【龔成問答信箱】（Q14361-Q14380）

Q14361：

老師，我好懶未開股票戶口，我二十九歲，月入$23K，冇儲蓄習慣(我最想改善既地方, 我亦知你一定會鼓勵我月供股)。

近日好想搬出黎自己住，有諗過租樓或者買樓，屋企人願意幫手比首期再由我自己供，老師覺得我應該先供樓再諗，投資定先投資再諗供樓抑或應該同步進行?

大前提係我唔肯定我供完樓仲有冇錢淨⋯當幫我分析下傾下計得架喇，唔該老師

龔成老師：

物業、車位、優質股，都是典型的資產項，因此就算你買樓，其實都是一種投資，這都是累積財富的一種。

最好的方法，當然是月供股票，同時你可以買到樓，平衡財富組合是最好的。

不過，如果你家人支持，而你過往又儲唔到錢，供樓都是一個逼自己儲錢的方法。雖然供樓後，有機會你會無資金月供，但如果你可以買細少少，令你每月供樓同時，可以月供到股票，這就是最好的方法。

如果香港經法轉弱，樓市會受壓（但由於長期供應仍不足，唔好預期會跌好多），只要跌少少，都已經是入市的時機。

------------------------------------------------

Q14362：

龔SIR 你好
我月供左長建都兩年, 而家繼續月供對平均價都不大影響,

同目前呢隻都佔我投資組合成20%

諗緊應該繼續進行月供定轉另一隻月供好, 如果轉另一隻月供,目標係中長線會有較好增長潛力可以考慮邊D 股票呢? 唔該哂

龔成老師：

月供股票，最好是長線進行，例如5年，如果你以長期去睇，再繼續入，都會對買入價、持貨總數有影響的。

不過，這股佔你組合2成，我建議以這個為上限，不要過多，始終同一股佔組合過多都會有風險。所以，我會建議你繼續供，但減少供款金額。

至於資金，你可以考慮供盈富（2800）或恆基（0012）。

------------------------------------------------

Q14363：

你好，我45歲的，上個月剛失業，因為一直找不到工作，所以只好做住part time. 現part time收入一萬多，每月生话費也是一萬多。

之前一直没有投資，現在有点徬徨，銀行有存款大概一百萬，HSBC的經理上星期游說我轉了19萬分三次（即大概50萬投資），他说最少有3.9里的利息。

另外，因為我現收入不穩，把之前A|A的一份投資取了$20萬出來想自己投資。我目標是想对抗通漲和多一点避動收入。可以指点一下嗎?

龔成老師：

你這刻的狀況，反而要穩住財富，不能太多進取貪回報，而無視了風險。記住，我地投資一定是「先想風險，後想回報」。

首先，你要確定翻，HSBC你所投資的，是否穩健的項目，風險不能高（少少風險可以），以保確你的投資穩健。

另外，你自己投資的部分，都要以穩健為主，第一，你現時無收入，原有財富就很重要，第二，你過往應該不太多投資經驗，因此不能太進取。

你可以投資一些穩健類股票，平穩增長型及收息型，都是適合你的，但不能用盡現金，只能投資一部分。第一，這刻股市只是合理，第二，你要現金作防守。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、港交所（0388）。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

------------------------------------------------

Q14364：

你好! 我是二十出頭的股票新手，近來在Facebook 留意到你! 回顧了不少你的 Post , 00435 及 00003 常被推薦。

但近來煤氣收入並不理想，現在還值得投資嗎?如果要買入是否等他除淨後才買? 另外，00435因社會運動，租金收入減少，等到相應在第一季業績時股價下跌才買呢?

另外，想買你的教學書，但好像太遲了，股票市場也變動不少。謝謝你

龔成老師：

煤氣（0003）香港業務，發展力不強，但重點是中國，睇翻佢中國業務，近一年的增長力有所減慢，但長遠來說，仍是有發展的。

佢係中國發展好多項目，收成期會慢慢出現，現時每年都投入大量的資本開支，已有好多公共事業，而部分資源更可以共用，這是佢其中一個優勢。

我地一定要以長遠為投資視點。現價在合理區中上部，分注投資可以。

至於陽光（0435），是很好的房託，中短期會因香港情況而影響租分收入，但所有野，都要以長線角度分析。

如果只是中短期問題，基本上不用理會。這股有質素，現價已合理，你不用等到第一季業績，因為市場一早已反映了相關的因素。

你可以先睇《股票勝經》。

------------------------------------------------

Q14365：

老師你好，我最近都開始咗月供股票，希望達到財富增值。我月入33k, 有以下組合

3@3000
66@3000
823@3000
1299@3000
2800@6000

持有9988 200股@$200

1）我35歲，呢個組合用以財富增值可以嗎？
2）我睇你有推介1928，有啲心動，想供3000，我呢個組合加1928合適嗎？
3）9988業務唔錯，有大發展空間，我應該增持9988嗎？
4）老師點睇3690？
5）唔好意思，仲有3333，呢隻有潛質嗎？

謝謝老師

龔成老師：

1）上述都是有質素的股票，同時適合你的年齡，都是平穩增長類，可以長期月供，但這刻不能用盡現金，你本身要留有一定的現金在手。

2）如果你資金足夠，即是仍有現金剩，不會消耗你原有的現金，可以加上金沙（1928）。

3）阿里（9988）是有質素的股票，同時有發展突間，前景正面，這股有長線投資的價值。不過，佢現價不算平，所以，你持有原有的貨就得，長線。

4）美團點評（3690）佢業務巨大，同時增長快。不過，佢仍是有危有機的股票。業務較新興，過往不斷燒銀紙，近期算是好翻d，但未有似樣的盈利，當然，可能有前景的。這類企業不是不可投資，在要控制注碼，不能大注。

因為無人知真正的發展情況，因此市場對其估值都是「估估下」，這一定會帶來股價上的波動，如小注，都可以考慮的。

5）中國恒大（3333）不能說無質素，但可以話存有風險。

佢本身都有一定的業務價值，無論品牌、物業質素、銷售網絡、規模等，在近年內地樓市唱旺的情況下，佢的盈利理想，但如果樓市逆轉，對佢會有影響。

而較大的問題，就是佢的負債，負債比率高得可怕，好景是當然可以好賺錢，但市道逆轉，又或遇到某些危機時，就會有不利情況。

因此，這股不是不能投資，只是背後存在風險，投資時要控制注碼。

------------------------------------------------

Q14366：

老師，你有研究494嗎？

龔成老師：

利豐（0494）的投資價值正不斷減少。

過往，佢都是一隻優質股，但10年前大環境開始改變，佢的質素亦開始減少。當整個大環境、整個行業都對佢長期不利，質素改變，這股的投資價值已明顯比過往減少。

佢過往以「超級中間人」自居，但現時的全球化及網絡發展，正正是跳過了中間人。

這股並不是劣質股，是有心經營的企業，但如果大環境不利，佢都唔會有運行，而我地投資者都唔會與大環境對著幹。

雖然佢股價不斷下跌，但企業價值正不斷減，因此，不宜投資。

------------------------------------------------

Q14367：

龔sir你好！我係你嘅讀者，有關的士牌有問題想問：

1.你書中寫市區的士 24000 x 12/600萬=4.8%回報。但如果要做85%按揭，利息有百幾二百萬。再打加每年雜費四萬左右。

會唔會以（24000-3333雜費）x 12/800萬=3.1%回報先係準確？？

2.小弟有物業渣打做30年按揭以供七年，現可加按120萬，分三十年還，總息還四十幾萬，如果加按出來買的士牌你有高見嗎？

龔成老師︰

1） 我書中所講的，是租金回報率，是投資者參考的的士平貴，比較各資產回報的重要因素。當然，如果要準確d，就要將每月的收入，減去雜費、稅務（不計利息），這就是淨租金回報率。這是以總資產去做分母的。

同時間，我地會比較資本回報率，即是當你利用槓杆時，你資金的回報率是多少。

例如你用85%按揭去做，本金就是$90萬，你要將每月的收入，減去每月利息支出（不是供款，是利息），減去雜費等，這就是淨收入，除以$90萬，這是資本回報率。

2） 加按套現，再將資金投資收息工具（如的士牌），的確是一個財富增值方法，因為加按的利息一般不高，當再投資較高息回報資產，自然就能賺取息差。

不過，世上沒有無風險的投資，每一個動作都有利有弊，有時點樣做，好睇你的投資目標，以及風險承受能力。

加按後面對加息週期，收來支付的利息會增加，息差優勢會減少，另外，的士牌增長力已經不及過往的年代，因為佢面對市場環境已有不少變化，叫車程式會對佢不利，雖然未必會影響到要減租，但都會影響長遠增長。。

