【龔成問答信箱】（Q22601-Q22620）

Q22601：

龔成老師,剛看完你的書,提及選股市盈率最好於5-20倍之間,但太低反映企業會有什麼問題?例如688如今只有3.7倍市盈率.

龔成老師：

在理論上，低即是平，但你見我定指標在5-20，是一個初步的參考，投資者仍有好多因素要分析，不選5倍以下的原因，是因為「有點過低」，而市場是公平的，當一隻股這樣低，反映佢有幾個可能性：

第一，佢盈利代表性不足。第二，佢之後的盈利有下跌可能，第三，佢的風險較高、或質素較差。

中國海外發展（0688）市盈率低，是因為佢不少盈利都來自物業重估，即是盈利不能反映真正的情況，代表性不足。以長遠來說，這股不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。
可以視這股為平穩型的企業，現價合理。當然中短期可能因樓市一般而股價一般，但長遠，仍是可以的。

------------------------------------------------

Q22602：

阿sir,我見你提到1177，2269又點睇，2269大公司，而且盈利較好？

龔成老師︰

雖然2間同係醫藥企業，但其實2間公司，無論業務和賺錢模式，都係完全不同，不宜直接比較。

中生(1177)已建立一套完整的商業系統，有多個已賺錢的藥品類別。透過營運賺取資金，再開發開藥物去再賺錢。

但由於開發藥物係有風險﹐唔一定成功。如果失敗佢要自行承擔所有相關損失，不過中生(1177)本身已有一定產品收入作後盾。

就算個別研發失敗，造成資金鏈問題的機會唔大。所以，此股擁有的這個營運模式和規模，令到佢持續有盈利增長，係一間唔錯的潛力股企業。

而藥明生物(2269)主要提供有關生物製劑藥物發現、開發與生產服務。

佢涵蓋生物製劑發展過程的所有五個階段，即藥物發現、臨床前開發、早期臨床開發、後期臨床開發及商業化生產。

集團本身唔係賣藥，佢係收錢助人去研發、測試和生產。

其賺錢模式較穏定，加上本身項目又多，可以把失敗風險分散。而且研發成本和風險，有第三方客戶分擔，故因失敗而出現資金鏈問題機會會較少。

此股潛力是有的，因為過往的財務數據的確理想，但現時的估值唔平，這刻投資值博率一般。

不過，這類股好難話現價一定貴，因為佢有好高的增長，只可以話現價唔平，但如果之後有高增長，那就未算太貴。只可以話，如果你真的想投資，小注好了，你要明白業務有不確定性，同時股價會好波動。

------------------------------------------------

Q22603：

龔老師您好～本人今年26歲，留意了您的專頁兩年多的時間，對您的一套投資理念非常認同！未來亦會努力實行以財務自由作目標。

到現時我用了30多萬儲蓄（佔總儲蓄6成）陸陸續續買入了幾隻股票，但可能是經驗不足，有幾隻股票處於負增長階段以及組合有點散，故打算重新部署一下。

持有股票如下：

1. 1928 :29.5買入1200股
2. 66 : 42.5買入1500股
3. 354: 4.06 買入2000股
4. 1211 : 37買入500股

5. 12: 37.5買入1000股
6. 1810: 10買入600股
7. 1830: 2.6買入8000股
8. 2382: 125買入100股

9. 2388: 23.5買入1000股
10. 2013: 13.75買入4000股
11. 788: 1.24買入26000股

想請教一下老師：

1. 現組合太分散了，老師您會建議可賣出那些股票？以便另作較有利的投資。

2. 2013前境如何？可繼續持有、賣出或加注嗎？

3. 海螺水泥及恆基地產那隻更有投資價值？

4. 現仍有大概20萬閒置儲蓄，可如何佈處？

5. 1177中藥6元是否初步進入便宜區間？

問題有點多，希望能得到您的回覆！感謝！

龔成老師︰

我地投資係一個長線計劃，只要你買入股票係有質素，長線都會增長。但中短期難免會有波動，令你出現帳面虧損，但只要佢地本質無受影響﹐照長線持有就可以。

1) 你現有持股，都係有質素和適合你。當中微盟集團（2013）和中國軟件國際(0354)質素係有，但風險性較高，要控制注碼。

由於全部都有質素，不用沽出。但長線計，你要控制組合持股，集中在10隻左右，以便定期審視和管理。

2) 微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。但在估值上都唔平。

由於佢不確定性高，而你又有一定持貨，故暫時不建議加注。

3) 海螺水泥（0914）有質素，有增長力。

佢主要從事生產和銷售熟料和水泥製品，業務地區包括中國東部、南部、西部、中部及海外。而安徽海螺是水泥行業中，全球最大的單一品牌供應商。

水泥屬於基礎原材料行業，對建築行業有很高的依賴性，同時亦會與經濟增長速度有較高的相關性，特別與固定資產投資相關。即是說，當中國基建及房產市場不景，水泥行業會比一般行業處較大的不利狀態。

另外，水泥企業在生產過程中，燃料成本佔總生產成本中約佔了超過一半。若能源價格出現較大變動，就會對企業成本造成較大影響。因此，當能源價格出現較大上升時，將引致安徽海螺的成本增加，影響其中毛利。

綜合來講，佢擁有相當規模、生產能力，有一定的質素及賺錢能力，而水泥行業長期將因中國城鎮化以及一帶一路的建設，仍然會增長，但不會像過往般快速，而是進入較平穩的時期，在本質上此企業不差。

現價合理區中間，但要留意盈利有潛在波動。

恒基地產（0012）都有質素，雖然增長力不算好強，但都有平穩增長能力，不差的。

佢始終是香港大型地產發展商之一，雖然賣樓最好賺的年代過去左，但在香港賣樓仍是賺到錢，不錯的。

這股都有質素，單計佢手持農地是全港最多的發展商，就明有一定的價值，當然，農地要發展要好長時間，所以先話這股要好長線。

質素上，其實都好相近。只能說，增長潛力會係海螺水泥（0914）大少少。

4) 由於你已有30萬持貨，這20萬宜暫時儲起，等大市有較明顯回調，才出手。

5) 未算，$6只算係合理區中下部。現價計，都要有較大幅回調，才會到平宜區。

由於中生(1177)係好有質素，好多時都唔會回到平宜區。你無貨，其實現價已可以入首注，之後再慢慢加注就得。

------------------------------------------------

Q22604：

謝謝您之前的幫忙解決問題。我現時有一大難題，不知如何決定，想再次請教您。

因一些家庭原因，我會賣出現有住宅，搬到一個較大單位居住。賣出後連同手上現金有1500萬左右，現有2個方案：

1）勉強可以買入一個800呎單位自住，不過手上就冇多餘現金，不能再製造現金流。而且每月要俾3000元管理費。

2）將1500萬投資，預計有5%收息，將收息嘅錢用來租樓，除交租35,000元外，還有剩錢用來再投資。

因為預期8年後退休，然後在世界各地住一陣時間。所以方案2比較適合我們，因為退休前後改變較少，不用賣入賣出樓宇。

不過方案2要好穩陣，近日見股票起伏大，唔想只投資股票，請問老師有何建議？要求不高，5%已經可以，不過一定要穩陣。

龔成老師︰

首先，你要知道搬到一個較大單位，是一件長時間的事，還是只係未來幾年。到你退休後，較細單位都可以。

如果係後者，你可以先買入一個細單位，最好係適合你地退休後入住。現時先放租，而自住樓就另外找租盤。這樣就可以解決住屋問題之餘，又有錢去做投資。

若是前者，方案2會比較好。雖然方案1，你們可以避免受到長線租金波動的影響，但令你資金盡用，不能作投資增值，始終唔理想。

另外，由於你們退休後，都計劃周遊列國，租屋或者對你們較方便。

只要你明白，租金和投資變幅未必一致，有機會令你租金支出和回報差額收窄，導致退休現金流進一步減少。你覺得可承受這風險，咁就無問題。

假設你用方案2，資金上唔好全部買晒股票，要做一個平衡配置，去分散風險，從而提高你獲得現金流的穏定性。

你可以將這$1500萬，分成5部分。

第一部分投資收息股，你可以建立一個收息股組合，你可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$1500萬資金，平衡地分配在上述的項目上，對你來說是最好平衡風險，同時有穩定的現金流。

但當然，你現時距離退休尚有好幾年，故不需要咁快將全部資金，放入以上收息資產。你可以先將部份，放係我之前講的平穏增長股，去保持增值。

同時間，開始慢慢用其餘資金，配置上述收息組合，為退休做準備，咁就可以。

但如果你情願穏陣D，收大約5%回報就可以。這樣你直接用資金，配置在上述5個項目，咁就可以。

------------------------------------------------

Q22605：

謝謝龔Sir，其實我只有100股騰訊五萬頭買，因以前從不投資，所以上了你堂後才明白投資重要性，不是炒買，但由於先前看市場消息不夠多功課做不足，

以為五百頭都係合理區，所以不小心早買入了，但一買就大跌所以心理壓力好大,而且買入後一直出的都是中央負面消失，所以分析不到。今天仲大跌得勁，所以

十分恐懼又怕幾年後上不回去那辛苦儲來的錢就好像不見了，所以就更怕好像學習了都錯。剛剛收到你的回覆心情平靜一點否則又高位買貨底位賣出了。

請教一下龔sir如估值減了，它上回5xx不難，但減了不是更便宜，那去返5xx會變貴那市場還願意給回貴價錢？另外想問下如重估值後5xx是否屬於貴或是合理區？

現在這幾天心情反覆不安，所以由你百萬富翁書籍從看，你的書已齊要重看一次了，先前上堂的資料也重看然後發現自己補足價格概念仍很差，但謝謝龔Sir你回覆

龔成老師︰

如果再有政策出台，係有較明顯影響，係重新估值時，有機會令現時合理價，變成平宜。

至於到時會唔會有人，願意用貴價錢去入貨，其實係會有人。特別係大市狂熱時，好多人會不計平貴，盲目追入。

但這都不是重點，重點是我地唔會預測將來走勢，只會用現有客觀資訊，去判斷現時投資決定。

我地睇到騰訊(0700)受中央政策影響，長線風險大左，所以估值都有下調少少，只要不持貨過多，就無問題。

但由於佢長線質素，未受重大影響，所以以你只持有1手投資者而言，只要一直持有就可以。此股依然有增長潛力，長線企業慢慢成長，股價自然會跟隨上升，你唔需要太過擔心。

記住，我地投資要放眼長線。如果你改變唔到個思維，只會一直因為中短期股價波動(但這個情況是必然會出現)，而承受沉重心理壓力。

其實這樣狀態，你係不宜作任何投資。

------------------------------------------------

Q22606：

成哥，以下是我的組合，但情況不是太正面，是否欠缺什麼？

388 @ 230.1 4手 405
1177 @ 7.45 2手
3067 @ 13.21 1 手
9988 @ 236.1 2手

005 @ 70.8 1手 437
576 @ 7.19 2手
788 @ 1.23 1手
941 @ 72.8 1 手
2018 @ 98 2 手

龔成老師︰

你唔好用買入價或帳面賺蝕，作為判斷一隻股票或組合的成敗標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

