做的就是養活好自己同我屋企人）但我相信根據你的方法⋯⋯就算係無咩天份⋯⋯都可以從衣食住行裏找到優質股，當初就是睇中中電公用股的特質，係價位74左右買了，

令我生活質素改善了。現在都堅持番工帶飯，不知不覺都帶了十年飯，就算比人笑我寒酸也不怕，都好過貼錢買難受，係咁嘅時候都仲帶到歡樂比人……哈哈

好彩我樂天，仲練到我面皮厚左。我一定要努力，就算感情上我是個失敗者（其實係我問題，男方對我都算唔差，係我當時太任性，同比左太大壓力大家

我仲衰花心，同其他男性傾計，係我唔啱）能夠找到可以相守的人很難，大家一齊加油!

Sir ~ 我成功購入一手2800! 好野

Sir 的書成功入手你本80後。

龔成老師︰

現在已經是2021年，唔好再比D固有舊思想影響。好多事情，其實唔會因為年齡，而出現限制。有時個限制唔係人地比，而係你比自己。所以，放開點，好多事件自然可以做到。

同埋，有時我地做野，係為左對自己有個交代。所以，有時唔好太介意人地點睇，因為只有你自己，才最清楚自己做緊乜。

信義光能(0968)係有質素，但佢波動性係較大。若你風險承受力較弱，換成盈富(2800)都係可以。

就算再優質企業(包括2800)，中短期股價都會有機會波動。原因不一定是本質出問題，可以係一些與其本質無關的因素。只要長線質素無變，中短期波動我地唔需要理會，長線持有就可以。

至於感情，是一個需要終生學習的課題。過去的就過它過去，吸引經驗，保持正面，自然就會有好事來。

還有，多謝你支持我本書。睇完之後，你可以先睇埋《財務自由行》和《股票勝經》。因為這3本，會係較適合初學者。加油!

------------------------------------------------

Q22288：

我係澳門既粉絲呀！對你既課好感興趣，唔知你會唔會考慮開網課呢？

我都想問下老師呀，因為我係有私人因素一定要賣左依家既自住樓，咁我賣左之後假設我會拎100萬去投資，咁剩低既錢我係咪可以買番間細樓做自住樓呀？

但會唔會供唔到呀？因為我人工唔高，還是租住屋先？謝謝老師喔～

龔成老師︰

網上課程，我暫時唔會考慮。因為只前都試過有人盜錄，比較麻煩，所以暫時只會開辦實體課程。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

每個都有自主需要，由於你終極目標的物業(900萬)，相較你現沽出物業(480萬)係有一段隔離。你可以先買入較細物業自住，另一邊用優質股增值，再去細屋換大屋。

至於會不供唔起，你要睇翻你個新物業價錢。你比較年輕，人工未算好多。可能你要預留較多資金，去比首期。

當然，另一個方法就係先租屋，再用套現物業的資金，去投資優質股增值。但這個方法，會令你財富組合，偏重晒係股市，風險會略高。

我會較建議用細屋+優質股的增值，因為這個方法會較平衡。

但緊記，這個細屋係用來將來換大屋，所以必需有投資價值，最少要做到跟大市同步。而且個呎寸唔好太細，少於300呎的單位，最好不要考慮。

------------------------------------------------

Q22289：

老師想請教你，如果我層樓7年前以$340萬買近屯市附近約460呎單位，依家升值$580萬，呢層樓近兩年放租每月收租$11500

我最近諗過因為層樓舊了27年樓齡，想賣咗出去攞d錢換另一層一手樓，資產增值潛力會否高d?定係一賣一買所花嘅費用更唔化算？

計唔計意比些意見我作參考

龔成老師︰

27年樓唔算話十分舊，但主要擔心會係到30年，會出現需要樓宇大維修時，這個成本上的風險。

係香港做物業買賣，成本絕對唔細。除非你現有物業，真係好有問題，否則你應維持現狀，保持以租養樓會較好。

另外，我一直都唔係太建議讀者去買一手樓。因為好多時都有溢價。變相令你買貴左，影響長線回報。

------------------------------------------------

Q22290：

龔sir你好，我26歲的，岩岩上星期7月5才開始真正開戶投資，係一個新手，之前有供一份儲蓄保險（供5年，岩岩今年1月供完，大約30幾萬），

大約一個月一萬三 人工左右，現在開了一個富途牛牛（入左18500）玩港股，sofi（入左25000）玩美股

以下是我持有既股

富途牛牛(18500本）
00451 2000股 0.355入
01725 200股 41.0入
01771 2000股 3.45入
Io. 美金25股 1.83入

sofi（25000本）
voo 美金5股 400.78入
apple. 美金3股 142.81入
dis. 美金2股。173.66入

因為之前唔識，左買右買已經蝕咗3000左右，想問我現持有股的因有d都虧損緊，我需要止損沽空，重新制定方向嗎？

還是應該再等這些股升？因現在比較迷惘是否需要將全部股賣走，重新制定下才再買？感謝

龔成老師︰

我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

協鑫新能源（0451）、恒達科技控股(1725)、新豐泰集團(1771)唔係全無投資價值，但質素只算一般，而且風險會略高，長線不宜持有太多。

Ion Geophysical Corp (IO)為技術中心的公司，其業務主要為全球石油與天然氣行業，提供地球物理技術、服務和解決方案。

本身規模唔算大，而且過往股價都好波動。佢這去數年，一直處於未有盈利狀態，加上近年營業額持續倒退。

可能佢面臨一些不利情況，佢唔係完全無投資價值。但不確定性好大，投資時最多只可以少少注。

其餘股票，都係有筆素，你照持有就可以。

其實你除左選股上經驗不足，令到買入一些較弱的股票外。我見你買入價都好多時係偏貴，這反映你定平貴能力，都係有所不足。

因此，我建議你未來時間，先利用月供模式，去建立一個股票組合，以減低買貴貨風險。

你26歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰VOO、盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰QQQ、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

如果你對這些股票，未太了解。我建議你先供一些指定市場的ETF，美股可選VOO和QQQ(後者風險較高)，港股可用盈富(2800)。到你有一定經驗，才買入其他股票。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，"保險"只係理財中防守部份，買足夠保障就可以，增值可以留比優質資產(如優質股、物業等)去做。現有儲蓄保可持有，但唔建議再增加這方面的開支了。

------------------------------------------------

Q22291：

你好，龔sir：本人今年35歲，之前都只是持有現金，關注你的F&B和買了你二本書，今年才初次投資股票。

現金：2百萬

儲蓄保險：20年期已供11年，一次領取可領40萬

一層樓：月供8千，貸款剩約1百萬

每月收入：8萬，二夫妻二個小孩。公司退休金：累積左50萬。每月需供養双方父母，所以能存3萬左右

持有股票26萬：
27 @61.6 *1000
1177 @7.38*4000
[email protected]*1000
[email protected]*1000
[email protected]*1000

[email protected]*67 月供2千
[email protected]*1000
[email protected]*2000
[email protected]*300

目標，50歲財務自由。 打算再投資20萬股票，應該如何配置，感謝關注。

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

現時你已經有物業類資產，現有資金，可以較集中在優質股，去做財富增值。

你35歲，應以增值為主，建議你用「平穏增長股」 + 「潛力股」作組合，去創造一個增值平台。2者比例，大約各一半。若你投資經驗較淺，潛力股佔比要下調至2-3成。

你現時持有的股票，都係有質素，你照持有就可以。但當中融創中國（1918）業務不差，有規模、品牌、銷售網絡，但同時有一定風險。

首先，中國樓市如果逆轉會有很大打擊，另外，這股的負債超高，無事就無事，有事大件事。

因此，投資這股不是不可，因為不是完全無質素，但要明白背後的風險，同時明白這一定會令股價較波動，自己最好控制注碼。

現在你每月可儲$30000，但只月供$80000，有點少。我建議先用5成儲蓄做月供(即$15000)，其餘先儲起，用一邊月供一邊儲蓄的策略。

現時大市只是合理區，你現有200萬資金，如果無特別用途，我建議用來投資增值。

你可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於"保險"，其實主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22292：

老師你好，我今年35 ,有17200 股滙豐係手，帳面都蝕緊40 萬，最近考慮緊要唔要放左一半或全部，等跌市再入其他做長線投資，如買其他想問有咩建議，謝謝，不勝感激。

龔成老師︰

你現時狀況，存在2個較核心問題。

首先，匯控(0005)都算係有質素，但佢只係收息股，增長力唔會明顯。

而當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你35歲年紀，應該先做好增值，而唔係儲收息股。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

因此，從資產配置角度，你係需要沽出部份匯控(0005)，將佢地換至其他增長股上。唔係佢質素有問題，而係佢唔適合你，同時佢佔你組合比例過重，而造成了不必要的風險。

以下是一些適合你的增長股，你可以沽出部份匯控(0005)，轉至這些股票身上。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)、粵海(0270)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

平穏增長股，現處於合理水平，可分注入市。現潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22293：

