【阿公講鬼】《狐仙吃童》（下） . .阿公當時都呆咗一呆，因為連佢都估唔到，細路女阿爸身上竟然有狐仙上身嘅味氣。 . .「喂！你係邊個，你喺度做乜？」男人大聲喝止。 .「佢幫阿女捉狐仙…」女人試圖解釋。 . .呢個時候，細路女突然間靜咗落嚟，阿公見到白影喺佢頭頂繚繞不定，想鑽返入細路女體內。 . .差少少！差少少隻狐仙就被趕離細路女身體！但阿公已經被男人推開咗，無辦法阻止隻狐仙。 . .「捉狐仙？妳無腦㗎？！」男人。 .「但阿女真係好奇怪，佢不斷喺屋企掟嘢，又發晒狂尖叫，扯自己頭髮…」個女人撥開細路女嘅頭髮，見到頭頂禿咗一忽，仲有手指血痕。 . .「妳無帶個女睇醫生咩？」男人。 .「睇咗啦…」女人。 .「你點做人阿媽，一個小朋友都睇唔住！」男人。 . .個女人聽見後開始係咁喊，阿公行去男人面前。 .「先生，你身上好重陰氣。」 .「關你咩事？」男人對阿公惡言相向。 .「我只係想話你知，凡事都有代價㗎。為咗個小朋友，唔好再拜狐仙啦，你咁做會害死佢？」阿公一開口就咬定男人拜狐仙。 . .「我完全唔知你講乜，你即刻同我走！」男人。 . .男人好似癲咗咁將阿公扯出廳，阿公見到男人膊頭伏住一隻女人外形嘅狐仙，皮膚、頭髮、眼球全部都係白色。狐仙係女人樣，但塊臉好長好尖，手腳仲有白色嘅細毛。 . .能夠化成人形輪廓，仲睇得咁清楚，就知道呢隻狐仙嘅修為，比起纏住細路女嗰隻高好多倍。 . .「咁呢隻女狐仙有幾多條尾？」我問。 .「睇唔到，狐仙修煉每五百年就會長出一條尾，但道行高嘅，根本唔會畀你知佢法力有幾高。」 . .隻女狐仙不斷喺男人耳邊細語，阿公知道男人唔會聽到隻狐仙講乜，因為男人修為都未夠。但靈體要擾亂人嘅思維，唔係單單用言語，而係直接擾亂一個人嘅魂魄。 . .阿公畀個男人半推半撞推出咗門外，仲搞到有警察上門，阿公只好被逼離開。 . .請到咁高法力嘅狐仙，照阿公推測，個男人應該「上咗契」畀狐仙。上契同一般拜佛唔同，效果強，但反噬力量亦更強。 . .難聽啲講，上契同賣身無分別，狐仙會幫你得到你想要嘅財富，但係成家人都係屬於狐仙。佢有權拎走你嘅親人。就好似細路女咁，女狐仙身邊較低級嘅小狐仙，隨時都可以吸個細路女人氣，令自己修為更高。 . .阿公唔能夠趕走隻女狐仙，因為男人有契約在身，所有反噬都會落喺阿公身上。佢只可以盡量教個細路女防身，令狐仙唔會令佢有生命危險。 . .自從嗰次之後，阿公身上帶住疊「百解符」，等再有機會見到個女人帶住細路女時就畀疊符佢，等佢可以幫個女防一防身。 . .「我有嘢想問，阿公你成日畫符，上面啲字又睇唔明，其實係咩字嚟？」我問。 . .「百解符係有多種功效嘅符咒，可以驅邪氣，亦可以解霉運。『符』其實同神父驅鬼讀聖經，和尚念佛經類似，而符咒就係經文嘅濃縮版本。由符頭、主事神佛、符腹、符腳、符膽組成，我頭先講嘅百解符就會寫上『百解』兩個字，所以就算識得畫道符，亦唔代表有功效，因為你唔明白個原理，道符講乜，請乜嘢神佛去做咩事。」 . .「咁最後你係咪趁個男人出咗去，就偷偷哋畀咗疊符個阿媽？」我講到好似阿公偷食咁… . .「無…」阿公嘆一口氣。 （太多字，下圖繼續）