終於有啲時間同大家分享一下 Jayden B 出世後10日發生咩事 👉無一個阿媽係生完仔就會即刻識揍仔👈 我哋每日都在學習當中成長 #做咗人媽咪內心要強大 #長文慎入 • 產後住院所有事需靠自己 生完之後醫生話有個5蚊銀大嘅傷口需縫針、BB俾姑娘清潔過後就抱過黎肌膚接觸，有約1個鐘嘅時間抱住BB，📷影下相打下視像電話報下母子平安。然後我就比啲姑娘推去產後病房 — 8樓大房，由哩一刻開就分隔。過完床之後姑娘就同我拎晒要用嘅野放喺床頭櫃，由於過咗晚餐提供嘅時間，老公就喺便利店買咗啲野俾我食 (補給補給)，老公拎埋走佬袋👜啲野喺門口交收，佢就可以返屋企休息。食完野嘗試產後第一次小便，㩒鐘叫姑娘佢會俾個尿兜你喺床上痾，痾到半個兜嘅量確保排尿系統無問題，先可以慢慢落地。姑娘將BB👶🏻推返黎身邊，母乳姑娘會過黎教餵母乳嘅姿勢同點先叫正確，初嘗親餵🤱🏻讓阿B埋身食奶；另外開始手擠母乳刺激胸部分泌乳汁，先試用1ml針筒擠出 #黃金初乳，不過姑娘知我地未上奶都會同BB補飲奶粉或水奶。 • 種豆靜脈注射 因為早產咗少少嘅關係，阿仔雙手種唔到豆但比人吉到瘀晒，最後種咗落左腳💉，見到佢日日都要打抗生素、乙肝疫苗第一針及卡介苗、抽血驗肝功能等等… 😢簡直心都痛埋啊～ 到DAY 4 姑娘話今日終於唔洗再打針針可以拆咗粒豆喇！不過仲有好幾個問題要解決：左腳掌有輕微嘅馬蹄足內彎，出院後需要做物理治療一段時間；左耳聽力測試唔合格同埋要睇骨科… 放心！媽咪會同你一齊渡過每一個難關。 • 胎糞及尿液顏色反映身體狀況 第一日見到佢排出嘅胎糞💩由黑綠；於第3、4天後，完全排完胎糞以後，大便顏色會呈橙黃色或是黃色👏 證明你嘅用心，努力餵食係成功嘅！(觀察尿液濃咗，如濃茶或可樂咁嘅色；同埋啲屎屎變成灰白色等症狀，加上留意皮膚泛黃程度，需立刻送醫檢查。) • 新生嬰兒黃疸 滿心歡喜原先以為哩日(DAY 5)可以出院，點知兒科醫生睇完阿仔話黃疸膽紅素指數偏高需要即時轉去照燈，初為人母嘅我難忍同BB分離，更何況當時姑娘都答唔到我要照幾多日、要分隔幾多日？當佢問我叫我決定今日去或留時真係好掛住老公同屋企啲貓🐈，但又唔想掉底個仔一個喺醫院喎，心情好矛盾… 加上同房對面床開刀生都已經出得院，送佢出門口果下超心酸😔 但最後都選擇就繼續留院，到老公打視像電話黎，見到雞髀同西米係咁嗲個電話就忍唔住果種好想返屋企嘅情緒，喊咗出黎💧 話比自己聽：「我知道我要堅強 ，STAY STRONG，我可以的！」真係唔知可以為佢做啲咩，唯有默默地泵奶送去俾佢食啦～ 其後老公都出黎再補給物資、探我同去探阿B。由於只限1人入去探訪，哩個機會就俾爸爸探吧，始終我都見咗佢咁多日，爸爸就由佢出世果日到而家隔咗成4日先見到… 哩晚無咗室友同BB喺房，望住房個窗外落雨閃電⛈特別寂寞。 • 回家後又再照燈 住院咗6日，終於收到好消息🥰 可以同阿仔一齊出院返屋企喇！好興奮咁換晒出院衫辦出院手續，等埋老公過到黎再去果邊病房接埋Jayden B，返到去公公婆婆爺爺嫲嫲急不及待都即刻上晒黎睇BB (無人係黎睇我架囉…)。第二日陪月正式返工，不過隔日去健康院檢查完，又要即時去屯醫擺底佢照燈😢 到底幾時先可以退黃唔洗再照燈呢？最後留咗一晚，隔日就收到電話話Jayden指數降返可以出院，又要出去接佢出院，連日都奔波勞碌，媽媽心都累埋～ • 夜晚才是作戰狀態 基本上BB出院後返到屋企嘅日子，全部時間都係俾晒BB～ 想擠啲時間黎做自己野真係有啲難道(除非你有工人姐姐)，餵夜奶係新手父母必經之路，日間盡量爭取時間休息，有咩就交比陪月處理，正所謂「佢訓 你就要訓」😴💤 先可以唞足精神準備夜晚嘅作戰！ 照顧初生嬰兒係會攰啲，但都係值得嘅～ 最緊要有另一半 @donlaukt 同你並肩作戰 各位新手父母 共勉之💪 #新手媽媽 #新手爸媽 #香港媽媽 #孕婦日記 #孕媽媽 #36週1日 #早產 #baby #babyboy #BB來了 #出世 #生產日 #生仔 #母子平安 #生產紀錄 #種豆 #黃疸 #生理性黃疸 #初生b #新生兒 #jaydenb成長記