成哥你好，非常讚你的資產配置網上課程。學到很多，特別是買樓置業個chapter.想請教一吓操作。

現時我自己的生意前舖後居，所以住方面的租金己包括在租舖的租金內。打算5,6 年後再買一層自住物業。

非常深刻你講過用資產追資產，所以我最近買了一個出租物業325萬，做了7 成按揭。首期90萬左右，租金回報每月1萬2千。

利息方面可以只供息不供本。年利率1.95% ，定息2 年，之後視乎市場息率而定。打算前三個月交給經紀管理，當交學費學做業主。之後自己管理。

這收入要交税20%，末計每年維修之類雜費。請問這個操作時可行嗎？

風險上，我明白如果無人租和利率上升的話，可以會由 "資產"， 變成 "負債"。

買原因是同區差不多的單位要差不多350萬。這區租盤比較短缺所以放租能力尚算高。

想請問成哥有其他風險或地方要注意嗎？這供息不供本可行嗎？

謝謝！

龔成老師︰

其實物業只要有質素，都是資產。就算因為加息，或者無人租，令到你短期負現金流。但只要佢長線有升值能力，我地都會視之為資產類。

現時計，租金回報率算可以。但你要留意2個問題，首先你個按揭只係頭2年定息，之後個息口跟市場。但所謂跟市場，到底會係幾多? 會唔會令你月供大增，造成財務壓力。

到時如果大增，你要轉按，會唔會有大問題? 你要計清楚。

第二，你現睇翻個單位，呎寸會唔會太細。一般我建議投資物業，只好有300呎以上，即一個家庭的最低要求，咁個投資價值會較好。

------------------------------------------------

Q22294：

老師你好. 這幾年一直有關注你, 叫做小有所得. 亦很感謝你於2年前的回答

大學畢業快2年, 目前有26萬存款, 5000股 1177, 1600股 3067, 月入17k. 預計10月後月入23k

1. 本身計劃約2年半~5年後結婚, 現在白表單人身份抽中居屋. 由於基本肯定只會有粉嶺皇后山的300呎以下單位, 老師覺得應否袋住先?

a) 想買的理由是樓價近年升幅太誇張, 300萬的樓用了5年時間就變成近600萬... 如果私人市場繼續用此幅度上升. 再過3年說不定就完全負擔不到了

b) 不買的理由是皇后山居屋並不算太優質 (雖然相比之下真的便宜) 目前一刻並沒迫切需要, 如果樓價升幅不算誇張, 將來完全有能力用購買地點和大小較為理想的物業

c) 個人想法是現在先購入, 將來有需要時一定有地方住. 而有能力的時候可考慮換樓, 雖然失去短時間內買入更佳物業的機會, 但似乎較為保險

2. 想知道老師對2182天長集團有何看法? 上市後很快就能派息. GP較高, 現金一直維持高水平, 口罩業務得到政策支持. 但同時擔心

a) 為買新廠房而作出的借款會拖累公司發展,

b) 太依賴單一顧客,

c) 市場流通小, 股權有點集中.

謝謝老師的意見!

龔成老師︰

1) 香港長線樓市，我預都係會保持上升。你可以先買入此物業，用以資產追資產，去保持增值。

我地買居屋，都有一個好處，就係可以比市價較平的價錢，買入單位。從而空出較多資金，作投資增值。

但你要明白，這居屋單位，位置唔算吸引，投資價值一般。加上你將來轉手，你係要補回地價(除非賣翻比綠表或白居2)。而且，都有一定買賣成本。

到底係先購入居屋，定先用優質股增值，等遲些買較理想單位，其實無一個必然答案。

但現時從投資角度，股市會比樓市較有值博率。你可以從投資角度、未來收入估算、長線生活所需去作考量，估算出一個較適合自己的決定。

2) 天長集團(2182)我未仔細研究這間企業，有派息表面上係利好，但實際上，都要睇佢派息原因和長線政策。

此股派息因素，對我地判估佢投資價值，影響唔大。此企業規模細，盈利和股價都幾波動。

投資價值係有，但唔算十分高，而且都有一定風險。若你投資係可以，但不宜大注。

a) 用供貸買入廠房，唔一定壞事，只要佢產出價值較高，咁就可以。

b) 佢5大客戶佔收入近9成，主要客戶近6成，的確係有過度集中性風險。

c) 都算可以，未到話十分集中。如果你想知邊D企業有這問題，可以上證監會個"股權高度集中公布"網頁，裡面有列出相關企業。

------------------------------------------------

Q22295：

感謝你的回覆，我女友其實仲有一堆銀行股，不過他最近看了你的股票勝經，已知不能在銀行及科網再加碼，她現在每月月供5000，慢慢平衡返個組合。

不過我也留意到公平值變動，其實我不太明。（如進階班有講到我到時再學習）

另外，我真的覺得你太好，明明沒收我們咨詢費，但每次回應的質素很高，內容十分詳盡。

我希望你打造的品牌越來越有認受性。

龔成老師︰

多謝你支持，我希望可以透過這裡交流，去分享一些正確的投資觀念和知識。從以令一般散戶或者新投資者，可以有個更明確的方向。

其實公平值，我係初階都有講。主要係一些會計上數字(非真正現金收入)，好似物業類股票，你會最常見到。

每年當物業升/減值時，都會反映在公平值上，而這部份會計入盈利當中，令我們估值時出現偏差。

因此，我地去做估值時，要先排除這些數字，才可以得出一個貼近實況的結果。

------------------------------------------------

Q22296：

龔成老師，港交所新CEO攪重組，對港交所有咩影響？

你好龔成老師，請問晶片股中哪一隻相對穩陣小小值博較高？

早晨龔成老師，中國平安$73買，有冇買貴左？

龔成老師︰

港交所(0388)新政策，暫時唔見佢對集團優勢，造成重大改變，依然係一間好優質的企業。

如果晶片股，其實我較建議台積電(TSM)，佢係一間有質素架企業，在全球半導體業界有領先地位。

集團專注生產由客戶所設計的晶片，現時已經是全世界最大的專業積體電路製造服務公司。

如果你睇好半導體發展，可以月供，並長線持有。

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型。現價算係合理區中下間位置，分注投資就可以。

------------------------------------------------

Q22297：

老師你好，最近見中慨股因為反壟斷法都紛紛回調

As at而家︰
阿里： $196.5
騰訊： $527.3
美團： $285
小米：$26.35

老師覺得可以點部署？而家價位合理值得入嗎？

另外，啲內銀股都除哂淨，呢排睇緊建行同工行，現價分別係$5.57同$4.48，老師又覺得現價入手長揸好嗎？

唔該哂老師

龔成老師︰

中央近期推出不少政策，一眾大型企業股價，都因此而受壓。但我地分析時，重點都係會睇翻企業長線質素。

暫時未見，這些股票的長線盈利能力，有明顯變差，你有貨可照持有。除了小米(1810)要回多1,2成才算合理外，其他已在合理區較上部，若無貨，已可入小注。

建行(0939)和工行(1398)都在合理區，可以分注。但你年紀較年輕，這2隻都係收息，增長力麻麻，唔係太適合你。

------------------------------------------------

Q22298：

成哥有d人話錢小就唔好分散咁多投資，唔係就賺好小，咁長期唔賣，回報率一樣多，仲要冇咁集中風險，咁講岩唔岩。

如果我月供︰
1000巴巴
500小米
500中國平安
1000眾安
500金沙
500新鴻基
500中生製藥

會唔會太散?但我中意呢d組合。

同埋諗深一層，唔知仲投資舊經濟股有咩用，雖然仲有質素，用黎平衡組合，但我小錢直接全部潛力增長股咪仲好？

龔成老師︰

唔係因為資金少，就唔應該分散投資。只係資金少，會較難去做分散投資。任何情況，其實我地都要盡力做一個平衡的組合。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時月供組合中，股票都有質素。但眾安(6060)不確定性較高，我不太建議用來月供。

建議你將佢換成指數基金，去提升你組合的平衡性。

至於舊經濟股，雖然佢地增長潛力不及潛力股。但佢地勝在穏定性較高，唔似潛力股咁高風險。

你要明白風險高，不等於回報一定高，這是一個錯誤想法。如果成功，回報當然可觀。但由於佢波動性大，失敗時，損失也會較慘重。

所以，「潛力股」不宜持有過多，要平衡。若你係偏年青，可以佔5成。但若你較年長或投資經驗較少，要下調少少至3成左右。

------------------------------------------------

Q22299：

龔sir, 我有以下股票，我現在43歲，想問我的組合會否太多潛力股？我想增持平穩增長股，你有什麼建議？或者對我組合有何意見？

0823 領展 $60.58 有3手
1038 長建 $41.65 有1手
1177 中國生物製藥 $8.0 有I手
1810 小米 $25.7 有1手
1830 完美醫療$4.8 有8000股
6823 香港電訊$10.54 有1手

謝謝

龔成老師︰

以你43歲計，潛力股大約可以佔你組合3-4成，若你投資經驗較淺，只宜佔1-2成。

你現時潛力股比重，的確係有點高，但主要係完美醫療(1830)近年大升所致。你現時持股，不變都係可以。

但未來資金，要優先投入平穏增長股，去令組合平衡翻。

------------------------------------------------

Q22300：

你好龔成老師, 我32歲, 儲蓄有50萬 (其中有30萬剛剛做完一年定期), 月薪3萬5, 每個月用1萬2做月供股票, 儲1萬3,

有朋友提議我把剛完定期的30萬全部買中銀(2388)收息, 請問你覺得這樣可以嗎? 或者有沒有更好建議? 謝謝!

