［職場胃腩］Network鯨如性行為。你想？哦，咁啱呀？我都想，但點解我要同你？

可以直接睇Patreon 全文，呢篇免費的（https://bityl.co/4dut）．亦畀你熟習下個界面。當然覺得好睇就去訂吧（https://bityl.co/4Y0h），月尾訂即時扣錢，12月1日又再扣，我會回一個月月費畀你。

煙草特醇
Network鯨如性行為，過癮，但點解要同你？
真人真事：那年十八，母娼起二，溫啤霞
Be interesting, my friend
傳音過王傳音：搞個 個人名牌，其實唔難
Let me 心噏 after writing so much

TLDR：個個都知Network鯨緊要，但你想Network鯨，對家做乜要理你？我碌電話睇埃汾Facebook或者Patreon唔好？所以，首先你自己要 become an interesting person。另外，略為搞下你嘅個人品牌，都係必要嘅。唔使咩好大工程，開個FB Page或者開個blog都可以。唔使錢，咁你都話冇時間嘅，就睇返第一句啦下。

煙草特醇



1. 一路都有讀者叫我寫多啲「職場」文，特別係「暗黑職場」（例如呢篇，好大迴響，主要係個題改得好）。自問職場上冇乜咁巴閉，冇乜嘢可以教人，「頂多係跳過幾次草裙舞咁」。不過後來諗到，「我其他方面都冇乜咁巴閉」，都仲係厚顏無恥咁寫，而讀者又受喎。所以，好吧，職場胃腩，重出江湖。


2. 今日想講嘅係，一條巨鯨，Network鯨，哈哈哈，係咪好爛呢。呢個課題想寫好耐，今次觸發點，係冇嘅。勉強嚟講因為我剪頭髮，10分鐘就諗咗呢篇文嘅flow。See？平日練功最重要，你睇到係台上一分鐘啫。

3. 篇文雖然放在Patreon，但open to all．等同平時嘅FB Page Post，不過多啲圖就放Patreon，同埋益埋Patreon讀者。亦都等冇用過嘅熟習下Patreon平台。唔會係常設環節，當然如果反應好嘅，客串可以變正餐。實不相瞞我之前有啲電台節目或者專欄都係客串變正餐，做人抵得諗都幾重要。啱睇就去訂Patreon吧（https://bityl.co/4Y0h）

Network鯨如性行為，過癮，但點解要同你？

4. 講返，Network鯨，大家都知係咩一回事。或者係啲event正餐前嘅foreplay，有時叫Mingle，拎住杯嘢周圍派卡片。或者係乜乜IPO會，台上有台上講，台下有台下講（香港特色），交換下卡片，盤下人地做乜，得閒飲茶。或者係有人搞局，放工去飲嘢，介紹個朋友你識。留意本文只係討論以工作，上位，搵著數，做生意之類嘅Network鯨。約炮求偶當然都有Network鯨，有時第一種會變第二種，但都係分開講。

5. Network鯨重唔重要？你問錯問題了，梗係重要，係好撚重要。香港地嘅嘢（第度都可能係），識人好過識字，幾時都係。如果呢樣你都唔信嘅，都唔使落去，「你去碰幾年釘，之後再返嚟睇」。

6. 我覺得討論「Network鯨重唔重要？」好似討論「應唔應該有婚前性行為」咁，浪費時間。

7. 所以，同性行為一樣，唔使討論重唔重要，爽唔爽。如何成功？如何做得更好？先係重點嘛。

8. 但，同性行為一樣，大家都想，大家都知過癮。「但你有冇諗過對方感受呢又」。直接啲講，「返去搵你_ _ 出火啦」，你想性行為，哦係呀，好呀。但關我鳥事？我唔想喎（主要係唔想同你）


9. 唔係嘩眾取寵，好多人都同你講Network鯨好重要（廢話），教你點Network鯨。但，有冇諗過，「點解人地要同你Network鯨」？點解我唔係睇多套葉念琛（新嗰套相當唔掂），寫多篇文，訓多兩個鐘，而係要同你Network鯨呢，又？

10. 即係唔係話功利計算，做朋友唔係應該咁計較。但做朋友都講「無友不如己者」，Network鯨唔係做朋友嘛，難聽啲講句，「大家都係搵著數」。最熱心Network鯨嘅係乜人？梗係小薯。好合理啫，你想識人，你嘅時間唔多值錢（sad but true ）。你係王維基嘅，大把人巴結你啦，使撚Network鯨咩。你去到邊都人人爭住識你，你要諗下點樣 奀Network鯨，趕走班友又唔好傷害佢地弱小心靈。

