【搶到 #漂白水 又如何？你識得點用嚟清潔消毒嗎？】⁣ ⁣ 香港確診新型肺炎個案不斷增加，為保障個人及家人健康，近來好多人都加入搶購漂白水行列，打算為家居徹底消毒，拒絕病毒在家散播。漂白水係一種強效嘅家居消毒劑，但由於具刺激性，使用時要小心。咁辛苦先搶到漂白水，你又係咪真係識得用，真正做清潔家居，抗疫於家門外呢？⁣ ⁣ -------------------------------⁣ Follow @likemagazinehk | 每日送上優質生活Tips⁣ -------------------------------⁣ ⁣ 使用前要稀釋⁣ 漂白水主要成分係氯酸鈉，能使微生物嘅蛋白質變質，有效殺滅細菌、真菌及病毒。漂白水對黏膜、皮膚及呼吸道具刺激性，遇熱和光會分解，亦容易與其他物質產生化學反應，所以使用時必要小心。不當使用唔止影響殺菌力，更有可能造成意外，危害健康。⁣ ⁣ 漂白水要點用呢？清潔家居，一定稀釋。一般市面有售嘅漂白水，氯酸鈉濃度為5.25%。若用來定期清潔家具，例如經常接觸的地方、浴室及地板等，可以1:99比例來稀釋，即係1份漂白水用99份清水混和，用毛巾沾稀釋液用來抹擦。但記住，漂白水要避免用於金屬、羊毛、尼龍、絲綢、染色布料及油漆表面。除不锈鋼外，不應用漂白水嚟抺拭金屬，或浸泡金屬製品。如要清潔消毒金屬面，使用70%酒精就可以。家具、地板等用稀釋漂白水抹過後，須再用水清洗並抹乾。至於家中嘅垃圾桶，除咗每日要清理外，定期要用1:49稀釋漂白水消毒。如用漂白水消毒被嘔吐物、排泄物或分泌物污染的表面或物件，使用 1 比 49 稀釋家用漂白水就可以。⁣ ⁣ 稀釋漂白水時，有幾點要留意。⁣ 1. 千祈咪貪方便，用樽蓋嚟量漂白水分量。消委會做過調查，發現唔同品牌漂白水嘅樽蓋分量唔同，建議大家用湯匙或量杯嚟量，分量會準確啲。或者事前要先清楚樽蓋嘅容量，再自行配調。⁣ 2. 若果你所購買嘅漂白水，氯酸鈉濃度唔係5.25%，無論高於或低於呢個數，稀釋時都要相應調整。計算公式係5.25÷漂白水嘅氯酸鈉濃度。假設你買嘅漂白水嘅氯酸鈉濃度係5%，用公式計一計，5.25÷5 ，所用分量倍數係1.05 倍，即是用 10 毫升 x 1.05 = 10.5 毫升漂白水來調校濃度。⁣ 3. 稀釋時要用凍水，因為熱水會令漂白水成分分解，失去效能。⁣ 4. 由於次氯酸鈉會隨着時間漸漸分解，經稀釋嘅漂白水應該喺準備後24 小時內使用，以確保其消毒效果。⁣ 5. 調校或使用漂白水時要開窗，使空氣流通。⁣ 6. 一開場已經講咗，漂白水具刺激性，所以調校或使用時須佩戴保護裝備，例如口罩、手套、護 眼罩及膠圍裙等。事後要用梘液洗手，用清潔嘅毛巾或用完即棄嘅紙巾抹乾雙手。⁣ ⁣ 禁與其也清潔劑一併使用⁣ 由於疫情愈來愈嚴重，好多人擔心單用漂白水都未必能完全消毒，清潔家居時會考慮用埋其他清潔劑。記住，使用漂白水時，唔可以同其他家用清潔劑一併或混和使用，否則會降低殺菌功能，以及產生化學作用，產生有毒氣體，造成意外，令身體受傷。如有需要嘅話，應該先用清潔劑清潔，用水過清後先用漂白水消毒。⁣ ⁣ 必倒高濃度入水渠⁣ 好多人猶記得當年沙士嘅傳播途徑之一係廁所嘅U型渠。雖然今次新型肺炎都可經糞便傳染人，但大家清潔家居時，切勿將高濃度及未經稀釋嘅漂白水倒入水渠，否則有機會腐蝕金屬管道。日子耐咗，或者一座大廈個個都咁做，渠道有機會洩漏，也有散播病毒風險。另外，完成消毒後，清潔用具要浸喺稀釋漂白水中30分鐘，然後用清水沖洗乾淨先可再次使用。由於未經稀釋嘅漂白水喺太陽光下會釋出有毒氣體，所以大家應將漂白水放置喺陰涼及兒童接觸不到嘅地方，以策安全。⁣ ⁣ 過期清毒力減⁣ 之前都講咗，漂白水放耐咗會分解，就算疫情影響下，唔係咁易買到漂白水，但一般家居都用唔到太多漂白水，所以大家用幾多買幾多，無謂囤積。購買嘅時候，都要留意保存限期，一般為樽身標示日期起3年內使用。買咗過期嘅漂白水，消毒效果大減。再三提醒大家，使用漂白水時務必要小心，避免接觸眼睛。如果漂白水濺入眼睛，須以清水沖洗至少15分鐘，以及盡快睇醫生。