以下是我持有的月供股:

00823 (188股) @$75.6
00066 (306股) @$44.7
02800 (471股) @$28.52
00700 (7股) @$556.5

09988 (25股) @$205.0
01177 (847股) @$7.06
01928 (393股) @$31.35
02382 (33股) @$222.4

龔成老師︰

你現時月供組合，係可以。

但正如我之前所講，我地投資除了選股要有質素外，你都要留意組合平衡性。

個別行業唔好佔組合3成以上(我見你地產類問題，已經修正好)，但個股都不可以佔高於組合15%，否則都會出現過度集中性風險。

中銀香港(2388)係適合你，但不要30萬全數買佢，你要平衡分配在不同行業優質股上。

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18881-Q18900）

Q18881：

老師我係你學生，我想問分析ROE、毛利等財務數據時，是否不能單純數字分析，還需要很多長遠目光和對經濟的了解？我仍未能完全掌握。

龔成老師：

其實當我地分析財務比率時，你不能只睇數字，要同時配合「企業」、「大環境」。

例如今年盈利比上年度上升了10%，而ROE下跌了3%，你要分析，點解？

你首先要分析翻，佢收入點解會上升10%，分店多左？加價？大環境向好？其他行家的情況如何？

之後要睇翻ROE跌的原因，是盈利下跌，再投資方面的回報較弱，還是甚麼原因，當我地分析ROE時，往往要配合派息比率及負債因素去進行分析。當然，我會較建議分析長期的ROE情況，而不是個別的一年情況。

但你最重要記住，數字是死的，我地作為投資者，一定要將佢「意義化」，要配合當年的企業經營情況、大環境，去配合分析。

------------------------------------------------

Q18882：

Ar Sir, 1446鴻福堂，我研究過企業是有質素的(對員工好，今年又派特別息比小股東)，但打不入內地市場，今年上半年疫市竟然也賺了一些。

將來也衹可以主力本地市場，佢地話稍後會嘗試打開外地市，甘Ar sir你點睇佢地將來的發展和賺錢能力?

鴻福堂上市5年，但股價現在是0.450，你會否認為此企業被估值低左呢?

是否值得現在投資呢?

Ar sir, 甘有時會出現企業質素好，但唔代表賺錢能力強的情況嗎?

龔成老師：

鴻福堂（1446）質素算是不過不失，未算高質。產品都有一些支持者，但發展力卻不強。

睇翻財務數據，每年盈利不高，生意多年來無特別增長，反映佢在開發市場方面，只是做得一般。

現價算是合理，無低估，但就唔見到有好大的投資價值。

------------------------------------------------

Q18883：

老師你好，我一直不懂投資，直到幾年前在公司同事遊說下，嘗試接觸投資股票，但因為什麼都不懂，他說什麼好我就跟着買什麼，結果幾年下來買的一路下跌

以為等着等着就可能會上升，但似乎越跌越多，我就開始嘗試去看一啲投資書籍，才發現自己一直犯的錯誤，我想問問老師

我應該繼續擺股票一直等上升返，還是應該賣晒佢，換一啲有實力前景的公司，因為擺下擺下都已經蝕左唔少，我應該點處理？

龔成老師：

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q18884：

老師你好:我今年27歲。持有以下股票，但不知道應不應該繼續持有，定沽左部分購入更有潛力如9988或1177？

2128中國聯塑 $15.79@2000股
3662奧園健康$8.1@3000股
1810小米集團$15.29@3000股
2013微盟集團$10.16@4000股
1448福壽園$6@4000股

感謝你繁忙中解答! 祝安好!

龔成老師：

上述都是有質素的股票，其實你可以長線持有，只是部分潛力股，可能風險度會高少少如微盟集團（2013），你佔組合的比例就不宜太多。

記住，買入價不是重點，重點是該股的質素、前景，你持有的比例。

至於阿里（9988）與中生（1177），你都可以加入的，阿里就最好回翻D，而中生現價就可以開始小注。

現時大市合理區，未算平，你都要留有一定的現金在手。

------------------------------------------------

Q18885：

Hi 我儲蓄唔多，家庭開支太大。我有14萬，如果拎呢舊錢去投資， 買收息股， 想穩年年收息， 揀邊隻好？

如果想買阿里巴巴其實咩價位入最好？美國大選係咪會影響股市會下跌架？

最後如果我想買你既書睇， 邊本比較好？ 因為我係新手學買股票

今日去買左3本你既書

我都好耐無睇過書。

想問9988，如果想長揸，依家個價買係咪會太高？
應該大約幾錢入？

仲有1810我都想長揸，依家呢個價入都可以嗎？

龔成老師：

首先，你要想清楚自己的投資方向，想收息，還是增長，自己的風險承受程度如何。

至於中短期因素，就唔需要太著重，最重要是期的財富配置。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

阿里（9988）是增長型的股票，風險較高，最好回翻少少先，至於小米（1810）都是潛力股類別，但最好都是回翻少少先買。

如果你較初階，建議你投資ETF。

例如盈富（2800）。如果想較高增長，就安碩恆生科技ETF（3067），不過現價唔平，如投資，只能小注慢慢入，或月供。

你保持閱讀，增加左基本知識先，投資唔好急。

------------------------------------------------

Q18886：

老師點睇303，我見佢都幾賺＄，派息都吾錯，但書中沒介紹

龔成老師：

偉易達（0303）作為收息股，可以，但增長力就不算強。因為佢近年有些業務正向下，這會令股價向下，所以無無介紹，去到現水平，算是合理，股價相信唔會再大跌，投資值博率開始出現。

雖然近年的股價較一般，但本質都未算差，但就唔叫好強。

佢過往派息比率高達9成，成立於70年代，業務是電子產品，這麼高的派息，反映管理層明白這公司已過了最高增長的年代，之後只會是平穩增長。

公司已不需要每年投資發展，反而管理層、大股東，偏向想收息，因此這是重派息多過重發展的公司。

雖然佢係某些業務做得不錯，但發展心不強，同時大環境並不是高速增長，故相信佢之後都會平穩。近年這公司的生意，都是平穩增長，如果比較幾年前的盈利，都是差不多。

如果你目標係收息為主，此股可投資，但不能太過大注。

------------------------------------------------

Q18887：

龔sir，您好，今年年頭已經在Facebook專業看你關於投資的知識，還買了《80後百萬富翁》《50優質潛力股》學習，但我本人比較保守，遲遲都不肯動手，終於在今個月買入了幾隻股票。

本人23歲，有現金50萬，現持有：
2800 [email protected]
2382 100@130
1177 [email protected]
1928 [email protected]

還想入0027，現價合理區中部，我比較想直接入一手，你覺得可以嗎？

我唔係太想月供，因為我覺得月供回報好慢，但我明白可以平均買入價，所以好難做決擇。

還想入1211，但現價略貴，你覺得回到幾多可以直接入一手。

另外2382轉換去0285你覺得好嗎？這兩隻股你點睇？邊隻潛力會較高？謝謝龔Sir

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你現時23歲，唔需要太保守。而現金要適當運用，當然，現時大市未算平，唔能夠盡用現金的。

現時你持有的，都是有質素的，可長線。

至於現價加銀娛（0027），可以的，但要留意賭業佔你的組合比例會開始多。

如果唔想月供，就自行分注入，但就要留意現時股價未算平。

至於比亞迪（1211），最好去翻$80先入，當然，未必見到，如果好想入，最好都去翻$100以下先分注。

舜宇光學科技（2382）與比亞迪電子（0285）都有質素的，不過現時比亞迪電子，所以，你持有舜宇就得。

------------------------------------------------

Q18888：

龔sir, 小弟今年24歲，月入大概3萬至3萬5
每月有一個月供九千既15年基金計劃

到年頭先發現到咁係好傻既儲法，之前都試過炒牛熊結果輸左幾萬蚊，之後買左龔sir幾本書睇發覺要改變投資策略

然後而家扣曬家用洗費每月大概有五千蚊放係股票市場
而我而家拎有既股票係

港股
788 @1.5 16000股
981 @26.95 500股
1368 @3.09 3500股
1810 @10.4 2400股
2638 @7.43 500股

中國股票市場
601985 @4.39 600股
2665 @2.6 1200股

想請教一下呢個投資組合算吾算合理/合格，亦想了解一下有無繼續投資落去既遠景，唯一好岩心水既小米已經升到成18蚊，仲好吾好繼續買貨，定係等佢回一回？我自己對呢間公司既信心就好大下。