因此，加按買的士牌在你的情況，不是不值得去做，但你要明白當中潛在風險。

------------------------------------------------

Q14368：

龔成老師，你好，1年前10月睇左你專頁，已月供盈富3000同港鐵2000，請問10年後可以增長幾多？

另外想問領展現價屬於低位，眼見香港運動還未平息，怕日後商户不租令到市場下滑？

如果長遠分注買入，應該選388港交所定3號煤氣，兩隻都是壟斷市場？

另外想問問1728正通汽車這股適合展線投資嗎？息口有9厘

龔成老師︰

以恆指過去年平均回報10%計（連股息再投資），你每月投資$5000，10年後大約會增值至95萬。

而領展（0823）佢有一定規模，坐擁不少優質商場。加上佢開始在海外尋找有潛力物業，預期由本地化進一步國際化，都是潛力所在。雖然現在受社會問題所影響，但相信只是中短線問題，長遠勢還在。

現時股息率有3.35%，未算平宜，只是合理區。要平宜的話，要接近5%。

港交所（0388）和煤氣（0003）都有壟斷市場優勢，但長遠增長力港交所會佔優少少。

至於正通汽車（1728）近年生意都有增長，但見盈利增長有減慢情況。股本回報率處較低水平，同埋佢較受經濟週期影響，對貿易相關都會有影響，所以股價會較為波動。

此股雖然有質素，但只算中等。以長遠計，將資金投放在其他優質股會更好。

------------------------------------------------

Q14369：

你好，可否分析一下6060众安在線

龔成老師︰

眾安（6060）我唔敢話佢無質素，不過，估值是最大的問題，其實到目前為止，佢的實質盈利都十分少，這刻的實質業務價值不大。

但佢做這類互聯網保險公司，的確有潛力，同時背後有支持，所以有發展，這部分產生了「概念價值」。

佢無乜盈利，但市值可以去到過百億，當中大部分都是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

所以，之後的股價，仍存有相當的不確定。但以穩健的投資角度分析，這股過往一直都不平宜。

因此，這類股可能有潛力和風險同樣大，最多只能小注。

------------------------------------------------

Q14370：

成哥，想請問下1876 百威亞太值唔值得長線投資，我係$27.85買左20手。

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

百威亞大（1876）主要於亞太地區從事啤酒釀造及經銷，集團擁有知名啤酒品牌包括百威、時代、福佳等等，未來會主力在亞洲市場發展。此股有品牌和規模，有長遠投資價值。

但你有留意我fb，都會見我經常講唔會太推薦人買IPO。而佢上市時間仍不算長，因此分析較難。

因為業務上，集團就算有吸引力，但新股半新股真實面要慢慢先見到，加上佢估值困難。

所以，此刻只建議持有小注，同時你要明白當中的風險。這股有長線投資價值，但你要衡量自己是否持有過多。

------------------------------------------------

Q14371：

龔sir, 我是你澳門班的學生，想問下你意見。

我父母岩岩退休，雖然資金唔多，但希望用黎投資收息，較為穩定既收息產品你會建議邊隻？Reits/銀行股/公用股會適合d?

龔成老師︰

你父母已退休，投資就唔可以進取，應以創造現金流為主。

你可以用收息類股份去建立一個組合，目標是5%、6%的股息率的收息股，例如港燈（2638）、香港電訊（6823）、工行（1398）、匯豐（0005）、置富（0778）、陽光（0435）。

這些都是有質素的股票，適合你父母長線持去創造現金流。

------------------------------------------------

Q14372：

成哥 點睇11，12？ 想問佢地幾多錢算平宜，幾多錢算貴？ 感謝成哥

龔成老師︰

恆生（0011）有質素，這股在《50穩健收息股》書中，已定義為一隻很不錯的股，有相當的優質度。

這股可以長線投資，但就會以收息為主。此股回到$150以下，股息率有5%時投資會較理想。如果要到平宜區，股價起碼要多跌20%至25%。

恆基（0012），是有質素的股票，前景正面，加上佢是全港持有最多農地的發展商，長遠的價值一定會慢慢釋放。

現價處合理區較上部，要再跌15%先至開始進入平宜區。

至於你問幾錢先貴，我估你係想睇下邊個位沽貨。其實貴無一個特別定位，我地持有優質股只要質素無變，基本上可以一直持有，咁樣先會最佳增值效果。

若言你真的想在質素無變之下估貨，減低持貨壓力，你可以用升一倍，沽一半的策略。先將本金收回，餘下股票任其自已再增長。

------------------------------------------------

Q14373：

老師，想請問我想入同諗住長揸中國中鐵（390），比亞迪（1211）同（435）。請問390可長揸嗎？我見現價應該是低位。

但本人現金得5萬，每月可儲萬5蚊

龔成老師︰

中國中鐵（0390），本質不算差的，有投資價值。但唔好預佢的增長力好強。睇翻佢的業務同財務數據，生意同盈利都處於穩定狀態，但增長力唔算強。

所以長線睇，佢有投資價值，但增長只是平穩。佢過往股價曾在2015年大升大跌，這只是炒一帶一路，但之後回復原狀，因為這因素只能為佢帶來平穩增長，而不是高速增長。這股都可以持有的。

至於比亞迪（1211）和陽光房產（0435）都有質素，可以長線持有。但你要留意，前者為潛力股（較適合年青人士），而後者為收息股（較適合退休人士），你要睇翻你年紀去調整。

------------------------------------------------

Q14374：

你好,之前參考咗你嘅意見, 購買咗兩次各千二百股 1928hk,平均價$35 ,本想作長線投資 ,近期見佢估價上升至$40 ，應否先沽，稍後再買入？

龔成老師︰

你可能認為這刻的價位$40已經係高位，先行獲利，等回調再買入。其實，我地唔應該去「估價、估走勢」，無人知$40之後會唔會之跌回$35，還是一直升至更高位。

我地投資重點，應該係睇「企業質素」，只要佢質素無變差，咁我地一直持有，讓其慢慢增值就可以。

你這個是很多投資者的錯誤想法，很多人以為自已掌握股市走勢，但最終都是失敗。

因此，建議你長線持有。

------------------------------------------------

Q14375：

老師, 你好！ 想請教你以下的問題：

1）本人已幫子女儲起每年的利是錢, 現已累積了大約$100,000現金。一直都只是放在銀行, 現在想開始幫他們把現金慢慢增值。

由於現金不是太多, 打算幫他們的儲蓄進行月供股票, 是否正確的選擇？ 或是分段買入一些優質股？
他們只是12及15歲, 有那些股票比較適合幫他們投票？

2）我媽媽想打多年買落的滙豐賣出, 買入價大約$110, 因她覺得滙豐已沒有太大優勢。

但我唔想她賣出後只留現金, 老師你也說過, 現金是沒有增值能力。如果我想幫她賣出滙豐的話, 有那些好的股票推介給她作另外投資嗎？

謝謝教導

龔成老師︰

1） 將每年收到的利事錢儲起，再用月供方式增值，這做法可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你的子女很年青，可以增值為主。但我相信每年收到利事金額唔多，拆開每月金額會更細，為免太散令月供費用成本增加（月供成本佔本金最好少於1%），我建議月供全數投入盈富基金（2800），佢係一隻包括50間質素不錯上市公司股票的組合，有效平衡風險。

2） 我相信你媽媽應該近退休之年，這個人生階段平穏現金流係最重要。滙豐（0005）雖然增長力大不如前，但作為長線投資的收息股，佢係可以的，所以唔建議你媽媽賣出。

其實還有一些優質和股息率高於5%的股票，都適合你媽媽，例如港燈（2638）、香港電訊（6823）、工行（1398）、匯豐（0005）、置富（0778）、陽光（0435），都可以考慮。

------------------------------------------------

Q14376：

Hi, 小弟25歲,Bank儲蓄$120000,月底薪$12350未計佣,已扣MPF,有番兼職送外賣,月儲大概$6000想開户投資,該如何一步步做?一直月供股票可行嗎? （利申:懶人）

龔成老師︰

作為一個初階投資者，我建議你先要做三樣野︰

第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

第二，了解銀行及證券行，去開一個證券戶口，作為月供股票之用。開戶用銀行或證券行都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

你可以供盈富$4000。同時儲下現金。

當你在做上述三件事的同時，開始學下股票，了解下那些股票適合你自己，就可以再調節你投資組合。

------------------------------------------------

Q14377：

老師您好! 想再請教…在您的問答專欄Q13473回答中, 月供$3000盈富, 增值20年後再轉去6%改息股, 一年便可收到18萬息. 那如果我現在月供$6000 （$3000盈富, $1500港鐵, $1500煤氣）

20年後轉去6%改息股, 是否一年便可有36萬息? 是否這樣計算的?

如日後月供想再加碼（如$1500）, 是否應加到盈富會比較合適?

另外, 您所指的”分注投資”是不是同一股票每隔半年買入一手? 先再謝謝您! 我不知不覺已買入了6本您的書藉, 真是獲益良多! 會繼續努力!

