【龔成問答信箱】（Q21541-Q21560）

Q21541：

阿sir，剛剛重溫你第五堂既野，去計0066企業價值，唔知計得啱啱啱

咁我就用左2012-2020年既數據既 咁由細到大排左市盈率再揀左中間5年既就係13.18-17.56，

咁由於2020年港鐵因為物業估值嘅關係導致佢每股盈利得出負數，咁我就用2019年嘅每估盈利為1.94，

乘返市盈率再俾上下10%緩衝得出就係24.09-37.47。請問方向正確嗎？

謝謝阿sir

龔成老師︰

你成個功課，方向大致都正確。但因為港鐵(0066)較為特別，所以係你答案之上，會有些調整。

首先，每股盈利部份，由於集團收入係包括一些物業重估，所以你見佢過往多年，個數字都唔太穏定，有上有落。因此，我建議你用6年平均去計，會較理想(不計2020年負數)。

另外，市盈率方面，由於每股盈利包含了物業重估部份，令企業價值被高估左，實際PE應該係無咁低(如果你記得計算PE的公式，就會明白我意思，可參考第5堂, SLIDE3)。

因此，PE個合理範圍，我地都會調高少少，去反映這個物業重估，所帶來高估每股盈利的影響。

其實最正統的方法，要每一年的盈利扣除翻物業重估，以這個作基礎調整市盈率數據。

每股盈利︰HKD2.34，合理PE大約上調15%，即15 - 20倍。

合理價格︰HKD35.1 - 46.8

當然，這只是其中一個估值的角度，而投資者在進行估值時，會同時用多個估值方法去進行估值，得出更立體的結果。你預佢現時估值，是合理區中上位置。

------------------------------------------------

Q21542：

你好，龔Sir。 我剛報了股票班，希望踏出第一步，去增加智識。現想請問 MPF 組合問題。

我現時39歲，睇返MPF滾存至今，只有30萬，以往未有理會，但至從看你的fb, 令我有所改變，MPF也是一種投資，不能輕視。

曾經睇過一片文章，MPF要按年齡去增加債券比列，不知以下改變，是否適合。

我39歲，單身。 MPF經理：銀聯BCT

現有資產基金組合：
4月開始轉了30%環球股票, 40%大中華股票, 30%環球債券

將來供款投資組合：
4月開始轉了 3.49%中國及香港股票, 40.75%大中華股票, 27.88%環球股票, 27.88%環球債券

十分感謝回覆。

龔成老師︰

強積金的配置其實唔複雜，你只要按你的年齡階段，去進行分配就得，年輕時較進取，中年平穩，退休前就保守。基本上你按年齡，慢慢跟這樣比調整就得。

強積金是一個超長線投資，中短期當然會有上落，但就唔需要轉來轉去。

只要按你的年齡，長線配置就得。我自踏入社會工作後，一直都是100%恆指，無變過，根本唔需要理會。

當然，你想分散風險，加入一些大中華股票或環球股票，係可以。

但環球債券增長力不高，除非你投資取態好保守，否則以39歲年紀計，就唔係咁適合。

股票班見!

------------------------------------------------

Q21543：

老師，想問金界合理區正確嘛？另外，老師覺得幾多先算便？值得入？我用上堂教的方法，計到佢合理價為$8-$10。

我而家有現金30萬
10萬1044

仲有一d質素無咁好既股票諗住逐d轉番做有質素既

我心裡面知而家股市未係平宜，老師都叫人留現金等大跌市先掃貨，但成日心郁郁想入市，例如金界，但同時又會諗，如果等大跌市，回報會高好多

內心會爭扎，工作收入唔穩定，所以會好想d資金用得其所，唔想再係有機會但無錢入

如果係你，老師會點做？

龔成老師︰

你做的估值，係合理的，現時金界(3918)算在合理區。如果要到平宜區，你預跌多2成以上。

這股股價較為波動，不過都有長線投資的價值，現價可分注投資。另外由於市場新興，在注碼上不能投資得過多。

另外，我地無人知將來個大市會點走，更加唔會去估佢走勢。只會用當時平貴，去制定入貨策略。唔好比自己心理或者大市氣氛，影響到你計劃。

係價格合理時候，入一部份資金。到平宜區時，我地就大力入貨。

恆安國際（1044）主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現貨可持有。

但緊記，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多(少於組合之30%)，同一股不能太多(少於組合之15%)。要平衡，建立後長期持有，不是買賣賺差價，而是成為你財富組合一部分。

因此，你未來要加入更多不同行業的優質股，令個組合平衡翻，唔會太偏重個別股票。

你持有股票如果係劣質股，就應馬上沽出。如果係質素較弱，但又未到無質素，可以分段咁慢慢沽。

現時大市只在合理區，現金和股票佔比，最好係各一半。由於你收入不穏，最好額外儲半年開支，作不時之需。

雖然無人知幾時會大跌市，但你都要預留一定資金，去把握這個可能出現的機會。

------------------------------------------------

Q21544：

老師，唔好意思，可能又要麻煩你，我手上持有1257@$3.5 / 三手：(3000股)，今年1月25日入，目前為$3.12。

最近Biden發表減碳目標，同各大基金經理亦看重中國實際參與度，你認為對此股在中長期算是利好消息嗎？

另外，相較之下老師如何看待956, 257 同 1330呢？

多謝老師先，同好多謝你不斷俾正能量同正面思維大眾，默默地，它們對好多人真係有一定程度嘅影響，我自己也是其中一個。

希望大家一齊進步！再次感激老師！

龔成老師︰

中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。

負債與發展持續性，都是這股的風險因素。

你所講的減碳目標，都會係一個利好因素。長遠來說，這股仍是有投資價值。但此股畢竟有一定風險，不建議太過大注，同時可能仍會弱一段時期。

新天綠色能源（0956）和綠色動力環保(1330)本質不差，業規模比較細，整體質素和潛力度，無1257咁高。

光大環境（0257）係中國光大綠色環保（1257）母公司，都係主力環保相關業務，同樣有質素，但由於己有一定規模，故潛力度會較1257為弱。

------------------------------------------------

Q21545：

老師，剛想到一個情況

我在102元時入左一手平安好醫生，早前有一天，記得因為有個女股神定乜知名人物大手購入這1833，令佢股價一日內突然狂升幾十元到140多元

我剛剛突然諗，這個突然炒高的價位是因為某些巿場利好消息，應該超出了1833的合理價，當時我應否先賣出了。

待1833回復合理價位（例如現在經常徘徊在90多元）時再買入來長線持有？

龔成老師︰

我地優質股，永遠都係長線持有，會係最好。好似這類中短期波動，其實唔需要特別做任何動作。

更加唔好去沽走勢，覺得佢$140就一定係貴，我沽左先，平D再買過。這個不是正確做法。

早前佢升到$140係貴，但未算得上十分貴。無人知之後，會唔會更貴，到時你就無機會入翻貨。所以，這個水平的股價上升，我地係唔應該沽貨。

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

你現時只有1手，你只要耐心長線持有就可以，等待這企業改變整個行業的情況。

------------------------------------------------

Q21546：

老師你好 啱啱睇完你本股票勝經 𠵱家睇緊50優質潛力股 加上自己睇下其他資料

現打算月供以下股票 希望老師俾少少意見 謝謝。 (之前老師你建議 平穩增長: 潛力為7:3)

盈富+中銀香港+港鐵+領展+中電+金沙

再加安碩恆生+小米/騰訊+港交所

想請問每隻月供係咪1/9咁分? 定某幾隻應該供多啲? 謝謝老師解答。

另外我已經報咗名上你股票班 到時會盡量同同事調時間務求上到老師你嘅堂 (我仲幫埋妹妹報名一齊上堂 會好好努力學習)

龔成老師︰

你現時所選組合，係合適。所選的都是有質素的股票，以及有長線投資價值，無問題。

資金分配上，我建議你簡單點，將月供資金分成10份。盈富(2800)月供2份，其餘全部供1份。

上課前，你先看看我的書，對你課堂吸收會有幫助。你有時間，可以睇埋"財務自由行"，但無都無所謂。

而我會較建議，你這刻可以初步進行上述計劃，但就一定要留有現金，到上堂後，才正式進行整個組合的具體配置。

一齊上堂是一個很好的學習方法，因為可以討論，大家可以更快進步。股票班見！

------------------------------------------------

Q21547：

老師，如果一隻股票我有$10買入，而現時升到$20，如果仍$20仍是合理價，應否加注？

如果加注會拉高我平均買入價。

龔成老師：

你思維錯左，唔好比「過往平均買入價」限制左自己，你要分析，現時我手上有一筆資金，怎樣會對長遠財富有最大回報。

當然，要同時考慮整個組合的配置、現金，持貨比例。

------------------------------------------------

Q21548：

Sir 我見很多收息股股價上落不多，但成交很多，是甚麼原因？

龔成老師：

因為市場對佢合理價的定義較為一致，沒有大大的分歧。

投資者認為企業價值好接近，例如$100億-$105億，如果市值上到$106億，就會有好多投資者認為貴，因而賣出，令股價下跌，所以股價不會太超過一定的範圍。

相反，如果一隻股票股價上落大，代表市場對這企業的睇法及分歧好大。

至於成交大，代表買賣好多，不一定會令股價有好大的變化。

------------------------------------------------

Q21549：

老師，我媽咪成日聽到我講買股票，最近夾硬過咗啲錢俾我，叫我拎去我投資

我會打算將媽咪嘅錢，放落去水桶1-2，買返去我平時睇開嗰啲，可以？

龔成老師：

你媽的風險承受能力，與你並不相同的，你不應投資同你一樣的組合，投資水桶1-2，並不適合佢。

特別是佢對股票無乜認識，當佢面對短期股價波動時，承受壓力的程度與你不一樣。

建議你幫佢投資水桶3類別的股票，再加上水桶2，會較適合佢。

------------------------------------------------

Q21550：

龔sir,你好！我是一個90後雖然我不是你的學生，但我都有留意你出嘅書，也同意你書中大部份的內容！

其實我今次信息你係希望你可以講下一個大部份有錢人都會做的事情「捐款」！

我相信你在成名之前也做了不少的善事導致有今天的你！

例如用自己嘅時間真心去回覆別人嘅問題.....，希望你來緊會出一條影片去陳述關於捐款對自己變得更富有嘅影響！因為我相信普通人變成有錢人離不開第一個步驟，就是幫助別人或捐款！好多謝你去留意我嘅信息！