11. 咁但，多數人都係小薯做起架啦，唔想行呢步嘅，下世投胎做富二代。所以你一定面對呢個問題：對方嘅時間值錢過你，佢識嘢嘅多過你，佢人脈廣過你。咁，點解人地唔係玩電話，要同你Network鯨呢？

真人真事：那年十八，母娼起二，溫啤霞

12. 好多人會笑，但我再講一次，我真係一個introvert。唔係咩有啲名氣成就（而我冇）就扮晒「其實我好唔鍾意應酬」嗰種，由第一日我都唔鍾意，亦因為我唔掂。點睇我都唔係一個善於社交嘅人，外型也不討好，著平嘅西裝，侏儒村嘅恤衫，好多時呔都唔打，亦唔帶錶。正路一枱人，你只會係出於禮貌唔好skip咗我先會畀卡片我。


13. 咁但，唏，你以為你唔鍾意就唔使做？唔鍾意都要做。我都做過呢種，不停出席呢啲場合，塞卡片畀人啦。或者在個cocktail party中，真係crying in the party，那年十八 母校舞會 站著如嘍囉咁，人人講年尾去邊滑雪，下年花紅幾多，我年尾就在屯門打大快活邊爐。

14. 唔好以為只係「小薯」先係咁。實情去到2014年嗰時，喂，我做咗10年融8年分析員啦，人工職位都唔算太薯啦，但都係咁。你有求於人時就係咁。我好記得，嗰時轉咗工，去到間細嘅公司，真係識你老鼠。咁而嗰時就真係比較「財演」。我最鍾意呢，就係去啲業績會。

15. 業績會有乜？除咗有業績，仲有會，仲有記者。我就去搵佢地傾計，特別係搵啲後生嘅妹妹仔（事實財記係多女仔）—唔係有乜企圖（唔好嗰度屙嗰度食，職場第一誡），而係，因為妹妹仔入世未深會聽我講。「換著啲阿姐十尺外見到我已經閃開，呢條友很煩」



16. 係喎，嗰時做乜？嗰時就塞卡片畀啲妹妹仔。「拿，你可以訪問我的」「拿，你可以叫我上節目的」。成件事十分《出埃及記》嘅溫啤霞， 「你搵我啦！」「你搵我呀！」。


17. 唔止，更加丟人現眼嘅係，我仲叫埋太宰治（以前條靚嘅花名）同我一齊去！真係母娼起二，買一送一，黃子華話齋，未試過雙飛你嘅人生唔完滿。而《母娼起義》就真係一套戲，巧睇，電影節上過，我睇咗，仲同個韓仔導演握手。套戲講乜？英文名就叫Mother Is a Whore。就係個仔孭住不良於行老母周圍接客，好感人的。當時我情況都差不多。太宰治做乜？未試買一送一，「你當佢未成年啦」。但，佢就負責周圍同啲記者講，「拿，你可以搵佢架」。


18. 以上種種，全部係事實，當年幫襯過，I mean收過卡片嘅，可以作證。

19. 點解搞到咁核突呢？咁固然因為我唔靚仔，著侏儒村嘅恤衫，又唔帶勞力士，唔係一個金融才俊。但，今日我依然唔靚仔，仲係著侏儒村嘅恤衫，亦唔帶勞力士，亦唔係金融才俊。但而家情況冇咁差了。

20. 前後有乜分別？好簡單，我出名咗嘛。問題係，無啦啦點會出咗名？雞同蛋嘅問題。

Be interesting, my friend．

21. 講咗咁多，想講嘅係，大家都係Network鯨，都係搵食，咁你作為弱勢小薯，對方點解要理你呢？人地時間寶貴過你，識嘢多過你，人脈廣過你。你有乜著數畀到人？

22. Unless 你有

23. 而作為一個小薯，你總冇可能介紹到好路數畀對方，你亦教唔到佢乜，咁你可以有乜嘢畀到人？

24. Be an interesting person ！

25. 呢個就係我成篇文想講嗁嘢，唔該，Be an interesting person！唔係蘇波榮，好多人都係蘇北京波榮。而在北京人口入面，北京波榮仲大鑊過北京asshole

