我將會停止供稿給其中一個專欄了，意味著又沒有了其中一個收入，我第一個反應是：「Any Sugar Daddy？！」

半年了，今年三月時我接受蘋果果籽的訪問，記者問我：「你諗住試幾耐呀？」我答：「半年啩……」然後，半年咁就過咗。

呢半年，好好彩地得到同唔同品牌合作嘅機會：永明金融、Blue、道地、家福會、救世軍、青年協會、海外升學中心、日本文化協會、褪黑激素、美白牙齒、靜電貼，單係保險公司都有四間、社福機構都有三間，應有盡有，真係好多謝佢哋搵我做嘢。有品牌直情同我講，以前唔敢搵我，而家終於夠膽搵我了，原因係以前佢覺得我係航空公司代言人，同我著住制服嘅傭仔合作，好似幫緊間航空公司宣傳咁，好怪，都唔知應該同我傾定同我公司傾。

雖然好似有好多機會，但其實我每日都想放棄，冇穩定收入令到我個人變得好悲觀，成日憂柴憂米，成日會諗：呢個月有job姐，難保下個月都有job㗎喎！一杯水，我總係會見到仲有半杯係空。

呢半年，仲畀我發覺到自己原來性格上有咁多盲點，係我以前做空少時完全冇察覺。以前做空少，生活真係好簡單，只要跟住個更表飛，個個月就有固定收入，相對嚟講個人算係被動嘅。以前嘅我甚至係好不屑賣廣告，冇？又餓我唔死嘅！我仲可以飛世界各地飲飲食食。毫無疑問，空少呢份工除咗係我嘅comfort zone，亦係我嘅擋箭牌，佢幫我逃避咗好多嘢，畀我可以活係一個美好世界入面乜都唔洗理。

呢半年，好多時都要硬住面皮去同人傾嘢，甚至搲爛塊面去爭取一個機會返嚟，對於骨子裡有藝術家脾氣嘅我嚟講，真係好難。除咗覺得自己要放低高貴嘅身段去迎合個商業社會之外，過程亦不斷令自己發覺自己原來係咁唔識同人傾嘢、咁唔識去social、咁唔識同人build up一個愉快又長久嘅合作關係。以前不屑同人合作，到而家面對人哋聽完你嘅proposal然後已讀不回，除咗覺得係報應之外，就係覺得自己真係好廢。

做空少嘅時候，我嘅夢想係：可以keep住飛，keep住創作，一年出一本書，雖然航空個題材好窄，冇咩突破，但飛同埋創作都係我鍾意做嘅嘢，所以我已經心滿意足。行上全職創作呢條路後，因為肺炎冇得飛，冇咗靈感來源，我仲靠咩去支撐我嘅夢想呢？呢個問題我思考咗好耐，如果淨係靠錢、靠多唔多job呢個物質層面，我諗唔會支撐到好耐。

呢個時候我諗起今年年頭我喺D2 Place擺嘅《空中飛傭告別年宵》，其中有一日Now TV嚟訪問我，記者第一個問題係問：「你可唔可以介紹一下你個品牌係賣乜呀？」於是我就有點措手不及咁開始介紹：「我個品牌叫『空中飛傭』，因為我正職係一個空少，所以我嘅產品都係同去旅行有關，全部都係自己畫、自家設計……」之後我睇返playback，我見到一個身材瘦削嘅小伙子喺鏡頭面前，好似好有自信咁介紹緊自己個品牌，唔知點解覺得有啲感動。過去五年，特別係近呢半年，無論過程入面覺得自己幾咁廢，幾咁冇資格，去建立屬於我嘅品牌，然後畀人認識，就係我一直堅持緊嘅嘢。

最後多謝嘅，就係你哋啲Likes。我份人係好膚淺，冇你哋啲likes，可能我一早已經去咗求奇搵份工做，唔會再經營呢度，唔會再經營呢個夢想。多謝你哋冇因為我轉型而unfollow我，多謝你哋繼續留低睇我啲低能無聊漫畫，多謝你哋咁明白事理、咁高汁，多謝你哋話就算畫嚿屎都繼續睇、廣告照Like，成就咗一個小伙子嘅夢想。（音樂響起：成就了登上懸崖峭壁的女子～）

同以前做空少唔同嘅係，而家嘅我創作要諗埋謀生，考慮嘅嘢多咗，過程中亦有好多發現同成長，但係我唔會放棄，因為有你哋支持住我。同埋，我想證明嘅係，

原來喺香港做創作，係搵到食㗎！

講完！冇咩事我返出去搵sugar daddy先！