龔成老師：

我睇左好多成功人士、有錢人的書，佢地都會貢獻社會，而我都在這樣做，原來佢地好明白一個社會法則。

就是你要「先給予社會，你才會得到」，如果我地想有更多財富，更加成功，就要先貢獻更多給社會，這是成功人士、有錢人、我，都明白的。

這個世界好神奇，你貢獻愈多，得到的就愈多，這樣的情況我已經歷了好多。

另外，當我地擁有了一定的資源，自己根本用唔晒，就應該還翻比社會，因為所有資源都是大家的，只是有時我地憑努力分多左少少，而比翻多d社會都是很正常的事。

------------------------------------------------

Q21551：

龔老師：你好,本人有一些股票問題想請教！本人在較早前以$1.64買入1569（民生教育）及以$1 .3買入2233（西部水泥）,2隻股票都有5萬股

而西部水泥過往3年的派息都不錯,但民生教育則比較小,我明白教育股是需要保留資金的道理,故此請問上述2隻股票可否長期持有？

另外本人已55歲,有50萬現金,我想分配到2（中電）、2800（盈富基金）及2822（南方A50),可以嗎？
多謝龔老師提供資料,感激！

龔成老師：

民生教育（1569）主要於中國提供民辦高等學歷教育，包括本科學歷教育及大專教育。該等學校為重慶人文科技學院、重慶工商大學派斯學院、重慶應用技術職業學院及內蒙古豐州職業學院（青城分院）。

過往的業務都有發展的，盈利整體有增長，不過就有少少波動。

企業長遠的發展力屬中等，現時股價合理，預期企業能平穩增長，但預期不是高增長類別。

你有貨可持有的。

西部水泥（2233）主要在中國陝西省從事水泥生產，以「堯柏」及「堯柏水泥」商標銷售，主要用於建設高速公路、橋樑、鐵路及道路等基建項目以及住宅樓宇。

業務不過不失，雖然都有d質素，但不算好強，產品價格自主能力不高，賺錢能力不算強。

比較吸引的是現價唔貴，但長遠對佢增長就唔好有太大期望，可以視為收息股。這類股唔建議太大注投資。

其實兩隻都可以持有，不過，以質素及增長力來說，都不值得持有太多。

至於你資金，可以分配到盈富（2800）、南方A50（2822）、中電（0002），建議加時加入少少收息股，例如香港電訊（6823）、置富（0778），組合會更加平衡。

當然，財富組合都要有一定的現金在手。

------------------------------------------------

Q21552：

請問老師2158現價可入嗎？另外，6886($26入）和2623($0.55入）都是持有很多年，一直都沒有止蝕，這二隻還有希望嗎？

龔成老師：

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

之前貴，現價算是略貴，最好回翻多D先考慮。

ＨＴＳＣ（6886）以「華泰證券股份有限公司」於國內開展業務，佢主要為個人、機構和企業客戶提供的金融服務：

（１）經紀及財富管理業務
（２）投資銀行業務
（３）資產管理業務
（４）投資及交易業務
（５）海外業務

其實業務都不差的，但增長力就唔算強，現價合理。由於你買入價貴，而這股增長力不強，要上翻去不易，你或者見有較大反彈都可以減持，轉其他對組合長遠增長力較好。

愛德新能源（2623）業務波動，之前年年虧損，近期先好翻少少，是高風險類股，這股長線投資的價值，唔高。賣出較好。

------------------------------------------------

Q21553：

龔老師，我手上有
1211, 2手$270
968, 3手$18.5
2820, 8手$145

你覺得呢幾隻股發展潛力如何？我應繼續中線持有，唔好理中間波動？謝謝

龔成老師：

1211買入價貴，但有潛力，你持有就得，不過要耐心D，同時唔好心急加注。

信義光能（0968）本質不差，業務保持有一定的增長力，股本回報率處高水平，加上現金流強勁，是有一定質素，可長線投資的股票。

現價合理區頂。你買入價略貴，不過有得守，只要不持貨過量就得。

ＧＸ中國生科（2820）有潛力，但現價仍貴，你可長線，但唔好再心急加注。

------------------------------------------------

Q21554：

龔sir，想請問下第5課計港交所合理價時，每股盈利你用最近5年，但PE就用10年內的4年，點解PE唔可以同樣拎最近5年？

我諗法係PE係嚟自除以EPS，咁EPS同PE所選取的年份如果唔對應會唔會有問題，同點解冇問題，謝謝你

龔成老師：

因為計算每股盈利時，我地其實是考慮「有代表性的每股盈利」，因此，並不一定用5年平均，這只是一個較簡單的方法，最正統的方法是自行推算。

所以，當用5年數據時，只是找一個較近現時有代表盈利的數去計算，是否5年並不是重點。

至於市盈率，則是運用能反映企業與市場關係的數目，如果10年的大環境無變，就會用10年，但如果大環境改變，就會用較近的年份，其實這都是無絕對的答案。

------------------------------------------------

Q21555：

最近經朋友介紹瀏覽你的網站，十分欣賞你正面的信息。有心真的不怕遲，只要努力，必定可以慢慢達成理想。

我40歲左右，之前因生活問題，放棄了讀博士（這是我一直的夢想)。後來決定以Part Time報讀，終於在2017年畢業。

當初有親友說我不設實際，但完成了自己的夢想，真是很快樂。大家努力~！

龔成老師︰

只要有一個你真正重視的「夢想」，就算再困難，幾無人支持你都好。只要你個「夢想」對你夠重要，你都一定會諗到方法去完成。

當你現在成功完成這個「夢想」，代表你人生又行前了一步，恭喜你。

在完成這個「夢想」之後，我地又係時候要好好規劃之後的人生目標。

好好思考如何去「經營未來的人生」，給自己一個獨處時間，好好想清楚自己的下一個夢想、目標，是什麼。

當你有方向後，你要將自己放到一個「適合你成長的環境」，努力去「成長」，提高自己能力，向下一個新目標和夢想進發。

------------------------------------------------

Q21556：

龔老師，你好，想請教下，N年前十幾年前的買了隻1191,成本12.8，一直跌。

現在一蚊都冇，唔知點，放左單咩都冇，同所淨冇幾。會否升返嗎？由佢放係度？

謝謝老師

龔成老師︰

我地是否持一隻股票，唔係睇佢個股價，而係睇佢有無質素。如果無質素，就算而一刻蝕多少，都應該要沽。

中國中石控股(1191)主要於中國從事物業發展業務，以及金融服務。

這企業規模好細，而且營業額都唔高。睇佢過去多年出現虧損。

加上2019年核數師意見是「不表示意見」，代表盤數有機會係有問題，對這類企業我會好有戒心。

現時由於佢2020年年度業績審核未完成，所以公司暫時停牌，因此你現時係無野可以做到。

此股唔見有明顯的投資價值，到佢復牌後，建議沽出。如果你持貨較多，可以每有出現反彈，就分批沽出。

------------------------------------------------

Q21557：

老師有啲嘢想問你，1858 春立 至從骨科集採，成本下降，而且由高位下跌66%時候已入貨(成本$19）

想問下呢隻值得我作為倍升股持有嗎？

龔成老師︰

集團毛利率由2019年的69.38%上升到2020年的72.60%，主要由於採購議價能力加強和公司量產導致固定成本相對下降所致。

這是一個正面的訊息，但我地分析企業，唔好只睇1,2年情況，而從長線去做考量。

春立醫療（1858）長遠有發展的。

佢主要從事以自有品牌「春立」研發及產銷植入性骨科醫療器械，產品包括：

（１）標準關節假體產品：主要包括髖關節假體產品及膝關節假體產品，用於治療骨關節炎、類風濕性關節炎
及其他疾病。

（２）定制關節假體產品：分為傳統定制關節假體產品及組配式定制關節假體產品，主要用於治療關節骨折及
其他原因所致的關節損傷或骨缺損。

（３）脊柱產品：包括頸椎前後路固定系統、胸椎固定系統及腰椎固定系統，產品適用於退化性疾病、脊柱疾病、畸形、骨折及其他病理原因所致的背痛。

佢係關節醫療器械技術有一定經驗，受惠於未來人口老化對醫療用品需求、醫療器械納入醫療保障等因素下，此股有佢架投資價值。

集團盈利由2015年4000萬，升至2020年2.8億，升近數倍。但主要升幅來自2019年，所以盈利增長唔算係平穏。

現時股價比之前合理翻D，但仍未算平。

此股都有倍升機會，但質素上，未算係最高個類。而且都有一定不確定性，不宜持有過多。若佢只佔你組合小注，你長線持有就可以。

------------------------------------------------

Q21558：

龔sir, 你好...我現在33歲, 有兩個小朋友, 大的5歲, 細的1歲, 目標係草到個首期上左車先。

由於之前都係短炒為主, 真係損手爛腳, 剛好早排有朋友推薦我看你旳facebook, 所以才開始接觸月供股。

有幾個問題唔係好明﹐想問問你,希望你百忙之中抽小小時間回覆...

1. 月供股意思:假設我月供金沙, 每月供$3000, 以而家1手股價係1萬4左右, 咁即係供4-5個月左右才入到一手, 係米咁意思...

2. 金沙而家呢個價位可入嗎?

3. 假如我每月投放$8000, 想月供2-4 隻, 有推介嗎?

龔成老師︰

短炒根本是無法賺錢，我之前做銀行、證券行多年，見證大量客短炒全部都蝕錢，只有長線才能有錢賺。所以，往後不要再用短炒這模式去投資了。

1) 簡單來說，月供股票就是你每月將現金，買入某一隻或多隻股票，慢慢咁樣儲貨。

形式就是每月投入相同的金額，買入同一隻或多隻股票，並持續進行。

以你例子，每月用相同金額$3,000 買入金沙（1928），假設第一個月股價為$30，就能買入100股；第二個月升至$35，就能買入85股；第三個月跌回$25，就能買入120股。

總結這三個月，投入了的資金為$9,000，累積股票為305股，平均買入價為$29.5。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

當於初學者或者不懂定平貴的投資者，月供可以令佢地買貴貨風險，得以大大減低。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3年以上，之後持有5年以上。

月供最重要的一點，是「選股」，如果你無選股能力，就投資ETF，如盈富(2800)。

2) 金沙（1928）有質素的，有長線投資價值，收息不差，同時有平穩增長力，但不是高增長類。

現價合理，可分注入貨，或月供都可以。

3) 以你33歲，可以選擇一些「平穩增值股」+「潛力股」作投資目標。

以現時大市合理區狀況，你可以考慮用部份儲蓄，進行月供股票。如果每月能儲到的現金為$8000，你可以每月先用$4000儲蓄，另外$4000就先儲起架策略。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，我建議你先集中在平穩增長類股，至於潛力股，只宜小小注(少於3成)。此期間，你最好是努力提高投資知識，才慢慢增加翻潛力股比例(最多5成)。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q21559：

想問下1800 中國交通建設 點解高息, 低淨值, 低市盈率, 高現金流, 有增長, 都可以跌足4年?

