【龔成問答信箱】（Q20881-Q20900）

Q20881：

老師又想打擾你啦，最近因為要處理小朋友黎緊入學問題，遇到唔少黑暗既一面..覺得自己好傻，令到小朋友報唔到理想既學校。

我覺得好對佢唔住，明明佢表現得好好；所以我突然就諗，或者要送佢去國際學校讀，先能夠配合到自己對佢既教育理念..

因為我真係唔想佢係傳統學校裏面被培訓做一世打工既人，我想佢成為一個愛身邊嘅人愛自己嘅人識得同自己溝通嘅人，唔好為錢而活。

我同先生月入真係唔多.. 月入5.5萬.. 供樓係2萬，工人姐姐 4千5 ... 如果讀國際學校一年係7萬5。

對於我地唔算好富裕既家庭黎講..的確係會用左我地好大一部份既收入，當然同先生本來都唔係物質主義者，平日嘅使費都係應使則使唔會買奢侈品。

我又喺度諗唔知自己投資嘅嗰個部份三年後嘅升幅實質上會唔會應付到三年既學費.. 所以真係想打攪你睇吓可唔可以幫我望一望我嘅投資比例，再俾啲意見我。

因為我真係諗咗成個星期 每一晚都好唔開心 登個仔覺得不忿同埋委屈 我唔想佢要退而求其次 去讀一啲咁差嘅學校 ..

龔成老師︰

入學個部份，已經過去了，現在多想也沒用。我地應著眼係可以改變的地方，向前看。

首先，我唔希望你將「學校」和「學習」劃上等號。

「學校」只係人生中學習的其中一個媒介，當中主要學習一些學術上基本知識。

但其實好多知識、思考方法、待人處事等，都係從日常生活和家人身上，慢慢累積而得來的。

我並不是說「學校」不重要，只是唔希望你將佢視為全部。

你認真想下，今天的你，到底有多少來自「學校」建構出來? 又有多少是你自己學校以外的「學習」建造出來?

當然，我理解你在國際學校，是有一些想法和考量，唔係單純為讀而讀。

所以，你只要確認自己清楚理解成件事，都覺得係有必要實行，那我們就從實際財務上，看看是否可以做到。

由於你已有自住房屋，算係解決一部分。

之後就係財富增值部份，較理想情況，就係你家庭收入，能在供小朋友讀國際學校之餘，都有餘力做好財富增值。

如果唔得，我地就要睇下，點樣可以係而個情況下，維持或者有限度地增值，盡量唔好比財富增值動作，完全停下來。

你可以考慮增加額外收入、做兼職、有時間做一些網上小生意等，都係可行做法。

------------------------------------------------

Q20882：

龔sir, 我想請教下我今年30歲
之前完全唔識買股票，比經紀遊說左買左兩份儲蓄保險，已經供左一段時間，但都仲要供多10年。

近年接觸股票，都是用便宜價買優質股長期持有的策略，諗緊好唔好斷供回報低的保險，將資金用黎買回報較好的股票(就算用來買2800回報都高過儲蓄保）。

暫時保費佔收入約10%，我都明白買儲蓄保可當配置中較穩陣的部分，但又想趁後生更加進取。

你認為我應不應該斷供保險呢？
謝謝龔sir

龔成老師：

其實，要睇你本身是那一種類型，如果你比較保守，而你本身在財富組合中，無乜防守性資產，投資這些保險產品，可以的。

當我地進行理財，攻守兼備是應該的，問題是比例如何，以及這個人風險度如果。

因此，好睇你自己的風險度，自己的投資能力，以及你本身、你想的財富配置。

建議點都留一份儲蓄保，至於另一份，視乎你自己的投資目標、實力，如果想進取，將資金轉做月供股票，長遠的確有較好的效果（當然風險度都會有所提高）。

------------------------------------------------

Q20883：

老師, 想問一問9922，6690兩隻股30入，可長期持有嗎？

龔成老師：

九毛九（9922）係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過現價就少少貴，雖然這股都有長線投資的價值，有貨就持有，但暫時唔好心急加注。

海爾智家（6690）主要從事生產及銷售家用電器，並以３個自主發展的品牌（包括海爾、卡薩帝、Ｌｅａｄｅｒ）及４個收購的品牌（包括ＧＥ　Ａｐｐｌｉａｎｃｅｓ、Ｃａｎｄｙ、Ｆｉｓｈｅｒ＆Ｐａｙｋｅｌ及ＡＱＵＡ）營運業務。

佢家電產品涵蓋冰箱、冷櫃、廚房電器（包括油煙機、灶具、消費櫃及烤箱）、家用空調、商用空調、淨化器、新風系統、洗衣機等。

業務不差的，有質素，長遠有發展，現價合理區頂位，你可持有。

------------------------------------------------

Q20884：

龔sir你好 , 我今年33歲，我bb而家五個月大, 如果想依家開始儲三百萬畀佢14年後去外國升學，而家應該揀啲乜嘢嘅月供股票組合比較好？

每個月供5000是否足夠？心水得港鐵(66)， 請問有什麼更好的選擇？謝謝

龔成老師：

以你的年齡與情況，可以投資一些平穩增長類為主的組合，加少少潛力類。

目標是追求10%的年回報。

如果每月投資$1萬，14年，10%，到時預期能滾存到到$330萬。

因此，現時你有兩個方法，第一，增加每月投資資金至$10000。第二，提高回報率，但你都要明白風險度會提高左，以及要求你的投資知識更多。

10-12%回報率，可考慮以下組合。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20885：

你好~ 我係高位33.5時買咗2000股175吉利汽車，最近跌到2X蚊...是否應該沽走部分或低位入少許溝淡？

968信義光能現時值得買嗎？
謝謝

龔成老師：

吉利（0175）可長線，不用擔心。

本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

現時價位在合理區頂，股價波動，有貨可長線。如果你資金多，可以回多少少，如10%加注。但仍要有現金剩。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂，如果想入，要慢慢分注，但仍不是大注投資的時候。這股股價上落都大，要注意金額。

------------------------------------------------

Q20886：

龔老師 請問909 明源雲 及9633 農夫山泉 有質素可長揸嗎? 我高追買入了 賬面輸唔少... 可待公司發展嗎?

龔成老師：

明源雲（0909）有潛力。你有貨可持有，只要不過多就得。

佢主要係中國房地產開發商及房地產鏈參與者，提供企業級ERP解決方案及SaaS產品。

睇翻佢之前的資料，佢係中國房地產開發商的第一大軟件解決方案供應商，市佔率有約2成。係呢個市場裡面，按收入計，亦為ERP解決方案及SaaS產品的最大提供商。

其實，佢的角色可以話中國房地產行業的數字化轉型，為房地產開發商及其他參與者，開發了一套行業垂直的ERP解決方案及SaaS產品，以助其管理廣泛的業務運營。

包括銷售及營銷、採購、成本管理、項目管理、預算以及房地產資產管理，佢的SaaS產品包括雲客、雲鏈、雲採購及雲空間。

業務雖然有增長力，但股價都唔平，如果初步分析，處貴水平，值博率未算強，始終市場現時對這類股有好大期望。

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。

由於有一定的品牌價值，因此企業質素與發展正面，財務數據不差，生意與盈利都有理想增長，不過上市不久，股價較波動，同時上市前數據可能執靚過，因此要注意風險度。

基本上，兩隻股都有質素的，不過可能你在貴的價位買入，要耐心少少，而兩股都有得守的。只要持貨不過多就得，特別是909。

------------------------------------------------

Q20887：

你好 老師。因為公司要改名的緣故， 我可以拎回MPF 大約11萬作為遣散費，請問sir這些錢可以怎樣投資最好呢 ?

