墨爾本對於我嚟講係一個充滿回憶嘅地方，​ 當年除左每個月用盡所有長途機去換取呢四十個鐘嘅逗留時間 ，每逢假期、三日假，我都會係機場等候補機位，千里迢迢只為見一個人一面。來回十八個鐘飛行時間、一萬里飛行里數 對於一個少女嚟講 根本算不上什麼。​ ​ 望番呢幾張2014年第一次同當時男朋友分手之後 我係Brighton Beach 影過嘅相，慨嘆原來咁就已經過咗七年。​ ​ 而家諗返起當時自己失戀個副哭喪樣都不禁會心微笑。個陣時以為失去一個人就等同失去全世界，好膚淺 但又好可愛。多謝當年嘅我總係奮不顧身咁去愛。如果未曾遇過呢一切發生嘅事，我都唔會係呢七年間寫左過千篇文，亦唔會明白幸福其實可以好簡單。​ ​ 至於如今佢身處邊度做緊乜 我都完全唔清楚，但係我深信當時許下承諾嘅一刻 大家係真心相愛過，如果可以重頭開始，我仍然唔會後悔你出現過係我嘅青春裡。​ ​ 七年後嘅今日，世界變左好多，我都一樣；我亦由一個少女變左做少婦。​ 無論今日嘅你經歷緊任何困難或者覺得get through 唔到嘅人同事，我都想拍拍膊頭同你講: 一切會過去的，時間就係最好嘅良藥；千祈唔好企喺今日嘅位置去審視明天嘅自己。​ ​ 正如一年半前突如其來嘅一個COVID19令我日夜膽心自己會失業、無唒人生目標。但一年半後嘅今日，我終於又開始飛番。其實我都唔知道自己會飛到幾時，只係喺仲可以飛行嘅日子，我想好好享受係半空中望雲海同日出日落嘅每一刻。​ ​ 人生有太多難以預測嘅事，所以後來 我學會過好每一個今日就足夠，做好今日要做嘅事，明天自然有佢嘅安排。​ ​ 如果可以同當時嘅自己對話:​ ​ 「其實你唔需要勉強係墨爾本揾翡翠，就算你再來回幾多次 都唔會揾到，因為墨爾本根本沒有翡翠(你想要嘅愛情)。」​ ​ 到後來過了足夠嘅歲月後，當你再回望當時嘅自己就會發現: 當你以為自己失去一切時，​ 明天 其實才剛剛開始。​ ​ ✨