【龔成問答信箱】（Q22561-Q22680）

Q22561：

想請教如何分析物業是否有質素？是否從地點上分析？我手頭上兩個物業，一個在西營盤港鐵站附近，另一個在馬鞍山港鐵站附近，附近也有幾個大型商場和公園。

西營盤的樓齡比較高，而馬鞍山是新樓接近十年樓齡。

是否港島區的樓一定會比新界、九龍的樓優質呢？

謝謝！

龔成老師︰

最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論。

一般而言，港島區樓係會相關較有價值，因為長線土地供應有限，而且又有中環這個主要商區存在，會較睇高一線。

但當然，我地都要再仔細分析，持有物業有無其他優勢或問題。

西營盤始終算係接近中環一帶，地理上會有一定優勢，加上你近港鐵站，係加分位。而且將來明日大嶼計劃中，如果將有道路連接西環地區，都係一個潛力所在。

但由於你物業有一定樓齡、維修保養會係有一個考量。另外，較高樓齡的物業，按揭年期都會較短，有機會令新投資者郤步。

至於馬鞍山，同樣近港鐵站係加分位，加上港鐵站附近生活配套都較完善，都會令投資價值提升。

近年屯馬線通車﹐進一步令交通完善，有利於居民進出東九和中環這2個商區，故都有一定投資價值。

------------------------------------------------

Q22562：

點睇1022飛魚科技

我高價買，而家蝕左好多

龔成老師：

如果從過往的業務情況，飛魚科技（1022）質素不太好。業務不穩，持續虧損，投資價值不高。

之前得到騰訊（0700）入股，往後會提高企業價值，潛力度高左，但由於仍有未知數，業務不能推算一定成功。只可以話，不宜持貨太多。

------------------------------------------------

Q22563：

騰訊比高位跌唔少，已經無質素？

龔成老師：

騰訊（0700）仍有質素。但受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

------------------------------------------------

Q22564：

老師，想問如想長缐收息，中銀香港同工行比較，怎樣選擇？工行現價好似持續偏低，是否比中銀香港更抵買，或買了工行會否賺息蝕價？

龔成老師：

兩隻都是不差的優質股，而中銀香港（2388）在長遠發展及增長力上，會略好。

中銀香港（2388）係本地銀行股裡面，是較有質素的一隻，有長線投資價值。

不過，整個銀行業的賺錢模式已有減弱，無以前咁好賺，之後主力是收息及平穩增長模式。現價合理。

至於工行（1398），其實本身質素都不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，現價投資可以，因為在合理價，但唔好對股價有太大期望。

同時，佢前景算是不過不失，中短期會因中國經濟有影響，銀行業的賺錢能力不及從前，加上壞賬因素，都會令佢中短期弱。不過，初步已好轉，但不是高增長型。

而長遠，會慢慢穩定的，不過，增長力不強。

------------------------------------------------

Q22565：

老師，我買了6666恆大物業，這股票急速下降，我7.x買現在跌到@@

是否應該加倉，我知道這股有一定質素，想問老師現在應怎麽操作、持有股份不多，大概6000股，感激！

龔成老師：

我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

恒大物業（6666）算是恆大系裡，較高質素的一隻。不過，現時整個系都有風險，要小心，小心。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務。

由於始終有風險，只建議你小注持有，原有貨就守，但不要加注，你預佢上落都大。

------------------------------------------------

Q22566：

老師，我最近考慮買居居自位，但20年後 居屋樓齡已達50年。

下手買家無法做9成按揭 只能做8成

市場範圍狹窄也不用怕嗎？

龔成老師：

居屋有自住價值，但始終投資價值，會比私樓差少少。但我相信，不會大幅貶值，日後賣出仍可。

但你首先應以自住角度去想，如果有自住需要，買居屋後每月可省去一些現金流，就算日後的售價不及私樓，只要能在這段時間，利用節省現金流的數目去進行投資，只要投資滾大到一定的財富，其實已經做到財富增長的效果，因此無問題。

------------------------------------------------

Q22567：

龔sir你好。我之前買左楓葉教育（1317）和睿見教育（6068）諗住作長期投資，前者買入價為1.87，後者為4.3。請問兩者既買入價，算不算是合理價

我見現在中央對教育行業既規管加強左好多，特別係K12教育呢方面，有人說直頭毀滅左呢個板塊。

學生想問下，現時既楓葉教育和睿見教育既本質是不是已經完全改變了？還有沒有投資價值呢😅學生我現在應該繼續持有好還是止蝕好

謝謝老師

龔成老師：

由於教育政策大方向是收緊，因此，建議減部分。但這兩股，又未去到劣質，因此，你餘下部分守都可以。

楓葉教育（1317）不是無質素的，但教育類股票增長力比過往減慢，加上政策因素，成為不確定性，始終市場都會擔心之後不少有甚麼政策。

佢的賺錢能力，確的有影響。

睇翻近幾年，教育行業的政策，中國政府都偏向收緊，無論在學費收費上及發展上。

由於市場擔心企業之後的增長力，令這股的股價較弱。

睿見（6068）都有類似情況。

始終政策風險難估，因此唔建議持有太多。

------------------------------------------------

Q22568：

老師你說的2845，現時價位合理嗎？現價每月逐步買入儲貨是嗎？

謝謝你！期待你來澳門教班

龔成老師：

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

此股現價合理區頂至略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

------------------------------------------------

Q22569：

請教老師有沒有其他具較增長力股票可推介？

龔成老師：

可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、比亞迪（1211）、中生製藥（1177）、三星FANG ETF（2814），如果有投資美股可考慮QQQ。

但就要明白波動性比一般的平穩增長股高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q22570：

龔sir，你真係好勁，$14x叫人可以開始留意比亞迪，講完無耐真係開始升返！

當時因為我手上吉利佔我股票比例都算重，所以無買到同樣係車股的比亞迪，其實係咪應該轉股？

龔成老師：

其實這是大量分析的結果，無人能預測到股價走勢，但我地會分析企業質素，叫投資者多留意某一類股票。

同時，會盡力計算企業的價值，去分析投資值博率。

雖然比亞迪（1211）的長遠增長力會好過吉利（0175），但現價你將吉利轉去比亞迪，投資值博率又唔算好高，因此，你保持原有的狀態。

其實吉利本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

------------------------------------------------

Q22571：

老師，想問下你對銀娛的睇法，之前澳門有確診，股價下跌，係咪入市時機？謝謝你

龔成老師：

銀河娛樂（0027）可以分注。

佢中短期會弱，加上全球疫情反覆，都對佢有不利影響，不過，相信這只是中短期，以長遠的角度分析，企業仍是有質素的。

在正常的經營環境分析，佢持有的資產好有質素，行業本身好賺，雖然疫情略有反覆，但全球疫情最壞的情況，相信已過。

但由於仍有未知數，加上之前虧損，因此將企業估值調低左。

現水平在大約在合理區中下部分，如果本身有貨，可長線，耐心持有就得，如果無貨，現價已經可以分注，但都要留現金。投資貨要有心理準備，中短期會弱，要長線，企業有長線投資的價值。

------------------------------------------------

Q22572：

龔 sir. 不明白你的問題。但我可簡述自己資料。我在台灣工作，零售管理，約100店，80-90k salary. 冇樓，

期待樓價回在港物色麗醫城供家人住慳租，只是以前經歷負資產，嚇怕了。剛申請IB account, 想找穩健ETF or ReIT 儲錢。

只係個人睇法覺得個市好狂，直覺有挺大調整，所以資金在過去一年都沒有動用。

龔成老師︰

我地唔好去用"感覺"或者"估"個市架走勢，我地要客觀分析，用企業價值，去判斷個大市平貴水平。

現時大市只在合理區，未算貴，不少優質股依然有投資價值。

若你不想選股，相直接投資一些ETF或者REIT，以下都是一些合適選擇，你可以參考下。

潛力股︰安碩恒生科技(3067)、ＧＸ中國電車基金（2845）、三星FANG ETF（2814）、QQQ

平穏增值股︰盈富（2800）、VOO、領展(0823)

收息股︰置富（0778）、陽光（0435）、收息基金(3110)

以你48歲年紀，最好以平穏增長股，作為組合主力。潛力股風險較高，不宜佔高於組合2成。而收息股增長力不算高，適量就可以。

現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

------------------------------------------------

Q22573：

我29歲. 潛力股 將阿里巴巴 資金轉小米同其他板塊可唔可以？

9988 馬雲減持股 對公司業務有冇影響. 我怕返唔到我201

龔成老師︰

阿里(9988)近期受大市氣氛和中央政策等因素影響，有較明顯下滑。但本身企業有質素，相信會慢慢適應新政策，令業務重回正軌。

但你預佢中短期會較波動，馬雲減持，跟企業質素無關，長線投資價值依然存在。長線要回到$201，相信係可以。

雖然阿里隻股票無問題，但問題是佢佔你組合太大心重，接近一半。因此，你必需沽出部份，轉至其他股票去平衡風險。

小米(1810)係一個選擇，但現價偏貴，要回多1,2成才合理。而且佢同是科技股，單一行業唔好佔組合3成以上，否則都會有問題。

不少平穏增長股，現處於合理水平，可分注入市。但潛力股，部份係略貴。

現時只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)、QQQ勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22574：

700,9988 股價都好差

想問收息股有什麼比較好

龔成老師︰

不要太著重短期股價，要睇長遠企業價值。

阿里(9988)和騰訊（0700）近期受大市氣氛和中央政策等因素影響，令股價大幅回調。但佢地本身係有質素，相信會慢慢適應新政策，令業務重回正軌。

但你預佢地中短期會較波動，長線投資價值依然存在。

至於收息股，你可以參考以下幾隻。

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

如果你年青，可以「平穩增值股」+「潛力股」。中年人士，可以較集中翻係"平穏增長股"。當你已近退休之年，就應集中在「收息股」，去創造平穏現金流。你可以睇翻自已年紀，去作出配置。

若你係較年青，收息股就未必適合持有太多。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

------------------------------------------------

Q22575：

謝謝老師意見，但3067喺HSBC冇得供。如改為:金沙, 港鐵，港交所，中生製藥各$2000, 剩低的$2000儲現金，這樣好嗎？

其實我都唔知2800供到幾多為之夠，但以現在情況睇，就佔我的持股比例中最多。

還是把剩下來的$2000分別加大港交所及港鐵各$1000，這樣安排會否好啲？

龔成老師︰

3067每一手唔貴，你直接每個月自己買一手，咁就可以。

盈富(2800)是包括58間質素不錯上市公司股票的組合，由於佢唔係單一企業，就算佔組合幾大比重，其實都無問題。

但由於你比較年青，只有24歲，全部用晒盈富(2800)，個組合變相有少少保守。

因此，我建議你長遠計，盈富(2800)最多佔5成。餘下資金，你可以分散去供上述5隻股票。

現時大市只在合理區，每月儲蓄唔好盡用。最好留有部份，等大跌市出現時，可以用來掃貨。

------------------------------------------------

Q22576：

投資年金同埋股票 ETF 基金有咩分別？

目標係買千萬既樓 可以點做？

龔成老師︰

"年金"，純粹為你提供現金流收入，唔會有增值能力，主要係適合退休人士。

如果你係為增值買樓，就應選擇有增長力的ETF。

ETF都分好多種，有對應不同指數(如盈富2800 - 恆指 / VOO - 標普500指數)、不同行業(3067 - 科技股)、特定目的(3110 - 收息股份)等等。