你現時持股，都係有質素，你照持有就可以。

但你要留意，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時港交所(0388)，持股佔組合比重很高，故暫時不要再加注。未來時間，你要透過加大其他股票比重，令佢回復平衡。

------------------------------------------------

Q22607：

成哥，我現有以下股票，請問這幾隻股長遠是向好的嗎？我應該用什麼心態去面對。例如不須理會或平常心？

有以下股票如下：

345維他奶 25.5有10000
1810小米 25.75 有10000
175 吉利 20 有10000
1177中國生物 6.71 有10000

謝謝

龔成老師︰

你現時持有股票，都係有質素和增長力，若你係年青至中年人士，照持有就可以。

近期維他奶(0345)係4隻中下跌較多的一隻，由於之前事件，對佢短期股價一定不利，但長遠，我相信影響又未算核心性，但回勇的路仍長，現時仍要睇事件發展程度，中期的影響，當中仍有未知數，只可以話短期股價上落都大。

長遠來說，佢仍有質素，有品牌、有銷售網絡。

這股可長線的，只要貨不多，可守，但有心理準備中短期弱，要耐心持有。

另外，你上述持股，都好偏重係潛力股類(1810, 0175, 1177)，佢地雖然有增長潛力，同時風險都較高，不宜持有過多。

若你算年青，潛力股最多可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

而且長線計，組合唔好只係得3,4隻股票。你要建立一個多行業，平衡，或適合你年紀的組合。

未來時間，你就要加大翻平穏增長股部份，令組合更平衡。

------------------------------------------------

Q22608：

如每個月供需要幾多錢先可以買入呢隻股

龔sir想問吓有冇啲人係真係以一個普通人玩股票致富,而其實美股同港股邊樣好啲

Sir，本人資金10000$準備開戶口。上次講嘅盈富有留意，但想問吓有冇啲增長速度較快，賺得較多穩陣嘅美股或港股，可能短線投資的！

龔成老師︰

所謂致富，每個人定義都唔同。如果以全球富人排行榜計，巴菲特就係全球最成功，以投資致富的普通人。

而預期未來一段時間，中國和美國會係全球最重要的經濟體系。因此港股和美股，長線都係有投資價值。

以現價計，港股投資值博率，係會比美股高少少。但長線投資價值，2者都係有。

至於增長較快的潛力股係有，但我係唔會做短炒，因為當有有好多不確定性因素，會影響股價，有些因素甚至係與企業本質無關。

只有長線持有，企業質素才會反映在股價當中。就連全球投資最賺錢的巴菲特，都係唔會做短炒，所以你不要持有短炒致富這種想法。

以下是一些適合你的股票，潛力股增長力高，但風險同樣都唔細。以你18歲年紀，長線可佔你組合4-5成。但由於你投資經驗較淺，不宜持有太多，最多2-3成好了。

但由於現時你投資經驗不多，暫時可先月供指數基金。到你有較多資金和經驗，才考慮其他股票。

而現有資金，可現價先入一手盈富。只後再有明顯回調，就再入一手，並長線持有。餘下資金，等大跌市地動用。

------------------------------------------------

Q22609：

我40歲，收入39000， 每月支出費用26000，如果想月供股票作退休收息之用，應該買幾多隻組合。心水2648，3110，6823，2800，各供$1000？定月供三種各供1500

如果再有多啲錢、哪隻可以月供多D

早晨，可以。俾D意見我嗎買哪幾隻月供適合我年紀。另外我應該買哪幾本書學習多啲

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

以你40歲年紀，投資著力點，唔應該係收息。而係先用一些有增長力的優質股，去累積一筆財富。到有一定金額時，才將佢地轉換成收息資產，創造稳定現金流，去支援你退休生活。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約4成，視乎你投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

書本上，你可以先睇我架《80後百萬富翁》、《財務自由行》和《股票勝經》，都適合初學者。

------------------------------------------------

Q22610：

我睇緊你寫的80後百萬富翁，希望5年能儲到人生的第一個一百萬。我計現金每月儲1萬元，然後月供$2000兩隻股票。

心目中的股票包括小米，比亞廸，騰訊，京東物流等。想問下龔sir 有冇咩意見？

我係年過45的中年婦人，有工作的，月薪$35000左右，要供樓約萬多元。謝謝

龔成老師︰

比亞迪（1211）現價偏貴，最好回到翻D先開始月供，如果你真的好想買，就小小注月供，或考慮月供2845。而京東物流（2618）不確定性都高，唔建議作為月供目標。

而小米(1810)和騰訊(0700)都係可以，但由於佢地係潛力股，有一定風險，以你年紀最多佔組合3-4成好了。

餘下部份，建議用平穏增長股作組合。因此，較理想做法，係在小米(1810)和騰訊(0700)2選1去月供，如果你想2隻潛力股都保留，則每隻各$1000。

之後再加入2隻(各$2000)的平穏增長股，餘下的$4000就儲起，等大跌市才出手入平貨。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。如果有投資美股，可投資VOO。

------------------------------------------------

Q22611：

我想問下以我個人為例 我一個人儲到$25000。如果用一半去月供，大約$13000，有冇話一般供幾多隻股票會比較理想？

定係keep住依家果3隻，加大銀碼就可以呢

我心儀係1448 同2382 ，1928 其實係咪應該直接現價買入呢 定做月供會好啲。

我哋想買或租既地區會係大埔，有考慮租或買太和寶雅苑居屋 或者 大埔中心私樓。但比較擔心既係 因為大埔好多樓盤都30年以上

而兩個盤都未做大維修，擔心買左之後 會有一大舊錢要洗 因為維修既錢應該無得預計 （居屋是否都要夾錢維修？ ）

而考慮租買既另一原因係男友 將來有可能排到宿舍 但最快都10年後

真心感謝， 你唔識得我都幫我地咁多 睇你既書同fb 好似做左朋友咁

龔成老師︰

無話供幾多隻才理想，長線計，只要你維持到個組合平衡性，咁就可以。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

另外，你要注意翻，如果供得太多，可能會令你個股月供費用成本好高，影響長線回報。

其實你照每隻供最少$1500左右，應該問題不大。

至於你心儀的股票，福壽園(1448)和金沙(1928)都在合理區，月供和直接分注入貨，都係可以。

而舜宇光學科技（2382）要回D，才算合理區頂，才可以小注入貨。但月供，現時開始都可以。

金額方面，最緊要唔好偏重左任何一隻，咁就無問題。當然，最好加入指數基金就能令組合更加平衡。

居屋和私樓都有要大維修的可能，所以你係買這些樓齡較高物業時，你要了解清楚這大廈的大維修安排。

如果你一心係諗住等宿舍，即係長線無買自住樓的必要。其實現時先租樓，都係可以。

但由於物業都係一種資產，我地成個財富組合，唔可以只係得優質股。所以，你未來累積到較多資金時，可考慮買入收租物業投資，令財富組合更多樣化和平衡。

現時整體租金回報率不高，故不用急於投資物業，可以先以優質股為目標，去提升自己財富。

------------------------------------------------

Q22612：

龔成老師，今日我終於都買了[email protected]

我計算過估值︰
合理PE~16.73-19.63
有代表性eps~2.4
估計疫情後每年10%增長

預期有代表性Eps～2.64
合理區大約$44-$51

如果保守不計eps增長
合理區大約$40-$47

而我的買入價45.9比較以下，計算的價格應該是合理區中或中上，請問小弟的計算對嗎？

想問這輪抗疫措施對0027對中長期有核心影響嗎？

龔成老師︰

銀娛(0027)的長線投資價值無受今次疫情影響。但始終疫情尚未穏定，你預佢長線

你計出的估值，大致都合理，現價大約合理區中下。因此，你買入價係在合理區水平。

你預係大約合理區中下部，此股有質素，可長線持有。

------------------------------------------------

Q22613：

哈囉 我啱啱開始出嚟做野 想開始每個月儲錢作為買樓基金 有睇開你啲盈富月供 但又對呢方面唔識 想你比下意見 長供建行定盈富好

龔成老師︰

策略上，你可以投資「平穏增長股」和「潛力股」，去累積這筆置業資金。你每月5成儲蓄做月供。其餘先儲起，用一邊月供一邊儲蓄的策略。

盈富(2800)和長建(1038)都可以，但前者係58間優質企業的組合，更有效分散風險。如果你不懂選股，可以先全數供盈富。以下係一些適合你的股票，你可以參考下。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

由於你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類，或者暫時只供盈富(2800)，都係可以。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q22614：

龔sir，如果700有機會跌到$400, 我想入1手作長線，那麼在我投資組合裏面「潛力股」的百分比又會再增加。

我日後再入市時，如果集中翻在「平穩增長股」及「收息股」是否可以平衡翻呢？這樣操作是否可以？請指教。謝謝！

龔成老師：

騰訊（0700）在$400，你可買。

你首先要設計好自己的長期「組合%」，如果年輕潛力股比例可較多，年長就收息股比例較多。另外，潛力股風險較高，這點你都要明白

設計好大方向，比例，之後就慢慢作出配置，這刻買入潛力股後，之後買入收息股等，可平衡。

總之，要建立一個「長期」的平衡組合。

------------------------------------------------

Q22615：

龔成老師你好，我同老公係理財方面有較大分歧，所以想請教下你。因為生左小朋友，我哋計劃3年後買樓，預大約買800萬左右既樓，首期預俾2成左右。

但佢呢一年，完全儲唔到錢，將我地的儲蓄計劃搞亂左，佢同我理財概念完全相反。

然後我哋吵大架…想問下我應該點樣去解決呢個僵局？

唔知呢個似感情問題定理財問題多啲，點都好，我以前係覺得係香港買樓係無可能，係你令我知道一步步黎，最終都可以達成目標，令我賺到人生既第一個一百萬，多謝你！

龔成老師︰

出現分歧，係正常事。100種人，就會有100種不同想法，100種不同目標。最重要，我地要"互相"遷就和諒解，才可以一同生活下去。

所以，你們真正背後的問題，有機會不是投資理念上，而是在溝通上。

我建議你地先將自己冷靜下來，之後再找個機會，作理性討論。因為係不理智情況下，只會令你地愈做愈錯。

你地要嘗試令對方明白，自己所想的未來計劃、目標和擔憂。新車已經買左，係一個定局，唔好再浪費心力去諗。

往後的路，依然係可以改變，想一想如何係現有資源，和大家都可接受情況下，繼續向前，才是你們應該做到事。

我明白準備結婚，去成家立室這個階段，係好忙，一定有好多野煩，好多野會不如意。

但這個正是你2口子要上的必修課，你試下放輕個心情，唔好比買樓或者投資問題困死自己。你現在重點，應該係要學習如何2人同步，一齊去走往後的路。

我會建議你地日後，多溝通，定共同目標，例如「如果我地的財富去到XXX水平，就可以買XX當獎勵大家」。

只要係一起走，好多問題都解決得了，加油!

