一個演員一隻汪（下） . 我以為我對阿天都有貢獻，至少我幫佢賺到錢，令佢由租屋住變到買到樓。 . 但連以前會搵阿天演配角、做臨記嘅公司，都唔再搵佢。 . 因為所有人都覺得，佢唔再係阿天，只係旺財嘅主人。 . 阿天嘅機會，比以前更少。 . 終於有一晚，阿天飲醉咗，攬住我喊：「我只係想演戲，點解咁難？」 . 我終於意識到，佢從來都冇開心過。 . ， 於是，我再拍戲嘅時候，我咬住阿天嘅褲腳，想將佢拖入鏡頭內，令佢開心番。 . 無論工作人員點樣用零食、玩具哄我，我都唔肯鬆開口中嘅褲腳。 . 「去拍戲啦。」阿天摸吓我個頭，但我見到佢嘅眼底，有一種難以言喻嘅羨慕，羨慕一隻狗，有得演戲。 . 導演嘅聲音從遠處傳來：「旺財主人，你搞唔搞得掂㗎？」 . 阿天好溫柔咁同我講：「乖啦，做嘢啦。」 . ， 我唔制！我唔拍！我唔要搶走主人應有嘅機會。 . 我好似發咗癲咁，喺片場中奔跑，撞跌晒啲器材。 . 所有人都鬧我、追我，搞到片場一片混亂，呢次拍攝不歡而散。 . 我又搞黃咗幾次拍攝，漸漸地，冇人再搵我拍嘢。 . ， 阿天好困惑：「點解你會變成咁？你以前唔係咁曳㗎。」 . 我好溫馴咁舔下佢塊臉。 . 我唔再拍嘢之後，生活初時變番好似以前咁，阿天日日鑽研演技，搵吓邊度有得Casting。 . 但每一晚，阿天都會睇吓我以前拍嘅電影同廣告。 . ， 突然有一晚，阿天重重咁丟低一本講演技嘅書。 . 「啪」一聲，我嚇咗一跳。 . 阿天抱起我，喃喃自語：「我一直以為，我咁鍾意演戲，我花咁多時間學做戲，我嘅使命就係要做一個最出色嘅演員。我做唔到，我好痛苦。」 . ， 阿天突然望住我對眼：「原來我真正嘅使命，係培養你成為一個最好嘅演員。」 . 咩話？我環視一周，差啲以為屋裡面有第二個人。 . 「大家都讚你演技好，其實你根本唔識做戲，只係郁吓對眼郁吓個嘴……唔怪得你，畢竟你只係一隻狗。」 阿天話鋒一轉：「但點解狗，就一定唔識做戲呢？」 . 點解呢？因為我係狗囉…… . 「世上有好多個人類影帝，亦都有好多動物明星，但從來都冇一個狗影帝！」 阿天愈講愈激動：「我嘅使命，就係培養一個狗影帝。我要話畀全世界知，唔係剩係人類先有演技。」 . ， 自此之後，阿天就開始訓練我嘅演技。 . 佢會教我，眼仔碌碌係咩意思、伸脷係咩情緒、「見到零食嘅開心」同「見到主人嘅開心」有咩唔同…… . 佢話，等我嘅演技有番咁上下，就會再幫我拍片，推番我出嚟拍戲，成就寵物界嘅經典。 . 坦白講，我都唔知狗有冇得做影帝，不過，見到阿天開心番，我點都會配合佢㗎。 . ， 生命中總有一條路，你付出咗好多，都未行到終點，令你困惑迷茫。 . 但即使係同一條路，都有唔同嘅行法。 . 或者，你命中注定，係呢條路上嘅引路人、係最重要嘅助手、係開路嘅先鋒…… . 只要唔放棄，始終會搵到自己嘅角色。 . —完— . #短故 #短篇 #小說 #陳美濤 #廣東話 #粵語 #tomatochan #一個演員一隻汪