而你選擇的，就是一些有質素的增長型ETF，例如盈富2800、安碩恒生科技(3067)、VOO、QQQ等等，都可以考慮。

但你要先了解這些股票，才好入市。當中QQQ和3067風險會較高，你要自己衡量。

------------------------------------------------

Q22577：

感謝大師百忙之中抽空回覆我這位投資小白，之前因有朋友分享了大師您對小米的睇法（24進取小倉、20-22加碼）

當時覺得30蚊的小米根本無可能跌咁低，自己高追後跌到27蚊就割了，然後其仍跌跌不休，仲見到20蚊。但現在看回去又對大師對小米的完整投資計劃很精準，心感敬佩

另因小弟係澳門人，無法參與大師您的課程。實言未來也只能白漂大師您的投資策略。但大師您一直慷慨解囊，深知大師為大好人，在此祝願大師在港股賺到家財萬貫！幸福美滿！

龔成老師︰

多謝你的支持，其實我之前都有開過澳門班的，不過現時疫情，所以暫時停左，之後會再開翻的。

你或者可以預早留位，只要whatsapp 852-55457212我同事講，打「留位澳門班」就得。我地有具體資料就會 whatsapp你。

因為現時已有好多澳門人留左位。

另外，你可以睇我架《80後百萬富翁》、《財務自由行》和《股票勝經》，都適合初學者。

緊記，我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

------------------------------------------------

Q22578：

老師你好，我現在上緊你的進階班！內容非常豐富！報左你初班及進階班係我今年做得其中一個最好的決定。我今次都係想問番隻788，中國鐵塔。

問題一：
係損益表入面，折舊及攤銷佔左營運開支入面好大部份，係分析時將它除去是否正確？

2020年報除去後的數字變化：
年度利潤（百萬人民幣）：6427》53942
ROE：3.45%》28.96%
純利率：7.92%》66.51%

調查後的ROE及純利率好似有少少誇張地好！係唔係正常？

問題二：
佢營業額5年複合增長大約7.69%，若減去折舊就變成大約14.29%。純利就27.03%（不計2016年，基數太細）。收入及純利近年都有少少減慢情況。

我應該用7.69%，14.29%定還是27.03%去總結鐵塔既複合增長率呢？

問題三：
另一方面，兩翼業務增長好強勁，特別係能源經營業務，最近出新聞指係換電網點係市場佔有率超過50%，鐵塔公司亦宣報同華為數字能源、比亞迪弗迪電池、百度智能雲、郵儲銀行等多家簽署協議。

能源經營業務對收入潛力會唔會加多d分？同埋呢方面的發展應該唔會比三大電訊商好似租塔咁樣壓制？

問題四：
我的持倉
1448（18.4%）
1177（17.5%）
788（17.1%）
3918（11.4%）
968（10.3%）
9988（9.4%）
1810（8.4%）
2318（5.6%）
1211（1.9%）

我今年就27，我真係好想做個倉平均回報有15%甚至係以上，我明白我潛力股佔左好大部份，我願意承受高風險！我會利用多d時間跟進持有股票的情況去平衡番集中風險。

我考慮緊將唔將鐵塔換馬去其他股票，暫時想等到有合理/平位再加去1810/1211，令組合回報更加有潛力！

鐵塔表面睇佢年增長做唔到15%，但佢新業務潛力好似很不錯，我唔知自己係唔係過份睇好788，佢未調整roe及純利率，負債比率等等雖然呢刻普通，

但我見佢5年中都係每年有慢慢改善中。我好掙扎究竟應唔應該留佢係我組合，謝謝老師見

龔成老師︰

1) 其實你唔洗特別去扣除這個數字，因為我地做估值時，都會同時審視經營現金流。這部份係會將折舊及攤銷加回去，以反映企業實際有多少資金係入帳。

因此，只要折舊及攤銷數字係合理，唔係有好大變動，咁就可以。

2) 如果你係用市場比較法，即係市盈率去做估值，你應該直接用營業額和純利個增長去做參考。去解佢有無增長之餘，佢賺錢能力，有無唔同到。

若以中國鐵塔(0788)計，你發現佢整體純利增長，係優於營業額增長，就可以大致估計到佢賺錢能力高左。但當然都要睇埋細節，當中有無其他問題。

但若果你係用現金流折現法，你就要在盈利之上，加回折舊及攤銷，並扣除資本開支去計算。(如果你覺得太複雜，同樣直接用盈利作參考，都可以。)

3) 會係利好，但會有多利好，暫時係未知之數。係能源部份，由於這些客戶並非完全壟斷市場，也非其大股東，故相對被壓價壓力較細。

但你要明白，現時能源相關收入，佔集團比重好少。就算利好，中短期對盈利相信唔會有太大影響，故不會特別去加分。但這部份暫時發展算正面，可以留意。

4) 中國鐵塔（0788）不是無質素的，但增長力係弱左，算係水桶1至2之間。如果你願意承受較高風險，將部份換至小米(1810)和比亞迪(1211)係可以。

但小米(1810)要回多1,2成才開始合理，而比亞迪(1211)係貴，就算月供都要回到近$200才可以考慮，而直接入的話，最好等回到$140以下。

另外，你要明白現時組合，係好進取。雖然潛力股增長潛力較大，但唔代表你最終回報，一定會係最高。

因為佢地發展係符合預期，回報上當然無問題。但如果佢地發展未如理想，就會有較大調整。所以，你要明白高風險，唔一定係有高回報。

係配置組合時，你明白這個風險，才作選股考量。

------------------------------------------------

Q22579：

碳中和有咩股票推介

龔成老師︰

你可以考慮一些跟綠色能源相關企業，例如信義光學(0968)、福萊特玻璃(6865)等。

但佢地現價唔平，前者要回多1,2成，才開始合理。後者更要有好明顯回調，才好考慮開始小注。

如果你無特別睇好邊隻企業，純粹係睇好行業發展，你可以考慮GX中國潔能（2809），其目標為追蹤SOLACTIVE中國清潔能源指數NTR之表現。

當中佔最多為"半導體產品與設備"股份，約組合4成，其次是逾2成的"獨立電力及可再生電力"。

此股平貴不易分析，而且頭10大股份中，除了信義光能（0968）外，其餘都在內地上市。

潛力度是有的，但會比較波動，現價在合理區頂至略貴，如投資宜要慢慢分注，可長線。

------------------------------------------------

Q22580：

你好老師，一直持有的中生製藥價位一直下跌，請問你點睇呢隻股票的前景？

另外，現在現金持有約50萬，計劃在3年內增至90萬- 100萬，每月的人工大約2.5 K，在投資上應該怎樣計劃呢？感謝老師。

龔成老師︰

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

近期由於大市氣氛較弱，加上中央政策等不明朗因素，都令佢股價受壓。但暫時唔見佢長線質素，有明顯轉差，這股可以照長線持有的。

以你目標，可以選擇一些「平穩增值股」+「潛力股」作投資目標。

一般我地預期投資有增長力優質股，年增長約10-15%。要做到你的目標，除了50萬本金外，建議你每月投入$10000預算，去做月供增值。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄(即$5000)，另一半就先儲起架策略。

若你投資知識不高，因此可較集中在平穩增長類股，至於潛力股，只宜小小注。

大市現處於合理水平，那50萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

同時你要明白，3年唔係一個好長時間(一般建議最少5年以上)，就算再優質股票，都有機會出現價值波動，影響你最終回報，你要知道有這個風險存在。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22301-Q22320）

Q22301：

Hello 龔 Sir, 幾個月前開始接觸你，另外，我先生買咗幾本你嘅書，我睇咗你其中一本書，其實我二十多年對投資都有少少心得，只係較少接觸新經濟股….

Anyway, 依排個市跌，股票跌了 10%，咁多年股市上上落落我都無乜所謂….

其實我想講返重點，因為做全職媽咪，我十幾年無返工，但我睇了你嘅書後，決定跳出 comfort zone, 揾咗一份我很愛的 part-time, 返咗幾個月，

我真係覺得好有意義又表現幾好….但係，我今日竟然唔知醒，今日公司叫咗第二個人頂上一日，我真係喊足成日….衝動下買了 #700 發洩…

今日的故事講完，想同你分享，希望下星期我繼續有工返

龔成老師︰

如果你有上過我股票班，就會明白，我地的同學好小心投資的。課堂會派一份6頁紙的「企業評估表」，我會逼佢地填好6頁紙，先可以進行投資，所以佢地的投資都好穩健。

人生路上，我地難免會遇到一些令人氣餒的意外。最重要，係我地有無方法，令自己收拾好心情，重新上路。

發洩，其實係無問題，因為係一個情緒抒發，可以幫自己調整好心情。

每個人抒發的方法都不同，有人會做運動、有人會去唱K狂叫、有人會去沙灘對住個海沉思...。只要唔好傷害到自己和其他人，咁就無問題。

當你情緒，開始可以慢慢回復平靜，我地就要客觀分析，點去解決當前問題。(記住情緒未控制好，唔好做重大決定。)

其實遲到，我相信好多打工仔都試過，除非你本身係遲到常客，或者本身比人印象係唔盡責。否則一次半次，你誠心道歉，相信問題不大。

由於你缺席，公司要找人頂一日，都係正常，因為人地都要運作。

希望你可以明白，人生總會遇上不如意的事，重點係你面對的態度，而唔係件事本身。

其實，我好欣賞你走出comfort zone的勇氣。特別你係一個無做野1X年的全職媽媽，就更加難得，你要加油!!!

另外，你好衝動咁買左架騰訊（0700），現價算合理區中部。雖然近期中央政策，對相關大型企業，有不利影響。

但騰訊（0700）係有質素和規模的公司，相信會慢慢適應如何在這些新法規下營運，因此長線投資價值依然存在。

不過，你預佢中短期一定會較波動，但長線持有的話，就無問題。

------------------------------------------------

Q22302：

1) 龔sir你好，最近我學習了SOTP估值方法，我用此方法評估了最近金山軟件的估值，你可以給我一點意見嗎？

金山內在價值：
網遊+辦公軟件=70億人民幣
金山雲= 108億人民幣
淨現金= 140億人民幣
獵豹移動= 10人民幣
但參考aastock 496.93憶市值
我計漏咗啲咩？

網遊和辦公軟件以33%增長，金山雲以一倍增長。獵豹移動大約股價$2美金，大概18億人民幣，現金就參考披露易最近的2020年全年業績

如果計算之後就變成價值$28.46一股，這樣就高了30%

2) 另外，信達生物最近研發出pemigatinib藥物針對治療癌症,並已經在台灣日本美國批准使用,並對信達生物業績增長一倍以上,如果股價跟隨大市回落至$60，即是到250天線附近。有見及此，值得買入嗎？

不好意思一次過問你這麼多問題

有機會出現MACD背馳嗎？恕我班門弄斧

1801信達生物(六個月圖)

龔成老師︰

1) 雖然有參考價值，但你都要明白背後原理，由於唔知你具體每一部分怎樣計算，有可能你這個估值方法，只簡單將企業子公司市值加起(持股部份)，再計入集團本身資產和負債，去做出一個市值作估算。

現時財經網站提供的市值，純粹係現價，再乘以發行股數。

而你這個方法，係要對不同分部，因應其特性和發展階段，用相應估值方法，去作出評估，所以唔一樣係正常。

其實，市值計算本身係好主觀，特別係一些估值方法，如果你唔係非常有經驗，只要數字有些微偏差，個結果可以差好遠。不同估值方法，會適合不同性質企業，唔可以亂用。

而且附屬公司、聯/合營公司計算比較複雜，如果直接閱讀財經網數據，係會有偏差。

所以係估值前，我地要按實際情況，對數字作出相應調整。這部份較難，我都係在自己的進階班，才會教授同學。

因此，我唔建議你單用市值，作為分析基礎。你可以用佢參考，但最重要都係了解企業本質，佢做什麼業務、行業發展狀況、財務數據、競爭情況等，去做核心會較穏當。

金山軟件（3888）主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區，唔建議大注投資。這股前景正面的。

