【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21241-Q21260）

Q21241：

致龔Sir，我是股票班舊生，感謝你的教導，開課前買了不少跟風炒作的新股，因為有試過贏，所以後來輸更多，完成課堂後，我就沽出沒有盈利及風險較大的B仔股止蝕，亦沽出了多年前跟風炒作，直至現在沒有盈利還大玩財技的股票，又沽出自己不懂分析的股票。

新股都是我長久以來輸得很多的類別，上課後才知這有如新樓盤一樣，能令有錢人決定售出的資產，一定貴，難怪輸多贏少。

順豐房託是我在未買就分析的新股，沒有抽新股，到現在還未持有的，我的分析如下，請賜教：

預計1.3億可分派利潤
發售基金單位：5.3億
股息率5.3％-5.9％
定價$4.98

計一計數
每股可分派約$0.25
除以股息率
估算合理價在4.23-4.72之間

雖然定價較高，但因應市況不境，還算克制，新上市即大跌一成半，證明老師所說的沒錯，股價終歸會回到合理價值

基金組合包括香港、佛山及蕪湖物業
可租面積30.8萬平方米，估值60億，出租率95.3％

2019年全年溢利1.74億
2020年全年溢利下降84.6％至267萬

集團解釋下跌主要受投資物業充值下跌及融資成本大增影響，但若撇除投資公允值變動後的運營溢利，則按年增4.5%；而同期，集團物業收入淨額，即租金收入扣除物業運營開支，則有2.16億元，按年升4.29%，增長平穩。

如果物業充值下跌只不過是會計上的估值，就應該不用擔心

展望集團在未來能透過收購併購壯大資產，或通過母公司順豐注入物業項目。

母公司順豐控股於中國50個城市擁有物業項目，規劃總建築面積440萬平方米，已竣工建築面積170萬平方米，大部分為物流綜合設施。單以後者計算，便相當於目前順豐房託可出租建築面積的5.4倍。

總結分析，派息不差，物業質素好，出租率高，幢憬未來併購及母公司注入資產，增添了普通房託缺乏的增長動力，由於未來發展只是估計，以現時資產，股價在約4元以較有投資價值。

謝謝老師看完我的分析，如分析有任何偏差及計算錯誤，請告知，定當虛心學習，進階班見！

龔成老師：

順豐房託基金（2191）質素都有，但又不是好強。

順豐房託的投資組合初步包括位於香港、佛山及蕪湖的以下三處物業，所有該等物業均為現代物流地產，包含配備有自動分揀及供應鏈支持設施的分撥中心。

1. 香港物業：位於青衣，為一個15層高的「坡道式」現代物流地產，具備可通向各倉庫樓層的車輛坡道。

2. 佛山物業：為配備有智能技術及量身訂造的設施，如自動分揀及供應鏈支持設施。

3. 蕪湖物業：於2019年竣工的位於鳩江經濟開發區的現代物流地產。

比起其他房託，佢會更受經濟及物流業發展影響，因此會更加波動。以過往的數據來說，不差的。

投資價值都有，相信長遠物流業發展對佢都有利，投資值博率算是中上，但都不能太大期望在股價發展，暫時可以集中收息為主加基本增長力。

我睇翻你的估值方法，合理，反映你已有一定的知識及明白課堂所講，我地估值時，最重要明白背後建基於甚麼因素推算，你估值的數，能反映企業價值。

而你表示展望集團在未來能透過收購併購壯大資產，或通過母公司順豐注入物業項目。這個因素將會長期帶動這房託的增長，但我地作為投資者，都要理性分析，這個情況將會怎樣發生，當中的可能性，收購的程度，到時2191幫母公司買物業，作價是否有著數還是只是正常價因素去發展，就這點，我自己不會過份樂觀，只會視這股為有質素，合理價的房託，而暫時增長力不會定義為好強。

其實你的分析不差，招股書有好多有用資料可以分析的，你可以再深入睇多D。進階班見！

------------------------------------------------

Q21242：

呀Sir, 請問你點睇00270 粵海投資呀？最近跌多唔少。投資專家睇淡。

香港人移民固然影響東江水少咗人用。但佢投資大灣區既projects 我又覺得可能一年內會升番

因為宜家我一手都冇，想趁低吸納，之後佛系式咁等升同收息。亞sir 你見解係？...

龔成老師：

粵海投資（0270）正面的，最近業績較一般，但從長遠來說，仍是有質素。佢主要因為水務以外的業務，影響左佢業績。

至於東江水，其實長遠仍是穩定的，不會大跌，當然，增長力不是強的類別，是平穩增長型。

這企業有多個業務，同時都處於賺錢的狀態，整體不錯。加上最大的水務部分，更是香港東江水，即是不斷賺香港人錢。

佢係供港東江水部份，賺錢能力已經比以往弱左。係疫情下，內地工商用水需求會下跌，影響收入。而且，集團收入除了水資源外，還有其他好似物業投資、酒店、百貨等，在疫情下難免會受影響。