------------------------------------------------

Q22616：

Hello, 想問問少少股市知識

可以這樣假設，只要標指股息率不低於10年期美債孳息率的0.54，美股就有一定吸引力，若然這比率降至0.4或以下，對美股是危險訊號。

觀乎金融海嘯市況最蕭殺時，債息率曾高見4.1厘，而股息率低見1.7厘。

"標指股息率" 係講緊咩同埋邊度搵到?

龔成老師︰

其實可以係其中一個參考，10年期美債孳息率你可以理解為一個無風險利率。而股票股息率，係一個你需要承受一定風險，才可以獲得的回報。

因此，若果你無風險回報，比有風險回報還要高的話，其實係反常，某程度係代表個市大過熱情況。

但我地唔會因為咁樣，就斷言大市已經好危險，純粹只係一個參考訊號。

因為如果企業係賺錢的話，股息會增加，慢慢2者差異又會重回正軌。而且大市熱，唔代表個股係貴，我地一定要獨立分析企業，去得出一個較準備的結論。

------------------------------------------------

Q22617：

龔Sir,我是一個40歲單親母，月入两萬，無資產，每月草一两千（甚至幾百）現只有現金流两萬，請教我可以買D乜？眼看你介绍的，全部都是一手幾萬的，可買不起

龔成老師︰

以你年紀計，投資應以增值為主。但你現時資金不多，我建議你2萬不要動用，用來作生活上應急會較好。

至於每月儲蓄，你都比較少和波動。你要找出一個你覺得每個月都儲到的金額，用佢去做月供指數基金，去累積資產。

你可以去銀行或證券行，開個月供股票戶口，之後每個月定期咁去月供，咁就可以。

同時間，你睇下有無方法開源節流，去提升每月可儲蓄金額，用去月供更多不同股票，令你財富增值能力得以增升。

------------------------------------------------

Q22618：

我想了解下咩係月供股票，因為我岩岩睇到你既po。

我係新手31歲，有2-3萬可用資金！

龔成老師︰

簡單來說，月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入某股，假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3年以上，之後持有5年以上。

月供最重要的一點，是「選股」，如果你無選股能力，就投資指數基金。

而財富增值方面，當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，可以投資一些「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

但由於你係新手，我建議先集中係指數基金。餘下資金和另一半儲蓄，我地就等機會，當大市出現較大回調，就加大力度掃貨，然後作長線投資。

------------------------------------------------

Q22619：

龔成老師您好！前两年間中有留意你的專欄，已覚得你的投資概念很好，近来才知道你開了臉書，原来老師那麼年輕，真的是後生可畏！

本人47歲，家庭主婦，與先生大部分在海外生活，没有子女，海外有自置物業(巳供満)，先生还有10年多退休，退休後有年金，

估計可補貼至少—半生活費，他有儲蓄習慣，近来開始投資海外股票市場。

本人因不熟悉海外投資市場，故選擇持續投資港股。幾年前因沒有投資知識將现金集中於收息股，但發觉組合較保守難以増值。

希望老師給予意見如何調動股票以達至最好的增值效果，如賣出那些股票轉其他増值股票。生活負担不重，可承受風險中上。

现金$10萬+保险儲蓄約$20萬

(以下是持有股票的平均買入價)
1)中国銀行(3988) @4.28 /10,000
2)中交建(1800) @10.88/2,000
3)煤氣(03) @14.16/14,000
4)中石油(857) @4.42 /16,000
5)中移動(941) @48/2,000

6)京東健康(6618) @128.5/400
7)招金(1818) @8.0 /2000
8)山東黃金(1787) @13.98/2000
9)鞍鋼(347) @5.12 /4000
10)騰訊(700) @470 /100

老師無私賜教，感激無限！

龔成老師︰

首先，你有一個投資理念很正確，我地永遠只應投資自己了解的股票和市場，這點其實很重要。

以你47歲，都有增值的空間，但選股上會保守少少，主要集中係一些平穏增長型股票。

山東黃金（1787）、招金(1818)、鞍鋼股份（0347）和中石油(0857)都是商品類股票，本身產品無獨特性，價格很受市場影響，故投資價值較中等，不宜持有太多。

中交建(1800)質素只算不過不失，而京東健康(6618) 雖有質素，但不確定性好高，這2隻股票同樣不宜持有太多。

其餘持股，都係有質素，可以長線持有。但煤氣(0003)佔比重太高，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

因此，我建議你沽少少，換至其他優質股，去平衡翻個風險。

現時大市只在合理區，資金不宜盡用。你10萬現金可以先留起，等大跌市才出手。以下是一些適合你的股票，現價合理，你煤氣套現和新資金，都可以以此為投資目標。

平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

至於保險，其實你買基本保障就可以。儲蓄保險增長力唔高，不宜投資過多。

以上策略，主要係講你地增值部份。但當你們將正式踏入退休之年，就要進行調整。開始慢慢將手上增長股，換成收息股，透過其派出股息，去支援你退休生活。

------------------------------------------------

Q22620：

老師您好，首先多謝你耐心解答大家問題。想請教投資方法。

本人42歲，月入兩萬幾，有現金90萬，有一層樓值520萬，淨番50萬樓宇按揭就供完。每月可儲6000。

大概持股票市值20萬：包括：

0005匯豐1600股，平均買入價79.9，
1088中國神華500股，平均買入價37.75，
1398工商銀行5000股，平均買入價5.093，
2388中銀香港3000股，平均買入價27.7，
3913合景悠活3000股，平均買入價7.9，
總括黎講共蝕左約9萬。

我投資知識極少，唔識分析股票，“月供股票”都係最近睇你嘅信箱先知有呢樣野。請指教什麼投資股票策略適合我。

另外，我是否應該還清按揭50萬，但現金就得番一半龐身，不過按揭利息唔多，每月千幾蚊。請問我應該點樣善用我現有資源，令自己財務自由，有被動收入，可輕鬆退休？

好同意你話應該長線投資，令財富增長。謝謝指教！

龔成老師︰

首先按揭方面，由於現時市場息口不高，我建議用來投資增值，財富增長效率會較好。

另外，你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你現時持股，都係有質素，可長線持有。但較大問題係你組合中，大部份只係收息股(0005, 1088, 1398)，佢地增長力不高，主要係收下息。

以你年紀都有一定增值需要，未來最好加入一些有增長力股票，去增升翻個財富增值效率。

其次，我發現你好集中係銀行股。記住，個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

所以，你暫時唔好再增持銀行股了，到你組合平衡性回復正常，才再考慮。

未來時間，除了90萬現金，你都可以用埋每月儲蓄，去做月供股票，為自己財富增值。

你42歲，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$3000做月供。其餘先儲起，用一邊月供一邊儲蓄的策略。

但由於潛力股有一定風險，你投資知識不高。我建議你先$2000月供指數基金，再$1000供多隻平穏增長股。到你學會更多投資知識和技巧，才好考慮加入潛力股類。

現時大市只是合理區，你現有90萬資金可以先投入20-30萬，用"分注"形式，慢慢買入上述平穏增長股。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

到你累積到一定金額，你就可以將佢地慢慢換成收息資產，透過其產出的現金流，去支持你財務自由後的生活。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20821-Q20840）

Q20821：

老師你好，我係你學生，先多謝老師的回覆，我又長知識了

但始終对數字背後意思不大了解

老師有提及 要考慮
1. 過往及將來經營環境
2. 為何產生這個生意和盈利

這些可以從那裏看到？ 財務報告及年報 ……

這樣又要從頭多看幾次 慢慢去領會

另外再想問，在上課時老師有提及#270 粤海投資也是一隻不錯的收息股 但股价一直偏高

跟據課堂提供數據
1. PB 1.6 -1.8
BV 6.765
估值 10.8 - 12.17

2. 用10年 PE 中間數
PE 12 - 16
2020 eps 0.6898
估值 8.28 - 11.03

3. 按派息 4 /5 /6%
2019 Yield 0.5894
估值 14.72 / 11.78 / 9.8

其實用那個方法去評估#270最合適？

請老師 比些意見

龔成老師︰

我所講要考慮「過往及將來經營環境」和「為何產生這個生意和盈利」，是想你睇成件事要長線咁睇。

這些資訊，會係年報、新聞、官方網站等地方見到。有時你未必睇1隻股票可以知道成個大環境，可能你睇多幾隻同業年報，會較易得出這個大環境的概念。

另外，我地睇數據唔好單單集中係某一年，你要睇之前發展係點樣。點解會發展到今日咁樣，而將來發展會唔會維持這個走勢。

如是，你係間較平穏架企業，較易透過過去一段時間資料，預期佢將來發展走勢，從而推斷出將來盈利。

但若果係較有潛力公司，就不能太著重過去，要將未來因素睇得重一點。

至於粵海投資(0270)這類企業，你用PE和股息去做估值，會較適合，PB都會用，但只是輔助性質，因為當我地考慮企業價值時，主力一定是企業將來的業務情況，而資產價值方面，只是一些現時的情況，因此，我地會以市盈率及股息率作為估值的核心。

