【龔成問答信箱】（Q22141-22160）

Q22141：

老師你好，想請教一下。我手上有9股均價$600的騰訊。最近跌到得$4xx。我係咪應該止蝕再係4xx買入月供？咁我個價就可以貼市d。

定應該繼續供？我計過要平均返個價去4字頭都要買入超過一手先得。求指教，謝謝

龔成老師：

騰訊（0700）可以持有，你這樣止蝕再買翻，是無意思的，所謂「個價就可以貼市d」只是一個左手數與右手數的問題，你絕對唔好比「買入價」限制左你的投資策略。

最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22142：

想請教一下，新手,現持︰

中銀03988,8000股，平均買入2.8蚊
盈富基金2800，一手，買入28.42
越秀服務06626,二手，平均買入4.9

這樣的組合太保守嗎？

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，算係一個偏保守的平穏增長組合。若你係中年人，或者投資取態較保守的人，這個組合係可以。

但若你係較年青，應以增值為主。中行(3988)只係收息股，增長力唔高，唔係咁適合。你可以用以下「平穏增長股」 + 「潛力股」，去取締中行。

如果你係偏年青，建議用潛力股，去增大翻個組合增長力。相反，你係近中年，可以用平穏增長股。

未來時間，你新投資都可以參考以下股票，再按你年紀和風險承受能力，去作出配置。

例如潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22143：

龔成老師你好，我同老公三十幾歲, 有2個小朋友。2019年賣樓, 搬番同屋企人一起係九龍住。

賣樓獲利約有300萬, 我地一半放入股票市場, 希望2-3年後可以買市區樓。

暫時買左以下股票, 想請問要唔要調整下? 同埋有咩股票推薦加入組合呢? 唔該哂!

匯控 (0005) @$40.48 有6400股
置富 (0778) @$9.12 有1000股
中銀 (3988) @$2.80 有160,000股
騰訊 (0700) @$610 有200股
潤泥 (1313) @8.66 有10000股

龔成老師︰

由於每個人都有「住」的需要，因此，長遠點都建議你買翻自住樓。

華潤水泥控股(1313)和騰訊 (0700)都有質素，但佢地波動性較大，你距離再買樓只有2-3年，時間唔算長，故不宜持有太多。現貨可持有，但就唔好再加注。

另外，你組合好集中係銀行股，咁會出現過度集中性風險。當銀行業有大問題時，你成個組合就會有重大影響。

因此，你要減持這2隻股票，令佢地比重，只佔組合2-3成。取回資金，可以分注買入以下股票。

若你想增長力高D(但風險都會較高)，可較集中平穏增長股。若你想較保守，可以集中係收息股。

收息股目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

到你置業前半年左右，你就要開始慢慢估貨。唔好等到要買樓一次過沽，因為無人知個陣時會係乜野價位。因此，你要慢慢沽出持貨，去平衡價格波動的風險。

------------------------------------------------

Q22144：

你好，如果扣除家用每月剩$13000（未扣其他日常開支），想開始投資有咩建議？暫時只係抽過ibond 冇其他投資。謝謝！

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

因此，你在選擇應該投資那一類股票時，會係因應你人生階段、投資經驗和風險承受能力，去做決定。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供，其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22145：

龔sir 你好,首先,真心好多謝你, 分享小小故事

本人18年創業失敗 , 負債30多萬,當時月入19000,每月還款15000,每日早餐食25元的燒味飯飽肚,中午不吃節省開支,晚餐再燒味飯 ,斷絕娛樂支出,

咬緊牙關渴望用最短的時間還清債務 終於在20年年初還清所有債務

在19年年尾,生活壓力無咁大的時候,購買了你的第一本書, 80後百期富翁 ,當中的心態對我影響好大,讓我確立財務目標,渴望掌控自己的未來 ,

21年年初更成為你倍升股的學生, 對財富之路的了解更多 ,真心再次多謝你

本人今年29歲 , 住公屋, 月入30000 ,現時每月存款18000, 現有資金60萬 ,預計2年內會存到人生第一個一百萬 ,思考未來計劃中

本人與父母同住公屋 , 由於父母年齡已過65歲,短期內不會被房署收回公屋 對未來置業計劃迷茫,未知方向,想你比小小意見

1)買私樓

與父母同住公屋 , 購買私樓出租, 家人作擔保人購買 500-600萬的私樓,做9成按揭 月供21000左右 , 放租大約可收回11000左右租金,

若有租戶的情況下實際每月支出大約一萬左右

2)綠表買居屋

把公屋交回,換購市區居屋 , 每月供款1萬8左右, 但就變成自住物業...雖然有升值空間,它日可出售套現, 但無法出租增加資金收入...

希望龔sir比比意見, 應該如何計畫 , 當有明確目標後,一定將會前進得更快更明確

最後再次祝你 身體健康 , 更早的達成你的目標, 然後開開心心住入你最早的目標

龔成老師︰

你唔需要太急考慮投資物業，現時租金回報率，唔算係好高。投資值博率計，先投資在股市，效益相信會較好。

你可以投資「平穏增長股」和「潛力股」。你每月5成儲蓄，即是用$9000做月供。其餘先儲起，用一邊月供一邊儲蓄的策略。

由於你已經上過股票班，投資上會有一定知識，潛力股可以佔組合約4-5成。但若你覺得，投資知識都未算掌握得太好，或者對這些股票唔係太熟識，可以調低個比重至2-3成。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

到了你真係有實際需要，要去購買一間自住樓時候。我會較建議買居屋，雖然佢投資價值不及私樓，但由於佢樓價私樓平。變相你可以空多更多資金，去投資優質股。

當然，因為係自住樓，最重要都係睇你「長線」生活所需，同埋是否可以做到「供得起」。只要做到這2點，基本上就無問題。

而你分享的這個經歷，對很多投資者和創業者，都很有教育意義。好多人都唔識面對失敗，不懂如何走出和面對逆境，你是一個很好的正面教材。

但你要記住，要留住財富，除了「知識」外，「健康」都係好重要。所以，斷絕娛樂和不必要開支係可以，但盡量少做一些會影響健康的事。影響到健康，一切都會變得不值。

加油!

------------------------------------------------

Q22146：

龔sir,你好 今年27歲，現時持股狀況如下，大部分跟龔sir你推薦都升 但自己高位入了其他 變相冇賺冇蝕….請問6919應沽出嗎？

剛忍痛沽出[email protected] 放 出2手 當時買入價是32.5.

以下股票都是一手買入，現想進行月供股票$8000分散風險，$3000小米，$3000金莎，$2000盈富基金 請問組合可以嗎？

No. 數量 平均買入價
386 10手 3.354
590 2手 16.1
2800 3手 24.6
1928 3手 31.4

1972 2手 19.5
788 10手 1.757
1810 2手 1810
6049 1手 35.5
6919 10手 32.5

龔成老師︰

人瑞人才(6919)主要為企業提供綜合人力資源服務，其服務包括發布招聘廣告、前端招聘、入職及上崗、後端人事管理等。

根據灼識諮詢報告，中國人力資源服務市場由2014年約人民幣1,912億元增長至2018年約人民幣4,086億元，複合年增長率為20.9%。

預期到2023年達到約人民幣10,142億元，複合年增長率為19.9%。故行業發展，預期係正面。

集團中國具有強大的服務網絡，覆蓋超過150個城市的客戶，開設超過20間辦公室。

按2020年末計，集團是內地龍頭靈活用工服務提供商，以工人數和收入計，市佔分別為2.3%和3.1%。

初步睇，此股都有投資價值。但人力需求很受經濟環境影響，加上集團現時賺錢能力，唔算得上十分強。

而且行業上，也算不上係藍海市場，因為行業都發展了一段時間，只是市佔較為分散，故增長力你預係中上，唔會係爆發性增長。

此股都有投資價值，但不宜太大注。若你持貨不多，可以守。

新東方在綫（1797）都有質素，但政策風險影響較大，不宜大注。

其實你持有股票，都係有投資價值。但較大問題係，你好多股票都係高位入貨。因此，我建議你暫時維持用月供投資，去減少你買貴貨的風險。

持股中，中石化(0386)增長力弱，以你年紀，不宜持有太多。你可以沽出部份，換至其他較有增長力的股票。

而月供方面，選股係可以，但我建議用指數基金做主力，資金分配轉為指數基金$3000、金沙(1928)和小米(1810)各$2500，咁會較好。

另外，現時大市只在合理區，每月資金唔好盡用。最好留有部份，等大跌市出現時，可以用來掃貨。

------------------------------------------------

Q22147：

老師：你好！有問題想請教你，首先自我介紹下，我同先生都是50幾歲，有一個仔和女，我做兼職每月3000元左右收入，先生每月約有18000元收入，

兒女還在讀書，每月交租12000元。現時有300萬現金，眼見資金越耒越少，心情難受，近排同先生開始學投資，

買了銀行安聯收益及增長基金（50萬）、純債卷（50萬）、農業股（50萬），請教我如何運用現有資金投資，目標是想草錢買層600萬左右樓住，

望老師能忙裡偷閑解答，萬分感謝！

龔成老師︰

雖然你地5X歲，但購買$600萬的物業，都可以做到按揭，當然成數未必高，以及年期未必長，因為你地現時月入不算多。

如果要累積多幾年錢先買樓，如5-10年，你地能按揭就更少，但如果現時短期內無法買樓，都無辦法，要慢慢儲錢進行。所以，我就當你地能按揭的金額好低或無按揭，去進行分析。

當然，當你地不斷儲錢時，都可以了解下樓市，不一定儲到足夠的數先開始，中間可以調整。

首先，大方向要累積到較大金額，我先以這個假設作分析。

若果係希望將300萬現金，增值去買600萬的物業，重點應放係增值之上。

但由於你和你先生，已經係50幾歲，都比較接近退休之年，係做銀行按揭上，會較困難。因此你需要累積更多資金，甚至係用全樓價作目標，去作準備。

以你年們年紀，投資選項上要保守少少。我建議你利用平穏增長股，作為增值平台。

平穏增長股︰金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

現時大市只是合理區，你現有可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

若你將來子女畢業，開支無咁多的時候，每月若有空出的資金，建議你用這筆錢，去做月供股票，去加快你增值速度。

策略上，你每月先用5成儲蓄做月供。其餘先儲起，用一邊月供一邊儲蓄的策略。餘下一半儲蓄，就等出現大跌市時出手。

而你現時基金和股票，可以審視翻佢地增長力和質素，去決定是否持有。債券只係產品，主要係提供穏定現金流，無增長力。用於增值，就唔係咁適合。

我假設投資回報有8-10%（連股息再投資），你現時投資$300萬，10年後大約會增值至650-780萬。

但你唔好因為見已多於600萬，就覺得足夠。因為置業時，還有其他連帶成本(如稅、律師費、裝修等)。

再加上，到時已到你們退休之年，你們係需要額外一筆資金，去投資收息資產，為自己創造現金流，去支援你退休開銷。

假設你希望退休後，想每月有1萬蚊現金流收入，以股息率6%計，你就需要本金200萬。你可以用此作為參考，去計劃你未來10年投資大計。

------------------------------------------------

Q22148：

成哥，其實我真係想上你既股票班，但我又行動不便

坐車點對點我都得既
因為真係好想學點估值
而家蠻中中咁買股
好蠢

係咪上完堂
自己肯學會學識？

龔成老師：

完成課程後，你會掌握：
☆自己設定投資策略
☆掌握資金分配
☆低風險爭取合理回報方法
☆能分辨股票優劣
☆為企業優質度評分
☆懂得自行尋找優質股
☆掌握5種選股方法
☆掌握大市買入及沽出時機
☆能評估現股價處平或貴
☆掌握企業估值
☆懂得閱讀企業年報
☆懂得分析財務報表

如果你決心足夠，我相信你總會方法去到上堂的，我未搞澳門股票班前，每一期都有幾個澳門過去的同學，每次上次，由澳門來回香港，8堂如此，每次來回花的時間要4小時，我相信你花的時間，應該不用這麼多。

