#水墨青花 (旺角) 旺角旺角道97號華懋王子大厦1樓H室 ----- 返工返左成個禮拜 難得到左週末 就想約下朋友出街 行行逛逛 hea一hea 輕鬆一下 奈何室內商場人頭湧湧 非常擠逼 室外天氣悶熱 係條街到行黎行去 又熱又曬 B仔就提議朋友仔搵間coffee shop坐下 涼涼冷氣 當我地搵緊附近有咩Cafe嘅時候 搵搵下突然比我地搵到呢間 個名非常具文青氣色嘅茶室 由於旺角cafe多到眼花繚亂 所以呢間茶室就喺眾多Cafe入面顯得格外脫俗😄 - 未去過茶室嘅我地 本身有d擔心入面全部都係老人家😂點知上網詳細research下發現 茶室原來係一個90後靚女開嘅 由於係後生女做老細 感覺應該會比較年輕化 所以我地就抱住冒險試新野心態 上去一探究竟😁 - 茶室裝修風格清幽淡雅 以黑白為主調 有超大採光玻璃窗及兩張四人檯 隔聲做得非常好 一閂埋門 就完全聽唔到旺角鬧市嘅噪音 係網上見到嘅靚女店主唔係鋪入面 不過好彩都有一個好溫柔斯文嘅靚女店員係到招呼我地☺️ - 茶室以計時任飲嘅模式經營 每人每個鐘$48其後每小時$15 除左少數特別貴價嘅茶要另外加錢享用之外 其餘各式各樣嘅綠茶 白茶 烏龍茶 紅茶 黑茶等等都可以隨意無限任飲 種類非常之多 而茶嘅飲法則有三種 第一種係蓋碗 即係俾個有茶葉嘅茶杯你自己沖茶 第二種係玻璃茶壺 即係店員會幫你用熱水沖製茶葉 再擺喺蠟燭上面加熱 等你可以輕輕鬆鬆咁係茶壺到倒出嚟慢慢品茶 最後一種就係冷泡樽 即係店員會預先沖泡好 擺喺玻璃樽入面雪凍比客人飲 三種體驗可以自由選擇 你鍾意嘅話可以三種都體驗晒都得 😁 - 由於朋友趕住返屋企食飯 所以我哋只逗留左大概一個鐘左右 因為時間得短短一個鐘 所以我哋淨係試到兩種茶 分別係冷泡2019年白牡丹王 同埋阿里山紅烏龍 前者冰涼透心 花香突出 飲落清新甘味 後者則濃醇並存 入口溫潤 兩者各有各嘅層次 各有各嘅特色 比起市面上普通台式茶飲店嘅純茶真係有過之而無不及 我哋一人攞咗一本書 一邊嘆茶 一邊享受呢種好似與世隔絕般嘅片刻寧靜 係個一剎間 真係有種煩惱一掃而空嘅感覺 非常relax 可惜快樂嘅時間過得特別快 由於我哋仲有好多茶想試 但係又要趕住走 所以就直接買咗一盒有八款味道嘅茶返屋企試吓 返到屋企沖左幾種同屋企人一齊飲 連平時飲開茶嘅Daddy都話d茶靚啊！😆 - ♥︎除左茶之外 餐牌內仲有好多款唔同嘅佐茶小食 價錢大部份都係10幾蚊就有交易 ----- 👶🏻B仔整體評價：8.4/10個👍🏻 👶🏻B仔抵食程度：8/10個👍🏻 👶🏻B仔環境評分：8/10個👍🏻 👶🏻B仔味道評分：9.5/10個👍🏻 👶🏻B仔回頭機會：8/10個👍🏻 ----- #swallowhongkong ☺️快D跟住B仔一齊吞食香港啦！🤤 #swallowmongkok