【龔成問答信箱】（Q22061-Q22080）

Q22061：

龔sir, 本人52歲，早年對股票市場沒有深入認識，便跟朋友一起買入股票，97年全部變晒蟹貨，朋友話同佢鬥長命，所以全部都沒有放出，

但有些已100合1，變為單位數股票，想放出也蝕手續費。

最近這兩個月開始睇你Facebook, 覺得應該要整合一下手上的股票，不應採取放任不管態度，要選擇一些適合自己年齡的投資組合。想問以下股票是否應全部放出？

0604(深圳控股）
0622(威華達控股）
0697(首程控股）
0759(CEC國際控股）
0887(英皇鐘錶）

0910(中國三迪）
1168(百仕達）
1339(中國人民保險）
1387(中國地利）

1466(錢唐控股）
8173(萬亞企業）
8178(中國訊息）
8311(圓美光電）

手上還有以下賺的股票，是否應繼續持有？

0354(中軟國際）
0700(騰訊）
1810(小米集團）IPO
2158(醫渡科技）IPO
6618(京東健康）IPO

睇左你facebook後，上月買入以下股票。

2382(舜宇光學）月供$2000
2800(盈富基金）月供$2000
6823(香港電訊）2000股

月入3萬，扣除開支後可儲蓄$5000，.流動資金$1,200,000. 應怎樣運用現有資金，來選擇適合的投資組合。

龔成老師︰

我地投資一隻股票，就如投資一間企業。如果你係無質素架股票，不論而一刻係賺定蝕，你都應該要沽出。

唔好諗住同佢鬥長命，因為無質素架股票，可以越跌越深，去到一個低賤的你估唔到的水平。所以要果斷，無質素就要沽出，將資金收回，用於有價值的股票身上，才是正確做法。

另外，你唔好再單係聽朋友講，或者聽消息就去買貨。

我地買入一隻股票，一定要知道佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

以你52歲計，現時月供的股票都無問題。至於，你現有持股方面。中國人民保險(1339)有質素，你可以長線持有。

深圳控股(0604)、首程控股(0697)都可持有，但質素較一般，不宜持有太多。

中國軟件國際(0354)、騰訊(0700)、小米(1810)、醫渡科技(2158)、京東健康(6618)係有質素的潛力股，由於佢地風險較高，以你年紀不宜持有太多，最多只可佔組合2成。

其餘股票，質素較弱，甚至係無投資價值，建議最好沽出，換至其他優質股較好。

未來時來，你可以用以下股票作目標，當中以平穏增長股為主力。但隨著年齡增加，慢慢增加收息股的比例。到退休時，你收息股比例，應提升至100%。

現時大市只係合理水平，現金佔比重大約3-5成。你可以睇翻自已現金和股票比重，決定是否再投入更多資金入市。若然係再入市，緊記係分注慢慢入，唔好一次入晒，以減低買貴貨機會。

------------------------------------------------

Q22062：

老師， 8367 倩碧是麻孫樂控股公司，上月見價位低殘，買一百萬股都是十一萬左右。 之後減磅兩次，仍有六十餘萬，繼續揸擔心一天瀉九成。 可以點處理？

龔成老師︰

倩碧控股(8367)集團於香港以「麻酸樂╱嫲孫樂」、「峇峇娘惹」及「泰巷」三個自營品牌經營。另外，有提供特許經營商經營，供中式麵食、泰國菜式，日本菜式及馬來西亞菜式。

此規模唔算大，營業額唔算多，而且有按年下跌的情況。過去企業多年虧損，2021年表面上係轉虧為盈。但實際上，只係公平值變動(一些會計數字，而非實際收入)會造成。

實際上，佢過去4年都係維持虧損狀況(包括2021年)。睇唔倒有乜明顯因素，支持佢近期大升。

遇到這些情況，我地就要好小心。而且企業本身無明顯投資價值，建議盡快沽出較好。

------------------------------------------------

Q22063：

龔成老師，你好呀！之前問過你有關投資股票嘅問題，因為等佢價格高啲先放，所以現在冇變動過。仍然係以下咁：

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

現在問題是我嘅租約差唔多滿，有現金和以上股票200萬左右。請問我應唔應該賣晒啲股票，用我190萬左右嘅錢去做down-payment 買樓，做6成按揭呢？

因為供樓同我現在租金一樣。我想買嘅係一個272呎嘅元朗開放式單位自己住，供樓連管理費會是$12000內。請問我嘅投資方向啱嗎？

因為份工剛剛做，要到出年才有稅單可以做8到9成按揭，又怕出年更貴，應該怎麼樣更好呢？ 麻煩老師解答，萬分感謝！

龔成老師︰

現時貸款息率唔高，其實盡借長線只會貶值的現金。之後，再將空出來的資金做投資增值，咁會較好。

至於明年樓價會點，無人知。但從長線投資角度考慮，你用低成數按揭，長線可以投資資金會縮細，在現時市況，對你係不利。

現時持有股票，都係有質素，長線持有就可以。

明源雲(0909)和美團(3690)不確定性較高，不宜持有太多。

另外，你非常集中係華潤啤酒（0291），佔組合近一半。記住，個別企業和行業，不要佔組合15%和30%以上，否則會有過度集中性風險。

因此，你要沽出停份，去平衡風險。

------------------------------------------------

Q22064：

龔SIR你好~~我係上年PM問你供股既建議，供左大概九個月，一開始你叫我拎5K月供真係好心痛，後來我減少開支再諗辦法做副業，真係比我做到月供5K!!!

見到有正數增長真係好開心(大概8%)!! 呢一年努力抗疫唔出街，總共儲左10零萬(拎左8萬左右投資)，自己做副業賺左萬零蚊,

雖然好少錢，拎去入左一手IBOND打算賺少少，錢搵錢呢個感覺真係好好。

加上好好運咁逆市升職，加左家用比父母，佢地又開心左～我覺得自己好適合做月供，個心好定，唔洗成日望住個市影響心情！可以用多D時間專注正副職/讀書。

本來手上有5萬左右現金，不過拎左去大學交學費， 再學埋電單車， 比我用晒了…而家無錢入市啦, 只可以月供， 不過D錢投資自己身上我覺得值得既!

未來打算加大個月供計劃！每個月總共可以儲1萬至1萬3～

而家調整緊個計劃，想問下你既意見～

1. 我應該繼續用5K月供,定加到6K?

2. 月供2800 價位約$27, 我可唔可以停左等到價位回落先再供?用筆錢供其他股票?

3. 如果已經有1810, 1211, 9988, 2158, 6618呢幾隻股票係手, 我應唔應該供3067?

9988而家月供緊, 其他暫時無供. 1810, 1211等價位低先再供. (暫時主力供823, 9988, 1177, 2638, 2800)

4. 最近考左電單車牌, 打算買車送外賣/送貨之類.（期望每月賺多$3-5K, 因為我係女仔, 第一比人話危險, 二黎比人笑我無出息, 但我唔理旁人既眼光, 我要賺錢呀!!!!)

a. 假設我手上有四萬現金:
i. 直接全數買車
ii. 兩萬蚊去分注月供股票, 留兩萬係手, 用信月卡分期12個月供車, 利息大約0.15-0.18% . 如果供股票想揀2638, 打算派息可以cover信用卡大部份既利息.

5. 思想上唔夠進取, 唔敢100%拎晒去買潛力股, 所以揀月供2638, 咁樣係咪好蝕底呀?

多謝老師花時間睇我既問題!!

龔成老師︰

現時你理財方向，都正確，要保持住。同時，你努力學習，去提升自己投資知識。

1) 如果每月係可以穏定儲到$12000，你就應將月供加大至$6000

2) 唔建議，首先，我地只會係去到好貴架水平，才會考慮減供款或停供。但現價計，盈富(2800)只在合理水平，不需要調整供款。

另外，你投資經驗不多，我唔建議你咁快自行決定調整供款策略。因為如果你調整時機不對，會大大影響長線平均價格效果，令長線回報受影響。

除非你對定平貴，係好有信心。否則一直不理價格，去長線月供，反而對你係最有利。

3) 港燈(2638)係收息股，增長力不高。你現時29歲，應以增值為主，故此股不適合你作為月供目標。

至於安碩恒生科技(3067)，你去月供係可以。只要你科技股(9988, 1810, 3067)，唔好佔超過組合3成。同時間，潛力股(1810, 1211, 9988, 2158, 6618, 3067, 1177)唔好高於組合4-5成，咁就可以。

小米(1810)現價略貴，但月供還是可以。而比亞迪(1211)現價係貴，月供最好等回到$17X才考慮。

4) 其實工作，都無性別之分。你唔洗太理別人眼光，做正確的事，永遠都是對的。

以利息率計，用分期買車，再去投資收息股，係會較理想。但你要明白，股票始終會有價格波動，有機會賺息蝕價，你要明這個風險。

另外，你都要了解清楚，這個是否真正總年息，會否有其他潛在費用，才去做決定。

5) 我地投資，除左年紀係考慮因素外，投資經驗和風險承受能力，都係一個考慮。所以，無話絕對的對與錯，重點係是否適合你。

以你年紀，港燈(2638)的確會係較保守。但要去到100%潛力股，你個組合風險，又會出現過高情況。

你可以用一半平穏增長股，一半潛力股作組合，這樣組合平衡性會較好。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22065：

龔Sir，感謝你在股票班最後一堂的個人分享，聽到我眼濕濕。實在太有共鳴，亦自愧不如。

我嘅成長環境同老師你有啲似，都係成長於公屋家庭，居住環境擠逼，由於長期缺乏私人空間，非常渴望擁有自己居住的房屋單位，

但礙於香港樓價高企，個人經濟能力有限，一直處於半放棄（人生）狀態。

自愧不如的是比老師你行慢好多好多步。老師在十多歲嘅時候已經定下目標，立定決心，付出超乎常人嘅努力，28歲嘅時候賺到第一個100萬，反觀現時27歲嘅自己才剛剛起步。

不智嘅我都曾經怪責父母嘅不努力，甚至抱怨不想被生下來，傷害了彼此。

現在明白父母給予自己最寶貴的禮物是生命，財務知識可以自己學，錢應該自己搵，人生掌握在自己手中，將來由自己親手構建。

當人立志成為優質股、潛力股、倍升股，定必增長迅速，回報驚人。深願能夠運用所學，日後向老師你匯報成果。

龔成老師︰

你現在才27歲，現在努力去做好財富增值，未算遲。這是你最大的本錢，只是你這刻努力，一定能完成到目標！

其實，好多外在的客觀環境，唔到我地去改變。但我地可以改變自己，調整自己的心態。

你唔好覺得不如我，我都只係一個普通人，我做到的事，你都可以做得到，只要你相信自己。

上完課程後，你就當係一個新起點。努力去為自己人生定好計劃，比心機學好理財，相信很多你過往覺得的「不可能」，都會慢慢變成為看得見的「無限可能」。

同學，加油!