至於增加資本開支投入建設，如果能提升現有效能，就會對佢盈利有正面影響。整體而言，集團業務依然係算穩定，預期維持平穏發展，故有長遠投資價值。

此股現時在合理區，投資時要分注進行。

------------------------------------------------

Q21243：

老師 本人係單親媽媽

過住二十年獨力帶大女兒根本無儲蓄 現女兒已出身每月可儲蓄大約2.5萬 本人一點投資知識都沒有希望十年後退休後有一千萬作生活費

現有現金十萬及每月可儲蓄2.5萬 想請教老師怎樣才可達成目標 本人今年47歲

龔成老師：

你現時47歲，在累積財富方面，可以以「平穩增長股」作為核心，到你10年後，目標是有一筆財富，再轉為現金流類別。

你可以考慮平穩增長股：考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

每月月供$15000，餘下$10000儲現金，等機會投資。

每月$25000，一年$30萬，投資10年，如果假設回報為10%，你將會滾存到$480萬。

或者你可以增加投資年期，例如去到15年，就會滾存到$950萬，較接近你的目標。

又或者，你可以選擇加大金額，都是一個方法。

又或，你可以提高你的回報率，例如投資較多潛力股，當然，這會令你風險度提高，以及要求你有更多的投資知識，你都要明白這點。

------------------------------------------------

Q21244：

1810最近因投入大量資金造車，而造車像Tesla要10年以上才有回報，稍一不慎有機會虧本，趁高位而沽。用沽出的資金再買入其他較有潛力的優質股

本來也睇好，打算長線持有的小米，造手機及其他家电市場是有潛力的。但因把賺了的錢大量投入造車市場才引到担心影響業績，所以才打算沽出後換馬

龔成老師：

的確有你所講的風險，佢發展新業務，這一定會有不確定性，最後成功與否，無人知。

不過，如果成功，就會有倍計回報，如果你太著重這刻的回報，只集中睇眼前的分析，就會錯過了一些倍升股。

而小米（1810）佢過往的研發能力，產品定位，市場化的能力都很強，所以我對佢其實都有信心（當然，不確定性一定有）。

而我地投資者，如果要有倍計回報，就要有長遠眼光，在可承受風險的情況下，取得回報。

------------------------------------------------

Q21245：

老師你好，請問一下2269小數股東損益有$300萬這麼大負數。這個代表什麼？

是否這個負數影響2019年的每股盈利？

龔成老師：

我睇翻藥明生物（2269）2019年的年報，你所指的部分是「小數股東權益」，或叫「非控股權益」，2019年出現了$346萬的數字要扣除。

其實這個數並不是一個正式影響藥明股東的盈虧，你可以理解這是一些會計上，之前計多左，要扣除的數目。

------------------------------------------------

Q21246：

2238 的廣汽集團
2333 的長城汽車

都注重發展電動車
你認為哪一個企業會比較值得投資？

龔成老師：

廣汽集團（2238）本身都有質素的。

佢係中國汽車製造商之一，主要業務包括製造及銷售乘用車、商用車、發動機及汽車零部件，亦從事一系列汽車相關服務及其他業務。

佢透過共同控制實體廣汽豐田及廣汽本田生產多個系列的乘用車。

業務發展不過不失，但增長力就不算強。

長遠仍有發展，但不是高增長型。現價合理。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值。

現價合理區頂，小注都得，如果想正式入貨，最好回少少先考慮。

其實兩隻都不差，而長遠發展，長城汽車會略好。

------------------------------------------------

Q21247：

你好老師,平時沒投資股票,有儲蓄$習慣.通常儲到一定金額去行銀買人壽一放就10年.

我返飲食行業留意近埋同事有投資,想了解股票慢慢令財富增加.睇左老師留言我月供盈富基金，

作為我返工10小時新手,好似老師當年睇好比亞迪一樣，

目標平穩增長又吾想單一月供盈富，我認同老師講法買股票是企業增長同業務，因為我新手想問去邊找到資料來做功課,從而分析企業選優質股

龔成老師︰

有定期儲蓄架習慣係好事，但儲蓄保險係財富增值角度，唔係一個理想架選項。

因為"保險"只係理財中防守部份，其實你買足夠保障就可以，增值可以留比優質資產來做。

而我地可以去決定一間企業是否優質，會從企業質素、行業前景、財務狀況等因素，多方面去作出一個全方位的分析。

相關資料，你可以睇翻公司年報、公司網站、財經新聞等地方找到。

盈富(2800)係包括55間質素不錯上市公司股票的組合，對於無選股能力的初學者，會係一個唔錯架選擇。

當然，如果你有一定經驗，可以慢慢創建一個適合自已的增值組合。但在現時經驗尚淺的時候，未懂選股前，先用盈富(2800)作為增值目標，會係較穏當架做法。

另外，你要記住，投資最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

長遠，你要懂分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21248：

老師好！我而家應該賣左結婚時D金器作股票投資用嗎？

龔成老師︰

我地先從黃金本質來分析，黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，不用佔財富比例太多(<3%)，而且持有的應該為實金。

如果佢佔組合太多，反而會減弱左你財富增值架效果。但由於"結婚金器"有點特別，它除左係黃金外，也存在金錢以外的意義。

所以，你係決定是否賣出用作投資前，除了從投資角度計算外，也要從金錢以外角度去作出考量。

------------------------------------------------

Q21249：

龔sir, 你好，本人三十多歲，月入$3萬，丈夫月入$7萬，收入穩定，由於過去十年投資比較保守，主要買入一些收息股票為主。如下：

港交所 2000股
領展 1000股
友邦 4000股
煤氣 1000股

讀了你文章後開始月供股票盈富基金、港鐵、恒生科技各$1萬。這些組合可以嗎？

但本人需要增長股的幫助，希望目標在五年內能買入多一層現時價$1200萬的物業作為自住，而將現住物業出租（貸款還餘$300萬）。

因為本人不知全數賣出現有股票去買$1200萬好，還是繼續買股票增值好，希望老師有時間回覆，謝謝！

龔成老師︰

若果你係打算3-5年後，才買入一個新物業。中間都尚有一段時間，可以利用用優質股作增值。到你要實行置業計劃，才慢慢分段沽出股票。

你現時持股，其實都係有一定增長力，而且都係有質素的。但有個較大問題，組合上太偏重左係港交所(0388)。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

港交所(0388)明顯係佔比重偏高，但而一刻唔需要沽出，因為佢始終係高質素。我地用將來投入架新資金，去將個組合慢慢咁平衡翻，咁就可以了。

你所講架月供組合，盈富基金(2800)、港鐵(0066)、恒生科技(3067)每月各$1萬，適合你現時情況。

其實這幾隻適合你的，有平穩增長股及潛力股（3067），如果你投資目標，希望增長方面加強翻，其實可以3067比例多翻D，不過，要留意恒生科技(3067)雖然優質，但同時都會有一定波動性，你要明白有這個風險。

另外，現時大市只在合理區，每月可儲蓄的資金唔好盡用。最好留有部份，等大跌市出現時，可以用來掃貨。

我假設投資回報有10%（連股息再投資），你每月投資$10000 + 現有持股(約值135萬)，5年後大約會增值至400萬。相信這筆資金，對你置業有一定幫助。

但緊記，在買入新物業時，股票最好唔好盡沽，必需留有部份，用作增值之用。

------------------------------------------------

Q21250：

老師，我而家30歲，頭幾年返工一直係月光族。而且，三四年前股票高位入d股票，點知買完一直跌，其後我又急住買樓蝕住賣套現，結果輸左好多錢。

我一直耿耿於懷，因為當時低位賣既優質股（700, 2318, 175等）而家已經升左好多好多，同時我買左層樓又樓價開始一直跌，我覺得自己好黑好灰心，近兩年我拒絕睇任何財經既資訊。

