「陽明亮亮」 有分在手
#金堅賽馬世界

上回谷草提供四匹心水，三匹跑入頭四名，可惜被臨場大汗的「正陽清風」撻著殺左條單T。希望今期心水能帶來些少分頭，打開勝利之門。

今次心水揀左第三場，四班1200米賽事。此組明顯地步速唔會慢，甚至可能前中後段會偏快步速，所以決定揀匹跑法較為容易守好位的馬為首選馬膽，11號「陽明亮亮」。此馬上季轉到呂健威馬房後，何澤堯偶然會晨操，但今季明顯騎師全程摸實唔放，今季初出更只敗給三班入位的「安喜」。上仗增程1400米，除了因排檔問題及對手大幅轉強，更有多重意外，例如：出閘擠碰，轉灣三疊望空，直路被封及碰撞等，最後大敗而回。其後操練何澤堯幾乎一手包辦，相比同日同主馬「陽明高高」有過之而無不及。今仗排4檔，有足夠步速情況下，若能跑出今季初出水準，已具備一定爭勝的機會，搏佢半冷！

配腳方面，先考慮上場遊馬河的1號「摯友無敵」，此馬經已八歲，馬房弱勢但用見習生成績也不錯。上場早段出閘稍慢，但潘頓依然要搶放並沒有考慮採用後上方法，最終該場幾乎全後上得手，上次大熱今次換人減多七磅去熱，無理由放棄。另一匹配腳選8號「金像傳奇」，根據馬匹血統，此馬應屬於中距離最好的馬匹，上仗雖然毫無威脅，但跑落有點追勢。其後馬房安排再上從化馬場操一星期再出賽，不排除馬房將從化馬先出賽一次，熱身後再回從化操練賺取新鮮感再出賽，對上兩匹「好利運來」及「神州威龍」已是成功之舉。最後挑選一匹擅跑新鮮感的「鑽石達人」，此馬上季初出即勝，馬房對轉倉馬今季成績不錯，騎練正值蜜月期，要重視。

今期推介： 11 陽明亮亮 拖 1 摯友無敵 8 金像傳奇 12 鑽石達人
投注方式：連贏及位置Q及單T

相片來源：HKJC