------------------------------------------------

Q22066：

老師，上年開始FOLLOW你的PAGE，亦很同意要買優質企業的看法。我亦已閱讀了你的4-5本書籍，亦閱讀了格雷厄姆、彼得林區、巴菲特的一些書籍。

透過購買優質股，我曾經浮收益超過6位數，我非常感謝！

然而，今年分析了968 後，認為該股是優質，故分注入了3手，分別是15、13及12，然而卻不斷下跌，收益不斷減少，令我反思是否應該斬倉...亦令我覺得不應該持續望住股票...希望將來可以好似老師甘可以令利財產增值。謝謝老師

老師，均價13.8入了3手968 信義光能，請問是否應止蝕？

老師，一直都想入完美醫療，但見佢業績持續向好，股價亦不斷上升。想問下老師，此隻股是否仍然5蚊左右才是合理區頂？

龔成老師：

其實，你保持用「價值投資法」就得，但要留意，這是長期性的，你中短期會有好多考驗。

信義光能（0968）是有質素的股，但你犯了幾個錯。

第一，你在貴的價位買入。

第二，你每次買入價相差太近，起碼要有10%以上，如果股價較波動的類別，要差15%。

第三，你應該等回去合理區先分注加注。

第四，你唔應該因為「股價下跌，就認為企業質素轉差」。

這股可以守的，但就要耐心點，如果你持貨不過多，無問題。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，你可考慮回少少，先小注，然後等跌多d先正式分注投資。

------------------------------------------------

Q22067：

Coinbase我係咪應該放手？

龔成老師︰

Coinbase Global Inc（COIN）雖然有獨特性，但真正的長期價值有多少，根本好難估。

佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。

要分析佢的價值，就要睇翻虛擬貨幣長遠發展。以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。

長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。

因為分析長遠是否好多人用，是非常困難，因此，當中存有相當的風險，當然，潛力同樣都大。

若你只係好少注，同時又睇好虛擬貨幣長遠發展，你可以守。若佢佔你組合較多，最好沽出部份，去平衡風險。

------------------------------------------------

Q22068：

您好，龔sir.，我想問您對Pre IPO有了解嗎？

我朋友佢話私募基金的回報高過股票，她提及到她將20萬本金放在系一個私募基金的項目裡，三到四個月連埋本金已賺40萬，她問我有冇興趣？

因為我的投資都是放系股票，對於Pre IPO相關資訊真是不太了解，而且回報率禁高，會不會有很大風險呢？

因為我聽她講就好似好低風險，但我始終都不太相信。按常理，高回報就高風險，但她提及的IPO好似有點有悖常理，所以想請教一下您，謝謝！

龔成老師︰

Pre IPO就係指企業在上市前(即IPO前)，進行的集資。

由於正式上市申請，係需要一段時間，有些企業就會用這個方法，去提前得到一些資金，用作上市前支援營運之用。

而Pre IPO基金多數會在上市時，就沽出這些股票獲利。由於上市前，一般估值較低，故潛在升幅會較大。一般這類股票基金，投資時間都唔長，可能講緊只係1,2年時間。

但你有留意我FB，我經常都會話，唔太建議投資IPO。因為可以參考數據好少，好難進行一個合理估值。而且好多時，企業真正表現，要1,2年先會睇得到，故投資風險會較大。

Pre IPO是未正式發表上市的企業，其可參考資訊，就更加少。甚至連佢最終能否上市，都會係一個問號。

我唔係話這類基金，全無投資價值。但你要明白當中潛在風險唔細，是否值得投資，你要自己衡量。

當然，我不是話這類項目不值得投資，只是「有風險，有回報」的類別，你要明白這點。

就算你最終決定投資，你都要控制注碼。永遠我地都要係「先知風險，後想回報」。

------------------------------------------------

Q22069：

老師你好！我跟咗你嘅投資方法三年，而家手上有超過一半係潛力股。我有限住自己每個月至少要供幾多錢，但有時手上嘅股票價格又偏貴唔想再入住，久而久之就越買越多隻股票，而家已經有14隻。

除咗股票數量太多之外，有時咁啱果個月得某一隻股票係合理價我就會買晒佢，好似而家9988已經佔我嘅投資18%。

我知道老師講過單一股票唔好超過15%，但而家佢係喺我手上已有嘅股票中價格最合理嘅。我唔想再增加股票嘅數量，但又無理由買其他貴貨。

龔成老師：

如果你出現愈買愈多的情況，反映你買入前，無經過仔細思考、研究，小心作決定，我在股票班，會派一份6頁紙的「企業評估表」

要求學員，每次買股票之前，都要填好先買，目的是希望令佢地，確保買入的都是有質素的股，以及睇得好準先會買。

阿里（9988）這刻，你只有不要再增持，到之後你有資金，慢慢配置到其他股票，阿里的%自然會減少。這動作不用急，長遠進行就得。

------------------------------------------------

Q22070：

老師你好，我兩三個月前開始見到你FB, 見到你教投資，有看你回答大家嘅問題，睇咗你嘅80後百萬富翁，而家睇緊股票勝經，

我47歲，有幫爸爸和女兒投資，持有以下股票。另外1063唔識點處理，結果而家價值得返$300幾，而家見到6808又跌到$5個幾，應該繼續長遠持有還是換出？

請你指導吓，謝謝老師！

本人持人
1. 9988 阿里爸爸 200股 $245.80
2. 9618 京東 500股 $397.40
3. 3690 美團 400股 $389.80
4. 0909 明源雲 2000股 $54 + 1000股 $45.80
5. 2013 微盟 4000股 $26.05

6. 2318 中國平安 2000股 $97.15 + 500股 $89.10
7. 1211 比亞廸股份 500股 $150.80 + 500股 $147.30
8. 6808 高鑫零售 3000股 $10.20
9. 3738 阜博集團 1000股 $32
10. 1398 工商 19000股 $5.73
11. 1063 新確科技 60000股 $1.38

爸爸80歲
1. 2888 渣打 300股 $105 + 300股 $77.80
2. 0003 中華煤氣 2000股 $14.88 + 100股 送嘅
3. 2318 中國平安 1000股 $95.70 + 500股 $91.30

用女兒利是錢幫佢投資
1. 2800 盈富 500股 $25.88
2. 3067 安碩恒生科技 200股 $17.83

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

由於你地3個人的人生階段不同，所以投資方法和目標，都會有分別。

先講你女兒，佢年輕，可以增長為主。你現時這個組合，已經係可以。

若你想增長力較高，可以多儲安碩恒生科技(3067)。但此股波動性會較大，要睇翻你自已風險承受能力。

至於你父親，由於已經係退休人士，重點唔會再係增值部份，應以收息股為主。透過股息的現金流，去支援佢退休生活上支出。

渣打集團（2888）質素只是一般，建議換碼。而煤氣(0003)和平安(2318)都有質素，可持有。

未來若你加大你父親投資，應集中收息股。以下都係有質素的收息股，你可以從中參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

至於你本人組合，以你47歲計，增長係需要，但要慢慢轉得保守點。

高鑫零售(6808)質素較中等，不宜持有太多。

新確科技(1063)主要於香港從事電話及相關產品之設計及銷售等業務。

這股規模細，加上多年出現虧損，暫時睇唔倒有投資價值，建議你沽出。

中國平安(2318)、工行(1398)有質素，可持有。

較大問題，係潛力股類股票(9988, 9618, 3690, 0909, 2013, 1211, 3738)你持有太多。以你年紀，最多只可以佔4成，而且要慢慢開始下調至2成。

現有持股，可以唔洗沽。但將來，你投資上應較集中平穏增長股部份，令組合風險水平，慢慢回復平衡。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q22071：

老師最近睇緊千萬富翁， 內容話到如果依家工作發展前景有限 就要轉工轉職位 尋求突破。

關於哩點 我想問下 如果我覺得我依家工作唔會有好大突破

但係我本身工作經驗唔多同時又岩岩得到哩份工冇耐， 咁嘅情況下要繼續留待 或者 搵機會轉工會好d？

龔成老師：

你要以5年、10年，作為思考的單位，現時的工作，對你長遠有無用？

如果無用，就要轉，轉是大方向，但是否這刻轉，或一年後轉，就要睇你自己的情況。

如果你本身工作經驗唔多，就可以先在現時工作，做1年先，等你有工作經驗先轉。又或者，你繼續翻現時工作，同時，尋找自己想發展的工作，如果找到，就辭工。

總之，你要思考你的大方向。然後就要想想，現時選擇那些工，最有機會完成到你的大方向。

------------------------------------------------

Q22072：

你好，我見恆安國際1044 數據都不差，現價入是否值得長線渣？

Pe 純利 股東資金回報都好
唯早前亦回購了數次

龔成老師：

對，恆安國際（1044）的財務數據不差的，不過，企業的發展與增長力就不強，佢主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現時大約在合理區中間。

------------------------------------------------

Q22073：

龔成老師，請問5M可以買什麼樓來放租？可以考慮那些區域？6年後退休，現在應否做按揭？謝謝！

龔成老師︰

其實無話特定乜野樓會較好，藍籌屋苑會加分，尺寸最好近300呎，符合一個家庭基本需要。

你要睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

現時息口低，承做按揭，再用多出資金去投資，相信會較好。

但由於你已近退休之年，按揭未必批倒好長年期，故壓力測試上，可能要求會因此而高左。在選擇物業時，你要考慮埋這因素，具體你要問清楚地產經網、銀行，了解清楚先。

------------------------------------------------

Q22074：

老師你好，我黎緊有計劃生完2胎就辭職，因為無人湊BB。你會建議我現階段應該點樣投資？

(先生份糧 + 被動收入可以支撐大部分家庭開支) 我之前買既增長股依家都係負數居多，現階段我應該考慮買返d內銀/ 公用股 收息嗎？

或係我應該買3067/2845 呢類etf嗎？ (手上大約有10萬可投資)