26. 對面坐嗰個，可能係某投行高層，可能係某CEO，可能係王維基，咩都好。佢乜都勁過你。但你身上係咪就冇佢想知嘅嘢？唔係

27. 世界可愛之處，就係以上呢啲人，如果有幸（對佢地嚟講係不幸）同你同枱，佢地一般都唔會不停玩電話唔理你，真心假意都好，總會同你傾下計。

28. 亦未必真係只係循例，難聽啲講句，佢地都不幸同你同枱，都要苦中作樂，即管睇下你呢條友，有冇咩有趣嘅地方。

29. 呢啲咪你嘅機會咯。

30. 總有啲嘢，係佢唔識，你識。或者佢識，但你熟啲。或者佢識又識，但唔好意思講出口，而你冇所謂。

31. 具體係乜？我唔知。但我發現啲勁人（即係你想去識嘅人），總有啲好奇心。你介紹完你做乜，你仲有乜嘢講？點解王維基要聽你講故事？例如你係搞北韓旅行社嘅（其中一個讀者係！），喂，interesting，「肥仔金係咪香咗？」「北韓啲路人係咪假嘅？」。呢個係一個好有趣嘅身份。

32. 我只係舉例，咁你話，你個人冇乜特別嘢。咁，唔該返返去上面嘅核心問題。既然你冇乜特別嘢，對方做乜要理你？好得閒？我去碌下埃汾Facebook Page唔好？免費仲有得笑。我去睇下埃汾Patreon唔好？一舊水唔使，一個星期六篇文喎（係，直入式廣告）（https://bityl.co/4Y0h）

33. 所以，唔該，Be an interesting person！

34. interesting person，就只不過係，「呢條友有啲意思」。門檻比你想像中低好多，畢竟你都識講，「阿豬阿狗都KOL」。總好過你只係介紹自己，我係邊度做，做乜，講完。

傳音過王傳音：搞個 個人名牌，其實唔難（有冇人唔Google知邊個係王傳音？）

35. 不過，仲有一個問題。你可以諗下，2014年，埃汾同太宰治「母娼起二」嗰時，埃汾係咪一個北京波榮嘅人？我估唔係，其實同而家差不多。


36. 但，冇人識你嘛大佬。邊個大王？冇人識你呀！你有幾interesting，都係冇人知。


37. 而事實，要自吹自擂，好多華人都覺得幾難為情（當然包括我呢個introvert），亦都幾非洲和尚乞人憎（呢個字幾時會變hate speech？）．你總會見啲友滿場飛，name dropping，上星期我又點點點，呀你在星展喎你識唔識呀乜乜乜，靚女都忍佢，係仔嘅，恨不得打七佢。

38. 所以，除咗Be an interesting person外，仲有最重要嘅一步—個人品牌。我覺得我而家變到好似Brian Cha周融或者黃明樂 Ada Ho咁寫文了，哈哈哈，但我講得出佢地四個嘅名，證明佢地都係有個人品牌。

39. 個人品牌呢樣東西，唔係我強項，亦都已經寫咗三千字，可能搵日再講。但呢個年代呢，係真係冇藉口的。

40. 好簡單，唔使你咩搞個網站，或者做特約飛機稿，但至少你搞個Facebook Page，一個仙都唔洗。或者開個blog，拎煙寫下嘢（但唔好多，很煩的）。你唔寫字嘅，咁搵個位放你啲相或者片（唔使比堅尼相，除非搵老細係你嘅工作一部份）。咁你都話唔得閒，或者唔知貼乜嘅。咁又返返去核心問題咯，你自己都覺得冇嘢好睇，咁我做乜要理你呢？「我去碌下埃汾Facebook Page唔好？免費仲有得笑。我去睇下埃汾Patreon唔好？一舊水唔使，一個星期六篇文喎（係，直入式廣告）。」（https://bityl.co/4Y0h）



41. 你係王維基嘅，人人識你，唔使搞呢啲無聊嘢。同樣地，你係星展香港CEO嘅，話知你係南美佬（而星展香港CEO真係一個南美佬），冇人知你乜名都好，都人人畀面你（而南美佬本尊係十分風趣但又demanding的，我都面過聖，拿，name dropping呀）。吳明林卡片都係印「記者」之嘛，謝霆鋒都係印「茶水部主管」之嘛，朱生卡片都係印I’m CEO, Bitch 之嘛（是真的）—而我甚至唔使講邊個朱生。

42. （另一職場心得：但凡卡片幾十個梯圖嘅人，避之則吉。特別係仲要對摺嗰啲。你有幾撚巴閉呢，又？）

43. 可惜，你會睇到呢度嘅，你多數都唔係吳明林謝霆鋒。多數你張卡片上個梯圖，都唔多吸引。你好呀我係埃汾呀，我在星展做Director嘅（事實我係，但有乜新鮮羅白皮？），哦，你拍戲的？一街都Director，一街都VP啦。梯圖現非唇嘛（亦因為咁，見工之類，基本上唔使睇人梯圖，睇人工代表一切，因為梯圖可以任印，但公司唔會無啦啦畀多舊錢你）