2) 你要記住，我地投資股票，就等同投資一間企業。你最重要係知道佢本質、行業等基本因素。

過去股價未必能反映其未來情況，因此唔好再睇圖的趨勢，這是好錯的投資方法！巴菲特已經講到明，技術分析沒有作用的。我地只會分析企業的質素，以及企業的價值。

我20年前，都會用移動平均線、RSI、圖表等分析方法，但當我輸完又輸時，我決定放棄這些技術分析，從此我就不斷贏錢。

信達生物（1801）係一家中國生物製藥公司，開發了集研究、發現、開發、製造及商業化於一體的生物醫藥平台。

睇翻佢資料，佢亦係腫瘤、眼科、自身免疫和代謝疾病領域建立了一個包括單克隆抗體和其他生物藥物的產品管線。

你所講的，是一個利好因素。

但由於仍處於燒銀紙的狀態，所以有危有機，潛力度是有的，但估值好難，現時市值都唔細，只能完全「估」佢將來的價值，不確定性好大。

只可以話，這刻投資值博率中等，你投資係可以，但唔建議大注。

------------------------------------------------

Q22303：

Hello 龔成你好，想請教下你關於現況應該點樣投資

我地二個人(30歲頭), 每月固定收入66000(已扣MPF)，係外地有個物業價值600萬左右係按揭每月交17000左右

現在手頭上有大約150萬現金，30萬股票，20萬黃金 (結婚收到的)

現在需要搬屋, 正係度煩惱緊買定租好 (如果租大約13000-15000左右)，銀行就話我地可以最盡係香港置業借到6百萬 (有說明外地物業同按揭情況)

不過我地就怕太risky/未係合宜嘅時間(定係等多1-2年再升人工先), 不過又好似好浪費現金,定係可以做一點其他投資? (唔係買物業)

希望你可以指點下我地. 不過如果你Post出黎我驚比人估到係我地, 好多朋友都有follow 你

萬分感謝!

龔成老師︰

香港物業，我唔知中短期會點走，但長線我預期都會維持上升。如果你2人係計劃，長線都會留係香港生活，我建議你要為自住屋，做定準備。

現時樓市雖然唔算平，但若果有配合到你長線生活所需，價格合理，足以你們長線"供得起"的物業，其實已經可以出手。

若果你都係想穏陣D，等人工高D先再算。現時資金，可以先投資在優質股，去進行增值。

你們可以選擇一些「平穩增值股」+「潛力股」作投資目標。若每月有一定儲蓄，建議進行月供股票，去提升增值能力。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那150萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

而黃金是貴金屬，有「終極貨幣」之稱，是人類自古以來的貨幣，因此，有持有價值，而現時我地的現金，一定長期貶值，所以黃金長期會向上。

不過，黃金沒有現金流，持有無法創造出經濟價值，其主要作用是對沖黑天鵝事件。

所以，你可以投資黃金，但不用佔財富比例太多(<3%)，而且持有的應該為實金。

當然，如果這些黃金若有紀念價值，你係可以自行衡量是否保留，不必跟足<3%的標準。

------------------------------------------------

Q22304：

Hello 龔成老師，上次聽左你意見開始抽部分資金去月供2318，現在組合配置更佳。另外有幾隻股票想問下你意見。

1. 3309
2. 1368
想了解你對呢2隻股票睇法

3. 1830
由2.x 見你講必瘦站但一直無入貨，見而加升到差不多10蚊
想問下合理區同便宜區位置係邊呢

謝謝你！

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

特步國際（1368）不差的，生意與盈利都有增長，本身都算有品牌，不過盈利就較為波動，部分年份盈利出現下跌。但長遠仍是正面。

個別年份有生意上升但盈利下跌，反映成本增加，同時未能轉嫁消費者，又或者佢要用減價策略才能吸客，反映賺錢能力未必好強，質素有，但不能定義為最高之列。

整體都有長線投資價值，現價偏貴。等佢最少回2,3成，才好開始小注。

完美醫療（1830）長遠有發展，本身有一定的質素。而價唔平，$6/7算係合理區頂部。若你到平宜區，需要出現好大幅回調，才可以。

------------------------------------------------

Q22305：

講完投資，保險個part都想請教下老師

以3X歲女士有家庭，1個3歲小朋友為例，其實要投保（危疾）既保額大概係幾多先叫合理？（另有買醫療）

每個經紀講既都唔同，都唔知幾多先叫足夠

龔成老師︰

危疾，佢賠償係已一個指定金額計算，同醫療保不同。這筆賠償，無指定用途。

因此，危疾除了可用作抵銷部份醫療開支外(超出醫療保保障部份)，最重要係填補你因長期不能工作，所失去的收入。

由於危疾係一些大病，一般治療至休養，可能講緊係2-3年。所以，你可以用你2年年薪，作為基礎標準。

再按你現時和預期將來家庭開支狀況、保單條款等，再進行調整，咁就可以。

------------------------------------------------

Q22306：

龔sir你好，我現在持有 主要是收息股。正為退休作準備，還有少量其它股 等合適時機沽出換馬

現在有點舉棋不定，因為以下4隻收息股都是我比較喜歡的 但只能4選2:

1098 路勁
3383 雅居樂集團
604 深圳控股
1883 中信國際

有勞龔sir幫幫眼 打擾了 謝謝！

龔成老師︰

中信國際電訊（1883）業務穩定，整體質素算是不差，作為收息股係可以。

深圳控股(0604)和雅居樂集團(3383)都適合做收息股，但佢地負債較高，風險會高少少。

而路勁(1098)都有質素，但派息較受盈利所影響，作為收息股，就未必咁合適。

這些股票，現價都在理想，已經可以分注入貨，並長線持有。

------------------------------------------------

Q22307：

想请问Geely Auto 您又怎么看呢？

Xiaomi 现在的价钱算贵吗？


龔成老師︰

吉利(0175)本身的質素不差，擁有一定的銷售網絡及品牌，不錯的市場策略及定位，而又能把握中國汽車市場增長的機遇。

長遠來講，佢的品牌與發展在中國仍理想，2018年，吉利透過旗下海外企業，動用超過$500億人民幣收購戴姆勒股份公司9.69%股份。由于戴姆勒股權結構分散，所以吉利已經成為了戴姆勒集團最大單一股東。

另外，佢早前杭州灣新工廠正式發布純電動新品牌新車「極氪（ＺＥＥＫＲ）００１」，宣布吉利進軍高端電動車。

這些動作不單有利佢有中國發展，同時長遠，可能加快了海外發展速度。因此，這股長遠仍是正面的。

現時價位在合理區頂，至略貴。你預佢股價會波動，有貨可長線。如果現價入貨，小注都可以。

小米（1810）有潛力的，佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價略貴，回多1,2成，才開始小注會較好。

------------------------------------------------

Q22308：

龔成你好呀, 我一直有睇你既page同專欄, 好讚成你所講, 股票係應該要睇長遠, 加上近期短炒蝕過錢, 更加同意你的觀點。

因為都踏入中年, 加上疫情期間工作大受影響, 所以都好希望可以盡快學識投資,

近期自己心目中都mark定左兩隻, 希望可以請教一下你的意見 (唔知可唔可以咁樣PM你問, 如果唔得都唔緊要的。)

唔知可否請教以下幾隻股, 可長揸嗎?

- 中遠海控 (見佢升咁多一直冇買, 但前景幾好咁)
- 國泰航空 (一直在7蚊左右持有左好耐, 希望等到疫情完後)
- 醫思健康 (有新世界入股, 加上是醫美行業, 自己比較熟悉, 覺得前景不俗, 但之前又係升左好多, 一直未敢入)

多謝指教

龔成老師︰

我想你先明白一些投資概念，我地做財富增值，就係尋找優質企業，用一個合理，甚至平宜的價錢，去買入，並長線持有。讓其自然增值，以達至財富增值目的。

成件事，重點係「優質」之餘，買入價格都要係「合理」。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

這股係有投資價值，但現價略貴，未係投資時機，要等佢回2、3成會合理翻d，我地才可以考慮。

而國泰（0293），坦白講質素只是一般。

其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般。

就算佢重組，得到新資金，只是比佢「捱過這一關」，並不是賺錢能力方面有改善。

若你持貨較多，建議等疫情過去，經濟好轉時，佢反彈就減持部份，去平衡風險。如果只係小注，你照長線持有都可以。

香港醫思醫療集團（2138）主要以ＤＲ　ＲＥＢＯＲＮ品牌提供醫學美容服務。企業都有質素的。

（１）醫療服務：包括整形外科手術、微整形療程及由集團醫生操作的能量儀器療程及一般診症服務，以及牙科（ＯＮＥ　ＤＥＮＴＡＬ及ＯＮＥ　ＤＥＮＴＡＬ　ＰＬＵＳ品牌）、中醫及眼科服務。

（２）準醫療服務：包括由已接受培訓的治療師操作的能量儀器療程，該等治療師已完成集團醫生主導的內部
強制性培訓。

（３）傳統美容服務：包括面部護理、按摩以及其他無創療程。

（４）護膚及美容產品：主要為集團的自家品牌寶特曼娜及瑞研雅。

業務發展不差，長遠有增長力，不過業務中短期會有少少波動。現價合理區頂至略貴。如果你資金較為充裕，現階段先入一小注，係可以。

否則等佢回多1成才入貨，值博率會較高。

------------------------------------------------

Q22309：

你好, 龔成老師。最近開始睇左你d 文章, 想試下投資股票, 本人沒有投資經驗, 最多只買過ibond, 我對小米, 騰訊, 港鐵, 領展等都有興趣, 但最近個價位好似唔係好夠平, 唔知入唔入市好,

除左上述股票外, 有沒有些係最近較平同值得入手的? 還是等待時機入手上述股票好呢?

本人33歲, 有價值港元$55萬的英鎊, 港元$20萬在銀行高息戶口(2.5 厘息), 如果投資股票的話, 我應該動用英鎊還是高息戶口中嘅港元呢?

動用英鎊的話, 現在係好價位嗎?(其實我一直都想等好價位時把英鎊轉返港元再放入高息戶口) 謝謝!

龔成老師︰

任何貨幣都可以無限發行，因此長遠只會貶值，唔係有一個財富增值的好方法。若你的英鎊無實際用途，建議你將英鎊換回港紙去投資。

如果你擔心匯價問題，你可以分注咁，慢慢換翻做港元就可以。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你33歲，應以增值為主，建議你用「平穏增長股」 + 「潛力股」作組合，去創造一個增值平台。除了用你現有資金，我都建議你用每月空出來的儲蓄，去做月供股票，去加大你財富增值速度。

現在你每月先用5成儲蓄做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

大市現處於合理水平，那75萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

現價計，平穏增長股都在合理區，可開始分注入市。

而潛力股，暫只有安碩恒生科技(3067)、ＧＸ中國電車基金（2845）、騰訊（0700）、阿里（9988）、中生製藥（1177）、福壽園(1448)勉強算在合理區中上至頂部，可分注入貨，其餘都略貴，想買就要等一等。

------------------------------------------------

Q22310：

龔sir, 好感恩幾年前有緣睇到你專頁，一向有買股票，都是輸多贏少，直至睇你分享先開始改變投資概念，1177,1211,285,到1810我都獲利不少，已賣出部份，

再加部份儲蓄，買到一個小單位收租，雖然不算很好的物業，但是真的好開心，剛看到你分享別人的喜悅，我也要向你説多謝，感恩你無私分享

龔成老師︰

唔洗客氣，我都係希望透過這個平台，去分享一些正確投資觀念。

希望可以幫到投資者(特別係一些初階投資者)，知道一些較重要概念，從而令佢地更大機會，找住正確方向。

雖然，你現時已有一定成績。但緊記要保持學習，長線投資才會做得好。

而且，你所講的股票，都係有質素。如果你係較保守投資者，而獲利又較多，可以"升一倍，沽一半"。

但緊記大部份貨，應該保持持有。因為長線持有優質股，增值效果才會係最好。加油!