龔成老師︰

我地投資，係應先處理好防守部份(日常生活)，才去進攻(財富增值)。

由於你會做全職媽咪，家庭收入會少了一部份，故首要任務，是要先做到收支平穏。因此，現時支援緊你日常基本開支的收息股，我建議你就唔好變動。

若收支平衡上，依然有一定缺口，你可以將部份平穏增長股，轉移至收息股，去增加家庭現金流。

若已經大致收支平衡到的話，你那些平穏增長股，照持有就可以，讓其繼續為你財富增值。除非佢質素係有問題，否則唔好太在意中短期波動，一直長線持有就可以。

至於3067/2845這類較有增長力的潛力股，到你家庭收支平衡之餘，每月都可以空出一定資金，才作考慮。

至於你手上10萬，我建議你留在身邊，作為應急錢，會較為理想。

------------------------------------------------

Q22075：

你好老師，萬分感謝你的回覆和提供詳細的資訊及分析！

不好意思，這麼遲回覆你，因技術性問題今日先開通富途牛牛戶口。

交代小小我的個人資料，我現43歲，自住物業沒有按揭(已供完)，有物業放租(但租金全數比按揭，按揭還有8年)，現60萬現金，

另20萬要6年後先可取出(兒子出世時買的小狀元儲蓄保險)，現每月可儲HKD13000，現計劃分階段投入20萬作投資股票。

如我選擇五隻平穩增長股作為我開始、首次投資股票，我會以"分注"形式，以下每隻股票先買一手，然後留意價位再每手每手入?

1）盈富(2800)
2）金沙(1928)
3）中銀(2388)
4）港鐵(0066)
5）粵海(0270)

這樣可行嗎？以上這5隻股長揸的話最少多少年較好？這5隻股現在入貨是合理區嗎？

另想問中國鐵塔00788你點睇？

謝謝老師！麻煩晒你！感謝

龔成老師︰

你現時已持有2個物業，成個組合係物業類比重好高。未來時間，應集中投入股市，令組合更平衡。

以你年紀，都有一定增值需要，你現時這個組合係可以。如果你想再進取少少，可以加入少少潛力股。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

至於你目標的5隻平穏增長股，都在合理區，現價可以先入一注。每再回10-15%，就再加注，直至資金用完。

另外，每月儲起的$13000，都可以做月供股票。每月先用一半儲蓄做月供，另一半就儲起，等大跌市機會。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。長遠仍算有發展力，可長線。不過，潛力度比過往略減。

這股都適合你年紀，現價可以分注入貨。

------------------------------------------------

Q22076：

你好，老師，有個方法想問你可唔可行，小弟有一層自住樓，已供完，銀行估值600萬，現想加按360萬，分10年還，連本金利息400萬

我計劃：

買1隻穩陣收息股100萬(做膽)，買10隻穩陣不同行業優質股做腳20萬x10隻，淨番60萬一半定下期一半慢慢還款，用曬之後將1隻腳賣走，用來還款，用曬再賣，用曬再賣咁

(當然首選揀隻賺的腳賣啦)10年後，淨反個膽100萬

這方法可行嗎？可以叫做無本生利嗎？

10年叫做無本賺100萬

謝謝老師解答

龔成老師︰

現時息率低，透過借貨去投資，從而賺取息差，係可以。

但有兩大風險，你一定要明白。

第一，借貸創造，表面上無本生利，但實質有風險的，你負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

所有借貸投資，都不是無本生利，而是背後承受了一定的風險，我不是叫你不能做，而是做進行前，一定要明白當中風險，不要視為穩賺項目。

第二個風險，就是你個配置，有問題。

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你膽拖這種模式，個膽一定會超過這個標準，令你出現過度集中性風險。

另外，定期本身回報不高，很大機會回報低於你本身借貨利息。變相，你已有一部份貸款，係無效率地運用，拖低了整個組合回報。

若你想用個定期，去平衡個組合風險。我建議你直接不借定期個部份資金，反而仲有利。

餘下資金，我建議你投資一些「平穩增值股」+「收息股」。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

若你想組合增長力高一些，可以較集中「平穩增值股」。相反你想平穏少少，可以集中係「收息股」。

但成個計劃，你要明白一點。你係投資緊股票，就算最穏陣架收息股，都會有波動，有機會出現賺息蝕價情況，故你計劃係唔會100%穏賺。

而且，現時大市只在合理區，唔算係好平，這個風險就會更高。

現時大市只是合理區，你借款得來資金，可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

投資增值，其實唔洗諗到好複雜。只要你用我上述計劃，並長線持有這些優質股，其實已經很大機會，得到一個唔錯回報。

------------------------------------------------

Q22077：

你好 老師，又想麻煩你提點下我。

手頭只有各一手而已

-小米
-3067
-6618

我有10萬

1/ 應該繼續集中月供現有嘅小米，3067 ？

2/6618應該keep定放？其實擺起度都無所謂作長線？

3/ 依家手頭嘅好偏埋一邊 或應入手其他類別 （福壽園/金沙/銀娛/中電/地鐵/領展/比亞迪電子/700）

4/ 新能源股 可以建議邊啲我去study多啲？

再次感謝

龔成老師︰

1) 你現時3X歲，雖然投資上可以進取少少，但都不建議全部買晒潛力股。

佢地雖然有增長潛力，同時風險都較高，不宜持有過多。

以你年紀，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。以下平穏增長股，現價都在合理水平，可以分注入貨。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

月供你可以小注潛力股，較大注係平穏增長股，就可以做到平衡效果。

2) 京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大。但由於你只係小注，照持有就可以，但暫時唔好加注了。

3) 係偏向左潛力股，故應加大平穏增長股，去平衡翻個組合。

4) 信義光學(0968)和福萊特玻璃（6865）你可以研究下，但現價都在略貴水平，回多1成左右，值博率會較高。

------------------------------------------------

Q22078：

老師你好，我係投資新手，20歲。我看好未來奢侈品會有更大的市場，所以想投資相關股票，但香港相關股份較少。

我留意到美國有一隻LV ADR股票，LV集團覆蓋性廣，有品牌價值，全球通關後預期業績也會有增長，股價也每年穩步上升中，想問可以以分注買入的方法每月購入嗎？

除奢侈品股，我也看好未來醫美板塊，科技板塊和新能源板塊的發展，想問大方向正確嗎？我應該如何開始部署這些板塊的資產呢？有什麼股份老師比較推介？

謝謝，希望老師能抽空解答

龔成老師︰

LVMH Moet Hennessy Louis Vuitton SE(LVMUY)是一家法國的奢侈品集團，業務涉及六個領域：葡萄酒及烈酒、時裝及皮具、香水及化妝品、鐘錶及珠寶、精品零售及其他業務。

企業有一定品牌，都有投資價值。但畢竟業務以消費類奢侈品為主，較受經濟大環境，盈利會較波動。

這股票都有投資價值，但現價唔平，最多只宜好小注。利用月供儲貨，會較好。

至於你所講的板塊(醫藥業會係重點，醫美都有市場，但無醫藥類咁高潛力)，都係有潛力，同時會係未來大方向之一。

以下都是一些我較睇好的相關行業潛力股，你可以參考下。

潛力股︰安碩恒生科技(3067)、信義光能(0968)、阿里（9988）、騰訊（0700）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814）。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你每月大約用一半儲蓄月供，另一半就儲起，等大跌市機會。

另外，潛力股雖然有增長潛力，同時風險都較高，不宜持有過多。

以你20歲年紀，潛力股可佔約5成，餘下應用以下平穏增長股。但由於你投資經驗較淺，潛力股比重，先用3成以下這個指標。到你學到一定投資知識，才慢慢調高。

餘下投資比重，你就配置在平穏增長股上，會令你組合更平衡。

------------------------------------------------

Q22079：

你好啊，龔成老師，我今年27歲，月入兩萬，每個月儲$5000，無月供股票。現時手頭上持有呢三隻股票：

1）中國移動0941 $47.9：1000
2）龍光集團3380 $11.7：2000
3）香港寬頻1310 $9.3：1000

因為我以前係短炒輸過錢，所以我現在就吾想再走回頭路。就想試下建個收息倉，慢慢打造被動收入。

但我見龔成老師通常都叫學員「先增值、後收息」咁我現在呢個想法是否太慢或者吾適合現在的我？求老師賜教

龔成老師︰

短炒係一個不正確投資方法，就算全球投資最賺錢的巴菲特，都唔會做短炒。

其實投資股票，就係等同投資一間企業，只要係有質素，你長線持有比時間佢自行增值，咁已經會有唔錯的回報。

我經常都會叫讀者和股票班同學，用「先增值，後現金流」作方法，去做投資增值。

意思係，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，就應以增值為主。中國移動(0941)和香港寬頻(1310)係收息股，增長力欠奉，不適合你。但由於持股不多，你可保留，但不要再加注。

龍光集團(3380)適合你，都有增長力，但負債佢比較多，風險會略高。現貨可持有，但暫時不要加注。

你現時這個組合，增長力太低。未來時間，我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股或潛力股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，你現在還很年青，應盡力去做去財富累積部份。我建議你每月最好可以空出一半薪金，去做月供，咁會較理想。

------------------------------------------------

Q22080：

龔成老師您好，本人之前高位買了中國財險（2328), 一路坐艇, 暫時賬面蝕了幾萬蚊。請問你覺得這股票前景如何，應繼續持還是換另一只股票。

本人心水完美醫療(1830)。求指導

龔成老師︰

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股都可長線，不過就重收息，唔好對股價有太大期望。

若佢只係佔你組合不多，你可以持有。但若較多，你可以沽少少，去平衡翻個風險。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。如果本身有貨，就長線持有，但這刻就不要心急加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18181-Q18200）