請龔sir俾啲意見賜教一下，多謝你

龔成老師：

衍生工具好難賺錢的，之後唔好再玩。

至於基金計劃，要具體分析先會知當中的質素。不過，月供$9000可能有點多。

至於現時持有，我無特別分析內地股市。港股方面，持有的相是有質素的股，大致上無問題，中芯（0981）唔建議大注。

中國鐵塔（0788）、小米（1810）可長線。小米開始貴，唔好心急加注，原有貨要長線持有。

特步國際（1368）都可以，但質素不算最高之列。

港燈（2636）只是收息股，未必適合你的年齡。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你的持有大致無問題，現時大市未算平，如果要入貨，要慢慢分注入，唔好太急，要留有現金。

------------------------------------------------

Q18889：

Hello, 本人有一物業，銀行估價300萬，現收每月租金6300，如果賣了，買股票收息，能達到財務自由嗎？

有推薦的收息股嗎？感謝

龔成老師：

假設套現得到$300萬現金，之後全部投資收息股，但到5%股息。

一年預期會收到股息，$15萬，每月平均會收到股息$12500。能夠財務自由，就要睇你的消費金額。

要留意，投資收息股，最好只作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理，未到平宜，因此買入時宜分注，同時不能用盡現金。

------------------------------------------------

Q18890：

龔老師妳好，請問港鐵00066而家入算抵嗎？

同埋小米集團01810
係咪都屬於回落緊

感謝龔老師

龔成老師：

港鐵（0066）現價合理，可以分注投資，長線持有，這股有質素的。

至於小米（1810）有質素及增長力，不過，現價唔算平，去翻$18以下會較為合理。所以最翻落少少先開始分注。

------------------------------------------------

Q18891：

老師你好！ 家人之前幫我買了00136, 10萬股 已蝕了8k，00871, 10萬股蝕了35k, 02858, 一萬股蝕了60k, 還有02882, 10萬股蝕了38k， 現在 應該怎麼辦

龔成老師︰

恒騰網絡（0136）比較麻煩，因為暫時的業務賺錢能力仍弱，不確定性大，你唔好再加注。如果佔財富太多就減持，如果不算多，就持有先，到反彈到一定程度後就慢慢賣出。

中國疏浚環保（0871），業務不佳，5年有3年處於虧損狀態，投資價值不高，加上核數師意見中，曾經出現了修定報告，這反映當中有少少問題，但其後算是調整翻，但這都反映，這企業有些地方有古怪，要小心。

近期股價大幅波動，炒多過實際，風險高，因此對這股有保留，賣出會比較好。

易鑫集團（2858）企業仍處於燒銀紙的狀態，這類股風險較高，不過，我唔敢話佢完全無潛力。

這類股估值難，不確定性較高，只可以話，小注好了，暫時我未能確定佢業務真的向好。

香港資源控股（2882）主要透過全資附屬公司勝力經營電鍍化工品貿易業務。另外，透過收購香港珠寶零售連鎖店－金至尊品牌，去踏足珠寶零售業務。

此股連年虧損，再加上2019年在核數師意見中出現"保留意見"，代表盤數可能有問題。建議你沽出，轉至其他優質股。

睇翻你以上持股，質素上都比較唔理想。我建議你在再投資前，去多讀投資相關書本、年報，新聞和相關課程。提升自已選股能力後，才再出手。

------------------------------------------------

Q18892：

請問的士牌是一個好投資嗎？

龔成老師：

的士牌，現金流工具，好處係投資者可利用借貨，付首期購入的士牌，然後收取每月穩定的租金收入，原理與買樓收租一樣。

按揭成數高、管理不難、買賣成本低、限制少，所以都是一個不差的投資工具。

不過，近年出現的叫車程式，對佢有一定的影響。相信長遠，的士牌的增長有限，只是一個平穩及收息的工具，前景只是中等。

現價合理。我會認為，如果資金真的較多，作為整個財富配置的其中一部分，都可以的。

------------------------------------------------

Q18893：

你好 龔老師，我只持有三隻股票
分別係9988 300股平均價係$262.67

IGG 10000 股 平均價$9.37
303 偉易達集團 1500 股
平均價格係50.67$

個倉overall都有賺

但想減持股票數量/ 優化股票組合
要如何做好？唔捨得蝕放

龔成老師︰

首先，如果你個倉只有3隻股票，會有"過度集中"架問題。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

另外，當我地選擇投資項目時，會參照自已人生階段。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

你持股中的IGG（0799）和阿里（9988）係潛力股，而偉易達（0303）偏向收息股。

你應睇翻自己人生階段，去調節組合持股。

最後，IGG（0799）是有風險的類別，雖然佢財務數據不差，但業務本質的不確定性大，軟件及遊戲都是變化較大的行業，這種不確定性可以令企業好勁或好弱，因此你要明白這點。

這股可以有潛力，但投資時，不宜太大注。

------------------------------------------------

Q18894：

老師好,向你請教後經過一年多了
早前停工大半年,可惜錯過了3,4月時的大跌市
最近在閱讀你的年報勝經,希望能了解多點關於年報的訊息

回想1年半前的自己,發覺對投資認識更多後不知不覺心態更比以往只做定期較為進取得多,亦開始明白知識真正的重要性。

目前月入2萬8千,持有股票組合約28萬,定存30萬,現金約20萬

恒生銀行2手 成本197
金沙5手 其中2手成本47.6 月供部分約3手成本35.57 月供2000

盈富 4手 成本26.96 月供3000
比亞迪 325股 成本43.87 暫時停止月供
恒地 1手 成本34.7 月供2000
煤氣 3手 成本13.91 月供2000
長建 1手 成本50.29 月供2000

首先多謝老師介紹比亞迪並帶來不錯的回報

可惜早前月供期不長,持貨量不多,於80元時覺得價格稍貴停了月供,並採取了升一倍放一半的策略

如今只剩下不足一手

本來打算於60元左右價位時恢復月供
豈料「一升冇回頭」,現在更升至接近140元的價位
似乎較難期望回落至60元左右的價位

1.請問這情況下老師會建議採取甚麼策略?恢復月供還是應該繼續持貨並改為投資其他潛力股?

另外我打算在美股戶口開戶後月供約HKD$2000 ARKK及HKD$3000 VOO,分散地區投資風險

並於定存中抽取3-5萬轉移到即將推出的ibond賺取較高回報

2.請問我投放在月供部分金額會否太多,令將來持有現金不足?

3.目前持有煤氣3手,恒地1手。明白恒地及煤氣屬同系股票會有集中風險,有否需要調整目前的策略如停供增長力減弱了的煤氣?

4.現時月供部分除了盈富的成份股外均屬舊經濟股及平穩增值型。有感今年疫情經濟受創下舊經濟股表現差強人差,「升市無份、跌市一齊跌」。如今股票組合也是靠比亞迪一隻支撐著其他股票的虧損。

　請問有需要檢討及重整名單,新加1-2款潛力股或新經濟股以增加第1個水桶的佔比及作風險平衡嗎?

5.騰訊及阿里巴巴等科網股均升至歷史高位,市場亦出現針對新經濟股的過熱訊號。如果作重整股票組合名單,是否應該待回落至合理價才轉馬?

6.中國阻止外匯流失,對金沙的基本面有影響嗎?

7.老師對即將上市的螞蟻集團有何看法?記得你提過IPO一般以稍貴的價錢上市,但考慮到螞蟻集團的獨特性,是否應該抽這隻IPO?如否,哪個價位才算合理價?

8.同樣,港交所的合理價應為多少?我對港交所及必瘦站一直有興趣,尤其看到老師介紹及持有必瘦站後對它更有信心。但再購入這2隻股票後會否持有過多股票令組合變得混亂?

問題稍多不好意思,期待老師的賜教

龔成老師︰

1） 比亞迪（1211）現價偏貴，我建議回到$100以下，才再開始翻月供會較好。$80以下先正式買入。

此期間，你可以供住盈富（2800）先，或其他潛力股都可以。

安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）

投資美股去分散地區性風險，係可以。只要你對這些股票係了解，同埋佢地係適合你年紀，咁就無問題。

如果你未到退休之年，IBOND我就唔太建議投資。

2） 以現時大市在合理區計，每月儲蓄大約用一半做月供，一半儲起等大跌市機會，咁會較好。

3） 問題不大，煤氣（0003）近年係弱左，但長線投資價值依然存在，你可以維持月供策略。

4） 其實你月供股票，都係有質素。受大圍環境變差影響，難免會跟隨下跌。現時你月供的股票，反而因為調整而值博率高左，所以照月供就可以。

至於是否雖要加入一些潛力股，就視乎你年紀。如果你係較年青，長線的確應該加入1,2隻潛力股，去提升組合增長潛力。

5） 騰訊（0700）及阿里巴巴（9988）現價的確係偏高，如果直接1手手咁入貨，我就唔建議。但若以月供形式，去慢慢儲，現階段依然係可以進行。

6） 內地政府主要想防止太多資金外流，這樣難免影響到賭場收入。但由於金沙（1928）主要以中場客為主，影響預期相對其他以貴賓廰為主的賭場同業為少。

而且，這個只會係中短期因素，長線集團發展依然係正面。

7） 無錯，好多IPO上市價都會偏貴。但我地要考慮埋佢質素和潛力，去取得一個平衡點。

但由於螞蟻集團上市資料未公布，故現時很難說是否值得買入。

8） 港交所（0388）是壟斷企業是典型的優質股，值得長線持有。

在$300水平以上就開始貴，你最好等佢回到合理區附近，才開始慢慢入貨。此股算有一定潛力，加入組合係可以。

必瘦站（1830）有質素的，佢生意穩定，同時有平穩增長的情況，佢盈利都不錯，保持增長。

比較特別的是，佢的派息比率高達100%。代表佢有自我成長的能力，不用投資太多的資金，都能令企業成長，這是佢優質的地方。同時反映管理層重派息多過企業增值，因為管理層未無太大的發展意慾。

不過，近年管理層有所改變，表示有可能減少派息，投入更多在發展方面。雖然派息少左，但潛力就有所提升。

整體而言，佢業務有一定不確定性，未知之後的業務、盈利、派息會點發展。現價合理區頂。

------------------------------------------------

Q18895：

龔成老師你好! 本人39歲, 未婚, 未有結婚生小朋友打算

本人現與母親住在公屋兩房單位, 母親是主婦, 自己月入HKD65000-.