44. 你有個地方，放你啲嘢嘅，就唔會出現以下嘅埃汾對白（原文照錄）：

45. 「我有寫文的」「寫乜文？」「乜都寫啲」「例如呢？」「都真係咩都有啲喎，金融為主咯」「即係股票貼士？」「又唔係喎」「咁即係乜」「咩都有啲咯」「……我過去拎杯嘢先」

46. 拿，呢啲就浪費對方寶貴時間啦。掉轉頭，我有個blog，有個Facebook Page畀你睇，係咪簡單好多？呢個係我在老朋友身上學的，大佬，咪得個講字。最緊要有舊嘢睇，畀人見得到。你話你想寫文嘅，請去寫。寫咗出嚟先有得討論。

Let me 心噏 after writing so much（呢句抄陳祉俊的，無友不如己者，記得Follow 佢FB Page同埋訂Patreon）（https://bityl.co/4dtz）

47. To sum up：莫道你在選擇人，人亦能選擇你。你想Network鯨，人地未必想理你．咁你有乜賣點？就唔該你自己做一個Interesting person，唔使有錢，唔使高級，甚至唔使有乜才華。但總之，就係畀人覺得，呢條友，有啲意思。另外，你再Interesting都可，冇人知嘅，即係富貴不還鄉錦衣夜行，所以請你建立你嘅個人名牌。唔使好大陣仗，但開個Facebook Page，開個blog，開個拎煙指點下江山，開個ig（唔係貼你嘅比堅尼相，除非呢個係你工作嘅一部份），就係咁簡單。

48. 其實唔難。再講多次，未訂Patreon嘅，去訂（https://bityl.co/4Y0h）。因為月尾，佢即時扣錢，12月1日會扣多次。所以呢幾日join嘅我都會回返一個月畀你。

［太美好的東西　會走　還未愛夠了你　怎放手］告羅非士打，梳士非巴利。置地本無樹，記者亦非台。Bankers Club？新一代以為講粗口呢

繼續全無公共性嘅長文，亦同投資或市場無關。三千幾字，意識流，跳嚟跳去，慎入。

TLDR：人生若只如初見，或者係妻不如妾 妾不如婢 婢不如偷 偷不如偷不着。係咪得唔到嘅最好？未必。應該係得到過一次，但唔好再試第二次，咁個感覺就係最好。因為求不得。我在Bankers Club食過碟海南雞飯，16年後仲記得—而我連第一次性交係咩感覺都已經唔係好記得（睇鹹古可以著返條褲，成篇文都冇再講性交）

1. 見 職場心經 講起，我又講兩句（幾千字咁咯），相我同用埋同一張。唔係抄，係致敬。畢竟我地就真係在置地幽會過！（但唔係Bankers Club）。同咩辰衝唔同，我又唔會乜都破舊立新，話冇乜值得懷念。Bankers Club絶對係小眾嘢，有幾多人去過？三十歲以下嘅有冇？

2. 拿，本人就去過啦！呢啲就邱月清個家姐邱月感啦。去過，當然唔係咩有朋友擺酒，或者股東會，業績會之類去過啦（呢啲，我全部都去過）。

3. 就梗係要坐低叫飯食，對住個夜景指點江山（唔通推車？嗰度停車場好貴的），懷念下英殖真好，講下西德馬克之類。結尾仲要係簽返個名，但唔使畀錢。呢啲就邱月感啦

4. 「不過，我都係跟人衫尾啫」。請噓，但即係至少我試過畀球王通坑渠咁，你估人人有資格跟人衫尾？

5. 甚至嚴格嚟講都唔完全係跟人衫尾，故事係咁的，由標哥講起（長期讀者可能知）．未睇嘅，睇返medium舊文（https://bityl.co/3dH5），好長氣咁講埃汾蘇花嘅職場生涯，雖然未必順序。

6. 同本文有關嘅，呢篇（https://bityl.co/3dHA），齋睇下半截都得，講我。埃汾英國讀Master後返香港雙失，頭兩份工都係教書，然後轉投銀行，再轉股票。但邊個咁破格，在銀行請個教書佬呢？就係蕉行嘅標哥。