Q18181：

龔成老師, 想請教你幾樣野,希望你有時間覆

34歲喇已經,仲係一事無成
我係外國返黎一年左右, 依家月入4萬, 唔係月光旅,但因為去外國攪移民唔成,用晒大部分積蓄

我依家做緊份正職,本身返到黎香港諗住攪返我既興趣(潛水)為副業,可惜撞正肺炎, 進展好似零咁

老師,你覺得我有咩辦法,可以增加多d, 主動同被動收入? 34 歲, 人又老,樓又要
又事業!!!! 點算

龔成老師：

你34歲，仍是事業發展的黃金期，你要保持正面心態，好好利用自己過往的知識與經驗，發展事業。

中短期只是小問題，唔好太在意。

第一，你保持儲蓄，同時做基本的投資，例如部分資金投資優質股，長期儲貨。

第二，要好好想如何發展潛水業務，所有野都有危有機，你現時可以先作準備，又或預先建立一些網絡或客戶群先，我相信你可以更有效利用現時的時間。

------------------------------------------------

Q18182：

老師你好，本人近年都有投資習慣，看了你的著作後有不少啟發

本人持現金60萬，撥40多萬作股票投資。我月入5萬，每月可儲17000，有一份儲蓄保險，年供12000，股票習慣一手一手買。我的投資組合如下，部分短線，部分長線：
短線
[email protected] 50000股

長線
9988@243 300股
823@ 69 1800股
[email protected] 400股

302獲利後會平倉。請問老師我的組合是否合理？會否建議月供股票？或者是否需要一些傳統股票平衡風險？

龔成老師：

其實唔建議短炒，真的好難賺錢。

現時你長線持有的，都是有質素的股票，阿里（0241）有潛力的，不過股價貴，就算近期回落都唔平，這股唔建議大注。

建議你之後做月供股票，你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票，每月$10000。

你可以考慮盈富（2800）$4000。

另外再加5隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18183：

本人29 歲，月入大約2 萬, 股票戶口約有250 萬。

有伴侶，未結婚，同家人住，沒買保險，減除日常開支，每月約儲1 萬

請問如何投資較好？

龔成老師：

如果你現時股票比例較多，現金不多，就唔好心急投資，應該多留現金，始終現時股市未算特別平。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你的投資方向：「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

如果你現時股票比例較多，而現金比例不多，就留現金，大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18184：

龔Sir 你好，我已經follow你個facebook有幾年, 而且拜讀你數本著作, 獲益良多. 呢半年自己擺脫月光族消費模式, 同時萌生了”學投資”同”置業”既念頭. 呢個轉變或多或少係因為睇左你既故事.
多謝老師!

1) 本人34歲. 我既置業目標係想2022 年底前買一個HKD4.50M – HKD5M, 大概250-300呎單位作自住 / 入租用途.

現時資產有現金60K同股票180K. 每月可儲15K – 18K. 假設之後既儲蓄只係放係銀行, 2022年頭大概會有500K, 仍未夠比置業其他開支.如果我要達到置業目標, 而投資年期係2-3年, 亞Sir 有什麼建議呢?

2) 現時股票分佈如下. 有無咩地方要留意/ 改善呢?
HSBC (0005) – 1200股 (~22%) ; 建行 (939) – 6000股 (~19%)

領展 (0823) – 11000 股 (~34%) ; 長江和記實業 (0001) – 500股 (~14%)

中國鐵塔 (788) - 14000股 (~11%)

3) 你既著作”財務自由行”我行左幾間書店都搵唔到啦!! 唔知道邊到仲有得賣?

4) 股票新手想報讀你既課程,有推薦嗎?

希望收到你既回覆. 祝身體健康!
80s 讀者上

龔成老師：

1）由於投資年期唔長，因為存有不確定性，建議只動用部分資金作投資，要預留一定的現金。而投資都要以穩健為主。

盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

2）銀行股佔比太多，唔好增持，如果之後上翻D，應該減持。領展（0823）的比例同樣較多，唔好增持。

3）書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

4）【投資倍升股課程】最適合初學者的，因為整個課程的設計都是針對初中階投資者的，課堂頭3堂都是初階的內容，只要你課後好好溫習，能跟到之後的內容。

每一課後都會有指引比你，要你在一星期內找那些資料，溫那些內容，只要你跟著去完成，到你讀完整個課程後，你已能自己選股、投資、評估平貴，在投資上已掌握了一定的知識。

------------------------------------------------

Q18185：

龔老師，你好！知道老師有好多讀者來書，希望有幸得到老師撥冗回覆。

(打完發現有啲長，但真心求教於老師，希望唔好見怪。另外，因為好多朋友有follow老師你，希望如果老師會回覆我，能夠不公開回覆，謝謝老師！）

我今年已經37歲，已經投身社會19年，一直拍拖未結婚，財政獨立。

因為只得中五學歷，所以一直薪金都唔高，2014-2018呢幾年，平均月入大約16K-18K。為咗唔好被淘，所以2016-2019 part time進修

叫做完成咗個學位，上年年中開始，月薪終於有22.5K。但由於以前理財意識差，加上一直都有固定俾家用及要供3份保險，儲到嘅錢實在少，每年1-2次短線旅行加上進修，已經無晒。

今年因為疫情，2月開始就WFH，所以有機會淨返多啲錢，半年大幾儲咗4萬蚊。

如果之後無得WFH，都希望每月最少可以淨到4K或以上(都想淨多啲，但啲錢總係唔知用咗去邊就無晒，本身唔好名牌，唔算購物狂)。

可能愈來愈近40關口，今年突然好積極去計畫返自己嘅財務，但有感已經好遲，都唔知應該由邊度入手。

眼見身邊差唔多年紀嘅同事、朋友，月入都幾萬，有部分已經置業或者有一定嘅積蓄，雖然我唔自悲，但都會諗點解自己以前唔努力啲！宜家好想奮力追返！

可能因為屋企本身灌輸係踏實工作，唔認識就千祈唔好投資(典型老師講過嘅「普通人」思維)，所以雖然知道投資先可以做到財富增值，但一直無認真去接觸。

直至早兩個月左右先開始買股票，因為我唔識，所以傾向保守，諗住買啲公用股叫做好過齋擺銀行。我買咗4手港燈[email protected]，同時月供2K中電00002，宜家有91股，另外有一手昆侖[email protected]。

後來先發現，港燈應該過於保守，而且唔應該買兩樣同類嘅股票。

老師，講完我嘅背景，我有以下問題：

1）因為開始買股票，先開始喺fb search吓有冇啲page對我有幫助，所以先認識到老師，如果早啲認識就好！咁啱朋友又借咗你嘅《50優質潛力股》俾我睇，但老師你認為我應該先睇《財務自由行》先，定還是都無所謂？

2）如果我短期嘅目標係40歲時有一筆積蓄，以我年齡同上述嘅條件，喺合理情況低下，預期可以有幾多錢左右？而我應該點樣做去達到呢個目標？

3）如果長遠目標係為退休打算，我MPF宜家約有37萬，虧損緊1萬左右，以37歲嚟講，高風險嘅比重大約可佔幾多？

4）老師有冇其他建議俾我？嚴厲啲都唔緊要！

補充: 扣除持有嘅股票，流動現金只有約1萬

收唔收到老師嘅回覆，都先多謝

龔成老師：

1）無所謂，都是基礎類的書。

你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第8版）
《80後2百萬富翁》（第4版）
《80後3百萬富翁》（第2版）
《財務自由行》（第6版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（第1版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第1版）

2）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

所以，你現時年齡，唔需要太保守，當然都唔會好進。你投資「優質，平穩增長股」是最好的。

如果你每月能儲到$5000-$8000，目標希望你40歲，滾存到$30萬-$50萬。

3）強積金唔需要太理會中短期，你著重長線就得，以你現時的年齡，可以平穩+進取。

4）你最重要是增加收入，你現時的問題是收入與本金，你可以試下做小生意，又或想想一些更長遠的事業發展，唔好只停留在$2萬人工的狀態。

------------------------------------------------

Q18186：

你好呀 留意左你個page一段時間

我而家黎緊9月year4 22歲 最近呢兩年一直都想學投資 盡快財務自由 但唔知何從入手 例如究竟係長線定短線投資好

技術分析定基本面分析好等 想請問你有無入門既書可以幫我開個頭 學岩嘅投資方法 股票戶口又應該用邊間好？
希望你會見到同得閒比意見我

龔成老師：

好簡單，你可以找一找全球最賺錢的人，佢地的投資方法，你跟佢地的方法就得。

例如巴菲特，但只用基本分析，唔會短炒，反對技術分析。佢用這套方法成為全球投資股票賺最多錢的人，你跟佢，一定好過你跟一些電視的所謂「專家」。

你可首先睇：

《80後百萬富翁》
《股票勝經》
《財務自由行》

之後再睇其他。巴菲特相關的書都是值得一睇。

------------------------------------------------

Q18187：

早晨！龔sir,請問d儲蓄保險，到65歲時係咪真係好似保險公司講，可以拎到咁多錢？

我上網睇到真實過案討論，到最後拎吾足！講扣手續費以類！thx!