而這企業，你同時用3種估值方法，可以，因為佢擁有的資產都是有價值的，同時佢的盈利情況，會因為佢擁有多少資產，而有所關連。

所以當市場衡量佢值多少錢時，的確會同時考慮佢的資產價值，但就不是核心，只是一個轉助因素。

當我地估值時，好多時會同時運用多種估值方法，這如同不同的角度去衡量一間公司價值多少，所以，唔會話只用一種估值方法，而是配合運用，只是角度問題，以及比重的問題。

你所計算出來的估值，三種方法，大致都有根據，都掌握到課堂所學，運用上基本正確，你可以以市盈率及股息率作為核心去推算企業價值。

粵海這股，現價算係合理區較中間位置，有長線投資價值。

------------------------------------------------

Q20822：

阿sir，我係你學生，睇六福個年報嘅資產負債表時，見到上年同今年嘅分別係今年多咗一項使用權資產，呢個上堂我聽得明。

但佢同時又無左一個土地使用權，數目無左，點解？

龔成老師：

你可以睇翻六福（0590）的年報，當中的附註17，有解釋到，主要是由於新的會計準則，出現一些入數的影響。

------------------------------------------------

Q20823：

老師你好，我睇完你的書，獲益良多，亦發現我之前買賣股票都沒有定止損價，亦沒有去研究公司企業內容就決定購買，結果導致輸多贏少的結面

我好耐之前買左一隻股票842，我當年買價格十分高要$4.5一手，但係我一直沒有放棄，岩岩睇左關於此股的資料

明明佢業務有所增長亦努力改善中，為何股價仍然是不會升呢

問題2，我現在股票係1/3，現金係1/3，基金投資1/3，請問這樣操作可以嗎，其實我想將現在股票轉月供，但無奈全部都蝕緊，又不能咁做，你會有更好的建議嗎

基金期係15年

我想請教你仔仔利是錢有5萬蚊買月供股票好還是派息基金好呢

龔成老師：

1）理士國際（0842）主要在中國從事鉛酸蓄電池製造及開發，產品可分為備用電池。

例如應用係ＵＰＳ、電信通訊、其他消費類及可再生能源四個領域）、起動電池及動力電池（應用於電動車，包括電動自行車、低速電池車及叉車。

業務不過不失，生意都有增長，但盈利有點不穩，同時持術未算強。ROE亦處於不高的水平。

這股投資價值只是一般。如果你持貨多，不如見佢上多少少就減持部分先。這股增長力唔強。

2）其實都算平衡的，不過，基金有好多類，要睇翻你持有的基金類別、質素、過往回報等。如果有利是錢是長線投資，最簡單是投資盈富（2800），你分幾次買入就得。例如每3個月自行買入一次。

------------------------------------------------

Q20824：

你好，之前用人生大半積蓄入了10手華潤 (均價$67.5) 及10手信義光能 (均價$18.3)，近期跌了很多。請問中長線有機會升回嗎？感謝

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果你只集中持有2隻股，這是一個高風險行為，你要調整翻組合。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，你可長線。但要睇機會減持，平衡翻整個組合。

至於華潤？是那一隻，號碼是？

華潤系的股票一般都不差的，相信問題不大，但你持貨過多就要調整。

------------------------------------------------

Q20825：

成哥，想請教一下，本人36歲，將會結婚，已用去了大半儲蓄，

而從前無留意你的指導，在高價位買落了以下股票，想問一下我應該怎樣部署？在較高位放了，換回優質股？

0005 滙豐 $51.75 800股
1357 美圖 $10.46 2000股
8473 彌明生活 $0.73 20000股

看了你的投資理財觀念非常好，現在已不斷儲蓄(每月儲$6000)，之後想作月供股票，保持增值，以下組合可以嗎？

盈豐2800 - $3000
港鐵 0066 - $1500
太古 1972 - $1500

龔成老師：

匯豐（0005）是收息股，未必適合你的年齡。你可以等佢股價上翻D，轉其他。

美圖公司（1357）過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大。同時，要上翻你當時高位，難。

這股暫時可持有住。

彌明生活百貨（8473）業務不過不失，發展能力中等，不是高增長的類別。

以佢現時的經營情況，算是合理價，但這股始終規模不大，加上近年的盈利有下跌情況，存有風險，因此不建議太大注。

另外，政治相關因素，都會令這股波動，要明白股價風險，政治因素是好難預測的。

至於月供的3隻股，都是有質素，可以長期進行月供。

------------------------------------------------

Q20826：

龔成老師，你好！本人38歲，想年年投放15萬入去，

6882 - 10萬股0.48入
6060 - 300股58入
272 - 6000股1.31入
308 - 4萬股1.2入
1766 - 1萬股3.93入

1800 - 1萬股3.86入
390 - 8000股3.91入
1186 - 8500股5.8入
769 - 12000股 1.25入
669 - 500股125入

這樣可令組合每年增值15-20%嗎？
或需早早換碼

龔成老師：

如果要每年有15%的回報，你要投資較高增長力的類別先得（當然，風險度都會增加，你要自己衡量）。

東瀛遊（6882）、香港中旅（0308）會因疫情減去而股價好轉，但睇翻佢疫情之前的業務情況，其實唔見得特別好。長期增長力不足。

眾安（6060）都有潛力的，不過要控制注碼。

瑞安房地產（0272）增長力不足。

中國中車（1766）、中國鐵建（1186）、中國中鐵（039）、中國交通建設（1800）都是相類行業，而長期的增長力，未算強。

中國稀土（0769）有危有機類，自己衡量風險，唔好大太注。

創科（0669），有質素，可長線。

------------------------------------------------

Q20827：

龔成老師，你好！本人38歲，想年年投放15萬入去，

6882 - 10萬股0.48入
6060 - 300股58入
272 - 6000股1.31入
308 - 4萬股1.2入
1766 - 1萬股3.93入

1800 - 1萬股3.86入
390 - 8000股3.91入
1186 - 8500股5.8入
769 - 12000股 1.25入
669 - 500股125入

這樣可令組合每年增值15-20%嗎？
或需早早換碼

龔成老師：

如果要每年有15%的回報，你要投資較高增長力的類別先得（當然，風險度都會增加，你要自己衡量）。

東瀛遊（6882）、香港中旅（0308）會因疫情減去而股價好轉，但睇翻佢疫情之前的業務情況，其實唔見得特別好。長期增長力不足。

眾安（6060）都有潛力的，不過要控制注碼。

瑞安房地產（0272）增長力不足。

中國中車（1766）、中國鐵建（1186）、中國中鐵（039）、中國交通建設（1800）都是相類行業，而長期的增長力，未算強。

中國稀土（0769）有危有機類，自己衡量風險，唔好大太注。

創科（0669），有質素，可長線。

------------------------------------------------

Q20828：

龔sir 京東健康192 有重貨，現在應該溝嗎？但係現金不多，無咩力溝，應該點做好🥲心急人上

龔成老師：

如果重貨，唔好再加了。

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

京東健康（6618）由京東（9618）分折出來京東健康，將會來港上市。這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴。你唔好再加注。

至於原有的貨，如果佔組合%太多，最好減持部分，等你唔好過度集中。

------------------------------------------------

Q20829：

龔成老師，真係好感謝老師一直以來分享咁多有關金錢、社會、投資既財商知識。

幾乎你出既每本書都睇晒，令我比同齡嘅同學對金錢或者資產嘅概念更深入理解（當然我亦都會繼續學習）。

但係都想講聲唔好意思。距離上次喺依度問你問題之後，我被一啲所謂嘅「快速賺錢」等其他所謂嘅投資導師吸引而冇報到你既股票班。而依一年不斷轉投資方式（跟唔同嘅「大師」時間），我發現自己原來錯過咗好多好好嘅機會。

下面係大部分睇完你既書或聽過你上次既解答而作既投資，但係受「誤導」錯過既優質股票。

。港鐵（0066）$37x3000股
。領展（0823）$60x3000股

上面兩隻股票最終都係係好接近嘅價格賣出左，主要係受坊間所謂大師嘅誤導（一啲提倡短期炒賣嘅）

不過值得慶幸嘅係，我多多少少都明白到投資既正確態度並唔係炒炒賣賣而係持有一間公司（正如你經常強調嘅概念）

目前我雖然仲讀緊final year 但係目標一值無變：5年內有百萬資產。

下面幾隻股票係我目前看好或者我本人都想經營嘅生意，想問吓你嘅看法。（其實大部份都係睇你嘅書YouTube Channel等等睇返返嚟嘅優質股票）

。金沙（1928）
。小米（1810）
。醫思醫療集團（2138）
。平安好醫生（1833）
。安恆科技（3067）

當然！今次會報名參加你既投資班，學習「正確」的投資觀念同技巧。

補充：距離上次問野依段時間 現金儲蓄：增加至200K
半年前開始左網店生意副業
今年為自己定下增加100k資產
衷心感謝你，睇完你既書同片，「決心」實現夢想

龔成老師：

我20年前，都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

其實大部分投資者，最初投資時都會行錯路，有人會醒，有人唔會醒。你現時已行正確的路，我地跟翻巴菲特的方法最正確（因為佢最賺錢）。

現時你持有的5隻股票，都有質素的，不過潛力類股有少少多（唔係唔得，因為你年輕，但你都要明白這動作有風險的）。

整體上你方向正確，保持進行就得。另外，留一定的現金等機會，都是重要的。

我相信你完成5年目標，可以的！加油！

------------------------------------------------

Q20830：

老師你好,,我係你新FANS,,求指教指教

本人31，現在供緊一層樓，生仔計劃中，每月扣除家庭必要開支，只有10000剩。

睇左你之後,,好認同你既概念，如:財務自由, 買股係買企業,,唔好齋諗唔做,,月供股當儲錢。

中期目標: 3-4年內儲100萬，長期目標:10年內買第2層樓。(300-400萬?)

1. 開支大令本金太少，我短期目標應該點定立好呢?

每月剩10000
5000供股:
2800 @2000
0027 @1500
1997 @1500

5000儲現金

2. 成哥你覺得點?

3. 年尾花紅儲左20000, 最近入左6666, 18.8入2手,,坐下好嗎?