1-2年前開始閱讀你的文章, 增值投資認識不少. 現有現金180萬左右, 股票10萬元, 基金5萬元.

想提供更優質的生活給家人及增加家用空間, 有置業打算. 有兩個方向, 不知如何是好.

- 用綠表購入3房二手居屋, 700萬, 9成按揭25年, 首期開支HKD一百萬左右, 月供需 HKD28328左右. 預留50萬裝修, 餘下30萬再作投資. 但二手居屋已有20年, 怕日後轉售有困難

- 先用50萬以租置計劃買下現有公屋單位. 另外, 外出租用3房私樓住 HKD2-2.2萬. 餘下130萬先作投資.公屋單位現估價250萬, 禁售期後轉售獲利200萬.
待2年後,

不知樓價是否再有下調,加上自己的130萬以首置買入私樓3房, 裝修費用後餘下投入債券基金收息, 可協助供按揭

請問那個方案比較好? 或有其他建議? 謝謝!

龔成老師︰

從平衡與穩健角度考慮，方案一「用綠表購入3房二手居屋」較好。

雖然居屋在投資價值未必及私樓，但從自住角度，不差的，而你最大的目的是「優質的生活給家人及增加家用空間」，相信這一步較穩陣地去做到。

至於買公屋的方案，由於你的目的只是借公屋作跳板，期望樓價下跌並之後買私樓，由於樓價下跌存有不確定性，到2年後賣出較難確定樓市情況，因此存在未知數。

如果到時要再等，你就要持續支付租金，加上年齡漸大令按揭年期有可能受影響，所以不確定性較高。

另外，債券基金有好有壞，要留意，有不少網友同我分享，投資債券基金出9現了賺息蝕價的情況，所以唔好以為一定能依靠當中的現金流，唔好比佢的高息吸引。

------------------------------------------------

Q18896：

龔sir你好~機緣巧合下係fb見到你嘅分享，獲益良多~啱啱都買左你兩本著作（股票勝經和50優質潛力股，閱讀中）了解到時間是令財富增值的不二法門，想就住自己的情況問下意見~

我今年30歲，單身，月入將近2萬。扣除1/4家用，1/4生活花費，1/4雜項（先儲埋支付包括保險，或者家裡要換的家電或電子產品等等比較大的支出），剩下大概5000能用作每月投資。

個人的目標是希望45歲前能儲到250萬用作移民，並且之後能靠被動收入維持生活。

現時只有投資美股（半年前開始，因為可以一股股買，資金少易入手），投資左26000港幣左右。暫時睇有6%升幅（買得比較雜，有2/3都係大公司）你認為需要轉返d錢返黎嘛？定係繼續放？咁之後仲入唔入錢過去？

港股方面，有1手中生（1177），7.92買入打算長揸~另外有5萬左右現金，係咪應該拎一半黎投資？定揸住等個市跌返少少先？

另外睇到龔sir的分享，想開始月供股票的計劃。

打算每月供2500蚊盈富（2800），1500蚊比亞迪（1211），1000蚊阿里，（9988），依個配搭可以嗎？（假設唔再投資落美股果邊）雖然長期供股票可以平均成本，但係見到近日阿里同比亞迪都創新高...宜家開始供可以嘛？

本人係投資新手，都係今年先開始慢慢學習，問題比較多，唔該曬龔sir~

龔成老師︰

當我地選擇投資項目時，應參照自已人生階段。年輕時，可以用"平穏增長股" + "潛力股"，到中年"潛力股"比重要減少，到近退休應集中在"收息股"上。

中生（1177）有質素和適合你，長線持有就可以。而美股方面，你可以睇翻你現有股票，是否有增長力、企業是否優質、行業前途如何、財務狀況等，去決定是否值得持有。

但我想你清晰翻2點，首先，唔好因為"入場費平"，就去投資一隻股票。我地選股重點係"企業質素"，一隻$50000入場費架優質股，長線可以繼續升。一隻入場費只要$500架劣質股，最終係可以跌到1蚊都無。

另外，大公司唔代表一定有投資價值，佢都可以係連年虧損。所以，投資前要了解清楚，唔好見係有名或者大公司，就盲目去投資。

以你年紀，投資策略可以比較進取。你現時月供選股可以，但由於現時比亞迪（1211）偏貴，你最好等佢回到$80左右，才開始月供，現時可以先用其他潛力股代替。

潛力股︰安碩恒生科技（3067）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）

學習方面，除左睇我架書，你可以多睇財經新聞、企業年報和上些相關課程。

本人的【投資倍升股課程】適合初學者的，每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。課程時間，你可以留意我FB。

------------------------------------------------

Q18897：

龔sir 2800 或者3067 之類既 ETF 或者基金增長會唔會比普通既股票慢?

因為我見到好多時你都係叫人穩陣d就買2800, 但佢真係比普通股穩陣? 但我以前睇過佢派息又唔會派得特別多,以新手入市又唔算好平,所以有呢個疑問。

我依家開始要慢慢了解下車股,其實車股係咪都係睇佢賣車同有無研發新產品之類?

好似以我所知內房就睇賣樓,有多負債,土地儲存,同國策之類。呢種分析方向是否正確? 你會唔會建議人同行業分開投資大同細既公司?

例如2333相對175係細隻d, 175買大份小小,2333小注咁樣?

原來係有人贊助佢地推介人買股票,難怪講呢d野既人好多時係咩基金董事之類既人。

龔sir之前話長線投資,咁我幾時先知道嗰個股票我應該要食糊?

因為我都有一個股票係咁,(3883)係美國總統一開始同中國玩貿易戰既時候5蚊左右買左2,3手,一路揸都揸左有2到3年,佢由5蚊跌左落4蚊

之後高位升到13蚊,但我都無放,依家落到7個幾,咁我係咪錯過左最好賺錢既時機? 因為有d後悔無係12蚊嗰陣放,覺得佢可以有能力升上去無放。

依家你建唔建議轉投其他板塊如車股,因為依家內房既國策收得有d緊,雖然人仔有升,但內房都無乜升。所以就想問咁算唔算長線投資錯過食糊機會?

我都買左本年報勝經睇,慢慢學下野先。

龔成老師：

盈富（2800）有平穩增長能力，不是高增長類，但由於有50隻股在其中，風險得以分散，以我地投資，一定要「先想風險，後想回報」，因此，先平穩風險，同時有平穩回報，這是好選擇。

至於安碩恒生科技（3067），原理相同，而當中是潛力股，不過，不少現價都唔平，所以買入時唔好一次過入，要慢慢分注，或月供。

至於汽車股，要睇佢的產品，客戶對象，品牌，過往賣車的數據，優勢，研發能力，有沒有與其他公司合作，長遠發展，財務數據等。

無論車還是內房，你分析時，重點是睇「這企業」，你現時是買入一間企業，就要用企業的角度，分析當刻及長遠的情況，同時買入價是否合理。

至於你話細隻大隻，你唔好比股價數字、入場費多少影響，最重要睇「企業」。

另外，唔好理中短期的股價波動，最重要是長期持有企業，如果企業有質素，可以一直唔放。如果升到貴，賣部分都是可以的。

你現時的想法，同一般散戶一樣：「著眼在短期升跌，以為自己能在高位賣出」，如果你繼續這樣想，結果只會與他們一樣（根據統計，香港散升，有9成在長期計是輸錢的）。

------------------------------------------------

Q18898：

龔老師您好，有事想請教，周不時睇到有啲所謂大行不斷作出或修改估價，這是為什麼呢？睇到有啲書話被某某機構阻擊，這又是什麼意思，唔明點解一隻股會有不同機構給予不同估價，咁會唔會被弄到停牌除牌架？

