【唔敢答的移民問題】

香港去英國嘅搬運公司邊間好？真係唔敢講！

臨近搬屋，好環保咁用番當年香港搬黎嗰啲紙箱重用。睇見啲箱上面間搬運公司名，諗起都仲好嬲，不過其實好好笑。就係咁嘅經歷加上某啲朋友嘅經驗，搞到我從來都唔敢推介邊間國際搬屋公司。

講得叫移民，緊係將香港屋企啲嘢連根拔起，當然希望搵間信得過「啲」嘅搬運公司嘅。當時港媽有個朋友移咗去加拿大，介紹咗間算合理（亦都唔平）。老實講香港嗰邊包裝、入倉、寄存、報關之如此類嘅部份，的確做得好好嘅。點知個伏就响目的地英國到出現，真係伏到諗番到想笑。

响預訂嗰朝晨早，我就收到個電話，重係好親切香港口音話唔識路又電話收得唔好（心裡面開始覺得不妙）。因為貨柜司機係唔負責搬嘢嘅，兩個華僑嘅另一部車隨之到達。佢兩個落車嗰時嚇得我吖，見到Benz雄同田雞喎！我忍唔住問你兩位係黎做咩嘅呢？啲搬屋工人呢？我得到嘅答案係：「咪我兩個囉！」（唔係呀？？？百幾箱喎！）

原來本黎嗰間英國接頭嘅搬運公司，聲稱忽然有事外判咗比呢兩個華僑。個貨柜司機同兩名影視紅星仲好鄭重咁，叫我確認貨柜把鎖係無開過。「咁條鎖匙呢？」「吓我無喎，唔係响你地度咩？」除咗用奪命較剪腳之外，我當時個腦係無其他嘢！結果係我自己爆開把鎖，兩條友幾廿歲搬到死死下兩個幾鐘都搬唔到兩成。最後我唔忍心落手落腳搞咗八個幾鐘，試問我重敢唔敢介紹搬運公司呢？

#力嘅表現
#瞓咗兩日