市值 (港元) 165.693 億
市場價值指標 (最新)
年度 (貨幣) 2020/12 - 末期 (人民幣)
每股盈利 (人民幣) 92.000 仙
每股派息 (人民幣) 18.088 仙
派息比率 (%) 19.661%
每股現金流 ($) 0.857
每股淨資產值 (人民幣) 15.160 元
市場價值指標 (全年)
市盈率 (倍) 3.4
周息率 (%) 5.712
股價/每股淨資產值 (倍) 0.206

龔成老師︰

你都講都佢一些正面的財務因素，但我地唔會單憑個別年份的指標，去評斷佢投資價值。

我地要好全面，去睇佢過往多年數據變化，企業本身質素和行業發展狀況等，去得出一個綜合性結論。

中國交通建設（1800）本身不是無質素，但又未去到好好，算是中等類別，但增長力不強。市場會擔心企業的可持續發展，擔心生意無過往咁好。

過去幾年收入的確維持增長，但你再仔細去睇佢財務數據。

你會發現，多年收入維持增長的同時，盈利整體係出現倒退的情況，反映佢賺錢能力係弱左。

而且佢本身負債高是扣分的地方，因此估值不會高(所以PE一直偏低，反映出市場對佢評價較一般。)，股價都反映了相關風險。

此股現價算是合理，分注投資都可，但就未必適合太大注。

------------------------------------------------

Q21560：

你好龔sir，本人28歲，投資新手

想請教你對0311 聯泰控股和恒生simplyfund 基金的睇法。

謝謝

龔成老師︰

聯泰控股(0311)主要從事成衣及其飾配件的生產和貿易業務。

此企業規模唔大，盈利都唔算高。賺錢能力唔強，加上有一定負債，都係扣方地方。

現價算係合理區頂，可投資。但由於質素只係一般，而且過往股價都好波動，只宜好小注投資。

至於恒生simplyfund，係一個可提供多種不同基金的投資平台。

你可以衡量翻恆生所提供之基金的投資策略，所投資的資產類別、投資策略、風險程度、市場、費用成本以及過往的表現(可以睇佢過往5-10年，如果回報係比主要投資市場高，你可以考慮投資)。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21221-Q21240）

Q21221：

老師，我聽咗你的選優質股和為何不賣出優質股覺好有道理。多謝你咁好的片，以下請假你幾個問題：

1）優質股會否因時因市而異？宜家個個都話唔好選新經濟股，但如騰信，巴巴，京東，小米（都持有）百度
，b站（目標股等待中）等我始終認為係優質股（我錯咗高追快手所以唔買，美團雖佢好但太貴）

2）最好的組合應集中買賣幾多隻優質股？定都要唔同行業優質股去平衡？

3）快手有排都未到家鄉令我反省覺以後應集中少隻優質股（80%想全買700），我是否錯？

4）我諗住係選優質中的優質，咁騰信應該係優中之優，你的優中之優係邊幾隻？

5）我之前670入過700賺唔多放咗跟住等到630再入，假期最後一日654我無放

見你答FB答話唔好放如果630買，但好多都話個市仲有機會跌，我矛盾中：覺你話唔好放啱，但又諗當日670入賺10唔放我入唔到630，我諗住短期若有機會去到660-680就放，定你都係建議我唔放嗎？

6）我205入咗比亞迪，太多信息話仲會跌（26000），我應放定唔理照長期持有？

感覺有時睇太多財經跟住個個都話會跌（之前話好多次跌真的跌），我唔理先會失手放買快手（分幾注買都係貴）

所以好矛盾（我個人都覺會再跌尤其疫情反覆，身邊見到好多行業都好差）

7）我52入咗中移動我會長揸
若跌穿50應再加注定幾多錢再加？

8）我唔會奢望3百萬變一千萬，我只要本金有一半的回報已好感恩，但感覺真的唔易，不過會努力，你要我地自己選優質股係好啱，因授人而漁，我設388@410-430入唔到因佢一跌標升，你現在建議388的買入價是多少？

9）你對來緊一個月的股市點睇？會跌至27000定會升至29000以上？

我見你叫人忍手，是否你都唔睇好後市嗎（第二季）？

龔成老師︰

1） 我地最主要都係睇企業本身質素，去確定是否一隻優質股。之後，再利用平貴，去定一個買賣策略。

現時有不少新經濟股，出現輕微過熱架情況。但唔係代表佢地無質素，唔值得買﹕只係用現時價值買入，個風險會太高，再等佢回調會較好。

我地只會係合理至平宜水平入貨，或者利用月供去儲貨。就算再好的股票，都唔好係貴價時高追，咁係好危險。

2） 一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你預大約8-10隻左右，會較理想。

3） 就算質素再好，都不要過份集中，因為咁個風險反而大左。因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

4） 金沙（1928）、港鐵（0066）、比亞迪（1211）、中生（1177）、福壽園（1448）、小米（1810）等，都係一些有質素架股票。

但除了質素，我地都要考慮佢現價，到底有無值博率。好似比亞迪（1211）好有潛力和質素，但現價太貴，我地都唔會去入貨。

5） 你依然停留左係"賺差價"架思維，我地投資增值，係透過長線增有一些優質企業，去等佢自然咁升值，而唔係炒炒賣賣。

所以，只要係優質，你長線持有就可以。你見我比亞迪（1211）買左咁多年，中間升升跌，我都無賣過，現在才可以享受數倍升值的效果。

同埋，你唔好諗住自已估到個市點走。如果佢唔係好似你預期咁賣完，之後跌翻比你入，反而大升，你就會進退失據。

6） 你比亞迪（1211）個買入價係貴左，但由於佢好優質，你長線持有就可以，但現價唔好再加注。

記住，睇財經新聞，我地睇下個客觀資訊，唔係意見。

7） 中移動（0941）都有質素，但佢主要係收下息，如果你未近退休之年，唔建議持有太多。

至於再跌是否加注，就睇翻你本身預算投資此股的資金，是否已經用盡。如已用盡，就算再平也不要加注，否則只會增加風險。

如尚有資金，可每跌10-15%就加1注。

8） 其實只要你學習一套正確財富增值方法，再比些耐性，要令資產倍升，唔係話咁難做到。

港交所（0388）現價略貴，你預回多1,2成才算較合理。

9） 中短期股市走勢，我唔知道。我只係從大市水平和個別股票平貴，去定投資策略。

現時不少新經濟股，都有過熱情況，暫時不宜投資住。至於舊經濟股，普遍價格都合理，依然有投資價值。

------------------------------------------------

Q21222：

sir,可唔可以比D意見, thanks a lot!
（學員附上了6919的分析練習，但不便登出）

Sir,我有3隻蟹貨,都keep左3年,覺得唔係幾睇到未來既增長力,覺得食之無味棄力可惜

371 4.44@12000
698 0.84@40,000
315 6.44@14500
788 1.73@18,000

我覺得依幾隻質素都唔差,但睇唔到個增長力,每次出完業績就想等派息,派完息就想等業績希望有轉機,,明明其他資金買增長股回報都唔錯

但下唔到決心沽貨,從來未試過蝕錢沽貨,我係咪應該咁做,可唔可以比D意見我,THANKS!

龔成老師︰

你分析人瑞人才（6919）的練習，睇得出你花了一定的時間去進行研究，同時都有心機做的，基本資料方面無問題，至於評分方面，你的答案大致正確，你給了15分，我相信這個數與這企業優質度接近，相信你大致掌握了該評估表的指標方向。

至於你在SWOT分析，你可以寫更多（雖然評估表該格位不是很大，但你可以自行寫更多），你只簡單寫定位清、效率高，其實可以延伸這更多，佢怎樣效率高，這因素如果幫到這企業將來發展。

至於評估表第5頁，你表示負面因素是行業競爭加劇，其實可以再延伸寫更多，如果這情況發展，是否會對佢賺錢能力有所影響，你表示佢最終因經營本低而勝出，這是否佢最終能站得住腳但賺錢能力會減，到時如果真的行業競受加大，佢盈利會否減少，這企業怎樣保持現時的賺錢能力？

至於企業估值方面，你計算出的企業價值都大致正確。

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

現價算係合理區頂部，此股係可以投資，但不宜太大注。

其實整份評估表，你都做得不錯，運用得很好。你要大量這樣分析企業，實力才會大幅提高，我自己多年來，都是不斷分析企業、分析企業，去提高實力，同時以「分析好多，投資好少數企業」去提高投資準繩度。

至於你這些持股，是否沽出換碼，你要從投資回報角度去考慮。如果換至其他優質股，長線有明顯較理想的增長，我地就應該行動。

北控水務集團（0371）和數碼通電訊(0315)都有質素，但你預佢主要係收息，唔會有太明顯增長力。

通達集團（0698），算是不過不失。但就唔值得持有太多，始終質素唔算好高。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股長遠仍算有發展力，可長線。不過，潛力度比過往略減。

你可以睇翻自己年紀、持股比重和風險承受力，去決定是否減持。

------------------------------------------------

Q21223：

龔sir.您好我今年40歲，以前有跟家人投資新股（白表）如下：

招行 1,000
領展 2,000
工商 2,000

中行 2,000
中鐵建 500
中鐵 2,000

因為自己唔識炒，輸多贏少，最後儲蓄都係做定期多，不過近期連一厘都無，跑輸比通漲。

現在收入二萬多，供養兩位已退休家人，住私樓（唔洗供）。

手持五百萬現金，應該點開始建立資產組合？

龔成老師︰

我地投資股票，係希望買入一些優質企業，透過佢自然增長，達至財富增值目的，絕對唔係"短炒"。

而定期這類方法，在財富增值上，効果都唔高，不建議你用。

只要選股和買入策略正確，並長線持有，就會有唔錯架財富增值效果。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你40歲，建議你用「平穏增長股」 + 「潛力股」的組合，當中以「平穏增長股」為主。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

現時大市只是合理區，你現有500萬資金，可先扣起等同半年開支的應急錢。

餘下部份，可以先投入一半，用"分注"形式，慢慢買貨。另一半就等大市出現一定程度的下跌，才大力度掃貨，然後長線投資。

不過，你投資經驗與知識不足，加上過往投資虧損較多，我會建議你先集中「平穩增長股」，而「潛力股」，只能小注，等你有較多知識後先加大投資潛力股。

同時，買入時要慢慢分注，或用月供作策略。

暫時只建議你動用$50萬-$100萬，到你有一定知識、經驗後，先慢慢去到約$250萬作投資。

------------------------------------------------

Q21224：

你好, 本人38歲, 已婚有一個3歲小朋友
手頭現金約100萬, 而家同老公屋企人一齊住

想盡快買樓…..但兩公婆月搵4萬蚊, 問過銀行按揭只借到400萬, 要再儲多D首期先有望
上車, 現每月可儲萬五蚊

1. 點先可以滾儲到多d資金

2. 投資新手, 之前都係抽下新股咁

3. 岩岩睇多左你既FB, 想4月開始月供三千2800, 請問是否OK?