目標想將這11萬一年後可增至20至30萬，是否可行呢？

感激sir回覆

龔成老師：

如果你這$11萬是「閒錢」，而你本身都有一定的現金，這$11萬就可投資。

如果要將$11萬一年後變成$20萬，這是一個一倍的回報，在投資上，是極高！

因為連全球投資回報最高的人，巴菲特，他能取得的回報是20%。

如果你要追求一倍回報，你就要面對好大的風險，而我並不建議。

因此建議你調整翻目標，投資一些穩健優質股，長期財富增長，會較為合理。

------------------------------------------------

Q20888：

龔成先生你好，我由2018年開始供月供股票，每月$5000建行，$5000港鐵。3年後由於月供股票計劃完結，想把轉其他股票進行月供，想問問保持好或是轉其他呢？
其中一個心水是領匯，第二隻可以選擇什麼？
謝謝你

祝工作順利
身體健康

龔成老師：

你可以轉其他，令你的組合更加平衡。

領展（0388）是考慮之選，另外，盈富（2800）都可以。如果你能承受風險，想進取少少，可考慮香港交易所（0388）或舜宇光學（2382）。

其實要睇翻你的投資目標及風險承受能力，盈富一定最平衡的。

------------------------------------------------

Q20889：

Hello 您好，本人唔係身處hk & Macau ，之前網上睇咗股票勝經想學點計股票合理區，但似乎講係概念，唔係教實戰點計。見網上課程好似冇提及依個課題，請問有咩其實方法可以學到？

另外，見您都有推介小米。我亦有留意其他股評人講呢隻股票，大家都認為小米唔值咁高。請問您心目中的目標價大概係幾多呢？其實我之前高位已經入咗少少⋯

By the way.. 我之前有睇50值博倍升股，近日計咗入面50隻股票，2018 同前幾個星期股價升跌% ，回報近2倍。

而我自己組合（已經一早賺少少就放咗），如果一路冇賣，同一時期，就是+70%，所以就更加激勵我要喺依方面研究多啲！

龔成老師：

由於企業估值，我會集中在課堂內講述，如果你上唔到，可以睇《股票勝經》《年報勝經》，有少少的。另外，你多睇巴菲特相關書都有講的。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂位，小注分注可以，但唔好入得太急，預佢股價仍波動。回多15%更有投資值博率。

加油，選股是一個好大的題目，要花好多時間的，我每星期用6小時分析一隻股票，一年50間公司，但我一年只會投資1、2間。我唔清楚我的投資實力是否比別人強，但肯定花的時間比99%投資者多！

------------------------------------------------

Q20890：

本人45歲，月入穩定6萬，有現金200萬，當中有55萬於$30買入吉利汽車，而家坐艇，賬面蝕12萬。希望10年內可財富增值到千萬，然後移民。我選了以下股票：
平穩增長股：

港鐡（00066）
長建（01038）
恆基（00012）
領展（00823）
希慎（00014）

潛力股
安碩恆生（03067）
港交所（00388）
阿里（09988）
小米（01810）

問題：

1）我打算留30萬現金，其餘平均分布以上9隻股，這樣可以嗎？

2）請問以上各股邊個價位以下買入好呢？

3）另外，希慎今年的財務報表顯示出現虧損，是否仍值長期持有呢？希望得到你的回覆

龔成老師：

吉利（0175）本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。這不單有利佢有中國發展，同時長遠，可能加快了海外發展速度。

另外，佢未必發展自己的電動車品牌，但會發展當中的技術，相信在合作及自身價值上，長遠仍是正面的。

其實這股無問題，不過你持貨太多就要小心，最好股價上翻多D，減少少貨，平衡翻。

1）大方向是可以，上述股票，都是有質素的，選股無問題配置都可以。

2）平穩增長股，基本上都處於合理區，這5股，已經可以分注投資。

至於潛力股，由於處於合理區頂至略貴，因此，這4股你投資時，唔好太急，現價可以開始第一注，但之後就要慢慢分注去買入，買入的速度要比平穩增長股為慢。

另外，如果大市只處合理區，現金最好有$50萬-$80萬，若出現大跌市，可以把握到買入的機會。

3）無問題。佢只是物業重估方面，出現了一些賬面上的虧損，營運上是無問題的。優質度不變，相信佢最差時間已過，慢慢會好轉的。

------------------------------------------------

Q20891：

我想先睇你嘅書籍，請問有推介新手教學的嗎？

老師，你提及到同一行業不能太多，同一股不能太多。
即同一股應該手持幾多先為之合理？
謝謝你

龔成老師：

你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

至於持股比例。我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，例如要在30%以下，同一股不能太多，例如要在15%以下。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20892：

龔成老師你好！本人現年44歲，已婚，未有子女，有計劃生育；有保險 (延期年金、人壽、醫療)；有自住物業，仍需供樓(2024/11供完)。

現在年收入約 $720,000，每年開銷約HKD$521,000，另有欠債 HKD$50,000。清還債務後，每月能$10,000作儲蓄和投資。

現想請教﹕
- 請問我應如何投資？
- 我應如何調整已有的投資組合？

本人投資現況﹕

證券
香港股票
00003 4,765股 平均價HKD$16.426
01398 5,000股 平均價HKD$5.002
01475 10,000股 平均價HKD$6.385
01818 4,000股 平均價HKD$9.415
02130 1,000股 平均價HKD$7.55
02238 2,000股 平均價HKD$8.13
03988 50,000股 平均價HKD$3.065

美國股票
AMD 1股 平均價USD$110.5
ARKK 5股 平均價USD$138.84
FUTU 1股 平均價USD$186
INTC 1股 平均價USD$77.85
KO 1股 平均價USD$68.24
PEP 1股 平均價USD$154.29
TSM 2股 平均價USD$146.35

單位信託基金
富達基金 - 美元高收益基金 (A類-每月派息-現金)
持有單位﹕1869.78 投資額﹕USD$20,152.13 收息﹕約USD$772.63/年
施羅德亞洲高息股債基金 (A類-人民幣對沖-每月派息-現金)

持有單位﹕1000 投資額﹕RMB102,046.88 收息﹕約RMB6709.08/年
恒生指數基金 (A1類-港元-累積)
持有單位﹕6139.496 投資額﹕HKD$60000

另代親人打理以下項目
香港股票
00003 5775股 平均價HKD$16.145
03988 25000股 平均價HKD$2.976

單位信託基金
JPM亞太入息(加元對沖)A股(利率入息)(每月派息-現金派息)
2936.796 投資額﹕CAD$27,600

摩根國際債券(加元對沖)(每月派息-現金派息)
1566.923 投資額﹕CAD16,000
Eric Tam
投資目標﹕
- 能提供穩定增長和現金流，以應付日後開銷 (子女、退休)

龔成老師：

基本上，現時你的持股都是正路，你持有的港股都是有質素的，不過，增長力唔強，以你這個年齡，其實可以投資平穩增長類，而收息股，如1398、3988。

至於美股，我自己無太多研究，但初步睇你持股都是正路的。

至於基金方面，初步睇都是正路的。

你現時每月能儲$1萬，由於你將會生小朋友，所需現金較多，因此，你先要計算好自己預期現金所需情況。餘下先投資。

在「可投資部分」，會集中投資一些平穩增長股，可考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。你利用月供或自行分注都得。

到2024年後，你供完樓，每月現金流運用數會增加，你可以加大原有的投資，甚至有小部分投資較有潛力的股票。

------------------------------------------------

Q20893：

老師你好，在《大富翁致富藍圖》，書入面以租養樓的例子，用超過1成首期做按揭，變相每月供樓錢不太大，再去計算租金回報同出正負現金流。

但如果我只有一成首期，每月供樓錢相對會多，那麼租金回報一定不能出現正現金流？

到底，應不應該用一成首期買樓去出租投資？是不是我扣除租金收入後，還有能力供樓，就可以了？還是租金回報比按揭利率好就可以？

另外，《5年買樓四步曲》入面，有沒有教點樣計算租金回報，利率等事項？對買樓零知識！

覺得自己很遲先起步，機緣下睇到你嘅書，40歲先開始識得認真儲錢和投資。

睇過你的《財務自由行》、《50優質潛力股》、《股票勝經》，《大富翁致富藍圖》，就是覺得《80後百萬富翁》不適合自己看，不是80後啊！這麼遲起步還行嗎？早點認識你就好了！

龔成老師：

如果你做9成按，出現負現金流是正常的，但我地可以再深入分析。當中可以計回報率與成本的關係，回報率包括租金及升值，而最基本要計算租金回報率，至於成本，就是資金的成本，即是按揭的利率。

如果你按息低過租金回報率，其實你借錢已經能產生額外回報，方向已正確，你用高成數按揭是可以的，但就要明白當中的風險。

《5年買樓四步曲》入面，都有教點樣計算租金回報，利率等事項，以及有教各種買樓事宜，你可以睇。

《80後百萬富翁》並不是只適合80後的，其實這是一本心理學、金錢學的書。有心唔怕遲，加油！

------------------------------------------------

Q20894：

你好 龔成老師 我有隻股票中國有贊(8083) 成本價3.743 有4萬股

我知道應該一早止損離場 但係我又見佢分拆上主板 所以就硬住頭皮揸住

請問龔成老師我應該如何處理？應該狠心斬倉之後考慮建滔層積板(1888) （因為我留意到佢係跌市都仲創新高）定係等有贊科技上到主板再觀望？謝謝！

龔成老師：

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

這股建議你減持或賣出。

建滔積層板（1888）質素中等。佢最大的問題是盈利波動，反成本等因素影響得好勁，近年派息的確不差，有時只是由於特別息，之後未必再有咁高。

中期業績的生意與盈利出現下跌，這裡會扣分。

而睇翻佢長期的經營現金流都有正數，所以又未去到差的情況。整體來說，這股的投資價值都有，但未到最高，算是中等，現價不算貴，值博率中等。

所以，未未算好值得你將資金轉到這股。

------------------------------------------------

Q20895：

請問我手上嘅股票，係應該換碼定繼續keep?