以前唔識死,,玩牛玩輪,,輸過,,買下騰訊美圖賺少少,,發覺自己都係好似賭錢咁,,學你話齋,,根本唔夠知識,,簡單D講就係跟人玩。

而家好想好似你咁,,一步步達成財務自由!
感謝賜教

龔成老師：

1）你31歲，是事業發展的黃金期，我相信你可以從「提高長收入」著手，想想自己事業方向，有那些方法提高收入。

因為你將來可能會有小朋友，支出會進一步增加，要從「控制支出」著手會較難，因此，要思考提高收入的方法。

2）月供部分及比例，大致可以。但你31歲，其實可以進取少少，例如將1997轉為3067，長期月供，提高長遠組合的增長力。

3）恒大物業（6666）其實都有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

有貨可持有的，不過現價唔算平，唔好再心急加注。

財務自由，我地未必能一下子做到，但就可以一步步完成。加油！

------------------------------------------------

Q20831：

龔sir 多謝你一直無私嘅分享，想請教下你嘅意見，我應該點樣理財規劃？

我35歲，月入40k，開支有供樓、家用、交通費等。每月約儲到10-15k。草根出身，與家人夾份買咗1個居屋單位 & 車位，自住自用（用我個名），同家人同住。

投資初哥，買咗少少股約值26萬，
金沙 $28.4買入
置富 $7.36買入
TSLA usd$675買入
Twitter usd$70買入

剩約40萬現金，請問應該如何配置現金 & 股票呢？有否其他投資策略建議
感謝龔sir回覆。

龔成老師：

現時的股票，都有質素的，你長線持有就得。

你這年齡，持有平穩增長股+潛力股可以，平穩增長股比例可多少少，如果你有一定的投資實力，潛力股比例多D都得。

至於現金$40萬，你可以動用$20萬，但唔好一次過投資，要慢慢分注買入。

平穩增長股：考慮盈富（2800）、VOO。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）、QQQ。

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20832：

想問問如果有200萬現金， 每個月可以儲蓄2萬，住在已供完的居屋，想10年後財務自由。

請教買樓(收租)投資好，或是買派息股票好呢？ 那種投資回報高呢？

工作很忙，沒有時間睇住股市。

龔成老師：

由於買樓有點勉強，因為你目標想10年後財務自由，如果買樓按揭要完成這目標較難配置。

因此，投資股票會較適合。

你可以在這10年，投資「平穩增長股」+「收息股」，到10年後，再將平穩增長類股，轉為收息股，集中在現金流。利用這10年做好「基本增值」。

收息股組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

平穩增長股：你可以考慮盈富（2800）、銀娛（0027）、恆基（0012）、港鐵（0066）、中銀香港（2388）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

暫時，你可以動用$100萬，分注投資上述股票，慢慢買入。

餘下資金，就管大跌市先動用。

------------------------------------------------

Q20833：

老師你好，求指點！ 本人40歲，現在大約有現金$30萬，想問下現在應該再入貨嗎？我想在5年內增長多有$50萬，有可能嗎？麻煩幫我分析一下！如果入應入邊隻好？

同埋邊隻應止蝕走，萬分感激
本人持有以上股票：

175 2手@31.6
860 7@$0.635
1448 5@$7.98

2382 1 @$207.6
3067 20@ $21.8
6690 10@$33.84

龔成老師：

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

上述持有的，基本上都有質素，可長線，無問題。

力世紀（0860）要注意，佢一直處於年年虧損的狀態，而我地對這類股好有戒心。

我地只可以對佢的前景作「想象」，無人知真正的價值有幾多，股價一定會大上大落。見佢之前有做個十合一之類動作，這類股票要小心。

整體而言，此股好難分析佢價值，投資風險較高，小注持有好了。

$30萬，暫時只建議你動用$10萬，以你年齡，可投資平穩增長股+潛力股，而平穩增長股應該佔比多D。

你可考慮恆生科指（3067）、吉利（0175），如果舜宇（2382）及福壽園（1448）回翻D都可考慮。

當然，你可以同時考慮其他股，建立更平衡的綑合，盈富（2800）、港鐵（0066）、領展（0823）都可考慮。

------------------------------------------------

Q20834：

老師～～最近入左雷蛇，平均價系2.83，回落左好多（佔組合10%，）上落好大，但我又覺得佢有潛力，覺得佢好有諗頭同多元化，將來應該有得發展，因為我打算長揸的

如果佢再跌落去我應唔應該加注，定係就咁揸住等佢長遠發展？

暫時組合：平穩增長股佔65%，潛力股佔25%，高風險（雷蛇）佔10%，今年33歲。麻煩老師了

龔成老師：

雷蛇（1337）有潛力，但本質好波動，盈利不足，所有的市值，都只是基於「將來預期」去產生，這個預期可以變得好快，因為大家都只是「估」。

同時，電競行業的真正營運模式，賺錢能力如何，充滿了未知數，一個遊戲可以好受歡迎，亦可以好快無人玩。

另外，佢近年都有發展一些新興業務，潛力度有的，但仍左有不確定性。

因此，這股有前景，但有風險，無人知真正的價值。而佢另一些業務較是較新興，同樣有危有機類，所以，佢有可能有潛力，但風險方面就要注意。

你現時持有10%，其實已差不多了唔建議佔組合比例太過多。

至於組合的分配比例，無問題。如果你有一定的投資實力，潛力股比例可以增加。

------------------------------------------------

Q20835：

你好 我都好想做到財務自由 我一直都有留意你文章 我今年已經35歲 工作十五年 最近辭咗職 因為父母年紀老 佢哋想我出嚟接手舖頭工作

但佢哋每個月只會俾七千蚊我 我一向都無儲蓄習慣 手上供緊幾份保險 巳經無左一半人工 有兩份供多一年就已經供完

以我現時咁財政狀況 我係咪已經無機會做到財務自由 我只想到老時候 有啲錢俾自己用 眼見舖生意很差 想問下老師你有咩意見俾我

龔成老師：

如果你每月只有$7000，的確得難利用投資去做到財務自由。

不過現時你已接手舖頭工作，這是一盤生意，如果運作得好，每月有一定的淨現金流，加上如果能去到「生意自動運作」的模式，令你在將來可以跳出來，其實都等同如財務自由。

所以，你現時要想想，怎樣令店錯的生意好轉，是因為現時經濟短期不景，還是有核心問題？能否改善？能否轉營？如果店舖有核心性的問題，就要變，或結束。

你長期收7000同時無發展只會浪費時間。

------------------------------------------------

Q20836：

龔sir 你好 我有事情想請教你 聽下你意見

資料背景：我（35）先生（38）共同生意，平均家庭月入：28-32萬，而家生意做左三年，我同先生終於可以完成 第一層樓既目標喇

（我地目標係兩樓一鋪~努力中）
我先生專注於事業，而我較專注於將營利再投資，兩公婆各有各功能。

因朋友移民 所以賣樓套現。
我地用860萬 幫佢購入 廣播道 實490連車位 作投資收租用。

因做生意關係，我地會做六成按揭，而朋友又唔急住成交，所以我地計劃 7/8月成交

想請教下，

1，仲有幾個月時間，可否將250萬餘下首期 用作投資收息用？ 風險是否太高？

2，我地股票戶口有約190萬左右： 6，1038 ，66，270，823，659，2388，1928，1211，175，700，9988，3918，1177，3319

想問如果想賣出套現，現今情況該賣出哪個？ 因全部都好優質（我覺得~）好難選擇

暫時帳面有18%增值，未計收息。

這個成績還可以嗎？因我已是你的進階班畢業生~
但我覺得自己增長度仍然好慢，未見理想。

我信心還不夠，好多時候未夠信心加大注碼。（因我內心時想著要留錢做首期，不敢太大動作）
希望下次大跌市，自己可以做得好啲，越嚟越進步啦
（我真係好期待跌市，雖然我有貨係手~）

3，而家有時會覺得自己好孤單，唔知點解 唔敢同朋友講依啲問題，亦都唔敢同朋友講買樓問題甚至乎講金錢既事。

我都明白做自己 甚至乎做好自己就好，但唔知點解 對住朋友 我都想收埋自己多啲。

我驚自己講既野，自己既現況，令朋友覺得我扮哂野，扮叻咁

所以，好多謝你既出現。

其實因為我幾年前睇左你本（財務自由行） 第一本睇你既書。

先發現原來買樓唔係想像中咁難實現。
而家我同我先生終於實行到喇～ （你係唯一一個分享到既人呀）

下一個目標，我記得你上堂都有提過，就係黃竹坑站既盤喇。

希望下次我可以分享到比你聽我又完成目標啦⋯⋯

你每日既努力 真係可以默默鼓勵到好多年輕人架。
加油！希望你咳少啲
最後，抵你咁靚仔既。香港鑽石級荀盤呀你！

龔成老師：

1）當然有風險，所以唔建議。你都見到近期大市上落可以好大，無人知你要用資金時的大市情況。因此，建議你持有所需現金，有餘下資金先用作投資。

2）的確，全部都有質素，如果要賣，可以找一些增長力相對較一般的，以及佔你地組合比例太多（可以賣部分）。

例如賣電能（0006）、長建（1038）、新創建集團（0659）。

你現時的投資成續不差，選股正確，你保持這個方向進行就得。完成買樓過程先，之後先重新建立翻股票組合。

3）這是正常的，唔係個個對投資有興趣。同埋，你講太多自己可以買樓等等的事，有D人就會唔中意你，這點我都明，所以我先唔出樣，就係當你不斷向上流，而D朋友無法同一狀態時，你太過講自己野就未必是好事。

其實，你地現時的生意收入不錯，應該將較多資源，投放發展生意，小部分資金就投放在股票物業去平衡財富，我相信長遠對你地最為有利。

加油！期待你下一個目標的完成！

------------------------------------------------

Q20837：

老師你好，本人一直在老師Facebook page吸收你對價值投資和長線投資概念，深感認同，多年來投資的股票都傾向行業內較有規模的，但有些股價暫時不太理想，想請教一下以下股票意見，謝謝老師。

中國中車 1766: 在南北車合併前已持有，合併後不知為何股價會大跌，在低位溝點貨，
平均價大約11.x左右，老師認為我該再買點貨再溝淡嗎？

碧桂園 2007: 都是以前在較高位15.x左右就持貨，之後跌至9.x左右繼續溝貨，平均價約11.31左右，暫時股價升幅不大，我該守候還是再溝點貨？

華虹半導體 1347 和比亞迪 1211: 暫未有貨，留意到國內電動車市場正在發展，但最近新經濟股又常受美債息率影響股價，不知何時是入市良機，望老師指點現價是否合理或較貴。

百威亞太 1876: 在23.x左右買入，老師認為這股票值得長期持有嗎？

阿里巴巴 9988 和 明源雲 909: 國內科網興盛，想投資參與這一趨勢，見一些大型投資公司都有持倉，但新經濟股股價反覆上落較大，老師認為這兩隻股票現價理想嗎？適合長期持有嗎？

中建材 3323 和中聯重科1157: 國內基建持續發展，老師認為這兩股票現價理和。適合長期持有嗎？

之前已參考老師的其他post建議買入金沙、中生製藥，股價進展理想，謝謝老師。

另外資產組合有匯豐0005和九龍倉1997這類傳統經濟股。

不好意思，遺漏資金內容，股票户口內總資產組合二百萬，現只剩76萬現金，該分注再投資還是待機再入市？

龔成老師︰

首先，我想你明白"溝貨"與"分注"的分別。溝貨是愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。若是"溝貨"，就不是再入貨，因為再平，都只會令你增加風險。

現時大市在合理水平，你76萬現暫時不要用，去等大回調出現，才入貨。

中國中車（1766）的本質不過不失，但增長力不強。在2015年，這股曾經熱炒，並處於貴的水平，其實市場發現佢原來只能平穩增值，業務不會高速增長，所以股價回落至合理水平。

