【龔成問答信箱】（Q22201-22220）

Q22201：

老師求救！

$270入左3690
$545入左700
$270入左9988
$29入左1810
$16.5入左2013
$4入左8083
點算好？

龔成老師：

你選股較集中在新經濟股類別，這是你的核心投資問題，你要注意翻。另外，不少貨都在貴的價格購買，你日後要加強翻企業估值及投資時機能力，或善用分注、月供等投資策略。

騰訊（0700）、阿里（9988）、小米（1810），無問題，就算騰訊回了不少，都有得守。

騰訊（0700）受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

美團（3690），不建議太大注，微盟（2013）都不建議過多。

中國有贊（8083）較大問題。

佢主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這投資值博率不高，宜減持。

------------------------------------------------

Q22202：

老師，請問你試過蝕到本錢嗎？我現在蝕了1成多了，心情開始影響生活了，如果完全放低唔睇一段時間（2、3個月），是否好危險？

龔成老師：

比亞迪（1211），股價試過由$88跌落$12

當時我打銀行工，月入萬零蚊。由賺幾百萬（賬面）上，去到蝕錢（賬面）。

我並無影響生活，因為我集中分析企業，而不是股價，如果你無法平常心對股價，就只會同一般散戶，永遠同一層次。

你有些概念錯左，我地不是不理股票，我地是不理短期股價，但會關心「企業」。

建議你花時間睇年報，減少時間睇股價。

------------------------------------------------

Q22203：

Sir, 文長，希望你可以比啲意見我

Sir,我係你38班學生, 由半年前向你請教, 跟住好認真咁上你八堂課, 功課做啱晒都好開都好有滿足感, ….. 又就好似你上堂提過一樣, 已經當大家好似朋友咁.

再次多謝你每次好肉緊咁教導我們正確理財知識, 連BREAK都唔休息咁解答學生疑難 (有時都擔心你操勞過度)

我年紀唔細 (50), 老公已經退休, 以下係我二人家庭狀況

現有資產:
現金 約有$0.8M
股票* 約有$0.75M
基金 約有$0.65M (虧蝕中, 打算明年年中免罰息後, 全數取回再作投資)
保險儲蓄+年金+MPF (預計10-15年後, 2人共約有$3M可以購買政府年金, 希望為將來基本支出補底)
已供滿自住物業 (兩房, 樓齡20, 地鐡沿線步行10, 估計現值$8M)

每月淨收入: $40,000 / month
本人希望3年後退休, 之後用兩年時間(i.e. 第4-5年, 慢慢轉晒去水桶3作長線收息. *股票profolio 草擬如下

中長線計劃:
A)預算3年(最長不多於5年)提早退休, 移居馬來西亞 (預算2人日後生活醫療保險等開支約$18,000-$20,000 / month)，

B) 希望從現有資產, 及每月收入 , 投資滾存, 達致以下兩個目的:

i)預留3年後退休時, 動用當$1.2M在當地買一間住宅, 退休用
ii) 其餘每月有被動收入最少有$18,000/month 作為二人生活開支

C) 想盡量10年內唔賣樓, 原因是暫時保留自住物業給家人使用, 或如租出, 大部份租金作為父母養老用.