3000股，823，＄91.6
800股，5，＄79.5
600股，11，＄168
2000股，868，＄22.1
500股，1038，＄57.2

請問買VOO,追蹤S&P指數
會否回報比2800更快？

龔成老師：

領展（0823）、信義（0868）有質素，可長線。

至於兩隻銀行股，你預佢地只是收息，增長力不強，持有與否要睇你的投資目標，如果你想增長，就宜轉其他。

至於長建（1038）是不錯的企業，有一定規模，資產亦有一定質素，並擁有相當充足的現金，而過往的發展亦很理想，能平穩發展及再投資的回報亦不算差，而開拓新業務亦能平衡當中的風險回報，整體有相當的質素。不過，規模大，國家保護資產，都令這企業增長力有所減弱。

長建有不少歐洲及英國業務，脫歐因素、歐洲經濟較弱難免對其造成影響，反而，脫歐情況明朗化會更有利企業，可說是最壞情況已過，之後將會慢慢向好。

其實長建近年仍不斷進行投資，但由於歐洲業務較弱，令股價並沒有顯現，但只要歐洲情況慢慢好轉，當中的資產價值就會更有效反映。

不過，歐洲的經濟，總不能用「強」去形容，所以長建並不是高增長類，只是最弱時期相信已過，往後會平穩向上。但回勇之路，仍然較長。

另外，由於企業已有一定規模，加上作風穩健，發展的速度不會太快，但平穩增長則無問題，手持的現金相信會逐漸收購其他海外業務。

是收息及平穩增長類，現價是合理的。你持有就得。

至於VOO，都是值得投資的，你可長線。至於增長是否比盈富（2800）快，暫時是，不過都要留意，這基金的平貴度，比盈富為貴。

------------------------------------------------

Q20896：

Hi, 想请教下汽車之家是否合適投資？

龔成老師：

汽車之家（2518）都有質素的。

佢中國的汽車消費者在線服務平台。根據資料，以移動端日活躍用戶計，在汽車服務平台中排名第一。

http://xn--autohome-t39lf9n8ned38fwc3culiu05e22a.com/ http://xn--cnche168-0c2n.com/，為汽車消費者提供全面、獨立及交互式的內容和工具並為汽車價值鏈的汽車製造商和經銷商提供全套服務。

根據資料，集團是最大的在線汽車廣告及線索服務供應商，就媒體服務及線索收入而言，於中國在線汽車垂直媒體廣告及線索市場中佔據的市場份額約3成。

佢收入源自媒體服務、線索服務及在線營銷及其他。

佢係2008年成立，最開始是一家內容型垂直媒體公司，專注於媒體服務。於 2016年，推出「4+1」戰略轉型方案，打造了一個囊括「車內容」、「車交易」、 「車金融」及「車生活」的平台，從內容型垂直公司轉型和升級為數據和技術驅動的汽車平台。

自2018年起，專注於用人工智能（AI）、大數據及雲技術（統稱ABC）開發全套智能產品和解決方案，透過提供跨價值鏈的端到端數據驅動產品和解決方案，構建一個連接汽車行業所有參與者的集成生態系統。

展望未來，計劃繼續利用「軟件即服務」（SaaS）能力連同核心AI、大數據及雲技術同時進行橫向和縱向擴張。

發展力是有的，但價位都唔算平，如果控制注碼，這股都可長線的。

------------------------------------------------

Q20897：

想問埋1876 現價合理嗎同值得買埋？

同埋九毛九買左一手 37 蚊入左點算

龔成老師：

百威亞太（1876）有質素，佢係AB InBev Group的一部分，係亞太地區最大的啤酒公司。

從事生產、進口、推廣、經銷及出售超過50個自家擁有或獲許可使用的啤酒品牌組合，包括百威、時代及科羅娜，以及旗下多國品牌和當地品牌，如福佳、凱獅及哈爾濱。

百威亞太係多個國家都有相當的市佔率，同時增長力強，就近年的數據睇，盈利每年都有雙位數增長，業務、品牌、質素絕對有。

整體來說，這股質素是有的，增長力都有，之前較貴，現價合理區中上部，都可分注投資。有長線持有的價值。

九毛九（9922）係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過你買入價就貴，雖然這股都有長線投資的價值。

如果持貨不過多，可守。一手無問題，但唔好心急加注。

------------------------------------------------

Q20898：

龔成老師你好，我於3年多前開始拜讀你的著作，當時以一年多時間財富由零累積至20萬，實在感激！

可惜至2019年因個人及家庭因素，全數清零，而近一年因疫情關係工作收入更減少了。

現在與男友同住，有結婚及置業的需求，兩人扣除所有開支，每月儲蓄共約$10000。

本來已有16萬現金，我們太心急於高位買了很多科技股(1810/$35/18手、2013/$28/3手)，現在跌了很多，很後悔自己的衝動，大調整心情真的很難捱，男友比我更不懂投資，他比我更難過。

（但我其實又不太擔心，明白企業本質及價值沒有改變，是長線投資而不是炒賣投機。)

不過還是想聽聽你的意見，請問你認為還可守嗎？有沒有什麼特別情況會需要先沽出？

現在再努力儲現金當中，今天趁書店特價最後一天，再買了兩本新書《5年買樓4步曲》《股票勝經》，我們會好好閱讀並努力去實踐，希望5年後可以有好消息話你知！謝謝你！

不好意思，忘了還有一事想請教：男友老闆知道我們想結婚置業，他很高興，因為男友是他的得力助手，說可以幫我們首期，意思應該是當中一半作賀禮

一半借給我們再還(想了想我們只有跌了一半的股票在手，可能要等幾年才有增長...)，你認為這方法可行嗎？還是應該按書中4步慢慢來比較好？

龔成老師：

你持有的股票，都是有質素的，但如果你太中在科網類，其實有風險的。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你持貨可以守，但要注意風險，同時，慢慢要平衡翻個組合。當然，如果你持貨過多，當股價上翻少少時，宜減。

股票無問題，你買入價及策略有問題。

另外，如果你地將會有結婚置業等資金需要，就要儲下現金，較多部分留現金，投資比例不宜太多。我地投資，要長線，要「閒錢」。

至於你男友老闆資金方面，如果可以有免息借貸，從資金運用上，是借得過的，不過，就要明白風險，以及不要太進取投資。

------------------------------------------------

Q20899：

老師，你以前有冇報過投資班？

龔成老師：

18歲開始，初投資的幾年，大量去上投資班。無人一開始識，所有野都要一步步去學。就算到而家，都不斷睇巴菲特相關書，保持進步。如果認為自己乜都識，才是最無知的人。

------------------------------------------------

Q20900：

龔成老師，你好！
本人由今年2月起開始買股票
有收睇老師嘅書

我持有：

6618、696、2388、855、1928、520、0005

想請教一下，我手持的都是優質股嗎？
期待老師的答覆
謝謝你

你所持有的股票，都是有質素的。

銀行股以收息為主，增長力不強，加上你已有兩隻，如果你不是年齡太大，銀行股之後不同增持，原有貨就持有。

至於其他，都是有質素的，可長線持有。

京東健康（6618）由京東（9618）分折出來京東健康，將會來港上市。這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴，所以如投資，小注都可以。當然回翻1成更有值博率。

這股如本身有貨，可長線。但唔建議你持有太過多。

至於呷哺呷哺（0520），有質素的，但近一年股價升得過多，所以最近股價受壓都是正常，你持有就得。

整體上，持股都不差的，你長線就得，但就唔好心急加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q17301-Q17320）

Q17301：

Sir, 我係股票班舊生, 用阿Sir這8堂所教知識去分析了1830/必瘦站（包括跟同行比較～發現必瘦站比2138及1827更有發展及優質, 之後填寫6張企業分析表）覺得此企業屬於優質股。

