有段時間，好似去到邊都仲聞到殘餘喺空氣嗰種催淚煙氣味。兩年過去，呢種令人眼水鼻涕直流、皮膚通紅灼熱嘅氣體終於消退，但呢兩年間香港人流嘅眼淚卻冇停止過，因為每日都有更荒謬、更令人絕望嘅事發生。 每次想放棄嘅時候，我都會聽返某次悼念周同學集會入面一個手足講嘅說話，嗰段說話令我覺得好被激勵。今日再睇一次，發現呢個社會好多野都已經改變咗；但我仍然好想同大家分享呢段說話（我特登錄低再逐隻字打返出來架，原文太長所以刪減咗）。希望可以帶少少力量俾同路人，記住我地唔係因為有希望先堅持，而係因為堅持先會有希望。 /大家好，我算係一個半前線嘅抗爭者，係一個基督徒抗爭者，我今日係懷着一個好沉重嘅心情同大家分享，分享我嘅感受、理念，同埋作為一個基督徒嘅睇法。 其實喺4月28號民陣反修例13萬人嗰次遊行呢，我已經開始參與呢個運動。喺100萬人一齊行啦、 200萬人一齊行啦、包圍立法會，各種遊行集會我都好盡力去參與；買裝備、貼文宣、派傳單、捐錢啦、上連登上twitter上fb推post啦⋯無論如何我都想為香港做啲事。尤其我作為一個爸爸，我想為我嘅小朋友創造一個更自由、更公義嘅社會，起碼佢日後長大之後，我可以好自豪咁同佢講，我有為佢嘅將來做過野架。喺5月到10月呢個期間，其實我見到呢場光復香港嘅運動，個能量巨大咁爆發。五大訴求確立，徹底實踐我地雨傘運動做唔到嘅不割𥱊、不分化嘅精神；上至老人家、中年，下至青年、幼童，我地一齊緊緊地團結。香港人再一次展示世界級嘅公民力量、質素 ，而且更加成功連結國際陣線。 或者我地幻想好快會勝利，我地好想喺煲底脫下面罩擁抱慶祝，但係林鄭政府嘅拖字訣，喺近月好似逐漸咁見效；港共政府冷血、麻木不仁嘅態度；警隊強暴同埋屠殺不斷升級，無數嘅人被黑警打傷：有手足失去雙眼、失去雙腿，有人被性侵犯，有人被強暴，有好多手足被跳海自殺、被跳樓自殺。直至琴日(9/11/2019)，離開咗我地嘅周同學⋯ 面對一個殺人嘅政權、殘暴可恥嘅警隊，極權嘅制度好似令我地感到害怕、感到疲累，士氣有點倒退。大家有冇開始諗想逃避呢個昏亂嘅社會， 開始想脫離連登想脫離tg，開始想返到去五個月前所謂嘅正常生活。宜家你地可以望下你地身邊嘅人，你睇下佢有冇疲累嘅眼光，係咪開始覺得攰喇？但你地甘唔甘心呀？我一定唔甘心，我一定要堅持落去，我地香港人係可以被擊倒，但唔可以被擊敗！ 我要提醒下大家嘅初心，就係團結我地一切嘅「五大訴求缺一不可」。或者有好多人問緊我地香港人究竟想要乜野呀？撤回惡法，撤回暴動定性，撤銷所有義士嘅控罪，成立獨立調查委員會追究警暴，落實真正嘅雙普選。正正係呢個五大訴求背後嘅價值座標，就係正正解釋咗我地點解要堅持落去。我地香港人追求嘅係社會制度嘅公平、資源分配嘅正義、法治精神嘅貫徹、政府治理嘅透明、人民參政嘅充份。今日香港人嗌破喉嚨，走上街頭，就係「五大訴求缺一不可」正正提醒我地唔會放棄，因為我地喺度捍衛緊我地應有嘅自由同公義！ 經過五個月密集式嘅行動，或者我地承認係一場持久戰、一場好漫長嘅持久戰已經進行緊。喺三權分立已經失效嘅社會，行政不仁、立法會不義、司法不公嘅時候，我地已經活緊喺一個軍政府嘅時代；但我地香港人從來沒有被擊敗。我地拒絕、我地精神上拒絕共產黨嘅統治合法性，我地唔會習慣暴政，我地一定會繼續保持憤怒，我地要堅持抗爭嘅初心。大家一定要記住，記住呢個抗爭嘅初心！