唔好比一些小問題，影響左你追求進步的心，加油！

------------------------------------------------

Q22149：

您好 龔老師：我初學投資購買股票 想請教您

有穩定工作 每月收入約$45000，租金$10000，還貸款$3750（尚有12期）、保險每月$1800

單親家庭 有1小孩（9歲）、請問我應如何投資好呢？

先謝謝解答

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀，應以增值為主，建議你用「平穏增長股」 + 「潛力股」作組合，去創造一個增值平台。

若你偏向較年青，潛力股可佔3-4成。但若你偏向中年，潛力股佔1-2成好了。到你有一定投資經驗，潛力股比重可以調升翻少少。

由於你係初學者，對企業估值，點去定平貴未必太了解。我建議你先利用月供模式，去建立一個股票組合，以減低買貴貨風險。

策略上，現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22150：

老師你好,唔好意思我想問下1177, 9988 & 941邊隻股票投資較好。

另外想問下我本身用左10萬買左銀行投資plan要放15年。

另外股票方面現在941有2手,9988有1手。本身喺Manulife買左每月供基金下年11月到期,嗰份基金現時大約$200,000.想用多10萬投資,

唸緊買股票定係投資喺Manulife有隻收益及增長基金每月派息大約6-7%. Many thanks

龔成老師︰

你上述3隻股票，都係有質素。但以你38歲年紀，投資應以增值為主。

中生(1177)和阿里(9988)係潛力股，適合你，現價合理，可以分注入市。但中移動(0941)只係收息股，增長力欠奉，對你就未必太合適。

至於一隻基金是否值得投資，你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

以每月派息7%計，勉強算可以。但你要了解翻個派息是否保證，若非保證﹐長線計投資價質股，相信會較高值博率。

------------------------------------------------

Q22151：

老師我有一個難題唔知點做！我媽媽有一層45年舊樓一向放租，近年疫情長達十年租客唔租，因為多年無維修，現在打算大裝修再放租，其實我咁做啱唔啱，

定係有其他方法，保障我媽媽收入。希望老師能幫我分析一下。謝

龔成老師︰

其實你要考慮翻個物業長線投資價值，因為本身個樓齡都略大，長遠維修成本會增加，會有機會慢慢蠶食租金回報。

除非，係一些大型屋苑(特別係藍籌屋苑)，或者你相信裝修後，租金回報會唔錯，而且可以維持一段較長時間。

否則，你要計劃下將佢轉換成其他資產。個新資產，可以係收租物業、收息股或者其他收息產品，都係可以。

若你不打算再新置收租物業，你可以考慮以下收息資產，大致可將資金分成4部分，平衡去分配就可以。

第一部分投資收息股，你可以建立一個收息股組合，你可考慮港燈(2638)、香港電訊(6823)、工行(1398)、建行(0939)、置富(0778)、陽光(0435)等，大多有5%股息或以上(你可睇下我本《50穩健收息股》當中仲有好多)。

你可以用"分注"形式，慢慢儲貨。平均的投資這些股，除了可以得到穩健的收息收，同時可有效的分散風險。這些股票唔洗理佢股價波動，只要一直持有收息就可以。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。另外，你亦可投資銀行低風險類的產品，你可自行到銀行了解下，總之是「低風險，持續現金流」的。

第四，持有現金，這可以為你的後盾，以備不時之選。同時可以等投資機會。

------------------------------------------------

Q22152：

早晨你好，因為我不太懂投資，所以我想分散風險，打算分三筆錢，買入以有關三個板塊「電動汽車、醫藥、科技」的etf、指數或基金。

應該點買？有推薦嗎，或者哪裏可以找到？

龔成老師︰

若你對個別行業有信心，但又不懂從中選股，ETF會係一個唔錯選擇。

電動車行業，你可以用GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

醫藥方面，ＧＸ中國生科(2820)基金是被動ETF並旨在提供在扣除費用及開支前，與Solactive中國生物科技指數NTR(指數)表現緊密相關的投資回報。

而科技股，你可以考慮安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

以上3隻基金，現價大約在合理區頂，至略貴水平。因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

雖然你現時只有約35歲，算係年青。但畢竟以上都是水桶1股票，風險會較高。緊記，最多只可以佔組合4-5成，否則風險就會偏高。

------------------------------------------------

Q22153：

想問有關月供股票事項

我現時月入3萬、1萬家用、現金儲蓄4000

月供股票
1810 $500
1177 $500
2318 $500
2800 $1000

有1手比亞迪 高位240入左

請問老師我月供組合有無問題？

我想月供金額再加大，另外想供12或16，有無任何建議？

月供股票由今年四月開始

龔成老師︰

你現時月供組合，無問題。至於加大月供，恆基(0012)和新地(0016)都可以，但前者會較有發展潛力。

而你現時25歲，很年青，我反而建議考慮供多隻潛力股，去提升個組合增長力，以下都是一些合適選擇。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

另外，你尚很年青，你應該把握沒有太多財務負擔的時候，努力去做增值。最好係每月投入，可以去到人工一半，就較理想。

------------------------------------------------

Q22154：

老師，想問你意見，我係38歲既孖b媽咪，仔女今年3歲，老公係公務員，老公月供梗941 $2500, 823 $2500 我之前問完你意見，

所以月供梗3067 $2000 6823 $2000, 今日出糧公司加左我大概14-15%人工，所以想利用加左既人工，月供多一隻股票，請問有個提議呢？

還是喺我原有既3067, 6823加大月供金額？

我之前曾經問過你，另外心水既月供股票有1211, 2845, 2382，但最後我揀左3067（因為潛力較大）同6823（因為有息）

求指教一下，謝謝老師！

老師，我最後同老公決定供多隻66港鐵$3000, 941 $2500, 823 $2500, 3067 $2000, 6823 $2000, 一齊每個月供$12000, 希望10年後儲到筆錢俾孖b讀書用

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時38歲計，可以較偏重係增值方面。你現時月供股票，都可以。而新加入的港鐵（0066），都係合適的。

但香港電訊(6823)和中移動(0941)主要係收下息，增長力唔會好高，不宜月供太多。

你可以考慮將佢地月供金額減半，去供多一隻潛力股，增長力會較好。以下是一些合適選擇，供你參考。

潛力股可選阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。但佢地波動性和風險會較高，你要自己平衡。

現時大市只在合理區，每月資金唔好盡用。要留有部份，等大跌市出現時，可以用來掃貨。

------------------------------------------------

Q22155：

龔sir 你好呀，我係你澳門fans 呀，有少少關於買樓嘅問題想問下你意見。最近同女朋友睇中左一個半新樓嘅單位，

入伙唔夠4年嘅私人樓（金峰名匯近路環）建築面積大概610呎，實用率7成3嘅開放式單位，管理費要2.7。我地都幾鍾意個單位同屋苑，

因為入面比較寧靜和配套設施都齊。我地計算過如果供25年的話大概每個月19000（我地兩個收入差少少5萬，）

但如果租哩個單位就大概8000租，我見疫情期間澳門租金跌左好多，而樓市就只係D大單位回調幅度比較多。我計完之後發覺租嘅價錢好似化算好多（平供樓一半有多）。

如果你係我地會先租再等樓市跌定係都會覺得哩一個係入市機會，還有如果美國加息樓價下跌空間你覺得多唔多呢，謝謝

龔成老師︰

表面上，你租金支出比供樓少近半。但實際上，你供樓金額當中，有一部份係用來還本金，其實等同於係度儲緊資產。

所以，你首先要睇翻個物業，長線有無投資價值。最重要都是睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

同時，你再要審視其升值潛力，未來地區上、交通上、生活等等的配套發展，才去下一個結論，咁會較好。

另外，你再從自已長線生活需要，去睇下間物業係唔係適合。若2關都過到，而你長線又供得起，咁你去置業，係無問題。

記住，我地投資股市和買物業，都唔好用估走勢去進行，我地應用而一刻佢平貴和質素，去決定買賣策略，咁就可以。

至於美國加息，理論上係對樓市負面。但有多大影響，你要視乎佢加息的力度、時間、經濟情況、樓市供求等等因素。而一刻，較難有個明確結論。

------------------------------------------------

Q22156：

老師你好 我32歲，剛剛開始起步投資了，目前有30萬現金左右。用76.6 入了1手中電 28.7 入了1手盈富基金，淨24萬左右。

我打算分注入市 2-3個月後打算再去入1手中電 1手盈富基金

然後打算用8-10萬買儲蓄保險 分散投資

淨10萬現金做儲備

請問目前的策略可以嗎? 謝謝老師

龔成老師︰

以你32歲年紀，可以進取少少。中電(0002)增長力唔算太高，主要係收下息。現有1手可持有，就不要再加注。

你每2-3月入一手盈富(2800)，這個策略係可以。另外，我建議你加多隻潛力股，去提升組合增長力。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但現少不少潛力股，都尚在偏貴水平。再加上你剛開始投資，未必太懂得選股，我建議你先用行業ETF做目標，佢地都係一籃子企業，較能分散風險。

安碩恒生科技(3067)、ＧＸ中國電車基金（2845）、三星FANG ETF（2814）現價都在合理區頂，你可以用2-3月入一次的模式，去儲貨。

至於"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

------------------------------------------------

Q22157：

龔成老師。 又係我，又打擾你

首先第一樣野要感謝你，就是因為看你的書開始理財，資產增值，最大的改變由以後的日日外食改為盡量自己煮，籍此省錢。

現在每個月如沒額外消費由每月存5000-6000 增加至8000-9000。當然我爸爸近來身體不好，那是另一筆支出。雖然在大家看來是小數目，不過感謝你，讓我定立目標為將來負責。

第二，有關2013微盟，我女朋友之前2月以近30蚊高位買入（約3手，佔股票1x%)。我現在稍為幫她看了2019-2020的報表。

期實他現金流算不錯，不過他現金流主要來自19年約8億及20年約10億的融資或可換股債券，而21年6月也有約3億的融資，

這部份我覺得公司太倚賴融資，現在大家看到這類saas 網上平台、網上商店、網上廣告等的潛力，可能問題不大，不過我是看到隱憂。

另外，雖然他還在消錢階段時，但已有小量的盈利，但他太倚賴騰信，有2x%營收來自與騰信有關的業務。

這兩點是我比較擔心的地方。如果是你，你認為這股在未來5年有能力去到30蚊的價位？你會如何處理這個投資失誤？

但已有小量盈利是指2019年情況

龔成老師︰

微盟集團（2013）集團主要在中國從事提供軟件即服務產品及營銷服務。

佢的產品分為「商業雲」解決方案、「營銷雲」解決方案及「銷售雲」解決方案三類。

「商業雲」可助商戶開設線上業務並助彼等提升顧客參與度、轉化率、收益及忠誠度。「營銷雲」通過大數據分析能力及ＡＩ技術為商戶提供智能營銷服務。

這些都是將來發展的大趨勢，從業務潛力上，的確是有的，見佢財務數據的增長都強勁。

營業額其實持續都有增長，2018和2020年較大虧損，主要係一些金融資產公平值變動所致，並唔係業務上出問題。

至於你所講，佢現金流較依賴融資，這個的確會令風險增加左。但由於佢都係一間尚在發展階層企業，需要投入較大研發資金，故要用到融資去支援開發，都係合理。

而騰訊(0700)佔其收入近20%，唔算話好多，過度集中性風險，唔算係好大。

我地分析微盟，主要考慮點會放係企業和行業長遠發展潛力，而唔係而一刻。當然你所講融資較多問題，和發展上的不確定性，會令風險高左。

但整體而言，此股都係有投資價值。但投資時，我地要控制注碼，去平衡翻當中風險。

由於此股有投資價值，雖然買貴左，都可以守。長遠企業發展，會令估值會慢慢上升，從而股價會回升。

但持有3手係比例上，有少少多，你可以考慮減持1手，去平衡風險。如果你唔想沽，你可以用新資金，去慢慢平衡翻個比例，都係可以。

------------------------------------------------

Q22158：

1830幾多才入市

2331可以考慮買嗎

山東黃金可以買入嗎

想重整股票組合。哪些值得投資

美股期權交易是否好大風險

龔成老師︰

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。

李寧（2331）有質素，佢係中國領先的體育品牌企業之一，擁有品牌行銷、研發、設計、製造、經銷及零售能力。

但現價偏貴，你要等佢有較大跌幅，才好開始小注入貨。

你組合中，大部份都有質素，可長線持有。

但留意，山東黃金（1787）盈利始終受國際黃金價格影響，本質上會較為被動，無乜價格自主能力，同時產品無差異性，是典型的商品企業。

這類企業都有一定的投資價值，但就不會太高。現價都合理，可分注入貨，但不宜持有太多。

中糧肉食(1610)、五菱汽車(0305)質素中等，不宜持有太多。

中國黃金國際(2099)無明顯投資價值，建議沽出。

美股，係有投資價值。但期權這類估走勢的工具，我就唔建議。你應該用翻正確投資方法，就去分析一間企業優劣，再用平貴向定買入策略，之後長線持有。

------------------------------------------------

Q22159：

龔sir, 我今年54歲，月供由1月2020年至現在，大約年半時間，股票之前組合︰

盈富基金$4000
港鐵 $2000
長江基建 $2000
金沙 $2000
中電$2000
港燈$2000
香港電訊 $2000

另外，分注買入
粵海 6000股
港交所 200股
煤氣 2000 股
六福3000 股
恆基 5000 股
置富 產業信托5000 股
中國鐵搭 2000股
小米 400 股