4. 知道買私人樓保值/升值潛力高D, 但budget有限, 買居屋自住係咪都OK

5. 我地住將軍澳區, 因想屋企人幫手睇小朋友,想搵番同區,但而家樓價越升越有, 真係追唔係幾到, 係咪應該搵遠d地方住呢

另現有股票組合約27萬如下, 請問有沒有重複??否需要調整

0005,1600股, 平均買入價49
0175, 1000股, 平均買入價33
1177, 3000股, 平均買入價7.63
1299, 400股, 平均買入價200股抽新股中, 200股96.5
1810, 800股, 平均買入價22.7
2388, 500股, 平均買入價15
9988, 100股, 平均買入價229.6

感謝!

龔成老師︰

1） 如果你打算1、2年內買樓，就建議留較多現金。

但若果你不打算太快買樓，就可以先利用投資，滾存更多資金先。

由於你係新手，我建議你先用月供模式，去投資一些有增長的優質股，以達至財富增值目的。

2） 抽新股係可以，但你要明白我地分析新上市企業合理價和質素時，除了了解行業發展、佢本身業務狀況外，都要參考過往財務數據。

但新股都唔會有太多這方面的可靠資訊，令成個分析唔完整。所以我地係投資新股時，就算覺得佢基本面再好好，我地都要比較保守，唔可以太取，去平衡翻參考數據不足這個風險。

3） 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你38歲計，應用「平穏增長股」 + 「潛力股」的組合。我建議你用每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）、ＧＸ中國電車基金（2845）。

由於你係新手，未有選潛力股的能力，也未必能掌握投資時機的能力。你可以簡單地先集中投資係盈富基金（2800）。到你有經驗，才選其他我建議架股票。

至於現有100萬，可先用30萬，分注咁入盈富。餘下現金和每月儲蓄，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

4） 私人樓一般情況，升值潛力都較高。但從自住角度，居屋都係有佢吸引之處。當你資金不多，而目的又係自住，居屋其實都可以考慮。

5） 除非你有迫切性要搬離現有居所，否則，你應先利用優質股增值，去先增值一筆財富。另一邊，再慢慢物悉價格較合理物業，咁會較好。

另外，其實將軍澳區已經是全香港，相對唔太貴的地區，所以日後其實唔太建議你轉其他區。

因為你手上資金不多，勉強買入單位，都會令你供款好吃力。而且，買物業後，我地都應該同時留有一定股票去做增值。所以，現時未必係咁適合。

建議你如果有較長時間，先用優質股累積起一筆財富，再慢慢換屋，會較理想。

至於現有持股，都適合你。除了匯控（0005），佢主要係收下息，唔會有太大增長力，不宜持有太多。

------------------------------------------------

Q21225：

龔sir你好，因為留意你啲post開始有買少少股收息，你嘅分析同意見都好實用！

想請教你以下情況，我應該如何理財，同埋有咩理財組員較適合我

本人28歲，
月入24k，
每月儲蓄大概15k-17k，
銀行現金20萬。

唔識理財，睇完你嘅分析先識買股票收息。多謝你嘅無私分享！！！

我個倉有:
0011一手@154.2
0006一手@45.9
1972一手@23.5

現金20萬中應該用幾多錢做投資？

另外如有每月月供股票應該每月供幾多較好，同埋哪一隻股適合？

目標期望5年內儲人生第一個一百萬，同埋一直想置業，但當有一百萬個時肯定樓價升到唔夠錢買樓。

仲有一個目標就係一直都好想創業，有好多想法，但好怕蝕哂d錢，所以一直遲遲未行岀第一步

我嘅目標係創業初期賺到嘅錢一部分捐岀去比有需要嘅人，我知失業率高企，好多人飯都無得食，有能力就要幫多啲人，平時每月都會買拉車仔買乾糧捐去食物銀行

所以如果創業我希望可以賺到更多錢，同時可以利用我嘅部分盈利再去幫人。感謝龔sir

龔成老師︰

你的想法很好，有能力時，我地係應該盡力回饋社會，這才有意義。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

以你28歲，可以選擇一些「平穩增值股」+「潛力股」作投資目標。現有持股都合適，但電能（0006）增長力唔高，只係收下息，長線唔好入太多。

以現時大市合理區狀況，月供最好用一半每月儲蓄，另一半就先儲起架策略。

由於潛力股要求你有一定的投資知識，因此這刻不用急著投資，你可以集中在平穩增值股先。

每月用$7000去月供盈富（2800），餘下就儲起，等大跌市機會。其餘合適股票，到你對佢地有一定了解，才從中選股。

平穏增長股：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建（1038）

潛力股：安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、ＧＸ中國電車基金（2845），但就要明白波動性比上述會高左，同時風險大左，你要自己平衡。

由於你投資知識不高，因此可較集中在平穩增長類股，至於潛力股，只宜小小注，最好是你提高投資知識，等你有一定知識，先慢慢增加翻潛力股比例。

現時大市處合理區，20萬資金，可先用7,8萬，分注咁慢慢盈富及其他平穩增長股。

餘下現金就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

當你累積到一定資金，就可以入市買樓。若此刻資金不多，可先從小物業入手，再慢慢換成大物業。（詳細做法，你可以睇我本<5年買樓4步曲>）

至於創業，你可以從你的興趣、強項、認識的事著手。

例如你本身對某類產品很有興趣，你會在那裡買？如果你在網上買這產品，這個網站的模式如何？

初期投入唔一定要多，可以用網店模式、網上買賣這些低成本模式著手。一邊做正職，一邊創業咁試都可以。最重要係行出第一步，因為未行過，你係唔會知乜野情況。

你最初要有學習的對象，你先尋找一些自己認為不錯的商店，了解一下佢地的商業模式，最始好大型及小型都有，先以小型作學習對象，然後就試下佢地的模式，能否成為你創業的方向。

記住，最好唔好做得太雜，要專注在某一範疇，等人容易記得你。

------------------------------------------------

Q21226：

龔Sir，想請教一下。

1. 522同981有潛力嗎？可以作月供選擇嗎？如可以，那一隻比較好？

2. 另外，聽你講過3067係供股好選擇，請問現價合理嗎？

龔成老師︰

1） ASM PACIFIC（0522）有質素。

佢係半導體和發光二極管行業的集成和封裝設備供應商，為跨國芯片製造商，為獨立集成電路（ＩＣ）裝配工廠和消費電子產品製造提供半導管裝配設備及材料。

過往的生意與盈利都有增長，不過盈利有點波動，這都會令股價略有波動。長遠有一定的發展，可長線投資。現價合理區頂位，如分注小注或月供，仍可以。

而中芯國際（0981）業務有增長力，但未必能稱為好優質的股。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。

加上此股近年升了不少，就算有所回落都唔算平，加上之前熱炒過，股價大上大落，投資要注意風險。這股唔建議大注，也不建議用作月供選項。

2） 安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

------------------------------------------------

Q21227：

龔sir你好。我又忍不住在反思自己的組合了，希望你能給些意見！

問題1：我現在計劃的組合比例ok嗎？（我19歲）

問題2：現在的組合內，所有都有持股，除了小米。最近見你話小米波動性大咗
（因開發電動車），我應仍選擇它嗎？（如不應該，組合比例亦會考慮調整）

我月供的金額分配ok嗎？（每月有$17000能放入股票市場）

問題3：我另外還有些以前買咗，但現在不太想加入做我的組合的股票。你覺得我對這幾隻股票的處理正確嗎？（特別是9988）

現在計劃的組合：
科技 （700, 1810） —— 22%
安碩科技 （3067） —— 30%
醫療 （1833） —— 8%
舊經濟潛力 （388） ——5%
平穩 （66, 823） —— 10%
盈富 （2800） —— 25%

一手手買股票
- 騰訊 （when drop to $520）
- 平安好醫生
- 領展
- 小米

月供股票 （至少供3年持有5年）
- 港鐵 （1k）
- 港交所 （1k）
- 騰訊 （2k）
- 盈富 （2k）
- 安碩科技指數 （每個月買1手）

組合外現持有的股票：

打算就咁擺喺到：
11恒生1手@124
12恒基162股@30.92 （放棄了月供因增值較其他慢，好似我大個啲再買翻好啲）

等賣：
883中海油1手@6.7
9988阿里巴巴2手@272 （知道有質素的，但我現在好像已有不少科技股，而個人對這股
有些失去信心） （但如果不要小米，應保留？）

謝謝你的無私幫助

龔成老師︰

1） 19歲係一個好年青架年紀，正值財富增值的黃金時期，策略上可以相對進取些。

你現時月供組合，無問題。其實恆基（0012）仍是有質素，當然增長力減少左，預期佢中短期都是弱，不過，這股是睇長線及超長線的。

如果你將來有資金多，都可以考慮月供翻佢。至於恆基（0012）和恆生（0011）現貨，可持有。

但你現有持股，有少少偏重左係潛力股，令個組合波動性略高。以你年紀，唔好超過6成。

2） 小米（1810）由新能車發展有一定不確定，故你要預佢波動性大左，但整體質素係有，你照持有係無問題。

你現時月供金額和選股，都無問題。

3） 這些股票都係有質素（包括0011, 0012, 0883,9988），唔建議你沽出，照長線持有就可以。

但留意中海油（0883）只係商品類，價格自主性低，質素只算中等，不宜再加注。

------------------------------------------------

Q21228：

龔sir，你好，本人今年46 歲，有現金 $200,000，想買公用股作長線增值投資和收息用途。
目標有：

中電（0002），煤氣 （0003），電能（0006）
請問那一隻較適合我？

龔成老師︰

若果以收息角度，中電（0002）和電能（0006）會較好。

但我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你現時才46歲，都應該作一定程度上的財富增值，而唔係純收息。我建議你用「平穏增長股」，去創造一個增值平台。

現時大市只在合理區，你20萬可先用一半，分注咁慢慢儲貨。餘下一半，就等大市有明顯回調，才再出手。

------------------------------------------------

Q21229：

成老師你好呀，我現年22歲，月入21k，我學習價值投資開始了大約9月開始月供11k股票

直至現時，月供包括（均價）2800（$26.9）,0066（$41.9）,0002（$73.1）,0027（$60.1）,2013（$13.5）,0981（$21.2）,9988（$237.4），另外曾一手買入9988（$227.8）一手，0981（$20.2）一手，0823（$58.4），一手。

1.我想問一問我的投資組合風險會唔會唔太適合我這個年齡？

2.這個月供組合會唔會太保守是否需要作出轉換？

3.是否需要加大月供額？

4.我亦有儲現金作一手低位買入，如果需要買會唔會有一些建議？

我亦想好好把握黃金10年做好投資將現金轉換成資產。
謝回覆

龔成老師︰

1） 以你22歲計，係財富增值的黃金時期，可以承受較高風險。

你月供組合中的股票，大部份都有質素。但中芯國際（0981）業務有增長力，質素都有，但未必稱得上最高質。

睇翻佢過往的業務情況，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為最優質的股票。故此股作月供，就不太適合，或最多小注月供好了。