我知道太遲計劃，所以好希望老師可以幫忙, 抽時間給予意見及指導：

I. 如何運用現有流動資產#1/2/3及現時每月$30,000收入, 在退休前約仍有3年時間, 應如何步署以至有效達至計劃A+B i&ii? 實際上是否可行？

II. 上面草擬嘅stock portfolio , 股票及比例要改進嗎? 15隻會唔會太多? 應如何改善 或 應該部份剔除 (現在15隻都有貨)?

III. 由於距離我退休前仍有3年，如利用自住物業做按揭借出 eg. $2M投資收息股，3年內加大現有資產，又是否可行加快達成目標？你認為這個想法如何？風險會很大嗎?

IV. 其實亦有想過趁現在樓價高，將單位先出售吐現$7-8M（反正已經住咗22年，物業亦升值咗$5M)，改為租住地方等。不過，我又擔心持太多股票會造其他成風險. 你意見如何?

V. 保留物業將來可做逆按揭, 以每月收到款項作為夫婦二人年老時,應付大部份日常開支, 你認為做逆按揭可取嗎?

重覆中長缐計劃，啲points 清楚啲

龔成老師︰

I) 你現時計劃操作模式，大致都可以。但金額上未必足夠，有些地方要再調整一下。

如果你希望3年後每月有1.8萬蚊現金流，以股息率6%計，你需要本金360萬。再加上你置業，和一些置業上雜費，相信最少要500萬才足夠。

以你現時資產2.2M(現金, 持股, 基金)，再每月月供$20000，3年後估計都只會增值至350萬左右，故實行上有點困難。

我可以考慮，現有資產和月供，就主力去累積這個360萬，以換取每月$18000現金流。

而你移居後的新物業資金，就透過賣出現有香港物業去獲得。由於你和你先生已移居，你家人可以搬去較細單位，從而空出這120萬，作你們新居住地置業之用。

II) 以你組合金額計，15隻都勉強可以。現持股都係有質素，但緊記由於你將近退休，你要將水桶1和2慢慢轉去水桶3﹐去為自己創造現金流。

III) 透過借貸投資，從中賺取息差，是可以。

但你要留意，現時按息不高，這策略是可行的。但當未來按息口上升，令息差收窄，就會影響到你回報。

另外，就是虧損的可能，股價是會升跌的，若然買入後股價下跌，你就會出現「賺息蝕價」的情況，那你的計劃就會得不償失。

但現時大市只在合理區，大致收息股在「不處於平宜區」的價位，較難確保不會「賺息蝕價」。

而且，這樣做都會增加你負債水平，而造成風險，你要自己從風險與回報中，作出一個平衡。以你年紀，總負債不要高於總資產50%，會係較安全。

IV) 這個都可以，但我在答案I)的建議，相信會較為穏當。因為畢竟3年唔係一個長時間，再優質股票都會有機會波動，令回報不確定性增加。

而且你咁做，這3年所有資產都會偏晒係股票類。若股市出問題，你成盤計劃就會大受影響。故建議原有物業，暫時不動，令組合較平衡會比較好。

V) 逆按揭都係一個可取方法，只要你物業在你家人居住後，再沒有傳傳承需要，逆按揭都係一個提取穏定現金流的好方法。

------------------------------------------------

Q22204：

龔sir，你好，一直有追隨你的專頁。想你就住我嘅財務狀況和目標比d意見。

現時我和太太35歲，財務狀況：
儲蓄：130萬
股票：40萬 （20萬hsbc, 15萬巴巴，5萬莎莎）
外幣：30萬 （澳元，兩年前兌換率5.8買，無升跌，但有約年息率5％）
自住樓：現值700萬，仍欠320萬貸款
未來儲蓄：預計月儲3萬

我倆目標五年後40歲，打算賣埋樓有其他人生計劃，希望可總共有1200萬資產 （打算賣埋樓）

我有以下計劃，想龔sir比點意見

1. 股票會長放，直至目標：莎莎$4, 匯豐$80, 巴巴$350）,到時40萬股票--＞75萬

2. 樓保守假設樓價不變，仍值700萬（到時欠270萬貸款）,賣左即是有430萬

3. 外幣30萬澳元keep，目標兌換上$7.5，有38萬

4. 130萬，分30萬流動現金（唔會郁），100萬分3注，買入基金 （初步計劃投資中國股票基金及新興市場基金，希望可追落後，感覺現在美國市場太高追，風險大），

目標100萬可增值至200萬

5. 每月儲蓄$30000，會全部月供香港科技指數etf，因睇好未來新經濟產業成長以平均成本法買入（嘗試找在每月相對低點買入），

令原本三年儲蓄180萬儲蓄，目標可增值至250萬

上面計落都只做到75＋430＋38＋230＋250，都係只做到約1000萬目標。

想龔sir比下意見，自問沒有選股票眼光，和太太都傾向保守穩陣，所以才打算以基金及月供方式去增值資產，

我想龔sir特別在第四第五點比下意見，能否有更好增值方法，讓我們達到1200萬目標。以我們投資保守取向，1200萬目標是否不實際？

龔成老師︰

要做到你1200萬目標，又唔可以話完全不可能。但你要從目標與風險中，取個平衡。

1) 其實我地買股票，就係買企業，只要佢質素不變，我地係應該一直持有，讓其為你財富增值，才是正確做法。

因此，我從來都唔會定目標價。只會係佢質素出問題，或者大市好狂熱，股價異常地高，才會減持。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你35歲，應以增值為主。匯控(0005)只係收息股，不宜持有太多。建議減持部份，換至其他較有增長力股票。其餘2隻，都可以長線持有。

另外，我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你可以投資平穩增長股+潛力股，以你年紀，比重可以去到各一半，但潛力股風險較高，若你投資經驗較淺，或者不想承受太高風險，就要調低少少個比重。

2) 其實每個人都有自住需要，無自住樓就會承受租金波動風險，你要自己衡量。

3) 在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

4) 可以，但大前題你要對相關市場，有基本認識。同時間，如果你唔識定平貴，就要分注去入市。

你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

5) 安碩恒生科技(3067)這類ETF係可以，但唔建議全數投資落去。因為組合除了有增長力外，平衡性都好重要。

因為而一刻你見佢行業係好有潛力，但你唔能夠肯定，會唔會突然出現一些負面因素，影響成個行業發展。因此，我地要分散投資，個別行業唔好佔組合3成以上。

現時大市只在合理區，資金不宜盡用。你每月儲蓄，可以先用一半去月供上述的股票。餘下一半，就等大跌市才出手。

但唔建議你找每月低點，因為係好難，好易出錯。你好簡單咁，每月用同一日入貨(不用理當天價格)，其實已經做到平衡價格波動性風險的效果。

我假設投資回報有10%（連股息再投資），你每月投資$30000 + 現有資產200萬(現金、外幣、股票)，5年後大約會增值至540萬。

再加上你現有物業，相信你增值至1200萬，係可行的。但重點係你要配置好一個適合和平衡的股票/基金組合，才會有機會做到上述預期回報。

------------------------------------------------

Q22205：

Hello, sir!我follow左你專頁好一段時間，我本身一直都缺乏投資概念，唔懂得投資只係儲錢擺響銀行，最近開始定下一啲目標希望增值同滾存財富。

我現時月入約40k，扣除支出家用我保守計可以每月儲到 約25k，儲蓄有現金50萬，另外近期入手左3隻港股。

1830 2手@ 8.5
2196 2手@54.6
9988 2手@206

我想提升自己理財知識，逐步提升持股對現金嘅比例，希望2年內資產值滾存到2百萬，想將來有資本去搞一啲小生意。

1. 想問我組合嘅股票策略可以有哪些地方改進？

2. 因為我有買左幾年儲蓄保險，但我現時想進取一點同彈性大啲，我嘅經紀向我建議買一啲每月派息嘅美國指數基金，強調本金基本上係冇增值但賺息，呢類產品適合我嗎？

我應該有咩地方要留意？

響投資方面真係新手，好多嘢需要學習，謝謝龔成老師，我有買你本書睇，好認同你對財富管理嘅態度，希望學到更多

龔成老師︰

1) 我假設投資回報有10%（連股息再投資），你每月投資$25000 + 50萬儲蓄和持股，2年後大約會增值至140萬。

但2年只係一個好短時間，就算再有質素的股票，都有機會出現波動，影響你回報，你要明白這個風險。。

你現時持有股票，都係有質素和增長力，但佢地都係潛力股，雖然較有增長潛力，同時風險都較高，不宜持有過多。

組合上，可以用平穏增長股和潛力股作配合，各佔5成左右。若你投資經驗較淺，潛力股比重，要再調至3成以下。到你學到一定投資知識，才慢慢調高。

現在你每月先用5成儲蓄，即$12500做月供。其餘先儲起，用一邊月供一邊儲蓄的策略。

現時大市只是合理區，你現有50萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

若你要達至200萬目標，你月供就要加大至$50000，或者將投資年期加長至3-4年，才可以做到。我比較建議加長年期，因為時間較長，最終回報不確定性會較低，成事機會會較大。

2) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而且，你這份基金係以收息為主，我相信唔會有太大增長力。用來做財富增值，就未必適合。

------------------------------------------------

Q22206：

龔成老師，你好。我係初哥，之前考慮左一段時間，用左少少買入一手深圳高速（$7.7買入），但係佢最近都跌，我有嘗試去了解跌既原因。

但係都搵唔到，我應該點樣去搵資料，了解一隻股票既外圍因素

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以。中短期價格波動，係正常事，唔見佢質素有明顯變差，可持有。但就不要對股價有太大期望。現價合理。

其實你要了解一隻股票，先要了解佢業務係點樣賺錢，這些要睇年報、公司網站等資料。這些資料，在港交所、公司網站、一些財經網，都可以找到。

之後，你要定期留意公司和行業相關新聞，去睇下有無一些事件，對佢"長線"賺錢能力，造成影響。

我地去分析，應該主要集中在企業和行業本身。外圍宏觀經濟因素，不應佔太高比重。

------------------------------------------------

Q22207：

龔成老師，想請教你以下問題。

1. 留意你提到，預計現時為牛市二期。想知下一浪是否必定為牛市三期嗎？還是有機會受各因素影響突然變為熊市？我不太了解牛熊市是否一定順序而行？

2. 坊間預期通脹快來臨而持續多年。想知哪些股票會受惠？哪些類型股票會下跌而不宜沾手？

3. 樓市方面，通脹理應帶動所有民生用品及物價上升、及樓價也因而上升嗎？

龔成老師：

1）現時牛熊分析，已經比過往年代，作用大減。

理論上，會去牛三，但現時我已好少這樣推論，現世代變數多左好多。

在過往年代，一般是順序的，因為會依經濟週期運作，但現世代有好多情況都不是。

你應該集中分析「長遠企業價值」，而不是推算「市況」。

2）如果企業加價能力較弱，本身產品自主能力較弱的，就有可能受影響。不過，我地的分析重點，始終是長遠的企業價值，前景等的因素。

3）理論上係。

當通賬出現，物業這類資產項，價格都會向上，但中短期仍會受經濟、供求、租金回報率等因素影響。

------------------------------------------------

Q22208：

龔成老師你好
電動汽車股具增值潛力

想問一下
點解你會揀買入比亞迪而不是Tesla既？

龔成老師：

比亞迪（1211）與Tesla（TSLA）都是有質素，有潛力的企業，由於同處電動車行業，而這行業的前景均正面，因此，兩隻都有長線投資價值。比亞迪在中國電動車市場、公共交通工具、電池技術方面較強，而Tesla則在外國的電動車市場較強，因此各有優勢。

比亞迪我投資了超過10年，選這股而不選Tesla，是由於過往比亞迪的財務數據較Tesla理想，比亞迪在過往多年，一直都有手機電池、傳統車等業務，為這企業帶來持續的正現金流。相反，Tesla在過往處負現金流狀態，要不斷靠市場集資進行研發，到近年才有正現金流。

投資者選股，選現時已有賺錢業務，有正現金流的企業，會比較穩健，風險度較低。

相反，Tesla過往未有正現金流，風險度會較高，但這類企業，若果能夠由負現金流轉為正現金流，股價的上升幅度可以十分驚人，因此，投資者選那一隻，其中一個因素就是本身的風險承受能力。

------------------------------------------------

Q22209：

老師你好, 好想請教你一個心理嘅問題, 最近我見啲科網股跌得好犀利, 譬如阿里巴巴我留意住佢, 人嘅心理就係咁

當然佢一路下跌嘅時候就會等一等,好似每日都跌啲每日都跌啲,咁唔會下定決心買,但係今朝早我見佢好似有啲止跌回升嘅感覺,跌咗落去又升返琴日嘅價位

咁我就買咗一手好想請教老師其實呢種心態係唔係唔係咁理想?

究竟我哋應該係下跌一路下跌當中捕捉一個價位就買?定抑話要等佢U turn升返少少先至買?

龔成老師：

你現時停留在一般散戶的思維，你唔好理短期股價，你要學憑投資真正賺大錢的人的方法，例如巴菲特的方法。

第一，著重企業價值

第二，不預測短期股價走勢

第三，不要情緒化投資

第四，要以平貴度去進行投資

第五，買入前定好投資策略，不要到時變來變去

------------------------------------------------

Q22210：

Hello. 龔成。想請教一下、如果香港政局不穏或我自覺身處地方政局不穩。現在所持有的股票應該先估出還是繼續看企業現在的質素？

因為萬一有咩事或香港經濟不太自由，無辦法估計所持有的還可否有價值

我現時月供五隻股票每隻1k.
1, 823, 3,66,2800

謝謝你的時間和建議！

龔成老師︰

若你相關資產，係會依然保留在你所講的地方投資，就應該睇企業質素。除非佢政局問題，同時影響到企業本質，否則政局問題應不作考量。

因為股價長遠都係反映企業質素，中國會係未來10年其中一個增長理想經濟體，香港股市中有不少有質素的內地企業，長遠都會受惠。

而且，內地企業需要一個面向世界的集資平台，相信香港唔會去到好極端。

你現時月供股票，係適合你。如果你想增長力再大少少，可以加入少量潛力股，但佢地風險會較高，你要自己衡量。

現時大市只在合理水平，每月資金唔好盡用，要留有部份，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22211：