龔成老師︰

你的計法正確，港鐵（0066）和煤氣（0003）都是優質的平穏增長股，長線預期佢地回報會跑嬴大市（即盈富升幅），所以你簡單咁乘2，變成每年有36萬股息，這個計法無問題。

增加供款，如果你自問選股能力一般，我建議你放入盈富（2800）。

至於我平時所講的"分注"，是一個投資策略，例如你想買入某隻股票，總數3000股，你打算長線投資。

與其一次過入3000股，不過分開幾次，例如每隔1個月、2個月、甚至3個月入一次1000股。主要目的，是做到買入價平均就可以。

多謝支持，記得要睇晒！有用的！

------------------------------------------------

Q14378：

今年27歲月入$41000，平均一個月可儲$27000。現無物業，都希望35歲前可以置業。近排工作繁忙無咩時間留意股市，因此有想過月供股票。

如果希望一年內從投資股票中增加5萬到10萬（好似太進取？），可以有咩策略？

謝謝

龔成老師︰

以你每月儲$27000計，要一年賺5萬，即年回報15.5%，其實有少少進取。而且1年是一個十分短的時間，就算再優質的股票，短期都會出現價格波動，令你投資回報很易失算，投資年期以5年或以上較好。

回報方面，我地一般期望年回報會跑嬴大市一點，大約12%。如果你想儲一筆錢去支援你將來置業，你可以透過月供股票去增值。

現在你每月儲到的錢，可以5成去做月供，其餘先儲起，用一邊月供一邊儲蓄的策略。月供方面，你可以選擇投資在平穏增長股︰

盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（0388）、長建（1038）、粵海（0270）、領展（0823）、深高速（0548）或潛力股︰比亞迪（1211），中生（1177）或福壽園（1448）等。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

以恆指過去年平均回報10%計（連股息再投資），你每月投資$27000，8年後大約會增值至370萬，相信以可以幫你置業。

------------------------------------------------

Q14379：

阿sir，請問月供領展定恒地（012）好？thx
阿sir, 如果兩隻一齊供又有冇問題呢？

龔成老師︰

恆基（0012），是有質素的股票，前景正面，加上佢是全港持有最多農地的發展商，長遠的價值一定會慢慢釋放。

領展（0823）有一定規模，坐擁不少優質商場。現時商場組合，有提升價值潛力。再加上早前斥資36.7億元收購悉尼一幢甲級商廈，集團開始在海外尋找有潛力物業，預期由本地化進一步國際化，這都是潛力所在。

其實2隻平穏增長股都優質，適合月供之用。但如果同時供晒2隻，你就要留意翻佢地會唔會係你組合中佔比重過高，出現過份集中風險。

任何股票、任何行業，就算再優質，我們都不應太過集中。因為一個行業就算更有優勢，也有機會面對行業週期及突發風險，令你整個財富組合不利。因此，你要建立一個平衡的投資組合，當中有不同的類別、不同的行業，這是最好的平衡風險方法。

------------------------------------------------

Q14380：

龔成老師你好，本人是大學四年級生，聽講你以前做過證券行，請問介唔介意分享下點先可以入行？會有邊啲門檻同條件？

我本科唔太關Finance, Economics, Accounting果啲事，係一啲冷門半工程半商科，GPA又一般般，但我已經學左投資一兩年，視股票研究為我既熱情之一。

所以想畢業後做返啲相關既工作，人工偏中低都唔緊要，最緊要比我係過程學到野，同埋儲到工作經驗，等我將來可以跳去同行之中（證券）更加理想既field。

我自知成績同英文水平都一般般，唔夠真正讀ibank專科果啲畢業生鬥，但我真係好想做股票呢行，就我呢個case，想問老師有冇啲好建議比我？

龔成老師：

其實證券行，入行唔算難（如果你做經紀類），你大學生基本上無問題，如果你想多d料去入行，可以考證券試1、7、8，這是好多銀行、證券行都基本需要的，不過，如果你考左後一年內無人請，掛唔到牌，會比人取消左。

其實有唔少證券行或銀行，都比你入左職先，之後先要你考牌。

證券行雖然唔難入行，但就唔易做，這已經是有點夕陽行業，除非你內地的人脈網絡好強，否則，唔易生存到。

以整體的前途與興趣去衡量，建議你去行銀行的路，就算最初入職不是你最想的職位，都可以學到野。但唔好做同一職位太過長，去到咁上下，要跳去其他職位，你的目的是不斷學習，有些職位是有關分析的工作，不過並不易入，你一步步行。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13501-Q13520）

Q13501：

老師你好，我係你股票班學生，有d關於安踏體育的問題想請教下：

1）　佢近年收購唔少企業，ROE近年維持增長（雖然只係升少少），可否視為這些收購是成功，能產生正面效果？

2）　近年＂宣傳和分銷成本＂佔收入比重都提升了，反映競爭加劇了，未來增長力是否會放緩？

3）　佢現時 PE好高成44倍，我本身用25-30倍PE，純利年增長+15%（合理每股盈利CNY1.479)去計個價。大約︰HKD46-56，OK嗎？

麻煩晒

龔成老師：

1）可以。

我地分析股本回報率時，要睇較長期，因為就算收購企業，都不會立刻反映。

同時，不少其他企業收購的個案，往往都會動用過高的價格買入，令再投資回報率減，最終令ROE減。因此，只要保持到ROE，已經是不差的成績。

而安踏（2020）更加可以有長期的ROE增加，反映本身賺錢能力提升，同時再購得來的再投資回報率增加。正正因為這點，我才在《50值博倍升股》書，推這股及給予4分優質度的高分。

2）兩個因素，第一，競乎加大左，這會對長遠的賺錢能力有影響，因為市場會進入平衡狀態，企業難以賺取過多的利潤，之後只能合理化。

第二，佢近年的盈利，有理想的增長，每年生意都有向上，除了收購國素外，長期的同店銷售都有向上，這反映當進行宣傳支出增加後，生意的確有上升，反映宣傳費用都值得。

3）現時市場的確有少少高估左佢，因為市場以一個較高的預測盈利作為推算基礎。同時，有些分析員利用現金流折現法，同時假設安踏之後的現金流增長好強，先推算出一個較高的企業估值。

不過，始終在預測中，投放過多增長因素作為估值基礎，並不是保守的做法，因此你的估值反而會更踏實，最多考慮較強的市場增長因素（收購、內需等），令估值提高少少，都只是將你的估值再增加10%。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13502：

龔成先生你好，我有一個問題想請教你，我先生即將在明年1月尾失業，但家庭開支非常大。

我家有3個物業1個車位，全部供緊，大約市值3千2百萬，outstanding 1千2百萬，另外還有一個私人貸款70萬，現金+股票大約有$180萬。

想請問如果我賣走車位，得190萬+現金及股票$180萬，再加按其中一物業$180萬，先還清私人貸款70萬後，共有$470萬，將呢470萬買晒收息股。

例如中石化有10厘回報，那麼是不是每年我會收到股息47萬？再除12即每月有3.9萬income?

那我先生可減低搵工壓力，這可行嗎？
謝謝你！感激幫忙回覆

龔成老師：

你以上計算每月股息收入方法正確，每月會有3.9萬現金流。

現時車位租金回報率不高，故出售車位套現，再轉收息股來增加現金流，基本上也可行的。

至於70萬貸款是否償還，你要考慮番佢本身利息費用是否高於用來再投資回報。如果貨款利率高，當然先清理左會較為上算。

至於加按去投資收息股，去從中賺取息差係可行，但要留意番主要有三個風險（但我認為不算高）。

第一，負債會增加，原理是問銀行借錢投資，負債增加一定會令你的風險增加。不過考慮你約總計的資產，以及總計的負債，並不算多，比率仍是很健康，因此不用擔心。但你要明白這點。

第二，投資收息股，有可能出現賺息蝕價，因為現時低息環境，你利用低息借錢，投資較高息的收息股，能賺到息差。不過，就有可能出現賺息蝕價的情況，因為這刻收息股只是處合理區，並不是平宜區。

要解決這問題，只要你分注投資，以及長遠持有，不理「價位」的問題就可以。

第三，股息減少，如果產出的現金流減少，對你之後的還款有影響。因此你盡量選擇一些業務穩定的收息股，當企業業務穩定，盈利自然穩定，能派出的股息往往都較穩定，當然，亦要分析過往的派息情況。

最後，在收息股選擇方面，你都要留意番。中石化（0386），質素算是不差，但又未到好好，始終這只是商品企業，沒有一些太大的優勢。生意近5年只是上上落落，無乜增長力，這是受油價等因素影響，反映佢處於一個被動的狀態。

佢上年的股息理想，但翻查之前的幾年，股息都不是好高，佢由2014年-2018年的每股股息：0.25/0.18/0.28/0.60/0.5，加上佢的股息不太穩定。所以，這股作為收息股，適合度只屬中等。買是可以的，但不要大注。