------------------------------------------------

Q22311：

你好呀, 我脫你有介紹ETF #2800 隻股, 我想問咩價位入好呀? 我本身流動資金唔多, 又還緊債, 但我又希望可以增加資金, 想睇下買邊一隻好?

本身知道ETF 股都係收息多, 好似比較啱我咁

龔成老師︰

首先，盈富(2800)是包括58間質素不錯上市公司股票的組合，這些股票有升有跌，但長期計，都有不錯的回報。

買入盈富主要有兩個回報(分別是股價升幅，加上股息回報)，股息不多，大約只有3%，而股價升幅，其實有升有跌，每年都會波動，但長期平均計，都有5%-10%，當然，這是不一定的。

現價計，算係合理區，已經可以分注入貨。佢係平穏增長股，有一定增長力，但股息唔算多。

若你目標係收息，可以選擇X恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

至於投資邊個，你就睇翻你自己投資目標。一般情況，如果你係年青至中年，我會建議你投資盈富(2800)，因為你應先做好財富增值部份。

若你年紀較大，接近退休之年，穏定現金流去支援生活，才是你投資重點，故X恒生高股息率（3110）會較合適。

你可以因應自己人生階段，去進行配置。

另外，你要審視翻自己現有貸款，若息口較高，我優先清還貸款，以免影響長線回報。

------------------------------------------------

Q22312：

想請教1302 6988 及 9666。

龔成老師︰

先健科技（1302）為心血管及周邊血管疾病及紊亂所用先進微創介入醫療器械的研發、製造及營銷商，主要提供先天性心臟缺損封堵器（包括ＨｅａｒｔＲ、Ｃｅｒａ及ＣｅｒａＦｌｅｘ等三代系列）。

雖然近年生意都有增長，都有潛力，但始終規模細，不確定性較高，業務可能有潛力，但現時的市盈率處高水平，值博率較一般。

現價偏貴，要有好大幅回調，才好開始小注入貨。而且此股盈利都好波動，只宜小注投資。

樂享互動（6988）是中國的效果類自媒體營銷服務提供商，利用商業智能技術為行業客戶及自媒體發佈者提供服務。

睇翻近年的財務數據，佢增長力是有的，但上市前的數據參考價值較低。

相信佢長遠，業務都有增長力的，公司話佢自己能盈利高增長。但就唔平，小注持有可以。

金科智慧（9666）有質素。

佢係中國西南第一的綜合智慧物業服務商，如果按佢綜合實力計，集團自2016年至2020年連續五年被中指研究院評為中國物業服務百強企業十強之一，自2015年至2020年，連續六年西南地區排名第一。

收益主要來源於四條業務線：物業管理服務；非業主增值服務；社區增值服務；及智慧科技服務。

包括各類住宅及非住宅物業，包括但不限於中高端住宅、商業樓宇、產業園、政府公建、高校醫院等其他物業。

生意與盈利都增長理想，暫時睇佢都有投資價值，但負債高會係一個扣分地方。此股投資係可以，只要唔好太大注，咁就無問題。相信長遠有發展的。

------------------------------------------------

Q22313：

老師你好，本人和太太各36歲，上年剛剛買樓尚有430萬貸款供29年，月入大概10萬，每月有4萬流動資金作投資，再加現金90萬，

想在3年後儲夠3百萬買多一層樓收租，本人唔識投資，想問下有咩投資組合可以加快達成目標，謝謝

龔成老師︰

我假設投資上進取少少，令你可以做到有回報有12%（連股息再投資）。你每月投資$40000 + 90萬現金，3年後大約會增值至300萬。

但你要明白，3年只算得上係一個中短期時間。最終實際回報，可能會較為波動，風險會較高。

從資產配置角度，你現時已經有一個物業，如果你咁短時間，又在增持有一個新物業。

除左成個組合會好偏重物業之餘，太短期內買2個物業，都會受較高價格波動性風險。(一般2個物業，買入時間最好相隔一個週期，大約8年左右。)

我建議你按部就班，透過月供和買入優質股，去為自已資產作增值。到你累積到一定金額，足夠你買入第二個物業之餘，都可以留下若干優質股增值才出手，會較理想。

財富增值方面，以你36歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

若你投資知識不高，可先較集中在平穩增長類股，至於潛力股，只宜小小注。到你提高投資知識後，才慢慢增加翻潛力股比例。

大市現處於合理水平，那90萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

------------------------------------------------

Q22314：

1) 我又如何得知此公司的每股盈利有冇加上物業重估呢？

2) 我想計比亞迪電子的合理股值，唔知我計得啱唔啱？

比亞迪電子現價$46.35

市盈率 水牛網沒有提供2021年市盈率所以我用9年
2020年 7.483 2016年 7.871
2012年 9.333 2013年 10.04
2018年 10.24 2014年 12.02
2017年 12.50 2019年 14.13
2015年 16.46

市盈率合理區域是 9.333 ～ 12.5

每股盈利 資料來自Aastocks
2016年 0.6112 2017年 1.3787
2018年 1.1044 2019年 0.7935
2020年 2.8725

5年平均值係1.35206，估計公司盈利還會持續增長，所以保守估計每年增長10%

1.35206 x 1.1 = 1.487266

股值合理區域是13.88 ～ 18.59

不知有沒有計錯，因為現價才$46.35相差太大。

3) 我最近留意緊國藥控股（1099）和中智藥業（3737）。我用阿sir你初階班比的企業評級表頭兩頁查過這兩間公司，機本上兩間公司都過關雖然唔係全部100分。

我睇兩間公司的官網都寫得自己點樣勁，但兩間公司的市盈率都低過10倍。流動資產-流動負債係正數。

初步睇價錢也在合理區之下。

想知道為何這兩間公司的市盈率會咁低？值唔值得投資？

謝謝！

龔成老師︰

1) 你可以睇年報中的損益表，就會知道佢有無物業重估成份。

2) 你現時這個計法，概念上係無錯。但做好初步估值之後，我地要再考量，到底這個估值，係唔係足以反映企業現時價值。

比亞迪電子(0285)近年賺錢能力有所提升，我地用過去5年平均數字，就可以能出現過於保守的情況。

因此，我地會以佢最新一年每股盈利作為指標，即係用HKD2.8725。

由於集團始終係代工企業(雖然有一定技術)，市盈率唔會太進取，我地會用佢過去10年中間4年數字，大約為10-12倍。

之後，再加多10%緩衝區。合理價大約為︰HKD26-38。

3) 其實就算係相同行業，只要業務性質、潛力、風險等不同，個市盈率都可以差好遠。

國藥控股（1099） 質素都可以，但增長力已經不算好強。

睇翻佢資料，佢係中國最大及具實力的醫藥分銷和零售企業，集團在中國主要城市以直接經營和特許經營方式管理零售連鎖藥店網絡，向終端消費者銷售藥品及大健康產品。

此股有質素，但賺錢能力唔算高，而增長力唔算太強，是平穏增長型。佢有個比較大問題就係負債比較高，而度會扣左D分，整體而言此股有質素，可投資，現價合理的。

由於佢已經係平穏增長型企業，增值潛力不及中生(1177)這類潛力股高，故市場給予市盈率，都會較低。

而中智藥業（3737）則相反，由於企業規模和品牌不大。雖然佢近年盈利增長係唔錯，但市場會較擔心，佢這個優勢，能否長線維持。

因此，會給予中智藥業一個較保守的市盈率，以反映當中的潛在風險和不確定性。

此股現價合理，但由於存在一定確定性，故只宜小注。

------------------------------------------------

Q22315：

我個人睇法認為。新世界，長期一定會好番，因為佢再俾人爆大鑊就可以執笠，但問題係驚短期甚至中期都有機會發現更多問題，始終起樓唔係一時三刻，

而今次事件反映QC部門同埋管理層有啲得過且過，其他項目都有一定機會有類似問題，只係未俾人爆或者佢地禁住咗，令中期不確定性同埋風險增加

另外留意到美國嘅經濟數據，FRB話經濟雖然開始復甦，但基層勞工市場仍然麻麻地，而高通漲相信係暫時性，仍未係時候改變貨幣政策。

咁樣會唔會令成個市場失衡，為市場復甦帶黎壓力？

龔成老師︰

中短期，新世界(0017)股價難免會弱。

但我地睇翻佢過去咁多年，其實都無出現過重大問題。所以，我會偏向覺得，個營運和監工上風險，未到話十分高的狀況。

長線投資價值，依然存在，但你預佢短期會較波動。

疫情雖然未算清零，但大部份已發展國家，已經開始穏定。相信經濟會慢慢向好，但這個唔會係一時三刻就出現，可能要幾年時間。

而中短期，依然會有好多不確定因素。例如不少發展中國家疫情未受控，對不少消費市場，或者不少企業的產業鏈，都造成不同程度的影響。

但相信這都是中短期，我都分析最好都係集中翻，係企業本質。外圍經濟因素，各國貨幣政策，係有參考價值，但佔比重不應太多，重點都係放係企業本身較好。

------------------------------------------------

Q22316：

Sir,水桶2 有咩好選擇啊？日清和雅生活算嗎？還有甚麼好選擇的？我今年34歲每月可儲2萬，現在儲一萬現金和一萬每月買d 股票的

暫時如下：

1. 科指 ETF 3032 15000股 $8.37
2. 小米 1810 1000股 $27.48
3. 阿里 9988 300股 $235
4. 京東 9618 100股 $309.5
5. 平安好醫生 1833 100股 $87.8

6. 日清 1475 3000股 $6.87
7. 京東物流 2618 100股 $40.36
8. 雅生活 3319 250股 $36.7
9. 福壽園 1448 2000股 $7.5
10. 鐵塔 788 10000股 $1.545

現金：35萬

龔成老師︰

日清(1475)和雅生活(3319)都係唔錯的水桶2股票，你現有持股，都係適合你。

以你34歲，可以投資「平穏增長股」和「潛力股」。你每月5成儲蓄，即是用$10000做月供。其餘先儲起，用一邊月供一邊儲蓄的策略。

選股上，你可以投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、煤氣(0003)、長建(1038)、粵海(0270)、領展(0823)。

潛力股可選安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有35萬資金可以再投入多10-15萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q22317：

首次置業 按揭多好定係少好？

依家開始有個好習慣就係先儲蓄投資 再消費，一個月儲＄5000 另外$5000攞嚟投資 係3-4年之後有＄100萬 有冇問題？

龔成老師︰

其實多與少，跟你首置無關，我地主要係睇佢現行息率。現時貸款息率低，我地應該盡借，令我地可以空多更多資金，作其他投資增值。

你現時養成這個先儲蓄和投資，之後才消費，係一個非常好的習慣，你保持。

以你2X歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，另一半就先儲起架策略。

由於你投資知識不高，因此可較集中在平穩增長類股，至於潛力股，只宜小小注。此期間，你最好是努力提高投資知識，才慢慢增加翻潛力股比例。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