直至朋友介紹下認識你，買左好多本你既書，之後我決定要改變自己理財既心態，希望你俾d意見我。

1. 我想好好建立自己既財富組合，想係3年內有120萬，你覺得有可能嗎？

以下係我既財政狀況：
月入45k，供樓10k，家用及個人開支20k，每月最多可儲10-15k。

而家手頭有現金20萬，同大概9萬既股票
1177 x 4000
3319 x 500
823 x 3我200
1313 x 2000
7500 x 3000)

2.有無d現價合理又有潛力既股票？

3.我想報7月既基礎班，但會考慮有每星期一堂？

謝謝你既耐心解答，同時感激你既書令我有得益，我仲學習做一個有耐心既人

龔成老師︰

投資最重要是理性，你太過執著於過往，其實無意思，最重要是分析，這一刻怎樣建立一個優質、適合你、平衡的組合。

1) 以你現時情況，每月儲$15000 + 現有持股和現金(約29萬)。我假設回報率為10%(連股息再投資)，你3年後大致上會增值至100萬。

若你想達成這個120萬架目標，你就要加大儲蓄力度，大約提升至每月供$20000，才可以做到。

同時，你要明白3年唔算係一個長時間，中短期股價係會出現波動，影響你最終回報，你要明白有這個風險。

另外，你現時持股中，ＦＩ二南方恒指（7500）係反向追蹤恆生指數每日表現。當恆指跌1%，你就會獲利2%(另扣管理費)。但若然恆指向上，你就會虧損。

我對這類產品有保留，恆指在過去數10年反覆向上，所以長遠計持有這股對你"不利"，一定多於"有利"。

建議你長遠就算不全數沽出，也最好沽出大部份，換碼至其他優質股較好。

增值策略上，你可以投資「平穏增長股」和「潛力股」。但「潛力股」由於波動性較大，所以你可較集中在平穩增長類股，至於潛力股，只宜小小注。

你每月5成儲蓄，即是用$7500做月供。其餘先儲起，用一邊月供一邊儲蓄的策略。

選股上，你可以投資在平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

增長力較強的，可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）。但佢地波動性和風險會較高，你要自己平衡。

餘下20萬資金，可再投入多5,6萬，分注入貨。餘下資金和每月儲蓄，我地就等機會，當大市出現較大回調，就加大力度掃貨。

2) 部份潛力股已有輕微過熱情況，只有安碩恒生科技(3067)、ＧＸ中國電車基金（2845）、 阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

但若然係做月供，這些潛力股都係可以。

3) 你預7,8會有機會有，你可以留意我FB公佈。

其實你過往投資架股票，都係有質素。但你在成個理財計劃上，出現左問題，令到成件事架效果事倍功半。

我建議你除了學好選股外，也要學好成個理財觀念，咁成個財富增值計劃的效果，才會更明顯。

------------------------------------------------

Q21251：

同埋好想請教老師你，納米盤如果四百幾萬係新樓但係得180尺開放式單位，或者可能最多得一房 200尺，呢啲盤好似上車容易好吸引

（因為只係比500,000左右首期，仲可以做九成按揭，又容易過到壓力測試）其實我哋應唔應該買入呢啲單位？

定抑或喺二手市場搵一個700幾萬嘅單位但係有兩房 五百幾呎，兩者比較邊一個更適合或者反而更化算？

龔成老師：

記住，唔好比「易上車」，吸引，這只是其中一樣我地的分析點，最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

因為總物業金額、首期，並不是衡量物業平貴的核心。

因此，你要小心做功課，然後先決定是否投資。

另外，250呎以上的物業，一般投資價值較高，因為是一個基本家庭所需的面積。

如果以你上述的比較，二手市場搵一個700幾萬嘅單位但係有兩房，五百幾呎，會比該新樓較好（當然，你仍要作出比較）。

------------------------------------------------

Q21252：

老師想請教你剛剛見到你寫嘅文章，如果你話「真正的股災是在你想不到的情況出現，大家想到的股災就絕對不是股災」

如果照呢種講法嘅話咁係唔係你平時話價值投資嗰啲優質股都要放咗佢？

如果我哋等到自己預料唔到嘅情況突然之間出現股災咁連呢啲優質股都會瞬間貶值，咁係唔係我哋應該要早啲賣晒啲股票？連休即古都要賣晒佢？

但又好似有啲矛盾因為我哋成日話長線投資，唔應該短線獲利，

但股災又會突如其來出現？咁會唔會好矛盾？究竟應唔應該長線投資？定係短線獲利就要走啦？

需唔需要成日擔心會出現股災？
謝謝老師

龔成老師：

第一，股災無人能預測的，所以你根本做不到「預日賣出」這動作，因為無人知幾時真正大跌。

第二，股災其實是股價大幅下跌，這是指「股價」不是是「質素」。

如果一間企業有質素，股價下跌，根本不會影響到佢業務營運及企業發展，因此只是一個表面因素，對我地的核心財富，往往只是中短期的情況。

因此你唔需要太過擔心股災，只要持有的是優質股，企業運作正常，在長期角度，股災對佢無乜影響的。

------------------------------------------------

Q21253：

想問吓老師心態嘅問題
例如美團3690

剛開始睇嘅時候4XX最高位
跌下來365元入第一注
之後跌倒2XX

其實應該在跌時候溝貨（有預留資金）還是應該升返320多的時候止蝕離場。

我選擇咗後者，重新檢視返個組合同埋比例，因為如果再繼續加注會去到成個組合嘅30%

龔成老師：

首先，一定要睇企業質素，如果無質素，就不會加注，同時不值得佔組合比例太多。

第二，我地會分析平貴，如果美團（3690）在$280仍是貴，當你在$365買入，而佢現時跌到$280，你都未必值得加注，因為你本身已有一定的貨，再買入時就應該以較平或合理翻D的價位先會考慮。

至於上翻去是否離場，其實要睇翻這股佔你組合的比例，如果佔比較多，而佢上翻去時又已經貴，其實應該減持部分。

其實，一隻股票佔你組合15%以下會較好，去到30%已經是較多的水平。

------------------------------------------------

Q21254：

你好，我有意換樓，近來都有人睇樓，但本人願意出售的價錢比估價高3～4%，原因本單位有景有裝修，放售約1個月，請問以現時市況，我應該堅持，或減價加快放售呢？請俾俾意見，謝謝

出售樓：估價502萬，九龍灣區
換樓目標：750萬，何文田區

HKG:9988 阿里巴巴－ＳＷ 100 @$190
HKG:9618 京東集團－Ｓ 50 @$330
HKG:1833 平安好醫生 100 @$96.5
HKG:6618 京東健康 50 @$72
HKG:9992 泡泡瑪特 200 @$39

HKG:0522 ASM PACIFIC 200 @$111
HKG:3067 安碩恒生科技ETF 700 @$18.6
HKG:0823 領展房產基金 400 @$67.55
HKG:1299 友邦保險 200 @$66
HKG:0636 嘉里物流 500 @$23

另外, 上面係我在2020年4月開始建倉, 本人可以相對高風險, 請問是否有野要執呢?