7. 固然人工唔高（2004年嘅萬二蚊都係唔高，之後一年被草裙到萬八，還不錯）（＊），但首先標哥教咗我唔少嘢（咁我當年都仲係一個蕃薯，勝在可塑性哥），最重要係，佢算係親手帶我入行—雖然成件事誤打誤撞，我當時乜工都搵，佢亦請咗第二個，只係再有人走，佢又懶唔想登多次廣告唔想見多次人，先搵我執二攤。我又咁啱遲咗教書份工，都未搵工，八號風球入緊機場收到佢電話，就請咗我。未必係必然，但佢就算係改變咗我大半生，畢竟佢大可拎我份CV去包橙皮（打後我成日都見佢做呢樣嘢）

8. 當時，2004年，我在蕉行香港嘅資金部，Treasury，做刁拿青衣（我知係讀D拿，你唔知即係你冇做過銀行）。部門又俗稱「炒房」，但我地炒嘅，好似小學雞啲STEM玩具咁，根本玩唔出咩樣—我唔係笑蕉行小兒科，係感恩。正係因為點玩都唔會點爆大鑊，標哥好放心畀我玩。加上佢又hea，乜都踢晒畀我做—interbank 港紙美金我又做過，外匯我又做，Interest rate swap我都成日做（＊＊），basket credit link note我買過（即係一籃子六間嘢冇一間出事就有高息）—甚至連CDO我都買過（有機會貼啲歷史文件）。

9. 所以睇你點睇，我可以扮廢老講句：有啲人覺得老細乜都唔做踢晒畀你日日白逗人工正仆街，但我覺得係學習好機會，worst situation is the best training。況且標哥只係hea，唔係廢。佢脾氣差，但唔會鬧下屬（只會掟爛自己位部公司電話）。況且佢唔hea，佢就登多輪ad，根本唔會有我。整體佢都係一個相當好嘅上司。雖則我在蕉行只係一年半。

10. 由於我乜都做晒，標哥又大牌，亦都令我要接觸好多人。例如我講過，雖則我A Level英文有個B，Master又在英國讀，但去到2004年我啲英文已經退化七八成。嗰時但凡有鬼打嚟，我都會有啲緊張，因為隔離電話有時聽唔到人講乜，加上金融界啲鬼先唔會好好耐性重覆一次你聽。但標哥例牌唔聽電話，有時望到鬼佬打嚟我接遲啲，仲會串我「聽啦，鬼佬打嚟唔敢聽呀？屌，大學生喎」。於是我唯有硬著頭皮包皮咁聽。「拿，又有進步」

11. 最重要係，佢事無大少都踢畀我，有一期只係得我同佢在刁寧房。咁我地做trade，當然可以揀好多唔同對家。所以好多時其他行嘅sales都搵我地—但標哥只得兩個原則：佢本身識嘅，就唔使傾，經我口話OK。佢本身唔識嘅，就搵我去同啲友傾一輪先，好彩嘅，你第二次先可能會見到佢本尊。擺明係扮晒嘢，好似大明星演唱會咁，推啲奀星出去暖場，我就係暖場嗰個。

12. 暖場除咗令我知道好多術語，知道啲金融人嘅氣場（並加以模彷），亦令我啲英文同普通話由極低嘅基數進步外—仲有令我有好多好嘢食。係食飯，唔係食女。

13. 頭先講過，好多其他行嘅sales嚟巴結標哥，但因為本尊唔會咁易出現，我就等於係狐假虎威。所以佢地會巴結我。點巴？都係飲茶灌水。反正2004年，pre雷曼時代，全行都仲係幾好賺，匯豐股價150蚊（後生嘅以為我講大話）。佢地仲有唔少嘅entertainment budget，衰啲講句，最大嘅當然唔係洗在蕉行身上，但食到月尾，我食餅碎都夠。

14. 餅碎食過乜？令當時萬二蚊人工嘅我，可以去Ritz Carlton（舊址，而家中環AIA定建行嗰度）食日本嘢，當然係sales請。可以請我去河內道唱K（發誓，正K，兩條佬唱，冇其他嘢）再去新東記打邊爐。可以令我有唔少月餅券，當年我阿麻好老懷安慰，覺得我卒之都捱出頭來。但對我嚟講，更重要係，演唱會飛—當然演唱會飛佢地唔會送（除非家燕媽媽），亦唔啱規矩—但，佢地會拎到拎飛。而我亦會足數畀返佢地。有乜用？就梗係，拎嚟溝女啦。睇容祖兒坐到頭幾行喎。

15. 但最重要嘅係，Bankers Club

16. 標哥，係Bankers Club會員—當然係出蕉行錢，但佢有本事叫到公司幫佢出錢，或者係公司有幾個Quota就畀咗一個佢。但我就唔係，而呢啲會員嘅嘢冇得狐假虎威，亦冇得借畀我用。不過標哥自己係會員，佢啲行家都多數係，所以，我狐假虎威做代表，都會去Bankers Club食飯。