～分析如下（有時間慢慢睇, 唔使急， 謝謝🙏）

目標客戶以中產以上人士為收入來源（屬中高檔次, 有能力將成本轉嫁給客人）睇過他們過去5年的年報, 發現他們現金流非常強，而財務穩建, 沒有向銀行借貸。

營業額～ 除2017年（-13.89％）2016 2018 2019都有增長， 當然2020年疫情下仍然有4％增長已經算係唔錯。

1）管理層積極進取, 拓展海外發展（包括2020年2月在澳洲開業, 表現理想,

2）還想在今年進攻美國美容市場）。但疫情下可能會較謹慎考慮開店舖問題 （或者趁疫情下以平價的租金買或租舖, 去發展美國美容業務）。

3）另外, 亦看了2019 2020 年報， 他們都積極發展大陸市場（包括大灣區）

但集團仍然以香港為主要發展重心地區。

4）至於男士美容業務（講了2年仍沒開始, 可能待2021年才推出）

5）流動比率～過去5年介乎177％～205％（合格）

6）ROE～5年內有增長， 今年53.04％

7）總負債/股東資金比率～今年91.35％ 算合格嗎？過住4年51％～74％

8）投資活動～ 過去5年都有投資發展企業（例如擴充香港及澳門/中國業務）（租舖/買機器/增加員工人手。。等等）

9）其中評估表內（估值～行業市盈率）

我以2138/香港醫思醫療集團的市盈率（12.43～12.85）及1827/卓珈控股的市盈率（28～30）比較, 好似太高, 所以用回必瘦站市盈率（7～9）

過住市盈率～亦以（7～9）

推算合理市盈率～ 以8～10計算估值, 所以推算約$1.44～2.20（這個股價合理區範圍正確嗎）如有錯請賜教！

必瘦站應該不屬於資產型企業， 所以市盈率及市賬率分析應對其分析平貴指標作用不大, 對嗎？

預估下年派息會減少, 因為疫情可能負增長（中國/澳門及澳洲）,但香港營業額應該不會太過差

最後發覺分析1隻股票, 起碼7至14日時間（包括睇年報, 所以我非常佩服你）。 必瘦站的年報算是簡單, 如果地產/銀行或大型企業, 肯定要1個月時間。

非常感謝你細閱以上分析, 已將8堂所學的僅餘嘅投資分析及知識盡量發揮。

龔成老師：

你的分析不錯，基本上已掌握了課堂所學，並講出了重點。

1）2）3）佢的發展方向，以香港為重心，並同時會發展中國，相信中國是其中一個管理層會重點發展的地方。

但由於管理層由的表態曾經出現反覆（你睇佢多年年報的管理層講話就明），過往一直用高派息政策，反映發展心態唔算強，但都會發展。

到近年，曾經表示想大減派息大力發展中國市場，最後，派息後保持高水平，有時都難以完全掌握管理層的方向。

4）暫時唔好有太大期望。

5）6）7）對，合格。但由於高派息比率，ROE無反映到再投資回報率，因此只反映原有資金回報率。

8）相信佢仍會保持發展。

9）你的方向正確，我會比你估值計算出的高少少，主要因為現金流強，派息高同時仍有增長力。加上佢就算在疫情期間，都無虧損，這點令人有驚喜。

另外，由於之前派左大額股息$0.34，因此我地計算出來的估值後，都要減翻相關數目，以反映企業現金的實際流出。

大約$2.X是合理區，去到$1.7以下是平。

------------------------------------------------

Q17302：

疫情人工黎緊幾個月都要減四分一，開始迫我面對之前一直打算做既網上小店副業同埋真係報左幾個課程增值自己。

同埋我更清晰自己一直只有打工都係死路一條，人要多把刀比自己用。性格問題囉，我最討厭停滯不前既感覺。

但萬事起頭難 ，岩岩起步又要儲stock ，要用啲資金。唉 ，好多不確定令我開始有擔心既感覺。

幸運既係 仲有份工頂住，

前兩年我睇過相，批過命 ，又話我無股票運 又唔好同人夾份做生意，所以呢句野一直有啲影響我...好既係我無再玩短炒。

龔成 我都係80後 你真係好叻又努力。無㗎，我單純想呻下 ，我諗你都睇過秘密呢本書 ，我相信呢種力量。加油！

龔成老師：

加油！我地總會面對困難，而我成日同自己講，困難是我令進步的因素，短期當然會辛苦，但長遠反而更加好。

最重要是保持進步，同時要對自己有信心。

《秘密》這書當然有睇過，我的書都有講吸引力法則，因為這的確對我地有影響。網上小店保持發展啦，好多野要試先有答案。

------------------------------------------------

Q17303：

老師，因隻932而差點永不超生既我。因為最近既疫情問題反而令我增加了收入，現在手上既流動現金差不多有十多萬，想捉緊今次機會突破返，將失去既時間同金錢追返晒。

但因為國安法，而中美又會產生太多不明朗因素恐怕引發蝴蝶效應，所以近期前我都未會採取買入資產既行動

想請問老師意思，呢段時間除左留有現金外仲應該要點準備機會來臨？

龔成老師：

順騰國際控股（0932）生意無增長，年年虧損，加上2019年的核數師意見有少少問題，這都反映企業本身的投資價值唔高。你要多從企業的角度去分析。

你唔好太著重中短期分析，唔好太著重事件的分析，要著重翻企業的價值，以及財富組合的配置。同時要長線投資。

現時的大市，你唔好100%現金，雖然有些版塊熱炒，但同時有些版塊較合理，只要你以分注投資進行，仍是可以的。如果你擔心，就唔好入太多貨，但唔能夠無貨。

------------------------------------------------

Q17304：

老師你好，恕我冒昧想問一下關於我的狀況如何投資。

我4X歲，月入$35,000，剛離婚要自己搬出來，暫時租住朋友一間的房屋月租$15000，每月可儲蓄大概$7000

打算短期內購買一間500多萬的房屋，手上流動資金大概10萬元，請問我應該如何部署往後的資金？

龔成老師：

如果你想買一層$500萬樓，就算9成按，都要有一定的金額，你要盡力加大儲蓄，希望每月可以儲到$1萬以上。

你要計算計自己打算幾時買，如果中短期，就未必適合將資金投資，如果是中長期，資金就可以適度投資，但都要投資較穩健的股，平穩增長型，如盈富（2800）、銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q17305：

你好呀，我一路以來都追開你嘅書 係你嘅fans 呢一兩年都有參考著你嘅書投資 首先想講返聲多謝 因為睇完你嘅建議再去睇年報 最尾成功係比較平嘅位買入恆基兆業

呢排自己睇到金沙中國價錢都嘅吸引 市盈率係15-16咁又見金沙城洒店改建嘅倫敦人就開幕 覺得有潛力 想慢慢分注買入 想問下你嘅意見！唔該曬

龔成老師：

恆基（0012）有質素的，不過增長力比過往減左少少，但長遠仍有投資價值。

至於金沙（1928），現價合理，中短期這股會較弱，始終疫情令佢生意影響，但我地投資股票一定是睇長遠的，因此這股可以長線投資。現價有投資值博率，全注已可以。

但都要同時留有現金，唔好心急用盡資金。

------------------------------------------------

Q17306：

龔老師你好，本人47歲，從事電梯維修判頭，太太家庭主婦，有2幼稚園小孩。本人因上年中風、所以現時身體影響工作。不能夠長時間開工。本月收入不太穩定。

現租住近女兒學校荃灣市區3房單位，租金$18000。早幾年放售物業約5百萬現金。暫未有上車。

現手持5百萬現金，應該買入那些收息股可用來幫補家庭開支及租金？ 謝謝你

龔成老師：

由於你收入唔穩定，加上有一定的家庭負債，投資唔建議進取。持有的$500萬要小心運用。

你最好以「低風險，穩陣，現金流」為資金配置的主軸。你可以將這$500萬，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息

你平衡的投資這些股，除了可以得到穩健的收息收，同時可有效的分散風險。

另外，小部分投資盈富（2800）都可以，而收息的ETF，如ＧＸ恒生高股息率基金（3110）都可考慮。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$500萬資金，平衡地分配在上述的項目上，對你來說是最好平衡風險，同時有穩定的現金流。

如果你能承受到小小風險，就可投資較多平穩增長股，即是銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。這部分要睇你的家庭情況，以及風險承受能力決定。

------------------------------------------------

Q17307：

老師你好！我準備24歲，月入$25000，手持現金33萬（先前用來作定期存款）。而今年開始每月月供匯豐股，每月$10000，已供半年，最近亦開始接觸股票。

而我看到老師在fb都建議月供盈富，我是否應改變現時月供匯豐？

另外，現時想開始學習買股票，應如何入手？以及現時有什麼有質素的股推介？謝謝你！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）以你的年齡來說，並不適合。你應該先投資盈富（2800），月供可以。如果有能力，就加少少其他股，甚至潛力股，但如果選股能力不強，就暫時供盈富先。

另外，以你的年齡，財富仍有一定的增值力，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。你可以睇《股票勝經》或上堂都得。

------------------------------------------------

Q17308：

你好，本人29歲，有穩定職業，月薪約四萬，扣除開支後大約可月儲二萬八千，現時大約有儲蓄八十多萬。

請問如想盡早開始投資股票的話，應該選擇那些股票呢？

本人屬於低風險和保守的性格，每月投資股票應佔每月可儲收入多少成呢？謝謝。

龔成老師：

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，加上你是較低風險，因此這刻不用急著投資潛力股。你可以集中在平穩增值股先。

你可以自行分注或月供，每月預算大約投資$15000。

你可以考慮盈富（2800）$8000。

另外再加幾隻（每隻$3000）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

至於現時的$80萬，暫時只能動用$20萬，分注投資上述的股都得。

------------------------------------------------

Q17309：

龔老師,我係投資新手 想打算用15萬去投資收息股 想買中銀香港,長和,中國神華,中移動呢4個 分散投資好定係買晒其中一個好呢?