其實，這企業的業務一向都是平穩增值，只是市場對佢有過高的期望，現價合理。

碧桂園（2007）負債不輕，風險較大，唔好太大注。

比亞迪（1211）長線發展正面，但現價偏貴，回到$120倒會較好。

華虹半導體（1347）同樣有質素，但現時估值有少少貴，如果投資，最好回翻D先。或小小注買入後等跌先正式入。

阿里巴巴（9988）算係合理區頂，可分注。

明源雲（0909）初步分析，處貴水平，值博率未算強，始終市場現時對這類股有好大期望。只可以話，如投資，小注可以，長線可以。

百威亞太（1876）、中國建材（3323）、中聯重科（1157）、匯豐（0005）和九龍倉（1997）都質素，但你預佢地增長力係較平穏。特別係匯豐（0005），佢主要係收息，若你係較年輕就不宜持有太多。

------------------------------------------------

Q20838：

你好龔sir, 本人42歲平均月入62k而每月開支包括供樓+雜費around 26000, 有一小朋友（年纪尚少）有一物業（未供斷，想看情况搬大些），對股票投資不太認識

過去偏重現金儲蓄來累積財富亦有月供基金10年左右應不應暫停轉到其他更加有𧹏力的地方

原因只得2厘回報. 2019亦開始每月6000供盈富.平鈞價 $26.5
呢2個月跟你建議分批入左些3067 @18.75（打算 每月固定入三手）。
你㸃睇？

中银 2388 [email protected]
必瘦站 1830 12000 4.67
長江基健 1038 1000 43.25
香港電訊6823 5000 10.62
港燈2388 5000 7.62

睍時持有的股票有没有需要裯整？
有以下問題想向龔sir請教
另外有現金流200萬想開始作投資 應該是什麽有潛力同時又懚陣？阿里，小米，
比亞迪仍然建議持有嗎？

2.現時每月7000月供基金想cut, 原因供了10年時間亦没有明顯增長. 主要因為信人話

貿易戰被開但個市不论斷地升已錯左了二次升浪，而家想MPF 都仲有20年時間係咪應該
全放返出來到中國体或美國等地投資

龔成老師︰

月供基金如果只有2%，增長力度唔係咁理想。就算你簡單只買一隻盈富（2800），拉長計每年平均增長都有約8%。

你現時用這個月供股票計劃，係可以。但大市只在合理區，每月儲蓄唔好用晒，要留有部份，等大跌市。

以你現時人生階段計，應以"增值"作為重點。香港電訊（6823）和港燈（2638）主要係收下息，唔會有太大增長力，不宜持有太多。

以下這些股票都適合你。你可以用佢地造一個組合，當中以平穏增長股為主力。

平穏增長股︰盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、長建（1038）、粵海（0270）、領展（0823）、或
潛力股︰港交所（0388），中生（1177）、福壽園（1448）、安碩恒生科技（3067）、阿里（9988）、騰訊（0700）。

現時大市只是合理區，200萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

至於MPF，我地管理方法好簡單，就是按你的人生階段而作調整，年輕時較進取，中年時平衡，年長時保守。

你現時應該投資「平衡分配項目」，到了更大年齡時，進一步調低風險，慢慢將組合中，較高風險的項目轉到低風險，慢慢進行就得。

我自踏出社會工作後，強積金都100%恆指的，我當時公司選的強積金公司，有隻基金好簡單，就咁完全追蹤恆指，所以我就選左果隻。

------------------------------------------------

Q20839：

老師，又要多謝你先，上年1211升到7/80蚊時有有問過你好唔好放，你建議長揸。

依家見到1211有成300%回報，重點係我未供夠一手都有咁嘅回報！

真係完全感受到潛力股嘅威力。我手上仲有2隻舊經濟股（66，823）

喺最近嗰市咁波動下都唔係大跌，真係風中勁草👍🏻👍🏻

因為1211現價太高，已經停咗月供，見老師之前都有推過好幾隻潛力股

諗住揀一隻作月供，因為資金唔多同參考返1211經驗，月供金額太低

要長時間先可以儲到多嘅股數，所以想調整下月供計劃，以下是現在手上持有的組合

2800 （1052股，26.76均價）
66 （664股，42.158均價）
823 （232股，67.78均價）
1211 （405股，47.15均價）
1810 （561股，28.62均價）
9988 （100股@216）

之前都供得有啲散同金額低，所以諗住停供以上股票，改為供1-3隻，我依家30歲，
比較適合高增長嘅股票，700/2382/388/1177/1448都好鍾意

如果只可以揀一隻供應該邊隻好啲？ 定係供3067+2800+1177

每隻供2000，咁嘅組合比較好呢？

龔成老師︰

所以，你必需記住長線持有優質股，才是最佳增值方法這個道理。

月供方面，你可以盈富（2800） + 1隻平穏增長股 + 1隻潛力股。或者進取少少，盈富（2800） + 1隻潛力股各$3000都可以。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或
潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）。

現時大市只在合理區，每月儲蓄唔好盡用。最好留有部份，等大跌市出現時，可以用來掃貨。

------------------------------------------------

Q20840：

我想問下我月供盈富$2000，金沙$2000，潛力股3067 $2000，這樣可以嗎。

另外想問問老師我有1手1024 351蚊和阿里1手 251蚊，這2隻我可守嗎，還是去到什麼價位再入注

還有老師澳門會有堂嗎
謝謝老師

龔成老師：

可以，這些都是有質素的股票，你可以進行月供，長線投資。如果澳門月供手續費較貴，或有些股無得供，你就自行分注，例如3067每2個月買入1、2手都得。

至於快手（1024）及阿里（9988）都有質素，你可長線。由於快手較波動及仍貴，因此唔好太急加注。阿里現價合理區頂，可小注。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20221-Q20240）

Q20221：

成哥，想請教你關於股票的買賣時機和持有股票的時間,及我的遠景

1.我不做短炒，但又覺得長線投資有點遙遠，我想改變策略做中線投資，不知道成哥對中線投資而獲利有什麼看法？

2.我自己中線投資買入時機的策略：（i）據我翻查過往股災的紀錄:
(a)1994~1995年 總跌幅為45.3%
(b)1997~1998年 總跌幅為61.1%
(c)2000～2005年 總跌幅為54.7%
(d)2007~2008年 總跌幅為66.6%
(e)2010~2011年 總跌幅為35.3%
(f)2015~2016年 總跌幅為36.1%
(g)2018~2018年 總跌幅為26.7%
（h)2019~2020年 總跌幅為30.2%

以上數據2018年為小型股災總跌幅為26.7％。我想在股災時分注買入，而不做月供。若我計算恆指從頂位回落25％成為我分注的第一注，其後恆指回落10％我再入第二注，如此疊加。反之，若恆指跌20多％後幾個月不跌反升進入牛市一期，我便一口氣買入，以上的做法如何？

3.我中線投資賣出時機的策略:
(i)投有股票時間:
我持有股票時間短至1年，長至3年，3年內必定清倉，一股不留。

(ii)賣出股票時間:

(a)當從股災見底一刻計算持有股票至1年然後沽出30％的股票。這樣做是想取回本金兼些微利潤。

(b)在1年至2年間內觀察市場氣氛，然後沽清50％股票。這樣做是考慮市場進入牛市二期，快三期的情況而考慮的。

(c)現時只剩20％股票，假設遇上股災就由佢坐艇，如冇既，3年內清倉。以上做法又何?

4.其實股災每2～3年就來1次，按照我上方策略，賣出後再買入唔係更賺嗎？成哥你話賣出後味必有機會買入，其實意思是買入便宜價吧？假設買唔到便宜價，合理區也可以吧。

成哥你也在書中寫出比亞迪的天堂與地獄，由88蚊回落至12蚊，其實冇賣出味賺唔到？

假設88蚊賣出，佢唔落番12蚊，佢落番30幾蚊對當時來說也是合理價吧？在股災前賣出其後再買入不是更好嗎？

當然，冇人知股災幾時來臨，但猜得較接近總是可以吧。賣出後再買入頂多利潤賺少左，但又唔駛承受股災帶來的風險，為何不做呢？我不是挑你機，我當然沒有資格，只是帶出我想法。

成哥繼續努力，永遠支持成哥您！

龔成老師：

1）我之前做過銀行同證券行，見長線客始終賺錢較多，短炒客較難賺錢。

另外，如果你分析全球真正賺錢的投資者、經金經理，佢地都唔短炒，都是長線投資的，巴菲特都反對短炒。

因此，你應該全力長線。如果想中線，真的小部分好了。

2+3）你這樣的推論，會出現了一個盲點，就是表面過去式的推論。

例如你去賭場，見到連續10局，都會大小大小這樣運作，你就將10局套用永遠。你會說服自己，這套模式能運用到過往所有時間（但其實是你由當中的所有時間去抽出數據，當然能應用到），但到第11局，是這些數據以外的，能否應會，無人知。

其實你這類想法，我在20年前已做了唔少研究。技術分析的原理，就是統計學，我數學科是「A」的，我20年前花了大量時間研究，結果，用了幾年，輸足幾年！

你回歸翻「企業價值」面，平貴，是最好的方法。你睇下全球邊個投資者最賺錢？佢點解唔用這些方法？點解？？？

4）我地可以計平貴，有時在貴的時候賣出，等跌的確有賺，但最大的問題是，好多野好難預測。

當時比亞迪（1211）$88是貴，賣出，等跌買入，的確有賺，如果佢企業價值增加，佢股價的確不會支持到$88。

但如果好似近年，佢的業務開始增長，全球都開始用電動車，佢上到$100最初是貴的，但由於企業價值有增長，慢慢又變成合理，如果用你的方法，就會在$100賣出了。

你試想想，如果用你的方法，在過往，港交所（0388）、騰訊（0700）在這麼多年，股價上升100倍時，你的方法能賺到多少？可能連一倍都賺唔到。你怎樣能賺到100倍，就是「唔好賣」。

------------------------------------------------

Q20222：

老師，我唔係好理解到點解美債上升，對納斯達克指數同科技股會有咁大嘅影響？

龔成老師：

關鍵是企業估值，當我地進行估值時，會以無風險利率作為其中一個估值因素，當無風險利率上升時，企業價值會受影響。由於科網股的現金流集中在較後段的年期，所以當估值運用折現率時，對佢地的價值影響，會比傳統企業更大。

當然，要正式計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q20223：

想分享因為平時返工冇時間睇市
5 年前蝕左5 萬之後一直冇再玩股票

10 月開始因為在家工作又玩返
最初好易賺錢
買穩陣野都賺到一萬幾千
但最近，日日睇住個市

覺得身心健康都變得好差
花好多時間睇人分析
但賺得唔多
甚至而家一手坐艇股....