龔sir, 早晨！想向你請教一些有關香港樓的問題。

1）我見現在內地有房住不炒政策，加上Facebook google 等有機會撤港，請問分別對香港樓巿有影響嗎？因為擔心這兩個都會令香港樓巿下跌。。

2）我最近想投資買樓收租，雖然見租金回報率不算太高，但仍希望能賺於升值。可是，另一邊又擔心以上的情況會令樓價跌，最後得不償失。。

3）由於預算（約550-650萬）有限，我正考慮沙田第一城，淘大花園，北角/銅鑼灣/灣仔，請問哪個選擇會比較值博？

4）（1）提到的問題對本地地產股會有影響嗎？

問題比較多，謝謝和期待你的回覆

補充一點，我擔心房住不炒的影響是因為有見香港政府與中央的關係越來越密切，政策上有不少都跟中央。。所以擔心香港之後也會推類似。。

龔成老師︰

1) 內地由於部份地區，房價炒至不合理水平，故中央政府才出手干預。好似最近一房多校政策，都係為內地不合理的樓價，去進一步降溫。

但香港房屋政策，未必一定完全跟足內地，因為大家背景和地區條件都不同，好難話完全一樣。但類似調控，係有機會。

而Facebook google 會否撤港，暫時都係未知之數。但有大型企業離開，對香港經濟係不利，樓間會出現影響係唔奇。但長線香港房屋供應失衡，相信出現較大回調，機會較微。

2) 長線樓市係升架機會較大，但你現時資金不多，加上投資樓市值博率不及股市高，故你先投資優質股，會係較好。

3) 地區上，沙田第一城和淘大花園都係較有值博率。但你都要睇翻物業本身質素，價格去作最終衡量。

4) 會，因為佢地除了住宅物業，還有工商用物業。若大型企業離開香港，佢地都會受影響。

------------------------------------------------

Q22212：

老師你好，我現時31歲，月入大概4萬，扣除所有開支每月大概可儲1萬。以下是我現時的資產分佈，想問問你的意見：

- 銀行現金約25萬

- 阿里（9988）100股（買入價 $250）
- 中生（1177）2000股（買入價 $7.5）
- 安碩恆生科技（3067）1000股（買入價 $20）
- 信義光能（968）2000股（買入價 $12.7）
- 舜宇光學科技（2382）100股（買入價 $175）
- 華潤水泥控股（1313）2000股（買入價 $9.19）
- 金沙（1928）800股（買入價 $35）

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，係有質素和適合你。但就過份偏重於潛力股(9988, 1177, 3067, 0968, 2382)﹐令風險偏高。

以你年紀，潛力股佔5成好了。若你投資經驗較淺，要再調低少少。

但由於你持股都有質素，你唔需要去沽出。用新資金去慢慢調整翻個比例，咁就可以。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

大市現處於合理水平，那25萬資金，你可以多用5-10萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q22213：

謝謝成哥，708 恆大 & 1357 美圖，兩隻股我蝕左投資本金嘅六成，剩返三成（總共得返3萬蚊）

其實真係好少，我睇過兩隻股三個月前都係好爆升，但係而家又跌返差唔多去到一年前嘅低位，我究竟好唔好等呢？

其實而家得返三萬蚊我諗緊不如等半年睇吓佢地變成點？我傻嗎？

好彩我投資左10萬蚊1211 比亞迪，我諗住當長線投資，當時180入，我第日等到過咗250先再放平衡返心態

龔成老師︰

其實唔係所有股票"等"，就代表佢一定會有機會重回買入價。因為無質素的股票，只會越跌越深。

所以，我地係決定是否守的時候，重點一定要睇隻股票有無質素。有的話，守係可以。若果係無，你只會浪費時間成本。你應盡早沽貨，投入其他優質股會較好。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

這2隻股股票，若你持貨不多，可以守住先，再觀察。相反係持貨比較多，就要沽出部份，去平衡風險。

另外，你唔好停留一般散戶個種"賺差價"想法，諗住升就沽，賺個現金差額回來。

我地真正財富增值，係將只會貶值現金，換成會資產的一個過程。只要資產係有質素，佢就會一直為你增值，你係唔應該賣出。

比亞迪(1211)係有質素的潛力股，係一個唔錯的資產。而且佢現時才在發展階段，未到真正全盛時期，價值未得到完釋放。。建議你一直持有，會對你較有利。

------------------------------------------------

Q22214：

老師你好！想代朋友問問他有40萬，想買些穩定的股票。短時間，大概持3至6個月到，他想知道有何選擇呢？謝謝你

龔成老師︰

其實就算最穏定和優質股票，中短期都一定有波動。

3至6個月係一個好短架時間，我一般建議投資者，持有股票最少3-5年，才可以較有效去平衡價格波動上的風險。

因此，如果只係3至6個月時間，我建議你朋友最多只可做定期存款，唔好以股票作為目標，去做增值。

------------------------------------------------

Q22215：

非常感謝龔成老師的回覆，您給予的投資建議，我會認真考慮。在我以後的投資生崖中，我會更著眼於企業本身的價值之上。

我近日先至在不同的社交媒體上認識到龔成老師您，您在眾多文章中提及過小米跌到24蚊，就可以開始分注吸納、福壽園，跌到7蚊就可以開始分注吸納。

小米、福壽園，最近我都打量著。而阿里，目前200蚊防守性極強。但現在，我會更傾向於觀望或審慎小注分注並長線持有的策略。

我現在先對龔成老師的著作《80後百萬富翁》一書感到興趣，請問有何購買渠道?