現時組合股票共現值HK90幾萬

很多年前月供盈富基金，大約有2100股，之後停咗，到之後認識你再重啟供股的路，現時都有正增長，好感激你，想問

1.現時組合是否太散？

2.我打算改變月供組合為

盈富基金$4000
長江基建 $2000
金沙 $2000
香港電訊 $2000
港燈 $1000
港交所 $1000
港鐵 $2000
中電$2000

希望這組合可以增加增長率，但是適合我否？

3. 另外，現在有現金大約60萬⋯⋯已經留咗20萬現金作急用（不動產），請問現時那隻股票可以值得分注買入呢？希望趁平價買入以上種類股票，麻煩幫幫忙

4. 另外，想問如果每月供$15000，六年後有沒有可能累積倒市值500萬股票？

真的感謝你幫忙，以上咁多問題希望你唔會介意，因為自從認識你之後真的財富增長速度比我之前以儲蓄的速度相差一截，在此多謝晒你

龔成老師︰

1) 唔算太散，都可以。

但緊記，現時大市只在合理區，每月資金唔好用晒去月供。最好留有部份，等大跌市出現時，可以用來掃貨。

2) 你將港燈(2638)月供資金，換成港交所(0388)係可以。

但以你54歲年紀，要開始為退休作出準備。港交所(0388)這類潛力股，唔可以持有太多，最多只可以佔組合1-2成。

而且，你成個股票組合，你按年慢慢向保守方向調整。慢慢加大收息股比重，到退休時，收息股最好係佔組合100%。

3) 以下股票，都在合理區。而且佢地都係較適合你年紀，未來應以這些股票，作增值目標。

但由於你本身已有一定持股，故我建議你現時40萬現金，等大市真係有較明顯回調，才慢慢出手。

平穩增值股︰、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

收息股︰港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

4) 我假設投資回報有8%（連股息再投資），你每月投資$15000，6年後大約只會增值至130萬。

但若用你實際情況，每月供$16000 + 現有資產130萬(持股90萬和現金40萬)，6年後係會增值至340萬。

如果要做到你6年後有500萬目標，就要將月供加大至$33000。若不相加大投資資金，就要將年期加長至9年，才可以做到。

------------------------------------------------

Q22160：

你好， 好想長期投資，好認同你嘅投資策略

本人背景，27歲 現有36萬 月入2萬，宜家有1801 一手 ，1772 一手，少量美股

請問有咩投資建議可以長期有回報？

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時27歲去計，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，應以增值為主。信達生物（1801）和贛鋒鋰業（1772）都適合你，但信達生物不確定性較高，不要持有太多。

至於美股，你可以睇翻佢有無增長力和質素，去決定是否持有。

未來投資，你可以集中係「平穏增長股」和「潛力股」。你每月用5成儲蓄做月供，其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

大市現處於合理水平，那36萬資金，你可以先用一半，以"分注"形式慢慢入貨。餘下一半和每月儲蓄，就等大跌市機會出現，才大力度掃貨，並長線投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21601-Q21620）

Q21601：

Hi 你好，睇咗你個page好耐，本人一路想做中低風險投資，只係未開始落手做，因為我知道好大部份財經資訊同新聞都唔係真係教人投資令讀者得到回報同被動收入，

而係好似龐氏騙局咁，呢個觀察令我大學揀商科都選擇咗marketing and pr，冇揀banking and finance，到而家我都係做嘢然後儲錢，冇投資過。

我想由頭開始學正確嘅投資方法，唔係投機或者賭博，我唔想做個啲無基礎知識扮識個類人，請問我可以點做？

如果係咁，我minimum應該預幾多本金慢慢累積呢？

多謝你睇我個msg！期待回覆。

龔成老師︰

你要分清甚麼是「龐氏騙局」，原理就是一個無任何經濟價值的項目，只利用新加入的投資者資金，令初期投資者得益，以這模式一支滾存。

但如果一間企業，本身有實體價值，對社會有長期正面影響，就不是騙局，你要分清「價值」的概念。

其實，坊間你會接受到好多投資資訊，但並不是全部有用。你要學識分辨那些"有用的客觀資訊"和"主觀的個人意見"。

前者係一些你值得參考的資訊，後者對你係無任何意義。

投資絕對唔應該係賭博，因此你需要有相關知識和經驗，去助你判斷每個投資機會。所以，你係投資前，一定要增進投資知識。

我自己會看好多有關投資、理財、股票、成功、激勵、心靈、致富等各方面的書。

我一開始，對投資一無所知，當開始睇，就發現自己過住的投資方法都是錯，更發現坊間的所謂「專家」、散戶，投資方法都是錯！

之後，我開始明白點解香港有9成散戶，投資股票都是輸多贏少，因為佢地無知識！

當我愈睇書，就愈明白真正的投資道理，同時自己的投資實力大升。由多年前輸多贏少，到現時贏多輸少。唔少散戶，可能憑短期市況好而獲利，但如果要做長勝將軍，就只有靠知識。

巴菲特的閱讀就更多，他多年來，絕對不是「睇住個市」，而是不斷睇書增加知識，睇年報了解企業。

我最初睇得好廣泛，到後來會睇較多「分析企業」、「價值投資法」、「巴菲特」類的書。

以下是我認為適合初學者睇的書，部分要到圖書館找的：

《我十一歲，就很有錢》
《經濟蕭條中，七年賺$1500萬》
《富爸爸，窮爸爸》
《思考致富聖經》
《秘密》
《財富金鑰匙》
《有錢人想的和你不一樣》
《世界上最偉大的成功寶典》
《洛克菲勒寫給兒子的38封信》
《解讀巴菲特》
《巴菲特傳-永恆的價值》
《勝券在握》
《智慧型股票投資人》
《非常潛力股》
《彼得林區的選股戰略》
《誰搬走了我的乳酪？》
《人性的弱點》

同時間，你都可以睇我架《80後百萬富翁》、《財務自由行》和《股票勝經》，都適合初學者。

至於開始投資，你唔需要預好多本金。其實只要每月有一定閒錢，就可以用月供股票，去做財富增值。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

若你係偏年青，應以增值為主，建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄做月供。其餘先儲起，用一邊月供一邊儲蓄的策略。

由於你投資知識不高，因此可較集中ETF。到你有一定知識，對這些股票又有一定了解，才考慮加入其他股票，咁會較好。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q21602：

龔sir你好，3年前接觸你的fb及書籍，見你一直推介1211， 思量後跟你買了少少，現在還持有著，真的萬分感激你！

講一講我背景，42歲，月入4萬，單身，與1位退休家人同住居屋（已供完），屋企所有開支我全負責，每月儲1.3萬。手上現金1百萬，但當中30萬要撥備以防不時之需。

因投資知識不足，股票分得太散，成19隻，當中不乏高位買入。曾經看過阿sir說8-9隻股票組合就夠了，所以想向阿sir請教一下我該如何整合出一個平衡及適合我歲數的組合

以下是手上股票數目及買入價-

銀娛，1手，$52.2
金沙，3手，$35
港鐵，1手，$41.2
粵海，2手，$12.28
比亞迪，3手，$40.6

福壽園，2手，$7.5
小米，2手，$22.9
阿里巴巴，2手，$215.8
騰訊，2手，$610
中生，1手，$7.72
平安好醫生，2手， $84.8

京東健康，1手，$112
金界，2手，$7.7
郵儲銀行，1手，$5.82
中行，1手，$2.95
中銀香港，3手，$29.81

中國人壽，1手，十幾年前買忘了價位
長和 及 長地， 各1手多，當年和黃重組換成的，和黃$68買入

今年4月剛開始月供 恆地$2000 及 中生$1000

想請教阿sir-

1）19隻股票內哪些該集中保留？

2）中銀香港，金沙，郵儲，一來高位買入，二來好似增長不大。是不是等到升回買入價後該優先舍棄呢？

3）手上股票市值8x萬，可動用的現金70萬，比例約一半一半。是不是全部現金都留待大市在平宜區時才入貨較好呢？

如果現在想慢慢入10萬貨，該加注哪隻較好？

謝謝你的時間及解答！Thank you very much!

龔成老師︰

1) 你現時有股票，都係有質素和適合你年紀，不需沽出任何一隻，照長線持有就可以。

中國人壽(2628)賺錢能力弱左，質素只算中等，現貨可持有，但不要加注。

但長線計，你要集中翻係10隻以內，否則你好難定期去審視佢地質素。

2) 首先你要明白一個概念，我地持有一隻股票與否，關鍵位是企業質素、前景，不要被買入價影響。因為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心，照持有就可以。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

這3隻股票都有質素，佢地增長力無潛力股咁高。中銀香港(2388)和金沙(1928)有平穏增長力，加一定股息。而郵儲銀行(1658)主要係派息。

雖然佢地增長力唔高，但有助於你平衡成個組合，建議保留。

3) 現時大市只係合理水平，現金佔比重大約3-5成。餘下資金，就等大跌市出現，才加大力度掃貨。

你想再動用10萬，去分注入市，都係可以。

由於你現時組合，潛力股較多，再加上不少潛力股都在略貴水平。我建議你這10萬，集中係一些平穏增長股身上。現價都算合理水平，可分注儲貨。

另外，你月供組合都可以。但我建議加大月供供款，最好用每月一半儲蓄去做($6500)，餘下一半儲起，等大跌市機會。

------------------------------------------------

Q21603：

龔成老師，本人一直有追蹤你的FACEBOOK和YOUTUBE頻道，雖然你我不曾認識，但對於你想提升大眾的財務知識水平的大任，我實在深感佩服。

而當中的一些觀點，我卻出奇地認同，所以我想寫信給你。感謝你寫了80後千萬富翁這書，也希望藉此告之你有知音，認同其致富之道。

其實我和龔成老師的背景有點相似，自小在公共屋村長大，家境非常一般，讀書也不是特別擅長，會考只有十五分，大學也是剛剛好的進去，畢業成績也是非常一般。還有一點相似的是，我們畢業後都從事銀行業。

龔成老師在很早便明白為富者，有很多道理並非一般中小大學課程所傳授，反而更多是躲在日常生活中的潛則規。我贊同推廣財務教育，畢竟金錢是我們所有人一生中用得最多的工具，但現今竟缺乏學科教授。