你要問清楚先得！

因為不同的產品有不同的條款，佢所講的回報，是否保證，還是會蝕？你要問。

手續費、每年管理費多少，你要問。

另外，好多這些產品都有年期限制，即是你購買後，唔好中途停供，否則會罰你好多錢，你要想清楚先好買。

------------------------------------------------

Q18188：

龔成老師好。我想向老師請教如何訂立一個適合自己的股票投資策略。

我的背景：

我今年26歲，過往兩年月入大約港幣4萬。今年開始月入會增加到港幣8萬。現有現金大約港幣60萬，股票港幣7萬，基金港幣2萬。

以往一直全部持有現金，無投資經驗。最近3個月開始接觸股票/基金等投資工具。曾經買入幾隻科技股，有一半股票升大約10%，我大約持有兩星期便賣出獲利。

有一半股票跌10-20%。由於係閒錢，所以仍然未賣出，會等股價上升先賣。

另外，由於工作壓力大和工時大約每日12小時，未必有時間長期看股市。 我希望每年有15-30%資本增長，可以儘快退休。

我的問題：

這3個月作為投資新手，感覺最難的地方係不知道如何訂立有效和可持續的投資策略。

很多時候都係憑新聞推斷行業前景，完全唔識分股票當時價位是否偏貴。希望老師可以按照我的背景，指點一下投資策略。

龔成老師：

第一，你要增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

你的本金將會不斷增大，只要差幾個%，長遠對你的財富影響都可以好大，所以，你一定要大量學習理財知識。《股票勝經》建議你睇一睇。

我地投資，就是建立一個「組合」，長線持有，要有質素，要平衡配置，要適合你。

另外，以你現時的情況，我將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

長遠，你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮做月供股票，每月$10000。

你可以考慮盈富（2800）$4000。

另外再加3隻（每隻$2000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18189：

老師，之前一直有入1373，大約1.46-1.7左右。後來越升越高，用先前上堂學既評估，合理價大約在1.5-2.1，所以1.8以上便沒有再入！

呢隻股社會運動和疫情下受惠，人人留屋企或自己屋苑附近，佢越賺越多，派息又不停增加，因此公佈業績後備受追捧！

請問老師，1373按現時情況，合理價在什麼範圍呢？回落至2蚊算平嗎？謝謝！

龔成老師：

我地分析時，最重要是睇翻佢的核心、長遠的企業發展情況。疫情對佢有利，但長遠的正面因素有利少？這就是我地要分析的。

雖然長遠不差，但不能因短期因素而過度樂觀。估值會調高，但不會大幅調高。

國際家居零售（1373）有質素的，但不是高增長股，你原有的貨可以長線持有，佢現價大約在合理區頂。

------------------------------------------------

Q18190：

你好，龔老師 ，我最近有留意你的文章，希望能早日累積資產達致財務自由。

本人34歲女性，單身與父母同住，並未有物業，做銀行，底薪四萬，早兩三年好景加上佣金合共20萬左右一個月，由於經濟轉差及疫情，現在只有合共約六萬元一個月

目前持有720萬現金，38萬基金投放中國及越南市場，等值23萬港幣的日元 6.9算左右買入， 6萬星加坡股票， 也有購買年供六萬退稅年金 供了一年還有四年 及 ipo持有至今13手人保 及一手港燈

以及等值港幣三萬左右的比特幣，購入價於高位美元兩萬左右， 虧蝕了大概港幣四萬， 由於年輕時不懂投資及過份進取

於八至九年前把所有股票賣掉合共虧損了四至五十萬，當時大部分主要持有細價股虧損，其中持有新濠 華潤水泥如果持有至今也可以賺更多

現時目標:

1: 用二百萬至三百萬作為首期 投資兩房物業長線收租別人幫我供樓，但又未知應考慮嚟緊大圍樓花還是二手物業比較好？

樓市實在看不懂，疫情影響，樓市也沒有怎麼跌， 但美國這幾個月又已經開始量化寬鬆，長線持有現金只會貶值，建議應最近購入還是明年才購入比較好？

2: 扣除三至四十萬左右應急錢，剩餘資金以穩健增長為主， 打算部分投放年收四至五厘的基金及部分投放股票，由於本人工作的關係

基金買賣沒有成本，而買賣股票需要申報， 3月中左右 本應可以178 阿里巴巴，但看價太貼而錯失機會，現價還可以買入嗎？除了阿里巴巴還有其他建議嗎？

3: 本人預計二至三年後就已累積到一千萬 ，由於工作壓力大，本人希望三年後退休，或是找一份 收入少一些但準時收工壓力小的文職

所以到時預計利用700萬年收3-5厘也已經足夠應付日常洗費有餘， 個人現在基本生活使費如不買名牌 1萬已足夠，請問那麼早退休，基據我目前的情況，此想法可行嗎？

4: 你對黃金及白銀價格有何看法？黃金現價值得買入嗎？1718 山東黃金及815中國白銀好嗎？

5: 另外，1766中國中車 好嗎？
謝謝你

龔成老師：

1）你應該善用現金，投資物業，以及配置都股票，都是你應該進行的。

香港樓市，中短期有可能下跌，但不會多，而長遠會升，你已經可以睇樓，留意樓市，在1、2年內可以買樓。二手樓會較好的。

2）不要因為怕申報而放棄配置。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

3）相信是可行的，你這刻應該集中「增值」，3年後轉變策略為收息。

4）至於黃金白銀，我自己都有投資。方法好簡單，你不是睇升跌，而是「財富組合的配置」，現金永遠貶值，黃金白銀總有一定的價值，因此可以在組合中，佔比一部分，長線持有。

但由於無現金流，因此又唔值得持有太多。1%-3%已夠。山東黃金（1787）都可以的。

5）一般般。

------------------------------------------------

Q18191：

龔成老師你好，我今年26歲，月入約3萬8，但以前一直冇好好既儲蓄習慣。現在只有現金13萬、股票持有2手中芯國際、10手FI二南方恆指、月供1000元既儲蓄保險（10年期，現在供了2年半）。近年開始儲錢，月儲約8000-10000元。

我目標係想係30歲左右置業，有可能嗎？我應該用我既現金做咩投資呢？非常感謝老師！

龔成老師：

30歲置業，絕對可以！我建議你睇《5年買樓4部曲》，正正是教你這類個案，如何一步步置業的。

你現時可以利用這幾年時間，投資一些平穩增長股，作方向。原有的貨就持有，現金$13萬就作備用，最多這刻只用$3萬投資。

你可以考慮月供股票，每月$8000，盈富（2800）$4000。

另外再加2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18192：

Hello 老師你好，我想試下投資，但無從入手，唔知可以點做，先介紹一下我自己背景，我今年23歲，每個月底薪8000幾元，因為我係剛剛做銷售，所以是計佣金，工作上暫時未有成績。

每個月3000家用
車費800元多 食飯大約1200

每個月會有1500洗費
保險2000 ，加上其本額外洗費，根本所剩無己。
又擔心投資風險大

龔成老師：

我地理財，要先做好防守，餘下就進攻。

你應該先累積現金，等你有3-6個月的基本開支現金數目後，就可以正式開始投資。

你之後可以月供股票，例如供盈富（2800）每月$2000，這是最基本及穩健的做法，到你日後收入增長，就加其他股票去月供。

------------------------------------------------

Q18193：

本人現時為家庭主婦，無收入，有數十萬現金，一層非自住物業，可出租約萬一元，按揭雜費要四千多元

如果賣，可套現約$370萬。由於該物業準備大維修，維修費用未定，現考慮放售轉買股票投資，還是繼續出租，求意見，謝謝！

龔成老師︰

賣樓，是最後一步，香港買賣物業的成本高，加上你賣出後無人知能否買回來，所以要想清楚這步。

由於你係無收入，加上你物業都係正現金流，我建議你先行出租。如果有需，可適量加按，處理近期的現金需要，只要你租金大過按揭就無問題。

------------------------------------------------

Q18194：

請問呀sir你對之後幾年美金轉弱有咩睇法？如果港幣會跟住一齊轉弱，係資產配置上係咪轉換黃金保值較好？

其實美金會大幅貶值既可能性應該唔高？因為匯率都係相對，可能有機會又有次按問題走出去化解？

宜家經濟大環境真係好亂，點先可以客觀d分析 去做好投資？

想再問多少少，實金去邊度買會穩陣啲？上環個啲鋪會唔會大啲機會有假貨？google見都有假金條流入市面。 最近，銀行都冇貨。金行買賣差價又貴，上環買唔知o ng ok.

請問金條係咪買賀利氏會穩陣啲？
好多問題，唔好意思，麻煩呀sir

Ps因為自己本身只買左30000$ 金etf, 只佔成個potflio 3.5% ，而且etf唔太穩陣。上堂呀sir建議買1-3%就夠，但宜家既時勢會維持建議嗎？

不過宜家買金同銀價錢真係好貴，肺炎疫情亦不看好今年內控制，經濟睇黎會步入衰退。等到好返先大手買入可能要等3年。。。所以資金寧願捕樓市同股票都唔好買咁多金？

宜家2000金價照買入3-5%實金會唔會太多？
唔該呀sir

龔成老師：

黃金白銀，我自己都有投資。方法好簡單，你不是睇升跌，而是「財富組合的配置」，現金永遠貶值，黃金白銀總有一定的價值，因此可以在組合中，佔比一部分，長線持有。

但由於無現金流，因此又唔值得持有太多。1%-3%已夠。

實金去銀行或金舖，銀就去上環，你上網打「上環實貨白銀」就有。

銀就賀利氏，金就無所謂的。

我建議你買入，長線持有，不要理會中短期價格。

至於ETF，都可以持有的，無問題。

你要分注入，不是一次過入，同時合共佔組合比例不要過多。

------------------------------------------------

Q18195：

你好龔sir,現36歲。

首先，我把最近賣出舊樓的200萬 其中50加到投資（剩餘150萬留作下層樓首期 待買中）

經過一年時間分股票 共100萬額
（65萬己買入分配，35現金 留待市大回落再入）
現在把資都分配在各行業，及用不同股去平均風險，如下：

HSI/基金 （目標15%）
盈富、港交所、3110 共6%

銀行/房託 （目標25%）
中銀、 工銀 7.5%
恆生、中銀香港 5.5%

地產/5G/保（目標25%）
恆基、置富、中移 12%
長和/長實、領展、國壽 10.5%

金/油 （目標15%）
中石化、中石油 5%
中海油、紫金 4%

新科技概念（目標20%）
小米4%
騰訊、阿 0%待回跌再入
中生製藥 2%

想請指教一下

1. 這種分配 適合我年紀嘛？

2. 股類好像有點多 20+種，但希望行業能分配不同股中 作 平均風險。覺得只要 每行業分配得宜，控制就好。 這方面 可以評一下嘛？

Thanks!

