講兩句《STAND BY ME 哆啦A夢 2》(2020, dir: 八木龍一，山崎貴） 1. 應該係曼德拉效應，一直以為第一集有用到《懷念嫲嫲》嗰段故仔。我咁啱有《懷念嫲嫲》嗰集嘅漫畫，呢個故事我睇過好多次，對佢3D動畫化興趣不大。而且，我係叮噹大長篇嘅漫畫迷，對於將叮噹改編成電影，我比較想睇大長篇嘅故仔；將叮噹日常漫畫故事串連拍成電影，我係有少少卻步。所以我一直都無睇過Stand by Me。 2. 點知原來《懷念嫲嫲》喺今次嘅第二集先至出現。而另一方面，因為今次主題係結婚，我以為另外幾出名嘅《雪山上的浪漫史》同埋《大雄的结婚前夜》會喺今集睇到，點知睇返wikipedia 原來上集已經用咗。 3. Well，雖然成個故事上有期望落差，不過整體上都睇得幾愉快。因為除咗《懷念嫲嫲》情節同埋另一段講大雄出世嘅情節（有冇網友記得嗰集嘅名？）喺漫畫睇過之外，講大雄靜兒結婚當日嘅段落我無睇過（係改編自漫畫定係新創作？），感覺上係幾新鮮。而且，不得不承認，呢三個故事嘅串連係幾成功。每個故事嘅主旨其實幾接近，由大雄懷念已故親人，到對自己嘅懷疑，睇得出大雄內心（不論係小學生大雄定係成年人大雄）嘅㥬惶、欠缺信心，再透過親人、友儕鼓勵，經歷帶黎嘅成長，增添返少少自信，仲展現到呢個大家都耳熟能詳嘅人物當中少少美好善良純真嘅本質。雖然係有少少老套，但都真係幾好睇，幾感人。 4. 另外，《叮噹》有兩個元素最好玩（即最常用）： 1. 一個乜法寶都無（拎晒去維修）嘅法寶袋； 2. 最好用嘅時光機。只要叮噹同大雄坐咗上去時光機，但又無帶法寶，咁嘿嘿.....劇情上即刻多好多野玩，我甚至嫌佢今次都係玩時空、玩困境玩得唔夠喉！（大長篇如《天方夜譚》就玩得好正喇） 5. 想講多句《懷念嫲嫲》。係，呢集可能係我睇過咁多集叮噹漫畫最抗拒嘅一集。我當年睇嘅時候只係小學生，喺我期待每集都出現唔同千奇百怪法寶，又或者係一次又一次闖禍之際，竟然無啦啦有一集係咁煽情咁悶。作為小朋友嘅我黎講係完全受唔住。不過相隔廿幾年睇返呢段故事，先發覺呢段真係寫得幾好，有笑有淚（漫畫版嘅完結係，當嫲嫲話想睇埋大雄結婚，小學生大雄返咗去搵小學生靜兒問佢可唔可以做佢老婆），感受係好唔同。 6. 最後，我都係唔係太接受到3D版嘅《哆啦A夢》。我嘅世界始終只有叮噹、大雄、靜兒、技安、牙擦仔。懷念2D。 #叮噹 #多啦a夢 #standbyme2 #movie #doraemon #電影 #影評