所以，我會比較建議你「不要集中一集收息股」，而是「建立一個收息股的組合」。

收息股你可以選擇︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435），普遍都有5%至6%。雖然股息率無中石化咁高，但勝在相對優質和穏陣。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、必瘦站（1830）、互太紡織（1382）等（***記住，股價略波動，不能太過大注）。

整體而言，你計劃是可行，而且你本身資產也過於偏重物業類，故在整個理財考慮上也是有需要的。入貨時要留意現時市況只在合理區，故買收息股時要分注。

同時建議你也預留一筆現金，以備不時之需。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13503：

龔成老師，你好，我之前聽朋友說，用盡我謹有的儲蓄，在$1.8位買入了18000股南方能源，本來諗住黎個短炒，賺番多少少錢。

點知近期不斷下跌，已經蝕左我3分一儲蓄。

我以後都不敢試，不敢貪快錢，現在是否只能等待回升？短期內能否上至1.8....令我可以拎回本金呢，或者我可以幾時放，吾蝕咁多？
感謝你～

龔成老師：

南方能源（1573）是規模較小的公司，這類公司賬目有問題的機會的確較大，以之前正正因為市場擔心佢賬目有問題而大跌，而近期唔知點解又多左人留意。

股價大跌後大升，風險極高，而這類股的賬目，的確可以有問題，這類股其實與賭博無乜分別。

所以，我知佢會唔會升翻上去，只可以話你同賭係無分別，如果你持貨太多，我會建議你要先減持一半。

這股上落大，大升或大跌都有可能，但你要明白一點，你現時是賭緊錢。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13504：

老師，感謝你在youtube的分享
本人快到45歲
還有 十年 就退休了

現在香港的情況 非常不穩定
但已投資了 105萬的香港股票
近來買了以下股票

87001 - 77000股@3.2
386 - 40000股@4.6
347 - 60000股@2.71
1810 - 20000股@9.8
308 - 100,000股@1.22
1881 - 30000股@1.99
不知道以上的股票可否長揸 賺息

龔成老師：

我地投資應該以長線為重心，因此，香港的社會運動只是中短期情況，你唔需要太過擔心，我地亦唔會因為咁樣而改變投資策略（但就可以會因此而把握機會）。

以你的情況，其實會開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

你可以將每月供到的資金，做月供股票，供「平穩增值股」+「收息股」，但就隨著年齡增加，慢慢增加收息股的比例。

至於你現時的持股，87001、386、1881，無問題。

鞍鋼股份（0347），質素只是一般，不建議持有太多，你可以在有較多的反彈時，賣出部分。

小米集團（1810），有增長力，但業務存有風險，對你打算10年後退休來說，未必是最適合，這股只建議持有小注。

香港中旅（0308），質素只是一般，不過近期香港社會運動令這股明顯受影響，建議算事情完結後，股價明顯上升後，賣出。然後將資金換成更有質素的股票。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13505：

龔Sir你好！我被你之前與一位保安員網友的對話內容，刺激了我的神經！我就如這位網友一樣，想著維持現在的生活已經過得不錯，不需要作任何改變。

但事情當然不應如此，除非你有數之不盡的財富，否則人生變幻莫測，下一秒就讓我有點徬徨無助。

我今年36歲，我原先沒想到會有任何改變，突然父母跟我說想提早過退休生活，而我本來也是沒有任何儲蓄（只有有一份每月供2200, 為期5年的儲蓄計劃, 還有一年就供完），每月收入約有4萬左右，扣取其他開支，每月應該可以儲到1萬至2萬左右，但事實上從來沒有儲過一分錢，真是糟糕透。

我很想有能力可以照顧父母退休後的生活，之前了解過，我想每月給父母2萬，他們應該是可以夠生活和娛樂開支，這是我目前最想做到的，龔Sir 我應該如何去做才能達到這個目標。還望指點一下，謝謝你抽空回覆。

龔成老師：

你收入不差的，但你之前未能用盡這優勢，因此，這刻一定要加倍努力，先可以追得翻之前的時間！

你要由今個月開始，每月儲$20000，記住，要堅持，如果你只是做幾個月又打回原形，根本就無意思，因此，你要保持每月做。

理財不能一步登天，你這刻最重要的，是每月儲$2萬。

下一步，你可以做月供股票，將其中的每月$1萬，做月供股，長期進行，令財富累積，你可以你可以考慮盈富（2800）$5000。

另外再加2隻（每隻$2500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）等，你可以了解下這些股票，然後從中選股。

同時，你要好好學投資，善用餘下的現金，因為慢慢你的現金會增多，如果把握時機，做好選股，這是重要的。

你憑上述的方法，不斷累積財富，之後再睇下點樣有效幫助你家人，而這刻要做的，就是盡力儲本金，同時合理投資，財富增值。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13506：

老師你好，開始買你嘅書學有關股票方面嘅知識，請問你有無邊本著作入面有教大家詳細分析同計算股價合理區嘅方法？

主要係計算果部份

龔成老師：

《股票勝經》《年報勝經》，有講少少關於計算估值，但唔算多，因為要講企業估值好難，要以文字上去表達並不容易，所以書本只是講一些基礎的概念。

股票班會在完整的企業合理值計算，因為要跟翻較新的市場情況，企業情況去講述，因此在股票班講述會比較適合。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13507：

請教龔Sir,
1876 & 1475 優質嗎？
現價合理嗎？多謝！

龔成老師：

百威亞太（1876）以質素來說，的確不差，但現價方面，其實不算平。

首先，佢從事生產、進口、推廣、經銷及出售超過50個自家擁有或獲許可使用的啤酒品牌組合，包括百威、時代及科羅娜，以及旗下多國品牌和當地品牌，如福佳、凱獅及哈爾濱。

佢係多個國家都有相當的市佔率，同時增長力強，就近年的數據睇，盈利每年都有雙位數增長，業務、品牌、質素絕對有。

但由於現價唔算平，就算這刻投資，也不建議太注，你預要再跌多d，先會到合理的水平。

日清食品（1475），本質不差，業務發展正面，但現價同樣不平，你少少貴，因此，最好等回少少先考慮。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13508：

龔老師，我現正每月供$5000港鐵，考慮多供$3000煤氣或盈富基金，你覺得如何？謝謝意見。

龔成老師：

由於港鐵（0066）是單一股票，盈富（2800）則是一個組合，以我地在財富分配上，應該投資盈富較多，因為單一股票始終風險會較高。

所以，建議你月供盈富（2800）$5000、港鐵則改為$3000。長期進行。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13509：

老師你好，我有一些問題想向你請教一下

1. 想問下3868 信義能源，因為再生能源係國策之一，現階段有補貼。加上他90甚至100%的派息比率，業務也在國內，受貿易戰影響不太，因此期望他有穩定現金流之餘帶點升值空間。

請問一下老師對3868有甚麼看法？

2. 想問下老師對借貸投資有甚麼看法？

因為今年下半年很多股票也處於便宜或合理價格，加上通脹下，其實比起月供，會否一次過貸款入市，再把月供錢用作還款，收息之餘加上合理升值，會否更為有利？

龔成老師：

1）信義能源（3868）由信義光能分拆上市，業務點都唔會差，佢主要於中國經營太陽能發電場業務，並向國家電網的當地附屬公司銷售電力。

佢擁有9個太陽能發電場項目，分佈湖北省、天津市、安徽省及福建省，但行業的增長算是中等，又未到好爆炸性。

初步睇升值潛力唔算好勁，但作為收息，應該不差，不過現時的估值唔算特別平，所以值博率只屬中等，小注投資好了。

2）借貸投資係一個創富的方法，但一定有危有機。

因為佢會放大左你的賺蝕，由於本身有風險，因此，唔會建議隨便用，只會在「有明顯機會時動用」。

現時大市只是處合理區，未到平宜區，這刻未到運用的時候。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13510：

老師你好， 最近我見大市跌，1881富豪同埋1270 朗廷酒店都跌咗好多， 股息率很吸引， 但我想問呢兩隻股票而家買得過嗎？

長遠渣可以嗎？
兩隻比較的話那隻比較好？
唔該你

龔成老師：

這兩股都是有質素的股，現時已可分注投資。

酒店業受香港的社會運動影響，有好大的打擊，中短期會好差，有可能差一段時間，但我地投資，一定會以長期的角度去分析，例如3年後，如果佢地賺的錢，基本上同過往無分別，而我地又能以一個較佳的價位買入，雖然中短期股價可能受壓，但長期則會正常，這都是不錯的投資時機。

你可以考慮朗廷（1270）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13511：

早晨，我還想問一下以下股票的前景

1. 52 大快活 - 佢啱啱公佈業績唔好，想問下以現價再跌10-20%左右吸納係咪合適

2. 1830 必瘦站 - 吸引的派息股，而且業務穩定，以現價再下調5-10% 入貨是否合理水平

3. 3690 美團點評 - 呢隻股近期不斷升，差不多到紅底，有無機會再升 (短期上望110-120)? 同埋點睇公司前景?