龔成老師：

分散是較好的，因為你並不是「賭」某一股的表現，而是要建立一個組合，要做好「配置」。

你可以投資中銀香港（2388）、長和（0001）、中移動（0941），都是可投資收息的股。神華（1088）業務有潛在波動，以長遠收息的角度，未必是最適合。

另外，你可以同時考慮香港電訊（6823）、置富（0778），都是不差的收息股。

------------------------------------------------

Q17310：

想問如何計算便宜的價格去買股票？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q17311：

老師你好，想請問如果我想月收股息15000

我以家30歲每月只可用2000黎供股我又咩都唔識咁我供哂盈富基金先同埋想學投資又冇時間想堂咁淨係靠睇書得嗎老師有咩書可推介比新手睇?

因為我住離島以家有個女又好困身以家暫時都係買電子書睇咩都做唔到。請老師指點迷津

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你這刻應著重「增值」。

其實你這個年齡，仍是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以先增加知識，可以不斷睇書，《股票勝經》是很好的入門書，你睇完這本再睇其他。

------------------------------------------------

Q17312：

龔成老師，你好 我係你以前股票班的學生，我睇左你本新書《5年買樓4部曲》，覺得老師你分析得好詳細，好活學活用。

我同我女朋友拍拖6年, 打算兩年內有結婚買樓, 我地兩個加埋月入HKD65k, 暫時有HKD1.7m liquidity cash，用作首期及裝修費。

我地亦問左銀行做初步審批按揭，可以做到9成按揭同買700萬左右的樓。因為我地係初階投資者，prefer 大型屋苑/ 藍籌屋苑，有升值潛力，實用面積大概300-400呎，比較鐘意海景。

由今年4月份開始睇樓, 包括大型藍籌屋苑 e.g. 黃埔花園, 將軍澳新都城, 南豐新村, 德福花園, 淘大花園等等。

睇過咁多屋苑, 我地prefer大角咀港灣豪庭, 港島南區置富花園同將軍澳中心. 三區都算近返工地點(中環/ 鰂魚涌), 同返娘家(西環)都比較分便. 想問龔成老師會點選擇?

以下係本人少少分析, 請老師作出指點:-
大角咀港灣豪庭優點:-

- 樓齡17年, 唔算舊
- 位於大角咀, 鄰近栢景灣, 維港灣, 帝柏海灣等豪宅
- 屋苑樓下有個小型商場
- 部份單位有海景
- 鄰近返工and 娘家 (20-40 分鐘車程)

大角咀港灣豪庭缺點:-
- 位於港鐵奧運站同南昌站中間, 交通不算太方便, 由港鐵站往返港灣豪庭需時行10-15分鐘, 中途全程露天步行
- 鄰近九龍殯儀館
- 要買生活必需品要過旺角/ 奧運
置富花園優點:-
- 景觀開揚，部分會有海景
- 比起市區呎價平
- 未來會受惠於南港島線北段(華富站)
- 鄰近返工and 娘家 (30-45 分鐘車程)
- 校網唔錯

置富花園缺點:-
- 大廈外牆正進行維修, 要額外分期灘還到2022年第一季，入住初期要忍受環境差
- 樓齡41年
- 交通往返其他地區遠, 冇會所
- 華富邨將會重建，會影響將來的海景同重建時會影響將來的居住環境

將軍澳中心優點:-
-樓齡較新 (17年樓齡)
-有會所
-交通方便, 鄰近將軍澳站
-鄰近大型商埸 (i.e. PopCorn), 容易買生活用品

將軍澳中心缺點:-
-人口稠密度高
-返工放工等繁忙時間港鐵超多人
-如果港鐵有任何事故, 出市區比較困難
- 離娘家(西環) 比較遠 (45-60分鐘車程)
- 校網一般
仲有兩條問題想請教老師

Q1: 我地prefer買有升值潛力, 會考慮受惠於南港島綫（西段）的樓盤, 知道老師推介田灣, 但係該區單幢樓比較多同樓齡比較舊, 請問老師有冇推介既樓盤? 如果冇, 置富花園會唔會都係一個唔錯的選擇?

Q2: 根據我地現時睇樓既經驗, 比較好的樓盤通常一個月內賣出, 所以議價空間比較少,賣出價一般都比銀行估價高少少。我地應該等市況靜D再壓價, 但係又擔心等等下樓價又升, 定係貼近銀行估價都可以買樓?

龔成老師：

1）就上述的3個屋苑，置富花園及港灣豪庭較好，始終對你的方便程度較高。

兩者中，港灣豪庭的升值潛力會高D，至於置富花園，由於就算將來起南港島線西段，相信都唔會經過置富，只會行下面的華富。

但如果只考慮方便你自己的程度，可能置富又會好少少。

中短期維係問題唔好太在意，最重要是睇長期。

另外，你可以睇下黃竹坑的金寶花園，雖然不是大型屋苑，但近黃竹坑地鐵站，加上將來隔離會有商場，生活配套會慢慢齊。不過呎價都唔算平，但你可以睇睇。

2）如果你可以等得，最好是耐心少少，但你要睇多D盤，要有心理準備有D盤會無左，但有耐性是較易買到好野的。

但現時樓市唔跌，的確較難買到平野，所以只要你認為合理價，有得平少少，都可以考慮。

------------------------------------------------

Q17313：

老師你好，本人買股票已有十多年，不過都係蝕嘅多。
目前的組合也不樂觀，所以想請教你怎樣處理現時的股票。

年初時好不容易才等到2899紫金礦業返到家鄉，放出後以83蚊買入1000股823領展，目前仍持有中，該長線持有嗎？

另外還有以下股票：

9988阿里巴巴 100股，買入價176
3323中國建材 10000股，買入價12.7
1618中國中治 10000股，買入價4.97
1333中國忠旺 25200股，買入價5.85

想問下以上除9988外、其他點處理好、該止蝕轉換成其他股票嗎？謝謝！

龔成老師：

阿里（9988）可以長線。至於領展（0823），有質素的，可以守。

至於另外的3隻，質素與增長力都不算好高，雖然不是劣質，但持有的價值不是好高類別。

中國建材（3323）如貨不多，可守，但預佢增長力唔強。中國中冶（1618）長遠應該賣出。中國忠旺（1333）長遠都應該賣出，但由於不是零質素，因此唔一定要立刻賣，可以等上翻D先。

長遠來說，你應該轉換成更優質、更高增長力的組合。

你有三大問題。第一，選股能力不強，你要考慮企業在行業裡的優勢，以及長遠行業的發展力，唔好只著重當刻的情況。

第二，太過著重買入價，其實你應該著重資產質素，要建立平衡與優質的組合。

第三，無用平均的買入方法，除非你掌握到企業估值，否則，以平均入市的模式進行，這樣能有效減少買入價的風險。

------------------------------------------------

Q17314：

老師，我從上年八月開始買入領展的月供股票，現在佢既市盈率係負數，咁我應唔應該繼續供落去呢？謝謝老師

龔成老師：

我地投資股票，就是買入企業，唔好太著重中短期因素，要睇長遠的企業質素與發展。

領展（0823）有質素的，中短期香港地產市道當然較一般，但長遠仍是正面，增長力或者不及過往年代，但要平穩增長及收息是無問題。

佢市盈率出現負數只是因為物業重估因素，這只是一些會計上的數字，對業務無影響的。

另外，月供股票一定要長線進行，唔好中間轉來轉去。

------------------------------------------------

Q17315：

老師，本人47歲、3年前買咗樓平租比自己人、租同供等同！

我買咗收息股3、6、405、435、778、1038、2388、6823、大約共160萬、現金淨40萬！

月可儲$10000
請問老師覺得我仲有咩安排會比較好呢！
謝謝老師提點

龔成老師：

你持有的，都是有質素的股票，雖然增長力不算強，但以你的年齡情況，其實無問題，配置基本適合。

你現時有物業，同時股票都佔財富一部分，基本上能做到股樓平衡，配置不差。

現金$40萬，以現時的大市平貴情況，都算可以，但暫時唔好再動用這$40萬，除非出現大型跌市，否則作備用及等機會之用。

至於月供可儲$1萬，你可以投資平穩增長股，分注或月供都得，例如盈富（2800），如果你可以承受到風險，就可以將其中$3000供一些潛力股，因為你的組合現時並無潛力股。

------------------------------------------------

Q17316：

成老師！1876 怎樣看 ?