假設投資回報有10%（連股息再投資），你每月投資$10000，4年後大約會增值至55萬。若你要達至100萬，就需要將金額升至$14000和供5年，才可以做到。

------------------------------------------------

Q22318：

師父1212 利福下至合理價低部5.95 ， 值得加注？

近曰消費股如六福，周生生， 莎莎都上番不少，何解1212返而向下？

啟德項目應該有利佢發展對嗎？

另外完美醫療已升至over $8 , 稍貴， 應否放一半？

3069 ETF 你有什麼意見？

龔成老師︰

我地投資，唔好太在意中短期走勢。我地要睇翻個重點，就企業自己本身狀況。

利福國際（1212）主要從事經營生活時尚百貨店及其他零售業務，以及物業發展及物業投資業務。佢透過崇光在香港專門經營百貨店。

中短期一定弱，但長遠仍會正面，不過回勇就要時間。同埋要留意，佢負債較高，因此唔建議投資太大注，現價合理區中下部至底部。

啟德項目，對佢長線發展係有利。但股價唔會一時三刻反映出來，要需要時間。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

如果本身有貨，就長線持有。若你持貨較多，現價沽少少獲利，都係可以。

華夏恒生生科（3069）主要係追蹤恒生香港上市生物科技指數之表現。

指數包含51隻成份股，當中有「藥品」、「⽣物技術」等公司。較為人熟識的，有藥明生物（2269）、京東健康（6618）、中生（1177）等等。

隨著人口老化和人均收入增加，對優質醫藥的需求只會有增無減。此股都有質素，可作長線投資。但你預佢會較波動，最好用月供模式儲貨，並長線持有會較好。

------------------------------------------------

Q22319：

龔老師你好，我今日34歲，未婚，冇乜經濟壓力，現時未有結婚及生育打算，月入二萬，月儲大約七千，現時擁有資產大約二十萬，其中八萬現金，十二萬股票。

經過你前三個月的教導，我購入多左水桶二的股票，現在股票組合比例大致平衡，現時持有的股票如下：

水桶1
1177 中生製藥 2000x$7.27 11.7%
3718 北控城市 8000x$0.99 6.4%
3067 安碩恒生 100x$16.06 1.3%
1448 福壽園 2000x$7.46 12.1%
3319 雅生活 250x$32.85 6.6%
2057 中通快遞 50x$230.4 9.3%

水桶2
823 領展 100x$74.55 6.0%
2800盈富 1000x$28.38 22.9%
2388 中銀香港 500x$25.1 10.1%

水桶3
778 置富 2000x$8.34 13.5%

快速增值：平穩發展：收息資產=47:39:13

1）請問現時股票組合比例平衡嗎？我打算長期持有無問題嗎？

2）現在我目標先儲現金，等儲到現金佔50%，才加水桶一股票合適嗎？

3）請問3718北控城市資源質素無問題嗎？現價（$0.96）是合理價還是平？我$1.92同$1.28都入左一手，現價可以再分注入嗎？值博率大嗎？等可以再等下？

還有等$15買3067，或等$80買平安好醫生，或等$23買小米，哪個值博率大些？謝謝指導！

龔成老師︰

1) 現時配置係可以，你長線持有，係無問題。但留意中通快遞(2057)始終唔係上市太耐，要再過一些時間，才可以見真章，所以暫時唔好再加注。

2) 現時大市在合理區，現金應佔3-5成左右。目的係等大跌市出現時，我地可以有資金入市買平貨。

而目標唔係集中係水桶1，因為水桶1雖然增長潛力大，但風險都高。建議你視乎當時平貴，再去慢慢平均分配在水桶1和2，咁會較穏當。

3) 北控城市資源（3718）有質素的。

佢主要在中國從事環境衛生服務；危險廢物處理業務；以及廢棄電器及電子產品處理業務。

環境衛生服務方面，佢的服務涵蓋綜合道路清潔、垃圾分類、垃圾收運、垃圾轉運站管理、公廁管理、糞便收運、綠道養護、河道保潔服務。

同時自2019年起開始，佢有係北京的若干商住區域提供物業管理服務。

過往財務數據不差，有一定的增長力，有長線投資價值。之前股價貴，現價落翻D，大約合理區中下部。現價加小小注，都可以。

至於平安好醫生（1833），無貨現價小注都可以，但由於佢不確定性都高，要控制注碼。

而安碩恒生(3067)和小米(1810)都有質素，但前者係一籃子科技股，較有分散風險能力。

3067現價中合理區上部，而小米就要回多1,2成，就算合理區頂，才可開始分注入市。以現價計，安碩恒生(3067)值博率會係3隻當中較高。

------------------------------------------------

Q22320：

龔成老師，我44，現在有以下股票，共35萬，另有15萬現金，月入2萬+佣金。

170萬按揭，供25年，每月供樓$7700，因為依家巳44歲，好希望可以10年內供完，請問我應該點做可以達到這個目標?

煤氣 18手
港鐵 3手，正在月供1000
中國鐵塔 5手

領展 1手，正在月供1000
盈富 2手，正在月供1000
阿里巴巴，上月開始月供1000

我有諗過每年年尾將花紅約2萬還按揭去減年期，希望可以加快完成供款，做法正確嗎？

龔成老師︰

以你44歲年紀，你持股和月供組合，都係合適的。你現時可以用這些增長股，去累積財富。

由於現時按息不高，我較建議資金先用作增值，而唔係去還款。這樣做，成個財富增值效率，才會較高。

現時大市只在合理區，每月儲蓄唔好盡用。最好留有部份，連同現時的15萬現金，一齊等大跌市出現時，可以用來掃貨。

我假設投資回報有10%（連股息再投資），你每月投資$4000 + 50萬資產(股票和現金)，10年後大約會增值至200萬。

到時你可以因應情況，再決定先還款(若到時息率好高，係可以先還)，還是保持增值。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22181-22200）

Q22181：

你好，想問怎樣判斷泡沫，例如美股市場? PE一直擴張，高於歷史長期水平，但係又有新解讀方法例如利率降低所以估值可以上升，

那麼要去到哪一個水平才屬於高，才需要沾貨呢?謝謝你的意見

龔成老師︰

其實泡沫，係無一個明確的準則，去到計算邊一個位，就算係好危險。

所謂的泡沫，就是「企業價值」與「現時股價」的相差，如果股價遠遠企業價值價值，就是泡沫的概念。

我地可以從大市和企業估值，去到調整我地投資策略(現金和持股比重)，去平衡風險。

就好以現時美股，大市算係合理區頂至略貴，係投資時就不宜太進取，要留有一定現金，去等佢回調，才慢慢加注。

而新解讀方法，的確利率下跌，某程度上係可以調升估值。但同時間，當利率倒轉回升，你估值都會馬上被下調，可能由而一刻合理，變相貴。

所以，我地做估值時，唔好單單睇利率，還要從企業和市場長線發展去著手，才會得出一個較穏當和立體的結論。

------------------------------------------------

Q22182：

龔sir 你好，小弟27歲 收入唔高 每月大約儲到 一千至二千蚊

一個約月前加入市場，希望為未來做個打算，但新手入場 做得少功課 攪到輸多贏少 （亂咁走去玩GME...)，E家就離左場啦

E家大約用三萬蚊拎黎投資，放左係1919(19蚊入，收左息），美股係 Apple 同 Biotech

想問下呢家咁有冇野要調整？

同埋因為儲得少，有冇機會仲做到月供股價？

如果有要點做，同埋有冇推薦？

多謝龔sir 回答

龔成老師︰

我投資股票，就等同投資企業，有一定要認真分析佢質素，例如點賺錢、行內有什麼優勢、長線發展方向、財務是否健康等等。

而且，我地目標一定要係長線，唔好做短炒，這都是經驗之談。

以你27歲年紀，投資上應以增值為主。Apple 同 Biotech 係可以，但Biotech這行業本質風險較高，要控制注碼。

中遠海控（1919）主要從事提供集裝箱航運、集裝箱碼頭管理與經營服務。

整體的質素算是不過不失，雖然在行業有一定的規模與優勢，但行業整體的賺錢能力無過往咁強。

經濟好轉會對佢有利，因為始終是對經濟較敏感的行業，現時的股價已反映相關利好因素。股價大升後，其後之後較難有高增長，因為已反映了利好因素，反而預佢之後轉為平穩增長。

首先，此股係無派息。你收到是10送3的紅股，但係10送3只是一些財技，你係唔會從中得到益處。

另外，你買入價係貴。此股質素只係一般，現時環球貨運緊張，才令佢收入大升。當回復正常，有機會出現調整。

長線投資價值都有，但唔算好高。若佢佔你組合較多，建議沽出部份，換至其他優質股會較好。

由於你投資經驗不多，加上定平貴能力好弱，你未來都係先集中做月供，去減低風險。

建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$1000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

最後，你依然係好年青，應好好把握這個優勢，做好財富增值。你現時每月投入資金好少，最好可以增大至收入一半，咁會較理想。

------------------------------------------------

Q22183：

你好呀老師我係初次接觸股票我想問吓你嘅作品裏面我應該睇邊，或者應該係有冇推介邊一本會易明少少

你有時間先覆返我啊唔緊要㗎

龔成老師︰

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的13本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）
《80後千萬富翁》（初版）

你可首先睇以下幾本，會較為適合初學者：

《80後百萬富翁》
《股票勝經》
《財務自由行》

之後再睇其他。

------------------------------------------------

Q22184：

龔成老師你好 ，本人和女朋友一直有follow你的page和買你的百萬富翁系列著作，但今次想為自己父母發問 。

媽媽58歲， 全職主婦， 爸爸63歲，兩年後退休。兩老沒有投資經驗，現在擁有現金80萬。已供完自住樓，樓價現約450萬。

預計兩年退休後會有退休金有600萬。 請問可以如何分配資產，讓退休生活更有保障？ 需要分段購入收息股， 或者可以考慮年金等計劃嗎？感謝你！！

龔成老師︰

由於你佢地都已或接近退休之年，我地投資重點，會係點安排一系列可產出現金流的資產，為地退休生活作準備。

你可以將這$680萬，分成5部分。

第一部分投資收息股，你可以建立一個收息股組合，你可考慮港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）等，大多有5%股息

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

（你可睇下《50穩健收息股》當中仲有好多）。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之需。同時，若投資市場大跌，你可以在這時買到更多的收息股，股息率會進一步上升。

你可以將$680萬資金，平衡地分配在上述的項目上，對你來說是最好平衡風險，同時有穩定的現金流。

上市收息股︳都在合理區。你現時可以先用40萬，慢慢分注買入收息股，餘下40萬就等個市有明顯回調，才慢慢加大入市力度。

------------------------------------------------

Q22185：

你好，請問⋯ 2318 1475 1909 是否還有質素？

龔成老師：

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

日清食品（1475）不差的，都算有質素。

佢由日清日本（於東京證券交易所上市）分拆上市，主要於香港及中國內地從事生產及銷售麵條、蒸煮食品、冷凍食品、飲料產品及零食。

本身有品牌，加上業務穩定，盈利都不差。但比較大的問題，是增長有，但發展潛力未算好強，但市場已假設佢有高增長，所以在股價上，只視為平穩增值類別。

內地市場的確係一個增長動力，現價合理，未算平，分注都得。這股可長線的。

火岩控股（1909）有質素的。

佢主要從事開發網頁遊戲及移動設備遊戲（包括遊戲設計、編程及圖像製作）以及授權全球各地的營運商營運集團自主開發的遊戲。

遊戲已在北美、日本、歐洲及中國營運。集團收入主要來自授權費及出售遊戲幣。

業務發展理想，生意與盈利都有理想的上升，賺錢能力強，基本上有投資價值，暫時睇，前景仍是正面的。

不過要留意兩大風險，第一，佢行業是一些變化較大的類別，無人知當中的優勢能持續多久，始終市場變化可以較大。

第二，股價上落大，現價合理區中上部，未算平，投資值博率都有，但未算高。因此，：如果要投資，就要控制注碼。

------------------------------------------------

Q22186：

Sir 1177最近回了好多，我之前$8入了3手，我記得你話我太高入，現在跌到 $7可以再入小小嗎？還是等再回下先？

Sir 另外想請教你點睇 1798 大唐新能源?