龔成老師：

1）你預佢中短期一定弱，佢半年前已預告人工成本上升，因此已預到盈利會受壓，加上香港的社會運動，點都對佢有影響，因此你預中短期弱，但長期的質素仍在。

現價合理，當然跌多10%會更吸引。

2）必瘦站（1830），這股有質素的，同時過往派息都十分理想，是很好的收息股。但同樣，佢都受香港的情況影響，中短期一定弱，但現價其實有投資值博率，只要不太過大注就可以。

3）美團（3690），業務增長發，發展有亮點，有潛力上的確不能睇少。不過，這股估值好難，因為未有似樣的盈利，市場只是「估」佢值多少錢，這一定會帶來股價的十分波動。

因此，這股不是不能投資，但好難分平貴，風險會較高，小注好了。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13512：

你好，我有一間已經供完的 物業大約值600萬。我覺得就這樣放著太浪費。

請問如果我把這個做按揭三百萬， 再用這三百萬作投資，可以有什麼選擇。

龔成老師：

加按的模式，的確可以有效運用財富，但原理是「增加借貸」，當中一定會提高左你的風險，你一定要明白這點。

如果你明白當中利弊，能承受風險，加按的確是可以的。

而這筆資金，會建議你投資偏向收息的工具。投資收息股，可以作為財富分配的一部分，但不建議將全部資金都投資，因為一定要留有一定的現金作防守，以備不時之需，以及若大市下跌，可以買平貨之用。

你可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、必瘦站（1830）、互太紡織（1382）等（記住，股價略波動，不能太過大注）。

但要留意，現時股價只是合理，未到平宜，因此買入時宜分注，同時不能用盡現金。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13513：

老師，好多謝你的回覆。你講出好多我的心理問題「賣左後會升，好唔抵，這明顯是一個心理因素，你唔好比這個因素影響。我相信心理因素在過往，對你有好大的影響，令你做左好多錯的決定，你要學識理性分析，平常心面對」。

這點正是我地散戶的心魔，往往以為等待可以上回水面，結果正正愈踩愈深，著眼現在的大幅虧損，反而好擔心沽出後會即升。

而導致俗語話左一巴，右一巴，不過老師講得正確，我們應該以長線投資，講求質素，唔係炒短線炒消息，所以我都準備引痛割斷，期望重新歸來，所以如果時間配合都想報讀老師的班，重新上路的了。

龔成老師：

投資的心理，要學習的，簡單來說，就是「理性」，你要當自己是一個獨立第三者，去分析這些投資好與壞，這樣你就會中肯好多。

心理因素每個人都有，但成功投資者，就是懂得將這個心態放輕。股價升跌，好正常，如果你被佢影響，就有問題。

另外，買股票賺蝕都是正常，無人是完美的，但人總是想著一定好極的事，例如「捉低位」，但卻不明白根本做唔到，所以，我地要學識接受不完美，明白自己的能力。

學習投資是一場長期戰，加油，希望遲D課堂見到你！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13514：

老師，想問金沙同銀娛，邊隻質素好d？
我見金沙好高息，但又好似銀娛發展潛力高d？

龔成老師：

兩隻都是賭業股中，最優質的，都可以投資，但性質不同，因此好睇你的投資目標。

金沙（1928）發展較為成熟，派息強，是很好的收息股，較為穩健，但增長力不算強。至於銀娛（0027），派息方面則不及金沙，但見佢的項目仍在發展中，因此增長力仍在。

所以，好睇你自己的投資目標，風險承受能力。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13515：

Hi 龔成老師，想問下2331(李寧)和2020(安踏體育)係咪優質股？現價屬於貴嗎？
謝謝解答

龔成老師：

兩隻都是有質素股票，都有質素，只是現價已有少少貴。

以質素來說，安踏（2020）會好少少，我上年出的《50值博倍升股》都有推這股，更給「4分」的高分優質度。可見有一定的投資價值。

安踏核心品牌，係中國體育服裝市場，佢有一定的知名度及市佔率，同時，這企業透過不斷收購去擴大業務版圖，品牌合作亦是其中一個方法。

例如「NBA聯名品牌」，就是在2014年，NBA中國與安踏發展長期合作關係，安踏正式成為NBA官方的合作夥伴，以及NBA授權商。其後安踏推出安踏-NBA聯名品牌運動鞋和配件產品。

安踏的品牌有相當的價值，曾獲得Brand Finance的「全球最有價值服裝品牌50強」，是唯一一家榜上有名的中國體育用品品牌。

不過，近一年這兩間公司都上升倍計，的確有點過多，現價略貴。如果要入貨，跌少少先開始，同時要小注分注去入，這樣會比較穩健。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13516：

老師你好，本人現年29，有流動現金20萬，月入4萬，扣除供樓家用基本開支大概餘下18000，曾經少不更事盲目跟風買股票，大跌以後就一直放著沒有賣沒有理會。。
分別是1060有2萬股，1682有16000股，8120有2500股，而我知道呢三隻股已經無前景可言，現已虧損約12萬。。。

想請問現時想加入月供股票可以怎樣分配？澳門月供股票逐隻手續費計，是否集中一隻比較好？例如只月供盈富？

是否月供起碼5年以上才能有比較大的利潤？一般滾多久為佳？現有的股票是否該賣掉再買哪隻優質股較好？

只希望盡快把虧損的找回來及開始建立正確的投資理財概念。感謝。

龔成老師：

投資好講求理性，沒有質素的股票，就要理性賣出，同時，唔好太心急要贏錢，而是要合理地追求爭值。

阿里影業（1060）、杭品生活科技（1682）、國農金融投資（8120），不是盈利極少，就是持續虧損的股票，你最好分注賣出這些股，最多阿里影業餘下少少已夠。

至於月供，澳門月供手續費較貴，你最好集中月供一隻，例如月供盈富（2800），$8000。這是最好的策略。

餘下的資金，就儲現金，然後慢慢自手一手手去入。

月供要長期先有回報，建議投資5年以上，愈長愈好，你預盈富的複息回報，預期每年8%-10%。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13517：

龔成老師你好，我想問709而家股價好低及息率高，但前景唔太明朗。應唔應該趁低吸納呢？

龔成老師：

全球經濟轉弱，加上香港的社會運動，一定會對零售企業有中短期的影響，佐丹奴（0709）無論業績，還是實質的股價，中短期都一定會弱，甚至股息會略減。

但如果是長線投資，反而有投資值博率，當然，要承受中短期風險，但我相信現時的問題中短期為主。所以，只要你不要一次過投資，分注進行，同時總金額不太大，這股有投資價值的，是不錯的收息股。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13518：

成哥，3313，投資得過嗎？
可以長揸嗎？

龔成老師：

雅高控股（3313）這類股，風險好高的。

我從基本面分析佢，投資價值不高，而佢股價上落大，的確好吸引散戶，但從我地正式投資的角度，唔會選這類股。

這股現時投機味太重，唔建議買。

可能你之後會見佢升得好勁，或跌得好勁，但我地投資，不是賭博，要投資有質素企業，要在可承受風險程度下，爭取合理回報。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13519：

老師你好 今日上完你頭幾堂
可能由於我一直都係睇你書選股
所以投資左兩隻我諗你都幾睇好既股票

我而家有1211 平均約39蚊。
0027 約48蚊

我係咪黎緊應該再將我既投資組合再加一至兩個行業去平衡返風險？

我27歲 我諗我暫時渣住呢兩隻水桶1同1，2既都算合適

龔成老師：

你27歲，可以承受風險度較高，但都應該加翻一些水桶2的股票，例如盈富（2800），去平衡翻個組合的風險。

我地並不是博，而是建立一個平衡組合，令財富合理增值。

另外，當你完左整個課程後，應該會掌握到自己選股，到時可以慢慢加翻股票去組合，我想信組合有5隻股票以上，會比較好。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13520：

龔Sir你好。本人想請教下關於月供股票選股的問題。

本人現時每月可儲8000-9000元，其中每月月供大約7000。現正月供平保、領展、騰訊及比亞迪。由於每隻股票投入金額少，儲股速度比較慢。

且即使股價波動，每月儲股的股數變化不大，比較難做到股價平時買多點、股價高時買少點的效果。

因此，想問下我應該停供一隻股票嗎？如果是，上述股票應該停供哪一隻？

想補充少少，本人月供股票打算長期持有。請問龔Sir覺得哪些股票比較有前景及值得永久持有？

龔成老師：

月供股票是一個長期進行的過程，中短期你見唔到有效果，但長期就會見到，你唔好太在意中短期。

現時你每月儲$9000，將其中$7000月供，都算可以，但你最好同時有一筆現金在手，若果大市向下，就可以把握到機會。

你現時供的都是有質素的股票，保持長期進行就得。

上述的4股，都是可以永遠持有的。另外，娛銀（0027）、金沙（1928）、恆基（0012）同樣可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q13261-Q13280）

