昨晚靜下來，好想寫一篇關於養寵物的文章。 自從Bo哥的離去，我有留意多了不同的狗狗group及新聞，有些主人真的嚇得我死，狗狗痾了一星期仍不帶牠去睇醫生上網問點解，隻狗未死就做定哂善後工作又有，有需要咁急嗎？做主人都放棄，狗狗也不會有生存意志吧。男女分手，男的走咗去唔理唔交租留下一班狗，女嘅一星期回去餵糧一次叫有啲愛架啦。我在諗，養寵物特別係養狗除咗攞狗牌之外，可唔可以好似揸車咁考牌呢？我時常看見工人姐姐攞住電話坐埋一邊兩隻狗好無奈咁望住佢玩電話咁就叫放狗？ 大家有冇真心諗吓，究竟大家點解要養寵物呢？因為是禮物？個樣得意？愛心？ 我一位朋友講得好好：「人類有自己嘅事業，只要你唔係懶餓唔死嘅，亦有自己嘅朋友同可以選擇自己嘅娛樂、興趣，而寵物呢？佢地眼中只有你主人，佢地嘅家人。」每日作為寵物嘅佢地就係望住主人幾時返來，返來有冇時間陪吓佢，帶吓佢出去玩，佢地嘅生命就係操控在主人手上。 我想講養寵物其實係要負責任的，唔係同佢地玩、俾嘢佢地食、有地方俾佢住就係主人，而係心靈必須要相通，佢嘅情緒同行為也要重視。 如果你真係想養寵物，當然首選希望係領養啦。因為佢地有機會可以教識你點樣做個好主人。放心一句，人係有自由嘅，我唔係那種你買狗我就會鬧爆你嘅人，不過都係最好領養啦，因為真係有好多動物需要人類幫忙架。 好，講現實點嘅問題啦 1）住屋問題，究竟是否合適養狗呢？萬一原來你家係唔養得狗，被發現唔可以留，佢嘅去向會點呢？特別係狗，佢地特性係會吠架。 2）需時照顧好緊要，唔係只係同佢地玩，有好多嘢要教，其實同養一個人仔無分別，除咗好啲嘅係唔使教佢地讀書，唔使考DSE外。仲有，要佢地聽話唔係一朝一夕，嚴格、用心、耐性係令佢地出到街都唔會俾其他狗或人傷害到主要問題。 3）取回來年輕的冇事冇幹當然只需要糧、零食費用，食得你幾多錢呀，但佢地都會年長，年年驗身的費用，打針費用，年幾大大吉利是佢地的醫藥費真係唔平的，貴過人都有，我朋友的狗五歲患白內障，你醫唔醫呀，每隻五萬，佢四隻都有，即係廿幾萬，唔係話我知由佢呀？現在狗的平均年齡已經可以係十幾歲，怎至養得好我聽過二十歲都有。我剛去世的狗狗，走時14歲，佢無拉拉有腫瘤，我每月放响佢睇醫生、食藥使費要八千幾蚊。如夜麻麻急病睇門診，未見醫生八舊幾，要埋藥就兩千幾落樓，可能只係肚痾或嘔，但等第二朝有事先睇又未必等到。我第一隻由bb養到大的狗做完兩萬幾蚊手術過幾日就走了，呢啲就係會有機會會發生的事實。 我唔係想嚇大家唔好養寵物，只係有機會會遇上嘅現實問題，所以我好希望愛寵物之人當想養寵物嘅時候真係要有心理準備同真係有能力支持下先好諗養寵物。 俾我Mean一句，佢地仲會大小二便，要清潔架，唔清潔你家會有味，也不能大量用飄白水，會影響到佢地嘅嗅覺。最重要係時間，沒有教不好的寵物，只有不懂教的主人。貪圖一時覺得佢地得意可愛，建議買毛公仔就無以上問題。 多謝耐心睇哂我肺腑之言嘅朋友。 #養寵物 #停一停諗一諗 #這才是真正的開始 #mynameismuichu #goofyandmuimui #chihauhau #dogstagram #dogslife