龔成老師：

百威亞太（1876）以質素來說，的確不差，佢係百威亞太控股為AB InBev Group的一部分，係亞太地區最大的啤酒公司。

佢從事生產、進口、推廣、經銷及出售超過50個自家擁有或獲許可使用的啤酒品牌組合，包括百威、時代及科羅娜，以及旗下多國品牌和當地品牌，如福佳、凱獅及哈爾濱。

佢係多個國家都有相當的市佔率，同時增長力強，就近年的數據睇，盈利每年都有雙位數增長，業務、品牌、質素絕對有。

過往股往少少貴，現時合理翻D，你預現時是合理區中上部，分注投資，長線持有都可以。

------------------------------------------------

Q17317：

龔成老師你好，我一直有留意龔成信箱，希望可以為自己制訂一套良好的投資組合，包括美股、港股、RIET、債券等，但過去5年覺得投資上走彎路，錯誤的港股投資及炒股導致數十萬損失。

因此在此希望請教一下龔成老師，以制訂一個健康的投資組合並盡快達到財務自由。以下為本人的基本資料：

今年29歲，從事穩定行業，月入約5萬，每月可儲2-3萬。另每年公司Bonus約20萬。主要資產如下:

1. 一香港物業出租，價格1000萬，做400萬按揭，每月供款約15000，租金收入24200,將來用作自住用途:

2. 香港股票50萬:包括中國石油化工股份(13%)、中國鐵塔(5%)、建設銀行(37%)、石四藥集團(8%)、藥明生物(15%)、長實集團(9%)、中銀香港(10%)、京東集團(2%)

*本人認為太集中在金融股、想調整組合加大中國鐵塔投資組合份額降低平均成本(原買入價2.13)及另外再買入吉利等增長股;

3. 美股約HKD15萬: 包括Beyond Meat、Zoom、波音等;

4. MPF17萬，另外每月額外自願供款1000

5. 現金約30萬

目標希望在40歲前每月產生4萬元現金流，現在正考慮在投資組合中加入星加坡及日本RIET，以及未來到英國置業、請問可以做到嗎?

龔成老師：

首先，你有「建立財富組合，做好配置」這是正確方向，持有優質資產長線是大前題。

不過，你這年齡，可以進取翻少少。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你應該在40歲前，著重增值，到40歲，轉為現金流類別。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，建行（0939）、中石化（0386），以你的年齡來說，並不適合。

你可以加大少少吉利（0175）及中國鐵塔（0778），長線持有。

至於外國的房託，只要有質素的都可考慮，但要留意不少房託都以收息為主，增長力不強，而你這刻應加強增長力。

------------------------------------------------

Q17318：

老師你好，我同先生每個月可以儲10000，有樓，年紀32歲，流動資金50000，請教我地怎樣投資可以做到財務自由

龔成老師：

你地的現金唔算多，建議$5萬唔好動用，除非大市有大型下跌。

至於你每月$1萬，暫時可以將一半投資，你可以月供股票或自行分注投資。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、平安（2318）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q17319：

龔sir,感謝你。
又一年過去，眨下眼我26歲了。我已完成了第一個一百萬。

感激遇到你令我對財務策劃上有更多既認識令我對自己有要求有目標，雖然還未稱得上熟悉股票市場，但我仍然會保持學習的心 堅持每月供股為我的未來努力。

下年目標希望能購入一層800萬以下的自住單位。
希望我會成功

龔成老師：

加油！你已行在正確的路。

理財是長期戰，你要保持進行，方向已正確，保持努力就得。提高自己的投資知識，以及不斷儲錢。希望你能成功置業。

由於你打算在1年裡買樓，因此宜持有較多現金。

------------------------------------------------

Q17320：

老師，目前我23歲
月供2800中。

想問月供美股可考慮嗎？
有邊隻可以選擇？

我上網留意 美股可一股買賣 只需幾百元，對嗎？

龔成老師：

唔好因為入場費低而強行投資某一股。

最重要是這股有質素及長遠發展正面。

美股你可投資，只要當中是優質股，以及你熟識就得，你這年齡，可以投資增長力較高的股票，盈富（2800）可保持月供，至於美股，你可留意一下科技類的，例如GOOGLE等。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16001-Q16020）

Q16001：

龔成老師你好 我想有幾隻股票請教你
1029 ，1733，2002，2314同埋6886

呢幾隻股票高位買入，依家跌左好多 請問我需要止蝕嗎？

謝謝你
我好徬徨

龔成老師︰

你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

鐵貨（1029）年年虧損，我當然有保留，如你有留意佢的股價，長期下跌的，投資這類股要較小心。另外有樣野令人擔心的，就是核數師報告，曾經出現「不表示意見」，這反映核數師對盤數「有疑問」，沽出會較好。

易大宗（1733），如果有睇佢的企業年報，就會見到核數師，多年來都有「保留意見」或「不表示意見」，這已經賬目「有古怪」。這類股基本上無投資價值，賣出較好。

陽光紙業（2002），佢在2014年的核數師報告，有少少問題出左，雖然之後無事，但賣出這股較好。

理文造紙（2314）本質不算差，但又唔算係好好。業務有下跌情況，如果持貨不過多，都可以守住先，不過中短期會較弱。

HTSC華泰證券（6886）主要從事證券及期貨經紀、證券自營買賣、證券承銷及保薦、證券投資諮詢、資產管理、融資融券、代銷金融產品及其他業務。

此股質素算是中等，業務雖然有，但賺錢能力不強，唔好預佢有太大的增長力，如投資不多，都可以持有的。

除了調整你個組合外，我建議你多看投資相關書本、年報，新聞和課程，去避免再買入一些質素有問題的股票。

------------------------------------------------

Q16002：

老師，我有[email protected]，應否再等下去？

老師，另外我吾小心買左[email protected]....應該繼續等下吧？

請老師指導

老師。我看到你fb說：十月會開班。
我想報名。

龔成老師：

長實（1113）有質素，有得守，但你要預中短期會好波動，要耐心，只要你持貨不過多就無問題。

至於融創中國（1918），風險就較高，因為這企業的負債高，所以如持有較多，就要小心。

課程方面，我所講的10月，是進階班。
https://www.80shing.com/course2.php

至於基礎班，則在7月有。
https://www.80shing.com/course.php

------------------------------------------------

Q16003：

龔成，你好。我一直是你的讀者，很感謝你一直以來為大家解答問題。

最近股市暴跌，我數年前開始經銀行投資一隻高收益債券基金，每個月有息派。我一直以為基金比股票穩陣能夠長線投資，但在這兩星期基金價格直線下跌，本金已蝕了30%！！

我感到十分徬徨，是否應該止蝕賣出？還是繼續等待？感謝您

龔成老師︰

債券，這其實只是「產品」，物業、優質股是「資產」，所以從財富本質上，我地應較集中持有「資產」，才對我地最有利（你可以睇睇《財務自由行》一書，我從財富本質上，講述了當中原理）。

至於債券基金，坊間分好多種，你要小心睇，因為有d風險低，無乜問題。但有d則有潛在的風險，絕對不是保本的產品，有機會出現了「賺息蝕價」的情況。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。

第三，不少銀行都會提供借貸，以槓杆去放大回報，以平息借貸去賺取息差。低息環境時間題不大，但進入加息週期，不止借貸成本增加，同時債券價格往往在加息期下跌，雙從打擊下，投資價值成疑。當然，若然加息步伐不快，息差利潤就可觀。

我不是說債券基金有問題，只是說明當中的風險，因為市面上的基券基金好多，你要仔細分析。

以你情況，你可以了解翻你基金到底係投資在什麼級別債券，是否"投資級別"，例如是「A」以上級別的。? 如果係一些較低級別，例如「垃圾級債券」，在現時全球不景氣下，這類債券違約風險會增加，對你風險會好高，你可以考慮將部份轉回一些優質股會較穏當。

------------------------------------------------

Q16004：

龔Sir你好！我本新冇咩投資經驗，想問下：

本人32歲，月入約80k，每月儲到45k左右，現時持有約800k債券基金，另外約2m主要都係擺定期，兩者都係賺吓利息，間中都有買吓股票，不過輸多贏少。幾年內未有置業計劃。

最近睇咗你個page，想試下月供股票，如果每月供20k會否比例太高？ 40%盈富基金、20%港交所、20%金沙、20%匯豐呢個組合可以嗎？明白月供股票係長線投資，同埋可平均買入價，咁需要設定一個預期回報嗎？幾時應考慮賣出？定係因為既然係長線投資所以根本唔需要咁諗？