龔考師早晨，補充詢問這些曾被質疑評估及阻擊的股我們又應該如何分析應對？

龔成老師：

其實大行報告，都不能盡信，有時可以參考下，有時有佢地本身的目的。

例如本身佢沽空左某股，然後就發表報告，講這公司有問題，之後就會令股價大跌，佢地就可以從中獲利。

所以，這些報告，參考下好了。

其實好少會搞到停牌，除非該公司自己本身有問題。或者最多為澄清，而暫時停牌。

我地睇到這些報告時，唔好盡信，要自己睇翻財務數據的可信性，同埋這股票過往的獨立核數師意見。

------------------------------------------------

Q18899：

1) 我在32.4入了一手金沙，得知現時金沙處於合理區的低位，有意再入一手，但後來獲得更多資訊後覺得銀娛會相對更大潛力，如再入金沙好像會有點矛盾，我相信金沙和銀娛並不適合同時持有。我對金沙應採取甚麼方向？

2) 多謝你上次的回答建議我加大潛力股的比例，我之後閱讀了50倍升股，實在大開眼界，我對數間公司都有投資興趣，想請教應投資次序和現價是否處於合理區。

354 中軟國際
6869 長飛光纖
522 ASM Pacific
謝謝解答！

題外話，我之前去尖沙咀誠品購書時發現你的書在商業投資類都受歡迎，我在早上時發覺在短短十五分鐘已有人選購和閱讀。

龔成老師：

1）比較平衡的做法，是投資銀娛（0027），因為這可減少你集中風險。其實兩隻現價都合理的，金沙較適合收息及平穩，而銀娛則有增長力，兩隻同時長期持有，可以的。

2）在這3股中，中國軟件國際（0354）、ASM PACIFIC（0522）的優質度會較高，暫時可留意這兩股，中國軟件國際在合理區，而ASM PACIFIC在合理區中上部。但始終業務都會有少少波動，因此投資唔能夠過份大注。

哈哈，多謝報料！

------------------------------------------------

Q18900：

老師你好,我看了中國光大綠色環保(1257)既中期報告,咁就有以下既問題/分析,希望可指點一下!!

(1) 2020年收益同2019年收益好接近,但2020上半年係疫情較嚴重時候,咁如果2020都可以做到2019同期既收益,係咪算唔錯?

(2) 損益表入面既"財務費用"係咪指利息支出既意思?如果係既話,推測公司將收入既一部分去還錢,就會影響公司長遠發展,呢個推測合唔合理?

(3) 另外,"財務費用"高過上年,而且公司負債係高過上年,請教下兩者會唔會有關係?

(4) 現金流量表中, "經營活動所動用之現金"比上年高左幾倍,可以點解釋?謝謝老師！

龔成老師：

1）可以咁講，不過，我地分析時最好用較長期的角度分析，中期業績只是輔助，但不是分析的核心。我地要用長期的角度去了解左企業先，再因應中短期業務情況去調整。

2）對，即是融資方面的成本，我地會睇翻佢的成本多與少，佔盈利比例多少。以及分析佢的風險度。

3）兩者有關的，要睇翻佢高左是否到了危險水平，還是仍可接受。

4）當中涉及較多的會計因素，好難在這裡簡單解釋。但經營活動現金流保持正數並有向上情況，一般都是利好的。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17841-Q17860）

Q17841：

你好，龔老師，經朋友介紹，開始睇你Facebook，亦已開始咗月供股票，同開始股票聖經
我以前亦係聽number去買股票，以下都想請教你幾個問題

1) 剛剛開始咗月供
2800 ($6000)
0012 ($6000)
依個組合可以嗎？

2）想請問下你點睇依幾隻股票
9618 京東（1000）234.6入
9966 康寧傑 （10000）15.98
1580大森 （25000）0.52入
883 中海油（10000）10.68入

再睇你推介，亦已買了
9988阿里 （1000）
778置富 （10000）

同埋我係股票初哥，應該選擇邊幾本書睇最好，想學點去了解公司架構，公司估值去選擇股票，想揾一啲潛力股，一啲平穩增長收息股去投資

另外選股勝經，年報勝經，50優質潛力股，50值博倍升股，50穩健收息股 你覺得我應該點排住去睇，同適合初學者睇

龔成老師：

1）盈富（2800）無問題。

恆基（0012）雖然是優質股，但都唔好太集中，建議你供$3000，另外再找另一隻去供。

2）京東（9618）有質素的。

康寧傑瑞製藥（9966）要注意風險，這股只是概念，未有盈利。

大森控股（1580）虧損中，投資價值不高。

中海油（0883）是商品企業，雖然都有質素，但唔值得持有太多。

阿里（9988）、置富（0778）可長線。

你睇《股票勝經》、《選股勝經》，《50優質潛力股》，《50值博倍升股》，《50穩健收息股》、《年報勝經》。

初學者最好熟讀《股票勝經》。

------------------------------------------------

Q17842：

Hello Sir，我係你學生，今日用評估表第一二頁，分析左1297同1809。

1297優質度我比佢有18分，政府係佢既大客，公司發展方針拍齊運用大數據同低碳/環保政策。但睇番幾年都唔似有新發展，而且佢股價長期無起色，係唔係唔值得花時間用之後幾頁做深入分析?

1809初步分析優質度我比20.5分，企業評分444432。會否太過鬆手?

但整體我對佢研發新產品步伐的確有信心，佢仲發展埋泰國市場，其實我認為佢仲有發展潛力。
另外佢算水桶一嘛?

龔成老師：

中國擎天軟件（1297）本質不差的，不過，佢之後的增長動力的確有減慢情況，因此估值上認為佢會較低，但如果佢能保持這增長，其實現時的股價有吸引力的。

這股的其中風險，就是規模較細，以及行業存有風險。

要睇你想投資那一類股，佢優質度存在，但如果你想找潛力股，就未必值得再分析，唔需要用「企業評估表」的3-6頁。

但如果你想找一些有基本增長力，以及現價唔算貴的股，這股可再繼續進行分析。

至於浦林成山（1809）我自己都無特別研究，初步睇佢的財務數據是不差的，不過以我的經驗，好少企業會去到有20分，你可能比分標準太鬆，我建議你睇多一次我比你的範例，你每一點分析，同埋加分只是第2頁，第1頁只是初步指標。

同時，建議你進一步分析佢產品及市場競爭，佢現時擁有的技巧，是否有優勢，競爭對手好難入到佢的市場？長遠的發展如何，你可以加強分析。

------------------------------------------------

Q17843：

老師你好，想問下596，浪潮國際值唔值得投資，我見到佢嘅業務都係同雲業務有關，因睇好未來5G市場，想睇下有咩潛力股可投資，謝謝

龔成老師：

浪潮國際（0596）佢地有部分業務，發展雲服務的，睇翻之前的營業額，都有唔錯的增長，現時去到$4億元，但就仍然虧損中。

不過暫時佔比唔算高，同埋未知幾時有真正的貢獻，這刻未能有太大期望。

其實業務都不算差，整體投資價值都有的，但未能話佢好有潛力。

------------------------------------------------

Q17844：

你好 我岩岩開始接觸股票一段好短嘅時間 但好唔好彩就誤信騙徙 買左1936輸左好多 不過我好後生無野唔輸得 當今次唔好彩買個教訓

我想問下依家咁嘅情況 得返兩三萬蚊本金 我應該要點樣做同埋有啲咩類型嘅股票我係可以考慮下咁架？

港股美股都會考慮吓無所謂

中招後睇到你嘅野覺得同之前嘅騙徙好唔同 比較中肯有道理 所以想請教一下你 因為真係初哥

或者有無咩野我係可以train下練下先 因為真係太fresh但我真係好想學下 因為除左想賺錢之外我都想係邊度跌低邊度起翻身 你可唔可以俾我跟你學野

龔成老師：

這是一個學習，你要好好記住，當你之後每次投資時，都提醒自己，要做足功課，只投資有質素，價格合理的企業。

你這刻反而唔好心急投資，財不入急門，你儲下現金先，同時打好基礎，之後先慢慢投資，唔好急於一時。

你可以睇《股票勝經》同埋有關巴菲特相關的書，巴菲特係全球憑投資賺最多錢的人，你跟佢的方法一定有唔錯回報。

------------------------------------------------

Q17845：

老師：2380 中國電力，我上市抽現只有1000 股，咁多年來都有派息比我，有見價位低，派息不俗，是否值得增持收息？

我有留意你常提的領展，地鐵和盈富基金，入場費高一截，如果息口比例一樣，我覺得買中國電力感覺更好。這想法是否太幼稚？

龔成老師：

中國電力（2380），你預長遠的增長力都有限，所以要睇你的投資目標，如果你目標是這部分資金收息，就繼續，如果想增長，就轉其他。

入場費唔好成為你建立組合的限制。

如果你太集中在單一股票，這就會造成風險。建立一個平衡的組合，是投資好重要的事。

------------------------------------------------

Q17846：

龔sir你好，好多謝你教識我買入股票資產而非短炒呢個概念，呢大半年來我開始買返股票投資，感覺到現在開始朝正確方向前進！

雖然小弟29歲起步較遲，但都要盡我所能達成財務自由的終極目標！

有兩個問題想向老師你請教：

(1) 美國無限QE令資產價格無限上漲，只是依靠美元國際貨幣的地位維持呢個騙局，可見的將來聯儲局亦會受制於既得利益者的壓力而維持量化寬鬆。

假若有一日美元真係崩潰，而港元又和美元掛鈎，咁我地買左港股、港樓和港元資產既咪會有重大損失?