微盟集團（2013）財務數據的增長都強勁，但波動性較高，唔建議用來月供。

但這2隻股票現貨，你照持有就可以。

2） 我不清楚你月供供款比重，故難言是否太保守。但從選股上看，都可以。你22歲，建議你用「平穏增長股」 + 「潛力股」作組合，比例約各一半。

以下都是一些適合你月供的股票，你可以用來加入。

平穏增長股︰盈富（2800）、銀娛（0027）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）、ＧＸ中國電車基金（2845）。

現時大市只在合理區，每月資金唔好盡用。最好留有部份，等大跌市出現時，可以用來掃貨。

3） 最好將可以動用的閒錢，都用來投資。因為你年紀，越做累積財富，個複利效果會越理想。

4） 現時大市在合理水平，現金和股票最好各佔一半。若果你現金唔多，可以先等大跌市出現，才出手。

至於投資目標，就係我2）中所講的股票。到時你可以因應自已持股情況和股價平貴，去用現金掃入這些優質股，並長線持有。

------------------------------------------------

Q21230：

老師你好，一直以來我都係對股票投資既概念都係半桶水，直至幾年前開始睇你既書，睇你係網絡

上分享你既心得同知識，慢慢學識投資係應該長線同睇企業既價值，亦都因為你，比亞迪

令我賺咗人生第一桶金，所以好想多謝你令我感受到賺錢原來咁開心，我來緊想抽居屋

同老公買樓，但係我唔知道應該點樣分配，所以想請教老師既意見

我現在持有268金鍱，9988阿里巴巴同3067，大約總供有二十萬

現金二十萬，每月可儲蓄15000，我應該月供股票令資產增值，還是應該儲蓄現金作為首期，我想兩至三年之間可以

賺多少少，幫補買樓，希望老師能夠指點一下，謝謝老師

龔成老師︰

比亞迪（1211）係有質素，雖然股價已升了不少。但由於佢有潛力和質素，最理想係繼續長線持有。

我建議你先用股票增值，但2至3年唔算係一個長架時間，增值時要保守些。

現有持股可持有，但由於佢地波動性略高，唔建議再加注住。未來以平穏增長股作為目標，去創造一個組合。

你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、長建（1038）、領展（0823）、希慎（0014）、太古地產（1972）

大市現處於合理水平，20萬資金和每月儲蓄，就等大跌市機會出現，才出手掃貨。

------------------------------------------------

Q21231：

大佬，我依家股票組合係咁

Stock 5, $46.3, 14000股
Stock 386, $6, 4000股
Stock 737, $3.95, 10000股
Stock 941, $74.75, 1000股
Stock 1789, $12.77, 4000股

Stock 1810, $31.75, 2000股
Stock 2333, $27.65, 2000股
Stock 2638, $6.84, 5000股
Stock 2800, $26.5, 5000股

我想問再整合一下。有冇咩股票會放左佢會好d ?

龔成老師︰

從質素上計，這些股票都係優質，可以長線持有。

但我地財富組合，除了係優質股外，都要因應自已年紀，去做相應的配置。

我地會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你現時這個組合，主要收息股為主，係偏向保守。若你係中年或接近退休的人士，這個組合都可以。

但當中有個較大問題，就係成個組合偏重左係匯控（0005），佢佔組合近一半。緊記，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於3成，而單一企業不要高過15%。

建議你，慢慢沽出部份，換碼至以下股票，去令組合回復平衡。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安（2318）。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金（3110），都可以。

------------------------------------------------

Q21232：

龔sir: 早前$15入咗3手藍月亮6993，之後係咁跌，買入的時候冇考慮市盈太貴，依家又冇咩息收，呢隻可
繼續持有？還是溝多兩手平倉就沽？

龔成老師︰

首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

另外，我地決定加注與否，要睇幾個因素，記住，並不是「拉低平均買入價」為目的。

第一，要分析這股的質素，如果無質素，就再跌都唔加。

第二，這股的類別，如潛力或增長或收息類等，是否與你的財富組合匹配，比例是否適合。

第三，你要先計算加注後，這股佔你股票組合的比例會否太多，因為同一行業，同一股票。不能佔股票組合的比例太多。

第四，現價是否有投資價值率，要平，或起碼合理，不能貴。

第五，你要在加注後，仍有現金剩。

記住，重點不是「拉低平均價」，而是組合比例與配置。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，唔係加注的時候。但此股有質素，現貨持有係無問題。

------------------------------------------------

Q21233：

成哥
本人38
我現在持有物業自住
每月可儲二萬
用作月供1177 及700
每月6000 供1177
8000 供700
其餘用作儲現金
手頭現金 約二十萬

手上持股
388 @ 451.6 100 股
700 @ 580 100 股
788 @ 1.2 20000 股
1211 @ 228 500 股
2158 @ 61.6 200 股
3067@ 17.83 400 股

6618@ 29.2 100 股 （因高位賣了接低成本）
9618 @330.7 100 股
9988 @ 255.2 300 股
2638 @ 7.2 8000 股
2800 @ 28.5 10000 股
3033 @ 8.3 4000 股
1177 及700 供了幾個月

目檟 ： 希望在十年後 有每月五萬被動收入

1）現在月供出這兩隻 可以嗎？
2）想增加潛力股 有那些值得投資十年後收成的倍升股？
3）現在持倉可以嗎？
4）想再集中儲倍升股 有沒有推介？ 例如 儲1448 及3067 可以嗎？
5）以上做法 能否做到十年後 有被動收入五萬？
6）現在倉位 會否太散？
7）178 好想買 值得現價大量入嗎 大約1.8

龔成老師︰

1） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時持股和月供組合，都係太偏重係潛力股。以你38歲去計，潛力股和平穏增長股最好各佔一半。否則，你個組合架波動性風險會過高。

而且，大市只在合理區，每月儲蓄最好先用一半，另一半儲起去等機會。

2） 以下股票，都係有質素架潛力股，有力可以成為倍升股。

潛力股︰中生（1177）、福壽園（1448）、小米（1810）、港交所（0388）、阿里（9988）、騰訊（0700）、比亞迪（1211）

但大部份現價偏貴，買入前要做好估值。

3） 跟月供組合一樣，偏重左係潛力股類，但情況無咁嚴重。這些股票可以持有，再利用月供和新資金，慢慢修正翻個比例。

若你想投資恆生科技股ETF，我建議用安碩恒生科技（3067），佢費用成本比3033為低。

另外，港燈（2638）係收息股，增長力欠奉，你不宜持有太多。

4） 這兩股都可以的，同時你都可以睇我本<50值博倍升股>，當中會有更多選擇，但要注意組合比重問題。

5） 要做到10年後每月有5萬蚊現金流，以股息率5%計，你需要本金1200萬。

以大市過去年平均回報10%計（連股息再投資），你每月投資$20000再加上你現有資金和持股（約值85萬），10年後大約會增值至600萬。

如果要達至你的財務目標，你要再加大投資力度。可以看看你自已的開支，有沒有一些部份可以調整來增加月供金額。

如果無，你就要從開源著手，轉工（如SALES，一些多勞多得的工作）、找PARTTIME、網上生意等，令你每月可儲資金大幅提升。或者拉長增值年期，以助你達成10年後1200萬的目標。

6） 有少少，長線最好維持8-10隻，咁會較易管理。

7） 莎莎（0178）仍有質素，但佢已經無過往年代般的賺錢能力，同時香港的零售市道有風險，都令這股近年的表現較一般。

這企業本身在行業有一定的地位，賺錢能力不差，但就會受經濟及零售市道影響，令股價較為波動。

其實股票班我都有講這股的估值，在過往10年，自由行較為黃金年代過左，所以從估值上，無之前咁高。

佢在行業的優勢仍在，但整體行業及零售市道，無過往咁強。長遠仍有質素，這刻處合理區，但投資注碼不能太大注，亦要有耐心先有收成。

------------------------------------------------

Q21234：

請問2186 綠葉製藥 $6入左3萬股，請問前景好何？止蝕位？待覆。謝謝

龔成老師︰

綠葉製藥（2186）主要銷售腫瘤科、心血管系統以及消化與代謝三個領域的新藥品，基本上都係有市場的，其實長遠又不是太差，只是市場有時對佢的增長力會有不同。

但近年佢質素的確有少少轉弱，但相信最差時間已過，這股本身的風險較高，唔建議投資得太多。若佢佔你組合比重唔多，可長線持有。

至於止蝕位，我唔會用一個價格來定。

只會在其長線質素出問題，或者個市去到好狂熱，令個價異常地高，我才考慮沽貨。若質素不變，就算中短期出現波動，都需要太在意。

除非你持有貨太多，就建議你在反彈時減少少。

------------------------------------------------

Q21235：

龔Sir，想請教一下，我有10000股中國人壽是賺返嚟的, 我想賣咗佢, 換馬 買比亞迪, 請問你意見如何？

雖然換取比亞迪只係大約800 - 900股, 但前景會更樂觀嗎？

龔成老師︰

這些股票賺翻黎與否，佢始終都係你做財富增值的本錢，我地都要認真對待。

中國人壽（2628）並不是無質素，不過增長力唔強。同埋企業的賺錢能力不及過往年代。

長線持有價值都算有，但暫時唔好對股價有太大期望。你可以考慮沽出部份，換至其他優質股，都係可以。

比亞迪（1211）去年營業額1530億人幣，按年增長26%，而市場一般預期為1400億-$1500億。

至於盈利為$42億，比上年增長1.6倍，不過，這就差過市場平均預期的46億人幣。每股盈利1.47。

其實整個業績，都算同市場相差唔太遠，而我地分析時，最重要是長遠的企業發展。業績初步反映，新能源車的市場仍處增長狀態，動力仍在，不過賺錢能力這刻仍算好強，但當技術進步、市場規模增加、成本控制等因素慢慢出現，賺錢能力進一步提高。

預期佢2021年新能源車銷量，應該能達到40萬至50萬輛的水平，已經能獲得一定的市場佔有率，新能源車仍是增長動力，仍是正面。

反映比亞迪長遠仍是正面，不過我自己在估值上，暫時未有提高，始終這刻市場太著重前景因素，因此，這刻仍是略貴，初步保持我之前對這股的合理價，$120。如果想投資去翻$150先月供會較好。

當然，之後到比亞迪正式有詳細財務數據、年報、附註等資料，會正式重新估值，相信調高的機會有超過一半。

你現貨可長線持有，但想現時將中國人壽（2628）換碼至比亞迪（1211），我就不太建議。

最重要不是睇「賺蝕」，不是睇「買入價」，而是睇質素。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q21236：