最近有d股票都喺你所講嘅平宜區，手頭上有流動資金你會建議點部署？新手可以將幾多比例放喺股票？

另外龔Sir你嘅投資班將來會考慮搞online course嗎？可能有好多唔喺香港嘅朋友都想學下野

唔該哂！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀計，應以增值為主。匯豐（0005）只是收息股，無甚增長力，唔適合你。另外，「債券」其實只是「產品」，物業、優質股是「資產」，所以從財富本質上，我地應較集中持有「資產」。而定期這類現金流工具，增長力弱都唔係咁適合你。

作為投資新手，我建議你用月供去做投資，咁樣會大大減少你買貴貨風險。

如果你每月儲到的45K無其他特定用途，你可以將這45K的一半去做月供，其餘先儲起，用一邊月供一邊儲蓄的策略。月供方面，可用你這組合，而匯豐就用一隻潛力股代替，如比亞迪（1211），中生（1177）或福壽園（1448）。

至於餘下的現金，就等機會，當大市出現較大程度的下跌，就可以動用現金去投資，在平宜價加大力度掃貨，然後長線投資。

另外，我地唔會話SET一個預期回報，因為優質股只要長線質素不變，我地基本上長期持有就可以。除非買入後發現自己犯錯，這股不是優質股，又或這股核心的質素轉差，變成非優質股，這時無論賺蝕都會沽貨。

又或是係市況過熱，市場處牛市三期的狂熱狀態，例如2015年的大時代狂熱時，我便會採用多沽少買的策略，但當時的市況未到極度狂熱，所以我亦只是沽出了一部分的貨。此外，股價要是嚴重高估，例如市況狂熱，又或自身的原因令股價爆升，都有可能沽出。

至於有關網上課程，我而家同出版社合作，搞緊一個網上課程，內容是理財與資產配置。股票班就唔會搞網上課程。應該3-6個月左右，網上課程會推出。

------------------------------------------------

Q16005：

老師你好，我目前持有600股平安好醫生，成本價67.15，應該再溝定投資其他股票

另外759近期都入左3萬股，本身留意佢係0.65一段時間，0.59入第

一注，0.54再入第二注，0.47入第三注，而家成本價0.53，想知呢只價近期有冇望上反

另外朋友推薦買西方石油，而家跌到10元，真係適宜重注等佢重上40？

龔成老師︰

是否再追入，就要睇你本身預定投入這些股票的資金，用盡未。如果已經用盡，就算現價再吸引，都唔好再加注。

平安好醫生（1833）係潛力股，但就屬於較高風險的類別。佢地的上市年期不算長，加上上市時是市場熱炒期，當時估值過高，對這類股有少少保留。

業務上，佢地的確是高增長，同時業務有發展潛力，但睇翻佢地的財務數據，平安好醫生仍處燒銀紙狀態。所以，此股可持有，唔建議你太大注。但長遠是正面的。

CEC國際控股（0759）原本開零食生意不錯，但後來又搞其他野，反映增長到了頂點，而強行投資其他類別，出現了拉低回報率的情況。過去幾年生意都係出現輕微虧損，這類股最多小注持有，長遠轉至其他優質股會較好。

西方石油公司 （NYSE:OXY）是國際石油和天然氣勘探和生產公司，這類商品企業，由於產品（石油）沒有差異性，只能賺取合理的利潤，不算是最高質的類別，投資價值算是中等。

佢會唔會上番$40，無人知。但這類定價被動的企業，不宜持有太多。

------------------------------------------------

Q16006：

龔sir, 見到長建價位都好吸引，想另外加一注，請問長建質素仍然優質嗎？

現價算是非常吸引嗎？

龔成老師︰

長建（1038）是香港具規模及多元化的上市基建公司，並在國際基建業穩據重要地位。

雖然近期佢跟隨大市回落不少，但這股質素依然存在。但睇翻現時歐洲情況，相信會令佢中短期表現較弱。要預2年左右佢先至會開始回勇，此股仍值得長線持有。

是否加注，要睇翻你有本身分配在長建的資金有多少。如果總共有3-4注，現只入了一注，現在可以。但只係2注，就最好等回調多10%至15%到平宜區再買。

------------------------------------------------

Q16007：

你好！ 我想問一下1876百威亞太同埋 2588 中銀航空租賃既前景分析，便宜同埋合理價？Thanks

龔成老師︰

百威亞大（1876）主要於亞太地區從事啤酒釀造及經銷，集團擁有知名啤酒品牌包括百威、時代、福佳等等，未來會主力在亞洲市場發展。此股有品牌和規模，有長遠投資價值。

但你有留意我fb，都會見我經常講唔會太推薦人買IPO。因為業務上，集團就算有吸引力，但新股半新股真實面要慢慢先見到，加上佢估值困難。

所以，此刻只建議持有小注，同時你要明白當中的風險。要去到平宜，最少要回多30%。

中銀航空租賃（2588）可說是有風險有質素的股票，業務本質的確不錯，生意與盈利都保持理想增長，加上賺錢能力不低，同時企業有獨特性，因此企業正面。

但要留意，佢的業務原理，是利用借貸投資飛機然後放租，由於收到的租金比借貸的利息成本高，因此賺取了中間可觀的利潤。

但如果日後加息，對佢盈利有影響，同時，佢現時的負債不少，這都是風險的來源。整體來說，這股有投資價值，是潛力股類別。

此股只宜小注，要到平宜區要回調多15%至20%。

------------------------------------------------

Q16008：

哈囉 老師
本人30歲

雖然一路都有儲錢習慣
因為洗錢習慣都大
所以只有40萬左右

想拿資金中約15萬用來投資
現月入25k
希望五年內資產可以增長有二百萬

暫時購入
2800 x 1 手
0014 x 400股
0005 x 1手
有三隻5G股在手

黎緊會月供 2800 $5000
0014 $3000
會揾多一隻潛力股供$2000

請問需要再進取嘛？

龔成老師：

如果你想5年有$200萬，以現時的儲蓄力度，及投資方向，仍未得，要有改善的地方。

每月月供方面，盈富（2800）$5000、希慎（0014）$3000無問題，你可以考慮比亞迪（1211）或中生製藥（1177）$2000。保持進行。

除了月供股票外，你最好每月儲到現金，例如每月要額外儲到$5000-$8000，列入準備投資部分，當大跌市時就會動用。

至於現時持股，匯豐（0005）只是收息股，增長力不強，未必適合你。

現時你的$40萬，是關鍵資金，可以分注買入優質股，同時留現金，慢慢收貨。大市波動，你要好好把握這個機會，同時留現金若出現更大跌市就可以把握得到。

------------------------------------------------

Q16009：

老師你好！多謝你既分享，我想問下你既意見。我依家有30萬現金，想將20萬買收息股：

303 vetech (8萬)
6823 香港電訊(8萬)
11 恒生銀行(4萬)

另外10萬想買增長股：
9988 阿里巴巴 (5萬)
2800盈富(5萬)

選股同分配合適嗎？
謝謝

龔成老師：

這3股都是不差的收息股，可以投資，但如果你想建立收息股組合，建議你同時持有5隻，每隻$4萬，這樣會減少集中風險。例如加上港燈（2638）、置富（0778）。

至於在增長方面，盈富（2800）無問題。阿里（9988）是有質素的股票，潛力股，但潛力股佔比宜略減。

------------------------------------------------

Q16010：

你好, 龔成老師, 本人年齡28歲月入29K, 每個月儲蓄20K

早前股資不利, 購入首控集團(1269) 136000股, 現蝕60% ; 歌禮製藥(1672) 2000股, 現蝕55% ; 阿里巴巴(9988) 1手,價位170; 盈富(2800)2手, 價位22.65

請問我應該繼續持有首控集團和歌禮製藥嗎?未來應該如何投資?謝謝

龔成老師：

我地繼續持有一隻股票與否，關鍵位不是買入價，是企業質素、前景，你要明白這點，要理性處理手上的貨。

盈富（2800）、阿里巴巴（9988）有質素，可以繼續持有。

歌禮製藥（1672）是未有盈利的股票，這類股好難分析，佢的藥成功與否，將影響佢的價值，而最大的問題，就是我地難以分析佢能否能功。

並不是話這股零質素，而是風險的問題，因此，這股只能小注，如你持貨多，要減部分。

首控集團（1269），每年都出現虧損，見唔到有投資價值，賣出較好的做法。只是現在賣，還是反彈後賣。建議你可以分注賣出。

------------------------------------------------

Q16011：

老師，想問下點解咁多隻藥股你會比較推薦1177？

龔成老師：

因為質素最高，同時佢現時的藥賺錢能力強，同時不斷投入資金研究新藥，模式最好，風險也是較平衡。

我地不是賭某一隻藥成功與否，而是要賺整間企業的賺錢模式，是有平衡風險，以及有長遠發展。

------------------------------------------------

Q16012：

你好老師，兩位新手想請你指引一下我地的投資方向。我地兩個26歲剛達出社會四年有穩定收入及工作

現有想上車置業念頭，因現在沒有急切的住屋需要所以想先放租後自住，宜家係咪一個上車的時機呢?定係投資入股票市場呢?(但我地從未投資過股票)

