我係一隻維護正義嘅狗（下） . 直到有一日，我收到新嘅執法任務，要去殺一個男人，佢打瘸咗一隻狗嘅腳，證據確鑿。 . 我以為我聽錯，我去問狗王：「佢打瘸咗隻狗，我哋就要殺佢？」 . 狗王答：「根據『狗法』第一條，以任何形式嚴重傷害狗隻者，殺！」 . 我唔係好明：「但就算係人類嘅法律，傷人都唔會判最重刑，打瘸人都唔會判死刑。」 . ， 「如果唔殺個男人，只係派兩隻大狗去咬幾啖，個男人會話流浪狗傷人，令人類追捕我哋。」 狗王嘆氣：「唔留活口，都係為咗狗隻嘅安全。」 . 我接受唔到：「所以『狗法』只有一種刑罰，就係死刑？一定要殺人，仲要咬到死無全屍？」 . 「人類可以監禁、罰款，刑罰就有高低。但狗唔通有能力監禁人？我哋嘅武器，只有鋒利嘅牙齒。」狗王好認真咁望住我。 . ， 我接受唔到，於是我請咗假，無參與呢次執法。 . 點知，執法出咗意外，個男人見到有幾隻狗跟蹤佢，已經心生警惕。 . 執法隊撲上去，個男人隨手拎起張凳，加上佢可能學過吓武術，打傷咗幾隻執法狗，仲走甩埋。 . 其中一隻執法狗返嚟之後，重傷而死。 . ， 殉職嘅執法狗，係我嘅好朋友，我好傷心好嬲，好想衝去搵個男人報仇。 . 狗王阻止咗我，並且召開會議，分析我哋執法能力嘅不足。 . 流浪狗體型較大，收集情報嗰陣，好容易引起人類注意；執法主要靠蠻力，如果犯人有武器，亦容易反抗。 . 所以，狗王搵流浪貓合作，貓身手更靈敏， 攻擊犯人嗰陣，貓由高處躍下，用偷襲抓盲人類嘅眼睛，狗再發動攻擊。 . ， 貓好樂意同我哋合作，唯一嘅條件係，我哋懲罰嘅對象，要包埋虐貓嘅人。 . 「狗法」正式改為「貓狗法」，「貓狗法」第一條，以任何形式嚴重傷害貓狗者，殺！ . 貓加盟之後，我哋執法嘅成功率高咗。 . 其實，我心底依然覺得，下下都殺人，係有啲問題。 . 不過，一來我諗唔到更好嘅懲罰；二來好多殺貓狗嘅人，初時都係虐待貓狗先，好快就開始虐殺。 . 或者有啲人天生就心理變態，我哋早啲殺佢哋，可以避免將來更多貓狗犧牲。 . ， 過咗一輪，執法隊又遇到情報不足嘅問題。 . 貓雖然靈敏，但都有一定體型，好難無聲無息咁潛入大廈，觀察犯人嘅行蹤。 . 於是，狗王決定搵老鼠合作，老鼠可以喺溝渠度行，咩地方都去到。 . 老鼠嘅要求同貓一樣，我哋懲罰嘅對象，要包埋殺老鼠嘅人。 . ， 我覺得好唔妥，殺老鼠同殺貓狗，應該有啲唔同。 . 殺貓狗嘅人，通常都係心理變態；但係殺老鼠嘅人，可能係防治鼠患，怕污糟怕傳染疾病。 . 但係狗王覺得，老鼠好幫得手，為咗增加執法成功率，都決定同老鼠合作。 . ， 合作開始之後，「犯人」嘅數量就大幅增加。 . 成個城市，有幾多人殺過老鼠？ . 執法隊疲於奔命，由於殺得人太多，人類都發現，好多人俾流浪貓狗夾攻而死。 . 人類開始剿滅流浪貓狗，為咗保護我哋，狗王要搵更多嘅合作伙伴。 . ， 呢個城市，仲有蛇、鳥、蟲蟻......每種動物都有佢嘅作用。 . 但係咁樣「合作」落去，我哋執法嘅目標，可能會變成「所有殺過蟻」嘅人，亦即係「所有人」。 . 事情一步步咁發展，我覺得，我哋唔再係「執法」，而係開展緊一場人類同動物嘅戰爭。 . 但行到呢步，我哋已經返唔到轉頭。 . ， 我成日都會諗，我哋嘅出發點明明係「正義」，到底邊個錯咗？ . 我哋從狗場逃走，想懲罰狗場嘅變態佬，為死去嘅狗討回公道，係正義。 . 我哋想懲罰虐狗嘅人類，都係狗嘅正義。 . 到我哋要搵貓幫手，貓當然想懲罰虐貓嘅人類，係貓嘅正義。 . 對老鼠嚟講，滅鼠嘅人類都十惡不赦，係老鼠嘅正義。 . ， 每人都有自己嘅正義，可能大家都好有道理，講得頭頭是道。 . 但如果你想搵一種正義，係可以滿足到所有人， . 結果，呢種「正義」，可能會令大家都唔滿意。 . －完－ . #短故 #短篇 #小說 #陳美濤 #廣東話 #粵語 #tomatochan #我係一隻維護正義嘅狗

天鵝湖（上） . 我係一隻天鵝，一隻美麗優雅嘅天鵝。 . 天鵝族以靚聞名，無論係長居森林嘅動物，定係路過嘅麻雀，都會驚歎於我哋嘅美貌。 . 靚，係天鵝嘅驕傲，係天鵝嘅代名詞。 . ， 近排，一班鴨仔移居到呢個湖度。 . 鴨族同天鵝族偶爾會發生矛盾，本來都係小事， . 但有一次，嘈起上嚟，有隻鴨居然鬧天鵝：「長頸醜樣鵝，死開啦！」 . 咩話？我哋係醜樣鵝？我哋全身上下每一條毛都精心保養，長長嘅頸項更加係優雅嘅象徵。 . 「醜」呢個評語，有辱祖宗，絕對唔可以掛喺我哋頭上。 . ， 我哋大發雷霆，氣勢洶洶咁衝去鴨族度。 . 點知鴨族堅持己見：「你哋就係醜樣，仲以為自己好靚，哼。」 . 經過一番爭吵，我哋天鵝族召開大會，商量點樣解決呢件事。 . 首先，每隻天鵝都要比以前更注重儀容，唔可以有一絲一毫嘅瑕疵，俾鴨族搵到破綻。 . ， 然後，我哋要搵幫手。 . 天鵝族嘅美貌遠近馳名，鴨族有眼無珠，先會話我哋醜。 . 所以，我哋搵咗好多其他動物，各種飛禽走獸，每當行過湖邊，就高聲歌唱：「天鵝真美！」 . 再用各種華麗嘅詞語，描述我哋嘅美麗。 . ， 我哋好嚴肅咁同班鴨仔講：「你哋聽吓，大家都話我哋靚啊。」 . 鴨仔嘎嘎呱呱咁答：「你哋就係醜。」「好醜！」 . 我哋忍唔住反駁：「你哋先係醜，天鵝明明好靚。」 . 天鵝族長揮揮手，示意我哋冷靜，然後問：「從審美角度而言，天鵝全身上下，有邊一忽係醜？」 . 我哋早已準備咗一堆審美資料，喺學術上擊倒佢哋。 . ， 「你哋嘅靚，唔係真正嘅靚。」 鴨族族長越眾而出：「表相係天生，根本唔係你哋努力得番嚟，有咩值得誇耀？ 而且表相轉瞬即逝，紅顏白骨皆是虛妄，根本唔係真正嘅『美』。 『美』可以係努力，可以係藝術，但絕對唔會係一條毛有幾白。」 . 全場鴉雀無聲，佢講嘅嘢好深，但有一句係真嘅，我哋個靚樣係天生，唔係自己奮鬥出嚟嘅「美」。 . 當然，我哋依然覺得自己好靚，但鴨族族長咁樣一講，呢種靚，好似有少少缺陷。 . ， 呢次對罵之後，天鵝族再次召開大會，既然我哋嘅外在美已經達到巔峰，咁就一於發展內在美。 . 到時我哋內外兼備，哪怕係最麻煩嘅鴨族，都講唔出一句「唔靚」。 . 我哋搵埋其他動物幫手，收集咗好多人類嘅文學作品，提高內在嘅修養。 . 自此之後，無論去到邊，都會聽到天鵝族背詩嘅聲音：「兼葭蒼蒼，白露為霜，所謂天鵝，在水一方......」 . ， 日子耐咗，其他動物都話，天鵝變得更有氣質。 . 「氣質」係乜東東？書上無寫，我估，大概係想讚對方靚，又唔想顯得太膚淺掛。 . 總而言之，天鵝已經有咗內在美啦。 . 一班內外兼備嘅天鵝，再次去搵鴨族對質。 . ， 「熟讀唐詩三百首，不會吟詩也會偷。」天鵝族長搖頭晃腦咁講：「我哋已經有埋內在美啦。」 . 點知班衰鴨繼續叫囂：「仲係好樣衰喎。」 . 鴨族族長沉吟咗一陣：「你哋雖然有內在美，但呢種內在美同你哋嘅外在美扯唔上關係。 哪怕係一隻老鼠，只要佢努力自我增值，都會有內在美，咁唔通老鼠就好靚？」 . 鴨族族長用一句話總結：「真正嘅靚，係由外到內，再由內去番外嘅。」 . 待續... . #短故 #短篇 #小說 #陳美濤 #廣東話 #粵語 #tomatochan #天鵝湖