所以喺呢個漫長嘅持久戰當中，我鼓勵大家將抗爭融入我地日常嘅生活：持之以恆參與所有嘅遊行集會；建立黃色經濟圈，杯葛任何中資背景嘅機構；紀念運動中重要嘅日子，同埋對香港民族重要嘅日子，將一直走來運動嘅歷史同所有義士嘅記憶，好好保存；成立各行各業嘅罷工工會；全民支持、支援被捕人士及佢地嘅屋企人，全民支持因政見而被解僱嘅手足，全民支持流亡海外嘅港人，全民支持全力抗爭嘅義士；有錢出錢，有力出力。每個人嘅支持都好重要。 而作為一個基督徒，我有咁嘅睇法：謀事在人，成事在神。作為基督徒，我地應該把眾人所求嘅事、所謀嘅事，交俾我地嘅上帝。耶和華同我地講：「我嘅意念非同你們嘅意念，我嘅道路非同你們嘅道路。天怎樣高過地，照樣，我嘅道路高過你們嘅道路，我嘅意念高過你們嘅意念。」 上帝喺人類嘅歷史運行佢嘅奇妙旨意同計劃，當暴政肆虐嘅時候，佢嘅手仍然牽引人類嘅歷史軌跡。上帝曾經帶領亞伯拉罕走入迦南地，上帝又引領過摩西同以色列人走出埃及，上帝又引領大衛嘅手戰勝巨人歌利亞。而今日，我相信上帝一定帶領香港人戰勝最邪惡嘅暴政！請大家保持憤怒，堅持信念，對香港嘅民族有信心，對上帝要有信心。 然後，我地將受傷嘅肢體交俾上帝去醫治，我地親自去求上帝安慰我地受傷嘅靈魂， 求主去擁抱離開我地嘅靈魂。喺以賽亞書41章裡面講到：「我們不用害怕，因為上帝與我們同在；不要驚惶，因為耶和華是我們的神。耶和華必堅固我們，上帝必幫助我們，上帝用祂的公義右手扶持我們。」痛苦唔會令我地消沉，悲傷唔會令到我地卻步，對佢地嘅記憶，我地會永永遠遠咁保存。佢地抗爭嘅道路走完喇，宜家輪到我地接手。我地應當剛強壯膽，將香港民族嘅意志承傳落去，咁樣先可以對得住佢地。 最後我想解釋點解我戴呢個V煞面具，係因為呢套電影有句講到:「面具之下只係一個血肉之軀，但係面具之下還有一個理念，就是信念不死，刀槍不入！」希望可以成為各位堅強、堅持嘅信念！

《濁水漂流》，講兩句： 1) 質感如歌、如遊記。會想起居於深水埗的日子，街道的光、氣味、顏色、溫度。那時差不多沒隔一兩條街就有巨型地盤(如今已成岩巉牙簽樓)，會想走進去漏夜歷險。當然不敢，反倒是會看到街貓悠然自得的進進出出。電影裡，看著木仔(柯煒林飾)和輝哥(吳鎮宇飾)果真走了進去，躍上半空朝嘉頓山以南的萬家燈火撒尿，魔幻又親切。
 2) 小弟成長於新界，出城遷往市區的首站是深水埗劏房。後來跟不同朋友聊起，大抵都有同樣經歷。深水埗的來往與混雜可說是香港的縮影。戲內主角們亦是從五湖四海漂流過來，來自非洲的小黑(高只仁飾)、意大利的甘浩望神父、越南的老爺(謝君豪飾)、北方的卓玲(余淑培飾)，還有沒被明言的輝哥。謝君豪的越南音調固然有神采，吳鎮宇更是交出怪物級演員功課，他所有對白的語序和句子結構都經過重組，就跟好多「唔知邊度鄉下」的婆婆伯伯般，聽落順耳，但細聽會知道，跟本地出生成長的人說話方式有根本性的分別。這個細節有多少來自劇本一字一句，多少來自演員消化與輸出，倒要跟導演或吳生確認才知道。