然而現在的教育制度也僅僅是培養年輕人成為一個出色的僱員或專業人士，而絕非是一個創業家或投資者。

我和龔成老師也有一點很似，就是很早已經讀了很多金融及理財書藉，可能在潛移默化下走上一個銀行家之路。

可是現今的銀行家大多變成跑數的代表，亦只是公司的其中一個齒輪，即是離不開僱員的命運，你所有的付出和努力說穿了也只是為公司的盈利貢獻。

你所分得的其實很少，但付出了最寶貴的時間，這點我非常明白，但我之前 沒有老師當初的勇氣逃脫這命運之輪。反而沉醉在大公司所給予的看似亮麗的職位和不高不低的收入。

當然後來我真的離開了創立了一隊銷售團隊，單純為了持續而穩定的被動收入和可持續的事業發展。

所以我看到龔成老師所提及成為富翁的五大範疇時（全職股票/商業投資者，全職物業投資者，知名專家，企業家，擁有強大銷售團隊）突然發覺自己一路走來方向是對的。

雖然我和所有一般大眾一樣不是天才，也不是特別聰明。但我天生對所有學問的追求和強大行動力，令我創造了很多人認為的不可能。

在我29歲時買下第一層物業。在35歲，在銀行事業正處高峰時離開選擇一條不一樣的路。在於39歲時重返中文大學修讀全職MBA，主修創業家精神。

在40歲時選擇創立銷售團隊不再為大公司拼命，而是為自己而作選擇。回顧到此，再看看你寫的書，便明白有知音，所以非常感激你可以將你的想法匯集成書，以簡潔的方式表達出來，激勵大眾。除了堅定了我的信念外，你的點子也給我和同事們訓練的重要材料之一，我實在感激。

你在書本中提及銷售能力的重要性，年少時的我曾對銷售員有種不屑之感。

我不知道是大眾的刻版印象影響了我，還是成長中有植入錯誤觀念。到我認真反思為富者應具備的能力時，我真的認為銷售技巧和投資知識非常重要，

其實每一個人也需要作銷售，包括是向股東或潛在投資者解說的CEO，以及是提出論點和協議的大律師，本質上也是銷售。所以愈快掌握和深入研究當中技巧對將來致富之路會更為輕鬆。

最後，我花了二天時間讀完80後千萬富翁，在此我鼓勵其他人。龔成老師所說的並不是提供股票號碼，而是確實地，有系統地說明致富的潛則規和在正常書本中學不到的論財知識，所以我非常推薦這書。也希望在不久之將來可以和老師好好交流一下。謝謝你。

你的追隨者

龔成老師︰

多謝你的支持！其實我希望將正確投資理念，和一些過往經驗和方法，跟大眾分享。

希望為一班有理想，但未找到方法的人，提供一條可參考的道路。

同時，也為一班對投資理財有誤解，因而到處碰壁的朋友，引領佢地重回正軌。

成個財富增值之路，要透過不斷學習，令自己保持進步，才可以令我們走得更高，更遠。

其實當我寫書、教班時，我除左想賺錢外，同錯會一定想「怎樣貢獻到社會」，這是一個好大的核心，我相信只要這個大方I向正確，所做的事就正確，而錢就會進來。保持努力，加油~

------------------------------------------------

Q21604：

老師，你好呀。最近岩岩睇完你講樓市既書，

有一章講到地區性。我想問最近有好多新樓盤既位置都係新開發。

我想問問老師點睇屯門掃管芴一帶既新樓盤。

呢一區會唔會受惠到屯赤公路，駁去港珠澳大橋。
發展潛力大唔大呀？好唔好係果區上車

龔成老師︰

屯門是大型的住宅區，商業活動少。而且地理位置上，較遠離市區，因此樓價與市區有距離。

但隨屯門港鐵通車，屯門區交通會較以前便利。屯赤公路，可能都會係一個利好因素。

但始終屯門跟市區有一定隔離，而掃管笏雖在屯門﹐但隔離港鐵站較遠，未能明顯受惠。

因此，掃管笏升值潛力係有，但唔會話好高。因為所有利好因素都反映左，預期掃管笏配套，未來都唔會有好大提升。

------------------------------------------------

Q21605：

想請教，我五十歲，看了你的幾本著作！先想學買股票！

（我份工六十歲要退休，我只剩十年時間有收入去投資！）我應該用月供買邊D股票？

（我每月得4000可運用）手中儲蓄有18萬（但唔係太咁動用)？謝！

龔成老師︰

以你50歲的年齡計，其實已開始為退休做準備。你離退休尚有10年，只要好好把握，都可以做到一個合理增值效果。

但財富增長同時，我地不能過於進取。因此，你可以投資「平穩增值股」+「收息股」。

現時的$18萬，暫時只能動用$7-10萬，因為大市唔算平，你要分注投資，同時留下大約一半資金，等大跌市時入平貨，作長線投資。

當然你覺得自己風險承受力唔高，你保留多一點現金，都係可以。但就會令你財富增值效率，會慢左少少。

月供股票方面，你可以先用$1500供盈富（2800）和供2隻收息股(各$750)。餘下$1000就儲起，同樣等大跌市機會。

但就隨著年齡增加，你要慢慢增加收息股比例。到退休時，收息股佔組合100%。因為你到時，需要透過收息股的現金流(即係股息)，去支持你退休後日常開支。

以下是一些適合你的選擇，你可以從中參考下。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21606：

你好，想請教你一些意見。我今年47歲單身，同家人同住公屋，自己有銀行儲蓄大約39萬，股票大約11萬，MPF大約55萬。

想自己搬出來住有私人空間，買樓但又唔想全部銀行儲蓄用晒，唔知好唔好租樓 。

又諗過海外買樓會平啲，再放租出去，再在香港租樓。
你有什麼意見？我頗煩惱。

謝謝！

龔成老師︰

如果置業後，會令到你資金儲備盡用，再無閒錢去買優質股，去保持投資增值，係唔理想。

至於租樓，會令你可投資資金減少，減低左財富增值能力。如非必要，我都唔建議咁做。

當然你可以用買海外樓收租，再租香港樓的方法，去平衡個支出。

但你必需對海外樓投資，有全面的認知，才好實行。我地投資的其中一個關鍵，是你有多認識這項目，「不認識就不投資」，如果你真的已了解當地的物業市場、租務市場、法例、經濟發展，那可說是過了第一關。

土地是有限資源，所以長期一定上升，但你都要分析這地方的長期土地供應。另外就是匯價如何，就算物業有穩定租金，以及樓價上升，但若然匯價不穩，都會對你的投資造成打擊，這方面不能忽視，你應該了解當地貨幣過去的變化，以及將來的強弱分析。

若你不懂，就不要去投資了。

以你47歲，要開始慢慢為退休做準備。在財富增值上，你可以集中係優質股身上。投資目標，可以用「平穩增值股」為主。

現時的$39萬，建議動用多$5-10萬，因為大市唔算平，你要分注投資，同時留下約一半資金。長線投資。

如果你每月有閒錢可以儲，你可以做埋月供股票，供「平穩增值股」。比例上都係用一半，餘下儲起，等大跌市機會。

------------------------------------------------

Q21607：

龔sir, 我是一位50歲嘅未婚女士，有男友但未有結婚打算，現獨居在與父親合資的自住物業。

2008年以198萬買入，市值約750萬，按揭尚餘107萬還清，每月用$6,600供樓。

我現時喺政府做合約職員（今年內可能轉制成為公務員），月入5萬，每年約滿後有一筆約滿酬金，佔全年收入15%，收入算穩定。

做呢份工之前一直不懂投資，亦沒有太多儲蓄。入職5年後到現在儲到約55萬現金，另有30萬股票，同埋下年就供完嘅基金投資保險（現值約24萬）。

股票資產分佈如下：
388 (100股）@$362.7
823（571股）@$78.9
1211 (517股）@$168
1810 (1200股）@$27.3

2800（1774股）@$26.8
6618（100股）@$165
9988（107股）@$250.5

每月扣除按揭供款，所有開支和供養父母的費用後，每月大約儲到$15,000現金。

早前follow你嘅post得到啟發，亦都很認同價值投資法，所以用其中$5,000月供2800和823至上述數量，供咗3年左右直到去年因某些原因停咗月供。

現有數個問題希望你指點一下：

1. 根據現時嘅工作狀況，我預算65歲退休，希望用餘下嘅工作年期可以盡快儲到更多錢做退休儲備。如恢復月供股票應該怎樣分佈較適合我？

2. 你對我現時嘅股票組合有什麼評價？由於有啲股票於較高位買入,現時股價回落，是否應繼續持有抑或應趁低吸納更多？

3. 現時嘅資產應怎樣配置才有機會達到每月$30000現金收入嘅退休目標？

4. 明年供完嘅基金投資保險，到時應全數提取作其他投資，抑或繼續存放滾存比較適合？

感謝你嘅耐性及期待你嘅回覆。謝謝。

龔成老師︰

1) 以你的年齡，其實要開始為退休做準備，但同時，財富仍有增長力（但不是進取），因此，你可以投資「平穩增值股」+「收息股」。

現時的$110萬(連同將贖回24萬基金)，可動用多20-30萬，因為大市唔算平，你要分注投資。同時留下一半資金，等大跌市出現，用來買平貨，作長線投資。

月供方面，你可以供「平穩增值股」+「收息股」。每月先用$8000供款，餘下$7000就儲起，同樣用來等大跌市機會。

如果你風險承受力較高，又想進取D，可以較集中係「平穩增值股」。相反，你較保守，可以較集中係「收息股」。

但你要留意，隨著年齡增加，要慢慢增加收息股的比例。到退休時，收息股應佔100%。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)。

收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

緊記，月供係一個長線計劃，唔好供下停下。咁樣會影響到平均價格風險的效果，會對你造成不利。

2) 你組合的股票，都係有質素。除左京東健康（6618）真係買入價偏貴外，其他都唔係太貴，算係貴左少少。

部份投資，雖然帳面上有虧損，但由於企業係有質素。長線佢地價值，都會慢慢提升，所以你長線持有就可以。

盈富(2800)和領展(0823)，未來再有明顯回調，你可以考慮加注。

但其他持股，因為風險較高，以你年紀不應持有太多。故只建議你持有現貨，不要再加注了。

3) 由於你自住問題已解決，也算持有一物業。故未來增值上，都係集中係優質股，令成個財富組合更平衡。

如果你希望退休後，每月有3萬蚊現金流，以股息率6%計，你需要本金600萬。

我假設投資回報有8%（連股息再投資），你每月投資$15000 + 現有110萬資產，15年後大約會增值至830萬，故這樣安排相信很大機會達至你的財務目標。

4) 你要睇佢扣除費用後，回報係多少。如果佢整體係優於大市，而風險又唔算過高，你可以考慮繼續存放滾存。

否則，你就按以上計劃。將贖回資金，分注咁慢慢投入「平穩增值股」和「收息股」中。

------------------------------------------------

Q21608：

龔sir，感謝感謝，你之前的回覆得好詳細好用心，老公說很有參考價值，我一直都想供盈富。但考量澳門銀行手續費問題所以未實行，聽您說完更安心了。

我真的要盡快決定投入同開始草貨了。

我老公說：

1.上堂時您提出的‘佐丹奴、粵海投資、大快活、六福‘，當時係優質股，依家隔左咁多年還值得投資嗎？想您俾點點意見，因他說這幾隻文中冇提到。

2.佢見組合內沒有內銀股，如滙豐，這些股票適合繼續持有嗎？

3.科技ETF市面上還有幾隻，是否因為呢隻手續費平D所以選呢隻？

4. 另外是關於我自己的，當時藍月亮發行抽新股時，我抽中左一手，那時睇中它是獨市生意及大陸龍頭，所以冇放，在$13蚊多時更入多了一手，現在這情況你認為適唔適合溝貨或繼續持有？

5. 之前我幾心儀想入手必瘦站，5蚊既時候吾敢入貨吾識睇位，最終沒有持有，必瘦站您認為之後喺邊個位我可以入手？

感謝感謝。
————
我近日開始去看股票勝經，但現在我既level睇會卡住唔太明白，老公說睇左再上您既堂效果會更好。如果老公再上多一次堂，有沒有優惠?