Q13261：

成哥你教得好好，我明白好多之前唔明的野，我而家想請教下：

1. 你中提到如果幾年來毛利率下降，只有兩個原因，其中原因是減價促銷，可否用以下數學公式的分子和分母增減去解釋毛利率為何下降？

毛利率＝(收入—直接成本)÷收入

2. 這直接成本是否只包括已賣出貨品的成本？

3. 你怎樣分辨毛利率下降是因減價促銷或貨品成本上升所致？

龔成老師：

1）你這條公式，正正是毛利率的公式，當直接成本增加時，毛利率就會下跌。又或當直接成本增加時，而銷售價格無法作出相應的增加，都會令到毛利率下跌，反映企業的賺錢能力正在減少。

2）每個行業的直接成本，定義都有所不同，但都是指最直接的成本部分。最簡單的理解就是零售業，貨物的來貨成本就是直接成本。

3）要分析當時的大環境，有無加價的情況，當時經營環境如何，對手是否處於減價的情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13262：

老師，我在10年前買了XX的月供基金，每月供2千，之前因agent建議，轉過兩三次投資組合，所以10年後，無升到。

依家仲蝕緊幾千蚊，依家最新的投資組合是7成供中國基金，3成系Healthcare基金。

由於供左10年，就算surrender都唔洗罰錢，戶口現時有197K左右。想請問我是否應該繼續供落去。我其實還有一份儲蓄保險，每月供$2000, 但要到56歳先可以攞番D錢。

我會參考老師的的建議，下個月開始月供股票，打算$3000 (2800) 及 $2000 (1211)。其實已經41歲，應唔應該供1211定系選港鐵或其他股呢？
謝謝老師﹗

龔成老師︰

保險公司的基金，有好有壞，我好難評論，但當中的潛在費用，往往不少，反而簡單的投資在指數基金，例如盈富基金(2800)，長期回報往往更多，而且管理費好少(0.1%左右)。

你再了解下，你所投資的基金，當中的投資策略，以及投資在甚麼類別的項目中，分析是否有長線投資價值，然後才決定是否停供。

至於儲蓄保險不要動了，每人都有基本保障需要，只要唔係過多就無問題。

以你年紀，尚有增長力，所以你月供安排無問題。但如果你將來想加大供款，建議集中番係平穏增長股，如盈富（2800）、金沙（1928）、港鐵（0066）、中銀（2388）、恆基（0012）會較好。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13263：

百威亞大應該增有 我現時有60手 27.7 買
還是走？

這股是否優質？及有前景？
因我看他是啤酒界的一哥

龔成老師︰

百威亞大（1876）主要於亞太地區從事啤酒釀造及經銷，集團擁有知名啤酒品牌包括百威、時代、福佳等等，未來會主力在亞洲市場發展。此股有品牌和規模，有長遠投資價值。

但你有留意我fb，都會見我經常講唔會太推薦人買IPO。因為業務上，集團就算有吸引力，但新股半新股真實面要慢慢先見到，加上佢估值困難。

簡單來說，這股質素是有的，但估值方面較難，股價因此會波動，因此佔比方面要注意。

所以，此刻只建議持有小注，同時你要明白當中的風險。如果60手佔你總資金比例不輕，你最好賣出部份。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13264：

你好龔成老師，我有廿十萬股票分別是
1398，5000股，買入價6.64
0005，400股，買入價68
0388，200股，買入價296
0788，8000股，買入價2.14
0700，100股，買入價460
0966，1000股，買入價21.1
1368，5000股，買入價4.69

現多突然多了一筆資金大約三十萬，以及有大約三十五両實體黃金在保險箱，我應該怎樣去增加自己既財富？請指教
謝謝

龔成老師︰

你現時持有股票都有質素，但問題是各類別的股票都有。平穏增值股︰388、700、788、966、1368 / 收息類︰5、1398。

我地投資增值係會運用「先增值，後現金流」作方法，初期應投資較多增值類資產，較後期則應投資較多保守類項目。所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

你新增的30萬可以因應你現時年紀，投資以下股票，同時對你現有組合作出調整︰

平穏增值股︰盈富（2800）、港鐵（0066）、金沙（1928）、恆基（0012）、中銀香港（2388）、長建（1038）、粵海（0270）
潛力股︰比亞迪（1211）、中生（1177）或福壽園（1448）
收息股︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）

至於黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，因此，黃金不會成為我地財富組合中，佔比太多的部分（約3%）。所以，你可以將部份黃金變現，再去投資股票，長遠效果會更好。

由於現時大市只在合理區，你資金可以先投入一半。餘下一半待大市出現一定程度的下跌，才大力度掃貨，然後長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13265：

成哥你好！我2017年尾開始投資股票，由於冇系統性學習過股票知識，亦冇睇過任何股票書，而且當時股巿又處於熱炒時期，我自己抱住人買我唔買會虧嘅心態去踏入股巿。

經過呢兩年嘅學習，尤其買咗你大部分嘅作品後，令我覺得投資嘅收成要用時間、耐心去見證。

我有個問題，當時我用均價23蚊買咗6800股美高梅，以現價嚟講我已經輸咗一半有多，如果當初買美高梅之前睇咗你嘅作品，起碼我選擇咗金沙、銀河，就算跌咗都冇現在咁慌張，因為仲有息收、重要嘅係企業仲有成長。

我現在想將6800股以現價來計嘅美高梅轉成另一隻股，最想轉嘅係《50隻優質潛力股》介紹嘅 楓葉教育 或者 轉成 特步國際 ，你認為合適嗎？

另外，我仲持有 正榮地產，均價5.7買嘅，呢隻可守等佢升定換馬好呢？

感謝你！

龔成老師︰

美高梅中國（2282）有質素的，只不過你在2017年大升市時買入，個價比較貴。但唔洗太擔心，我地唔應該因為股價下跌而止蝕，只會因為企業優質度改變而止蝕。賭業中短期不利，但長期仍處於賺錢的狀態，因此唔需要擔心，有得守的。

只是你買入價貴左，可能要長少少時間。相信行業中短期會弱，股價會較為不利，但不要理會，長遠會慢慢好轉的。

正榮地產（6158）主要在中國從事房地產開發、物業租賃及物業管理業務。此股質素算中等，經營現金流長期負數，加上負債比較嚴重。如果佔組合唔多可以持有，但長遠轉至優質股較好。

楓葉教育（1317）本質不錯的，長遠仍是正面的。這股有長線投資的價值，但由於股價較為波動，最好分注投資。

因為佢過往增長快，但在政策風險下，最影響的不是現時的業績，而是之後的發展，令增長力減慢。但如果以一間平穩增長的企業來計，現價已是合理價，因此現時可以理解為合理區中下部。

特步國際（1368）主要從事鞋履、服裝及配飾等體育用品的設計、開發、製造、銷售、市場推廣及品牌管理。

集團獨家總代理商經營的全國超過6,200家零售店組成的龐大分銷網絡，其覆蓋全國31個省份、自治區及直轄市，集團在海外亦設有一些銷售點。

此股有質素，作為內地知名體育品牌，無論在品牌和規模都有一定優勢。但由於環球政局不穏、內地經濟放緩等負面因素，預期零售相關行業收入會進一步轉差，特步也不會例外。此股有長遠投資價值，只要佔組合比重不太高就無問題。

如果你覺得美高梅佔比太重，想轉到其他類別股份，楓葉教育或特步國際都是可行的選擇。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13266：

老師，請問醫藥股值得月供嗎？如果中生和石藥邊隻長線較好？

龔成老師：

唔少優質的醫藥股，都值得月供，長期不斷儲貨的。

人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多多。

例如中生製藥（1177），長遠仍有一定的發展，佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

佢商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

雖然現價就有少少貴，月供是很好的投資方法。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13267：

老師你好，想問1211，在38元有貨，可以中線持有嗎？

龔成老師︰

我地持有一隻股票與否，關鍵位是企業質素、前景，不要被買入價影響，買入價只是一個心理因素。

比亞迪（1211）因為早期出左業績，雖然有增長，但較近期的數據及預期業務較弱，相信中短期仍會弱。

要留意，我地分析時，唔需要太著重中短期的數據。佢出來的數據的確有點失望，但中國車市都預左有影響。

中國車市放緩、外來競爭、行業競爭加劇，都成為不利的因素，相信中短期仍會對佢不利，這會影響整個行業。

股價由高位回落不少，現在回落至合理水平，同時反映市場預期中國車市的不利情況。相信這股中短期股價仍會不利，但長遠前景仍在的，有貨可守。但要留意，這股有風險，因此不能太大注。