可能較為不幸，我在看到襲成老師的回覆前不久，已再度入市，不過是打算小注分注入，並打算長期持有:

-天能動力(819)，14.26買入1手2000股。您之前在2021年4月28日的文章上有提及過天能是有質素的，業務向好方面發展。

我自己亦對天能進行了一些資料搜集。目前是超低市盈率，僅5.38倍，就算相對同業，都是一個極低市盈率水平。

股價現處於52周較低水平，盈利及其増長速度亦相當亮麗。行業前景方面，未來電動車是大勢所趨，動力電池企業的前景更是無可限量。

不過，近日我看過一篇文章，指天能動力在較早之前進行分拆。天能動力將接近貢獻九成利潤的電池研發、製造以及銷售的核心業務分拆予天能股份。

那請問天能動力 (819)，在進行分拆之後，在企業質素以及投資價值上，有否改變過，我是否已跌入低市盈率陷阱?

-深圳國際(152)，10.86買入了兩手1000股。您在較早前有專欄提及過深圳國際，評穩定、高息、有少少增長力。深圳國際一股，我跟長輩研究過之後，是看好的

不過一定要長期持有，到通關之後，好可能會急速增長。

我自己亦對深圳國際做過一些資料搜集，深圳國際，由深圳市政府透過投資公司間接持有，企業本身持有深高速一半股權

經營收路費、港口、物流園業務。另外，我經披露易發現到深圳國際的亮點，發現兩摩、花旗等大行的持有已發行股權的占比好多，約接近六成之多

相對其他內銀股/收息股/公用股，大行持貨一般只有大約十幾％左右，深圳國際在這方面給我安心的感覺。不過，發現2020年的盈利為4007百萬，盈利增長率為負20.19%

請問這只是疫情所造成的現象，對企業質素以及投資價值上，亦沒有影響?

再次感謝龔成老師的回覆~~~

龔成老師︰

你係分析上，依然係未放開過往短炒的模式。雖然我明白唔係一時三刻可以改變，但你必需要努力去調整。

52周較低水平，係一些技術分析，主要係短炒用。過去股價，跟今天企業質素，未必有好大關聯性。如果你用佢做投資決定，好易會出問題。

天能動力（0819）分拆電池業務上市，對佢價值唔會有影響，佢會係新上市公司的大股東，相關盈利依然會係佢會計帳目當中。

至於佢一直低市盈率，很大程度係因為市場對佢長線賺錢能力有保留。只能說，此股風險本身較大，投資係可以，但緊記不能大注。

深圳國際（0152）有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

但留意，集團主要股東係深圳市投資控股有限公司，而非兩摩、花旗。其實一般股東比重，對企業分析上，重要性唔算好大﹐最多只會作為輔助性參考。

由於疫情關係，令到國內不少經濟活動，出現停頓。因此，收入難免受到影響，但這都是中短期因素，長線投資價值依然存在。

集團過往業務穩定，生意與盈利都不差，不過就不是高增長類。這股都有長線投資的價值。

現價合理，投資收息可以。但以你25歲年紀，這類收息股，就不太適合。你應先集中係有增長力股票，去累積一筆財富，到退休時，才換成這類收息股，去創造現金流，而非現在。

------------------------------------------------

Q22216：

唔好意思龔成老師
我有一樣急需請問你的意見

因為我在年初恆騰網絡136炒起時分階段入左好多，平均價係10.81，我最高峰時可以賺$300k但無走，就是因為貪心

現在我手持48000股136，賺面蝕300k左右，眼見他一直跌好像永不翻身咁，恆大又好像沒有起色，真的很擔心

我投資的一百萬股票，有一半就是買了136

請問龔成老師
我現在應該止蝕離場嗎？

龔成老師：

第一，我地應該建立平衡組合，同一行業要少過3成，同一隻股票要少過15%，你出現了集中風險。

第二，恒騰網絡（0136）有危有機類。這些股我地投資的金額，要更少。

佢現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，可以升得勁，但失敗，會跌得好勁。因此，長線投資不是不可，但只能小注。

現時你最大的問題是集中，因此，要在反彈時減持，餘下先守。

------------------------------------------------

Q22217：

龔sir你好，一直有留意你同睇開你岀既書，本本都令我獲益不少，希望你唔好停下來，繼續讓大家一起進步

有少少問題想請教一下，本人三十四歲，分別係唔同時期投資以下股票：

0005 1200股 均價$59
1038 1125股 均價$49
0066 500股 均價$43.8
9988 300股均價$ 227

Q1:請問呢個組合可以嗎？ 會否太過保守？

Q2:如果賣左0005 轉換其他更優質資產會不會更好，比如Reits 或 地產股 因為香港始終地小人多租金不斷向上，回報會唔會好啲

銀行股賺錢能力如你所講不及以往

我會耐心等候回覆 謝謝

龔成老師︰

多謝你的支持，我有時間，一定會繼續出書，同大家分享更多有關投資的知識。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，以於有不少比重在匯控(0005)，所以係有點保守。

2) 以你34歲計，應以增值為主。匯控(0005)只係收息股，增長力好一般，唔建議你持有咁多。地產股，係可以考慮。

但房地產信託基金（REIT），就未必太合適。佢原理如同買樓收租，基本上是穩健的。而房託規定要將可分派的90%收入作派息，故利息有一定保證。

而租金長遠一定會上升，故長期持有不錯。但好多房托，其實都無增長力，係純收息，除了領展(0823)適合你外，其餘REITS，在你這年紀暫時不要考慮。

以下是一些有增長力的優質股，你可以將部份匯控(0005)換碼至優質，平穩增長股，及潛力股票，未來新資金，也可以用佢地作為投資目標。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，我想提多你一個要點。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，指數基金係不受此限。你現時組合總金額不多，有出現過份集中問題，都係正常。但當你組合金額有一定數量，你就要留意，唔好比個別行業/企業，佔太高比重，以免造成不必要的風險。