龔成老師：

如果九龍灣區，應該有一定的質素，加上現時香港樓市其實唔算差，你唔需要太急去減價賣。建議你找多幾間地產代理代，幫你放盤，等多D客去睇樓，我相信當你貼近市價時，要賣出不難的。

如果你目標價想比市價高，就以這價開多1、2個月，睇下市場反應，之後再慢慢減價。

另外，何文田區都是有質素的地區。

你上述持有的，都是有質素的股票，基本上都可以長線持有。雖然潛力股部分有少少多，但不是過多，同時有質素問題不大。

嘉里物流（0636）你原有貨持有就得，但就不要太心急加注，因為近一年升左好多，股價較波動。這股不差的，順豐入股後長遠發展更正面。

佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的35個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

另外，Pop Mart泡泡瑪特（9992）暫時不宜加注，佢是一家覆蓋潮流玩具全產業鏈的一體化平台，當中包括藝術家發掘、IP運營、消費者觸達及潮流玩具文化的推廣。

根據弗若斯特沙利文報告，分別以2019年的零售價值（市場份額為8.5%）及2017年至2019年的收益增長計，集團是中國最大且增長最快的潮流玩具公司。

合作伙伴中不乏知名品牌，好似迪士尼、HELLO KITTY等等。而產品中，最為人所認識就是"盲盒"，此銷售模式為集團貢獻不少。

整體而言，這企業都有質素和發展前景。睇佢數據，過往幾年增長唔錯。

但始終是新股，參考數據唔多，未來能否一直維持咁高增長，要有待觀察。所以投資時，我地要保守D，唔好太進取。

現價貴，但有潛力，你持有就得。

------------------------------------------------

Q21255：

老師我見到你上左去富途果度做節目，我自己用過幾日就del app因為果個完全係一個為短炒既人而設計既apps真係會害死人。

但我絕對理解同埋明白你叫人月供盈富基金既目的，係對於完全冇投資知識唔識選股既人而言真係一個幾好既選擇。

我都明白價值投資法係香港推廣係好難做，特別而家市場上既股評人都係技術分析為主導。但都希望你可以堅持落去

都好多謝你出現左係我人生入邊，你同埋另一個價值投資法既股評人(洪龍荃)都真係幫左我好多

特別學習估值/分析企業方面，你地兩位有好多投資理念都90%接近(當然佢可能因為基金經理真係進取好多)
另外larry其實佢係佢一個收費既理財教學節目都有建議初學者月供股票

佢都有建議月供盈富/煤氣或者買一D有質素既ETF，佢話當年屋企人都係因為月供股票，然後慢慢幾年後發現D錢竟然夠買層樓既首期。(如果有需要可以share條收費片比你)

而未來港交所亦會更加進取，會放更多有高增長既成份股入恆指，令盈富基金更有升幅。

我最近呢一兩年都不斷用價值投資法去影響我屋企人同埋身邊既朋友

希望佢地謝絕短炒同埋技術分析。
我都希望你可以繼續努力將巴菲特既投資理念推廣出去
如果有人質疑你既，你叫佢show個持倉成績出黎比較下就OK~

龔成老師：

其實，價值投資法一向是最賺錢的方法，你見全球全賺錢的人巴菲特，以及一些出名基金經理，都是用價值投資法。

不過，就算這方法已經是最賺錢，但香港散戶，仍是集中在短炒，因為佢覺得短炒會好快賺到錢，但事實就不是。

有錢人始終是少數，就是一般人的知識有限，明知有一個賺錢方法/但都唔會用。

其實，我一向都好明香港人心態，一般散戶唔中意價值投資，中意快，所以，價值投資一向在香港都唔受歡迎。其實我無乜所謂，做左要做的現財教育就得，至於散戶是否聽，就是佢自己的決定。

大家加油！繼續做好自己就得！

------------------------------------------------

Q21256：

1.運用老師上堂教的，自己嘗試計美圖（1357）的估值，大概合理範圍$2.37-4.29,這樣的估值合理嗎？老師認為合理價又是多少？

2.美圖（1357）主要收入是否廣告牌和高級訂閱？佢好似已經過左最壞時期，這股潛力好嗎？值博率高嗎？

3.見佢2018開始投資活動現金流都係正數，係咪姐係佢冇再投資發展？咁佢算唔算係水桶1？

另外睇到佢2016損益表有項（其他項目公平值變動及減值）係5606109（k¥), 令佢果年既股東應佔虧損6260880（k¥）,e項究竟點解？

龔成老師：

1）+2）美圖公司（1357）正面，佢過左最差時期，現時正向好。

佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

至於估值，坦白講，我未深入研究，同時這企業業務變化大，過往持續虧損，但見佢開好有正現金流，因此預期向好，但估值難，如果業績向好，估值可以好高，但如果差，估值都可以大跌，因為這刻的財務數據基礎不足，無盈利令到估值有好大不確定性。