車市要慢慢才好轉為這股要好長線先有野睇，所以要著重分析長遠的因素，唔好太理會中短期的情況。預期佢中短期有可能進一步弱，但所有野，都是有危有機，如果想買入後1年就有利潤，咁就買錯股了，這股從來都是長期的，預期2、3年後先有真正的爆發情況。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13268：

1. 如果想將一部分資金長線投放美股市場，應該買s&p500 定係數隻大型龍頭科技or零售的成長股較好。因為覺得s&p500 過度分散。

2. 可唔可以排序下2020，2313，669既優質度同潛力。

3. 呢3隻既未來十年前景如何。

4. 669同業多唔多競爭者，市場接唔接近飽和。

5. 2313作為代工廠護城河如何，盈利壓力同波動性有威脅嗎，代工廠係咪應該估值比低d。

6. 三隻都值得買？ 謝謝你🙏

龔成老師︰

1） 選擇數隻大型龍頭科技or零售的成長股都可以，但重點是這些係優質企業就可以。記住，我地投資其中一項好重要的，就是投資自己熟識的企業，若果對中港企業較為認識，就應較多在這裡選取適當的股票。

唔好因為近年美股的升幅不錯，多左人投資美股，就認為美股較好。

2 & 3）

創科（0669）主要從事製造與經銷電器及電子產品，有一定的優質度、有增長力，但又未到潛力股，只能視為平穩增長類，因為佢最高速發展的時期相信已過，現時已有相當的規模，相信往後只能平穩增長。

安踏體育（2020）製造及買賣安踏品牌體育用品，以及分銷國際品牌產品。集團全球化的戰略，令佢本身的生意及規模發展都不錯。

不斷增加資金去拓展業務，這必然有危有機，這點會令佢短期的派息能力較差，但如果你目標是長線就無問題。佢其中一個優點，就是在增長的同時，負債並無特別增長，這令企業的風險不算高。

申洲國際（2313）本質不錯的，近年的生意與盈利都有不錯的增長，加上佢股本回報率（ROE）處於高水平，反映佢雖然做代工方式為客戶製造針織品，但由於利用全縱向模式營運，令佢都有一定的優勢，有一定的賺錢能力。

三者都各有優勢，優質度相若，但以潛力計，則安踏和申洲會較高。

4） 雖然有競爭對手，但集團領先電池工具技術、改良市場原有工具技巧和成本跟生產效率控制得宜等因素，都令佢保持優勢。你留意番佢毛利率和純利率一直保持平穏上升。

5） 申洲國際（2313）以代工模式經營，主要客人如NIKE、ADDIDAS等都是大型品牌，理論上會降低了集團議價能力。但你睇番佢毛利率和純利率一直保持平穏上升，可見佢其盈利能力未受代工形式所影響。

6） 3隻都是優質股，可以長線持有，但現價偏貴，最多只可做月供或分注形式去小注買入。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13269：

本人27，月入21000，投資知識仲在學習中，今年1月先開始緊月供股票（月供$5.5k左右），而10月開始打算調整月供既金額

1211 $1500 （現有250股）
2800 $5000（現有845股）
0066 $2500（現有258股）

想問下以上金額分配合理嗎？

另會每月儲起$4k,現時大約有$80k, 存款，都明自己遲左好多起步，都希望35歲時可儲到150萬（年期都想愈早愈好），如果想達成目標，應點再安排？

另外呢幾個月都有不同既社會活動進行中，睇到的股價下跌緊，但我都明白買股票係買緊個間公司而唔應該只著重於股價，但點都會有的擔心

多謝你咁忙都用心解答問題，辛苦老師啦！

龔成老師︰

有心唔怕遲，現在起步也不算太慢。由27去到35歲尚有8年時間，以恆指年回報10%（連股息再投資）約有10%，以你月儲$13000計（月供9K+儲蓄4K），大約可以增值至178萬，當然要睇番到時情況，相信你達標機會很大。

你月供組合無問題，可以跟你安排。至於每月儲到的$4000，現時大市大致在合理區，你可以等大市出現一定程度的下跌，就投資在平穏增長股。

例如：盈富（2800）、金沙（1928）、恆基（0012）、中銀（2388）、港鐵（0066）、粵海（0270）、領展（823）或潛力股︰比亞迪（1211），中生（1177）或福壽園（1448）等，這樣會增長得較好。

近數月，香港社會出現不少不穏定因素，都令很多股票股價下跌。

但我地一定要了解股價下跌的原因，基本上，現時社會狀況造成股價中短期向下係好正常。只要了解翻當中的事情，無影響到企業核心就唔需要擔心太多。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13270：

龔成老師，想請教下你關於資產轉資嘅疑問。手頭上有幾百萬資產，正打算轉換貨幣做美金，但又唔肯定呢個做法是否明智之舉？ 換成美金 還是 開一個外國戶口 轉資 比較好？

另外，不知道老師有無留意近年新加坡嘅經濟發展潛力？轉資開戶的話，坡紙 同 美金 邊款較好？

我二十七歲 有一份穩定全職 最近見好多富商都逐漸有轉資風向 令我有呢方面嘅考慮 但有好多疑問出現 希望老師可以提點一下 想了解下老師的意見，謝謝

龔成老師：

如果你現時持有的是港幣，是否轉做美元，其實無所謂，因為有聯匯，你唔需要擔心港幣會出事，所以，除非你想投資一些美元類的資產，否則，唔需要刻意轉做美元。

至於坡紙同美金，最重要的，是「不要單單持有貨幣」，如果你持有的目的是單純外幣，意義不算大。因為「紙幣」只是「政府借據」，你單持有是無意義的，只會貶值，你一定要投資「外國資產」，先有作用。

因此，如果唔睇好香港經濟，應選定長遠睇好的地區，投資該地的資產，到時先轉相應的貨幣。

不過，我相信香港只是中短期問題，我仍對香港長遠發展有信心的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13271：

老師，見大快活跌左唔少
現價可否買入？
謝謝

龔成老師︰

大快活（0052）是有質素的，我都很喜歡這股。比起其他一些潮流飲食，我會偏向選大快活。因為香港人變得好快，潮流飲食的不確定性高，業務可以很好，又可以好差。

反而最基本，民生的必需品，好似大快活咁會更有投資價值。近期由於社會不穏定和經濟不景氣影響，股價出現倒退是正常的事。

但相信這些因素只會造成中短期影響，集團長遠質素不變。加上大快活定位偏向民生，較有抗跌力。現時股價合理，有長線投資價值，但中短期依然會波動，最好分注入市。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13272：

成哥，有人將2800 同安頓A50 比較，你點睇？

如長線持有，月供股票
2800, 南方a50, 安碩a50 邊樣較好，有咩分別

龔成老師︰

盈富（2800）是追蹤在香港交易所上市50間優質上市公司的股票組合

南方A50（2822）和安碩A50（2823）追蹤在深交所和上交所上市的50隻最大市值A股，由於2隻股票追蹤目標一樣，表現雖然都會有分別，但唔會太大。

盈富（2800）所屬香港市場比較成熟，價格波動無咁大。而大陸股比較波動，但長遠增長力會較強。雖然中國比過往年代增長較慢，不過長遠仍是不差的經濟體。

如果你想要較平穏增長，可選盈富。假若你想以有較大增長，以潛力為先可以南方A50（2822）和安碩A50（2823）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13273：

龔成老師你好，有問題想請教一下。本人看完你的著作，現在買了一手滙豐及一手恒生，因希望收息，見到中銀香港又不錯，想買一手，這組合可以嗎？

但你說過銀行股佔的比例不可超過30%，該買什麼代替中銀香港好呢？請賜教，謝謝

龔成老師︰

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

其實你可以用番「先增值，後現金流」作方法去審視番你的組合，初期應投資較多增值類資產，較後期則應投資較多保守類項目。

所以係放配投資項目時，會因應番你的人生階段。如果你年青，可以"平穏增長股"+"潛力股"，但你已近退休之年，就應集中在"收息股"去創造平穏現金流。

你可以因應番你架年齡，去審視番你現有組合是否適合 ，同時可以在當中找中銀香港的替代股。

平穏增值股︰盈富（2800）、港鐵（0066）、金沙（1928）、恆基（0012）、中銀香港（2388）、恆生（0011-增長力稍遜於中銀香港）、長建（1038）、粵海（0270）

潛力股︰比亞迪（1211）、中生（1177）或福壽園（1448）

收息股︰港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13274：

成哥，想問下同仁堂國藥3614同 1666科技，而家兩隻邊隻值得買D？同埋我成日搞唔清香港同仁堂D鋪係屬於 1666定 3613？

龔成老師︰

同仁堂科技（1666）主要從事醫藥技術開發、技術諮詢、技術服務；製造、銷售中成藥、生物制劑。

同仁堂國藥（3613）則是同仁堂（1666）旗下企業，主要集中在生產、零售及批發中藥產品和保健品；並提供中醫診療。

故你所講的同仁堂香港店，其實都屬於這2間企業，只不過同仁堂國藥（3613）係直接管理。

由於同仁堂集團收入主要來自銷售中藥產品，故同仁堂國藥（3613）較有增長力。但要留意，這類股的行業變化較大，同時研發上，無可避免有風險。雖然同仁堂算是藥業保健股中，較穩健的一隻，但都無可避免受行業不確定性影響，因此，只要投資不太大注。

整體而言，2隻股票都有投資價值。現時同仁堂科技（1666）估值合理，而同仁堂國藥（3613）有點貴，如果買都要分注進行。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13275：

龔成老師，本人買了你的投資教學書籍, 獲益良多，在此感謝!