------------------------------------------------

Q22218：

龔成 你好，一直打算分注VOO同QQQ 定期各買一股 但他們價位一直升

如果現在入市 會是貴價位入嗎？

還是應待他們跌至什麼程度才買入較理想？

龔成老師︰

Vanguard標普500指數ETF〈VOO〉，是追蹤標普500指數的ETF。而Invesco QQQ Trust(QQQ) 是追蹤納斯達克100指數。

2隻都係有質素的ETF，後者增長潛力和風險會較高。但現價都處於合理區頂，至略貴水平。

但由於你係用近似月供的模式去入貨，本身會有平衡價值波動效果，因此你現時已可以開始買入。

除非你本身有一定投資經驗和技巧，否則我唔建議你用平貴去做策略，用你本身計劃定期各買一股，會較好。

但緊記，你這個定期入貨計劃，一定要長期進行，才會有理想效果。最少維持3年，並持有這些股票5年以上。

當然，可以的話，最好一直持有。因為，優質股持有時間越長，財富增值效果就會越理想。

------------------------------------------------

Q22219：

龔成老師，你好！本人今年3x歲，丈夫4x歲，丈夫是西醫，沒有子女。

1. 擁有一個已完成供款，現值$800萬的物業
2. 持有一個寫字樓舖，現值大概$450萬
3. 兩年前，購入一層價值$1,200萬物業，康城樓花，今年年尾收樓，正在供款中。
4. 持有大概40萬匯豐股票，購入價$48元
5. 有400多萬現金

兩三年後，有計劃搬到港島區居住，不知道應該如何處理，現在手頭住宅物業？

這些年，我們忙於工作沒有學習投資知識，對投資一曉不通！我們第一步應該如何投資呢？

謝謝你！

龔成老師︰

我地投資除左講求增值，組合平衡性都好重要。現時你有2個住宅物業，加1個商用單位，其實成個組合嚴重偏向左係物業類。

我比較建議，你用手頭上其中一個物業，去轉換成港島區物業。至於沽出那一個，你可以從佢長線潛力和租金回報率去衡量。

其餘資金，你就用來投資優質股，這樣安排會較理想。

另一個方法，你唔洗沽出現有物業，將佢地放租，以租養樓，從而節省買賣物業之成本。之後，港島區自住房則另外購買。

但這樣做，風險就會較高。因為當你買入新港島區物業後，資產會極之偏重物業類。當物業市場有問題，你成個財富組合，會有嚴重影響，你要自己衡量。

不論你用那一個方法，你都應將每月閒錢和置業後餘下資金，盡力投入優質股，去提高優質股係你財富中的比例，去盡力提高平衡性。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

現有匯控(0005)都可以持有，但佢係收息股，就要係收下息，唔好預佢有太大增長力。而且，佢已有一定數量。所以，你暫時唔好增持佢或銀行業股票。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

------------------------------------------------

Q22220：

龔sir, 你好，求教呀！我同老公因為住屋問題，攪到非常煩惱，想聽聽你的意見。我哋十年前買落2房戶，住到現在，但仔女已步入青春期，

需要各自有自己房間，但3年前我哋將宜家2房戶加按，再加上當時儲蓄，買多咗個1房單位收租，所以宜家煩惱緊應該賣出自住單位，樓換樓呀，

還是自住物業放租，然後再租一個3房單位住呢？

如果樓換樓的話，我哋計過財政上會有壓力，但仔仔已是中三生，有必要同妹妹分開房間。龔sir，請你教教我哋該如何做？

我哋宜家現金只有700k左右，股票只有2800（但冇諗過賣），如果真的要樓換樓的話，計過同區屋苑，最平都要補2百萬現金，仍未計stamp duty, commission payment 等雜費。

龔成老師︰

你有2個方法，第一個方法就係你所講，將現有自住單位放租，之後再另租一個3房單位。好處係你可以保留原有物業，同時也減少了買賣物業的成本。

另一個方法，就係盡沽2個現有單位，去買入一個3房單位自住。這樣做以2間細屋，換一間大屋，相信可以減少你財政上壓力。但中間買賣物業的成本，就會相對較大。

而且，你會失去左一間單位租金的現金流。

至於用邊個方法，你可以睇翻整體財政狀況，邊個方法會較穏當。另外，你都要考量埋現有物業質素。若佢地長線係有增長潛力，你用以租養樓去保留佢地，會比較好。

若投資價值一般，你可以沽出套現，直接買一間大屋，就可以了。

但緊記，你要有信心長線供得起，才好置業，否則用方法1會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16481-Q16500）

Q16481：

老師，多謝你之前的股市騙局提點！因為你既po，我發現自己做左水魚！我想趁未輸得好甘快啲走，可以俾啲意見我嗎？

呢個月我入左3隻-
1870-$0.44
9938-$0.34
1672-$3.62

想問下應該開市喎理咩價放出定系可以等升啲啲輸少啲放出？謝謝

龔成老師：

益美國際控股（1870）上市後的業績明顯比上市前弱，要小心，之前股價大上大落，現時市值$2億左右，我相信已等如佢的大致合理估值，相信好難會上翻高位，你可以等升翻少少就賣。

華和控股（9938），股價同樣大上大落，以業務是建築，以佢的獨特性及行業，好難有好高的估值，股價現時跌左9成，不過初步分析仍有點貴，賣出較好。

歌禮製藥（1672），這股有危有機，之前炒作得好勁。這股我唔敢話佢零潛力，不過，就一定是高風險類，要睇你博唔博。如果你注碼不多，當博佢之後的藥有突破，不是不可，但你都要有心理準備，這股可以持續向下。

------------------------------------------------

Q16482：

你好老師！我最近透過朋友介紹關注左你，想多了解資產增值投資方面既野。

我本身有5萬人民幣，宜家人民幣不斷貶值我係咪應該轉返港幣用來做港幣的股票/基金投資？

我未買過股票，個人cash flow得10萬，我可以點部署令到3年後儲到最少50萬。宜家我會盡量逼自己每月儲一萬
多謝老師解答！

龔成老師：

相信人民幣再大幅貶值的力度有限，不過，亦都不能預期佢會升值，長期持有貨幣是無用的，要轉到「資產」，如物業、優質股等。

如果你能逼自己每月儲到$1萬，我會建議你將其中的$6000去做月供股票，長線投資。

你可以考慮盈富（2800）$3000。

另外再加2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$6000。

現時大市處合理區，可以一邊投資一邊留現金$4000，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

如果你不想做月供，就自行分注，以每隔2個月入一些股票的模式進行，慢慢入一些優質股。

------------------------------------------------

Q16483：

老師，我有一個全資擁有的物業。在2010年年尾陪朋友睇樓時自己心動買了一層二手藍籌屋苑，remaining mortgage loan 約$3.9mil, 估計現值約$8mil，買入後一直放租，租金剛好足夠cover mortgage, management fee, rental tax and other expenses.