我們2個都會一起上，因有他在我應該會更好學習。

龔成老師︰

1)以上4隻依然係有質素，你投資係無問題。佐丹奴(0709)主要係收息，增長力不高，唔係咁適合你年紀。

粵海投資(0270)和大快活(0052)則平穏增長+股息。而增長力，會係六福(0590)較高，這3隻你們都可以投資。

現時都在合理區，可分注。

2) 大型內銀股和匯控(0005)都有投資價值，但由於已經好大隻，未來增長力唔會高，主要係收息。

以你年紀，應以增長為主，這類收息股就唔係咁適合你。

3) 安碩恒生科技(3067)每年收費和追蹤誤差，都係幾隻當中較低，暫時睇會係較好選擇。

但你要留意，由於幾隻恒生科技ETF都係初上市，追蹤誤差只能作參考，實際誤差未必一樣。

4) 藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，若持貨佔你組合不高，長線持有就可以。

近期雖然回左唔少，但都只算係合理區頂，唔建議現時加注。最好回多1,2成，才考慮。

5) 必瘦站（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，又真係好想入。你可考慮回少少，先小注，然後等跌多d先正式分注投資。

6. 上堂前，你先睇左股票勝經，的確係有助吸收課堂知識。但唔明都唔緊要，到時課堂都會再仔細解釋，當中的概念。

如果你基礎不足，可以上多一次基礎班，同時當你地2人一同上，可以有互動作用，增加了學習的進度，打好基礎後，再上進階。

你重讀初班，可以比個優惠價你，你whatsapp 55457212我同事講翻。

------------------------------------------------

Q21609：

阿sir 我25歲，係疫情低下 3月頭我決定祼辭左一份我覺得毫無進升和學到野既工作！

我自知呢份工如同書入面星期一捱 想等星期五，毫無激情，繼續向呢個公司只係浪費時間（我覺得時間好寶貴）我已經考慮半年，

但身邊朋友同事都勸我騎牛搵馬，都唔太認同我辭職，話呢個時勢有咁既工已經算好，但最尾諗左半年決定辭 因為我唔知前面會點 但我知總會接觸新環境新事物

而且想趁冇負擔年齡試多啲 至少收入冇呢份工高 但我辭左好肯定都有兼職收入 經過兩個月一直好積極揾全職 一邊睇書 一邊兼職 奈何疫情下難揾全職

開始質疑自己夠竟係未岩同焦慮呢兩日睇左書阿sir 本書 覺得完全觀念同我想法一樣！令我更加相信自己冇揀錯，得到肯定！

因為我覺得我花更多時間黎睇理財知識 運動 學野是值得的！多謝阿sir !

龔成老師︰

其實，我地做決定，一定係睇長線。

好多人一直安於現狀，唔肯試下離開舒適圈，就永遠只能停留係現時階段。

恭喜你，能突破自己舒適圈。你才25歲，還很年輕，應該把握這個負擔較少的年紀，去作出不同的嘗試。

現時你就要好好計劃將來，到底自已未來10年、20年目標係點樣，想自己變成一個點樣架人。點做，才會一步步接近你想的人生。

你現時把握未有全職工作的時間，去學習、做運動，努力投資在自己身上，這個態度係非常正確。

相信你將來，一定可以找到理想的人生。

------------------------------------------------

Q21610：

龔SIR 你好~本人是投資倍升股課程學生，剛上了第一課，感謝你在課堂上釐清了一些錯誤的投資觀念。本人今年35歲，通常會每儲蓄到一筆錢就會買股票投資, 增值財富。

這個投資組合有沒有問題? 還是需要再執一執?

00388 $478.6 @200-
0003 $14 @3707-
0005 $33.617 @ 1200-
02202 $27.3 @200-
03988 $2.4 @3000-
09988 234.8 @100

另外，知道澳門政府在珠海哪邊建立一個新街坊項目，在橫琴哪邊建立一個屬於澳門的新區。（橫琴「澳門新街坊」項目）

位置鄰近澳門關口, 在此發展中的新區對面亦有新樓盤開賣, 你認為值不值得投資?樓價大約為33平方, 值港幣110 萬左右, 租大約每月可收4000-5000元。

龔成老師：

你上述持有的，基本上都有質素，不算差，但可以優化組合。

你年齡35歲，其實可以著重增值多少少，所以，你持有的煤氣（0003）、匯豐（0005）、中行（3988）只是收息類別，不應佔你組合比例太多。

至於港交所（0388）及阿里（9988）無問題。而萬科企業（2202）負債較高，不宜持有太多。

你在之後的財富配置，可以投資平穩增長股+潛力股。

至於澳門新街坊，我無仔細研究在，但我自己對橫琴是正面的，這地方是中央其中一個重點發展地區，加上澳門地方細，一定要想方法延伸經濟圈。

同時，中央會對澳門的信任度會大過香港，所以會加強澳門周邊地區發展。

當然，你最好實地考察下先，上述只是簡單意見。

------------------------------------------------

Q21611：

老師，我亦很仰慕股神巴菲特，所以我亦有投資brk.b，持有1個半月已有7.5%回報，再加上佢財報穩健，令我更有信心持有。

不過，畢竟他年時已高，有佢隨時退休令股價下跌的隱憂，亦不清楚接任的人會不會處理伯克希爾如股神一樣穩妥。

你又對此有什麼看法？

龔成老師︰

其實巴郡已經係一間大型企業，雖然股神巴菲特真的退下來，很難找一個有咁高能力的人取代。

但由於企業已係好成熟，就算係其他人掌舵，相信大方向唔會差好遠。

此股依然係具有投資價值，值得你長線持有，

不過，回報率點都會比過往略減，但仍然是不差的。

------------------------------------------------

Q21612：

想問老師，一年只買1/2隻股票，是否次次都是賺錢。

如果我這樣做，我心理上會害怕。如果睇錯，整年的儲蓄，會就此蝕了。

暫時都想分散投資，如果不夠資本，可能3067/2833/QQQ/VOO/ARKK便算

請問我的想法是否可行？

此外，你為何會有信心，果1/2隻會是眾多公司中，成長最快的一兩間？

龔成老師︰

唔係，就算股神巴菲特投資，都唔會隻隻都係賺錢，佢都試過不少失敗投資。

但由於佢成個組合做得好，整體成績都有唔錯表現，這就是我成日強調，組合要優質和平衡的原因。

其實只要你有一定經驗，細心分析，加上係合理價或以下，才買入優質股，長線虧損的機會，唔會好高。

至於點解有信心，個1,2隻係眾多公司中，成長最快的一兩間。除左累積不少分析經驗外，我都分析左好多企業，從中作比較，才會知道個別企業，優質度如何。

你5隻股票都有質素，3067/VOO/ARKK係潛力型股票，波動性較大。如果你係偏年長、投資經驗較少、或者風險承受力唔高，就不要持有太多。

現時大市在合理區，記得資金唔好用盡，要留部份等大跌市，才出手。

------------------------------------------------

Q21613：

老師，有評論話如果完美醫療（1830）無左過期套票，必瘦站會蝕錢，可信嗎？

龔成老師︰

完美醫療（1830），這個所謂過期套票，其實是指一些客人已付費，但顧客於合約服務期內並無使用服務確認的收益。

預繳收入其實在不少行業都存在，是一種對企業甚為有利的營運模式，利用折扣價向客戶出售預繳套票，藉此推廣纖體美容服務，多年來令集團收入提升不少。

而這些過期套票，大致維持佔每年入帳之套票2-3成。至於出現原因，可以係客人計錯數買多左，或者好多其他因素，無人知。

但這部份一直多年恆常地存在，佔收入比重每年都大致相同。基本上，佢已經算係恆常收入一部份。

這部份收益，無話好定唔好。但我地計算企業盈利時，考慮這部份收益，才算正常。因為佢真係成個生意模式中，其中一個收入部份。

其實，你試從顧客的角度去想想，當你買產品時，你不會假設自己不會用，而最終總會有一部分客無用，有部分客只用到部分。

正如你食一個飯，都會食剩，如果將食剩的%要退錢，要按比例從收入扣除，相信好多食店都會虧損。

這些「用不到」「食剩」，其實是產品收入的一部分，所以，做生意不可能強行將「過期套票」數目折去的。

------------------------------------------------

Q21614：

龔sir你好，今年33歲。早兩年賣左樓，賣咗樓之後大概有5,000,000現金，現在跟屋企人租緊樓，全家五人，爸爸媽媽啱啱退休，我同老公同細佬做嘢

大家都係搵萬幾蚊，每個月租金$29500，屋企人覺得都係買返樓好啲，自己都有買下股票，手上持有3690，3993，6969，6618，291，都係短炒為主

因為都想幫補租金，每年要供三份合共大約120,000保險，3年前供的，包括一份基金（$50000每年），基金已經供咗3年可以隨時停供

一份儲蓄（$50000每年）另外一份危疾（$26000每年），想你俾啲意見我，啲錢點樣可以運用同埋投資得好啲,可以40歲達致財務自由

龔成老師：

你地首先要決定，是否買翻買，如果買樓，就要預留部分資金，然後餘下投資增值。

如果唔買樓，就可全部用作增值。

如果現時完全無物業，我會傾向買基本的自住樓，但就作高成數按，餘下資金投資增值。

如果想40歲財務自由，你可以投資
平穩增長股：潛力股
7：3
（如果你投資實力較強，可增加潛力股比例）

好好利用7年時間，去進行財富增值，利用股票投資。現時現金，計好多少會買樓，餘下的「可長線投資金」，現時已可分注買入（當然要有一定的現金留低）。

另外，唔好再短炒。至於現時持有的其他理財產品，都可以繼續進行。

------------------------------------------------

Q21615：

老師你好....自己依家嘅方向好迷惘，自己有工作，但債項實在太多，呢個時候我真係唔知點做好.....

我好想去重新好好開始，已經31歲嘅我仲係一事無成，我依家應該要點做好....

龔成老師︰

我明白你此刻，可能有太多不如意事情，同時間圍繞在你身邊，令你好氣餒和無奈。

但其實所有問題，都總會有解決方法。在好多問題圍繞自己時，我地要努力去保持一個正面心態。有系統地，將問題逐一拆解。

首先，我相信你最大問題，係債務方面。你先集中去清理這部份，優先處理利息較高債項。或者可以將較高息債務，先轉到較低貸款利息的地方。

我地先減少你長線還債負擔，再慢慢被這些負債消滅。

至於，人生目標，每個人都不同。唔一定要做到家財萬貫，才算係事業有成。

你要清楚知道，5年、10年、甚至20年後，希望自己變成點。之後，再想下，點樣先可以一步步咁達成。

記住，這個世界無問題係解決唔到。只要你定好計劃，按部就班咁實行，問題總會解決。而你人生目標，都總會達到。

------------------------------------------------

Q21616：

Hi 龔sir! 我年紀2X, 每月都儲到幾千蚊加上本身有少少閒錢，所以想由月供股票開始投資。

我有3個問題希望龔sir可以指點一下。

第一：就係月供股票嘅回報。我傾向長期投資，但係唔知道長期係幾長。簡單啲講月供股應該供幾耐(5年10年?)，或者供到有幾多手先夠? 雖然成本平均咗，但回報係咪同時會平均(拉低)咗?

如果股價合適係咪直接(或儲夠錢)買一手長渣好啲?

第二：我諗緊月個股票包括0027 0293 0823 3690

前三隻我覺得喺疫情之下已經係低谷，未來幾年都會升。3690就潛力而言，現時股價係咪屬於合理/便宜區域，或者bottom line (市場消化完美團負面消息)?

第三：揀月供股嚟講成交量應唔應該係重要考量? 抑或其他因素比容易賣碎股更重要?