我32 歲月入60000
供樓10000
有積蓄約70 萬現金 30 萬股票

但真係唔敢大部分錢都放在股票....
我決定下月開始月供
823 2800 每樣2500 替代日日甘捕市了....

請問老師仲有冇邊隻建議供？

同埋有冇邊啲潛力股？
我睇你2019-20 的50 隻潛力股
好多都倍升 甚至幾倍升了 ....
現價是否太遲？

謝謝老師你

龔成老師：

其實日日睇住個市，未必賺錢的，我過往做過10年銀行與證券行，我見到好多短炒客都是輸，長線投資者就贏。

所以，你現時長期月供，是正確的做法，原理是儲優質股，成為你財富的一部分。這樣壓力較少，財富長期增長乜較多。

其實你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股，則可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。總之買入的比例宜比平穩增長股為少。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20224：

你好老師，本人26歲，月入15萬，已有現金340萬，是投資新手，剛買左00941 -5000股和9633 -2000股 和00175 -1000股，想在一年內多200萬，

可以如何分配？
謝謝你

龔成老師︰

我地一般目標，係年均回報10-15%，要1年內提升多200萬，用股票就未必適合。但長線計，我都建議你用部份資金去投資優質股，為自已增值。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。策略上，你可以投資"平穏增長股" 和 "潛力股"。中國移動（0941）係收息股，無乜增長力，不宜持有太多。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

現時大市只是合理區，你現有340萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20225：

龔sir你好，我是新手學投資，上星期31.450購入1手中芯國際，尋日收市突然跌到去26

本人睇好中國芯片都會有長遠既發展，我係咪應該止蝕離場？

另外有購入小米和京東健康，依兩股都睇好，都係諗住長擺，新手黎講我係咪唔識分配投資，thx

龔成老師︰

首先，我地投資會因應年紀，去選股。若你係較年輕，上述股票都可以。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

雖然近期以由高位$4X，回調到$2X，現時市盈率已經去到8X倍，依然係貴架水平。此股質素和吸引力一般，如果佢佔你組合比重唔高，可以守。

而京東健康（6618），業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但要做估值好困難，佢未有盈利之餘，不確定性都大，但市值欲去到5000億以上。

只能說，而價計依然唔平。若你只是小注，就無問題。若太大注，最好沽出部份去平衡風險。

小米（1810）長線持有，係可以。

------------------------------------------------

Q20226：

你好阿sir, 我手上有00066，02800，00823，09633，01833，01810，09988， 之前一手手買，各一至兩手貨。現考慮月供方法投資，每月用3k

1）比亞迪潛力空間係咪大過騰信，邊個好D？2）想買一手02382 or 03067, 邊個潛力大D？謝謝解答先。

女，37歲thank you

龔成老師︰

1） 其實2隻都係好有優質和發展潛力，但比亞迪（1211）會較高。

比亞迪（1211）現價偏貴，回到$120才較合理。而騰訊（0700），則要回多1、2成左右，才算合理水平。

2） 舜宇光學科技（2382）如果你睇好手機鏡頭發展，可以投資此股。但現價偏略貴。

而安碩恒生科技（3067）係一籃子科技股組合，較具分散風險能力。現價在合理區頂部至略貴，可小注入貨。月供，慢慢分注入。

月供組合方面，平安好醫生（1833）係潛力股，但就屬於較高風險的類別，我自己會比較怕投資這類。

業務上，佢地的確是高增長，同時業務有發展潛力，但睇翻佢地的財務數據，此股好難估值，你投資都可以，但小注好了。小注月供都可。

------------------------------------------------

Q20227：

龔sir, 你好～小妹一直係你fans，家中已集了多本你出版的書，如50值博倍升股、五年買樓四步曲....當中五年買樓四步曲，睇了一次又一次。

最近遇到一個難題，前年買了沙田第一城放租，現在差不多三年，第一城依三年可以説是易放租，租金可以頂到按揭每月供款

但最近考慮到第一城樓齡真係太高

如果持有多十年廿年，其升值及租務能力未必大，所以考慮轉投資啟德新盤，但那裏租金回報又不大，請問此刻是否應該樓換樓？

另外，想問下龔sir, 我的投資組合是否正確？本人35歲，收入穩定，現持有$70萬現金，$30萬股票：

港鐵 $41.5兩手
騰訊 $519 一手
領展$63.5 兩手
中移動 $47 一手
長江基建 $38.5 一手
長實集團 $47.4 一手
中國平安 $82.9 一手
盈富基金 $24 兩手
阿里巴巴 $205 兩手

麻煩龔sir提供意見，謝謝！Jennisa Chou

龔成老師︰

在整個新界區，沙田物業質素算較高。雖然佢有一定年期，但這類大型屋苑保值能力較強。而且位置較近市區和東九，該區新供應又唔算多，都係利好因素。

而啟德位於東九，都有一定潛力。但新盤一般定價都會較貴，投資價值會低左。暫時你可以保留沙田物業，啟德就等佢價格有回調，才再作考慮。

你現時持股都有質素，而且都有一定增長力，適合你。除了中移動（0941），佢主要係收息，增長力較一般，唔建議加注。

另外，長和系股票都有質素，但增長力不算強，你原有貨持有就得，但就不用加注。

現時大市在合理區，股票和現金最好各一半。你可以再投資多少少資金，加大股票比例，咁會較好。

------------------------------------------------

Q20228：

龔老師，你好我今年31歲，剛開始投資，之前間唔中都有買下股票，但唔多

現在手上有10手匯豐，而每個月大約可以有8000蚊既儲蓄

想短期目標3年100萬

我見老師你大多數介紹人先月供2800作開始，我是否應將10手匯豐轉來投資其他？

如果轉出來，我可以會選擇分散投資或是集中一兩隻股就好？如果1772/9922

果啲值唔值得長線投資？然後再每月月供5000盈富/領展？謝謝龔老師解答

想補充，現在31歲先都想投資，會唔會太遲？目標係想37歲之前買400萬以下既樓宇

現在其實手上也有20萬現金可作投資，謝謝！

龔成老師︰

31歲開始投資，都唔算太遲，依然有一定時間去做增值。

以你情況，可以利用"平穏增長股" + "潛力股"作增值組合。匯控（0005）係收息股，增長力唔高，只宜持有小注。你應將大部部份，換至以下股票，長線會較有利。

策略上，現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）。

至於20萬現金和每月一半儲蓄，就等機會，當大市出現一定程度的下跌，就可以動用現金去投資，在平宜價加大力度掃貨。相信這安排，可以較有效助你儲到置業資金。

至於，九毛九（9922）上市年期唔算耐，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過以佢2019年賺1億計，市值郤去到400億﹐明顯係貴。雖然這股都有長線投資的價值，有貨就持有，無貨，就唔太建議這刻追。

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

------------------------------------------------

Q20229：

龔成老師，我是你今期投資班的學生，以往一直不懂理財

很慚愧地和一班後生仔上完幾堂後，終於鼓起勇氣寫信請教你︰

我今年41歲，儲蓄有230萬，有穩定收入（公務員），月入八萬，扣除開支後

每月可儲蓄4萬元。我是孤兒，不需要供養父母，自己也沒有家庭，但至今仍未置業。
我想請問︰

（1） 如果只是買樓自住，現在是入市好時機嗎？如果屬自住

我是否不用把租金回報率下跌列入重要考慮因素？我可否視物業為優質股票一樣，可能買貴但不會買錯？

（2） 如果我現在買樓，我應否把230萬全數用於首期及買樓相關開支（如裝修等費用）

然後用每月的儲蓄（供樓後大概3萬）作投資股票之用？還是撥出多一點現金來購入股票資產？

（3） 根據你課堂所教的水桶模式買股法，我的歲數應為40/40/20，但根據我的實際情況

我可否調高水桶1或2的比率？
期待你的回覆。

龔成老師︰

1） 租金回報可以係其中一個考慮因素，另外交通便利性，同區配套和未來發展等，都是相關因素。

想知平貴，你可以跟同區相類似樓盤作比較。現時香港樓價唔算平，但作為自住居所，最重要係"供得起"。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

2） 我地投資組合除左要係優質資產外，多樣性都好重要。

如果你現時完全無股票係手，唔建議全部用晒去買樓。要留有部份，分去投資股票作增值，咁會較好。

所以，適當運用按揭，不要用盡現金，才是更好的方法。

3） 其實水桶模式比例係一個參考，你可以因應自已情況，再作出調整。但當然，唔可以調整得過份進取。

同時你要明白，水桶1要求你有一定的投資實力，這方面你要自己衡量翻。

------------------------------------------------

Q20230：

龔sir,呢排見好多人甚至係財經界人仕，話即將冧市，現時恆指30000點算好高嗎？

以及美股的GameStop事件，都會是冧市先兆嗎？

本人持有
788。20000股@1.53
981。1000股@31.9
520。8000股@18.6
9988。400股@241

持股策略需要改變嗎？

龔成老師︰

首先，我地投資唔好去"估走勢"，應用估值平貴，去定買賣策略。

現時大市只在合理區，雖然部份新經濟股，有輕微過熱架情況。但整體大市水平，尚算合理。

呷哺呷哺（0520）都有質素，但近年增長有所放緩，不宜持有太多。

而且，我地投資時唔可以太集中單一企業，相同行業不可佔組合多於3成，而單一企業不要高過15%，否則會有過度集中風險。此股最好沽出部份，換至其他股票，去平衡翻個組合。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

雖然近期以由高位$4X，回調到$2X，現時市盈率已經去到8X倍，依然係貴架水平。此股質素和吸引力一般，如果佢佔你組合比重唔高，可以守。

另外，中國鐵塔（0788）和阿里（9988）有質素，如果你係較年輕，可持有。

------------------------------------------------

Q20231：

龔sir你好，我今年40歲，由工作而來一直無理會份MPF，全部放了在增長基金，最近睇返份MPF發現升了不少，想請教老師，我如何管理我份MPF，再可在退休有更好的回報呢？是否需要升市時轉回部份做穩定基金？還是按年齡調整風險？