龔成老師：

中生製藥（1177）是潛力股，人口老化令佢長遠有唔錯的增長，無論是政府投入的行業資源，又或是人民生活質素令可控制資金上升，都令人們更在醫療方面投入更多。

佢已建立一套完整的商業系統，有多個已賺錢的藥品類別，同時毛利高，可以不斷將錢投資在新藥裡，這模式運作很好。

但這類藥物企業，難免有一點風險，因此要久不久檢視，中短問題不用理會，但如果有一些核心性的問題，就要再全面分析。

就這刻來說，這股可以一直持有，因為商業模式理想，高回報，不斷再投資令股東利益快速增長。加上睇翻佢的業績，保持增長，這令企業價值有實際的上升，令股價得以支持。

現價合理區中上部，有貨可持有，分注或月供可以，這股可以長線持有的。

如果你加注，要慢慢加，不要急。

大唐新能源（1798）主要在中國專注於風電項目的開發、管理及營運。

佢要從事風電等新能源的開發、投資、建設與管理，低碳技術的研發、應用與推廣，新能源相關設備的研製、銷售、檢測與維修等，與新能源業務相關的培訓、諮詢服務，以及房屋出租。

過往的業務發展不差，長遠都有投資價值，不過規模較細，唔建議投資太大注。現價合理區中上部，未算貴。

------------------------------------------------

Q22187：

我想買隻709，我係1.7買左一手所以先留意，我相信佢疫情後復甦番所以一直都冇動作，係奇怪在佢同鱷魚恤呢幾日都好似俾人有心炒起但係又冇咩利好消息咁所以先好奇

老師我想問多兩樣野，我相信我買既都係優質股，但係如果我高追左的話我應該點做？

同埋如果touch wood 真係要放手上既股票套現，我地應該用咩準則去計算邊一隻可以放先？我諗唔明我應該放高增長力先定保守既先

龔成老師︰

若果你買的股票，係有質素，但係買入價較貴。由於企業係有質素，長線係會成長，令股價上升，所以你照長線持有就可以。

記住，買入左一隻股票後，我地唔好再用買入價，作為是否持有指標，而應該用佢質素，去做決定。

至於你現套現的話，可先集中沽出，較無質素的股票。

另外，你可以睇翻邊D股票，無咁配合你目標。好以你現時31歲，應集中在增長股上，一些增長力較弱的收息股，就可以先沽出。

最後，你可以睇埋佢地佔組合比重和現時平貴，將持股較多，或股價已經相對較貴的股票，優先沽出。

但緊記，有質素和適合你的股票，不要盡沽(就算略貴)。必需留有部份，去保持增值才算理想。

------------------------------------------------

Q22188：

你好，老師。希瑪眼科（3309）可以投資嗎？現在是合理價嗎？

仲有1隻歡喜傳媒（1003），可以投資嗎？

1660（兆邦基地產）可以投資嗎？

龔成老師︰

希瑪眼科（3309）有質素的，佢主要於香港及中國內地提供眼科服務，及銷售視力輔助產品及醫藥產品。

另外，睇翻佢，都尋找加大在中國擴展業務，係2019年透過收購眼科醫院於昆明及上海拓展服務網絡及在惠州設立一間新眼科醫院。

除了一線城市，佢亦係昆明及惠州等二線城市拓展服務網絡。

這股在業務上，的確有吸引力的，相信生意將會不斷擴大。不過過現時估值都唔平，現時估值略貴，基本上已反映了企業的增長力。長線投資不是不可，但就唔建議太大注。

歡喜傳媒(1003)多年虧損，無投資價值。

兆邦基地產(1660)規模唔算好大，質素算係一般，不宜投資太多。加上現價偏貴，值博率不高。

------------------------------------------------

Q22189：

老師，我是你剛剛完成初階課程的學生，最近分析1717澳優。澳優算優質股 但行業比較時 發現6186中國飛鶴優質度更高

行業平均pe為19-24，兩隻均處於合理價低

1.如果現時兩隻值搏率那隻會比較高？

2.老師會比這類行業的pe太約是多小？

3.現是政策上對於這類奶粉股長期發展是有利，但在研究要主要那些不利因素？

龔成老師︰

1) 澳優（1717）和中國飛鶴（6186）都有質素，現價大約係合理區中間，值博率相約。

但由佢地過去股價都係較波動，投資時要控制注碼，去平衡風險。

2) 一般都係10-15倍，會係較合理。但較具潛力和規模，好以蒙牛(2319)，就會比高少少，大約可以去到15-20倍。

3) 你主要可以從成本和供求去分析，例如原料價格和成本、中國出生率、行業形象(出現毒奶事件風險)、國際奶價、競爭對手(國內外)等。

------------------------------------------------

Q22190：

你好,我已經睇了你本<80後的千萬富翁>, 比外國作家(有名的)寫的致富書都好.我買過好多致富書睇, 當中包括:

1) 有錢人想的和你不一樣 (我的最愛, 入面教的思維方法很好)

2) 致富的科學 (啟發<秘密>誕生的一本書, 看這更能感受到吸引力法則在錢或財富方面更深的思想)

3) 35歲開始，不再為錢工作：歐洲富爸爸教你賺錢之道 (這是<我11歲就很有錢>作家的大人版, 教人開始儲錢幾好)

4) 思考致富 (我覺得不錯, 但應用內容部份己見過時, 例如分享如何寫CV, 收音機發展那些...)

5) 窮爸爸富爸爸 (這本是借的, 看過一次)

以上的書, 我只留了1和2, 其他都斷捨離了, 因為覺得內容都重覆.

至於你的投資教科書, 我看了<年報勝經>, 覺得不錯, 很易明, 但內容不夠深入. 知道最好是上你的股票班, 但我真的抽不到時間, 因為我不定時工作, 有時要OT至夜深.

希望你可以寫更深入的書, 教更深的知識. 黎緊我會買埋你其他書.另外, 因為我開始做小生意了(兼職), 你會寫做生意, 同埋推薦一些實用性高的書嗎?謝謝你.

這次主要是想告訴你, <80後的千萬富翁>寫得很不錯, 真的, 比我看很多名作家的致富書好, 一來可能是你吸收了各人的大承, 二是你的文筆親切貼地, 令讀者喜歡.

期待你繼續創作寫書.

龔成老師︰

多謝支持，由於估值方法，真係要好長時間講解，你如果上過我堂就會明。所以，較難係書中詳述。

但你若對企業估值，想作進一步的認識，你可以睇《股票勝經》、《選股勝經》和《年報勝經》，會較詳細教你估值的基本概念。

至於實用性較高的投資書，你可以睇《證券分析》和《巴菲特給股東的信》

雖然不如上堂咁完整，但對初學者已經會有一定幫助。

至於創業有關的書，都可以考慮。但因為現時真係好忙，所以重心暫時只能放係股票上。未來有時間時，都可以考慮下。

------------------------------------------------

Q22191：

老師你好，我最近發現屋企人原來買咗幾隻水泥股，都唔少貨，現在蝕咗好多，想請教下應該點算，thanks

- 2233(買入價：1.32）
- 1313 （買入價：9.xx)
- 743(買入價：7.xx)

龔成老師︰

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。可以視為收息股。這類股唔建議太大注投資。

華潤水泥控股（1313）本身有質素的，不過業務就較有波動，佢過往的盈利數據上落都大，因此股價的變大亦會較大。

佢之前公布的中期業績，業務有回落情況。長遠計，房屋、基建發展等因素，都會利好水泥股。因此長遠是正面，現價合理，但就要留意股價上落會較大，自己要注碼上控制。

亞洲水泥（0743）質素只是一般。

佢母公司亞洲水泥集團於台灣成立，並於台灣證券交易所上市。而佢的水泥及預拌混凝土產品主要於上海市和江西、湖北、四川、浙江、安徽及福建省，以「洋房」品牌出售。

這企業的主要生產設施位於江西省、四川省及湖北省。於上海、四川省、湖北省、江蘇省及江西省亦有混凝土配料廠，可生產混凝土供應鄰近的用戶。

佢擁有及經營鄰近主要生產設施的石灰石礦場，供應集團生產熟料所需的全部石灰石。過往都有發展的，但盈利波動大，佢的賺錢能力較被動，整體質素只是一般。

這幾隻水泥股，係有投資價值，只係你買入價有少少高，又唔算好高。

但較大問題係佢地質素上，不宜持有過多。再加上組合太集中係水泥行業，令過度集中性風險增加(個別行業不宜佔組合30%以上)。

因此，你要進行減持，將部份持股，換碼至其他行業優質股，去令個組合回復平衡。

------------------------------------------------

Q22192：

龔成老師，您好。一直都好想報你的班，但係因工作時常出場，現在因為疫情更加被隔離在外不能回港。請問，有無機會有網上課程？

覺得港股越來越難玩，現在手上有 2039, 2866, 6666, 1810, 除了1810睇過老師介紹，

其他的股票越揸越無信心，唔知係咪優質股，睇PE又唔覺得貴，在想應該呢刻止賺或長揸。

龔成老師︰

我同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

近期環球經濟因素、疫情、中央近期政策等，都令最近市場比較波動。但我地唔好因為咁，就比市場氣氛影響左自己判斷。

我地持有一隻股票與否，都係要集中睇翻佢本身有無質素，唔好被個股價波動，影響左你左決定。

但留意，市盈率只係其中一個估值方法，未必適合所有企業。而且各個行業，市盈率的合理值，都會有所不同，唔可以用市盈率低，就判斷係唔貴。

我地仲要考慮埋企業本身質素，有時市盈率太低，反而未必係好事，可能係反映緊市場覺得這股票，係無投資價值。

中集集團(2039)和中遠海發（2866）投資價值都有，但唔算好高。若持貨較多，可以沽少少，去平衡風險。

恒大物業（6666）有質素，有長線投資價值。

佢係物業管理服務運營商，佢係中國物業服務百強企業中，以項目所覆蓋城市數目計，佢排名第二，如果以總收入、總毛利及總淨利潤計，排名第三。

類別為中高端住宅物業、寫字樓及商用物業，並已訂約管理其他物業類型如主題樂園、產業園、康養項目、特色小鎮及學校等。

佢絕大部分物業管理服務收入，來自集團控股股東恒大集（3333）所開發物業提供的服務，長線發展正面，可長線持有。。

小米(1810)都係一隻有質素的潛力股，你可以持有。

------------------------------------------------

Q22193：

老師，你好。想請教一下，24歲開始月供2800 快一年，每月$1000，今年增加供款2800 $3000,另加多一隻1177月供$1000 。

如果一直這樣供到50歲(供26年)，會有幾多錢呢？

龔成老師︰

我假設投資回報有10%（連股息再投資），你每月投資$4000，26年後大約會增值至520萬。

你24歲還很年青，你要把握好年青這個優勢，去盡力投資，加大複息效應。每月投資資金，最好係可以等同收入一半，咁就會較理想。

另外，我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，會因應番你的人生階段。

你現時係年青，可以集中係「平穩增值股」+「潛力股」。到你接近中年時，就慢慢集中翻係"平穏增長股"。到你近退休之年，就應集中在「收息股」，去創造平穏現金流。你可以睇翻自已年紀，去作出配置。

