【容易受傷的伯伯】

星期三，我放假，同事whatsapp我，話有位獨居伯伯喺屋企跌倒！

同事上門視察情況，伯伯手掌受傷，流咗好多血！由於鄰居已幫伯伯止咗血，伯伯表示唔駛去醫院！

星期四，義工陪伯伯到醫院眼科覆診，姑娘順道幫伯伯洗傷口，表示伯伯傷口好深，建議佢立即落急症室！

由於怕急症室等得太耐，分分鐘傍晚都未走得，伯伯勸極都唔肯去，義工唯有帶返佢返屋企。

我叫同事幫伯伯約翌日去賽馬會診所洗傷口。

星期五，同事安排另一位義工帶伯伯去診所，義工返嚟滙報話，醫生冇睇到伯伯個傷口，同事聽見，認為伯伯即係冇大礙，事情告一段落。

我同同事講，應該冇可能！隨即打俾診所問清楚！

原來，真係雙方溝通出錯！醫生根本唔知伯伯嚟睇手掌！！！

結果，洗傷口變咗攞薄血藥；打破傷風針變咗打流感針！！！

我打俾伯伯慰問情況，伯伯表示傷口唔多痛，唔想再麻煩我哋…

我，又點會咁容易放過佢？

星期六，同事放假，我返工。

我打俾伯伯，冇人聽；我唔放心，決定上門搵佢！

由於我從未見過伯伯，唯有叫一位平時探開伯伯嘅義工，陪我一齊去樓下公園兜吓佢。

保安同我講，伯伯半個鐘前出去咗街市買餸…

離開樓座，我離遠就見到一位伯伯行路柺吓柺吓，就跌就跌咁，直覺話我知，應該係佢…

果然冇估錯！義工同我講，就係佢！！！！！

伯伯冚住傷口塊紗布，同踩住喺鞋底嘅紙巾冇乜分別…

佢話塊紗布依舊好乾淨，傷口唔太痛，叫我唔駛擔心…

伯伯聽覺唔好，我每句說話都要喺佢耳邊重覆兩次…

勸咗佢廿分鐘，堅持唔肯去診所、唔肯買藥品、唔想我嘥錢、唔想我麻煩…

我叫義工陪佢返屋企，我去藥房買消毒敷料。

上到伯伯屋企，地板破爛，家徒四壁…

伯伯淡然地話，醫院姑娘話我同事幫佢黐嗰塊紗布好馬虎，好求其…

我笑住同佢講，我啲手勢可能同我同事差唔多！

好彩！伯伯傷口已冇滲血…

我幫佢護理好，叫佢比對吓啱啱搣落嚟嗰塊…

伯伯尷尬地笑，話呢塊白好多！

笑時，露出冇牙嘅嘴巴。

接住，係《阿肥姑娘訓話時間》…

第一，平安鐘變咗床頭鐘！

一如過往，佢唔掛返上頸，我係唔會離開！

結果，伯伯乖乖就範！

第二，地板破爛，枕頭發黑！

伯伯話冇緊要，地板爛少少唔覺眼，枕頭瞓咗幾十年有感情！

問題係，過去一個月，佢俾塊地板kick低三次！

即時聯絡義工合作機構，預約幫佢維修地板；再返中心攞個有心人捐出嚟嘅全新枕頭俾佢！

我同伯伯講，下星期我會上嚟幫佢做評估，申請老人院…

一個月，跌三次…

冇結婚，冇親人，只有一個年紀比佢細幾年嘅鄰居夫婦得閒關照佢…

伯伯，1927年出生，單身，一邊耳失聰，糖尿病，血壓高，白內障，曾中風…

佢話，唔鍾意上門送飯嗰啲飯餸，因為好難食！

佢話，唔需要亦唔鍾意入老人院，因為冇自由！

但，為咗佢著想，我必須咁做！

伯伯，乖乖哋，唔好令阿肥姑娘替你擔心…

三年後嘅今天…

伯伯，最近好嘛？老人院啲飯餸啱食嘛？

我永遠唔會忘記喺你入老人院當天，捉住我雙手同我講…

「阿肥姑娘，講真嗰句，妳真係……好長氣！不過，好多謝妳……一直關心我！」