 3) 有人說吳鎮宇演得浮誇，我卻會覺得相比起來，他比很多深水埗暴烈阿叔來得不dramatic。反倒是他的落泊，好看得不得了。以致他淚眼盈眶的好幾場，「不以哭泣為哭泣」，口up up別的甚麼，把所有已然溢出的悲從中來強行吞回，真係好痛好痛。 4) 相信大部份進場觀眾都未必有無家者的經驗(包括我)，電影頭半段，不免有觀看他者故事的感覺。但隨著事情推演，許許多多的有路與無路，到大勝(朱柏康飾)與輝哥的激辯，最沒資源的人到最後仍念茲在茲初初打那場官司是為了甚麼。一下子召回更廣闊的共同感。陳妹(李麗珍飾)與蘭姑(寶珮如)的互相照料、木仔與卓玲這對《那麼溫柔的、暴烈的》CP的成人禮、何姑娘(蔡思韵飾)盡力幫忙又難以逾越某道牆、街友走了之後的眾人自學式破地獄，那種實巴巴的羈絆與不知何時再能碰面的再會，莫不是我們曾在某個時地人事在街道上經歷過的種種。
 5) 歌很好聽。小黑的故鄉歌、大勝的喃嘸歌、還有甘仔的廣東歌，他唱不了兩句已覺心酸，下一刻朱康就爆哭了。還有還有，黃衍仁的歌，把燒旺的火轉化如水般行走下去。
 6) 美中非常不足，首映夜音響故障，不時發出噼啪怪聲，替負責配樂的黃衍仁和混音師鄧學麟感到如坐針毯，相信他們直頭火燒心。事後才知道，原來不只是多了怪聲，映院submover直頭gg，成個低音無左。 所以，睇左首映而又喜歡嘅，真係應該入場睇多次。
 7) 講返轉頭，其實電影嘅opening credit已經好好睇，講緊嘅係巴士上層POV前嗰段無聲黑底白字工作人員名單。點題字卡亦選得很好，忘了原文，大意是關於居於街道，作為一種展示生存條件的方式。立時想起班雅明提及詩人、拾荒者、妓女等城市漫遊者（Flâneur）的一句：「街道是漫遊者的居所。他靠在房屋外的牆壁上，就像一般的市民在家中的四壁裡一樣安然自得。」
 8 ) Last but not least，本來諗住正正經經寫一篇，但整理需時，就寧願寫得雜碎快手搞掂。因為趕時間，因為6月3日就上畫，因為首周票房好重要，首周票房好重要，首周票房好重要。

【《魂遊記》的四個密碼 】 _ 傳統就係老套？ _ 始於清末，源自廣東省珠三角的傳統說唱音樂「南音」，跟香港獨有、70年代中後期逐漸興盛的「粵語流行曲」，是屬於兩個不同年代的流行文化產物，風格南轅北轍，無論歌詞內容和聽眾年齡層都相差萬丈遠，但綽號「萬能泰斗」的粵劇名伶阮兆輝深信並非如此，決定擔當跨代橋樑，以「賽馬會藝壇新世力」的名義，發起名為「南音‧承傳」的計劃，與「E世代全才唱作人」張敬軒合作演唱《魂遊記》一曲，嘗試探索兩者拼湊交匯會帶出怎樣的火花。 _ 《魂遊記》由伍卓賢作曲、編曲及監製，惟不僅音樂部份，亦包含影像故事，長達約九分鐘的短片，由曾獲金像獎最佳美術指導提名的張蚊與廣告界資深導演陳品聯手掌鏡，劇本邀得劇場界「鬼才編劇」、曾獲「香港舞台劇獎」最佳劇本（《香港式離婚》）的本地著名劇作家黃詠詩負責，以自身經歷編寫歌詞，以及創作一個橫跨20年的故事 ── 講述2010年，蔡思韵飾演的「中女」午夜夢迴，見到1990年的自己，又名「少女」 ── 見鬼嗎？「係靈魂相認！」導演之一的張蚊說。 _ 劇情與「雙聲」互相穿插，配合紫紅色調的大坑虎豹別墅與半山羅便臣道住宅實景畫面，影像交疊，迷幻而古雅，聽見「韶光倏忽恨難留」這句，倍覺唏噓淒涼，有歷練的人看在眼裏自有共鳴，忍不住反覆重播，細味當中隱藏的密碼，就由輝哥獻唱的六句南音說起。 _ 夕陽西下水東流， 物換星移幾度秋， 形貌何處魂自返， 韶光倏忽恨難留， 奉請魂兒登練度， 乘空攝景上瀛州。 _ 都說《魂遊記》是黃詠詩基於自身經歷而創作的故事，她生於大家族，爺爺篤信三清，乃聞名港澳的黃道長，在打齋業界赫赫有名，所以影像開首，阮兆輝於一眾茶客面前的獻唱的六句南音，實情是喃嘸佬經常在靈堂上大派用場的歌詞，「頭六句係我家族堅係用嚟招魂唱嘅，其餘嗰啲（部份）我老作！」 _ 阿詩笑言，當初之所以有這六句出現，全因腦海中的微弱記憶。「我係聽過我十叔唱過，（創作劇本）之前我問番佢，佢喺電話唱畀我聽，我就抄低。其實我（最初）都唔知叫咩名，只知道係屋企（使用的）招魂曲。」言下之意，這六句是名不經傳的文本？「佢話冇名，話喺《青玄煉度科儀》差不多結尾（出現）。」 _ 依照上述字眼，在Google世界裏查找一番，最終在「香港中文大學道教文化研究中心」的網站發現相符內容，原來這六句確實出自一本名為《青玄集要煉度施食科儀（下）》的科儀文獻，科儀是道教術語，有道教道場法事的意思，「科」即動作。本書共有兩卷，於清朝光緒十一年，亦即1885年問世，距今136年，當中有部份字眼跟今天的版本不同，譬如「乘空攝景上瀛州」，在文獻中是寫「乘空躡景上瀛州」（瀛州是中國神話三大神山之一，意指天國），原版另有兩句「青山綠水連天遠，野草閒花滿地愁」，在《魂遊記》中則沒有出現。至於六句南音的意思，用最簡單方法解釋：事物消逝乃自然定律，不要留戀人間。 _ 另一個或會引起觀眾思考的，是阮兆輝與張敬軒之間的關係，因為兩代的蔡思韵於同一個空間裏相遇，是否代言阮與張的「共存」，也是基於同一種設定？黃詠詩坦言這樣是有點想太多了，「好得意，冇專登諗住咁樣做，但出咗嚟又似，成件事好自然發生。」那麼為何又會見到黃詠詩本尊亮相幕前，她坦言本身只是打算做「戥腳」充撐場面，後來才知道自己入鏡，所以要感謝兩位導演的用心，「導演好好嘅，佢哋好鍾意個故仔，想我呢位真正嘅主人翁都出一出鏡，當係Signature咁，其實係In-Joke嚟嘅，成個Team都合作得好開心，全部人都好錫大家。」 _ 最後一點要留意的，是輝哥在短片裏拿着的兩塊板，中間有紅線牽引，稱為「响板」、「響板」，或者單純稱為「板」，是一種敲擊樂器，借板與板之間撞擊產生聲響，帶出節奏，歷史久遠，最早可以追溯至唐代，使用的木材亦甚有要求，輝哥說：「以前係用檀香木造嘅話就叫『檀板』，但呢啲都係俗稱，唔係學名。」 _ 生於廣州的張敬軒，一直對南音十分鍾愛，並希望能夠滲雜於流行曲之中，去年舉行《張敬軒 × 香港中樂團盛樂演唱會》，其中一節演出，便將地水南音的一代宗師杜煥的《憶往》跟舊作《披星戴月》糅合其中。相隔半年後，這次創作《魂遊記》的過程中能再度加入南音元素，張敬軒感到非常興奮，亦明白這是自己的責任所在：「可以同輝哥阮兆輝先生合作，機會相當難得，所以好開心，作為流行音樂歌手自己都應該成為一個橋樑，令年輕朋友認識傳統藝術，可能00後都少聽我哋呢代啲歌，利用自己仲喺呢個行業希望做多啲嘢。」 _ 原文刊於《香港01》 —— 標題：「魂遊記︱張敬軒阮兆輝攜手傳承南音 導演安排編劇黃詠詩客串有因」 _ （24042021） _ #游大東 #游大東影視筆記 #魂遊記 #張敬軒 #阮兆輝 #黃詠詩 #蔡思韵 #張蚊 #陳品 @fitto_records #虎豹別墅 #yautaitung #24042021 @eeg_music @wah_wah_lee @williamontheway @hcfc_official @hinscheung_officialfanclub #南音 #廣東歌 @9588hk @cantopop_fans