《原來很多人也在訂婚後，才分手》

阿怡今日在公司受到了眾人的祝福，
因為在IG post中，她說自己Say了Yes。

然而，她其實不想出這個IG Post的。
只是這個時代…似乎不容許一個人「突然結了婚」，還是需要在Social Medai留下一點節奏。

但為何要抗拒？
大概是因為真相…
不是他主動問「WILL YOU MARRY ME」。

而是她主動地問：「你幾時會問我…WILL YOU MARRY ME？」

這是很大分別的。

＝＝＝＝＝＝＝＝＝＝

阿怡的男朋友阿Man，
性格與英文名相反，沒有太多陽剛味，為人沒有侵略性，隨偶而安。
他常說：「我人生最侵略性嗰次，就係追你啦！」

兩個人由26歲戀愛，到30歲。

阿怡是抱著「不能回頭」的心態開始這段關係，
因為一個人遭遇多了，再多遭遇就很糟了。

阿Man也「不想回頭」，因為回頭嘛，很煩。

一直相安無事，兩小口子經過無數故事。
『也是時候…想想將來了，對吧？』

這句內心說話，雙方同時想起，是幸運。
而阿怡，從來沒有這種運。

四隻腳，開始走上兩種不同的步調。
＝＝＝＝＝＝＝＝＝＝

阿怡問自己…是不是她太煩，
她實在不想自己落入「逼婚」的名號內，感覺…地位很低賤。

這張婚紙的commitment，說需要又不是必要。
但是否想要？
又真的想要。

她恨自己有點庸俗，
但想和一個自己喜歡的人結婚，簡單如此，又為何要弄至腦交戰？

可能是因為眼前這個男人，
有種「不主動踢，就不動了」的感覺。

「喂，其實你如果…已經唔鍾意我，可以早啲講喎。」

「吓？鍾意呀。」

「咁…都咁多年，我哋諗下之後一齊住？或者簽張紙咁？」

「吓…？唔使嘛。仲有大把時間喎，有時間搞下囉。」

這個男人嘛，有時間，都真的只會「搞」，
其他事，都不太會搞。

這一年，她其實不止一次明示暗示，想對方表態。
她不介意對方放棄自己，畢竟這是很Fair的。
最令她介意的是對方往往帶點「uncertain」。

＝＝＝＝＝＝＝＝＝＝
對方的回應愈曖昧不明，阿怡就愈會尋根究底。

終於到最後，甚麼明示暗示都徹底放棄。

一句到尾：
「其實你想唔想同我結婚㗎。」

「呃…都可以嘅…」

「咩叫都可以啫，覺得唔想咪唔想，想咪想囉。咩叫可以。」

「『可以』即係唔抗拒，但又…唔係好話…一定要咁囉。」

阿怡差點就哭出來。她委屈地說：
「咁如果我想呢？」

阿Man雖然Hea底，但也是帶著腦袋做人的，於是連忙說：
「可以。唔係唔係，咁我都想，結囉！」

隨後，阿Man連求婚的動作也沒有，以為「咁就已經足夠」。

還是要阿怡三催四請，出動了姐妹Jasmine，
暗地為阿Man籌備一切，才有一幕「毫無驚喜」的求婚。

坦白說，阿Man遞上的戒指，也是阿怡買的。

她這刻著實是哭了。
但不是感動，而是無奈。

＝＝＝＝＝＝＝＝＝＝
這幾天，眾人的祝福，對阿怡而言，都是一個又一個的疑問。

因為大家都是
「要幸福呀！」「白頭到老！」「永結同心！」

『我可以嗎？』

這一天，是試婚紗的日子。

阿怡戴著「問號」去披嫁衣；
阿Man即還想著「Mon Hunt刷裝」去試西裝。

情緒是累積的，
這一天，自然是不歡而散。

Jasmine安慰阿怡：「算啦，結婚前多數都會鬧下交。」

阿怡：「其實…我們今日無鬧交。因為，我哋已經搵唔到嘢去鬧對方啦。原來呢個感覺係…好恐怖㗎。」

Jasmine：「咁，你係咪要認真諗下…係咪繼續？」

阿怡：「都通晒天，仲可以唔繼續咩？」

Jasmine：「如果唔啱，點繼續呀？繼續錯落去呀？」

究竟…自己喜歡阿Man那一點呢？阿怡這晚回到最基本的問題上。

原因說不出，但的確是喜歡的。

