每逢盛夏倍憎Hot 對於夏天，我又愛又恨——錯，其實只有恨。 每逢仲夏，每逢熱到瀕臨中暑邊緣，我就不禁遙想那年中五暑假，在等放榜前去了火炭一間蠟燭廠返暑期工的熱與怒。 有關我在那間蠟燭廠的奮鬥歷程，一早寫過，但不排除你有可能冇睇過，我決定簡述一下。份工，是在勞工署搵的。我呢世都記得工作簡介寫咗以下四隻字：「冷氣廠房」。於是飛奔去見工，而又順利見得成工（這次堪稱我成世人最順利的一次見工），第二日立即上工。 見工時已經想問：哈個冷氣廠房呢請問？——因為我完全感受唔到冷氣，但見工時已是傍晚，員工已經收晒工，熄冷氣好正常……翌日，返工，終於明白冷氣廠房的真諦和所在。蠟燭廠分成兩大part：熱到核爆的偌大廠房 & 長期有冷氣開放的寫字樓——而嗰個神秘冷氣廠房，原來是熱到核爆偌大廠房裡的一間room。而我和同學（當時有幸見得成呢份工的只有我同佢）的日常工作地方，自然是熱到核爆的偌大廠房，但不包括那間有冷氣的room，那間room是阿頭的辦公室暨個人休息室。 OK fine，青春就是要捱得吖嘛，於是每一天便在non-stop地流汗情況下完成諸種工作：整蠟燭、將整好的蠟燭入盒、將冇用的蠟廢料投進一個熱爆的蠟反應堆，另加每星期走唔甩的兩次上貨落貨——好記得有一鑊，突然有批貨偏偏揀在夜晚送嚟，阿頭的唯一手下（亦即我的頂頭上司）說：「嗱今晚我唔得閒，你哋搞掂佢嘞！」然後卸膊的他走了，不帶走一碌蠟燭。 這份暑期工對我的教訓是：1.世界從不公平。當時有兩個跟我同齡的後生仔也有來返暑期工，但我完全唔知佢哋日常工作做乜，只知道佢哋唔使乜都唔使做——他們是某高層的寶貝仔。2.中秋不再煲蠟。誰知盤中蠟，碌碌皆辛苦。3.不再輕信勞工署張貼出來的工作簡介……仲有4.——大個咗，一定要去有冷氣的地方返工。 回想，是意志令我捱過那一份工，但我的body，每一個工作天都感到好酷熱。 所以我不明白Why有成年人竟然會將「捱得」同「捱得熱」等同，而同時又將「捱得」作為「青春」的代名詞——成條算式加埋即係：青春，就係要捱得；捱得，就係要捱埋熱。 捱得，是態度是精神是意志；捱熱，是物理狀況，當然你可以用精神意志說服自己能夠忍受酷熱，問題是，body啋你都有味——熱到某一個點，就會（令擁有澎湃抗熱意志的你）中暑，中暑到一個程度，就會死——即使你擁有不死意志。 如果我見到街上的你正在使用芭蕉扇（或任何令你感到有少少涼意的裝備），我絕對不會話你怕熱、鬧你唔捱得。捱熱，除了流到成身臭汗，我睇不到有任何得著。塵世間不是每一樣嘢都值得你去捱。 今天的我，終於成功在有冷氣的地方返工了，但不代表唔使捱熱。 不計日常出外工作，就單計由屋企返到office的那段路程吧，一樣有大把熱到我流幾加侖汗的機會。 搭巴士：我搭的不是冷氣巴嗎？Why從風口吹出來的竟是暖風？ 搭港鐵：不知由幾時開始，只要一進入港鐵範圍，立即恍如置身酷熱天氣警告下；上埋車，直情好似身處一個迫滿人的沙灘！偏偏貼住我企的那一位不是bikini女郎，而是流汗比我流得更猖狂的麻甩佬（當然不排除對方都會咁諗）。 所以有時我會飛的。一上車講咗想去邊後司機即說：「吓？過海？我就交更咯喎……唉是Q但啦，嗱我唔熟路你一陣提我點行呀費事行錯你話我兜路……開大啲冷氣？好熱咩？開咁大冷氣因住攝親吖！妖香港啲路真係難行xy#z@ax……」 香港之夏，除了熱，仲好㷫。xy#z@ax…… （原文刊於am730） #月巴事