有盛必有衰，美元價值終會回歸合理水平，但現時在香港我們又不得不買資產來保持購買力，定其實我都不能擔心咁多，唯有寄望未來數十年資產繼續因QE上升?

(2) 老師點睇耀才(1428)(我$2.06買左)?自從耀才去年初推出股票APP後積極拓展內地市場，今年首5個月，透過旗下手機應用程式(APP)「耀才證券寶寶」開戶量

較去年同期飆升近5倍，使用量亦按年勁升約4倍。落盤總量超越560萬宗。而受惠於資產泡沬上漲和中小型劵商結業，理論上耀才都可以好似港交所(388)咁長線看升?

請老師不吝賜教，謝謝！

龔成老師：

1）港元同美元有聯匯，因此，港元可以理解等如美元。

如果美元大跌，港元都會，「貨幣」會貶值，而我地只要持有「資產」，就能自保，物業、車位、優質股，都是典型的資產項，這些資產的價值不會減少，反而是保值的方法。

2）耀才（1428）都不差的，不過，這類證券相關股，會較受投資市場影響，因而比較波動，這類股只能小注投資。

長線持有是可以的，但你預中間的上落可以好大。

------------------------------------------------

Q17847：

你好 老師，本人同先生未來想買樓置業..先生三十出頭月入四萬 但家庭開較大 每月可能只儲到5000..未必做到月供股

保險有十幾萬但唔可以拎出黎...請問如果想入手長遠投資嘅股票...

(可能都係入得一兩手最多幾萬蚊....有沒有意見可以比到我們一家....
謝謝老師指教

龔成老師：

首先，唔建議你地投資太進取，因為如果想好急儲到錢買樓，而強行投資高風險類，最後結果可能未如預期。

因此，你地這刻只能從收入與儲蓄著手，如果可以的話，想想增加收入的方法，短期可想兼職或小生意，長期就要想想突破現時的職位，如果更進一步。

另外就是儲蓄，有家庭儲蓄會較難，但都可試下每月定一個儲蓄金額。

另外就是適當投資，你地可投資優質、平穩增長類股，都能助財富增值。

同時，可以努力學投資，希望小部分資金能找到潛力股，這都可以令組合回報增加。

------------------------------------------------

Q17848：

你好老師,請問775有投資價值嗎?感激,會不會變了一文不值的垃圾股,我想在775,3868之間選一隻,想看看老師意見,和想看看老師有沒類近這兩股的潛力股推介謝謝

龔成老師：

長江生命科技（0775）有投資價值的，不過風險就較高。

佢從事產品之研發、製造、商品化、推廣、銷售及投資，涉及的項目和資產涵蓋保健、醫藥及農業相關業務三大範疇。

農業相關業務和人類健康分別佔總收入約4成和6成，農業相關和保健產品業務這2個範疇，相信未來會平穏發展。而集團主要潛力，來自醫藥研發部份。

這部份成功會有好高回報，失敗就變得好差。這部份會係潛力所在，同時也是風險所在。投資只要控制注碼，都可以。

信義能源（3868）有質素的，都可以長線投資，都是潛力股。

兩隻你都可以考慮，長江生命科技風險度會高少少，不過潛力又會大少少。

------------------------------------------------

Q17849：

龔成老師你好。本人36歲，投資初哥，月入5萬，手持三手騰訊。現居自置物業，市值480萬，月供萬二蚊，還要供20年。

另有卡數及基本開支每月約3萬5。計劃兩年內以儲蓄/投資方法累積100萬，想請教該怎樣做？感謝。

龔成老師：

騰訊（0700）可以長線持有，這股有質素。

如果想2年內有$100萬，你要加大力度儲蓄先得。

至於在投資方向，可以投資多少少較有增長力的股票，但就要留意風險度會高左。要自己平衡。

可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177）。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17850：

老師可否講吓易和國際8659? 明明係做一次性塑膠速食盒，以為疫情下不會太差。點知連日大跌，0.4時以為算低位

但今天跌到0.1X，只買了一萬蚊都冇咗六七千。。。
謝謝您！

龔成老師：

易和國際控股（8659）最大問題是估值，佢一年賺$2000萬左右，業務唔算有獨特性，其他公司都做到類似的產品，就算需求增加，都唔代表佢一定取得該生意。因此，市值預佢值$1、$2億，加上是創業版股票，估值唔會太高。

之前市值去到近$10億，根本是誇張！就算現時跌到0.1X，市值大約是$1億多，基本上是回歸到合理價。

記住「高不如貴」，「低不等如平」。

------------------------------------------------

Q17851：

龔老師，我係新手睇左你大約都3個月，見你解答都好好，我想問下，我3818中國動向，1.23買左84手，應唔應該現貨止蝕，定係等螞蟻上市先再考慮？

另外1089樂遊科技控股3. 1買左7手，應該升到幾多要止賺？

龔成老師：

中國動向（3818）本質未算好強，但近期的股價上左，因此其實唔適合高追，因為本質唔太值得這樣做。

整體上，不是完全無質素的，但就唔好持有太多，你可以考慮賣出部分，餘下可以守住先。

至於樂遊科技控股（1089）增長力是有的，但現時估值都唔平，未必值得持有太多。如果7手佔你組合比例較多，可以到上多少少賣出。

另外，唔好整個投資組合，都集中在高風險股，你要建立一個「平衡的組合」。

------------------------------------------------

Q17852：

Hello 龔sir, Follow左你個page唔係好耐時間，但都想你比d意見，為將來生活打算。

我既背景：
1. 兩公婆3x歲，每月收入 $70k
2.月供股票 中電、港鐵、滙控 各 $2k (由上年9月開始)
3.供緊層樓 $14k/月

問題：
1. 放在股票市場的組合、金額可以嗎？
2. 仲可以做邊一類型投資？
感謝！

龔成老師：

利用股票去進行財富增值，而及成為財富組合的一部分，可以的。

不過，你現時所供的，雖然都是有質素的股票，但增長力就不強，你3X歲，其實可以加入增長力好少少的股。

中電（0002）、匯豐（0005）只是收息股，可以考慮轉其他類別股票。

你現時股樓平衡已足夠，其實可以加強股票方面的投資知識，除非月供外，可以自己分析平貴去進行買賣（長期性的）。這樣都可提高財富的增長。

------------------------------------------------

Q17853：

阿sir你好，睇咗一排你嘅post，一直都係建議長線投資，但係我希望短期內資產增值所以prefer潛力股多過穩健股，想問你攞d advice

首先講講自己依家個profile：
月入20000
2000月供基金
2000保險
扣埋雜費家用每月最多儲10000

股票戶口現有35萬
投資組合：

2013/2000股 @10.72
241/2000 @23
268/2000 @19
3690/100 @189
700/100 @545
9618/100 @236
9988/100 @211
753/4000 @4.74

仲有1100股嘅美股preferred shares，26蚊左右買，跌咗太多唔諗住放

leverage ard 1.5x

我知道自己投資好集中，高價買入好多科技股，依家小賺/打和嗰d（例如700）應唔應該放咗佢買長線股？投資組合應該點砌？

接受到自己2-2.5x leverage，所以仲有錢買入多幾隻

現時24歲，希望30歲前滾到200萬，有冇可能？

龔成老師：

其實我18歲時，同你都有相同的想法，好進取，想盡快賺多D錢，可適，最後的結果反而是輸錢，幾年的投資都無結果。

你組合，太多潛力股，這會有較高的風險，同時你想用槓杆，這會令風險度進一步提高。

當然，如果股市大升，你的回報會放大，但事實是無人知的，如果心態上「只想回報，而無想風險」，就要小心。

我反而會建議你平衡翻D，潛力股一定要有，但不能過度集中，同時要有其他股票，另外，都要有一定的現金。你永遠唔知大市幾時會跌，如果大跌發生，你反而無得把握這個機會，你要想一些較平衡的做法。

------------------------------------------------

Q17854：

龔SIR,你好，本人36歲，每月可儲1.5萬，手頭上本身已有大約現值110萬的股票，另有現金40萬作備用。

現時持有股票分別：

22% 租務地產股 (0016,0066,0778,0823) 月供0066$1500
12% 銀行股 (1398,2388)
7% 電訊股 (6823)

2% 醫藥股 (1177) 月供$1500
50% 中概股 (0981,1810,1833,2382,3690,9988)
2% 澳賭股 (1928)
5% 盈富 (2800) 月供$3000

1. 我想問問我持有的組合入面有16隻股票是否太散? 其實100萬大概應該持有多少隻會比較合理?如果價錢合理我應該先沽了那些來降低持有的隻數?