龔成老師：

你在資金分配上正確，股票，現金，及留現金等買樓的比例，都可以。

1）大致無問題，都是一個平衡的組合，不過銀行股太多。同時這刻組合的增長力不強。

而當日後再增加股票時，可以增加平穩增長股，加少少潛力股，而收息股就唔需要加。

2）去翻15隻會較好，只要你當中有指數基金，已經有分散風險的作用。所以隻數不用太多，太多在管理上會較難，難以全面分析。

------------------------------------------------

Q18196：

龔sir，有問題想指教
現月供

#2800 $3000
#3 $1000
有冇問題？

另外想月供多3隻，每隻$1000 for 3位小朋友將來，有咩好建議？

龔成老師：

可以，這都是有質素的股票，可長線月供。

你可以考慮追蹤恆生科技指數的南方恒生科技（3033）。

另外再加2隻（每隻$1000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18197：

老師，如果我每個月已經供梗盈富$4000，甘我仲加注係盈富到既話，長遠黎睇會唔會比例太多？

如果以下甘既組合呢，會唔會較好？

823-500股 $30000
1448-2000股 $16000
1177-如$7以下，6000股 $42000
2800-1500股 $37500
1928-1200股 $38000
1830-8000股 $20000

甘樣會唔會太分散？同埋老師我呢15萬係咪應該等恒指跌到24000左右先開始進行？現是應保留現金先？

謝謝老師

龔成老師：

盈富（2800）唔需要擔心比例太多，因為始終是一個組合，本身已有風險分散的能力，如果你想組合更多元化，或者想提高增長，可加入南方恒生科技（3033），不過注碼要比盈富少。

至於你選的5股，都是有質素的，你同時投資都得，可以建立一個平衡的組合，只是如果股價略貴的就等等。

唔散，一個股票組合，你預大約10隻股票左右會長遠適合。

至於你的資金，等跌先買入較好，不過部分如較合理的，都可以現價入，如金沙（1928）、領展（0823）。

------------------------------------------------

Q18198：

龔成老師 又麻煩你 我依家有10萬蚊現金，依加工作上工資不穩定只有10,000元，要養兩個人，計埋我三個人

我想資本增值一下，養兩位老人家，我依家應該買咩好?

龔成老師：

你可以善用資金，長期增值，但都要明白，增長要時間，財富要慢慢累積的。

當我地進行人生財富累積，會運用「先增值，後現金流」作方法，初期應投資較多增值類資產，而較年長的，則應投資較多保守類項目，因為初期財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你可以考慮盈富（2800），另外再加1、2隻：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18199：

龔sir, 我35 歲，月入$56000， 工作十分穩定, 可儲約$35000 一個月

我而家手上有-

8000 （平均買入價$11.84）媒氣

40 SPDR 金ETF, （買入價$1379 ）

另外月供咗4個月- $2000 小米，$2000 港鐵， $2000 友邦，$4000 盈富

有大約$950,000現金做首期等買樓

想請教下我嘅 組合會否太保守？ 如果我想月供多$2000 潛力股，請問有咩建議？

另外，最近巴菲特也增持黃金， 同埋好多資深投資者都鼓勵增持黃金，我應否也跟著做？ 謝謝

龔成老師：

以你的年齡，的確可以進取少少，你加多一隻潛力股去月供是合適的。

可考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），南方恒生科技（3033）。選一隻去月供就得。

至於黃金，我自己都有投資。方法好簡單，你不是睇升跌，而是「財富組合的配置」，現金永遠貶值，黃金白銀總有一定的價值，因此可以在組合中，佔比一部分，長線持有。

但由於無現金流，因此又唔值得持有太多。1%-3%已夠。

------------------------------------------------

Q18200：

龔sir 我同先生已買股票總值180萬，大多是龔sir所講平穩或優質或潛股，二按貸款$150萬 下月尾到手，請問資金應怎部署?

另外心急高位$228.6買入了2手康希諾（6185）仔細想想B股，又有不確定性，有點擔心，應怎處理這隻股票，謝謝

忘了一問: 先生睇完龔sir介紹窮爸爸富爸爸後，除2按外，想再以我兩人工合共向銀行再借$140來投資，target 置富，希慎等，可取嗎請問

龔成老師：

由於你新資金是來自加大借貸，因此在配置上，唔建議你太進取，應該集中在平穩增長類的股票。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。南方恒生科技（3033）小部分都得。

至於康希諾生物（6185）主要於中國從事研發疫苗產品，疫苗產品線如下：3種臨近商業化在研疫苗：

包括腦膜炎球菌結合疫苗（ＭＣＶ）組合（四價ＭＣＶ及兩價ＭＣＶＩ，均為集團核心產品）及Ａｄ５－ＥＢＯＶ（其由集團與軍事醫學科學院生物工程研究所共同研發，為中國第一種獲批淮作應急使用及國家儲備的埃博拉病毒疫苗）。

另外，有6種處於臨床試驗或臨床試驗申請階段的在研疫苗；包括針對白喉、破傷風及百日咳的ＤＴｃｐ疫苗組
合（嬰幼兒用在研ＤＴｃｐ、在研ＤＴｃｐ加強疫苗、青少年及成人用在研Ｔｄｃｐ）、肺炎球菌疫苗等。

業務有潛力，但估值好難，市場對佢有好大期望，股價炒得幾勁，反而風險高。

這類股，是有潛力。但因為佢無盈利基礎，市場都只是「估估下」。如果持有係可以，但一定只能小注。如你持有太多，就賣部分。

另外，唔好借得太多，有危有機，小心。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16141-Q16160）

Q16141：

老師，我是你股票班學生，想請教一些發行股數每股調整等問題。

1) 為何使用最新一年的已發行股數去計算過去的每股盈利，這樣得出該年的每股盈利還是該年的每股盈利嗎, 為什麼？定係我仲係理解錯?

2) 使用最新一年已發行股數計算過去每股盈利只係適用於每年穩定地調整股數的公司嗎還是所有公司只需用最新一年的已發行股數就可計算出正確數目？

3)在計算市盈率時，由於公司收入出現虧損，盈利是負數，令市盈率亦出現負數，咁有以下問題想老師幫忙解惑(練習對象：盈富基金)

a) 咁即係代表這個市盈率沒有意義，要用其他方法估值？

b) 定係基金係唔可以直接以咁既方式估值, 因為佢係以唔同比例持有50間公司的股份？

c) 優質股票是資產，咁盈富是否資產型股票，是不是用市賬率去分析會比較好？

4)老師曾提過恒指24000點以下的時候才是開始入市的時候，這是如何得出這個指標？

5)我見網上，有指只需找出恒指近年來最高點然後以這指數的70-80％作為判斷入市的其中一個參考，這方法可行嗎？

如蒙老師解惑，不勝感激。
近期不斷翻看老師的筆記及著作，每翻看一次都有更多對理財的明悟，實在感謝老師的用心。

龔成老師：

1）如果公司2010年發行1億股，賺$1億，每股盈利就是$1。2020年，發行2億股，賺$2億，每股盈利就是$1。

公司的盈利在這10年增加了，但如果睇每股盈利，就無增長過，因此，每股盈利要有適當的調整，例如2010年$0.5，2020年$1，就能反映到盈利增長了一倍。

2）原理同上述一樣，這往往考慮左一些股價的調整問題，其實要解釋，好難三言兩語講到，反而，我會建議你用整間公司的角度計算，估值及分析，因為送股對企業價值無影響，只是當計算每一股股價有調整。

3）會假設當年是「無數字」。

A）如果其他年份有正數，都可以照用該方法，但如果無正數，就要用其他。

B）如果是基金，要睇翻佢追蹤D乜，例如盈富（2800）就要睇恆指，而不是睇盈富數據。

C）你要睇翻該50隻成份股，是否大部分是資產型企業。

4）利用恆指過往市盈率做估值，第二堂有教過。

5）無根據。

------------------------------------------------

Q16142：

龔sir你好，我想問下配置
我29歲，穩定職業，月儲2萬多
主要資產為

1. 現金 70萬左右
2. 股票 34萬左右
恆地 35.5x2000
銀娛 48.3x1000
MTR 47.5x1000
吉利 16.8 x1000
建行 6.05 x 4000
中銀香港 27.3x4000
日清 6x3000
鴻福堂 0.89 x1000

由於家裡只是租屋，所以一直預留現金作首次置業之用，目標以不多於64萬的首期買入450萬以下的一房單位。

但現時股票市場回調吸引，心儀屋苑樓價反而未有回調，此刻黎講，股票搏值率明顯比物業高。

不知我應該堅持預留現金置業，還是投資於股票。心裡隱約覺得即使樓沒有股票那麼高的搏值率，但還是得買樓，因為始終要住，想再聽下你意見

龔成老師：

如果你打算2年內置業，你的現金就唔好動用。

這刻的投資值博率，港股的確比港樓為高，不過，買股票原理是買入企業，買入後耐心等企業成長，所以要較長時間先有收成，就算這刻買入，2年內都未必見到。

香港經濟將轉弱，1、2年樓價會向下（當然，不是大跌），長遠來說，會因供應不足，而向上。

所以，你可以把握這2年的時機，等機會入市。

至於你現時的股票，基本上都是有質素的，持有無問題。

------------------------------------------------

Q16143：

你好，龔成老師。本人是澳門人，自雇人士，與另友人開有一間公司，都快7年了，月入平均3-4萬，年頭太太有了第二胎，也要和本人媽媽一起居住。

所以年初賣了原來的細二房單位（母親名下），成交價488萬，母親會給我一260萬+我自己本身60萬存款，選了一個間三房單位640萬，澳門首置可借足8成，首期+印花稅雜費+裝修後，應該還剩100多萬資金，月供21xxx .

