*嚴禁劇透* *粗口自行過濾* *可瘋狂話戲屎但免人身攻擊* [1230隔夜超短劇評][無綫][BB來了EP20 大結局] [讚] 全部支線嘅演員都做得好，而且全部都有個結局。好多都睇到好感動，阿妙嗰段Ben一唱「有多少愛可以重來」，仲有幾個男人喺1980睇嬋姐小秋子張合照嗰吓，真係打劫咗我幾滴眼淚。估唔到長青呢個古人設定喺最後一集可以爆出嚟，轉做劉華同埋朗朗攬住咕嗰吓真係感動得來又搞笑。 另外，最後嗰幕係咪話即使允豬最初冇揀到Ellen做媽媽，Ellen Elvis都係會喺埋一齊呢？呢個又正喎，即係話畀大家聽，BB只係一段感情裡面再衍生出嚟嘅一種關係，最主要最完本嘅，其實就係一對戀人。各位，要珍惜你身邊嗰個呀。 [彈] 段段支線寫到咁感人，點解主線唔用啲力呢？當然明白支線係想借咁多個唔同嘅情況，去表示能夠喺埋一齊已經係福份，唔一定要完美先係「完美的感情與婚姻」。先唔好講我覺得又係離咗題，但咁多段支線，明明加咗男女主角入去，都好以唔夠力去推返男女主角條線，最草草收場就係主線。 本來以為第19集差唔多全部講晒支線嘅嘢，可以喺第20集focus返喺Elvis、Ellen度，但佢哋兩個為主嘅戲份加埋都唔知有冇半集。去到BB自己溝通嗰吓，心諗雖然老套咗啲，但都正喎，因為呼應返第1集講話係BB自己揀邊個媽媽。但講完咗，就真係完咗，夢中啟示只係一個啟示。其實將允豬啟示嗰段放喺今集頭，之後每個支線就緊勾返男女主角有所反省就得，依家個問題係覺得支線同主線嘅關係唔夠深，各有各發展咁。 不過肯用BB嚟做一個純愛情感情劇，已經係我睇晒咁多集嘅原因。繼續努力，畀多啲唔同種類嘅劇集觀眾睇就最好！ [演員表] 李佳芯 飾 唐恬兒 / 黎諾懿 飾 葉致廷 / 陳秀珠 飾 梁月嬋 / 盧宛茵 飾 康麗貞 / 姚嘉妮 飾 許朗 / 羅樂林 飾 唐秋 / 高海寧 飾 許晴 / 黃長興 飾 李冠中 / 楊卓娜 飾 王佳妙 / 吳家樂 飾 蔡長青 / 范文雅 飾 何雪盈 / 劉宸熙 飾 譚奕龍 / 楊證樺 飾 成 / 吳家樂 飾 蔡長青 / 周麗欣 飾 Ellen / 鄭世豪 飾 Ellen夫 #1230隔夜超短劇評 #無綫 #TVB #BB來了 #李佳芯 #黎諾懿 #陳秀珠 #盧宛茵 #羅樂林 #徐榮 #高海寧 #黃長興 #楊卓娜 #姚嘉妮 #吳家樂 #劉宸熙 #楊證樺 #周麗欣