成sir，你好。小弟睇了《年報勝經》，書中提及經營現金流-資本開支＝自由現金流。

如果要搵上述資料，是不是在年報中的現金流量表就可以？

我想計算［215］和記電訊的自由現金流，可唔可以麻煩你指教一下。

以上是和記電訊的現金流量表，要計算自由現金流，應該用那一個金額計算呢？麻煩晒成sir。謝謝。

龔成老師：

佢2020年的資本開支，$5.93億

而佢的經營活動現金流，為$12.97億

所以，你只要將$12.97億減去$5.93億，就可以理解為佢的自由現金流。$7.04億。

------------------------------------------------

Q21237：

老師你好，我想請教一下買樓問題。我個portfolio入面己有70%係樓(澳洲投資物業），現已達正現金流狀態，睇個勢仲有機會升，真心唔想賣。

而我依家喺香港跟屋企住，都會想有更多私人空間，但稱不上係有迫切需要。

而我依家買樓唔係唔得，因為我人工穩定而且接近6萬，但要放晒所有股票做首期，就會變成All-in樓市既狀態

所以想請教老師，你認為我應否係香港買層自主樓？定係保持分散風險嘅原則，keep返三成股票？

龔成老師：

澳洲物業如果已有正現金流，同時質素唔差，其實可以持有

由於你這刻在香港，無太大的逼切自位需要，加上你在整個財富配置比例中，已經較集中在物業，因此，暫時你未必要好急在香港買樓。

你可以集中用股票作為投資工具，先將財富增值，到你有自住需要，又或樓市出現較明顯下跌，有明確機會時，才考慮買樓。

其實最好是，當你買樓時，只需賣出部分股票，買樓後仍有一定的現金及股票剩，就最平衡。

------------------------------------------------

Q21238：

龔sir 你好！我有個疑問：一般來講，投資股票越早越好，因為時間越長越有複利效果，而分注/月供就可以減低市場波動的風險。（我理解對嗎？）

但經過上年3月，我之前月供的股票（約供了兩年）帳面蝕咗好多，雖然我明白長線不用擔心，而之後今年年頭都升返啲

但好似輸咗機會成本，因為如果不月供而將儲到嘅錢大跌時入貨會賺多好多。

我知道老師你都沒有月供，而係耐心等機會。

咁其實我應唔應該停月供/分注，儲現金等到個市再大跌至入貨？

但又覺得留現金會蝕通脹及享受不到複利效應。我現在股票現金比例（2:1）（金額都好大下）......
謝謝

龔成老師：

股票愈早買愈好，這個大方向是不變的，當然，只限於優質股，但都要留意，這是講長期的，而中短期會波動，簡單來說，你今年買，會著數過5年後買，但如果以中短期計，只要我地能把握到買入時機，有機會在一年後的買入價比這刻好。

另外，月供是一個長期儲貨的策略，好處是平均了買入價，有效減少一次過在高位買入的風險，但缺點就是，無法一次過捉到低位。

因此，對於投資實力不足的人，利用月供是很好的方法。

但如果本身已有投資實力，能把握投資時機，有企業估值能力，其實不用月供都得，所以我自己都無月供。

而我一般的建議，都是部分資金月供，同時留部分現金，等機會，這是一個較平衡的做法。

你現時現金的比例，都可以的。

------------------------------------------------

Q21239：

龔sir，有幾個問題想問

第一，請問閱讀你12本著作的順序

第二，我已有1百萬流動資產，是否可以不去讀（80後百萬富翁）？

第三，你的二個面授課程，應分別在讀完你那本書的時候報讀？還是讀完你的12本書便無需報讀？

第四，看到你有一網上課程，你的12本書或面授課的內容可完全覆蓋到嗎？讀了你的12本書後是否無需報網課？

第五，我即將38歲，對於我閱讀你的書、面授課、網課的計畫會有建議嗎？

第六，網課會再推出限時優惠嗎？

第七，你的12本書中，相信大部分會是說「心態」、「經驗」，不會過時，但其中3本：50優質、50穩健、50值博，提及的股票會因時間而出現變化，現在或將來才買的話，會否過時呢？

龔成老師：

1）你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的12本書：

《80後百萬富翁》（第9版）
《80後2百萬富翁》（第4版）
《80後3百萬富翁》（第2版）
《財務自由行》（第7版）
《大富翁致富藍圖》（第5版）
《50優質潛力股》（第4版）
《50穩健收息股》（第3版）
《50值博倍升股》（第3版）
《股票勝經》（第3版）
《選股勝經》（第2版）
《年報勝經》（第2版）
《5年買樓4部曲》（第2版）

2）不是，因為書都是教你累積財富，同時無太大順序的。

3）課堂大部分內容，都是無在書講過的，而一些實戰，更具體的投資技巧，都只會有課堂講述。

例如企業估值技巧、5種選股模式、選股程式的具體應用、年報分析的實戰技巧，同時會派一份6頁紙的「企業評估表」給學員，令你可以自行為企業進行有系統的質素評分。

你可以當書只是頭1、2堂的入門部分。

4）網上課程是配合《大富翁致富藍圖》的，你可以理解是書的實戰版。

5）我建議你先睇《80後百萬富翁》、《股票勝經》、《財務自由行》，然後可以上股票班（基礎班），這樣進取最大。

6）暫時都無推出特別優專。

7）《50股》的3本書，你要睇下出版日期，因為久不久會更新的。當中分析股票，因為都是一些大方向，因此無太大變化，但平貴度，你就要留意可能會變。

------------------------------------------------

Q21240：

老師，如果想幫港交所做估值，應該使用甚麼模型比較適合？

龔成老師：

你可以用現金流折現法，以及市盈率估值，如果用市盈率估值，可以用佢過往的市盈率作參考。

其實要深入進行估值，要考慮企業長遠的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20841-Q20860）

Q20841：

老師你好，想同你講返多謝你之前比我嘅意見同出咁多書教授我地財富知識。

追蹤你專頁已經兩年，由一開始18歲只有儲畜5萬，到宜家計埋股票增值同自己嘅生意收入已經有接近40萬。

雖然比起其他網友或者同齡人只係小數目，但都希望同你分享一下，因為你真係功不可沒。

手上嘅股票好多先前股市低迷時買入，幾乎都有近一倍增幅，希望快d有機會擁有第一個一百萬！

雖然當時我對電動車認識不多，無入到你介紹嘅比亞迪，但係真係好多謝你介紹必瘦站，我由$2.6買入到依家升左唔少，慢慢睇住手上股票翻倍真係好開心！

另外都有持有你專頁推薦嘅小米，都係先前低位買入。同埋，好多人都笑嘅盈富基金我都有買入，升幅都有1x%，老師你仲有其他增值型股票推薦嗎？

好開心先前有機會接觸到你嘅專頁同寫嘅書，如果我當日無接觸到你，可能今日仲係仍然係對投資財富觀念一無所知，亦都唔會開始投資，

搞自己嘅生意，更加可能仲係返緊兼職，無宜家嘅收入，想講嘅係你係絕對幫助緊好多人例如係我，希望你可以繼續回答我地網友嘅問題，加油。

身邊好多人以為不停短炒追波幅可以搵到最多錢，佢地覺得高位唔放好蠢，換返做cash先係賺左，究竟我應該點樣同朋友糾正佢地呢個觀念？

另外，屋企人成本$6.x買入中國交通建設1800，到依家已經跌至$3.75，我自己分析認為呢隻股票負債偏高，盈利能力不強，

但係不肯定現時嘅股價弱勢係受制於疫情經濟未恢復定係走勢會持續疲弱，請問你可以比少少意見嗎？應該先繼續持有定係賣出？

龔成老師︰

能做到這些成果，主要都係你自己努力學習和實踐得來的。以你這個年齡，能夠擁有這刻的財富，其實已十分好！

同時，你擁有「知識」，當你日後有更多收入及財富時，相信投資複息力量會更大。只要繼續向正確方向走，第一個100萬相信好快會出現。

先講中國交通建設（1800）本身不是無質素，但又未去到好好，算是中等類別，但增長力不強。

你分析正確，佢盈利能力不高，負債偏高都係扣分位。因此估值不會高，現價算是合理，要回到你屋企人買入價，可能要些時間。

同時此股質素只係一般，持有太多，建議沽少少，去平衡個風險。若持貨不多，可以守。

至於你朋友的「賺錢」思維，與98%的散戶想法一樣。

只追求實在的現金，認為要賣出賺到現金，才是賺錢，但我地最重要是講求「財富最大化」。

當一隻股票上升，例如你買入價$10，現價$15，賣出可以賺$5。

但當你套現$15後，你怎樣將這個「$15」再次增值，令你的財富增長，比留在原有股，得到更大的回報？

如果原在的股票是優質股，即是我地持有優質企業，當你一直持有這股，企業長期價值向上，就會帶動我地的財富有最大增長。

簡單來說，我地是從「財富長遠最大化」的角度去想。可能你會問，一直不賣，那麼永遠無法取出財富。

我地累積財富，會用「先增值，後現金流」作策略，前者著重增值，之後就會改變策略，將已增值了的資產，轉為現金流類別，而我地就是不斷享受資產產生的現金流。

你試想想，如果用你朋友方法，升左少少就賺左先。在過往，港交所（0388）、騰訊（0700）在這麼多年，股價上升100倍時，這的方法能賺到多少？好可能連一倍都賺唔到，莫說能賺到100倍，除非係長線持有「唔好賣」。

記住，財富只留給「有知識和耐性」的人。

------------------------------------------------

Q20842：

老師，我係你學生

1. 想問下一般公司如果想做配股，係咪通常會係個股價既合理區中上/貴既位到做(一D有質素既企業)? 例如你之前講過1211/1810都先後係高位配股，即係代表果D價連管理層都覺得貴，係好時機問股民略水去做發展?

咁如果未來係估值上，應唔應該用配股價去做一界定，評估公司既平貴呢? 姐係例如小米23.1配股，咁23.1以上其實都盡量唔好買，係23.1以下買會好D?

2. 如果配左股既話，咁其實公司既股數係咪會即刻多左?咁公司既每股盈利會唔會有所下降?如果會既，咁需唔需要再重新做估值?