西人同華人喺生活方式上最大既分別係：華人好注重養生之道，而西人就好注重享受眼前。 例如：我地會揀比較結實既床褥來保護脊骨，而佢地就會貪舒服，要瞓超軟既床褥，張床軟到朝早起身要用扶手咁滯。 又例如：佢地好鍾意坐d好軟綿綿既梳化，係軟到一坐低，就會成個人陷入張梳化度，幾乎同張梳化合體果種。而我地就會揀d實淨d既梳化來承托自己既腰背。 又例如：佢地好興喺廚房個吧枱度擺幾張吧凳，由得d靚仔坐到掉掉fing，懶型咁食飯。而我地就會好注重自己d細路係咪坐靚靚食飯。 坐得唔靚，瞓得超樣衰既後遺症自然係腰痠背痛。我地優秀既龍的傳人一早已經用生活智慧去盡量預防呢d後果。而佢地班西方匈奴就會選擇啪丸來止痛，仲要係越大劑越好。 我去年夏天踩單車PK，膝蓋受傷，縫咗11針。醫生俾咗2大樽獸醫開俾馬食咁大粒既止痛藥我。我食咗一日已經wing到牛咁眼，第二日即刻改食自己既私貨「必理痛」。 我將d牛咁眼止痛藥擺咗喺藥箱度「看門口」。朋友來探我，見到我d超級無敵大粒止痛藥，即刻好似鄭秀文見到雞蘿油咁，兩眼發光，問我：喂喂！呢隻超勁止痛藥有錢都買唔到。醒我半樽得冇？ 我：吓？不如你去樓下酒庫攞2支酒仲好啦。唔好食咁多止痛藥啦。 朋友：梗係唔好啦！靚酒隨時隨地都買得到。但你呢隻止痛藥千金難求。唔好咁孤寒啦！ 我：你搞乜要食咁勁既止痛藥呢？ 朋友：我朝朝起身都腰骨痛，唔食藥運作唔到。 我：去做物理治療吖嘛。 朋友：冇用既。 我：你做咗幾多次？ 朋友：2次。 我：梗係唔係淨係做2次啦。神仙咩？ 朋友：咁我要即刻止痛吖嘛。 我：係咪你張床太軟，唔夠support啊？ 朋友：吓？我張床我瞓咗幾十年都冇問題喎。 我：吓！床褥要最少每10年換一次㗎喎，如果唔係，會冇晒d support㗎。你換過張床褥，睇下腰骨痛會唔會好轉？ 朋友：痴線！關乜張床事呢？ 我：我懷疑係你張床褥太軟，搞到你腰骨痛。你不如試下我呢隻啦。 朋友：（㩒下我張床褥）你有病！你張床咁硬，仲衰過瞓棺材，我唔換！ 我：你瞓過棺材咩？又知道好硬？你再咁啪丸法，就真係好快瞓棺材啦！😳🤣🤪#棺材 #西人 #龍的傳人 #床褥 #止痛藥 #牛咁眼 #生活智慧 #生活方式 #養生之道 #鄭秀文 #雞蘿油 #雞屁股 #匈奴 #getha #latexmattress #啪丸

唔知你屋企有冇曾經為過送唔送屋企人入老人院而煩惱過呢。 琴日收症收咗個病房常客，個個姑娘都識得佢。佢係一個九十歲嘅婆婆，好多野講好精靈。本來佢同屋企人住，但因為之前有cancer切除咗直腸同肛門，喺腹部開咗個造口排便，屋企人兼顧唔到佢嘅造口護理，所以只好送婆婆去老人院。婆婆一入來，我收症問佢一堆問題嘅時候，佢已經滔滔不絕開始呻佢喺老人院嘅經歷：「如果唔係因為呢個造口，我駛鬼住老人院咩。住老人院好慘架，成日都要綁人手，綁到實一實。條片up住24個鐘都唔幫你換！我有俾錢架，搞到好似乞佢地幫咁！一個月都要八千蚊，單人房就要一萬蚊⋯啲床好窄架，得咁闊（用手勢形容）⋯啲阿姐全部外省人來嘅，冇啲耐性同愛心，真係好慘架！」講講下，佢就好灰咁話：「如果之後我有咩事，唔駛救我喇，叫醫生幫我打支針等我安安樂樂咁死好過啦！」聽住佢講，我都不禁想像佢喺老人院嘅生活。 綁手（約束手帶）喺醫院都好常見，因為有時啲公公婆婆精神狀況有啲亂嘅時候，可能會自己爬床、想走；但其實啲姑娘好多時都會俾啲機會佢地先，盡量都唔想綁，真係搞唔掂怕有危險，都會同屋企人講返個情況先會用呢啲約束裝備，用意都係保障病人安全。用咗之後都會有相關嘅assessment chart去定期mon住，確保約束手帶/手套/背心嘅使用係合適，冇箍得太緊整傷病人。