謝謝

龔成老師︰

1) 如果你定平貴能力不足，一手手買，會有買貴貨風險。月供可以平衡價格波動風險，所以較適合你這類初學者。

月供係一個長線計劃，月供最少維持3年，並持有這些股票5年以上，才會有較理想效果。當然，更理想係一直做，一直維持累積優質股(優質資產)的習慣，對你會最有利。

用月供方法，成本會拉平均左，但同時間，平均回報都會有機會被拖低左。

所以，若你用估值方法，直接1手手係合理區，甚至平宜水平才入貨，的確回報一般會比用月供儲貨為高。

但問題係，用估值方法去入貨，對投資知識要求較高。初學者我唔建議咁做，反而會增大你買貴貨的風險。

記住，我地投資唔係想賺到盡。而係在合理風險下，賺取最大回報。

2) 國泰（0293）的質素只是一般。其中一個風險，是油價，睇翻佢過往多年，油價對佢成本影響好大，令佢盈利十分波動，就算佢利用對沖，都唔係好成功，反而試過因對沖而蝕大錢。

另外，航空業對經濟週期較敏感，收入不穩，同時唔算係一個好賺錢的行業，因此這股的質素只是一般，此股不宜作為月供目標。

其餘3隻，用來月供都可以，美團點評（3690）有潛力的，但不確定性都高，只可小注月供。

3) 成交量，參考價值好低。有無碎股，其實都唔重要。

你要記住，我地係長線持有一些優質股，而唔係短炒。我地著眼點，應該係企業質素、行業發展、財務狀況等。

我建議你，可以睇我寫架"80後百萬富翁"、"財務自由行"和"股票勝經"，都適合初學者，可以令你更深入了解成個財富增值的理念。

------------------------------------------------

Q21617：

龔成老師你好！本人（31歲）與丈夫（34歲）共月入7萬，育有1子，現金大約有50萬，持有股票價值約12萬，依家持有友邦、盈富、小米、安碩恆生科技，買左一層公屋自住。

仲有3年供完，市值大約300萬。依家每月大概有3萬蚊流動資金可以用黎投資。

想問下老師，如果想係10年內做到每月被動收入有3萬，可唔可行？應該點先可以做到？

龔成老師︰

由於你已有自住物業，因此在你之後的財富配置上，不用太急增持物業部分，可以利用股票去進行增值，而現時自住公屋，基本上狀態不用有特別變動。過3年供樓完成後，你可以再加大力度投資股票，令財富進一步增值。

要做到每月有3萬蚊現金流這個目標，以股息率6%計，你需要本金600萬。

以你31歲，可以選擇一些「平穩增值股」+「潛力股」作投資目標。現有持股，都係有質素，適合用來增值，可長線持有。

以現時大市合理區狀況，你可以考慮用部份儲蓄，進行月供股票。你可以每月先用一半儲蓄，即先用$15000月供，另一半就先儲起架策略。

如果你投資經驗唔算高，可以先集中係平穏增長股，潛力股只小注(少於3成)。若你有一定投資經驗﹐可以加大潛力股比重，最多佔組合3-5成，視乎你投資經驗多寡和了解這些股票程度而定。

現時大市只是合理區，你現有50萬資金可以先投入多10-20萬，用"分注"形式，慢慢買貨。餘下資金和每月所儲倒的資金，就等大市出現一定程度的下跌，才大力度掃貨，然後長線投資。

我假設投資回報有10%（連股息再投資），你每月投資$30000 + 現有資產62萬(現+股票)，10年後大約會增值至720萬，故這樣安排相信很大機會達至你的財務目標。

------------------------------------------------

Q21618：

老師你好，小弟現年31歲手上有20萬資金想入市投資股票。

最近有留意0002, 0003, 0012, 2800, 6823想從中開始投資，不過有部分股黎緊都會除淨，理解到一般情況下股價係除淨日後會回調，

如果我目標係長線持有以上股票的話，請問我係唔係應該等除淨日後先開始入市？多謝老師指教。

龔成老師︰

你對除淨派息的運作，似乎有少少誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

所以，假設不受其他市場因素影響，單係除淨這個因素，除淨日股價下跌，係正常。

而「派息日」，就係這班合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作。因此，你唔會在此期間前後做買/沽貨，而出現任何著數。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

以你現時31歲去計，應先集中做好增值部份。你所講的股票都有質素﹐但中電(0002)、香港電訊(6823)增長力較弱，主要係收下息，不建議你持有太多。

策略上，你可以較集中投資在「平穏增長股」和「潛力股」上。如果你覺得自己經驗尚淺，想先保守少少，用中電(0002)、香港電訊(6823)都係可以。

現時大市只在合理水平，你20萬可以先用一半，以分注形式，慢慢入貨。餘下的另一半現金，我地就等機會，當大市出現較大回調，就加大力度掃貨，然後作長線投資。

由於「潛力股」係需要一定經驗，你投資經驗較淺，建議你先小注，大約佔組合3成左右。此期間，你要努力提高投資知識，到有一定水平時，你可以慢慢將佢調升至5成比重。

------------------------------------------------

Q21619：

你好，我由2020年中開始到今年5月在不同的日子持有的股票比例：

00941 10,000股
02628 10,000股
00003 10,000股
03988 5000股
700 100股

另有現金200,000

以上比例會唔會太不平均，比例太重放在0941？

呢幾隻都係股息很不錯的股票我才選上的，但其實這個想法是否錯誤？求解答！謝謝！

龔成老師︰

你現時持有的股票，大體上都有質素，可以長線持有。

但中國人壽(2628)增長力，近年明顯係弱左，你可以考慮沽少少，換去其他優質股。

另外，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你現時中國移動(0941)，佔成個組合一半，明顯係嚴重偏高。你必需慢慢減持部份，換至其他優質股，去平衡風險。

至於以上股票是否適合你，要睇你年紀、經驗和風險承受能力。

好以騰訊(0700)這類潛力股，增長潛力大，但同時間波動性都較高。比較適合年青、有經驗的投資者。否則，不宜持有太多。

至於中國移動(0941)、中行(3988)這類收息股，增長力好弱，但勝在有穏定的派息，風險較細。適合較年長、或者投資取態好保守架人士。

而中國人壽(2628)和煤氣(0003)算係2者只間，有一定增長力之餘，都有一定派息，風險度相對係中等。

你現時組合，算係一個偏向保守的平穏增長 + 收息組合。

若係較接近退休之年的人士，或者投資好保守，想以收息為主。941和3988係合適，但其餘幾隻，就未必太適合。

以下是一些優質收息股，給你參考。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

------------------------------------------------

Q21620：

小妹我已經35歲，工作13年，穩定，但無特破，對炒樓有興趣，想做地產經紀，但家庭有負擔，兩難，但我這年齡又是出去衝的最後機會，點算？

我想做有錢人，但呢刻又好多限制！
同埋我唔夠勇氣呀！

龔成老師︰

要成為有錢人，就不能安於現狀，要有勇氣去突破，你已經存在了第一個條件，因為你已懂得對不理想的現象不滿。

地產代理是成為有錢人的5大方法之一，建立銷售團隊之路。

但從事這條路，不確定性一定比你現時工作高。而且開頭時，收入有機會比你現有工作少。如你選擇好這條路，就要有一定決心，一直走行去。

否則，好大機會會令你成個事業發展，變得進退失據，你要明白這一點。

較好的方法，就是你一邊做現時的工作，一邊尋找一些可以「不辭工但又能創富」的模式（因為我從你的文字，已見到你勇氣不足，如果這刻不足，只能暫時留在原工作先）。

例如你利用投資，好好滾大資金。

然後，到了資金有一定的水平時，你在負擔上較安心，而你又有足夠的勇氣，到時才跳出去。

同時，你可以在這段時間，結識一下地產代理，多了解佢地的工作。（甚至做兼職，當然，你要了解現時正職是否容許，或當中風險，所以你自己衡量，如果真的做兼職，當見到自己這方面真的有發展時，先全力去做。加油啦！

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21441-Q21460）

Q21441：

老師你好，有d關於創業同投資嘅事情想請教你。

1. 當我已經諗到我嘅生意做咩之後，應該從咩各度思考？

2. 點先可以有效宣傳自己的企業？

3. 我好想行岀第一步，但我唔係好知應該做d 咩好。

4. 如果我有個idea 但就無實行idea嘅能力，身邊有無咩人有咁嘅能力，有d咩方法？

最後想多謝老師你，我上年先開始投資，好幸運一開始接觸到老師嘅fb page 同書，認識到價值投資法，令我覺得睇年報，了解一間公司營運模式非常有趣，

因此作為投資初哥，我完全無試過炒賣，雖然而家賺嘅錢唔多，但已經感覺交小唔小學費。我定左個目標，就係希望有1日可以去交港交所敲鑼

龔成老師︰

1) 開始寫一份給自己的商業計劃書，規劃出未來發展大方向。但唔需要太仔細，只要有個大方向即可。

因為商業社會，每日變化都好大，寫得太仔細，反而會限制左自己發展。

做生意，「執行力」是關鍵位，我成日都聽到有人話：「早知我就…」、「這生意我一早想到啦，只是佢快過我」等等，這類說話。

做生意，最重要是「做」，之後先慢慢再調整。

2) 要睇你業務性質，和對應什麼客戶群。例如你做補習，你就要去多學生和家長出現的地方去宣傳。

你要「找出市場」去宣傳，不要亂用力去宣傳。

3) 你要做，就係先行出第一步。好多人就係顧慮太多，唔敢行第一步，令到自己只停留空想狀態。

其實做生意，好多時都係摸石過河，邊行邊試，有時唔需要諗太多。只要有大方向，做就可以了。

4) 你就去睇下，市場上有無類似的成功人士，去模仿他，學習他。或者，你去做或學一些，可以幫到你實踐IDEA的工作和課程。

記住，你投資方面，現時只係起步。你要一直保持學習，投資回報才會好。

期待見到在港交所敲鑼的你！

------------------------------------------------

Q21442：

老師你好，本人現有200萬流動cash, 還有其他大保份cash放左保險公司saving plan, 回報大約3.2% 但一本lock死5 to 20年。

今年年頭ipo市況好，賺到75000已經非常開心，但3 to 5月連蝕番66000,主要因為本來10萬買左 AMC升(12.8 入但13.x走左)賺到d, 但佢升到30後我50萬元反手手沽空，

1.5分鐘蝕足50000，之前又500000萬買左9959,24.25炒賣左幾轉有得賺又賣左，跟住佢跌到又買番，以為自己好醒，點知隻野跌到18已cut loss,

本人炒買股票20年，都係得果吉，可否教教本人應該怎樣？因為已經信心儘失。感激謝謝

龔成老師︰

你有「賺錢」的思維，反映你與98%的散戶想法一樣，都係停留係短炒，賺差價架模式。

短炒我見好多人都係蝕錢收場，股價中短期一定會有波動。而波動架原因可以同企業本質無關，只有長線股價才會反映企業質素，所以優質股一定要長線持有。

你見全球最賺錢架投資人巴菲特，都唔會做短炒，只會係做長線投資。所以，你要改變你投資方法，唔好再做短炒，並以長線投資優質股為目標，會對你較好。

你現時先做，就係放棄以往一直用的短炒方法。之後，再用正確的理財策略，去累積財富。

我建議你睇我架《80後百萬富翁》、《財務自由行》和《股票勝經》，當中會有一些理財和選股概念。

到你明白當中理念，才開始再計劃你投資大計，會較好。

------------------------------------------------

Q21443：

龔sir，我今年28 上年開始接觸股票 但因為咩都唔識成日都高追 一跌就好驚 輸左好多錢 依家我轉左新的一組配合持有：

9988 $228 200股
3067 $17 2000股
175 $23 1000股
6618 $174 100股
1398 $5.4 5000股

想請問我這個新組合 適合嗎？
我打算長線 唔睇股價短期波動。因為成日睇股價影響心情。

另外3067 係睇到你話潛力股可長線 我洗唔洗巴巴升返少少之後每個月加倉到3067 （因為3067指數都包括埋9988）

謝謝你龔sir
知道你平時都好忙好勤力覆大家訊息。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，各行業或粳類別都要有。

但同一行業又不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你上述持有的，都是有質素的股票，因此可以長線進行。另外，工行（1398）是收息股類別，而你年齡應該著重增值，因此收息股未必最適合。