17. 好記得第一次，對家想要我地生意，某英資銀行。標哥就叫我放工去Bankers Club，搵呢個人，「老燒豬」（係真名，不過咁多年我估佢都唔會介意，況且佢應該知道個個都咁叫），一個叫Lucille （冇錯係姓朱）嘅女人。

18. 去到Bankers Club，老燒豬當然一早到咗。見到我呢個黃毛小子，都係發下功洗下我腦，叫我記得在標哥面前美言幾句。言談間，都同我講返起，「我一入行就聽過你老細大名啦」「嗰時佢直頭係四大惡人呀，邊個唔識佢」，但弦外之音亦都係，每個人都有佢嘅時間，我老細係威過，但已經回塘，到佢地呢代上位。

19. 我衣衣哦哦咗一輪，都唔知自己講咗乜，都係話佢知其實我都話唔到事，佢話當然明白，但我美言幾句就得。

20. 然後，開始閒話家常，佢就問我有冇嚟過Bankers Club，可能係我啲行為舉止已經出賣。佢就叫我「叫嘢食啦」

21. 於是乎，我就食咗人生中最好食嘅一個海南雞飯。

22. 當然，回憶中嘅味道梗係美好。後來標哥都有再同我去Bankers Club，但就當然老細發辦點菜，好似都冇再食過海南雞飯。

23. 後來，當然仲有去過Bankers Club，股東會呀，有人擺酒呀，有人榮休呀咁。但亦真係冇再食傳說中嘅海南雞飯。

24. 所以就係人生若只如初見，或者係妻不如妾 妾不如婢 婢不如偷 偷不如偷不着。係咪得唔到嘅最好？未必。應該係得到過一次，但唔好再試第二次，咁個感覺就係最好。因為求不得。

25. 港大年代，學到嘅實在冇乜。唯一係貪得意去聽岑逸飛講佛，講貪嗔痴，「求不得苦」。食唔到，好想食—都未係最痛苦。到食到啦，念念不忘，再想食多次，已經冇機會—可能已經最好。排除萬難，再去食多次，發現拎唔返嗰種感覺，返唔到轉頭，要搵更勁嘅嘢，好似毒癮咁，越踩越深。好多嘢都係咁。海南雞飯又好，虛榮又好，愛情又好。

26. 關於Bankers Club，除咗海南雞飯，實在已經講完。不過最後容許我補多段懷念標哥（未死的，退咗休啫），畢竟佢改變咗我大半生。

27. 當時標哥，過時過節前就請我地食飯，都食唔少好嘢。亦都見識佢簽個名就走人，唔使簽卡唔使畀現水嘅豪氣。有時佢仲會請食晚飯，咁有啲同事就當然唔多願意，覺得好似加班咁。我就冇乜所謂。

28. 飯後，標哥例牌捉我地去陪佢聽歌。係聽歌唔係唱歌。去邊聽？多數係酒店，有 Live Music嗰啲。標哥同我講 Santana，講Deep Purple，講Dire Straits，講Pink Flyod，講Led Zeppelin（！）。其他後生同事當然唔多識理佢，唯獨我搭到嘴。

29. 但，點解？「因為我老豆聽！」。聽到呢句標哥就有啲唔高興，「講到我做得你老豆咁喎」。但事實係，因為我老豆十八歲生我，其實仲後生過標哥。

30. 第度唔知，但當時聽啲Live Music，十居其九都係賓佬賓妹唱。

31. 而其中一個賓佬，就係Joey Vidal．乜水？就係衞蘭嘅老豆！亦係衞詩嘅老豆！我點解知？因為我拎過衞蘭嘅CD畀佢轉交個女簽名！

32. 簡直不能相信，咁就16年前嘅事。

（＊）當年係因為有教書舊同事去咗太古城地利亞，拉我過檔，兩皮嘢個月。我返去蕉行辭職，獲標哥挽留（因為佢怕煩，咁當然亦因為我唔係十分非常差）。就match 返我個人工。點解係18500 唔係 20000？舊文有寫。但呢個短故事已經話你知三個職場法則：第一，識人好過識字（舊同事介紹我去地利亞）。第二，好多老細係怕煩嘅，又唔係佢嘅錢，加你人工冇你想像咁難。但第三，第啲行業我唔知，但金融圈，你想人工加得快，得兩條路。A，你轉工，跳嚟跳去彈出彈入。B，你拎個屙化兇你老細加人工—Either way，你都係要有個屙化在手。