由於我太太最快也要2年後才可搵工分擔供款，我想法是借盡銀行首置8成，餘下的資金可去幫補每月的一半供款，我想請教老師

我應該怎樣去運用者畢資金去作一個穩定的投資，可以令資金不會放在戶口貶值

有什麼方向可以在保護本金（我也明白要增值也要承擔一定風險）的大前題下作出一個投資手段，謝謝，期待你的答覆

龔成老師：

借8成的確可以令你現金剩下較多，如果運用適當，的確可以增加回報，不過，這無可避免令你風險度增加，所以你要自己衡量。

如果澳門都有一些如香港的「按揭高息戶」，即是該戶口的息率，等同你按息，你可以將一半現金，投放在這裡，作為流動資金，等機會，這部分當見到十分大型的跌市，所有股都處好平宜的水平，就可以動用，這會有效令到你財富增值。

而部分的現金，你可以投資收息股，由於現時不少收息股都跌了很多，其實已可以作出投資，只要分注就得。
市下跌，可以買平貨之用。

你可以建立一個收息股的組合，目標是6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。就算有些近年的派息會減，如匯豐，你都不用擔心，因為最重要是長線投資。

買入時，要分注，慢慢入。

------------------------------------------------

Q16144：

龔sir本人是股票新手，白紙一張，看你的書有不明白的地方，問題比較白痴，請不要介意。

1. 股票聖經37頁，說送紅股對股東沒有實質權益增加，因為總股數增加，股東手上所佔權益就會攤薄，這裏我明白，但是股價會自然地向下調，這裡不明白？

因為股數增加，權益攤薄，等於打了平衡，為什麼股價會向下？0003收息股，如果我們長期持有，不就是賺了他的派息嗎？為什麼說送控股對股東沒有實質權益增加？

2. 股票聖經208頁，優質企業因為貨幣系統，經濟成長，自身成長，令企業價值不斷上升，帶動股價長期向上。所以量化寬鬆，長遠來說，是會帶動股價上升，可以這麼認為嗎？ QE對股票市場或整個經濟體系有什麼不良影響？

3. 股票聖經316， 你說2016年賭場連跌10個月期間，你分批買入金沙股票，想請教一下，如果我再遇到呢一種機會，假設有500,000資金，應該分別投資幾多隻股票？分幾多次入手？每次應該入幾手？

假設我整個股票組合是100萬，50萬潛力股，40萬平穩增值股，10萬收息股。

本人30歲 謝謝.之前你建議過每跌10%入一次，但係我都不能很好地分配及掌握到入市的資金分布，因為好少機會可讓我連續入市2次，假設金沙$28買入第一次，第二次買入$25.2, 第三次買入就要$22.68（比較難達到這個位置）

最後想問，澳門班幾時再有？

龔成老師：

1）如果一間公司價值$100億，發行$10億股，每股價值應該是$10。如果佢的發行股數變成$20億股，公司的價值不會因此而改變，所以都是值$100億。

但每一股的價值就會變成$5，這就是自然的調整。

煤氣（0003）每年都會派紅股及派現金股息，現金股息，的確有實際的得益，但紅股，只是一個虛數，股東唔會有實在得益。

2）QE會令現金的價值進一步減少，因此，資產項，例如物業、優質股，長遠的價格就會向上。

3）你首先要計算，單一股票只能佔你總股票組合的15%，而同一行業，只能佔30%，你以這個數為基礎，去計算出每隻股，能投入多少金額。

另外你買入時，要分注，最好每注相差10%以上，你的價格設定，可以。

4）預期今年澳門班，會在第四季舉行。

------------------------------------------------

Q16145：

老師，我留意左2588已經好一段時間，已經回調左好多，相信是因為短期航空業不利消息影響，驚航空公司倒閉會壞賬。

龔成老師：

中銀航空租賃（2588）可說是有風險有質素的股票，業務本質的確不錯，生意與盈利都保持理想增長，加上賺錢能力不低，同時企業有獨特性，因此企業正面。

但要留意，佢的業務原理，是利用借貸投資飛機然後放租，由於收到的租金比借貸的利息成本高，因此賺取了中間可觀的利潤。

但如果日後加息，或航空業好差，對佢盈利有影響，同時，佢現時的負債不少，這都是風險的來源。

整體來說，這股有投資價值，你可以考慮，只要注碼不能過大。中短期我唔分析，但長遠計，這企業不致於市場這刻睇得佢咁差。

------------------------------------------------

Q16146：

龔Sir好，我在買樓方面有些事情想向龔Sir請教。

本人37歲，為公務員，月入$73,000，太太在私人公司工作，月入32,000。

太太名下有一個沙田2房單位，在我們早年結婚時買的，估價約七百八十萬，尚餘按揭二百五十萬，現放租15,000。

我們手上可用現金為二百萬。
我們向一名4歲女兒，也有外傭。

我們現住宿舍，但由於是新制公務員，我們需要在今年9月遷出宿舍。現正考慮遷出宿舍後的安排。

我們心儀美孚新邨700呎三房單位，方便女兒上學。我們正考慮應該是買還是租美孚新邨。美孚新邨700呎單位約八百五十萬，租約二萬四千。

由於美孚新邨已有50年樓齡，買是否合適？

若果租美孚新邨，我打算用手上的現金買一個荃灣或大圍(如金獅花園)的細兩房單位，約四百萬作收租。由於我是公務員，我只打算做5成按揭，以免違規。另外，我們也怕租美孚新邨會經常被業主迫遷。

哪個安排較可取？敬希襲Sir指教。
謝謝！

龔成老師：

從長遠自住及物業質素的角度分析，美孚新邨會較適合你地。我會建議你，考慮在適當時機，買入美孚新邨。

現時沙田單位，就保持收租。

雖然美孚新邨已去到50年，但物業優質，銀行估值足，維修方面無大問題。

你現時現金$200萬，如果要以5成按買到美孚新邨，未必得，所以，你可以考慮加按沙田物業，就算加按後，每月的租金都能夠足夠還款，因此風險不大。而這一步可以加大你現金。

當然，你都要計算好，買入美孚新邨單位後，每月供款是否無問題，因為買樓，最重要是「供得起」原則。

------------------------------------------------

Q16147：

龔先生，你好。請問，我是退休人士，暫時沒有財政壓力，但如果想增值財庫，不想坐食山崩，10年后可以用。我應該跟你教其他人一樣，選擇月供股票？

定係現在就買股票？我心水也是盈富，領展，中銀香港，長建等。

例如我有200萬在做定期，早幾年息有3厘左右，應否停了去買股票？因為只有200，買樓又買不到。謝謝你。

龔成老師：

你現時的情況，應該做好「配置」，月供一般會適用於累積財富的人。

你最好建立一個平衡組合，收息股可以是其中一部分，但不是唯一的。你應該著重收息，同時加上適當的增長，這會較適合你。

你上述的股票，都可以投資。

如果你想更加穩健，可以將財富，分配成多個部分，著重現金流，低風險，你可以將這些現金，分成5部分。

第一部分投資收息股，你可以建立一個收息股組合，你可考慮港燈（2638）、香港電訊（6823）置富（0778）、陽光（0435）、深高速（0548）等，都可以。而你上述的股票，同樣可投資。

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將資金，平衡地分配在上述的項目上，對你來說是最好平衡風險，同時有穩定的現金流。

------------------------------------------------

Q16148：

halo 阿SIR, 我現持有100萬現金,因疫情生意大受影嚮, 所以還是每月咬緊牙關過活中

原本已作每月供股5千,分別2800,3同12, 見到現今股價好多平貨,不過未知幾時係底,

有思考過先拎50萬買貨, 餘下50萬用黎供股,亦或者等巿跌幅度再大D時先購入,亦一方向就係提高金額每月加注,例如5萬一個月咁去供股

但因為怕現貨平宜, 而供股每月先供一次,而會錯失良機,阿SIR你會有任何建議嘛?

龔成老師：

首先，你要睇翻你自己要多少現金作備用，我地理財，要先防守，後進攻。

生活上、生意上，要有多少現金，如果6-12個月要頂住，是否足夠？

剩下的現金，就可以投資。

大市比幾個月前跌唔少，部分股票已到了合理區底，或略平的位，你可以動用現金，以一手手模式，加快買入，把握這個機會。

總之，你記住幾個要點，第一，這是「閒錢」。第二，買入要分注，慢慢入，唔好一次過用盡資金，第三，要預留一定的現金，無人知幾時是最平，但有現金就一定有用。第四，要建立一個平衡組合，唔好只集中在幾隻股。

------------------------------------------------

Q16149：

成哥。。想請教。。

我現在有1000萬現金在手。。剛剛37歲，有自住樓
月入十萬左右

想問下點樣可以發大佢。。
唔該曬

龔成老師：

如果你本身已有物業，在財富平衡的角度，你應該將資金分配到優質股，利用股樓平衡作增值，同時，如果見到樓價大跌，可以買多一層做投資。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股最多小注。

盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，你已經可以動用其中的$300萬，分注投資。你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

總之你記住，投資不是炒賣，而是如何將你的現金，轉化成有質素的資產，建立一個平衡、穩健的組合。

------------------------------------------------

Q16150：

你好，我係新手，我持有1000股03690.係高位價$115入市.之後一直係咁跌，見升極係92左右又跌返，請問我係咪可以估佐先等低位轉入其他

另外9988我都持有1000股.$205入，係咪等跌再溝貨還是買其他算

匯豐舊年59蚊入貨，係咪都可以出佐先.麻煩曬，我都係最近2個月先學玩股票，多多指教

龔成老師：

美團點評（3690）有潛力的，不過這股要進行估值難，而股價亦比較波動，因此唔建議太大注。

你唔好太理會中中短期股價，分析股價是無意思的，你應該分析企業的業務情況。

如果你持貨不多，可持有住先。

至於阿里（9988）有質素，有增長力，但之前一直都貴，要去到$180以下才算合理。加注與否，要睇翻這股佔你組合的比例，如已有一定數，就算。

匯豐（0005）只是收息股，唔好對股價有太大期望。如果想增值，其實應該考慮其他股票。

------------------------------------------------

Q16151：

龔老師你好呀！
想問下 眾安在線(6060) 這隻股有潛力嗎？

龔成老師：

眾安（6060），並不是無質素，佢業務高增長，但最大最大的問題，就是這企業仍處燒銀紙的狀態，虧損不斷出現，根來無人知幾時先有較似樣的盈利。因為行業的不確定性都幾大，難估值。

這就會出現一個嚴重問題，企業值幾多錢先合理？

答案是無人知。

市場根本無法正確估到佢地企業價值，那就只能單憑概念、前景，去估這股的股價值幾多。這就會令這企業的股價十分波動，因為大家都只是估估下。

潛力有多大，企業值多少才合理，無人知，但這類股，我地一定不能大注。

------------------------------------------------

Q16152：

龔老師， 1. 2826 雲算etf 現價可買入嗎？ 打算長線吸納。

2. 可長線持有9988嗎？雖然未係藍籌，但都算係優質股吧？ 謝

3. 3918係咪可以入了

龔成老師：

1）ＧＸ中國雲算（2826）有長遠的增長力，不過估值方面較難，所以分注慢慢入較好。可長線投資。

2）阿里（9988）有質素，加上有潛力，可以投資，你預$180以下就是合理價。長線持有無問題。

3）金界控股（3918）有質素的，但風險度會比澳門賭業股為高，因此要控制好注碼。現價在合理區中下部，可以投資，這股有長線持有的價值。

------------------------------------------------

Q16153：

老師, 您好! 我剛踏入50歲, 現手持下列股票, 由於以往很喜歡購物, 所持現金不多, 只有幾千元美金及幾千元英磅;

2手00002中電; 2手00005滙豐; 2手00011恒生; 2手00388港交所; 1手01398工商銀行; 4手02388 中銀香港; 1手 09988阿里巴巴

見老師多提議供股, 所以下月開始會股2800盈富基金$2,500, 00006電能實業$1,500。

每月基本洗費約 $30,000, 包括保險供款 $15,000;

請問老師, 如果65歲退休, 以上述所持股票, 有多少現金流呢? 需要調整股票分配嗎? 請老師指教。

另外, 老師是否有一本書, 介紹50歲的投資策略?