2. 現想將月供部份由$6000加至$10,000,是否可以加2隻每隻$2,000, 個人心水是0669同1211各$2,000,另外現時是否不建議月供0388及0700?還是有其他更好的選擇?
THANKS!

龔成老師：

1）都唔算散，以一個$100萬以上的投資組合來說，持有10-15隻股票適合，基本上你組合無問題的。

不過，比較集中近期熱炒的科網手機相關股，上述股不少都有質素可持有，但任何類別就算睇好都唔能夠太集中，你最好調整到40%以下。

同時你可以增加盈富（2800）的比例。

2）這4隻都都可以月供，其實這4股除了創科（0669）未到貴外，其他都開始貴。不過過月供股票的原理是長期買入，將買入價平均，只要你每月投入的資金不多，同時月供的年期長，就算這刻唔算平，都可以進行，因此你選其中2隻心水股就得。

------------------------------------------------

Q17855：

你好, 老師，自從在FACEBOOK上見到老師向大家分享投資理財概念後，我就開始購買老師的書籍以及已報讀老師的課堂, 我購買的書籍包括:

- 80後百萬富翁 1
- 80後百萬富翁 3
- 50穩健收息股
- 5年買樓4部曲 (計劃買)

看完後, 發覺我起步有點遲, 由小到大只懂得儲錢, 完全不懂投資, 導致在我過去黃金10年資產增值時段白白浪費了。

如今, 我已33年也結了婚, 未來2-3年內我和太太想計劃生小孩及買樓, 但資金有限, 計劃時有點迷茫, 不知道老師您有什麼建議呢?

這是我現時的財產分佈:

- 家庭收入: $61,000
- 每月能儲蓄: $22,000
- 流動現金: $113萬 (已扣月供股票)
- 儲蓄基金: $11萬 (暫時不能提取)
- 月供盈富: $6,000
- 月供領展: $2,000
- 月供港鐵: $2,000

皆因獨生女的太太已有一層樓,但由太太家人住，直至百年歸老，我們倆暫時外面租樓住的, 所以想計劃買多一層樓, 將來可一層自住, 一層收租作為其中一個退休時的被動收入。

但我倆已達到生小孩年齡，再等多數年後怕太太高齡產婦，而養小孩又是一筆頗大的數目 (即使我們倆公婆都很節儉)

所以想請問老師以上的財力如要3-4年內達成這兩件事的話, 是否太脫離現實呢? 因為我記得老師提及過, 香港房地產長線看只會上升, 故此愈早買時間價值上愈好。

我粗略計算過, 現時外面一層普普通通實用面積400多尺兩房, 入場費也要600萬, 加上生小孩我想預30-40萬流動資金, 所以3-4年後有機會由113萬增值到200萬嗎?請指教。

龔成老師：

如果你太太現時持有的物業，已經供完，其實可以適度加按，加按這動作有好有壞，如果本身負債多就不應加按，但如果本身已供滿，就可以好好利用。當然，你都要明白這動作會令你地的風險增加左，同時將來每月還錢多左，因此可以先消化下先。

利用加按得來的資金，可以作為首期令你地買到物業，同時，餘下有資金可以作為投資。

如果假設你唔加按，可以善用你現時的現金作投資。

你可以先睇一睇《5年買樓4部曲》，好適合你現時的情況。

要4年內滾存到$200萬，都有可能的，但你每月都要保持儲到$20000以上。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$5000
。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

善用你手上的現金好重要（但不是一次過動用，要小心，分注，有效有運）。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17856：

龔sir你好,本人剛滿十七歲.1年前已購買股票勝經和50優質潛力股.前日已在1.40購入788 16000股,想keep 3年.

1.我認為價值最少值1.0元,想問1.4合理嗎？

2.中國鐵塔股本回報率差,因此短期內我認為盈利能力不強,但此股風險低嗎？

如果三大電訊商盈利能力減少,會導致鐵塔股價下跌嗎?

龔成老師︰

1） 中國鐵塔（0788）有質素的，這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。由於這股有發展力，如你有貨，可長線。

股價由高位回落不少，你買入價算係合理區中部。

2） 中國鐵塔股本回報率低係一個扣分位，但企業整體來計，係有長線投資價值。

另外，你要睇翻佢地盈利減少原因，未必一定會影響到中國鐵塔。

電訊行業發展其實係偏向平穏，客戶對3大電電訊商的需求，正常情況下，變化唔會好大。

你17歲，已經有理財與投資知識，這是相當好，你比同齡行得快，我相信你這刻比起財富增長更重要的，是「知識」的增長，對你長遠的影響會好大。盡力在這方面下功夫。

------------------------------------------------

Q17857：

你好 龔成老師! 我是澳門的讀者，已買齊你的書（雖然未睇曬）

我今年27歲，月入10萬。下個月開始每月可儲6萬，想在2年後即29歲用200萬作首期買樓!

但現時只有3萬蚊股票儲蓄....因過往幾年太大支出導致沒有任何其他儲蓄。有3個問題想請教:

1: 請問每月儲6萬，應該用多少錢買股票入市，留多少錢現金在銀行戶口? 50/50? 還是40/60?

2:股票2年後就要完全沽出，應該選擇邊幾隻組合較穩健又有增長力?

3: 澳門月供股手續費好像很貴，如果我決定每月出糧個日就入2800，會否和月供股概念相同? 只要我fix 每月同一個日子買入就等同月供做法?

謝謝老師! 留意了老師剛好滿1年，已報年尾澳門股票班，第一次發問， 祝老師身體健康!

龔成老師︰

多謝你的支持!!

1 & 2） 投資股票，就等同買入一間企業，企業是要時間去升值。1年係一個短期的時間，就算企業再優質，中短期都會出現波動，影響你回報。

由於你2年後有一個明確目標，要將全部錢用作首期，投資策略上要較為保守。

現在你每月儲到的錢，可以5成去做月供，其餘先儲起，用一邊月供一邊儲蓄的策略。

月供方面，你可以50%投資在平穏增長股︰盈富（2800），另外50%投資在收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）、深高速（0548）。

餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨。

3） 會，但你必需有自律性，不論當日價格如何，都照買入同一數量，都可以做倒月供的平均價格效果。

遲些，澳門班見。

------------------------------------------------

Q17858：

請問現在的香港，月供股票/買股票風險大嗎？是不是比儲現金好？

已有匯豐很多年，這個時候繼續持有，還是放左佢好呢？

龔成老師：

匯控（0005）賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。

我從股息角度分析這股。

相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話特別差，今次要停派息，主要原因係接獲英倫銀行透過審慎監管局發出的書面通知，要求匯豐取消派息。

所以，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線質素依然存在。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題。

但記得，唔好佔比太重就得。同時明白這只是收息股，唔好對股價有太大期望。同時不能持有太多。

------------------------------------------------

Q17859：

66有2手,平均價45.5入,1038有4手,53入,6823有5手,11.02入,386有2手5.12入,939收左息高位走左,現在跌左,我係唔要入返隻銀行股?

以上是我的投資組合,如曾持,應該曾持那幾隻股?麻煩老師被意見!非常感謝

604收左息,高位走左啦!現在很多收息股都賺息蝕價,唔知點選股?

龔成老師：

上述的股票，基本上都有質素的，部分只是中短期較弱，可持有。不過，上述股票的增長力不強，如果你想組合多翻少少增長力，應該加入一些較有增長力的股。至於銀行股，唔好持有太多，始終賺錢能力不及過往年代，但原有貨持有無問題的。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q17860：

老師，已經睇完你本股票勝經，重新撑握了一些財務和投資的概念。要嘗試制定自己的配置，和學習選股確實不易，希望之後有機會報讀你的班。

現時似乎屬於你書中提及的熊二階段?自己手上有一些資金，估計現時也不用再急於入市?

我今年已陸續入了約50萬港元股票....但是入市時並未考慮策略，也未仔細分析企業，但主要是過往你曾介紹過的股票。我想未來股票總投資額暫時不想超過100萬

因為自己仍未能掌握股市和選股，但眼見現金不斷貶值而自己又沒有其他資產，所以比較擔心，自己之前的努力賺取的人工，因自己沒有及時購入資產，慢慢再進一步被制度蠶食....請賜教

大家都係玩大富翁大，我就只當係遊戲一種，玩完開心完就算。而你可以將之變成教人致富嘅工具，造福人羣之餘，同時成就自己的事業。真係好叻，好佩服你!

龔成老師：

如果從整體大市及經濟，傳統會認為是「熊二」，但我想講，在現世代，牛熊三期的作用，已比過往減少，因為變化太快，人為因素多，過往經濟差，股市都會弱，因此牛熊週期易分析，但這刻經濟差，但部分股大升，因此，唔能夠再停在傳統的觀念，

你要用「企業」「平貴」去分析，唔好「預期大市之後的走勢」。

現時大致處合理區，你有一部分優質股，同時有部分現金在手就得。

你可以考慮盈富（2800）。以及加上：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。