（＊＊）你可以睇下日鳩日講咩港紙爆煲呀聯匯乜乜呀嘅所謂KOL呀，專家呀，記者呀，有邊撚自己炒過IRS．乜嘢IRS？稅局呀？

—————————————————————
Ivan Patreon 狼耳街華人，一星期至少三篇港美市場評點，其他免費好文推介，每日一圖，仲有FB Page post summary．一個月一舊水唔使，開張一個月已近 500人訂，仲有兩篇免費試睇：https://bit.ly/31QmYj7

——————————————————————————
［收費短片第九擊］美股科技股是否泡沫爆破？價值投資之選

課程資訊：https://homebloggerhk.com/course_detail/?code=CC009

內容:
*美股急跌點算好
*科技股係咪泡沫爆煲？
*有乜價值投資之選？

本星期內特惠售價: $80
課程編號：CC009
觀看期限：首次播放後一星期及限每影片４次
客服whatsapp: 63832145

另外想買返第八擊（美國總統大選股票部署）都仲可以：https://bityl.co/3NPn

［補習天王的風險管理］本人不仇富，亦不落井下石。但純技術討論。係咪有啲改進空間？

1. TL；DR – 呢種賣內幕貼士嘅方法，係deemed to fail的。唔應該薄利多銷，應該做客制化，高端，私人銀行咁玩。

2. 純技術討論：犯法係唔啱嘅，捉到就罪有應得。「但諗下點唔畀人捉到」

3. 正經，非抽水。春風化乳，有教無淚，誨人好倦，埃汾教過書，私校津校都教過，中一至中七都教過（都幾好嘢，兩年教晒七級）。唔敢話挫肉英才，比較似係誤人子弟，corrupt the youth。但至少離開時都有口皆悲，學生普遍評價都幾好，而家結婚都仲會請我去飲，有事都問我意見，有啲仲成為呢度嘅讀者，甚至課埋金支持埃汾，呢啲就真係愚子可教，為師含笑九泉。

4. 但即使我仲係教書年代，仲未加入中環萬惡（但好過癮）嘅金融圈都好，即使我當時仲係個酸臭窮知識份子都好（詳見「安雅會談」，自己Google），我都唔係嗰啲道貌戇然嘅教書佬。我並唔係因為高人工而去教書（否則後來唔會丕咳三份一去做銀行），但錢幾時都係好重要，有錢是好東西。

5. 所以我唔會好似啲行家咁批判補習天王。難聽啲講句，你眼紅人地啫。尼馬（冇錯巴西巴塞巴黎嗰個大三巴球員）其實由出道開始已經成日畀人批評，更多係佢嘅私生活，但我鍾意佢夠坦白。佢話（大意）：畀著你係我，後生，有錢，有力，唔通唔玩？留返七十歲先玩？（我加嘅）。正是如此。

6. 早排同朋友飲茶（包括安雅會談在場嘅兩位），又講開教書，我算係教得最耐（兩年）。至少我年代，教師中，都有個講法：好多教書都係三年內走人。唔係頭三年太惡頂，而係到三年後，你人工一加又加，一個唔該拎埋個cert Ed （PGDE教育文憑），你拎三皮幾嘢人工，但社會其他工作經驗係零，你仲點轉工？

7. 唯一出路就係做補習天王。實不相瞞，我都有咁立志過，甚至去見過，甚至有真補習天王見我。仲記得在佐敦，山林道對出彌敦道附近，某大牌補習社。當時見我嘅，係已經幾出名但未係買豪宅（屯門啫）嘅高式卡，Kevin Ko．

8. 聽聞佢已經退出江湖多年，咁為免年紀輕嘅讀者（呢度有冇？）唔知，高式卡真係相當咁出名。點出名？出名到《愛出貓》（仆街呢啲咁撚爛嘅戲我都入場睇）都要醜化佢，有個叫「高式古」嘅角色，而後來高式卡直頭出律師信的．彩蛋係，後來出碟，佢個名變成陳順發。唔知乜水？英文係Oxide Chan．仲唔知？咁證明你冇乜睇港片。Oxide就係彭順！咁陳順發當然就係彭順加彭發（＊＊），套戲正係彭順有份導演