至於恆生科指ETF（3067），你可以久不久加注，原理同月供，長期儲貨一樣，但就唔需要改變阿里（9988）的持股情況。

但你要計算翻潛力類別比例會否過多，因為「平衡組合」是好重要的。

------------------------------------------------

Q21444：

龔sir 有d問題想請教你 我買入一隻股票後，係咪升2成就要止賺，否則跌翻會無得賺。我成日聽人講要鎖定利潤。

龔成老師：

這是坊間的做法，而你睇翻全球投資最賺錢的人，巴菲特，佢無這樣做。

我地只要買入優質股後，長線持有就得。我持有比亞迪（1211）13年，就是唔理佢，長線就得。

如果你成日望住個市，成日要「止賺」，你想想，騰訊（0700）、港交所（0388）這些升值100倍的股票，你根本就賺唔到！

------------------------------------------------

Q21445：

老師，我同我先生聯名買咗間688萬3房居屋，個名已經用咗，我打算再置業，但又要比15%稅

現在層樓買咗2年，
現在有100萬積蓄，
我個人計

我每月可以儲2萬，
請問點樣可以再置業，
用幾多年時間儲和投資？
做什麼投資比較岩？

龔成老師：

如果有需要，其實可以到律師樓搞拆名，這樣你地就可以一人一個單位。

不過，你現時的現金$100萬，再加上買了物業只是2年，其實唔需要太心急不斷投資物業。

我地理財，最重要就是建立平衡的財富組合，例如物業、優質股，同時持有。

所以，你這刻可以利用每月$2萬，儲蓄投資，並利用手上現金的部分，例如$30萬，去投資股票，先將財富增值，過幾年後先投資第2個物業，這樣會較好。

你可以定一個5年計劃，投資優質，平穩增長類股。

------------------------------------------------

Q21446：

老師，我之前買$255果時入咗美團，$46入左華虹半導體，而家咁嘅市況，你會由佢跌定止賺

龔成老師︰

首先，一定要了解股價下跌的原因，基本上，股價中短期上落好正常，但如果上落太大，就要了解翻當中的事情，有無一些影響企業核心的因素。

美團點評（3690）都有質素，佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，但增長力難免會受影響。

集團過往一直處於燒銀紙階段，至2019年才開始有少量盈利。未來是否維持，暫時都好難講，若你持股佔組合不多，可以守。

華虹半導體（1347），佢而家係部分範疇擁有技術，但並不是整個產業鏈中最重要的技術部分，所以不能定為很高質素的企業。

不過，中國政府一定會加強開發半導體技術，所以，長線發展正面，可持有。

------------------------------------------------

Q21447：

老師你好， 我是一個媽媽，有四個仔女，三個出哂身，有個讀緊大學， 近年學識左點買賣股票， 呀女推介睇你的書‘50隻優質潛力股’， 現時手上的組合是以下：

（00005）9手61.37
（09988)3手223
（02628）5手16.5
（2383）3手166.7

（02318）2手90.04
（01810）10手25.5
（00659）10手6.11

（00788）25手1.1
（3309）6手5.46
（00823）10手59.43

1.想請教一下現時組合可以嗎？ 有冇一些可以從中剔除呢？

2. （02628）本人有意想賣走，應否溝一溝下貨？

3. 最後， 我成日有個心引，見到有啲賺少少就想放， 以前銀娛就係咁$59買左， 之後賺左$7000就走左， 呀女成日叫我唔好放要長揸， 話有潛力唔怕。

但我覺得如果長揸咁有咩用，啲錢袋左入袋先係自己， 而且有時會覺得見佢升幾轉， 如果自己買賣幾轉已經可以賺幾轉。

所以想問下老師你，其實而加我係咪應該長揸本身持有的股票， 等佢跌到本身持貨嘅價位/低過先再入， 慢慢草貨呢？

龔成老師︰

1)ＴＯＭ集團（2383）業務不太好。發展多年都無乜成績，近5年生意無增長，年年虧損，投資價值不高，可沽出。

希瑪眼科（3309）有質素，業務仍發展中，有一定不確定性。你可以考慮沽少少，去平衡個風險。

阿里巴巴(9988)和小米(1810)這類潛力股，雖然有潛力和質素，但同時間，個波動性都唔細。現貨可持有，但當年年紀越大，就要慢慢減少這類潛力股的比重，令個組合唔會太波動。

至於其他股，基本上都有質素的，問題唔大，但要留意，同一隻股票佔組合的比例，最好控制在15%以下。

2) 中國人壽(2628)質素較中等，近年賺錢能力係弱左，但未至於無質素。此股不建議太大注，你可以沽出部份，換至其他較股票。

3) 你有「賺錢」的思維，反映你與98%的散戶想法一樣。

你追求實在的現金，認為要賣出賺到現金，才是賺錢，但我地最重要是講求「財富最大化」。

當一隻股票上升，例如你買入價$10，現價$15，賣出可以賺$5。

但當你套現$15後，你怎樣將這個「$15」再次增值，令你的財富增長，比留在原有股，得到更大的回報？

如果原在的股票是優質股，即是我地持有優質企業，當你一直持有這股，企業長期價值向上，就會帶動我地的財富有最大增長。

簡單來說，我地是從「財富長遠最大化」的角度去想。

可能你會問，一直不賣，啲錢永遠入唔到自己袋，即係永遠無法取出財富。

我地累積財富，會用「先增值，後現金流」作策略，前者著重增值。之後就會改變策略，將已增值了的資產，轉為現金流類別，而我地就是不斷享受資產產生的現金流。

另外，你有一個想法，係想走幾轉，賺佢波幅，都係有問題。

因為我地投資，係唔應該去估走勢。你諗住而一刻已經好貴，先沽貨，但之後回調平價再入翻。但實際上，股價是否每次一定跟你預測一樣走?

若你沽貨後，佢反而不停升，你除左錯失個升市機會，而且要可能要用更高成本，才可以買回這隻好股票，成件事係得不償失。

你試想想，如果用你的方法，在過往，港交所（0388）、騰訊（0700）在這麼多年，股價上升100倍時，你的方法能賺到多少？可能連一倍都賺唔到。你怎樣能賺到100倍，就是「唔好賣」，一直持有這些優質股。

至於，是否跌至低位再入，我地唔會用你買入價，作為入貨標準。

我地係會睇翻企業本身估值，如果當時個價格水平合理，你持貨又唔多，又有充裕資金，可以加小注。到平宜區，才加大注。

記住，永遠都係睇企業本身價值，而唔係你個買入價，買入價其實意義不大。佢應該作為你買賣，或者是否持有一隻股票的指標。

------------------------------------------------

Q21448：

买左老师五年置业果本书 中间提到黄竹坑等地区系比较有潜力的。

想请问马鞍山和钻石山房产比较 是否钻石山升值潜力会相对较高？谢谢！

龔成老師︰

鑽石山優勢在於同時擁有2個鐵路線，加上較為接近香港第二個核心商業區「九龍東」。

沙田區是新界東與市區的連接位，在整個香港的地圖上，算是一個中心點，對於較常往返內地，而又想近市區的人來說，沙田區是不錯的選擇。

近年多年屯馬線，令馬鞍山交通便利度提升，都係有利發展的原因。

但從地理位置上，鑽石山都係較接近「九龍東」和港島，整體質素，會相對馬鞍山稍稍佔優。

------------------------------------------------

Q21449：

老師，想問一下小米連續幾日不斷回購股票，對於同股不同權架構，會令小股東對企業既控制權減弱嗎？同埋佢回購主要係邊類股份

龔成老師：

會有少少影響（其實好少影響）

佢現時的回購，是回購出面市場的股票（即是小股東的）。

即是小米這間公司回購，間接會令大股東佢地的控制權增加。

但說到尾，由一開始，佢同股不同權的模式，已是大股東佢地玩晒，因此分別唔太大（因為大股東在投票權方面，一向都過半）。

------------------------------------------------

Q21450：

龔sir, 我係90後27歲男仔，想請你幫下手 指點。
我本金60萬學人買股票，今年2月尾開始輸到變50萬 。心情好難受。

過往都係以短線炒股為主。 港股美股都有買，想搵你教我慢慢追返本金，以中期或長期目標為主。

目標係30歲 有100萬 每月存款有$4000 ，主要想重新整理個投資組合，唔想經想睇到心煩又失望。 麻煩龔sir有空指點下。

美股有ARKK 打算長期持有
港股 少量短炒

龔成老師：

我20年前，都是短炒者，短炒幾年，輸足幾年，之後長線投資，就開始不斷賺錢。

其實我當時，用左幾年時間去學短炒，我當時不斷睇書、上堂學短炒，但最後都是輸，可能是我能力不足吧。

但我之後做銀行同證券行，見大部分輸錢的客，都是偏向短炒的。

當然，你問我有無人贏錢，是有的。但就我觀察，長線投資贏錢的人，比短炒的較多。

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的。

因此，我相信長線投資，是真正助我地贏錢的方法。

如果你發現自己行錯路，就唔好再向前行，行翻正確的方向。

你之後要投資優質股，長線，學「真正投資賺大錢的人」，如巴菲特學習。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

你投資ARKK，長線，可以。

另外，你可以考慮投資平穩增長股+潛力股。
你可以月供或自行分注。

上述是大方向，但我這刻唔建議你投資太多，例如只動用3成以下現金，餘下等機會，反而建議你先學好投資，例如可睇《股票勝經》，之後先正式投資。

------------------------------------------------

Q21451：

龔sir～
又有問題打搞你喇
我一路想入金沙同領展
金沙set左目標買入價係 35
領展係 70

但好耐都唔到呢個位
開始接近左陣又彈返上去
我係咪諗多左？應該調返高d？
定其實可以等？

麻煩曬你成日解答我地d問題～～
同埋想同你分享下
我剛剛join左za bank
佢地做緊頭 $20 萬savings 有年利率 1%！

我擺左d錢係入面賺息 好過擺銀行
想知點解呢類虛擬銀行會做呢類咁勁嘅優惠吸客？佢地背後係為乜？

龔成老師：

領展（0823）及金沙（1928）都是有質素的股票，面對這類股，只要不是貴，都可考慮，特別是當你完全無貨，而你現金又十分足夠的時候。

如果你買入一注後，仍有現金剩，這兩股你可以現價買入第一注先，等你有基本的貨，之後再跌先買入。策略上會較好。

另外，虛擬銀行為左吸引客戶，都會利用高息，去等客戶試佢地的產品，等多d人對佢地有認識。

------------------------------------------------

Q21452：

龔成老師
我疫情時初學投資股票
根據你經常說的理念 長期持有優質股 今日終見曙光
雖然我持有的股票是小量

財富增值都是很小量
但我都好想多謝你
初學見短期波動 都會好緊張
是你啟發我 我才有信心堅持長期持有

龔成老師：

太好了！

投資是一個長期戰，你要面對好心心理壓力，但要記住，你只要買入優質股，長線，就能有回報。你只要想想，全球投資最賺錢的人是誰？是巴菲特，只要我地用的方法同佢方向一樣，就有不差的回報。

------------------------------------------------

Q21453：

龔sir 你好,自從上年第一次向你請教, 我現在主力持續買入index tracker (除2800 仲有S&P 500/ MSCI World), 因為問心知道自己冇時間/ 知識去選股。

後面2者我買左外國買accumulative 個種, 唔駛自己人手將派息再投資,好啱我D 懶人。現時同長線我都會keep 住月供index tracker, 間中先會買下個別股。

1. 03067 - 我想買入長線, 見你近來的Q&A 都話現價唔平/ 在合理價較高水平所以應該小注/月供, 想請教在大概咩價錢左右應該開始平/ 多買入?

2. 我持既股同上年一樣(只係多左小小金沙同2800), 考慮緊好唔好遲點賣出大部分收息股(銀行+地產+港燈) 轉去index tracker (等平點入), 希望加強增長力, 你會建議嗎?

3. 如賣出左收息股, 但index tracker 現價又唔平, D 現金放在銀行唔知幾耐先會等到買入時機, 你會建議用這些現金暫時放落其他野嗎? (舊年收到的股息都係只係放在o係度等)

4. 如我aim index tracker 佔持股80%, 個別股20% 會太保守嗎?

感謝你的意見, Stay safe!

