//支持本Page請Click入內文比Clap，已為Medium收費會員請直接Click入內文閱讀，謝謝！//

//今日上水有人響警署放火魔法又比人屈係鬼，證明捉鬼天屍就係要搞散場運動先心息//

和理非班捉鬼天屍響元旦日最自豪嘅，就係響當日遊行下晝兩點左右，聲稱「捉倒」一男一女響中國人壽舖頭爆玻璃，聲稱聽倒黑衫人叫「自己友」條友直頭當咗自己係英雄，然後民陣仲要加多腳話果兩名黑衣人「同平時接觸嘅抗爭者好唔同」。但其實呢個就正正係一個黃屍捉鬼嘅範例。

點解呢一男一女會被屈係鬼呢？

1. 因為遊行未正式開始經已進行破壞，正常勇武唔會咁做；
2. 當有途人問及一男一女係咪手足時，兩人支吾以對；
3. 當二人被包圍要求確認身份時，開始慌忙逃走
4. 有受訪者稱睇見二人往放暴警方向逃去，並向防暴警聲稱「自己人」，

有人話四點夾埋就係一個有Full Picture嘅臥底破壞，但當你拆開逐個黎睇，你係會發現破綻百出：

第一，早咗裝修就叫係鬼？我之前都寫文講過，依過往勇武同和理非之間嘅默契，行完先郁手係比較理想做法，但掉番轉講，太早郁手你最多咪話佢唔理想、要求下次改善囉，幾時變咗自己唔鍾意嘅嘢發生就一定係鬼做？

咁會唔會聽日開始，有黃屍用開匯豐覺得無咗ATM唔方便，就所有裝修匯豐ATM嘅都係鬼？後日直頭唔鍾意裝修，就所有裝修都係鬼？ 黃屍幾時變咗宗教審判庭，可以為咩係鬼落定義？

第二，自6月以黎落場咁多次，前中後線抗爭者我接觸唔少，可以話係五花八門咩人都有；口齒唔伶俐、性格古怪嘅唔在少數，即係而家好多人嘲笑嘅陳梓維咪就係其中一個囉。甚至乎可以講，勇武派唔少都不擅言辭。

再者，知唔知勇武派響出手一刻，究竟要立刻要承受幾大壓力？由佢扑爛第一塊玻璃開始，經已揹住刑事毀壞、破壞社會公眾安寧、非法藏有攻擊性武器三條罪響身，面對嘅隨時係以年計嘅監禁；

然後包圍佢果班捉鬼天屍，一時又話要搜袋、一時又話要Check手機，然後仲要全程直播影住，每一樣嘢都係令佢增加暴露身份嘅危機──知唔知點解有啲抗爭者比你班天屍圍住果陣咁順攤比你搜袋呀，係因為佢地仲未郁手呀，郁撚咗手仲要比你班友圍撚住，點知捉鬼果班會唔會係臥底假扮架？就算唔撚係，比你班天屍包圍果陣突然有防暴衝過黎拉人點算？唔撚通靠你班和理天屍頂住？分分鐘和理天屍為咗自保，仲可以推兩個人出去送死！

所以慌忙逃走，根本就唔係啲咩內心有鬼，而係自保嘅唯一方法！

第三，果個所謂「自己人」嘅證言，個撚個黃屍信到十足十，但其實只係出於某位受訪者把口。李司棋話：「呢度唔係法庭，我對眼就係證據」，問題係有記者係影住哂成個黑衣人破壞、被圍堵、逃走，但全部都無影倒講「自己人」呢啲對白──片就無，你口講就話有，點解我要信你？如果講過信字，事後有義士PM岳義士承認自己當日就係裝修其中一份子，點解唔係信佢而係要信你班黃屍？

第四，至於話佢地故意走向防暴方向，然後警察全無郁手，呢啲又係影片完全無影到：以我所知，其實當時警方根本未有封鎖到成條馬路，佢地只係繞過防暴警嘅另一邊馬路離開，所以根本唔存在叫「自己人」之後再有警方接應呢件事。

第五，反而電台果班聽眾愈吹愈勁，9噏到乜嘢「再嘈我就掹槍」，喂，我地睇過咁多個臥底郁手嘅片段，有邊個唔係有槍就直接掹出黎指嚇市民？其實自從抗爭開始後，好多和理非黃屍出於本身對勇武嘅厭惡，基本上對所有破壞都疑神疑鬼，佢地會將一啲幻想出黎嘅事件當真咁講（例如七一衝立法會果日，經已唔止一個黃屍話見倒有黑社會響現場煽動群眾）、甚至認為講錯都無所謂，因為呢啲係「善意的謠言」，假都好，只要對佢心目中嘅運動發展有幫助就無問題。

