「最重要有內涵，形式唔緊要」—- 論基督徒的保守心態 (長文慎入） 當有人嘗試在教會和機構提出一些形式上的改革，或一些技術層面的改進（如音樂/音響/ 設計/美術/ 環境 /宣傳等），大多都會聽到類似説話：最重要有內涵，形式唔緊要。大概意思是信仰重心是生命見證、個人屬靈操練，其他係門面野，並不重要，Don’t bother. 這種心態可能是衍生自聖經的概念，就算你幾有能力、做得幾好，若沒有愛、或者為了炫耀，也是鳴的鑼、響的鈸，虛有其表，上帝並不喜悅。但在實踐的過程中，筆者認為有點捉錯用神，慢慢演化成不思進取的籍口。 唱歌走音，唔緊要，有心。 彈到甩哂，唔緊要，有心。 旋律啦咔、歌詞唔啱音，唔緊要，有心。 創作重複緊20年嘅公式冇變化， 唔緊要，有心。 Design肉酸啲，唔緊要，有心。 啲內容對應唔到會眾需要、都唔緊要，有心。 冇錯，事奉不只講技巧同埋能力，不是專業人士的專利，心態的確至為重要，但不等於我們要放棄精益求精，無止境地選擇犧牲各種技巧的水平和質素。 所謂「傳福音」，除左福音本身，重點還有「傳」。除了最Hardcore 1 on 1 囉個人做見證果隻傳，我諗都有傳講、傳播的意思，讓人明白信仰同福音的意義。係現代社會，傳播係一門學問，可以用幾年讀一個Degree，點樣將信息、信念、信仰令人明白，除左話有心同做個好人，係咪都值得思考下點傳，是否effective？ 有趣啲角度咁諗，根據耶穌吩咐，我地既target audience其實係全個地球阿🤣 不分年齡、種族、階層、地域，係一個史上少有咁浩大既campaign 😂 大佬，除左有心，係咪都要反省下點樣做得好啲？ 唔好講其他層面啦，講返音樂，係業界，「教會」係一個adjective （形容詞），「乜呢首野咁教會？」來形容老土既旋律同編曲；見到唔啱音既歌詞會話「你番邊間教會？」；有時成功流到出去嘅嘢，好多時係派膠類。有時唔憤氣，我哋係咪可以做得好啲，為呢個形容詞帶嚟新嘅意義？ 另外我想講，人係受環境影響的。點解中世紀教堂有咁宏偉既建築、精美嘅窗花、充滿意象嘅雕塑等等，其中一個原因係想人入到教堂能夠受到環境嘅啟發、又或者透過欣賞藝術靈修、思考信仰。今日，我哋睇嘅係電腦螢幕、聽到嘅喇叭mix出嚟嘅音響，在能力範圍中喺各樣細節花些心思，會否令參與者更專心投入？ 小弟係一個社工，讀既係社會學，某程度上教會群體比較似Close System，有特別的傳統、獨有文化、甚至語言，普遍比較與世隔絕。 時代講求創新，而教會比較着重傳統。一間教會二十年佢嘅模式可能無乜變，外面既社會已經係兩個平行世界，於是脫節嘅情況可以好誇張。 某啲傳統的確好有意義，值得保留，某啲價值觀也是不可退讓的。但係有啲嘢需要與時並進，先牧養到係呢個時代生活嘅人。 道成肉身、走進人群，唔係淨係肉體，我們如何在網絡和文化藝術進行牧養工作？在文化方面如何減少溝通鴻溝？做青年工作，如何擺脫離地、好悶、好老土嘅標籤？ 如何增加基督徒在社會的角色、基督教價值的公共性，值得深思，常常檢討，並唔係淨係有心就夠。 筆者最後帶番頭盔，以上嘅東東，我也在學習和嘗試中，縱使有時力有不逮，都在盡力嘗試，都想同各位弟兄姊妹一齊努力。 （其實唔知點解會寫長文，要明嘅人應該都明左，唔明嘅人又繼續佢既自在生活😂 anyway, thanks for reading) #eddiesir講經系列