去睇牙醫，但係唔刷牙？ 仲記得我上個禮拜因為牙痛去睇牙醫，做咗一個小手術之後就冇咁痛喇。 下個禮拜仲要去複診，好感激牙科醫生專業嘅診斷同埋治療，如果唔係我隻牙都唔知點算好。 當然啦，做完手術之後我都唔可以亂咁食嘢，亦都要注意口腔衛生，勤力同用心機刷牙，如果唔係就白費咗醫生悉心嘅照料。 前幾日去Donki睇嘢嘅時候，見到咁大支波板糖，充滿想像力嘅我內心load左一load，心裡面幻想，可以同醫生講：「醫生，多謝你呀，咁努力幫我治療，請你食丫」 如果醫生話唔食嘅話，我仲可以話：「俾你啲病人食呀！你一定客似雲來啊！」😂😂😂 咁樣做當然好荒謬啦，呢個只係喺我腦海中幻想嘅對話，我現實裏面絕對唔會咁樣講出嚟。 如果我真係咁講出嚟，我諗醫生內心真係暈低咁制。 其實教學同醫療一樣，唔可以淨係當係生意咁做㗎，有啲人會話，你梗係會想啲人英文差啲啦，英文差啲你咪生意好啲囉。 但其實學生英文差，老師就會教得好辛苦，就好似你平時唔刷牙，蛀牙嘅時候搵牙醫，唔通你覺得牙醫真係好鍾意賺你啲錢咩？ 當我有學生，上我嘅課程，但係返到屋企完全唔接觸英文。 我個感覺就係好似牙醫一樣，見到病人平時唔刷牙，搞到啲牙蛀晒先來搵醫生一樣，感覺一啲都唔好受。 所以，如果可以嘅話，我都盡量會鼓勵學生，平時要多練習，多接觸英文，唔可以淨係倚賴老師㗎。 如果上咗堂就乜都唔理，其實同去咗睇醫生唔食藥，或者去咗睇咗牙醫但係唔刷牙係完全冇分別㗎。 老師並唔係神仙，唔可以將你嘅英文水平起死回生，老師嘅角色，只係畀指引你，唔係幫埋你學。 唔好對老師千祈唔好對老師有不切實際嘅期望啊！