#gfmurmur8232 我同我男朋友一齊左兩年 我22歲 佢27歲 我地係交友apps識既 識左無幾耐就一齊左 頭一年大家都好開心 之後佢就好似變左個人咁 佢會不停甘發脾氣 有時明明係佢發完脾氣仲調番轉頭話我發脾氣先 因為我番緊學 咁我都會番下parttime 甘唔夠錢就會問佢拎dd甘用($1xxx) 同埋因為我冇信用卡 甘我試過有一次問佢借信用卡 佢就話我貪錢 咁我用完佢張卡 係會俾番錢佢, (屋企人冇信用卡) 之後 大家一齊去旅行 旅行住既地方係我屋企人既 去之前就大家都俾左舊錢出黎當係酒店錢 (食野就另計) 咁我諗住屋企人大家拎多少少錢出黎 大家開心d 每人港紙2百幾蚊到啦 佢俾個陣冇事架 佢番到香港我同佢鬧交 佢就冇拿拿搵野出黎講 話我屋企人貪錢 好啦, 去到以家 我同佢一齊左又一排 早排去睇醫生 發現左宮外孕 即刻入左醫院 佢就係成個過程都好驚.. 我咁大個女都冇做過d咩手術 其實我仲驚過佢.. 黎件事之後佢對我好似越來越差 佢成日話番工辛苦 番到黎就成日西我面.. 番到黎幫我抹身又係咁嘆氣 我岩岩做完手術 幫唔到自己沖涼 我都唔想搞到自己好似廢人咁 之後發生左d事 同佢鬧交.. 佢發脾氣發到勁大聲甘鬧我拍曬台咁 (之前仲幾次佢屋企人訓曬 勁大聲咁趕我走 :::: 你走呀！！！！) 你話佢屋企人聽吾到就假既.. 佢屋企人聽到佢癲左咁 即刻入黎我地房 佢屋企人就即刻幫左佢先..咩事都吾知就話我.. 我就好似過街老鼠咁 到最後我 忍唔住佢我走左.. 走既時候佢仲講左 你走左以後唔好返黎 其實每一次就算係佢唔好都好 我都會就佢 我都會哄佢 我知佢番工辛苦 我亦都體諒佢..有時知佢ot煮埋飯俾佢拎埋過去 試過同佢鬧交 幾日都唔搵大家 佢都唔會話搵下我 仲可以好開心同佢d朋友食飯飲野.. 每次同佢鬧交我都會諗係咪真係自己咁有問題.. 我真係好愛佢 我試過夜晚係佢屋企樓下等佢番黎.. 見到佢個一刻佢係勁吾想見到我既樣.. 我喊左3個鐘佢反應.. 話我扮喊… 我明白兩個人一齊要好好去磨合,但係好似永遠得我一個付出 唔知佢係咪覺得俾左小小零用錢我就任意鬧我都得.. 另外,佢試過係ig見到女仔有玩一隻game之後走去add人地id 話冇同佢玩過… 我見到既時候佢仲要話係朋友 冇野.. 平時既佢唔會咁主動.. 我唔敢話自己冇問題 我同佢鬧交 我自己都有問題 但係我想話俾每個女仔聽 身體係你既 你要錫自己 你唔錫自己冇人會俾你更愛你自己 我從來都唔會話因為你做過手術而要你付出d咩.. 因為我要既只係一個愛我 同真心錫我既男人.. 我令唔到你成熟 係我失敗 老實我從來未遇過一個甘既男人.. 我當自己上左一課 因為我要既係將來 唔係一時既快樂,既然大家都咁辛苦都無謂再咁樣落去.. 雖然我憎你.. 但我都祝你快樂 -- #hkig #couple #murmur