所以，你唔好諗住一個組合供到老。以下是一些相關股票，供你參考。

潛力股︰、中生(1177)、福壽園(1448)、安碩恒生科技(3067)、港交所(0388)、阿里（9988）、騰訊（0700）、舜宇光學（2382）、小米（1810）、ＧＸ中國電車基金（2845）、三星FANG ETF（2814）

平穏增值股︰港鐵（0066）、金沙（1928）、煤氣(0003)、恆基（0012）、中銀香港（2388）、長建（1038）、粵海(0270)、領展(0823)、希慎(0014)、太古地產(1972)

收息股︰港燈（2638）、香港電訊（6823）、工行（1398）、恆生（0011）、置富（0778）、陽光（0435）、深高速（0548)。收息基金(3110)，都可以。

由於現時大市只在合理區，每月儲蓄唔好盡用，要留翻一半，等大市出現一定程度的下跌，才大力度掃貨，然後長線投資。

------------------------------------------------

Q22194：

本人30歲，每月收入4萬，現持10萬現金

以下持股比例想老師幫我分析一下：

收息股（水桶3, 總投資11萬）：
$70.25買（0005）匯豐1600股

平穩增值（水桶2,總投資12萬）：
$52買（66）港鐵500股，
$92買（823）領展500股，
$27.66（2800）盈富1436股，
$4.94買（3662）奧園健康2000股,

潛力股（水桶1，總投資10. 6萬）：
$6.78買（1448）福壽園1000股,
$1. 12買（788）中國鐵塔26000股，
$2. 1買（6068）睿見教育12000股，
$2.16買（1337）雷蛇9000股，
$0. 54買（860）力世紀48000股，

問題1：想問持股比例適合我嗎？同公司質素有冇問題？有部份股票都坐緊艇，有冇邊隻股係應該賣掉轉其他？

問題2：想再買入潛力股，老師最近有否推薦新的潛力股？

問題3：力世紀（860），見佢先前從事珠寶業，近年轉型做豪華電動跑車，覺得佢管理層都正面，佢收購左Apollo 條生產線，德國汽車工程服務外包提供商ideenion,

亦同上海金橋簽訂合作協議，並於今年下半年推出原型車型，可見佢唔係得個講字，而佢既股東陣容亦有雅居樂9％,李家誠9. 25 %,

與李氏關連的維港投資6.3%, TOM集團1. 9%支持，覺得亦有加分。睇過佢既現金流亦強勁，近期股價落至$0. 4, 想增持多40000股，是否有值博率？

佢已經轉型發展電動車，但有d網頁依然會將佢同六福，周大福等既珠寶業比較，其實點解？

問題4：上年與未婚妻聯名買入500萬私樓單位自住用，希望於8年內買入第2個私樓單位（預算約800萬），但感到十分困難，如果只靠投資股票，回報率要有多少才能使我買到第2個單位呢？

而方法係咪應該係儲夠首期，再將原本自住的單位甩名？再用單人名義購買新一單位，但單人又好難過到壓力測試，除非儲了3成或4成首期，感到十分迷妄，希望老師可以指點一下，感謝

龔成老師︰

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合。收息股，就不宜持有太多。而且個別企業和行業，不要佔組合15%和30%以上，否則會有過度集中性風險。

因此，你應該減持部份匯控(0005)，至其他有增長力的優質股，長線會較有利。

另外，你唔好用個買入價，作為判斷股票質素指標。我地著眼點，應該係睇企業長線質素。如果係有質素，中短期帳面數字虧損，唔需要太在意。

睿見（6068）政策風險較高，要時小注係可以，但不建議再加注。

雷蛇（1337）有潛力，但本質好波動，同樣不宜持有太多。

力世紀（0860）好難分析佢價值，只能說投資風險唔細。

2) 潛力股暫時都係推介以下幾隻，但現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

3) 力世紀（0860）佢一直處於虧損狀態，雖然已開始發展電動車，但只係好初期，未到賺錢階段。

現時主要盈利，都係來自珠寶產品及鐘錶分部。因此，坊間用佢同六福(0590)比較，都係合理。

最終新能車能否發展成功，都係未知之數，現時新能車方面估值，只係得個"估"字。整體而言，此股好難分析佢價值，加上佢過往有10送1之類動作，我對這類股票較有保留，投資風險唔細。

4) 我比較建議你甩名，因為可以變回首置，從而節省15%印花稅。但壓力測試會較難過，你要預留較多首期資金。

至於股票投資回報，你預10-15%左右，只要你係投資一些有質素的增長股，長線要做到這個回報率，係合理。

建議你用「平穏增長股」 + 「潛力股」作組合，去創造一個增值平台。

策略上，你現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金和現有10萬，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

我假設投資回報有10%（連股息再投資），你每月投資$15000 + 現有資產43萬(股票+現金)，8年後大約會增值至300萬。

你可以用這個結果作為參考，去計劃你每月供款金額和投資計劃。

------------------------------------------------

Q22195：

你好， 本人35歲，已婚，家庭月入3萬5至4萬，與家人同住，需供養4大長老，每月基本開支+2夫婦保險約3萬5，每月可儲蓄金額約5千，現有約15萬股票+15萬現金

完全唔識投資 ，朋友教我買入匯豐嘗試下投資。2019年第一次投資入0005，好快就跌咗4成，有入多一手溝貨平衡成本

幾個月前開始睇你嘅facebook及剛剛開始建倉

現有投資分佈：（平均入手價）
0005：800股 （49.35）
1310：1500股 （9.34）
0636：500股 （23.35）
0823：200股 （76.15）
0066：1000股 （43.8）
ibond : 3手（2024到期）

明白投資應該要分散風險，我想問下我現在剛剛建嘅呢個倉，比例可以嗎？

同類行業不超過30%，單一股票不超過15%， 想問下係咪用金額去計？

因四大長老，只有二人有工作，但即將步入退休之年，家庭開支將會進一步擴大，現在想儲多一點現金以備不時之需。我們能承受的風險不高，短期一年內暫不考慮月供股票

但如果手頭鬆動可能會考慮在大市調整時分注購入平穩增長的股票

請問下領展，港交所及港鐵適合我們投資嗎？ 到我們儲多一點現金後打算月供或分注購入

謝謝回覆及解答

龔成老師︰

我地配置一個組合，除了因應人生階段外，都要考慮到平衡性。同類行業不超過30%，單一股票不超過15%，是一個幫你達至平衡性的參考指標。

我地係會用當時市價，去計算比重。由於股價係會有波動，所以差少少都係可以接受。

以你現時35歲年紀，應以增值為主。匯控(0005)和香港寬頻(1310)有質素，但佢地係收息股，主要收下息，增長力唔會明顯。你可以沽少少，換至較有增長力股票。

而IBOND係收息產品，比較適合退休人士。建議你沽出，贖回資金作其他投資。其餘持股都適合你，可長線持有。

現時大市只在合理區，15萬現金用來等大跌市機會。而沽出部份收息股和IBOND資金，可以換碼至以下股票。

但潛力股增長潛力大，但風險會較高，你要自己平衡。以你年紀，最多可以佔5成。但由於你現時經驗較淺，最多佔3成好了。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、領展(0823)

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

現時只有安碩恒生科技(3067)、ＧＸ中國電車基金（2845）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘都略貴，想買就要等一等。

未來當你每月有較多空閒資金時，你都可以利用上述股票，作為月供目標，去進行財富增值。

------------------------------------------------

Q22196：

龔sir你好~本人近年才真正認真學習投資,增加知識, 同時近日在重新審視自己倉位/思考手上股票該如何部署. 其中2個問題有少少想不通,想向你請教

1.現時雖處於牛市階段, 但近日恆指走勢向下,再加上內地制定反壟斷政策/不同監管政策, 不利消息令新經濟股價下跌 ;

是否可視為趁低吸納機會,待企業適應這些政策後繼續增長? 我們可以如何理解現時市況&進行出入市部署?

2.當股市進入跌市階段時,是否有需要將資金進行調配, eg.由之前增長較高既股票轉到房地產/公用股當中? 抑或其實可以照樣保留現有股票,

同時靜待一些企業股價回落到合理/便宜位置時,再進行入市?

謝謝你!

龔成老師︰

1) 大市水平，係我地入市與否的其中一個參考。但更重要係睇企業本身，佢股價是處於什麼水平，才去決定入市。

近期中央政府，不斷推出一些反壟斷政策和監管，令很大大型企業股價受壓。現時不少由過往略貴，回至較合理水平。

表面上，因為咁樣出現左入市機會。但我地都要了解翻，這些政策對這些企業，有無造成長遠影響。如果有，我地估值可能要進一步調整，或者控制注碼，去平衡風險。

2) 當大市下跌，估值好似平時，我地就會加大持股比重，投入更多資金，去買入優質股。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

不論大市在高定低位，都不會影響我們投資選項。市場平貴，純粹只會影響我們入市策略(即現金和持股比例)。但所投資的股票類別，係因應人生階段，所以係不變的。

只要現時持有股票，係適合你年紀，而長線質素又無變壞，就算跌市，你都應該一直持有。

至於入市時機，我地唔會等到佢平，先至開始入貨。因為我地唔會知，這些優質股，係唔係一定有機會，回到平宜水平。

因此，我地會因應自已資金多少，去分成多注咁入貨。係合理區頂，只會小注。回到合理，開始慢慢加大力度。到平宜區，才大力掃貨。

咁就可以平衡價值波動風險之餘，又不會出現完全入唔到貨的情況。

------------------------------------------------

Q22197：

成sir. 之前見你對40歲少股票，多現金的見解，實在擊中心房。

本人已48，冇樓，只是揸住200萬現金，有感樓及股都實實在太貴，故過去一直等跌市，結果錯哂。

求見解未來在房及股怎樣做打算比較好？現在應買樓嗎？同埋建一個約100萬的倉應怎規劃？實在困惑無比。希望賜教，謝謝！

龔成老師︰

由於香港樓房屋供應失衡，相信長線維持上升，機會係會較大。

而是否買樓，從投資角度，而時租金回報率不高，應先投資優質股會較好。但若從自住角度，只要物業係附合你長線生活需要，而你長線又＂供得起"，咁置業都無問題。

至於投資優質股方面，你可以投資優質，平穏增長股，作為投資目標。現價在合理水平，你可以將100萬分成多注，可慢慢入貨(唔好一次過去入貨)。

餘下100萬就等大跌市出現，才出手掃貨。或者此期間，你物悉到合適的自住樓，你就用來做置業基金，都係可以。

------------------------------------------------

Q22198：

龔老師你好，follow了你大半年，零經驗的我都好同意你長線持有嘅說法。

今年26歲，每月可儲$10000，最近都想入手,盈富，港鐵，領展，請問咩位入係最好的？如何分配？有什麼要注意， 謝謝～

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你26歲，應以增值為主。盈富(2800)、港鐵(0066)、領展(0823)都適合你，建議你以盈富作主力。

但你現時無投資知識和經驗，對企業估值，點去定平貴未必會太了解。所以你先利用月供模式(暫時唔好自行定平貴入貨)，去做增值，可以減低買貴貨風險，對你而言會較理想。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

由於你係較年青，長線可以加入一些潛力股，去增升組合增長力。以下都是一些有質素的潛力股，你可以參考下。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22199：

