見到好多人做年度總結，fb又係咁提我個page荒廢咗好耐快啲出下post，雖則我覺得呢個post出咗都唔會有幾多人想睇，叫做幫自己留個底咁啦 2019年，尤其係下半年，對香港人嚟講係好難捱，講緊嘅嗰種難捱係無論你有咩政見、企喺乜嘢立場、咩身份，你都好難可以獨善其身嘅嗰隻難捱 本來好多香港人都係只要有份工有得得閒去下旅行食下魚生刺身乜乜乜就滿足，其他可以乜都唔理，經過半年來各種嘅洗禮，一向以為都叫可信嘅人、事、物、價值觀，可以話變就變，咩係警暴，咩係濫權，以為唔可能發生喺香港嘅懷疑(其實仲洗唔洗加懷疑兩隻字我真係好懷疑)被自殺事件，香港政府都一一將呢啲污糟邋遢嘅事實大巴大巴車落香港人度 我哋就好似一個無憂無慮天真爛漫嘅細路哥，突然間老豆老母同你講佢哋要離婚你要買定離手揀跟邊個咁樣，我哋被迫一晚長大 呢種長大嘅感覺一啲都唔好，好不安、好徬徨，唔知自己可以點做，就係因為咁，我哋一步一步試唔同嘅方法，去爭取原本就屬於自己嘅權利 爭取到而家，係有爭取到少少嘢，但未夠，我哋好清楚自己要嘅係啲乜嘢 一路爭取到而家已經就有半年，話唔攰係呃鬼食豆腐，但攰都要捱落去，難捱都要撐落去，因為我哋知我哋已經冇本錢輸 香港人，加油💪香港人，反抗💪 好啦，講完社會嘅事，講下自身嘅事啦 今年我創下咗好多紀錄，第一次去雪國玩雪滑雪、第一次同朋友出國、第一次自己出國、第一次海外擺檔，搭飛機多過搭黨鐵 仲有終於的起心肝續返BNO、終於肯DOKIDOKI怦然心動丟咗好多所謂嘅「回憶」、終於肯好好處理困擾自身多年嘅情緒勒索問題以及其根源者 淨係呢啲已經夠我拎唔知幾多個人生成就獎杯 就咁聽唔係咩大不了嘅成就，但做咗三十幾年人，我終於都理解到，真正了不起嘅成就唔係咩搵幾錢幾錢做緊邊間公司擁有啲咩財物，而係令到自己真真正正由心而發地感到開心，呢個已經係最了不起嘅成就 而關於情緒勒索呢件事，原本我想寫篇短文短談一下，後尾發現預期嘅篇幅已經超出咗短談嘅字數，所以都係儲定多啲元氣之後正式出返篇長文，但唔會係呢幾排嘅事，畢竟單嘢仲係處理中，但亦都快將完結，希望咩都完哂後可以整理到一篇自己滿意嘅文章 至於出書方面，工作一直都係進行中，雖然我承認呢年嚟大部分時間都係專注緊休息，不過社會嘅事件引申出嘅骨牌效應下，好多事都諗通咗，覺悟咗 咁大個人用「成長」呢個詞好似有啲肉酸，但的確係進一步成長咗 新書嘅進度係良好嘅，個大方向係講我同情緒病角力嘅大小事，當中亦都涉及大量頭先講到嘅情緒勒索事件 對比我之前三本著作，呢本嘅題材係非常沉重，不過就同世上好多事一樣，冇經歷過傷痛，係唔會體驗到幸福起上嚟可以有幾幸福 多謝星夜出版同編輯暉暉等足我成年幾，為咗唔好令你哋等了又等，我會加倍努力💪 而其實喺呢份沉重嘅同時，我又萌生出另一個新嘅諗頭，但為咗貫徹我一向以嚟未十拿九穩做得到就唔講嘅慣例，暫時都係會懶神秘唔講係咩事住 講做係實做到嘅，只係唔知幾時做到，而家係希望單嘢可以「如期」做到咁就perfect池啦 總之喺度多謝合作夥伴喺呢件事上俾到信心我！希望我哋合作愉快！做到好成績出嚟！ 新一年，老套都要講 五大訴求，缺一不可 不互屌、不篤灰、不譴責 核爆都唔割蓆 祝願各位手足身體健康，黑警死全家 我哋唔係要完！係要贏！ - 市集情報： 《百鼠圖市集 及 百鼠圖展覽》 
日期 : 2020年 1月11 及 12日 (共2天)
時間 : 13:00-20:00
地點 : 香港九龍荔枝角長義街9號 D2 Place ONE (一期) 2樓 The Space 格子 - 庚子年賀年市集 
日期 : 2020年 1月18日(六)
時間 : 14:00-18:00
地點 : 觀塘鴻圖道43號景雲工業大廈3D 🛒寄賣店： 倫居 地址：元朗西菁街23號Kplus 5號舖 官網：www.bondbazaar.com.hk - #舊圖翻用N次 #唔係因為特別好用只係因為今日冇時間要趕稿 #有稿趕係幸福嘅 #有稿喺手唔洗趕仲幸福