3）至於投資活動報表，我睇翻只是一些定期轉換問題，其實與之前無太大變化，因此仍是有投資的。

至於損益表，我睇翻佢當年的資料，該項目為「可轉換可續回優先股」而出現虧損，而這你可以理解是一些會計上的項目，不用太過擔心，我地分析時會集中在營運上的盈利。

------------------------------------------------

Q21257：

Sir，我係你舊生，我以590計算,2015至2018中間四年市盈率為6.99-18.26, 以平均盈利在過往近四年（2016-2019）是1.97

咁我是用行業市盈率11至14定還是調高少少？

我仲係唔係好掌握到，點樣推算隻股票合理市盈率
望指教

龔成老師：

由於佢的市盈率範圍好闊，這反映市場對佢估值分歧較大，所以當運用6.99-18.26市盈率時，會較為小心。

因為太闊即是參考價值會低左，我地未必能視為好有代表性的數據

因此，會同時運用行業的市盈率，配合佢自身市盈率去運用。

你預六福（0590），如果去翻正常經營環境，大約有代表性的盈利$1.8-$2.0，可以作為參考。

至於市盈範圍，大約9-13倍都可以作為參考。

因此，你預$20是這股的合理區中間左右。

------------------------------------------------

Q21258：

龔sir,想請教一下，本人今年45歲，剛剛由於私人理由辭職，現況：

物業：第一幢剛賣出，取回現金約600萬
第2幢自住，7年前買入價1400萬，現約值1600萬 （按揭尚欠650萬）
第3個為澳洲物業，買價約為350萬，出租中，沒有按揭，每月租金約為8500）

股票約值：220萬
現金：650萬 （包括第一幢賣樓所得）
MPF: 現值110萬

現考慮移民，希望利用以往獲得的資產，在外國用低成本享高質生活，龔sir 有什麼建議？賣樓的600多萬可以如何善用（若移民可取回MPF 的110萬）

第二幢亦在放盤中，但比較難賣，若出租可能收月租大約30000左右。在外國亦在考慮應該租還是買樓？

龔sir 有何建議？可以如何善做配置？我是否應該留香港多幾年賺多些錢才可以去外國過半退休生活呢？

龔成老師：

你到外國初期，不用太心急買樓，可以租住外國樓先，等過幾年，睇到時情況及需要先決定在當地買樓。

至於現時的自住物業，不用改變狀態，可以先放租，令你得到租金方面的現金流。

至於$600萬，建議你投資物業以外的資產，並建立一個更平衡的投資組合。你可以將這$600萬，分成5部分。這些都是較低風險，著重現金流類別，相信較適合你過半退休生活。

第一部分投資收息股，你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$600萬資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q21259：

即係0016繼續keep住，定係咩位放咗佢好？
因為我都屬於新手，多多指教

同03380呢隻點睇？

龔成老師：

新地（0016）仍是有質素，當然，增長力減少左，預期佢中短期都是弱，不過，這股是睇長線及超長線的。

佢較多業務在傳統經濟，增長力一定不強，但不是無質素。是平穩增長類。投資收息及少少增長，可以。但就唔好對股價有太大期望。

如果你追求平穩增長，這股可持有。

龍光集團（3380）都有質素的。

佢係中國一家於粵港澳大灣區住宅市場的一體化物業發展商，並發展長三角核心都市圈及西南、中部城市等區域。

主要於中國從事物業開發、物業投資、建築及裝飾以及一級土地開發：物業發展分部開發、物業租賃分部、建築及裝飾等。

過往業務發展不差，生意與盈利都有增長，不過負債就少少高，略有風險。這股都有長線投資價值，你可考慮，不過，由於佢同新地都是地產類，你不宜過份集中。

------------------------------------------------

Q21260：

龔sir你好,我有個問題想請教一下你,澳門供緊樓貸款餘130萬左右,每月供9千,

現金80萬左右,每月可存1萬,這狀態下,好唔好係大陸珠海香洲供個單位好?

龔成老師：

唔建議太急去集中物業。

我地建立財富組合，最重要是「平衡配置」，例如建立一個股樓平衡的組合。

你現時有物業，之後的配置，可以先考慮股票，等股票有一定的數量比例後，之後再投資物業。

至於珠海地區，有質素的，是大陸其中一個有長遠發展力的地方，如果找到一些交通配套等都不差的物業，日後都可以考慮。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15041-Q15060）

Q15041：

你好成哥：剛上緊你堂，有問題想請教一下

如果一間公司，今年向銀行借＄買一台機器1000萬，折舊10年，每年10%

那在財務報表的那部份會顯示出來？

是否負債表？因為買機器時借左銀行1000萬
另資產表也多了1000萬資產

另外之後每年折舊100萬在資產負債表內，
同明股東權益表也要每年減100？

因為資產=負債+股東權益

但現金流量表則不影響？只顯示買機器之後的每年還款支出？謝謝解答

龔成老師：

佢會在資產負債表，「資產項」多左$1000萬機器的資產項，同時，會在「負債項」裡，多左$1000萬銀行負債。同時，當中的現金流情況，會同時在現金流量表中反映。

至於每年折舊，就會有$100萬的支出，在損益表反映。

而每年的$100萬支出，都會令「資產項」減值，股東權益的部分都會減少，因為有支出。

而每年就沒有現金流的影響。

你的理解基本是正確的。

------------------------------------------------

Q15042：

我34歲，有層自住樓，但仲供緊，有14萬港幣係離岸投資戶口準備買美股，10萬港幣準備買港股

岩岩上個月開始用大約7000港幣供緊同SNP500有關既美國ETF，每個月大約再剩3000-5000港幣for投資，想請問你會唔會有咩建議俾我/有咩投資組合岩我,感謝

龔成老師：

現時大市處合理水平，你運用月供的策略，作長線投資，方向正確。

其實你這個年齡，仍然是財富增值的黃金時期，要好好把握，盡你一切的力量去儲蓄、投資、學投資知識。

如果你本身無持有其他股票，你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，暫時潛力股只宜小注。

港股方面，你可考慮銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q15043：

想問現持有1000股中國恆大 21.9入，之後不斷跌，是否立即賣出？

龔成老師：

中國恒大（3333）業務上是有質素的，但中國經濟轉弱，加上佢本身負債極高，相信會對佢有一定的影響。

你預佢中短期都會弱，但如果只是小注，可以守住先的，但你要預佢慢慢先會上翻去。

------------------------------------------------

Q15044：

龔sir,請問2186綠葉製藥有潛力嗎？

龔成老師：

綠葉製藥（2186）正面的，佢主要銷售腫瘤科、心血管系統以及消化與代謝三個領域的新藥品，基本上都係有市場的，加上佢過往的生意增長唔錯，市場仍發展中，所以長遠不差。

當然，你要預佢業務中短期會有波動，現價合理。

不過，佢的優勢並不及其他較大的醫藥企業，因此，在估值上不會太高。這類股如不太大注，可以考慮的。

------------------------------------------------

Q15045：

老師,我有以下問題, 希望老師可給我一點意見

本人現時46歲, 有一太太及4歲女兒, 我的職業可以說是一兩年來都穩定.
我有一自住樓, 已供滿了. 現時手上有7m 股票及3m 現金.
而我是一個原全不懂投資及不懂股票的人, 但我跟網上學了月供股票, 每月20萬

3 30000
6 10000
823 30000
66 20000
12 50000
11 30000
2800 30000

我的原意是收息給未來退休用, 但我亦很想供一個10m 左右的單位給我女兒或自未來用 （可說是投資吧）. 此樓會用家人名買, 由我擔保及收租去供.
我是自己開公司, 人工10萬, 加每月公司盈利5-10萬左右.
現我有幾個問題想問一下老闆.