本人40歲單身, 剛剛5月買了一層560萬300呎40年樓齡的單橦樓係天后區自住. 因為社會不懚時勢所以樓價已下跌。不過如老師所說, 如果自住又供得起就不用太擔心. 我想用餘下的錢作以下部署作60歲退休（1300萬）, 想
老師結予一些見議:

1.投資成份保險月供$3000, 已滾存50萬 - 不變

2. 公司ORSO 月供11000, 已滾存50萬 - 不變

3. 存款 10萬 - 計劃買入盈富，恆地, 港鐵

4. 每月收入扣除開支剩1萬, 計劃每季買入以上股票 （因為工作關係所以不能月供）

龔成老師︰

你想法正確，由於你物業是自住性質，故樓價波動唔需要理，最重要係供得起。

當我地進行人生財富累積，會運用「先增值，後現金流」作方法，年青時應投資較多增值類資產，以增值為先，而較年長時則應投資較多保守類項目。

以你年紀，尚有增值能力。所以你選擇的平穏增值股：盈富（2800）、恆基（0012）、港鐵（0066）都是可以的。建議你比重放較多在盈富，可以令你組合更平衡。

而你用每季固定金額代替月供股票，這個策略都可以做到平均格價效果，所以無問題。但你每季只會儲到3萬元，不足以3隻股票各買1手，所以你可以全數買晒盈富（2800）就可以了。

現在離你60歲尚有20年，以恆指年平均回報10%計，季供$30000到時大約會有680萬，以完成你目標一半以上。

只要你ORSO和投資保險回報唔係太差，相信到時你60歲累積到的總資產和你目標唔會差太遠。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13276：

龔成老師你好，小弟今年27歲，月入7萬5左右。現在手持大約120萬現金，有份十年儲蓄（每年供1萬美元，已供兩年），扣除保險及各項開支，每個月儲到6萬~6萬5。

中短期目標想買樓自住，長期就當然係財富增值。老師，想問你點睇而家個樓市？我而家係咪應該做住財富增值（例如月供股票），再睇睇個樓市變化再決定，抑還是繼續儲多d彈藥（現金），作好短期內上車既準備？ 謝謝！

龔成老師︰

相信中短期有可能出現調整，但當中仍有未知數，而我一向不太預期中短期的，不過，我好有可能在一年內增持香港物業。至於長期，因為需求大，供應仍然不足。因此長遠仍會向上的。

香港樓現價略貴，投資價值的確較少，但自住價值仍在。現時香港樓市比合理價，貴左少少，唔算太多。如果你短期內有迫切需要買入一間屋自住，你要留意番供款，只要得起樓價變動唔需要太理會。

否則，現時以回報計股市會較吸引，對你財富增值較有效。現時大市在合理區，你可以將每月一半儲蓄（作月供）和一半現有資金（要分注入市），投資平穏增長股︰盈富（2800）、金沙（1928）、恆基（0012）、中銀（2388）、港鐵（0066）、煤氣（0003）、港交所（388）、長建（1038）。和小注潛力股︰比亞迪（1211），中生（1177）或福壽園（1448）。

餘下的資金，等大市大跌再入市，會對你財富增值效果提升。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13277：

龔成老師:想問現在香港甘乱,經濟ㄧ定會很差 ,手上的股票由盈轉虧,港鐵是否还可以長期持有?

1177現在還有盈利,是不是先賣出先?要不要止蝕?還是跌低買入?謝

龔成老師︰

首先，你要明白投資股票，就等同投資企業，我地要考慮的是企業質素和前景。基本上，就算是優質股，股價中短期上落好正常。但如果上落太大，就要了解翻當中的事情，有無一些影響企業核心的因素。

我相信香港現時的社會狀況，中短期會對股市方面會有負面影響，但受影響程度，就要睇外國真正的走資金情況，當中還有都好多變數。

不過我相信，長遠資金唔會大走，始終香港都是有優勢，有錢賺的地方就有資金來。因此，我相信中短期有影響，但又唔需要過份地擔心。

港鐵（0066）中短期的確不利，但長遠而言，香港的長遠發展必然是向著新市鎮，鐵路系統必不可少，將來社會對鐵路這個大型運輸系統的依賴必愈來愈多。

加上政府亦表示這會是發展的重點，故無論是鐵路以及相關的物業，都會保持增長，長遠計必然向好，持有無問題。

中生（1177）因中央出左d藥品降價的政策，「以藥品規格採購試點進行，據透露本次帶量採購的具體操作方法，是按藥品通用名進行遴選，企業必須要保證有足夠的生產能力，價低者得」。所以，預左對行業有影響。

不過，中生製這類咁大的企業，財力較強，就算市場出現中短期的亂局，只會淘汰左一d無質素無實力的企業，長遠對佢影響有限。但賺錢能力減少，企業無可避免去扣少少分，但依然有質素，可持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13278：

呀sir，宜家個個都覺得零售業受最大影響
同埋佢地股價都跌左唔小，咁係咪適合掃貨？

利福/莎莎/周大福/六福呢d股係咪要把握機會掃多d

龔成老師

你的方向正確。

我地投資，永遠是睇企業的長期業務面，中短期的事情與股價波動，不用理會。

上述的股票，長遠仍是有質素的，但中短期一定會弱，而我地投資者正是把握「中短期不利事情令股價受壓，從但長期因素無變」的機會入市。

不過，現在的股價仍未算好平，同時股價會波動，因此，未到訓身的時候，但已是合理區中下部，可以分注投資長線持有。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13279：

龔成你好! 我想請教現市的投資方向，我和先生每月9萬收入，有一BB &工人，之前3月在自住樓套了200萬出來。

現自住樓每月供款增加$6,000（負現金流$6,000）

在4月（高位，約100萬首期，8成按）買了一細價單位收租，每供$15,000，收租$12,000（負現金流$3,000，未計$800管理費）

現持股票$40萬（港鐡、煤氣、金沙、比亞廸，知識有限，只懂呢幾隻）
現金$120萬HKD

現香港情況差，又撤資又乜乜
1) 我是否需要轉持美金？
是否要開海外戶口？（保住自己既錢）

2) 我如何運用現款投資？
(例如：買REIT收息幫補負現金流，會否賺息蝕價？High yield bond fund收息如下圖有無得諗？環球吹淡風，風險高嗎？)

謝謝你的時間！

龔成老師：

1）不用轉。

香港只是面對中短期問題，長遠仍是有前景的，同時，港幣有聯匯，不用擔心。

當然，你可以在長遠建立一個環球的組合，這是任何時候都可以的。

2）你這刻物業的比例較多，宜增持翻股票的比例，以你的情況，我相信平穩增值股如盈富（2800），以及收息股都是你的選擇。

收息股不要再投資太多地產類的股票，可以考慮翻港燈（2638）、香港電訊（6823）、深高速（0548）等這類股會更加好。

至於債券基金，則有好多的，這一定要仔細睇先得，有d則有潛在的風險，絕對不是保本的產品。

第一，有些基券基金，會投資「高收益債券」，即是「垃圾債券」，你一定要睇睇佢所佔的比率。

第二，債券基金往往不是單純地持有債券，而是可以作買賣，以及利用衍生工具作對沖等策略，即是可能有價格上的波動。你要睇下該基金的策略，是否高風險。

第三，不少銀行都會提供借貸，以槓杆去放大回報，以平息借貸去賺取息差。這一定會提高了風險。

我不是說債券基金有問題，只是說明當中的風險，最重要的，這不是保本產品。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q13280：

想問下金界合理價位係幾多？
現價應唔應該入？

龔成老師：

金界控股（3918）有質素的。現價合理中上部。

佢是柬埔寨最大的酒店、博彩及娛樂運營商，旗艦NagaWorld是金邊市唯一的綜合式酒店及賭場娛樂城，持有為期達70年至2065年的賭場牌照，NagaWorld僱員人數超過5500人。

賭業本身是高毛利行業，而金界壟斷了金邊的業務，加上業務平穩，財務穩健，沒有未償還借貸及債務，企業有一定的質素。

但要留意，金界所發展的是較新興的市場，若然比較澳門的賭業股，金界的增長及潛力較大，但當中的風險同樣略高，因為業務難免存有不確定性，這點你要明白，亦因為這原因，若投資此股，在注碼上不能去得太盡。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。