<<每個人都有陰暗面，原來卡通片都有>>
　
生活好忙好壓抑，weekend本身諗住睇蠟筆小新平衡下，於是我一口氣睇咗二十幾集蠟筆小新。我喺youtube不停咁睇蠟筆小新，youtube亦好醒目咁不停suggest我睇更多嘅蠟筆小新，睇睇下，youtube竟然suggest 我睇蠟筆小新恐怖系列，睇到我尋晚發惡夢。不能只有我睇到，一定係要拖埋大家落水，要大家一齊陪我驚。
　
如果大家有印象，小新有個女同學叫妮妮，妮妮只係讀幼稚園，但你感受到佢大大下會成為一個不折不扣嘅八婆，妮妮係憎恨所有嘅女同學，妒忌比佢靚比佢有錢比佢友善嘅女同學，5歲嘅妮妮好明白所有女人都係自己嘅威脅。此外，妮妮長期活喺自己嘅幻想入面，成日強迫小新佢地角色扮演，但扮演嘅情節都好痴線，例如假定正男有戀母情意結，編寫自己或者自己嘅老公有外遇。妮妮好痴線，但佢都好努力塑造自己形象，盡量喺人前扮溫柔可愛，扮美貌與智慧並重。但講到底，妮妮都只係一個幼稚園學生，有時情緒失控，或者扮扮下唔記得咗，佢會破功，俾人睇到佢恐怖嘅一面。
　
點解妮妮會咁痴線，因為妮妮媽媽都係一個痴線女人......
妮妮媽媽都會成日喺人哋面前扮野，塑造自己係又靚又完美嘅少婦，佢亦喺妮妮面前扮到自己係和藹可親嘅媽媽。忟憎同想發脾氣嘅時候，妮妮媽媽就會匿埋喺廁所， 拎隻大兔仔公仔出嚟，當隻公仔係沙包， 瘋狂咁打隻公仔，而妮妮就學咗佢呀媽，收埋好多隻兔仔公仔，有咩事就瘋狂打兔仔。
　
蠟筆小新恐怖系列有幾集講述妮妮呢隻兔仔沙包，呢個恐怖系列係有唔同嘅級數，先講初級版......
　
有一日，小新叫咗班同學喺屋企分享收藏品，妮妮就share 自己嘅兔仔公仔，講對付唔同公仔，會使出唔同嘅毆打招式，講講下，其中一隻兔仔就比小新嘅細妹小葵掟咗出花園，大家唔為意之下，兔仔公仔比月光照到，竟然比月光activate咗，變成一隻有靈魂同埋識講嘢嘅公仔，喺花園嘅小白嚇到幾乎冇命，兔仔話自己冇名冇姓，日日都好抑鬱，自己冇痛嘅感覺，但唔明白妮妮同妮妮媽媽點解會瘋狂咁打自己，講講吓，呢隻兔仔瘋狂咁自己打自己，話好想感受下打自己係咪咁好玩，唔係妮妮點會成日無啦啦打佢。初級版嘅結尾，講述妮妮發現自己唔見咗隻兔仔公仔，喊住咁去小新屋企，搵番呢隻activate咗嘅兔仔公仔，呢隻兔仔公仔目露凶光，跟咗妮妮返屋企......
　
講到呢度有啲心寒，但中級版係由卡通片變恐怖片......
妮妮有一晚發惡夢扎醒，起身去廁所，佢發現平時畀佢當沙包瘋狂咁打嘅兔仔，竟然喺廚房un曬腳咁食緊零食，妮妮嚇到即刻叫醒阿媽。呢一刻兔仔就好似午夜凶鈴咁，突然擰轉個頭，望住妮妮同佢阿媽：你終於發現咗 我，平時你都打得我多啦，快啲過嚟服侍我。嚇到不知所措嘅兩母女，嚇到唔識旭。兔仔大聲喝妮妮媽媽：斟嘢畀我飲，開電視我睇。妮妮媽媽隨即喺雪櫃斟咗杯橙汁畀兔仔飲，兔仔一野 推開杯橙汁： 點解你咁蠢，我係兔仔，當然係要飲紅蘿蔔汁。 呢個時候，妮妮就開咗部電視畀兔仔睇，好衰唔衰，電視機竟然播緊龜兔賽跑，兔仔睇到怒火中燒，瘋狂鬧妮妮特登播龜兔賽跑諷刺佢。呢隻嘅結尾，妮妮喺睡夢中甦醒，佢落廚房搵阿媽，發現阿媽好溫柔咁對沙包兔仔，色呆滯咁同妮妮講： 你以後要對隻兔仔好啲，唔好再無啦啦打佢。故事就喺一個恐怖音樂下完結 ，媽媽嘅呢番說話，係證明咗噚晚發生嘅事並唔係發夢，妮妮露出咗一個心寒嘅表情。
　
如果你睇到呢度，已經有啲心寒，你都係唔好再睇落，你今晚會瞓唔著.....高級版真係好恐怖，高級版係異形......
故事講述妮妮記錯咗游水嘅時間，去到泳池游唔到水，於是又拎隻兔仔出嚟瘋狂發洩， 呢個時候兔仔終於忍唔住，佢嘅靈魂復活，心口嘅棉花亦都爆咗出嚟，佢目露凶光咁啤住妮妮，質問佢：點解係都要中我心口，中我心口真係咁好玩？兔仔撲向妮妮，發咗癲咁揸住妮妮隻手，要求妮妮瘋狂咁中自己心口，兔仔仲不停咁重複大叫：嚟啦，打我啦，你打我即係認同我，證明我嘅存在價值。嚇到標屎嘅妮妮瘋狂用腳踢兔仔， 兔仔差錯腳跌咗落去泳池 入面，濕咗水之後竟然分裂成 無數隻兔仔。第二日，成班細路喺泳池入好開心咁遊緊水， 妮妮呢個時候見到 分裂出嚟嘅兔仔上咗唔同小朋友 身，所有小朋友好似撞邪咁衝向妮妮，要求妮妮中佢哋心口。
　
睇完呢幾集恐怖系列，真係顛覆咗我對蠟筆小新嘅想像。
睇得多蠟筆小新，你就會明白蠟筆小新真係唔係畀細路仔睇，入面有好多黑色幽默。小新嘅爸爸野原廣志，成日強調自己係一個辛苦嘅上班族，要背負35年嘅房債，小新嘅媽媽美冴完美展現 全職家庭主婦嘅辛酸，原來除咗呢啲，仲咁恐怖，weekend 睇卡通片睇到發惡夢，嗚嗚嗚嗚嗚嗚嗚嗚嗚，點解Youtube 要suggest 俾我，點解？