龔成老師：

首先，你持有的股票不是差，但有點集中在銀行股，而我地投資，同一行最好在30%以下，否則會出現集中風險。

所以你之後唔應該增加太多銀行股。

至於月供方面，你供盈富（2800）及電能（0006）可以，基本上已經可以開始。

你現時每月供$4000股票，假設股票有8%的複息增長（要當你收到股息後，再投入買股票），65歲，會滾存到$130萬，加上你現時的股票，預期$180萬。如果這筆資金收到5%股息，大約一年有$90000，每月收息$7500。

如果你想增加這數，有兩個做法。

第一，增加每月的月供數，第二，投資較有增長力的股票。

運用「先增值，後現金流」作方法，初期投資較多增值類資產，到退休，則應投資較多保守類項目，因為初期財富系統未成形，同時可承受的風險度較高，所以會著重增值為先。

到退休，先集中投資低風險，現金流類別的項目。

------------------------------------------------

Q16154：

Hi 龔成老師，我現時27歲 月入32000蚊 擁有一個物業 而家按揭9300蚊左右 扣起生活費

一個月可以儲或投資14000蚊左右 現金我大概有60萬 而家暫時月供3000蚊2800 而家見到個市有波動

想增加月供嘅錢之外 想拎多10萬出來買幾手股票長線投資 請問0006或0003會適合我嗎？thanks

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你27歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，煤氣（0003）、電能（0006），以你的年齡來說，都不算最適合。

你可以保持供盈富（2800），同時可考慮銀娛（0012）、阿里（9988）、港鐵（0066）、舜宇光學（2382）、小米（1810）等這類較有增長力的股票，只要建立一個平衡組合就得。

------------------------------------------------

Q16155：

老師你好，有點問題希望能幫忙解答，小弟雖然做左幾年野，但一直都是月光族，沒什麼儲蓄，到現在31歲發覺太後悔，希望能佢發奮，前幾年有試過在股票牛熊學投資，但都爛尾收場！

而家可用資金只有20k左右，股票手持蟹緊既772,135(各一手) , 月供每月$1500, 每月可儲8k, 我希望年半可以有40萬-50萬上樓，請問老師有可能嗎？

簡單的是希望每月能生活好點，有額外的收入，這年紀在投資方面應該要怎樣？ 謝謝

龔成老師：

投資衍生工具，我20年前都試過，輸好多，之後唔再投資，其實好多人都中過招，只係有人會醒，有人唔識醒。

之後唔好再投資。

如果你現時現金不多，建議你努力儲現金先。

閱文（0772）不是全無質素，但估值是最大問題，這類股只能小注。至於昆侖能源（0135）質素中等，都可守往先，就算要賣都要等油價上翻先。

你每月儲$8000，一年半後本金為$12萬，你想累積到$40萬-$50萬，這要好高回報先得，我擔心你為追求過高回報而面對過高風險，正所謂「財不入急門」，小心。

建議你每月月供$5000。

你可以考慮盈富（2800）$2000。另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市波動，你可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16156：

龔成老師，我一直有看你的書近在這一年間。我是住在澳門的

以下問題是針對澳門情況，想請教你有關分注入市中衍生的一些交易手續費貴的題，分注入可減低很大風險，長期持有令交易成本高的問題不顯著，當短期少至一兩星期時，平均成本大增

澳門沒有太多證卷行，有的都在十多年前關門大吉了。澳門銀行的交易手續費，買入買出在固定手數以下的股票時，大約共320元。

有沒有意見對於短期持有時的操作方法，能在盡量減少分注注時又可分散風險的建議。

剛在宏達訂了你的2020版50隻優質股。

龔成老師：

如果澳門手續費咁高，買賣成本高，就更加不要做短炒，而我一向都不建議的。

你要減少買賣次數，儲多少少錢後先一次過買，就可以減少成本。

當然，我地投資時會用分注，這裡就要取一個平衡點。你可以計翻，手續費的佔比，唔好高過成本的1%，如果少過這數，有效分注買入是較好的。買入後，長線持有。

希望書盡快去到澳門，好似話好多人排緊。

------------------------------------------------

Q16157：

成哥。首先謝謝你先，上緊你堂，再睇左你介紹的書，真的明白好多野。學到既野我希望現市個大跌市，(你說的係機會黎)，希望我可以學既野可以拎出黎，但怕行錯路，請給指點

1)請問依嫁個市，越跌越有，啲優質股越來越平又正。本人30歲未婚有30萬，請給我意見，入咩好，比多少少方向我。

2)再說幾多成盈富幾多成潛力幾多成平均增長好，做進取型希望個組合有一百萬

我相信現市係個大機會，我怕入錯野令個30萬發揮唔到最大作用。。襯現市（跌市機會）買入，買入后希望來緊二至三年后個組合有賺一百萬。謝成哥！

龔成老師：

1）以你的年齡，以及已經有一定的投資知識，可以一半水桶1、一半水桶2。

前者如比亞迪（1211）、小米（1810）、中生製（1177）、新意網集團（1686），你亦可以自己選股。至於後者可以考慮這刻較有值博率，希慎（0014）、金沙（1928）、領展（0823）、加上盈富（2800）去平衡組合。

2）盈富可以佔股票組合3成。

就上述的股票，現價已可以入，但當然不會一次過入，而是分注，慢慢入，同時留現金。只要在較平的位入到，要打上一倍以上是好合理的，所以我地而家好希望優質股股價跌。

------------------------------------------------

Q16158：

成哥，你好。我係進階班學生，你份24大比率表好正，thx

請問流動比率（倍），最少及最大，我唔識入，你筆記教用100%以上合格200%以上理上。。100%，200%，是否就是100%=1倍，200%=2倍?

龔成老師：

我希望用好多列表，又或簡化的模式，去幫同學學到一D本身唔易掌握的概念！

你只要將「流動資產」÷「流動負債」就得，例如流動資產有$10億，流動負債有$10億，就是100%，這就合格，這是剛剛找到數。

如果200%，就為之一倍，即是$20億流動資產，對比$10億流動負債。

------------------------------------------------

Q16159：

老師你好
1. 看了大富翁致富藍圖有些不明。你講資產如果優質可以什至永遠持有。例如我買了個好優質的股票，但是我不賣，我就沒有現金去應付日常開支。

2. 另外，大市似乎到了便宜區。我現金不多，既想入股票，又想保留現金買樓用。好矛盾。因為一方面覺得現在是買入優質股好時機，但短期未必放。

另一方面打算2020年買樓結婚。想投資優質股又驚短期要用錢。如果不買樓，就白白浪費了入市良機。

3. 雖然老師常強調不要理股市短期升落。但看到自己在便宜時買的變更便宜，就感覺擔心。

4. 最近有些股票跌到3年低，就算股票是優質，那3年豈不是仍“白過”嗎？

5. 在2018年尾已月供2800 $7000，823 $4000，1211 $2000。如果今年29歲，現在應該放幾多%的錢在股市，應該留多少現金最好？而且在股市上，潛力股 : 低風險股怎樣比例才合適？

龔成老師：

1）當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

然後我地會進入「財務自由」的狀態，在不消耗任何資產的狀態下，利用租金、股息等現金流，已足夠日常支出。

2）如果你想在1、2年內買樓，就唔好投資股市，就算股市平，我地都要長線先有效果，因為買股票就是買企業，企業成長需時。

因此，你這刻應中儲現金，然後把握樓市1、2年內有可能下跌的機會，作出置業動作。

3）好多人都著重「這刻的股價」，但這是錯誤的，如果我地明白企業價值的概念，就知這刻應該開心，你只是心理問題，並不是投資問題。

其實要克服心理因素，就要有「將來財富」的概念，我投資股票20年，久不久都會遇到一些大跌市，當時我都會持有有一定的股票，身家會縮水，當刻如果我好集中在「這刻的股價」「這刻的股價」，我都會唔開心。

不過，我每次都係著重「入貨的機會」，而唔理我原有的貨有無蝕錢。通常過一年後，身家都會大增。

當我經歷過幾次後，就會明白，如果我想之後的身家大升，就要這刻的身家縮水，這刻縮得愈勁，之後身家就會升得愈勁！

簡單來講，在大跌市，我唔理「之前買的股價蝕左」，只著重「這刻的入貨機會」，同時會心裡想，如果可以比我用更平的價入貨就好了（就算我已經持有這股並賬面上蝕緊），所以，我當刻反而希望跌更多！

4）同（3）的概念一樣，要長線。

5）如果不計你買樓的部分，你應該投資較多比例在股票，現金剩下3成已可。但如果你買樓，就另計。

------------------------------------------------

Q16160：

龔成老師 本人33 今年頭先發覺到理財的重要性
本人一家三口 只有我工作

月入四萬五 於屯門有一單位 市值六百萬 樓按三百四十萬 暫時自住

無儲蓄

想請問假如我按到盡加上屋企人幫幫手 一間開多間五百萬既出租是否好方法增加財富資產？

龔成老師：

這策略，有好有壞。

首先，你總負債會多左，風險會高左，如果你收入出現問題，風險就會好大，因為只有你一個工作。

當然，這會增加了你的資產項，長遠會對財富較有利，但要「供得起」，這是重點。因此，你要自己衡量。

整體來說，風險度是「中高」，如果樓市大跌到較平，值博率就會增加，這時才考慮會比較平衡。

反而這刻，集中儲蓄及投資股票，在負債上保持原有水平，風險度會較平衡。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。