但喺老人院，我就真係唔知有冇咁完善嘅評估喇，加上香港啲老人院質素咁參差，新聞都成日睇到好多令人髮指嘅虐待院友事件。所以我諗喺用約束裝備上，都唔敢保證係用得合適、安全。 至於換片，雖然醫院病房都好忙，但換片都一定唔會懶，至少四個鐘都會換一次，同埋會幫佢地轉埋身。有啲老人科病房甚至換得更加密，一更都可能換成四次。你話啲病房助理/護士（我之前出老人科係全個病房嘅姑娘阿Sir都要一齊換片）換片hea唔hea，講真就真係睇人。我試過part啲姐姐係好求其，就算有屎都可能剩係輕輕抹一下就算；但都有啲好細心，真係會抹到乾淨先換下一個。換得求其定認真，除咗睇換片嗰個人本身性格，都好睇病房忙唔忙、多唔多病人。但至少以我觀察，我覺得換得好細心或者做得夠嘅一定多過好求其嘅，始終預防pressure sore（壓瘡）係病房裡面一大重點，如果成日求其換求其抹，up到病人patpat紅咗損咗，病房啲大粒野/管理層都會怪罪落來話換片功夫做唔好。所以就算求其都有個譜，起碼有屎都一定會幫你換。而且病房好重視病人私隱，換片都一定一定會拉好簾。但老人院呢？老人院缺乏監管，照顧工作做得唔好都唔未必會有咩好嚴重嘅後。如果連沖涼都可以就咁除晒長者嘅衫褲，要佢地冇尊嚴地喺露台沖；更何況係換片呢啲普遍人認為係厭惡性嘅工作呢？所以好多老人院入來嘅case，patpat都多數有壓瘡，有啲可能甚至係爛到見骨。 講咗咁多，點解我特登分享呢件事，其實係因為我屋企人最近都為到送唔送公公住老人院而煩惱。雖然公公今年都九十歲，但其實佢仲行得走得，甚至唔駛揸拐杖；不過佢近幾年有啲腦退化，加上佢有長期尿喉要護理，而佢又成日都因為尿喉處理得唔好而入院。佢同婆婆兩個人住，但因為佢地年紀差好遠（以前啲人好多都係冇感情地因為父母之命而結婚），婆婆日頭要返工，都唔可以照顧公公。前幾日，公公又入咗院，媽咪同佢啲家姐細妹都發現公公自理能力開始變差，食藥又唔識自己跟時間食。佢地開始諗係咪需要送公公入老人院。其實如果有錢就話請個工人就搞掂，又或者要送去老人院都揀啲好靚、服務好好嘅院舍；但香港又有幾多個有錢家庭呢？以前我都會覺得有得揀緊係唔揀住老人院，仲要香港啲老人院質素咁參差；但真係喺自己屋企發生嘅時候，又發現好多時真係好似冇得揀。 我又再諗，疫情肆虐都成一年，有啲調查結果都發現好多長者因為唔可以成日外出而有抑鬱嘅情況。如果連住喺屋企，起碼叫做有自由嘅長者都咁唔開心，咁嗰班喺安老院舍每日過住千篇一律嘅生活，得唔到適切照顧甚至可能係受住好多唔人道嘅對待，仲要連屋企人都冇得見嘅公公婆婆，會有幾絕望呢。可能有好多都好似琴日呢個婆婆咁，寧願死咗佢一了百了，都唔想再繼續呢種痛苦嘅生活。 講咗咁多，其實我都仲係唔知可以點做。一方面唔想睇住公公入咗老人院，可能健康仲差咗；但另一方面卻唔知有咩其他嘅方法。好多時送屋企人入老人院，唔係因為唔愛佢地，只係呢個社會環境限制咗我地愛佢地嘅能力。喺香港一生人勞勞碌碌，買樓唔駛諗，租樓又貴，就算係廁房劏房閒閒地都幾千，物價又高，剩係應付住屋同生活開支，都可能已經好吃力，就算有心想照顧年邁父母，都未必有能力去做。而一班長者勞碌一生，到老卻冇一個保障等佢地可以安老，只好繼續勞碌。但年紀咁大都冇咩工作可以揀，多數做外判清潔工，係叫做可以有份收入，但工作環境差、冇保障，外判公司只係為求利益用盡方法、走法律隙灰色地帶剝削呢班老弱員工。「安享晚年」對好多香港嘅長者來講，可能只係一個遙不可及嘅夢。 喺香港，每日都有好多好多嘅悲劇靜靜上演，好似前排寒潮一日有幾個長者喺屋企過咗身都冇人知，但呢啲都可能只係冰山一角。都係嗰句，愛要及時，愛到就愛，做到就做，照顧到嘅時候就好好照顧你嘅家人。可能會好難行，但我相信總有希望，一齊加油。#staycuteprocreate #staycutewardsharing