二人每月收入約五萬
持有現金約40萬

定期存款約 20萬
如果上車置業屋人會借出約40萬

龔成老師：

如果你地長遠都有置業的目標，可以把握這1、2年。

香港經濟會轉弱，樓價有機會下跌，但這只是中短期，因為樓市長期仍是供不應求，只要經濟好轉，就會向上。

所以，你可以把握這1、2年機會，現時持有現金，不要投資股票，盡你地最大力度儲蓄，增加首期資金，到見到樓價下跌就開始睇樓。可以大力還價，只要遇到一個心急業主，就可以買到平貨。

------------------------------------------------

Q16013：

龔sir 你好，本人27歲，入月15000，現時現金持2萬，另外手持27@2000 57入

1928@400 35入
9988@100 189入
5@400 60入

想問下這些是否繼續持有？

黎緊想做月供股票，每月可以月供6000，儲現金3000，想問下如供2800，1928，2388 ，呢個組合可以嗎？謝謝你

龔成老師：

其實你持有的股票不是無質素，只是部分的買入價在較貴水平，相信要加強學習企業估值的能力，掌握價值的概念。

由於不是無質素，可以持有。

至於月供股票，選股無問題，你可以供盈富（2800）$3000、金沙（1928）$1500、中銀（2388）$1500。同時儲$3000現金。

至於現時的$20000，就持有現金，不要心急用。

------------------------------------------------

Q16014：

龔成老師你好，請瞭解一下268你有什麼看法。

有聽過一種說法，優秀企業是可以穿越牛熊，我看268在2018和2019的跌浪中都屬於非常頑強。

龔成老師：

金蝶國際（0268）本質的確不錯，但一直都處貴的水平，要留意，這股十分波動，要小心。

佢業務前景正面，亦因為咁，市場覺得佢貴得有道理，就算去到$8，仍有少少貴。不過，要大跌不是易事，但我地作為投資者，好多時都會先考慮風險，因此，就算在$8水平，投資也只能小注。

------------------------------------------------

Q16015：

想請教老師，其實如果我每月做一些short put藍籌股，是否會比月供股票更為化算？因為我可以先收取期權金，成本應該會較低？

即使如果跌穿了，我其實也收了期權金再接貨，有賺時間值。 反之，如果藍籌爆升咁我就真係只賺期權金

盼望龔sir有時間回覆

龔成老師：

認沽期權，好多人以為有著數，其實未必是很好的工具，因為回報有限，下跌時就要強行買入。「回報有限，風險無限」，所以你見我從來都唔會推。

------------------------------------------------

Q16016：

老師你好，兩個月前偶然睇左你個page，於是去買了幾本你的著作，有很大的啟發。我十幾年前已開始少注投資，六年前賣出所有股票就停了下來，我發現升升跌跌賣出買入打個和。

一直都有聽聞價值投資的好處，但總是沒有去問怎樣做，沒有實踐。現在重新理解投資，有以下問題請教。

37歲，收入$60000（公務員）每月可儲$10000
太太自由工作者，最近收入不穩。若上軌道才加大月供。

現金$15萬
這兩個月剛買入股票
9988 $209 （200股）
215 $1.5 （6000 股）
2800 $23.55 （500 股）
1448 $6.28 （1000 股）
1928 $28 （400股）
2378 $85.5 （500股）

現金將分注買入優質股。

我希望增值但又知道組合平衡的重要性，所以有懷疑應否都加入REIT, 如823。 另外對831也有認識及興趣，但此刻PB又似乎過高。

起步較遲，過往開資較大，又未買樓，現希望爭取資產較高增長。還未開始做月供，打算用$5000。

2800 （供2000）
1211 （供1000）
1177 （供1000）
27 （供1000）

請問老師在策略上有什麼建議？

龔成老師：

你方向正確，你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

而你上述選股，大至都是這類，而且基本上都是有質素的，持有無問題。

如果你想增值，可以選有增長力的房託，例如領展（0823）。

利亞零售（0831）有質素，但增長力不強，而我地分析這類零售相關企業時，一般都唔會太著重PB的。

至於你打算的月供組合，可以。基本上已經可以進行。

至於你現時的$15萬，是其中一個令你財富增長的關鍵位，你要好好運用，股市波動，間中去到平宜區，你要小心運用資金，買優質股，同時唔好用盡現金。

------------------------------------------------

Q16017：

龔Sir你好，我係2017年至今投資如下：

0003@$16.4，5500股
00241@$15，4000股
751@$2.98，1萬股
1337@$4.06，2萬股
1928@$34.70，1600股
2378@$105，500股
2600@$4.76，4萬股

共蝕咗22萬幾，請問阿sir,我應該點做才可以係5-7年回本，我月薪28000，每個月可儲2萬，係繼續買落去定係儲錢好？謝謝阿sir百忙之中抽空回覆先

咁多年都輸股票，搞到我日日都訓唔著，真心想龔Sir幫忙做個分析，教吓我未來定樣可以回本。無限感激

龔成老師：

首先你要明白一點，買入價只是一個心理因素。我地持有一隻股票與否，關鍵位是企業質素、前景，唔好被買入價影響。

你要關心的，是企業的長期發展，而不是中短期股價。

當你持有有質素的股票，可持有，甚至加注，如果無質素，就要賣出，將資金轉其他，才可以更快回本。

阿里健康（0241）風險類股，有危有機，小注好了。

創維集團（0751）業務出現持續下跌，質素有下跌情況，要賣出部分，長遠而賣出全部。

雷蛇（1337）企業一直都處虧損狀態，只是純炒前景，風險股。小注好了，持有太多要賣出部分。

金沙（1928）、保誠（2378）、煤氣（0003）有質素。可持有。

中國鋁業（2600）質素不高，加上是商品企業，不應持有得太多，要賣出部分。

如果你可以每月儲$20000，建議你保持每供$10000盈富（2800），長期進行，5年相信能追回過去的損失。

至於餘下的$10000，你先儲現金，到你能掌握企業質素分析，企業估值計算，先動用。

------------------------------------------------

Q16018：

老師你好，先生同我大概40歲，有一個小朋友。我家可月儲$4萬，自住樓已經供完。現金50萬。

問：如果再按層樓去買多間屋，老師有咩高見？謝謝。

龔成老師：

借貸投資，是創富方法，但都有利有弊，你一定要明白這點。

首先要考慮你本身的風險情況，你負債會因此而增加。當然，負債不一定有問題，但你要考慮自己的年齡、情況、風險承受能力，去決定是否增加這負債。

以40歲，已供完物業的情況來說，風險度中等，但最後都要睇你地自己。

現時香港的樓市，未算平，因此這刻的值博率只是中等，如果去到跌1、2成，才算有較大的值博率。因為你地現時要增加了風險才投資，所以要求的回報率都會增加，以抵償你額外承受的風險。

------------------------------------------------

Q16019：

老師你好，有事想請教，我和先生都28歲，月入60000，各人都擁有一套物業。每月扣除供樓連開支，剩10000左右。

現時有30多萬匯控（平均價格75左右），幾萬中銀（平均價格3.49）及幾萬領展（平均價格67）。

手上現金只剩10萬左右，想請教接下來應該點？謝謝老師。

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）、中行（3988）以你的年齡來說，並不適合。

但現價賣出有好值得，所以，你暫時可持有，但之後上翻後宜將部分或全部，轉到其他股票。

你之前可以考慮一些較有增長力的股：盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

至於現時的$10萬，由於在比例上，並不是很多，所以建議只動用$3萬，餘下留現金，到再大型的跌市出現時，才考慮動用。

同時，你可以考慮做月供股票，每月$8000，上述的都可以考慮。

------------------------------------------------

Q16020：

龔成老師你好:近期股市跌 ，如果想利用股票令資產增值(甚至創造現Passive Income).， 公共股是否一個好選擇？( 港燈/港鐵)

或是銀行股比較好( 恆生/匯豐?) 現在儲蓄有30萬， 每月也可以儲到兩萬， 暫時目標係儲到100萬做首期， 希望得到意見。 感謝回覆我

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

如果你這刻的目標，是要「儲首期」，咁就應該以「增值」為主。

你可以考慮平穩增長股：盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。