我實在不喜歡工作亦沒有事業心，打工對我來說除了是維持生活費之外，最大原因是kill time... 如想今明兩年(45歲前)開始落實財務自由的狀態

我是否應該賣掉現時的藍籌屋苑cash out and realize the profit 然後買入(或分段買入)收息股? property profit 加上我的股票及MPF價值是否足夠養老?

如此的想提早退休除了不喜歡工作之外，亦因為這幾年發覺因為工作而心理壓力越來越大，每每星期日晚都一定會失眠，因為不想面對新的工作週。

In order to maintain my mental healthiness, 所以萌生提早退休或轉做簡單part time工作的念頭。(我是一個閒不來的人

就算是提早退休都會找些事情填滿時間表，所以part time job, 或去旅行，或到大學讀書等的生活模式會是我所expect的)

希望得到你的意見。謝謝!

龔成老師：

每個人都有佢喜歡的生活，你有這目標，向前行就得。

賣樓後套現$400萬，這是你「可投資的資金」，最好投資一些風險較低，現金流較強的項目，目的是為你產生現金流，同時保住財富。如果你認為下面方法可以，這資金合你的生活情況，你可以過2年後賣樓的。

比起單單持有收息股，我會建議你將資金分成5份。

第一部分投資收息股，你可以建立一個收息股組合，你可考慮港燈（2638）、香港電訊（6823）、匯豐（0005）、工行（1398）、置富（0778）、陽光（0435）、深高速（0548）等，大多有5%股息

你平衡的投資這些股，除了可以得到穩健的收息收，同時可有效的分散風險。

第二，投資債券，你可以選擇A評級的債券，年期較長都可以，但利息卻不高。你可以到銀行問問。

第三，投資年金，你可以睇睇，這是適合你們的產品，零風險，可以有穩定回報。

第四，你亦可投資銀行低風險類的產品，你可自行到銀行了解下，總之是「低風險，持續現金流」的。

第五，持有現金，除了可做定期外，現金亦可以為你的後盾，以備不時之選。同時，若投資市場大跌，你可以在這時買到更多的收息股，股息率會進一步上升。

你可以將$400萬資金，平衡地分配在上述的項目上，對你來說是最好平衡風險，同時有穩定的現金流。

目標是平均有5%的收息回報，以$400萬來說，平均每月$16700，你可以睇下這數與你現時生活費，去衡量具體情況。

如果你想增加回報，可以投資更高息的收息股，但就會提高風險，你可以視乎自己風險度決定。

------------------------------------------------

Q16484：

阿sir我係你舊生，做完瑞聲分析，不過有少少野想問

瑞聲5年平均為3.49，而2019年每股盈利是2.06

佢嘅缺點比較單一行業嘅五大客戶，而且生意受到手機市場增長降低而影響到，雖然都有優勢

如之後的5g手機潮，光學業務有望成為增長動力，聲學亦算係壟斷旗艦手機市場，品牌價值高，負債處合格水平等

所以我推算佢每股盈利2.3，合理市盈約12-18倍，推算大約28-42，想問呢個水平合唔合理？

龔成老師：

瑞聲（2018）本質不差的，我相信佢發展正面，不過不是高增長類。佢在光學在行業的優勢未到好強，因此不能估值太高，至於聲學方面，正面的，但就不是高增長業務。

因此，整體的市盈率會比10倍-15倍，不過你以一個較低的EPS作估值，而我會用高翻少少，所以你最後估值的數目，其實都接近合理區。

相信佢近一年的EPS會弱，但長遠，會慢慢上翻，因此用「2.06」是比較保守。你預現價大約是合理區中部。

------------------------------------------------

Q16485：

老師，剛讀完《股票勝經》，之後又買了《年報勝經》，因為龔成老師經開強調要睇年報睇年報睇年報

我又係投資初（新）手，睇完頭三張講年報的部分；順道睇緊 0270 19年年報，想問乜嘢係 EBITDA ?

同埋我流意到，呢隻股供水業務收入好似已經飽和？反而由19年積極做物業投資？

龔成老師：

EBITDA是指除息、稅、折舊攤銷前的溢利，作用是分析企業的賺錢能力，即是盈利減去上述4個項目。

投資者會分析過往EBITDA的變化，以分析企業的賺錢能力如何，有無增長能力。同時，可以與同行比較作分析，以確認這企業在行業的質素。

你分析上述數據時，最好用較多年份分析，唔好只比較兩年。

水務增長的增不多，但這是一個好穩定，現金流好強的業務，因此好有價值，但就不是高增長型。

至於地產，佢有少少增大，這會提高了企業的風險度，不過增長力會因此而增加。

------------------------------------------------

Q16486：

老師，之前有提過打算今年/明年會置業 但因為本金仲未夠 所以現時都係主力儲錢做首期

如果購買物業之後都應該冇多餘既錢再去投資股票 因為有啲會問親戚借 有一部分又要還借貸 （如果冇法放租）

如果之後經濟好轉 股價都會有所上升 就會錯過左入市既最好時機 如果係咁我到時應該點部署我之後既投資？

龔成老師：

如果你打算1、2年內買樓，由於要用現金，因此，這部分的資金不能投資，只能儲現金，然後進行買樓動作。

所有的投資，都會等你完成後先進行。

買完樓後有資金剩，就可以進行適當的投資。

所以，你要盡快儲最多的本金，買樓後如可出租就較好，同時到時要盡力儲錢，盡快投資。

------------------------------------------------

Q16487：

成哥你好，呢兩個月我閱讀左你5本著作同埋報左你開既投資班。有小小資訊。

1. 我聽完你意見之後，開始左月供股票，分別係友邦、煤氣、地鐵、領展、盈富、金沙。另外自己有散買太古。
想請問對於我既組合可唔可以比少少意見。因為我睇完你本書(股票勝經)知道應在後生時投放更多在潛力股，但同一時間深明自己的能力圈不足。所以選擇左呢個組合。