當然去到呢一刻，我無話百份百肯定在場果兩位究竟係咪真義士，但更大嘅問題卻係，當唔可以肯定佢一定係鬼嘅時候，一班和理天屍一口咬定佢地係鬼嘅如果會係點？

跟住又令我諗番起早前大埔槍擊案被捕嘅18歲少年，響上庭前透過連登攬炒爸發表宣言：

「寧願全世界知我係手足，都唔願意俾人話係鬼。」

當初睇見呢句嘢我係感到非常震撼，因為當日呢件槍擊案發生時，雖然我無話到義士係鬼，但都曾一度懷疑究竟單案係咪真嘅：然後我諗當日如果同班和理天屍一樣，走去有理無理捉埋一份鬼，我諗我呢一世都唔會有資格抬頭面對一班義士。

警方派臥底混入人群，對於咩人最高風險？當然就係勇武派人士：你睇近日大圍捕，駛乜臥底郁手，一頭一尾街頭「截龍」，所有市民就立刻變成待宰羔羊，任拉任鎖；只有會反抗、會用武力嘗試衝破警方圍捕嘅勇武派，先至係臥底行動之下最高風險人士。

但點解警方一而再、再而三響各個抗爭運動入面混入臥底之後，勇武抗爭者仍然不停透過民間記者會、網上文宣不停叫人唔好捉鬼？

1. 因為勇武義士係有行動嘅榮譽感，就算唔想暴露身份，都希望外人認同自己嘅貢獻；任何詆譭勇武行動對佢地黎講都係一種污名化打擊。

2. 歷史上有無真係成功捉鬼？係有，包括機場成功捉倒疑似公安；仲有將軍澳捉倒疑似臥底警被獅鳥。但相比之下，捉錯鬼嘅比例卻係遠遠比前者多。仲有，就算捉倒鬼又點？你班和理天屍捉完咪又撚係放生人地；仲要勇武派想出黎獅鳥果陣，天屍就立刻化身成阻膠阻9住哂放生隻鬼走，咁你捉黎有撚用？

3. 元旦遊行晚上，和理天屍亂咁捉鬼，被屈義士響被搜袋、除口罩同埋Check手機之後已直接講咗：「而家比人起哂底、見哂樣，以後唔駛再出黎抗爭」。

喂，點解抗爭義士每次比人影大頭都咁緊張、搞到要私了？就係因為怕身份曝光比警察搵上門。而家你呢班捉鬼天屍，響直播鏡頭面前要求人地除乜除物比你搜袋，咁同班影大頭嘅藍屍大陸佬有乜分別？

元旦遊行當日有一位戴助聽器被屈係鬼嘅義士，結果搞到比人起哂底，原來佢份職業係唔容許上街抗爭嘅，班捉鬼天屍有無為自己嘅所作所為後悔過半秒？係連句So99ry都無。

然後當高風險嘅勇武派已三番四次呼籲唔好捉鬼，但和理天屍完全唔理、捉鬼行動仲要變本加厲之後，剩番落黎只有一個可能性：就係和理非原教旨主義者，想借住捉鬼行動搞分化、瓦解勇武派：

不停捉鬼立刻產生嘅一個效果就係，唔少勇武小隊宣佈退出抗爭前線，而理由亦非常簡單：只要和理天屍繼續不停捉鬼，前線義士將會置身於一個極其危險嘅被起底、被圍堵嘅環境，而做完之後仲要被屈係破壞行動嘅內鬼，仲邊有人再願意出黎為香港人冒險？

然後當勇武派愈來愈多退出前線，香港抗爭運動又再回歸番6月9日之前準時集合，準時解散嘅行禮如儀式集會，最開心嘅，當然又係以蕭若元、劉細良為首，成撚日話衝擊係鬼、勇武係中咗政府嘅局、堅持《逃犯條例》修訂撤回同勇武抗爭無關嘅「和理非原教旨主義者」囉！

結果好諷刺地，成功止暴制亂嘅唔係特區政府、亦唔係警察，而係呢班和理天屍。佢地充份明白「堡壘要從內部攻破」嘅精髓，口講「同情後生仔」、「不分化不篤灰不割席」，但實質卻係借住捉鬼黎肅清自己唔鍾意嘅勇武派。

所以呢班捉鬼天屍，無論係有意定無意，其實就係將勇武派義士當Condom、就係借住捉鬼同勇武派分化割席嘅敗類；當半年黎苦苦相勸都唔聽嘅時候，如果再唔做啲嘢清剿呢班天屍，抗爭最終必被搞散。