【《七救星》ViuTV周一至周五收視三連霸 】 _ 無綫電視公布的最新一期收視報告，已於周一（6/9）出爐，縱觀傳媒、網媒或KOL的討論焦點都落在上周六（4/9）TVB以「食老本」的《兒歌金曲Summer Fest》大戰ViuTV「食正奧運餘溫」的《力圖打排球》，兩個節目同樣於晚上八點半播出，結果前者只得11.7點慘勝，而後者則獲得5.1點成為全台收視冠軍。 _ 其實還有甚麼好講呢？要不是大台勉強來說還有「慣性收視」（或固執地不肯轉台）這條「三斤釘」，無論節目包裝和演出陣容考量，《兒歌金曲Summer Fest》根本不應製作。雖說橋唔怕舊，最緊要受，問題在於，本地「兒歌」幾已「絕種」起碼十年，那夜歐倩怡唱的《問題天天都多》或者滕麗名唱的《魔法咕嚕咕嚕》，都是八、九十後的集體回憶，而這班人，今天都已經三十幾四十歲，但這個節目卻用上90年代《兒歌金曲頒獎典禮》的花紙包裝，今天的細路仔怎會有共鳴？反而製作團隊有勇氣以《流行經典50年 ─ 兒歌之夜》（2017年9月《流行經典50年唱爆周末》已試過，那集極受歡迎，網上討論度高），說不定收視會比現在多一倍。 _ 做人跟做電視台一樣，最緊要知道自己定位，誠如近日人氣急升的「七師傅」七仙羽一樣，憑其超級神秘背景，加上強烈的個人風格（半鹹淡廣東話、說話方式時而呆滯時而直接），配合「風水師傅」這個身份，令她成為ViuTV主持的《七救星》最難以抗拒的賣點。最初看《七救星》，的確不太掌握得到節目的定位，再多看幾集，才知道那是一個頗為踩界，結合玄學、惡搞、爆笑、真人騷於一身的時尚心靈輔導綜藝節目，每位應邀出席的藝人，都有自己的孽障需要解決，可以是爛桃花，可以是妹仔命，可以是冇發達，只要七師傅出手，問題自然迎刃而解，但關鍵不在於師傅用上哪些招式，而是嘉賓有沒有認真看待自身問題，解開自己的心結，令觀眾有所領悟。 _ 參考電視史上較相近例子，《七救星》算是《軟硬製造》（1993）的N代進化版，但今天《七》剛好繼承了《ERROR自肥企画》那種「觀眾硬係覺得呢個節目有啲嘢想講」的感覺，才會令到節目播出後大受歡迎（七師傅的IG粉絲暴升至7.2萬），單單「七連閃電鞭」已經不停洗板，甚至推出後續歌曲《OM7G》（P1X3L featuring 七師傅），只有ViuTV能夠做得到，那是觀眾賦予給Sound Bear的特殊地位，大台無法複製，難怪節目於8月16日播出以來，收視愈升愈有：3.8、3.9及4.2，連續三個星期成為99台周一至周五黃金時段收視冠軍，頭兩周更是一星期最高收視節目，第三周僅僅輸給《力圖打排球》排第二。 _ 對於節目播出後收視稱霸99台，「七師傅」透過WhatsApp語音短訊回覆查詢時指，《七救星》拍攝期長達兩個月，正值盛夏，拍外景需要上山下海，長時間曝曬，抵受高溫，加上跟支付寶 @alipayhk 和譚仔雲南米線 @tamjai_hk 的廣告拍攝期重疊，休息不足，相當疲倦，「今日拍完第二日又再拍，係冇時間休息㗎，所以好多時見到我個樣呢，可能有時靚啲，有時殘啲，有時可能肥啲，有時可能瘦啲，次次個樣都唔同，因為有時係捱到病晒，我本身有好多活動，加上每日有好多客嚟搵我，所以係非常之辛苦，但係咁辛苦我都要堅持去做好呢個節目，主要係想帶畀大家多啲歡樂，呢個係主要嘅原因，因為拍呢啲節目係冇錢賺㗎，好少錢，太濕碎，非常濕碎，主要都係為咗帶一啲嘅歡喜、快樂畀香港人，呢個係主要目的，係電視台導演同埋監製嘅共同願望。」 _ 「七師傅」直言，台前幕後都視這個願望為一種布施，只想幫助別人，「我哋就冇諗自己個人嘅得失，冇諗過話我拍完呢套嘢會點樣紅，只係希望呢個節目能夠畀到正能量大家，令到大家歡喜，輕輕鬆鬆咁睇一套戲（節目），開開心心忘記唔開心嘅嘢，減低啲壓力，呢個都係我哋工作人員共同期待㗎，（節目）出咗嚟之後呢，見到大家真係好開心，真係每晚都喺度追睇呢個節目，大家睇完都面帶微笑去瞓覺，都真係改變咗好多人嘅思想，有啲人本身諗唔通呀，或者想自殘嘅，都發咗好多訊息過嚟，話多謝你呀師傅，睇完呢個節目之後呢，睇嘢正面咗，諗嘢開心咗，所以見到呢樣嘢，我哋都係好開心。」 _ 不過，當很多觀眾大叫「師傅愛你」的時候，亦會有人不喜歡，「七師傅」承認有負評，但她不會介意：「都好多人鬧我騎呢，鬧我另類，鬧我神棍，其實呢樣嘢冇問題㗎，我寫咗嗰首歌詞都係咁講：『網民令我成熟』（面對網民會令佢哋更加成熟），大家睇問題嘅角度都唔同，所以大家都覺得我騎呢，我都覺得自己係有少少騎呢，因為你做呢啲綜藝節目，有少少搞笑嘅節目呢，有少少騎呢其實係冇問題㗎，總之大家開心就得，唔使睇呢個節目睇得咁沉重，將佢睇到咁深仇大恨，何必呢？」 _ （10092021） _ #游大東影視筆記 #游大東 #七救星 #七師傅 #ViuTV #陳安立 #王頌茵 #力圖打排球 #師傅愛你 #TVB #譚仔雲南米線 #支付寶 #10092021 #收視 @weare_p1x3l @georgeau.8 @phoebus_ng @imarco_p1x3l #七連閃電鞭 @smallfatfat

【 勿看輕努力的人 ── 林明禎拍廣告花絮 】 _ 撰寫影視娛樂文章和報道已超過五年，作為紀錄者和旁觀者，也不得不承認，在香港做藝人實在不容易（其實全世界也如此，惟香港人煙稠密，「冇得避」感覺強烈）。興許是長時間在娛樂版的衍詞用字耳濡目染下，彷彿觀眾一旦接觸屏幕和鍵盤的時候，就會霎時間放下所有理智，變成一種自恃能夠通觀全局、無所不知的「超級Mean精」，做演員好，做歌手好，總之站在幕前，就要吃得苦，品頭評足當然是「最低消費」，更多是無理取鬧惡言相向詆毀專業，一竹篙打一船人，女藝人的情況尤其嚴重，批評五花八門 ── 身材驕人就必然「不懂思考」、穿得太性感就是暴露，穿得密實又會話「冇料到」、「Chok樣」又會被視為有偶像包袱、樣貌稍為不夠狀態就叫「崩壞」，總之若有稱讚就是「收人錢講好說話」，「踩到盡」才切合討論氣氛，以下要說的例子，正是「大馬女神」林明禎。 _ 可能跟上個月初在九展Star Hall觀賞ToNick演唱會時，當晚其中一位特別嘉賓是林明禎有關（大數據魔法？），接下來的這段時間，無論是出席記者會還是掃手機，總會經常見到她的蹤影，拍完2022年賀歲片《飯戲攻心》後，轉個頭又要演出另一套電影《願望扭蛋機》，Google一下才知道，女神因為疫情關係滯留香港，索性暫時將事業基地搬到香港，除了拍戲，更成功接了5個廣告，除了跟林雪和193@ERROR合拍的藍妹啤酒廣告外，近日推出的Kotex極柔安心熟睡褲廣告，亦同樣引起不少討論，事關歷時超過兩分半鐘的廣告裏，林明禎需要講大量廣東話兼中英夾雜的台詞，而且每句字數頗多，對於一直講普通話的女神來說，理所當然難度甚高，不時出現「歪音」的問題，而這一點就成為網民的攻擊目標：「啲發音仲係好差！」、「我聽咗啲咩？」眾所周知，普通話才四聲，但廣東話有九聲，所以今次林明禎根本是挑戰自我。 _ 據今次製作 @Kotexhk 廣告的幕後人員告知，林明禎在拍攝開始之前，花了一整天時間，對着錄音機反覆練習，用貼近廣東話發音的英文字拼寫句子，硬背台詞，就算身在拍攝現場不用埋位的時候，仍堅持與導演和工作人員用廣東話交談，確保錄影時的發音，效果不會有太大偏差。講好對白還未夠，林明禎知道劇本大綱之後，會親自向導演和客戶解釋想法，在拍攝期間會做出哪些動作、姿勢和面部表情，更會接受客戶意見修改，她又會主動要求多拍幾次，冀最終出來的效果達致完美。為了凸顯產品訊息，製作團隊為林明禎揀選了一條剪裁上略為誇張的粉紅色長裙，以帶出戲劇效果，換句話講，要去洗手間就得大費周章，所以幕後人員指，拍攝當天林明禎其實沒有甚麼機會去洗手間，但仍保持專業，毫無怨言。 _ 有人留言質疑：「其實搵咩人拍呢個衛生巾廣告，效果都一樣啦！」某程度上認同這個觀點，但又不能完全認同，因為演員賣的是演技和個人魅力，那是專業，講求功架，所以絕對是有「殺死」或「拯救」劇本的能力，如果女神根本得個樣沒內涵，求其迤（Hea）做，透過畫面呈現出來，絕對睇得到，又正因為林明禎這種勇於追求突破、無畏語言障礙、對工作保持熱誠的性格，與追求創新的品牌定位能夠互相呼應，所以決定邀請合作，鼓勵女神繼續挑戰自我。至於大家最關心的口音問題，說穿了，林明禎根本不是第一人，畢竟香港一直都是外向型社會，過去40年來，不斷有來自其他地區的藝人來到這裏發展，「講唔正廣東話」的例子太多：80年代有葉蒨文；90年代有任賢齊、吳奇隆，千禧年代有金剛、還有最近紅爆的七仙羽，假如七師傅的「招牌」口音和擅於搞笑而勁Like，相信林明禎同樣能夠成為下一人。 _ （24082021） _ #游大東影視筆記 #游大東 #林明禎 #KOTEX #馬來西亞 #飯戲攻心 #願望扭蛋機 #Tonick @minchenhoney @minchenpng @minchenfanstw @heisonng #kotexcomfortsoft

#電影觀後感 #媽媽的神奇小子 電影以香港殘奧運動員 #蘇樺偉 嘅故事為題，講述佢由細細個唔識行到變成世界第一嘅成長過程。偉仔天生患有痙攣、唔識得行路，出入都要蘇媽抱著，但蘇媽無放棄一直鼓勵偉仔企起身學習行路，終於有一日偉仔竟然企咗起身，令蘇媽覺得以前嘅努力都好值得。 一次偶然嘅機會，13歲嘅偉仔喺跑道上展現佢驚人嘅爆發力，教練方Sir主動邀請偉仔加入訓練。雖然一開頭唔係咁順利，但係媽媽嘅鼓勵同陪伴之下，偉仔好努力練習，第一次參加殘奧就拎到接力金牌。 之後佢陸陸續續拎咗好多塊金牌，但偉仔發現雖然佢好鍾意跑步，但原來為咗成就自己做全職運動員，屋企人犧牲咗好多。於是佢放棄跑步成為速遞員，蘇媽為咗比佢繼續跑，幫佢接咗唔少廣告，臨近比賽時間緊迫，究竟點樣去工作同練習之間取得平衡，佢又點樣衝破迷失嘅人生階段？ 淨係睇預告都已經知道呢套戲一定好感動。母子情、偉仔嘅努力都令觀眾動容；尤其係年幼嘅偉仔第一次企起身、第一次拎金牌、京奧輸咗2場而蘇媽繼續鼓勵佢。 電影中除咗吳君如、張繼聰，其他好多都係新演員，包括飾演唔同時期偉仔嘅梁仲恆、馮皓揚、鍾雪、Locker，表現專業值得欣賞；尤其係梁仲恆扮演痙攣人士同運動員嘅演出令人印象深刻。 至於另一主角蘇媽吳君如，細細個睇佢都係喜劇多，對佢嘅印象大多停留喺周星馳嘅奶媽、金雞同埋電台節目嘅三姑，以上都同搞笑有關。 但睇完《媽媽的神奇小子》，你會發現吳君如真係一位好有愛嘅媽媽，無論係愁眉深鎖、擔心呀仔無人照顧；用好多時間陪佢練跑，甚至幫佢同心上人表白。或者仔女未必明白媽媽嘅母愛，或者媽媽有時真係做多咗，但其實佢無時無刻都係為仔女着想，為佢哋做最好嘅決定。 電影內容當然勵志，即使我哋輸係起跑線，但只要望住終點一直向前跑，我哋唔會一世都輸，甚至有可能超越其他人成為世界第一。即使香港只係一個小城市，但依然孕育出好多嘅精英運動員；好多人仲想大半生嘅時間，只要有一個機會，就算勝出嘅機率幾咁渺小，都全力以赴表現出最好嘅自己。 而最令人無奈嘅係，即使偉仔已經係世界第一嘅跑手，但都因為經濟困難被迫放棄跑步，為咗繼續運動生涯去拍一啲自己唔擅長嘅廣告，為咗生計深受巨大嘅壓力。希望今年開始，無論係當打定係退役嘅運動員，生活都可以得到保障，各大廣告商都可以多啲搵佢哋工作。 #吳君如 #梁仲恆 #張繼聰 #胡子彤 #馮皓揚 #林家熙 #鍾說 #柳應廷 #神奇之路 #神奇小子 #痙攣 #殘奧 #香港電影 #hkmovie #hkpop #cantopop #cantonese #廣東話 #廣東歌