龔成老師：

1）對，大部分公司配股，都會在合理區中上部，或貴的水平去做。因為配股就是集資，在高位賣出股票，能得到更多資金，對公司當然有利。

投資者可以用配股去做參考平貴，但不能硬性運用。

2）股數的確會多左，所以我地在計算時，會調整翻。一般來說，如果佢配股數目的%不過多，我地唔理都得，而佢年報都會反映翻相關數目因素。

------------------------------------------------

Q20843：

老師 ，今年33歲 有層居屋供左年剩有廿年170萬末供完
物業約值500萬 （未補地價）
另外 之前還欠2年屋企人錢 15萬分兩年還

兩公婆每月可以8000剩
月入同先生加埋4萬5
有兩個小朋友 4&8歲
以前嘅積蓄都用晒買樓 小朋友身上
現時現金35-40萬 連股票

2800 -2000
1810 -1000（高入左）
9988-200

以下仲有啲新股之前炒炒放放
好後悔，諗住賺差價 依家明白唔可以咁做
不過知道冇用 以下有D新股 有啲低位入高位放咗 之後又有啲高位入返現在持有以下新股

2148 2158 2159 1167 2125 6993 6690 （大約15萬）
以上新股分別同先生都各持有D

1想問以上新股keep住繼續持有？ 定係應該沽咁啲？ 本身好多都係低位入賺咗錢差價之後放咗又再買返！所以有啲賺咗等於冇賺

2.另外因為現在物業升值都好快 差唔多升左150-200萬 是否應該現在補地價？

如果報咗地價之後就可以做二案 ，想可以之後買到多層樓 ，定係將補地價嘅錢做其他投資會理想？

3 想問一問老師，如果擁有一隻優質股要長持有，但有陣時又會話佢而家高位要等佢回落左啲先，如果佢唔會囉keep住繼續升，就唔會擁有到佢（例如1211 由150覺得佢係高位唔敢入，但最後佢又升到爸爸聲）如果見到有啲潛力股但係又高位 咁就應該月供？

成日最大一個錯誤就係見佢高位緊就好想入貨
，有啲跌緊就好想沽出

4另1516 6996 有潛力？

老師謝謝你的解答！

龔成老師：

1）盈富（2800）、小米（1810）、阿里（9988）無問題，可長線。

至於新股，其實唔建議投資太多，始終3年財務數據好難見到企業真實面，因此較為波動，同時你買得有點散，相信你無仔細研究過企業。

麥迪衛康（2159）稻草熊娛樂（2125）加科思（1167）不宜持有太多。

2）如果你資金足夠，就可考慮補地價，但如果唔太足夠，就唔需要急。香港樓我相信長期仍向上，但不會象過往般倍升。

3）我唔建議「預測」股價走勢，我只會分析企業價值去推算這刻的投資值博率。因此，月供或分注這類股都是其中一個方法。

至於你話高位想入貨，低位想賣，我建議你長期月供，唔好理股價，回報其實唔差。

或者你可考慮：GX中國電車（2845）目標是扣除費用及開支前，與Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

4）融創服務（1516）有質素的。

佢由融創中國（1918）分拆上市，主要在中國提供物業管理服務及增值服務。而融創中國本身係中國好有規模的地產發展商，有這個背景優勢，佢長遠發展唔差。

睇翻佢資料，佢客戶主要包括融創中國及其合營企業與聯營公司，以及其他房地產開發商、業主、住戶及其他客戶（如社區增值服務相關的廣告公司）。

財務數據唔差，生意與盈利增長快，現金流強，整體正面，這股有長線投資價值。不過，現價貴，如投資，真的小注好了。

德琪醫藥（6996）係一家專注於創新抗腫瘤藥物的亞太地區臨床階段生物製藥公司。

由於未有實質盈利，只可以話，有危有機類。

ＡＴＧ－０１０係佢核心產品之一，通過與Ｋａｒｙｏｐｈａｒｍ訂立的許可協議，集團可於中國內地、台灣、香港、澳門、韓國、東南亞、澳大利亞及新西蘭對其進行開發及商業化。

該產品為首款及唯一一種獲ＦＤＡ批准可同時用於治療復發╱難治性多發性骨髓瘤及復發╱難治性瀰漫大Ｂ細胞淋巴瘤的藥物，亦用於治療脂肪肉瘤、復發性腦膠質瘤及子宮內膜癌。

這類股好難金析，無人知最終的發展情況，大家都只是估估下。

只可以話，如果能承受風險，小注當博下可以，買入後唔好理股價，長線等發展。

------------------------------------------------

Q20844：

老師你好！我之前高位入左0175（$31）/6690（$36）/1183（$5）同埋小米（$24.9）！請問呢幾隻股有冇潛質長揸？

龔成老師：

可以，這些都是有質素的股票，長線無問題。只要你不是持貨過多就得，但如果想加注，都唔好太過心急。

要留意，澳能建設（1183）以過往的業務來睇，只是中等，業務發展不算強，整體不差但又未算好好。

佢最近宣布，同德國創新科技企業Ｕｂｉｔｒｉｃｉｔｙ達成戰略合作，於大灣區拓展大灣區開發、製造及分銷電動汽車充電業務。

睇翻澳能果邊，主席表示，目標係兩年內在港澳大灣區安裝500至1000個充電裝置。

企業發展力都有，但早前股價其實有點超前反映。就算近期回落，這刻投資值博率未算高，如睇好，小小注好了。

另外，你上述4隻，都是近期較多炒作的類別，你出現了集中風險。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q20845：

你之前建議既潛力股我以持有小米股票，如果揀一啲平穩增長股會唔會更加好？

我見你有介紹到月供盈富，但澳門好少銀行有月供呢個服務，而且手續費又好貴，所以我會唔會分注入盈富會比較好？

同埋如果唔月供既話係咪唔好諗盈富？
多謝你無私既分享

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

所以，你加入平穩增長股，是可以的。最簡單當然是加入盈富（2800）。

如果唔月供，你可以用一手手模式去投資，例如每2個月買入一手就得。月供的作用就是平均買入價，只要你做到類似效果就得。

------------------------------------------------

Q20846：

你好，想請教一下

想5年後有80萬
有20萬現金，
每月可月供股票$2000，
什樣選銀行進行月供？
長線持有大概幾多年有回報？

另外手持5號同6號兩年，
可繼續持有嗎？還是轉其他股？

我今年37歲，已進行月供$2000盈富，剛買投資組合各一手

小米 $25.8
領展 $70.35
中國電車2845 $123.5
金沙 $35.8

匯豐 $72/400 、$65.5/400
電能 $70.2/1000

以上組合是否適合？
若想再投資必瘦站、吉利、粵海會否太多太亂？定集中加持現有股票？

另外有銀行高息戶口（2.5%），建議有多餘錢放入銀行？還是投資收息股比較有利？

太多問題，謝謝解答

龔成老師：

如果你目標是5年有$80萬，你投資上，應該投資一些有基本增長力的股票。匯豐（0005）、電能（0006）未必適合你。

至於其他選股，無問題，方向正確。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

$20萬，暫時可動用$5萬-$10萬。

平穩增長股：潛力股
7：3
（如果你投資實力較強，可增加潛力股比例）

平穩增長股：考慮盈富（2800）。

另外再加1、2隻（每隻$1500）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股：安碩恆生科技ETF（3067）

另外再加：阿里（9988）、騰訊（0700）、港交所（0388）、舜宇光學（2382）、小米（1810）、ＧＸ中國電車基金（2845）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

必瘦站（1830）可等回多少少先，吉利（0175）現價小注開始都得，現時合理區頂，粵海（0270）未必適合你的投資目標。

現時大市波動，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20847：

龔成老師，我最近才買股票，一開始賺少，後來一次貪心了，資金$60萬在美團$436.8買入。。

犯盡你所說的散戶錯誤。。現在天天看你的post反省自己。。

以前我看過你的書，一直覺得要價值投資，可是到真正落場，卻慢慢迷失了。。

可是現在我不知道應該怎樣做了。。
此股pe高，原本就不值那麼高，是不合理的
我錢不急，應該等下去嗎? 可是越等越跌。。
謝謝您，感激不盡

我賺了大概$60000。。如果能夠升回$400，我放了。。就算打和。。但不知仍有沒有機會，好害怕

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

希望你慢慢改正翻你的錯誤。

美團點評（3690）有潛力的，過往一直虧損，到近一年，開始有正現金流，這是一個實質的利好因素，因為之前一直在燒銀紙，現時初步見到成效，不過，估值的方法好虛無，因為現時的市盈率仍過百倍。

如果有利好消息，佢可以上好多，但如果估值修正，股價可太跌。

只可以話，潛力是有的，現價唔算平，但不是完全無投資價值，不過，一定不能大注。

簡單來說，這股無問題，但你買入價，以及過度集中就有問題。現時你只能睇位減持，穩陣D就是上翻D已經要減少少，餘下先守。

------------------------------------------------

Q20848：

龔sir 你好，我手上持有以下股票。比高位回左好多，有d驚，係咪需要斬哂佢重新嚟過？謝謝

175 吉利 4000股@27.2
909 明源雲 3000股@44.9
1516 融創服務 2000股@23.95
1810 小米 6000股@20.5
6690 海爾智家 800股@30.5
6993 藍月亮1500股@16.5
9992 泡泡瑪特2000股@85

龔成老師：

你如果持貨不過多，持有就得，你要問翻，佢有那些業務明顯轉壞，要令你賣出這隻優質股？

業務發展一直良好，只是股價之前貴，現時回翻，根本業務完全無變，優質度無變。

唔好太著重短期股價，睇「企業業務」「長遠發展」。試下唔好睇股價，了解翻佢業務，如果你想賣出，要找出佢「業務轉差」的理由！

我睇翻上述的股，都是有質素的，只是你犯了兩個錯。

第一，集中持有了新經濟及市場熱炒股，我地應該建立平衡組合。

第二，無用月供或分注，無計估值，集中在貴的的價值買入。

明源雲（0909）、泡泡瑪特（9992）雖然都有質素，但股價上落大，不宜持太過多，如太多宜減。至於其他，問題不大。

其實整體都可持有，暫時大部分都可守，唔好心急加注。如果有些股佔組合比例太多，上翻去要減持。

------------------------------------------------

Q20849：

龔sir請問恒指加成份股，月供盈富基金會減低投資價值嗎？和月供恒指ETF 那好？

想月供方式計畫晚年回報，現38歲

龔成老師：

如果恆指加成份股，會令盈富（2800）有少少改變，以佢現時的改變方向，相信會加入更新增長力較強的企業。

這會令恆指長遠的增長力提高，但會令風險度增加左。

投資價值基本不變的，長線投資仍是可以。月供可以。

------------------------------------------------

Q20850：

老師想問一下1066/9990/6993
全部重貨

想問下如何操作
感謝

龔成老師：

威高股份（1066）都有質素的，不過業務有少少波動。

佢主要從事研發、生產及銷售醫療器械產品、骨科產品、介入產品、藥品包裝產品及血液管理產品，以及於中國經營融資租賃及保理業務。

長遠有一定的發展，不過毛利變化較大，盈利有不確定性。雖然有長線投資價值，但股價較波動，以及經常都貴。

你預現價合理區頂，小注好了。

祖龍娛樂（9990）業務不差，但貴。

係中國移動遊戲開發商，睇翻佢d資料，佢比較專注於開發ＭＭＯＲＰＧ（即係大型多人在線角色扮演遊戲），同埋係170個國家及地區的市場，包括香港、澳門、台灣、東南亞、韓國、日本、歐洲及美洲。

佢主要業務包括開發與授權業務及綜合遊戲發行及運營業務。

例如係開發與授權業務方面，佢將遊戲授權予第三方發行商，並提供遊戲管理、玩家服務及技術支援等服務。

而係綜合遊戲發行及運營業務方面，佢主要通過第三方分銷渠道商（例如包括有ｉＯＳ　Ａｐｐ　Ｓｔｏｒｅ、
　　　　Ｇｏｏｇｌｅ　Ｐｌａｙ、騰訊應用寶、華為應用市場、Ｏｐｐｏ應用市場、ＶＩＶＯ應用商店等）
。