龔成老師：

你的方向正確，有選股能力，當然可以憑自己實力選出高回報的股，但如果高估自己能力，反而會輸錢，因此，明白自己的實力而願意付出的時間好重要。如果不想選股，就投資指數基金，你所選的都可以長線。

利用月供，或慢慢分注買入，長期累積，是最好的方法。

1）安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

2）要睇你投資目標及風險承受能力，最重要是長期方向，如果你仍想增長，就將收息股轉其他，現時合理價都可賣，然後可轉平穩增長股及潛力股，如果無心水，就盈富（2800）及恆生科指ETF（3067）。

3）其實現時舊經濟類是合理的，因此轉盈富或其他舊經濟類股是無問題的，至於新經濟則在合理區頂，因此轉3067時就會慢慢去分注買入，部分資金可能會等跌多少少先買入。

4）如果你真的無選股能力，或無時間選股，這樣是最好的，好多人高估自己選股能力，最後出現虧損。

------------------------------------------------

Q21454：

你好。我最近睇你解答網友留言提到GX 中國電車ETF 2845, 請問GX 系列其他etf , 2826中國雲算。2820中國生科。2809中國潔能。適合長線投資ma?

同埋呢隻基金之前未聽過。市值算大ma? 穩唔穩陣ga? Thx

如果我想未來用大約50萬資金。在5,6,7月分開17注分段入做中長缐投資。請問這些ETF 算優質ma? 這樣設計可以嗎？另外加三隻股。700，388，2269

麻煩有空給我少少意見,
thx so much

龔成老師：

你上述所講的幾隻ETF，都是潛力ETF，都有長線投資價值，上述的4個主題，都是一些未來發展大方向，長遠潛力度不差，但要留意，所有這些潛力行業，在發展過程中，一定會有變化，所以，你要明白風險，同時控制注碼。

幾隻基金都穩陣的，只是價格上落一定大，買入時要明白風險，或者用月供策略會較好。

以GX中國電車（2845）來說，這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴（其實另外幾隻你上述所講的基金，都有這類情況）。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

因此，上述基金，可投資，但你要明白風險，同時，不能將所有資金都投資在潛力基金類別。你要建立一個平衡的財富組合。

你可以將$50萬，其中$20萬或以下，投資潛力基金/潛力股類別，要慢慢分注，可分1年時間去買入。

至於餘下的3隻股票，有質素，但都唔平，你可以月供，或慢慢分注買入。我會建議你同時留有一定的現金在手，當大市下跌時有資金去買入。

------------------------------------------------

Q21455：

龔sir你好啊！對上一次PM你已經兩年前，當時啱啱受你啟發開始投資股票，上年仲上埋你嘅堂

由0倉慢慢喺兩年時間建立咗一個六位數嘅組合，真係好多謝你！

其實除咗投資方面嘅知識，你經常分享嘅致富思維都影響咗我好多，自己呢兩年都睇左好多有關呢方面嘅書，一開始真係完全唔明點解[諗下]就會實現到

好懷疑，直至最近我有一個好想走出comfort zone，好想係為咗建立自己事業而做嘢，唔係為咗逗份人工，做幾多都係為公司、為老闆，我覺得自己可以走得更高更遠。

咁啱有個帶保險嘅團隊嘅朋友(亦都係我自己嘅財策師）approach我，邀請我加入，其實佢三年前都搵過我，但當時我未ready, 唔相信自己可以做sales嘅工作。

但三年過後，我嘅諗法唔同左好多，雖然都係唔認為自己係傳統觀念上做top sales果種人，但我真心覺得自己會成功，應該全力用3-5年去build up呢盤生意，建立自己嘅團隊

我亦相信我本身會計師嘅優勢可以比到客戶信心、在職媽媽呢個身份亦幫到我了解到大部分打工仔喺保障上嘅需要。

講咗咁多，都希望你能夠比小小意見：

1. 我感覺你本身都唔係果種好外向好多野講果種人（感覺錯請原諒）你一開始係點樣踏出第一步去開班教人同錄youtube?

2. 我一開始嘅計劃係part time做，始終小朋友仲細，有份正職收入會安全好多，但最近考晒牌開始training而自己都睇書睇YouTube學點樣做個好嘅銷售嘅時候發現原來真係要投入好多時間去做先會做得好

咁我本身都有儲蓄，先生亦有正職可以support，我是否應該去盡d全職去做？我好怕自己係一時衝動。

3. 仲有無d咩係我應該考慮嘅因素？(信心、家人支持、儲蓄)

真心好感激你改變左我人生、之前睇到你再分享<成功人士同普通人之間嘅差別>只係[做同唔做]，令我更加好似打咗支強心針

Thank you so much!

龔成老師：

太好了，我相信這兩年你都成長了不少，最重要是思維，相信你保持這樣「相信自己」，「大膽試」的思維，長遠會有一定的發展。

1）對，我本身是一個十分內向的人，根本不喜歡出聲，中學時老師話我是全班最不想最聲人的頭3位。

到我大個，我知道如果我要成功，要發展事業，就要改，所以我逼自己多同人講野，多做演說，現時無論拍片，上堂對過百人講野，我都無問題，所有野都是逼出來的。

你要想翻你的「大方向」，如果大方向要求你有某些技能能，你就要克服困難，做好這些事，為了完成你的大目標。

2）最好當然是全職，但就好睇你的決心，如果你決心不足，就暫時半職先。

3）如果你擔心，就留多一點儲蓄先，因為初期做，業績會有上落，這時是對你最大的心理考慮，如果你有較多的儲蓄，心理壓力會較少，較易克服不同的時期。

加油啦！我好相信好多事，我地都能做到的，只是有無勇氣去做，你現時已踏出決定性的一步，你要盡全力去做，堅持！

------------------------------------------------

Q21456：

龔成老師你好，差唔多一年前我講過想5年內(即2025年前)將手上資金提升到160萬作買樓首期之用。一年過去，我主力靠儲蓄的疊加效應，total asset 已經算有100萬！感覺2025年160萬目標好似可以超額完成！

1）現金:由$30萬升到大約$45萬 （小部分做了定期存款收息）

2）股票組合價值: 由$4萬升到$39萬（股票蝕錢中。。。）

3）另外儲蓄保險，2025年可以可以拎到20萬左右。

>> 所以total asset 已經算有100萬

本人月入$36,000，收入尚算穩定。要幫家人供樓及照顧已退休父母，現時每月可儲現金大約1萬，另外有月供股票$4500。

—$1,500煤氣 (0003)
—$3,000 盈富 (2800)

現有股票組合

—月供煤氣 (0003) @$13.7
—月供盈富 (2800) @$27
一 3738 @$29.5
- 1283 @$1.7
美股Tesla @$766

因為想買樓，所以希望可以中風險投資方法。上年經指導後加大了月供。而家想加多一隻月供股票，心水係恆基（0012）、中銀（2388）、港鐵（0066）、領展（0823）四選一，請問邊一個會比較平穩增長？

調整後的月供比較會為$2000 一隻，即total $6000 一個月，是否穩妥？

現時股票現金比例大約為50:50，此比例是否穩妥？

希望可以得到你意見，十分感激。

龔成老師：

太好了！恭喜你！
這是你努力的成果，我相信你一定能完成目標的！

現時離2025年有幾年時間，你可以利用這段時間合理將財富增值，到接近買樓時就適度賣出股票，加大現金比例，減少股票或風險類資產的比例。

現時這段時間，你的投資應該以「平穩增長」作核心，潛力股都可以但不能太多。另外，3738、1283不宜持有太多。

現時月供的可繼續，你可以加入港鐵（0066）去月供。

現時你現金比例50%，其實30%-50%都是適當範圍，只要你到按近買樓時增加翻現金比例就得。

另外，你這段時間可保持財富增值，但如果在當中，見到樓價下跌，其實都可以考慮買樓，因為你的最終目的買樓，如果樓價平左，出現機會，只要你供款方面無問題，都可以考慮買樓。

------------------------------------------------

Q21457：

老師，你對1696有何看法？

我從其2020中期報告見到，其毛利有55%，疫情下純利則只有8%，以往則有14%至16%，這表示其經營成本以外，還有很多成本開支，對嗎？

而其總債務佔其總現金及銀行結餘約60%，這是正常嗎?還是不健康呢？

還有1696現價合理嗎？
可長線？

龔成老師：

復銳醫療科技（1696）主要從事設計、開發及提供能量源醫療美容器械，如一些無創醫療美容器械、微創醫療美容治療系統等。

由於疫情是一個特殊的經營環境，所以我地在分析時，會有調整，而我地會以「正常經營環境」作核心分析。因為疫情可能會有一些額外的支出增加，又或由於外在環境影響了生意，當某些業務的生意減少，而固定成本無法立刻減少時，就會令純利率產生影響。

至於負債情況，暫時問題不大。

業務上，有佢吸引地方。但股價近年上升了不少，市場好集中「預期之後的業務情況」，因此，股價會較波動，只可以話現價唔算平。長線投資價值，都有的。

------------------------------------------------

Q21458：

龔Sir, 你好，想問下供股既配置問題，我29歲，一個月可以儲15k, 供股每月$8k如下（已維持約三年）：

煤氣：1000
長建：2000
盈富：3000
比亞迪: 2000

直到比亞迪升過$80我就停供左，轉左供銀娛，而長建亦已停供。

1. 如果呢家月供配置為以下，你認為合適嗎？
領展：1000
中生製藥：1000
小米：1000
盈富：3000
銀娛：2000

2. 煤氣因為已經供左三年，但無咩增長，如果係想追求增長既應否繼續供？還是轉領展比較好？

謝謝！

龔成老師：

1）領展：1000
中生製藥：1000
小米：1000
盈富：3000
銀娛：2000

這組合可以。你保持長期進行就得。

如果你日後有更多資金，可以考慮加入3067，每月供$2000。

2）其實煤氣（0003）仍是有質素的股票，但增長力弱左，而佢改為20送1，反映增長力可能減少左，但不算差。

香港業務不強，但中國部分不差，中短期雖然較一般，但見佢的長遠發展力仍在，但就要耐心點。

由於佢一向都穩定派「相同股息」，在這情況下，反映派息的增長會少左。但整體來說，這企業仍是有質素的。

我睇翻佢近年在中國的投資，仍是保持進行的，每年都有幾十億，這些投資不會好快就見到收成，但這企業就仍是發展中的。我對佢長遠發展仍是正面，只是增長力的問題。

你原有貨，持有。

但不要再月供了。轉其他更有增長力的股更好。

------------------------------------------------

Q21459：

老師，潛力股包括9618嗎？最近跌穿300，可以小注入嗎？90後如果9618,175,同914，邊個會較好？唔該老師

90後的我依嫁有4手823，同月供12同66，

甘823同12係地產股，66地鐵就公用股，

另外想加月供中銀香港，就銀行股，

同想加逐手買9618或175或914就新經濟股，甘樣組合正確嗎？唔該老師

龔成老師：

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂，如果買，都可以，但要控制注碼。這股可以長線投資的。

90後，財富仍有增長力，吉利（0175）及京東（9618）都可考慮，吉利會略好。

而你現時持有的，都是有質素的股票，屬平穩增長類，可長線，而中銀香港（2388）有質素，平穩增長類，長線可以，現價合理。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。所以，你慢慢加入吉利及京東，是可以的，最重要是注意整個財富組合的比例，以及要有現金剩剩。

------------------------------------------------

Q21460：

想問平安好醫生 同 2382 現價值買？

同3067

龔成老師：

平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂，但好波動，月供就得，如直接買入只能小注。

舜宇光學科技（2382）有一定的質素，但現價合理區頂至略貴。

過往手機市場高增長，令佢鏡頭業務受惠不少，但近年手機增速開始減慢，你預佢增長力會變得較平穏。不過，手機市場又開始向好。

在長遠，無論是手機鏡頭，又或是各種鏡頭方面的應用，只會愈來愈廣泛，前景正面，不過，中短期可能會有少少波動。

這股可以長線投資，分注或月供較好。

安碩恒生科技（3067），有長線投資價值。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂至略貴，因此，這刻不能大注投資。最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。