1. 我的月供股票組合是否要更改?

2. 這樣月供, 我是否應該改為自己每月買一些更有潛力的股票?

3. 我現時手上的股票95% 都是輸的 （5-10%左右）, 我太差勁了

4. 加上我想買樓, 我是否應賣股去給多點首期呢?

最後我想我是投資多一點的有潛力高增長服票, 及手上都希望持有及一直買入一些收息股作未來退休用.

以下是我手上的股票
中電控股 4,500
香港中華煤氣 29,324
匯豐控股 3,600
電能實業有限公司 609
恆生銀行 4,994
恆基地產 24,004
新鴻基 4,000
香港鐵路有限公司 878
維他奶 4,000
越秀房產信託 120,000
陽光房地產基金 100,000
深圳高速 36,000
領展 4,980
中國建設銀行 60,000
中芯國際 15,000
錢唐控股 120,000
日清食品 50,000
盈富基金 5,477
中國銀行 150,000
阿里巴巴 1,500
Google stock 25pcs
BA （Boeing） 90pcs

希望老師有空可指點一下,萬分感謝

龔成老師︰

1） 月供組合可以，這個偏向平穏增長的組合，適合你年齡用。但我建議你銀碼上有少少變動，分別係更改為$50000盈富（2800）和$30000恆基（0012），原因下面會講。

2） 其實以你人生階段，應該偏向穏重一點，而非單考慮增值。潛力股係你年齡，我唔係咁建議。

3） 你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

你所持有的股票質素唔算差，中短期波動就算係優質股都會出現，你唔需要太在意。保持長線持有，讓其慢慢增值就可以。

但你要留意翻2點，首先你持股好側重左係地產股，咁會有過度集中單一行業風險。行業出問題時，會大幅影響到你組合回報，所以你最好跟我 1）的建議調整一下。

第2，以下2隻股票想你了解翻︰

錢唐控股（1466）主要從事採購、加工、設計、生產及批發分銷珍珠與珠寶產品。此股市值細，營業額不高，加上年年虧損，暫時見唔倒有太大投資價值，最好沽出。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等，最多可以小注。

4） 由於你本身無負債，而按揭一般利率不高，所以你按揭做多少少無問題。空出來的資金，用來投資其他回報率較高項目會更理想。

------------------------------------------------

Q15046：

本人38歲，本人及先生收入共9萬。
扣除供樓，生活及保險及年金開支，餘＄4萬。
現金$300萬，主要定期。
有~50萬股票，不過蝕緊少少。
005 - 3600 （ 平均$61）
2388 - 9000 （平均$28）
最近先留意老師FB ,如早10年睇到就好了！

想月供股票 $10000-12000
1. 2800 $4000
2. 066 $2000
3. 012 $2000
4. 1928 $2000
5. 1211 $2000

請問尼個月供組合好不好？選擇太多，好難揀
請問供地產股012 ， 0823 ，1038 好D？
另 供1928 定027 ，會好D？
近日股市跌，想入少少。有什麼suggestion ?
想入1928，027 ，2388 ，幾＄先算平？
謝謝老師！

龔成老師︰

其實你而家個月供組合己經可以，以你年紀計都有一定增長空間。你組合中包含了平穏增長股和潛力股，所以可以了。

至於你現有的匯豐（0005）是收息類股票，唔會有太大增長力，現貨可維持持有，但唔好加注。

金沙（1928）要$30以下才算平，而銀娛（0027）要下跌多10-15%較好。這2者分別是，金沙會係"平穏增長 + 派息"，而銀娛就比金沙"高增長潛力"。

中銀（2388）現時股息率已有5%以上，已有長線投資價值，可以買入。但留意，你本身已有貨，所以唔好買太多，避免過份側重左係個別股票或行業。

------------------------------------------------

Q15047：

老師你好，本人19歲，希望兩年後把資產增值至20萬以上，請問以下組合能否達到目標？謝謝

現在每月供$4000月供股票，分別係盈富基金$2000，港鐵$1000，領展$1000，另外我會在稍後時間購買一手中銀香港及中華煤氣

龔成老師︰

以你年紀，應以增值為主，這3隻月供選股和預備買入的2隻股票都可以。

你要明白一點，我地投資股票就同投資在一間企業上，一定要長期先會見到回報。而2年是一個短的年期，中短期會較受外圍因素影響，因此回報不確定性也相對較高。

我地月供目標應以5年或以上會較好，以恆指過去年平均回報10%計（連股息再投資），你每月投資$4000，5年後就有機會增值至30萬。

記住財不入急門，投資優質股是需要時間，讓其慢慢自行增值。所以買入優質股後，長線持有才是最有利的方法。

------------------------------------------------

Q15048：

成哥, 華潤醫療1515係優質度上你俾4分, 但自書出版後股價一直下跌, 想問企業質素仍在?

見佢係湖北有不少醫院, 想問最近武肺對佢影響大嗎?現價進入便宜區未?謝謝你!