9. 講返，我對蕭源甚麼，冇乜批評。黃國英話齋，呢啲補習天王，學生肯去畀錢，家長又支持（大多數都係家長畀啦，真係援交去補習咁痴線咩（＊＊＊）），咪完全證明所謂主流正規教育嘅失敗，日校老師嘅失敗。而天王（例如林逸欣）搵到咁多錢，就可以話正規學校係underpaid佢，市場肯畀佢，咪值。補習天王就係重視individual talent嘅行業，英超球星都係，investment banker都sort of 係。我從不眼紅人地，因為人地值。我冇美斯咁好波，亦冇陳美詩咁好波（唏波呢啲嘢好主觀），所以人地搵得多錢過你，優勝劣敗，有幾撚難明？

10. 講咗一大段都未入正題，只係想講，我無意針對蕭源，或做正義撚。當然犯法係唔啱的，我亦唔會Blame the system，佢係破壞咗個規則，同埋製造不公嘛，坐監就抵。

11. 而舊文都寫過（https://bit.ly/2ZEBaMA），有利益嘅嘢，自然有人出古惑，走後門。人性嚟的，唔好咁虛偽以為人人係君子馬蘭奴，世界只有馬蘭頭。球員轉會消息又好，諾貝爾奬又好，入美國大學又好，公開試試題又好。有high stake，自然有人犯險，自然有啲技不如人但有錢嘅人，想出術。

12. 但，你話馬後炮又好。其實蕭源呢種玩法係，係實會出事的。亦都係類似推土機執銀仔咁。

13. 你見到個矛盾在邊嘛？一方面，佢sell嘅，係內幕消息，本人好撚堅。但內幕消息，by definition 就係唔可以畀人知。請問，如何你可以用一樣，唔可以畀人知你知嘅嘢，去大鑼大鼓搵生意呢？

14. 所以，你話我冷氣軍師都好。首先，大家唔應該犯法。但如果係要咁出術嘅，就梗係唔係收幾舊水然後講畀幾百個學生聽（＊＊＊＊）。呢種玩法唔可以做薄利多銷。一定係私人銀行，tailor made，我只係做幾個有錢仔學生，但收佢每人一百幾十萬，只係講畀幾個人知，咁可能冇咁易出事？

15. 所以同樣道理，你見啲咩微信女咩內幕消息，必然係假。仲要你錢都冇比，仲有人地波波相睇。一定係流料。係堅料點會咁派？唔怕坐監？

16. 記住，純技術討論。大家唔好犯法。入赤柱擺壽酒，係冇人得閒嚟飲的。

17. 呢篇我幾滿意，如果大家反應好嘅，聽日我寫多篇類似嘅。講PTGF扯皮條，亦都係近期案例。咩係PTGF？我都唔知，好似啲化學物品嚟的，Polymer之類，PTFE啲朋友掛

（＊）呢篇其實特登玩咗好多四字成語，同學們可以拎去做中文Proveread．包括呢個Proveread都係要Proofread的

（＊＊）講開彭氏兄弟，當年我見過有條報紙題，叫做「彭氏兄弟迎娶李心潔」，真係改變我三觀。可惜冇相，亦可能係我曼德拉效應

（＊＊＊）又講開，我有個中學同學，唔係援交搵補習費咁痴線。但佢係本校地理科狀元（其實其他科都係），拎咗嘅獎學金（官校啲奬學金，一千幾百，尤如垃圾），第二日就拎去補Linda Lau。呢啲就叫市場取態。即係等於你捐罐橙汁畀道友，佢應該會想去賣咗佢然後去吸毒咁。

（＊＊＊＊）都未計，如果太多人知，根本你個消息就已經失咗意義，仲會令你風險更大。如果真係四份一考生都補佢，又知內幕，你估會點？四份一人拎Ａ？定係老廉好快搵到佢？

------------------------------
版務：收費專欄已推出，支持埃汾高質文章。幾舊水睇三個月，一星期三篇

請去呢度訂：bit.ly/2wVXndj
課程編號填: CC01
科咗水後後有Login及Password畀你

逢一三五入去 homebloggerhk.com （見到就睇到《事先張揚》），亦睇得返以前嘅文。一般我都係會黃昏出文嘅。

歡迎留言 如果喜歡，不妨新增字幕「中英文佳可」字幕組鏈結：

不定時有新會員專屬內容！從今天起開始加入(做會員)吧！
加入會員➔ https://www.youtube.com/2KMKingsley1028/join

2019年目標!1萬訂閱!!! 大家不妨放低1個訂閱支持下!!!

如果大家有什麼意見不妨留言! 想我嘗試拍什麼影片記得告訴我喇!
直播隨時入來吹下水，閒聊一下! 有咩問題隨時inbox我吧！

FB/IG在下 其他平台(Follow 我吧)
IG: @2km_kingsley
FB page : 2KM Kingsley