好，下一個問題。

『喜歡的人娶自己』是否已經足夠？

『不足夠。』

為甚麼？
問完這個問題…阿怡總算明白了。

＝＝＝＝＝＝＝＝＝＝＝＝＝＝＝＝
趁著酒席還沒下訂、婚紗還沒選好、喜帖還沒印起。

阿怡向阿Man說：
「我哋…都係唔好結婚啦。」

連月的忙碌，阿Man心情已差，一聽就把枱上的東西全掃在地下：
「陳安怡！你又玩咩呀！結又你話結！而家又話咩唔結！你想發脾氣咋嘛！發還發，講嘢經下個腦啦！」

阿怡：
「我係認真㗎。」

她沒哭。
阿Man明白一個女人，在這一刻不哭的原因只有一個，
就是她在之前…已經哭過了。

此時，才發現…這個女人紅腫的雙眼。

阿Man：「嗱…總之咁…而家呢，親朋戚友全部都知，所有嘢都in progress。
除非你可以講到一個原因，係我駁唔到嘅！

如果唔係，照結先啦，唔好煩啦。好唔好。」

終於，阿怡落下斗大的眼淚，止也止不住：
「因為我知道…你都係因為『唔好煩啦』，先同我結婚。」

阿Man回不上話，合上了雙眼，呼了一口氣，沒有反駁的餘地。
因為她…不幸說中了。

『喜歡的人娶自己』
與
『喜歡的人想娶自己』

對於另一半而言，
也是，有很大分別的。

IG: cheungson88
https://www.instagram.com/cheungson88/
（很少人Follow的acc，有時說說生活事）

MeWe：張晨
https://mewe.com/p/張晨
P.s. 用app有機會彈app…可搜尋「Cheungson」

《法羅婚禮-註冊篇》
通常講起海外婚禮，大家會諗起泰國、峇里、沖繩呢d熱辣辣嘅海島。但係大地之友有無考慮一下喺凍冰冰嘅法羅群島舉行婚禮呢？我自己就係前年喺法羅群島註冊，再喺上年喺法羅補辦婚宴。估唔到喺兩年後，再有香港人喺法群島註冊，仲邀請左我同大地之子出席佢地嘅註冊儀式❤️ 佢地係一對同志戀人，自2017年7月1日起，同性婚姻喺法羅群島合法化。我問佢地點解選法羅群島，佢地話手續最簡單方便。到底有幾簡單？今日我同大地之友們分享下，等好事近嘅你地有多一個選擇❤️

註冊儀式會喺首都Torshavn 市政廳舉行，通常由市長主持，如果市長唔得閒就會由其他City Council 嘅成員主持。儀式會用英文進行。喺你計劃註冊嘅日子至少一個月前，要準備好以下文件：
1.雙方出世紙
2.婚姻狀況證明
a,如果你未婚就要去婚姻註冊處攞一張無結婚記錄證明書，俗稱寡佬證
b,如果你離過婚，就要交出離婚證明
c,如果你曾經喪偶，就要交出過身配偶嘅死亡證

記得所有文件要係英文，如果唔係英文就要搵翻譯人員翻譯成英文。準備好文件之後，就可以send 去 City of Tórshavn 嘅電郵：torshavn@torshavn.fo，當佢地收到電郵之後就會send返張Notice of Marriage 嘅表格畀你，你填好表格，簽好名再用電郵回覆返佢地就得啦😊

而婚禮當日，你需要帶兩位見證人，喺婚姻證書上簽署。你要將呢兩位見證人嘅名字同地址喺電郵告知City of Torshavn 。如果你未能帶上兩位見證人，亦都要喺電郵告知，咁佢地就會準備兩個員工做見證人。

當你完成以上嘅程序，就可以預約日期啦😊婚禮完成之後，你會收到兩份婚姻證書，一份英文，一份法羅文。

成個註冊儀式係免費嘅😊

今日好開心出席到呢對香港人嘅婚禮❤️成件事好神奇，我同佢地之前無見過面，但係竟然喺法羅群島出席到佢地嘅人生大事。祝你地永結同心，白頭到老❤️❤️❤️

今日就先分享註冊儀式，如果你會邀請親朋好友黎法羅出席，咁就要準備婚宴啦！到底喺法羅搞場婚宴要幾多budget?下一次再同大家分享😊😊😊😊