龔成老師︰

華潤醫療（1515）其實本質唔錯，只是近期好多醫療政策方面的壞消息，如果你持貨不過多，持有住先可以。

佢是華潤集團在醫療版塊的主平台。主要在中國從事綜合醫療服務、提供醫院管理、諮詢服務、醫院集團衍生業務。

旗下擁有過百家醫療機構，提供臨床診療、健康管理、公共衛生、醫養結合等全方位、多層次的醫療健康服務。擁三級醫院、二級醫院、一級醫院、社區機構，總床位數超過1萬張。

本身有一定的企業優勢，但面對中短期的不利，相信要時間守下。武肺相信這個因素會係較中短期，長遠企業發展仍是正面，此刻價格大約在合理區較低位置。

------------------------------------------------

Q15049：

龔老師，上年係Inbox問過你問題，經過一年，不計近來跌市，股票倉有18%增長

近來又有提問，希望老師幫忙解答！
現時持有以下股票

1.港鐵 1000股
2.領展 1400股
3.長建 1000股
4.港燈 6000股
5.恒基 2366股
6.中銀 1000股
7.中生制藥 5000股

月供有以下 （已月供1年）
1.恒基 5000蚊
2.領展 3000蚊

現在想再月供多少少，總共月供金額可以一萬蚊，所以想月供多2隻股票，心水有銀娛及港鐵。你認為以下分配可以嗎？

1.恒基 3000蚊
2.領展 3000蚊
3.港鐵 2000蚊
4.銀娛 2000蚊

你認為需不需要加月供潛力股？

謝謝你！

龔成老師︰

投資是長期戰，保持原有的策略最重要，你已經行在正確的路，之後繼續就得。

要否增加潛力股，要睇翻你人生階段。如果你較年青，可以加入一些如比亞迪（1211），中生（1177）、福壽園（1448）的潛力股。

而你現時或將會月供的組合，都是優質的平穏增值股。但有一個問題，你資金好集中係地產類。恒基（0012）和領展（823）固然是，港鐵（0066）都算是半隻地產股。

咁樣會有過度集中單一行業的風險，你可以考慮將其中一隻地產股從新組合中抽走，換成其他優質股，以下的都可以。

平穏增值股︰盈富（2800）、煤氣（0003）、中銀香港（2388）、長建（1038）、粵海（0270）、港交所（0388）。

------------------------------------------------

Q15050：

龔sir您好，想問隻3690。呢3日它唔太算跟大市跌，似乎有人頂緊價位for某d人出貨（我覺得），對嗎？

業務上我覺得它會因疫情影響下跌，想問吓大約去到咩位可以分注入，又或做淡倉可行嗎？

龔成老師︰

投資我地係睇長線，睇企業本質和前景。"人頂緊價位for某d人出貨"而D無人會知，而且佢唔係一D會影響到企業盈利能力架因素，所以我地唔需要理會。

美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。

業務較新興，但佢現時仍在燒銀紙狀態，我比較怕這類企業。這類企業不是不可投資，但是不能大注。

因為無人知佢燒銀紙燒到幾時，因此市場對其估值都是「估估下」，這一定會帶來股價上的波動。但潛力度，有的。

------------------------------------------------

Q15051：

成sir又再麻煩你賜教,

我打算月供以下股票:
$1000, 盈富（2800）
$1000, 光大國際（0257）
$1000, 福壽園 （1448）
$1000, 比亞廸電子（0285）

承上, 因為我28歲, 剛開始學習投資, 主要想多投資潛力股/將來會更大發展既企業.

我覺得比亞廸電子&光大國際喺中國將來會有價有市, 所以可以先投資一吓, 亦見成sir提及過光大係一隻優惠股（50優質股）, 股息率都還可以, 整體風險還好

盈富就盡對係平衡風險+平穩優質股

福壽園就聽成sir介紹既其中一優潛力股

未知成sir對以上組合/企業有咩睇法呢？謝謝你

更正返先, 光大你無喺書度提過

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增值為主，你所選的股票適合，資金分配上都可以。

比亞迪電子（0285）正面的，中美貿戰中短期會對佢及唔少企業不利，但這只是中短期，長遠雖然都可能有影響，但不是核心性的。因此，這股中短期仍會波動，但長期就不用擔心，只要長線月供無問題。

光大（0257）本質不錯的，但股價都幾波動，加上佢之前進行供股，以及佢負債愈來愈多，這都令佢股價受壓。

佢係一家以綠色環保和新能源為主業，包括項目投資、工程建設、運營管理等。業務主要可分三類：環保能源、環保水務、新能源。

項目主要包括垃圾發電、沼氣發電、生物質能發電、太陽能光伏發電、工業固體廢物及危險廢物處置、水環境治理、以及中水回用等。例如污水處理廠、垃圾焚燒發電廠、工業固體廢物填埋場、沼氣發電廠、環保科技及工程管理等。

雖然此企業所賺得的項目回報率不會太高，但在可見的將來，行業的擴展仍會保持。以長期來講，佢都是正面的。

------------------------------------------------

Q15052：

你好老師，想問下本人現年51歲，資金上有人民幣1250000做了兩份保險儲蓄定期計劃為期五年，一份2024年7月和2025年2月到期，現在戶口只剩下大約港幣$250000，想用$150000 做月供股票，

因不太懂投資，只會投放在盈富基金，也因為南商銀行最近有月供股票免兩年手續費推廣計劃，兩年後便會每個月收回$50蚊手續費

我知道月供股票是長線的投資，我現在沒有一份固定工作，如果是這種情況下，我適合做月供股票嗎？

我只供兩年不再做月供，放在股票户口滾存到60歲是否不太多利潤？希望老師有空才回覆我吧，謝謝。

龔成老師︰

如果你擔心無固定工作，影響到你月供計劃。你可以直接將你$150000，自行按一個指定時間（如每2個月），不論市況，都保持買入一手盈富基金（2800）。

這方法同樣可以做到月供股票中，平衡價格波動風險之效果。而盈富是包括50間質素不錯上市公司股票的組合，如果你不懂選股，只供此股其實已經可以。

而將來當你再儲到錢時，都可以用此策略。到將近退休之年，再將手上盈富慢慢換碼至一些收息股，幫自已創造平穏現金流就可以。

以恆指過去年平均回報10%計（連股息再投資），你用2年時間投入$15萬，60歲時大約會增值至30萬。

------------------------------------------------

Q15053：

想請教一下龔老師
爸爸今年60歲 己退休

本身有8000股匯豐 早年買落收息
依加佢想再買啲收息股
匯豐好似比恒生高息

咁佢應該買邊隻好
又會否過於集中銀行股？

龔成老師︰

退休人士應以穏定現金流為主，匯豐（0005）和恒生（0011）都適合。但你全部集中在銀行股，就會有過度集中問題。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要為你爸爸建立一個平衡的投資組合，當中有不同的類別、不同的行業，這是最好的平衡風險方法。