見佢的生意同盈利都增長得唔錯，同時已建立左一套完整的生意模式與銷售方法，發展正面。

不過，佢有兩大風險，第一，行業變化大，唔會肯定地講佢一直有生意，始終行業與佢業務不確定性大。第二，現時估值貴，市場已假設佢有高增長，如果之後只是一般增長，股價都會受壓。這類股要明白風險，同時控制注碼。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價仍略略貴，勉強小注投資都可以。

簡單來說，你持貨不是差但重貨是問題。

除藍月亮外，另外兩隻如果太多貨最好睇位減翻D。

------------------------------------------------

Q20851：

其實想請教一下，因為現在喺學習上，遇到一個樽頸位，就是計算股價方面。

可以通過企業年報，尋找過往的企業利潤情況，，債務和查看股本回報等資料，以評估企業是否有獨特嘅業務性。

但是在股價方面，完全一頭霧水，完全不知應在哪裏入手，來評估股價是否在合理區，還是在貴價區。
有些企業，現在係個高位，因為業務得到支持，所以五年後的今日睇返，股價屬於平，因為日後價錢都可能會更貴。

就算老師你告訴我，有那些股票屬於偏貴，有些屬於合理區，我都不懂得怎樣去計算，或拿什麼指標用作評估。所以想請教一下，評估該企業股價，可以從哪些方面入手？

例如利潤，股本回報率？還是從其他地方入手？因為就算尋找到一隻優質股，但都不清楚該價錢是否適合現在購買，還是等到合理水平才購買。所以想尋找一些指導。

在股票聖經裏面，你都有提及過好多情況下，都係適合購買嘅時候，但係如果我能夠掌握到哪些是合理區域，咁個防守性就會更加強。

所以想請老師指導一下，繼而再努力學習。

睇咗你好多書，現在跌市，個心都不會害怕，反而認為是一個機會，真心講句謝謝你的心得分享。

在觀察股價是否在昂貴區或是合理區，應否觀看市場所提及的移動平均線？

龔成老師：

你在思維上，行錯左個方向，過往股價、高低、平均線，都絕對不是計算企業價值的方法！

你現時要計出，一間公司值多少錢。

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q20852：

成哥你好，我以前以為股票好似賭博咁靠運氣或一d好高深既技術分析先可以賺到錢，但自從係fb見到你專頁之後再買左你d書睇

令我對股票有另一種睇法 就開始學玩左股票幾個月 ，因為之前科技股全部都好高價 所以買入左d舊經濟股（依家已經有不錯的回報）都係成哥推介的，但發現自己無新經濟股

最近見到有d科技股回落左 小小 但仍然係高位 當時心急入左d，但結果跌極都仲有得跌 都跌幾多下，彈藥開始唔夠 唔敢加注

但都係一d優質股黎，佔我既股票組合都算平均，想問下遇到呢d情況 係唔係等待拒升返上去最好？今次都令我體會到高位入同心急的後果

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你現時的新經濟股，只要是有質素的，可以持有，但唔能夠佔比過多，同埋唔好再心急加注。如果佔比多，就要上翻D時減持。

另外，我地在買入時，一定要分注，唔好一次過買入，風險高。另外，留有一定的現金，都是重要的。

------------------------------------------------

Q20853：

略貴指是否指一下跌會損失很多？

為什麼新舊經濟股都要同時有？ 因為一下跌會全部一齊跌，會存在大風險？

明明全部升都宜家全部跌

龔成老師：

每間企業都有佢的價值，例始某企業值$100億-$150億，如果現時的市值為$160億，就是略貴，在理論上，長遠股價會回歸去翻企業價值，即是股價有可能去翻$150億或以下。

當然，如果企業不斷成長，例如價值增加到$150億-$200億，當初用$160億就有值。

但這是一個值博率的問題，當你用略貴的價去買入，風險就會較高，你要博企業有一定的成長。

至於新舊經濟，其實不一定各半，但最好同時持有。

例如近期的新經濟股回落翻，但銀行股上升翻，如果你同時持有，組合的風險就能減少。

------------------------------------------------

Q20854：

Hello Sir, 請教一下，我本身有居屋物業自住（未補地價, 今年見到税貸抵，借左 $20萬（分24期合共$3000左右利息）年頭已用嚟提早左還款俾銀行，因為可以節省 約 $3萬幾蚊利息

而且縮短咗供款年期，依家仲有2年3個月供完，供樓+剛借貸的現在每月還款 $15,600)當年用首次置業7拆優惠購買 樓價 $1,240,000 未計按揭利息) ，現在估值成交約$5,500,000左右 實用517呎<= 參考註冊處成交(未補地價)

本人38歲，已婚，未有子女，月入 $35k - $40k，老婆月入，$25k-$30k, 自己流動資金約$50萬，沒有其他借貸，暫時未持有股票，因為居屋未補地價不可以再做按揭，換句話說沒有充夠資金付首期再買多層樓收租。

想問下我應否用呢個方法去增值資產，賣左現時居屋俾房協，扣取所需費用應該可以取回 $5百萬，然後老婆用首次置業再買差不多呎數私樓自住。

假設買 $8百萬私樓，做按揭6成，分20/25年還款，即是 賣樓所得款項 $5,000,000 - 首期 $3,200,000 - 買樓所需支出和裝修傢俬 $1,000,000 ，剩餘約 $800,000 + 自己流動資金 ，再用呢筆錢投資增值，這樣可行嗎？

還是有更好的做法或建議方式，想聽聽呀 Sir 你嘅意見，感謝

龔成老師：

其實從自住角度，居屋是有優勢的，雖然投資價值不及私樓，但自住絕對不差，反而當你買左私樓後，其實會令你每月的現金流減少左，因為你要持續供樓。

當然，如果從長遠物業投資的角度，私樓會較好。

因此，你要衡量那個項目去作為你財富增長的核心。第一個方法就是保持現狀，由於現金流每月都強，因此可利用投資股票去增值。

第二個方法就是你轉私樓的方法，私樓增長較好，但你每月現金流會減少左，你較難用其他工具去增長。

你唔好單睇這刻能擁有現金的數，而是睇長遠現金流，以及這些現金流能為你創造多少財富。建議你兩個方法寫低，仔細比較下。

------------------------------------------------

Q20855：

老師之前承蒙你嘅解答，多謝你！

有啲心態上嘅問題想請教，其實之前買股票都係想收取股息及股價嘅升值，好少諗會賣股票，依家睇咗老師嘅書，其實係咪應該預留一筆生活費之後

再盡量儲錢，等待一啲認為係優質嘅股票（通常都係揀老師書中嘅股票）大跌價，然後買入呢？

依家成日都記住老師嘅說話：錢係會貶值，要買資產⋯買資產。我想儲股票多過想儲錢

龔成老師：

我地最重要是「建立一個財富組合」，現金都是組合其中一部分。

適當現金作應急錢，以及等投資機會，都是重要的。

所以，你要一邊投資優質股，一邊留基本的現金，這樣是最平衡的做法。

------------------------------------------------

Q20856：

Kung Sir，收息基金3310係指邊一隻?
網上面搵唔到!

你的投資班，我都好有興趣！我個朋友（你的學生，去年五月！她強調你一定會回答我們的提問!）也分享，學費不平但獲得的智識助她好快就在股市中倍數回本！

不過，要安排一下照顧孩子功課的時間先，希望可以抽身出席，繼續向阿Sir你請教！

再一次多謝你的分析！

龔成老師：

GX恒生高股息率（3110），是一個投資收息股的基金，追蹤恆生高股息率指數之表現。

可以視為收息股的組合中其中一員。這基金可投資的，現價合理，可分注。佢是投資香港大型，較穩陣，派息較高的上市公司。

這是不差的收息組合，但增長力不強。

可以上基金網站有介紹的

http://www.globalxetfs.com.hk/funds/hang-seng-high-dividend-yield-etf/

至於股票班，我地最重要是睇「價值」而不是「價格」，只要令你長遠財富有實質增長就值得。希望遲D見到你！

------------------------------------------------

Q20857：

老師我層樓已經收左訂賣！月內應該會完成！ 有三百萬cash, 諗住租住樓先， 或者買層殘唐樓住先， 用幾年時間用股票滾存, 點樣配置比較好老師!

龔成老師：

如果你本身有自住需要，最好在日後適當時機，都要買翻樓，因為無自住樓會面對樓價與租金上升的風險，當然這點要你自己衡量需要。

如果你打算利用幾年時間以股票作增長，由於時間唔算長，唔建議太過進取，可以投資平穩增長股及收息股為主，潛力股除非有大跌出現平貨，否則唔太建議。

平穩增長股：考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

如果你能承受到風險，有些更有超過8%、10%的高息股，但股價就略有風險，要自己衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

------------------------------------------------

Q20858：

呀sir好呀～最近有人同我講買馬咪同買股票一樣，話只要有研究馬經，都係有根有據有做功課，都係投資。

我雖然知佢係講緊歪理，但我唔知點駁，想聽呀sir既見解。唔該呀sir

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，建立後長期持有，不是買賣賺差價，而是成為你財富組合一部分。

當別人認為投資同賭馬一樣，就是停在「賺差價思維」。

我地並不是賺差價，而是將現金轉為企業擁有權，長期或永遠持有，變成我地財富組合的一部分。

------------------------------------------------

Q20859：

老師你好，有啲唔係股票上既問題想問下你 😁

想問下你擁有10萬，100萬，1000萬，層次/現實分別係點樣？

想知道唔同程度既有錢既感覺係如何？層次上有咩分別？謝謝你回答。

龔成老師：

思維會闊左，資源運用都會唔同左。

賺$10萬，當時唔會覺得多，但都有滿足感。

到$100萬，會好相信自己可以賺到$1000萬及更多。

到我賺到$1000萬的時間，基本上「相信自己可以賺到更多」的信念已好鞏固，只是時間問題。

$10萬，人搵錢較多。$100萬，人搵錢+錢搵錢。$1000萬以上，錢搵錢。

以前會同時間換錢，而家會以錢去換時間令自己有時間賺更多錢。

同埋當資金過左幾百萬，我開始請人幫我，令我可以有更多時間去進行真正的創富。

同埋當財富不斷增長，世界觀會唔同，會睇一D大的、遠的，係生意上，會更大膽去投資在業務，以及開發市場。

------------------------------------------------

Q20860：

老師，之前一直有留意老師建議的股票，但股價也未有下跌到合理的範圍，所以還是留有現金沒有入手。

請問這個情況我應該如何處理，才不會浪費了現時的資金？還是我應該先採用月供模式，再慢慢等之後跌市才入貨？

龔成老師：

首先要設計一個平衡組合，要適合你，以及有不同類的股票。

如果組合內，你想投資的某類股，完全無貨，而你長遠想有這類股話，可以用月供模式進行，又或小注買入後等跌再加。

因為當你100%現金等，而這類股又不斷升，你有機會永遠等唔到。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。