丫sir 唔好意思又麻煩你，我想為隻（1558）東陽光藥估值 ，但發覺現時醫藥行業股既pe 都好高，我試將市值由高至小，

pe 唔過50既6隻股票做一個平均數得出黎係31pe 請問呢個數據可相性高嗎？

另外我拎1558 （東陽光藥）5年平均pe 為25.6 ，最有代表性既eps 為1.18，但佢係20年發紅股1送1 令佢pe 大減 ，

所以我將佢平均pe 減半變成12.8 同時都將行業pe 減半變15.5。

估計合理pe 約12.8-15.5倍估算合理價為12.8x1.18-15.5x1.18

15-18加多10%緩衝=13.5-20

我計得啱唔啱。唔該丫sir

定我應該再減半多次 變成6.75-10呢個先係佢合埋價

龔成老師︰

你計算的基礎，基本上係正確。但數字判斷方法，有些地方係要修正。

首先，現時很多醫藥相關企業，好多都被炒到好貴，所以PE都偏高。加上這些企業，上市時間唔算長，參考價值會被打折扣。

行業本身係有發展潛力，但一般需要較長時間去投資。東陽光藥（1558）本身係有質素，但佢收入較集中在磷酸奧司他韋，考慮到專利到期時，會對佢造成不利等問題。

BOC網中每股盈利，已經考慮了這個1送1影響，所以你計算每股盈利時，唔洗再調整。

至於佢PE大跌，唔係因為1送1紅股。發送紅股，每股盈利和股價係會同時下調，因此唔會影響到PE。

你記翻上堂教你的PE架公式，係市價/每股盈利。即係PE大跌，主要原因應該來自股價大跌，或/和每股盈利上升所致。

於在2020年，受新型冠狀病毒肺炎疫情影響，中國國內人口流動性降低，醫院的診療活動數量、處方量及藥品銷量也隨之下降，因此集團收入有較大下滑。

因此，好明顯不是後者，而是因為前者，即股價大跌所造成。

由於這個是一次性問題，相信唔會長線影響企業，係我地計算每股盈利時，應排除2020年數字會較好。用過往4年平均，約為HKD1.276。

係估算合理PE時，因應企業產品種類、發展潛力和未來面對風險，我地要向下調，你預大約6-10倍。合理價，大約HKD7.7-12.8。

東陽光藥（1558）不是零質素，但業務有少少轉弱，加上業務都有少少風險。雖然現價係吸引，但某程度都係反映市場對佢睇法較淡。

因此，此股係可以投資，但唔可以太大注。

------------------------------------------------

Q22200：

想問下網上有講按揭存款掛鈎戶口可代替交息的概念？ 但睇左唔係太明, 想請教下你, thanks.

想問下如果自住的話, 其實青衣(藍澄灣/ 海欣花園)或者深井(浪翠園/碧提半島) 呢2區作為選擇，請問老師有咩建議? 覺得邊區會好D & 升值潛力好D呢?

唔好意思呀, 突然問幾條問題, 知道你好忙, 但仍細心解答我既問題, 萬分感謝!

龔成老師︰

其實簡單咁講，就係你可以存一筆錢落去個戶口，佢派息金額係足以和你按揭利息支出，作對沖。

但佢會限你存款金額，會係等同你按揭的一個百分比。至於多少，你可以問翻銀行。

從投資角度，青衣(藍澄灣/ 海欣花園)會係較好，始終交通較便利和較近市區。

但這是你自住樓，你要考慮埋你長線生活需要，你要諗佢地配唔配合到未來5-20年生活。若然係可以，又供得起的話，置業係無問題。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

新頻道成立！歡迎訂閱及加入：
【游泳私房話】YouTube：https://www.youtube.com/channel/UCWfGGxRvTJwgZz6Wak2zalw
【游泳私房話】FB社團：https://www.facebook.com/groups/swimmerprivatetalk
－－－－－－－－－－ 路隨心轉，熱情燃動！ 盡情體驗卓越不凡的駕馭樂趣
全新MICHELIN Pilot Sport 4 S新世代高性能運動輪胎磅礡上市

身為全球輪胎業領導品牌，MICHELIN多年來不僅持續引領輪胎業界的研發趨勢與設計潮流，更在高端性能輪胎市場佔有著舉足輕重的地位，品牌旗下的「Pilot Sport系列產品」，自1997年首度推出後，旋即深受全球廣大消費者的喜愛與推崇，隨後於2003年發表膾炙人口的Pilot Sport PS2、2010年亮相的新世代性能跑胎Pilot Sport 3、2011年登場的高性能街胎之王Pilot Super Sport、2014年強勢推出Pilot Sport Cup 2道路專用頂級競技輪胎，以及甫於2016年問世的Pilot Sport 4新世代高性能胎，Pilot Sport系列每一款產品，除了均獲得熱血車迷們的熱烈迴響，完整滿足不同客群對於操駕樂趣與輪胎性能演繹的高標需求，更是許多歐洲知名汽車大廠指定使用的原廠配胎首選(從1997年起至今已有超過400部車款原廠配置Pilot Sport系列輪胎，包含義大利知名跑車大廠Ferrari旗下最新超跑鉅作2017年式FERRARI GTC4 LUSSO)，成功建立起Pilot Sport系列產品等同於高性能運動輪胎代名詞的鮮明形象。

在新世代高性能車款動力輸出大幅精進提升的趨勢下，車輛對於輪胎的性能表現與要求同樣越來越嚴格，如何慎選一款能夠和眾家超跑完美匹配的高性能輪胎，絕對是消費者在選購輪胎時不容忽視的關鍵因素，而消費者對於高性能輪胎產品的殷切期待與渴望，MICHELIN當然都聽見了！為了讓國內廣大熱血性能車迷能夠進一步體驗到卓越不凡的駕馭樂趣，台灣米其林於今日正式宣佈：全新世代MICHELIN Pilot Sport 4 S高性能運動輪胎隆重在台灣上市，同時鎖定熱衷於享受極致駕馭樂趣的超跑車主為目標客群，強勢切入國內高性能輪胎市場級距，Pilot Sport 4 S所具備的卓越輪胎性能綜效，也將帶領熱血性能車迷們進入「路隨心轉，熱情燃動」的駕馭新境界，盡情領略性能與安全的絕佳平衡！

專為頂級性能跑車量身設計 全方位卓越輪胎性能領先群倫
做為Pilot Sport系列產品的最新力作，原廠研發團隊以「熱情成就不凡，擁抱卓越的駕馭感受」為初衷，運用MICHELIN集團最先進之輪胎科技和獨一無二的產製技術，投注龐大資源結合傾力打造全新Pilot Sport 4 S，賦予這款新世代超高性能輪胎，無論是道路或賽道上的表現均是同級競品中的領先者。

全新Pilot Sport 4 S不僅完整承繼Pilot Sport系列產品的所有優點，更導入了賽事經驗及百年科技，淬鍊出全新Pilot Sport 4 S這款傲視同級對手的新世代高性能輪胎，其在技術應用層面上，除了採用米其林領先業界的獨家" 進化晴雨雙配方(Bi-Compound)"，針對胎面外側採用全新的”複合彈性體”，專為乾燥路面設計，強化輪胎抓地力。內側則運用了多功能彈性體”與“疏水性二氧化矽”混合配方，在濕滑路面上，擁有絕佳抓地力與制動表現；內外側胎面透過創新複合材質的完美融合，不僅克服了以往性能輪胎在乾濕地路面的性能表現產生顯著落差的情況，也讓全新Pilot Sport 4 S在面對乾濕地路面兩種截然不同的路時況，都能展現出色的制動性能，進而體現MICHELIN Total Performance策略願景的核心理念：跨越技術上的挑戰並在同一條輪胎上提供全方位的性能表現，正因如此全新Pilot Sport 4 S才得以精準掌控輪胎性能最關鍵的高水準的接地及轉向操控、進化的晴雨雙配方、精湛的百年工藝、獨特的美學設計及胎邊輪圈保護設計等五大性能面向！

根據德國權威認證機構TÜV SÜD所進行的綜合測試數據顯示，全新Pilot Sport 4 S在關鍵的性能測試項目中，完勝其他受測的主要競爭對手同級輪胎產品，充分證明其優異的產品實力。相關測試數據結果如下：

乾燥路面煞停測試
MICHELIN Pilot Sport 4 S於乾燥地面煞停測試中，由時速100km/h進行煞停只需33.66公尺即可完全停止，比成績最接近的競品短少0.83公尺。

濕地路面煞停測試
MICHELIN Pilot Sport 4 S於濕地路面煞停測試中，由時速80km/h進行煞停僅需27.73公尺即可完全停止，其所需的煞停距離比成績排名墊後的競品，足足縮減達2.41公尺！此外，全新Pilot Sport 4 S在濕地路面煞停測試的優異表現，也讓它成為第一款在這個測試項目中獲得歐盟輪胎認證標章(European labelling scale)最佳A級評分的產品，透過該認證標章讓消費者可以清楚了解自己計劃購買的輪胎相關性能、噪音等級與磨耗指數等關鍵資訊；而在滾動阻力測試中，相較於其他三分之二的受測產品僅獲得C級評分，MICHELIN Pilot Sport 4 S同樣在此項目中獲得極高的評價。

單圈計時測試
在全長2.6公里的賽道上進行單圈計時測試，測試車輛分別配置MICHELIN Pilot Sport 4 S以及其他五款競品輪胎，測試數據顯示MICHELIN Pilot Sport 4 S的單圈成績比競品快上0.4秒~1.39秒，證明其在賽道上同樣展現強大的性能優勢。

磨耗耐久測試
根據歐洲知名專業測試單位DEKRA Test Center所進行的實測，MICHELIN Pilot Sport 4 S在磨耗耐久測試中領明顯先對手，並且擁有更長的使用壽命。

為詮釋極致性能而生 在道路和賽道上完美釋放駕馭激情
透由MICHELIN長久以來贊助全球知名賽車運動賽事，做為研發道路用輪胎的移動實驗室，工程研發團隊將比賽過程中所收集的龐大數據資料庫，以及專為賽道用胎的創新輪胎科技完整移植，為提供極致駕馭樂趣、專為運動型跑車所打造的輪胎產品，奠定了紮實的研發基礎，並賦予全新Pilot Sport 4 S高性能輪胎「為詮釋極致性能而生，在道路和賽道上完美釋放駕馭激情」的產品訴求。

全新Pilot Sport 4 S於今日隆重在台上市，宣告了MICHELIN即將在國內高性能運動跑胎市場上，掀起一波讓人情緒沸騰的性能狂潮，也將為廣大熱血性能車迷們帶來前所未有的駕馭新視野！

【全新Pilot Sport 4 S vs. Pilot Super Sport】
l 乾燥路面煞停距離較短1.08公尺
l 濕滑路面煞停距離較短1.05公尺
l 乾燥路面單圈計時成績快0.16秒
l 在一般道路平均行駛里程多4,500公里

(台灣米其林官方網站：http://www.michelin.com.tw/)
(台灣米其林臉書粉絲團：https://www.facebook.com/MichelinTireTaiwan/)

⬛本影片已取得【digiMobee移動生活網】授權使用

◉ 訂購 剛剛好水餃：https://shopee.tw/privatetalk

網站：http://www.autoprivatetalk.com
FB：https://www.facebook.com/harry.liaokang
社團：https://www.facebook.com/groups/autoprivatetalk
主講人/剪輯後製/企劃：廖剛
註：不會有字幕(我手邊沒有人力)(但你有興趣也可以幫我上字幕)、不要用粗話罵人～