你可以選擇港燈（2638）、香港電訊（6823）、置富（0778）、陽光（0435），這些都是優質收息股。

------------------------------------------------

Q15054：

小米會唔會買唔買得過？佢之前升得好勁。玩在跌左少少。會唔會去返10蚊左右？

我也有留意美團。佢跌穿100。有冇潛力？

龔成老師︰

未來會否回到$10無人知，我地投資唔會用預測走勢，而係用企業質素去做考量。

小米集團（1810）有增長力的，因為佢的產品的確受歡迎，同時處於增長狀態中。

但估值是最大的問題，佢不斷在投資，同時無人知幾時先有較理想的現金流，大家都只是憑「將來價值」去推斷，因此股價一定好波動，市場估值經常處於不一的狀態。

所以，你要預佢將來慢慢會向好，但未有確定時間，因為佢的確這刻未有較好的盈利。如果這股只投資小注，現價可以買入，佢前景都算正面，只是有較多不確定因素。

美團點評（3690）我唔敢睇少佢的業務，因為真的業務巨大，同時增長快，不過，佢仍是有危有機的股票。

業務較新興，但佢現時仍在燒銀紙狀態，我比較怕這類企業。這類企業不是不可投資，而是不能大注。

因為無人知佢燒銀紙燒到幾時，因此市場對其估值都是「估估下」，這一定會帶來股價上的波動。這股有潛力的。

------------------------------------------------

Q15055：

你好 龔成 想問下你投資意見
我同我女友有40萬現金,現有一個香港放緊租物業,但今年年尾結婚要用25萬左右。

近來諗住用按揭套現買越南樓（做過research有大概7%既回報同升值既潛力）或者用現金買投票建唔建議？？如果股票買005，2800定美國ETF好？

女方26歲
收入： 45000
租金收入：16000
每月按揭還款連管理費：33000
每月平均儲蓄：7000
現有物業按揭貸款：700萬

男方 27歲
收入：30000
每月平均儲蓄：10000
唔該哂！！

龔成老師︰

越南樓，我自己無研究開。

我地投資的其中一個關鍵，是你有多認識這項目，「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

由於你年尾有個明確計劃（結婚），手頭上$25萬資金不宜作投資。

至於用唔用"餘下15萬 + 加按"買越南樓，就睇翻而筆錢架整體回報。如果以投資恆指計，過去年均回報約10%。如果你有信心越南樓整體回報（7%既回報同升值既潛力，再扣去加按成本）可以跑嬴恆指，你可以考慮。

但你要留意翻，加按會令你負債風險增加，要注意這一點。

而選股方面，由於你們年青，應以增長力行先。匯豐（0005）只是收息股，無乜增長力，唔適合你，而盈富（2800）和美股ETF都可以投資

------------------------------------------------

Q15056：

老師，我媽媽俾左10萬我幫佢投資，原來想幫佢做訂期，但覺得息口好少錢，想幫佢搵返少少退休金，請問我係每月買1手hsbc 5號收息還是一次過買10萬元

我見現時56元，定係買2800收息，有諗過幫佢月供股票，或者有其他意見可以給我，謝謝你

龔成老師︰

如果你媽媽係退休或將近退休人士，咁佢應以平穏現金流為主。

作為收息股，匯豐（0005）和比盈富（2800）更合適。另外港燈（2638）、香港電訊（6823）、置富（0778）、陽光（0435），都是優質的收息股。

但由於現時大市只在合理區，入貨時要"分注"慢慢入。

------------------------------------------------

Q15057：

Hello 龔成老師

我係投資新手，之前因為聽到好多利好消息
入左1手舜宇光學科技（02382.HK） @$147.

但而家都跌到$126,想知道應該要止蝕離場定仲有機會平手呢？感謝

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

舜宇光學科技（2382）有技術，企業仍有一定的發展，但中短期仍會受中美等因素影響，股價較為波動。此股長線質素無變，問題是你買入價有點貴。

但此股有質素和前景，你可以守，唔需要賣出。

------------------------------------------------

Q15058：

您好龔成老師, 想請問大快活質素是否仍在?另外我發覺0058現價為$18.8,處2016年1月價位,是否處平宜區?謝謝

龔成老師︰

大快活（0052）是有質素的。比起一些潮流飲食，我會偏向選大快活。因為香港人變得好快，潮流飲食的不確定性高，業務可以很好，又可以好差。

反而最基本，民生的必需品，好似大快活咁會更有投資價值。近期由於社會不穏定、經濟不景氣、再加上武漢肺炎所影響，盈利出現倒退是正常的事。

但相信這些因素只會造成中短期影響，集團長遠質素不變。加上大快活定位偏向民生，較有抗跌力。現時股價處於合理區，有長線投資價值，但中短期依然會波動，最好分注入市。現價處合理區中下部。

------------------------------------------------

Q15059：

龔成老師你好，留意到你話最近會入市。我想請教，如果想買追標譜500的ETF, 係要買美國上市個隻 定香港股市追蹤標譜的？
謝謝

龔成老師︰

我所講架係領航標普五百（3140）是追蹤標普500指數之表現，在港交所做買賣的那一隻。

因為佢係港交所做交易，相信對一般香港的投資者，會係最好方便的工具。

由於近年美股的升幅不錯，因此多左人投資美股，多左人認為美股較好，但我地唔好因為這些中短期的表現，就認為美股較好。

以中國及美國長遠的經濟發展計，兩者都是不錯的，而中國的增長力仍會好少少。

------------------------------------------------

Q15060：

你好，我月入$17,000，存款約$70,000，每月能儲$4,000，如想開始月供股票，請問建議供多少？

應集中供一隻股還是多隻？
謝謝

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（823）、港交所（388）、深高速（0548）
潛力股︰比亞迪（1211）、中生（1177）或福壽園（1448）
收息股︰港燈（2638）、香港電訊（6823）、工行（1398）、匯豐（0005）、置富（0778）、陽光（0435）

以你資金計，你可以選擇1至2隻股票月供，供太多隻股票會令手續費成本比例太高（單隻股票月供成本，不應多於投入資金1%），而月供金額就用$4000。

由於現時大市只在合理區，你現有$70000可等待大市出現一定程度的下跌，才大力度掃貨，然後長線投資。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。