補充：我在醫院工作，兩年前轉做長工，醫院為我轉供公積金，不需再供MPF

謝謝老師！

龔成老師：

由於強積金比我地平時的投資，更為長線，所以強積金在配置上，唔需要經常轉來轉去。你只要簡單按翻你的人生階段，去配置進取/平穩/保守，已經是大方向。

現時你年齡40歲，財富仍有增長力，你可以有一半或以上，持有原本基金，餘下就轉到較低風險類別。

------------------------------------------------

Q20232：

龔sir, 想問下點睇2158同8083？

龔成老師：

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

現價貴，回翻多D先考慮。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

------------------------------------------------

Q20233：

龔Sir,想請問838和1753現價值得持有投資嗎？

另外龔Sir,黎緊下個月有機會撈底買入股票作投資嗎？

龔成老師：

億和控股（0838）無研究。

初步睇佢的業務與過往財務數據，只是一般般，現價吸引力一般。

兌吧（1753）主要係中國從事用戶運營軟件即服務平台，以及互動式效果廣告等業務，不過這刻仍處虧損狀態，只可以話分析不易，有危有機類。

這都是潛力股，但風險較高，其實佢生意增長不差，只是未進入收成期，如果你睇好，小注投資可以。

另外，無人能估到大市的升跌，我地只能搞翻企業的平貴去決定買賣的力度。

所以，你最好平衡投資，部分要持有優質股，部分留現金等機會。

------------------------------------------------

Q20234：

老師，最近好多朋友都建議股票，基金投資要「泊岸」，因為有些新經濟股已瘋狂破新紀錄。

兼且首富李先生已在英國發展「小香港」，所以佢哋都會起程，認為香港無希望啦。

想了解一下投資去向？自己深信老師的長線投資理念，因早前短炒帶來痛苦體驗，決定長守。但係自己既貪心又擔心，明白未到收成期，不要理會情緒先生主導。
如你所說投資最終目的是想賺大錢，希望藉這次機會能改善自己財政狀況。

若然李先生撤資香港，我這小市民要怎樣計劃未來？長遠要投資股票在那一版塊？本人都有1038，只是仍然未到家鄉。

睇咗你最新分析，我的1211佔比已超過安全比例。但若能承受風險，是否不用理會。

不過真心不知道自己可以承受多少？

原來有錢賺都會這樣子不安，老師你真係好厲害。

我今日去書局買一本你的書給我的姨甥女，希望佢對財富增值多一些概念。

我相信這樣可以令家人和朋友早一些達至財務自由，不用終日埋頭苦幹換來卑微收入。Work hard Play hard.

謝謝您。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果你認為香港股市較集中，可以同時投資美股，最簡單就是買ETF，例如：VOO、QQQ，令你的組合更為平衡。

你要從概念上，明白「平衡配置」。

至於比亞迪（1211），當我地分析是否過了適當比例時，會以長期股價作準，因此不要短期就調整，要長期。如果你能承受風險，持有都可以的。

希望書本，能提高你同姨甥女的財務知識，大家加油！

------------------------------------------------

Q20235：

老師，想問問我想買呢6隻收息股以達到每個月有息收，你覺好唔好?

1310、778、11、2638、303、883

預計每個月收息$2744，以目前股價投資大約$45000。
唔該老師

龔成老師：

可以。

上述都是有質素的股票，業務基本上都穩定，派息理想，收息可以的。這是一個不差的組合，能平衡風險，以及有穩定股息。

雖然增長力不強，但以收息為目標，可以。現價合理，可投資。

你日後如果有更多資金，打算加入更多收息股，可考慮：ＧＸ恒生高股息率（3110），這是一個收息基金，你都可以參考下。

------------------------------------------------

Q20236：

老師你好 ，我見你成日都會話投資係2800到穩陣 我就有個疑問

以我個人見解，無論升幅同息口都唔夠內銀穩陣，如果以供股形式去投資，股息都用黎抵消晒每月手續費

點解會推薦呢隻，就以今年股災表現，由低位去反現價都係3成，而內銀表現相約

息口還要高，2800升幅係食恒指，而內銀比重都高，2者相比下。應如何取捨

龔成老師：

因為盈富（2800）這是一個「平衡組合的工具」，當中有50隻成份股，對股票組合有平衡作用。

內銀是單一行業，如果你只投資內銀，就會出現行業集中風險，萬一中國出現了金融系統風險，內銀會有較大損失。而盈富有不同類別的股票，始終會較平衡。

可能你見過往表現差不多，但我地分析時，唔能夠只考慮「過往出現的情況」，而是要考慮「各種有可能出現的情況」。

我地投資，一定是「先想風險，後想回報」。

------------------------------------------------

Q20237：

你好，請問388和700邊一個好呢？
買入位是幾多好？

龔成老師：

兩隻都有質素，都有增長力，不過，兩隻都略貴。騰訊（0700）增長力會略高。

你預兩隻都是回1、2成會合理翻D，但就唔知見唔見到，所以，如果想入，可月供，或回少少小注，等跌再加。

------------------------------------------------

Q20238：

想問一問龔成老師對以下四隻股票有咩睇法😖

1）9988 佢個股價岩岩升返上去 初初好驚 其實我覺得佢個股價托得一陣 會再跌 但我知佢有實業 差極有譜
但依然心情好矛盾 原本我set左$300樓上放 依家似乎好遙遠 跌低過$200應該放左佢定買入溝淡佢？

我擔心既係唔知政府只係想罰下佢定針對佢 但針對佢都唔出奇？我200尾買入。想聽下龔成老師你對9988既睇法
佢係咪真係大到倒不下？京東同佢都平排啦個地位？

2）3690 佢仲有冇潛力沖多次過$300？

3）9991 最擔心係佢 倉庫失火兼大股東阿里巴巴出事 網站上話佢集多項服務於一身 冇人代替到
我先買 依家諗唔到佢有咩好處 所以用溝淡方法都擔心 係咪應該放左佢？

4）1137 我覺得佢有潛力發展同佢會uptodate改良營銷方法所以買佢 我預佢會去到$16-$20
但佢反覆徘徊係$10-$13 擔心自己睇法係咪錯左？

唔好意思我呢個新手 心情太矛盾太多問題🙏

龔成老師︰

首先，我想你明白"溝貨"與"分注"的分別。

溝貨是指愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。若是"溝貨"，就不是再入貨，因為再平，都只會令你增加風險。

你能分辨清楚的話，有助你更準確去做投資決定。

1） 我地投資係睇長線，唔好太在意個買入價，佢只係心理因素。長線企業質素，才是我地考慮是否持有的重點，。

阿里巴巴（9988）近期面對內地監管可能收緊，風險度增加左。早前螞蟻金服因貸款業務問題，被叫停上市。中央就是擔心這些小型信貸增長過快，但監管又未及銀行嚴緊，會危害實體經濟。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左，但依然值得長線持有。

京東（9618）同佢地位接近，有機會出現同樣情況。但投資上，阿里會較為穏健，而京東潛力較大，但風險也較高。

2） 美團點評（3690）都有質素，佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，要上翻去應該都可以，但增長力一定會比以往慢左。

集團過往一直處於燒銀紙階段，至2019年才開始有少量盈利。未來是否維持，暫時都好難講。這類企業不是不可投資，但不能大注。

3） 寶尊電商（9991）主要在天貓、京東、拼多多、微信小程序、小紅書、抖音及快手等平台以三種業務營運模式為品牌合作夥伴提供電商服務。

提供商為品牌提供IT解決方案、網店運營、市場營銷、客戶服務及倉儲配送等電商服務。初步睇佢業務都有吸引地方，但整體賺錢能力唔算話好強，質素算係中等。

以佢2019年純利不足3億，但現時市值郤有200億，明顯係貴。如果你持貨不多，可以守。但此刻加注，我就不建議。

4） 香港電視（1137）業務有前景，但有兩點存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？

另外就是估值方面，我都好難講這刻的估值，只能話唔算平。此股可投資，但不確定性較高。若你持貨不多，就無問題。

------------------------------------------------

Q20239：

老師現在我有
1810小米10000股$16.5
7000股$23
6618京東健康500股$180
700騰訊100股567.5
883中海油20000股$7.2
9988阿里爸爸200股$285

1.京東健康高追左、會否升番$180？止蝕定溝貨？

2.小米應否放d？

3.現組合可否比d意見？

4.還有什麼股票好似小米咁可以翻倍？
老師真係好多謝你😘😘能夠令到我賺錢、不過真係要好堅持

因為好驚到時小米會比大陸或美國制裁會跌返落去😔而比人話點解嗰陣時賺錢唔放。

龔成老師︰

1） 由京東（9618）分折出來京東健康（6618）其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，同時暫時計唔平。所以，此股只宜佔組合小部份。

2） 小米（1810）你可考慮賣出部份，原因唔係佢質素有問題。純粹係佢你組合比重太高，個別企業佔組合最好維持15%以內。起碼去翻25%先。

你現時超過一半，會有過度集中風險。如果佢萬一出問題，你成個組合就會嚴重地受影響。

至於佢會唔會因政治或政策，而影響長線發展，無人會估倒。但此刻所見，佢係有一定質素和發展潛力，值得長線持有。

3） 中海油（0883）質素只係中等，唔建議持有咁多。

而你組合極偏重潛力股，就算你好年青，都應該加入適量平穏增長股（佔組合最少一半），去加強組合平衡性。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

4） 其實不少潛力股，都有機會倍升。但部份現價偏貴，未係投資時候。而且你組合波動性已經好高，投資唔係買晒全部高質增長股就可以，都需要一個平衡健全的組合。

建議你先調節好個"潛力股"和"平穏增長股"個比重，咁會較穏當。

------------------------------------------------

Q20240：

我早幾個月開始睇到你個page.對股票無咩認識.10月開始左月供.供左3個月

比亞迪電子285
平均38.6 月供1500

中國生物制藥1177
平均7.7 月供1500

小米1810
平均25月供1500

買左10000股788中國鐵塔
1.35入

買左8000股1830必瘦站
2.4入

我想問下呢個組合可以嗎？

1810同285係咪都係偏貴？我仲應唔應該繼續月供定暫時停咗月供呢兩隻先會好啲？

我見788宜家不停跌。我應該守住先唔好理定係放左去好呀？

想入多一隻.想問下龔sir點睇藍月亮6993？
可能太多問題.唔該哂龔sir

龔成老師︰

月供可以幫你拉平均個買入價，基本上你一直月供就可以。但時間必需夠長，最少供3年和持有5年，才有較明顯效果。

你組合中全部都係潛力股，就算你好年青，能承受較高風險。現時比重都過高，我假設你係年青人，個比例最好係"平穏增長股"和"潛力股"各半。

未來你要慢慢調節翻個比重，否則組合個波動性會太大。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

中國鐵塔（0788）有質素，你唔洗太在意佢中短期波動，一直持有就可以。不過增長力比過往弱左。

藍月亮（6993）有質素，佢有中國P&G之稱。成立於1992年，擁有衣物清潔護理、個人清潔、家居清潔三大系列。

佢係內地洗衣液龍頭，加上毛利率高，賺錢力強。睇佢之前數據，以零售額計，其洗衣液、濃縮洗衣液和洗手液，市佔率都是首位。分別佔市場24%、28%、17%。

整體質素係有，發展都正面。但現價唔平，現時入貨，風險唔細。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。