2. 我非常認同在合理或平宜價格投資優質企業。但始終不太明白如何知道企業究竟處於高估或低估的情況。

請成哥可以指教一下

龔成老師：

1）我地進行人生財富累積，會用「先增值，後現金流」作方法。所以，如果你年輕，應加大投資潛力股類別，不過要留意，潛力股要求你有較高的投資技巧。

我建議你這刻先投資「平穩增值股」，到你上左堂後，才開始投資潛力股。你上述的所選，都是平穩增值股，你可以開始月供，但唔建議用盡資金，你一定要同時留現金，上完堂後會有更具體的投資方法。

2）要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

所以，你到時會更具體掌握。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

股票班見！

------------------------------------------------

Q16488：

老師, 想問下你點睇2196同6185呢兩隻股?

龔成老師：

復星醫藥（2196）本質不差的，業保持發展，生意有穩定增長，不過見佢盈利增長的力度不及生意，這反映佢賺錢能力有所減慢，這點要注意。

現時股價合理區中上部，分注投資仍可以。

至於康希諾生物（6185）上市不久，我一向對新股及半新股都有保留。因為佢地一定會整靚盤數先上市，而真正的賬目，要過1、2年先會見真章。

佢主主要於中國從事研發疫苗產品，例如有3種臨近商業化在研疫苗：包括腦膜炎球菌結合疫苗組合，係中國第一種獲批淮作應急使用及國家儲備的埃博拉病毒疫苗。

這一刻仍好難講佢有無質素，但見佢股價升左唔少，只可以話高風險，可能有潛力，你如投資，要自行控制好注碼。近期有少少炒作，要小心，總之要控制注碼。

------------------------------------------------

Q16489：

老師，請問你點睇1881?其股息約有9%, 較435和778為多。但在你的新書中，只見你提435和778。是否1881有什麼問題呢？謝謝！

龔成老師：

富豪產業信託（1881）其實都有質素的，是不錯的收息股。但佢地其他房託，會波動少少。加上酒店中短期的風險較大，不過，現時以投資值博率的角度分析，其實都有投資價值。

睇翻佢持有酒店物業投資組合，持有8間酒店以收取當中的租金收入，4間在香港島，2間在九龍，1間在沙田，1間在香港國際機場。整體來說不過不失，位置與質素都不算差。

雖然酒店業務有波動，但由於富豪產業的收入模式是收取較穩定的協定租金，因此波動較少，令過往的可分派收入保持平穩上升狀態，過往股息大致穩定，但到近期，當然會好波動。

所以，你都可以考慮這房託，佢中短期會較弱，但長遠仍是有質素，只要你控制投資金額，就得。

------------------------------------------------

Q16490：

龔成老師你好，之前由朋友推介我睇咗你本《股票勝經》，但都未係好明點樣詳細分析一隻股票既質素同估值等。

所以想請教老師你下當初屋企人買落既[email protected]同埋
[email protected] 質素同前景如何？應唔應該繼續持有？

啱啱已經喺澳門書局買咗《50優質潛力股》，希望再多加學習學習，多謝老師！

龔成老師：

《股票勝經》是基礎，要掌握企業質素與價值分析，你要多睇年報，分析股票，同時你可以睇《選股勝經》《年報騰經》。《50優質潛力股》，你都可以學到分析一間企業的過程，那些要重點分析。

錦欣生殖（1951）本質不差的，長遠有增長力。

佢主要係中國及美國，透過合約安排從事經營及管理輔助生殖醫療機構，以提供輔助生殖服務、管理服務，以及輔助醫療服務。

佢的自有輔助生殖醫療機構，包括位於中國的成都西囡婦科醫院及深圳中山泌尿外科醫院，以及位於美國加利福尼亞州的３間ＨＲＣ　Ｍｅｄｉｃａｌ手術中心以及ＮｅｘＧｅｎｏｍｉｃｓ　ＰＧＳ實驗室。

佢過往的財務數據不差，生意與盈利都有不差的增長。不過現價就唔算平，小注好了。

北控水務集團（0371）本質不算差，但由於佢的負債在近年不斷上升，市場認為佢的風險度提高左，對佢估值方面都保守左。

整體來說，這股可以長線投資的，不過不建議大注。而現價合理。

------------------------------------------------

Q16491：

老師您好！聽説老師投資有道，且不吝賜教，實在難得，因此想請教老師：

我今年31歲，月入約12萬，為家中經濟支柱，供養媽媽（已退休）及弟弟（月入2萬多）。扣除家用及家庭開支（共4萬）後，我每月可儲蓄約7至8萬。

我有計劃結婚生子，而未婚夫已置業自住（仍在供樓），並有一部車（Tesla 新款）。未婚夫月入約8萬，每月可儲蓄3萬。

現時，我個人有現金450萬左右，剛買一份可扣稅年金（供10年，每年交4萬多）及兩份共50萬儲蓄保險（只需供5年， 一份25萬，每年5萬，已交第二期；另一份25萬，已交滿期）。一直以來，我主要做大額定期存款，賺少少利息幫補家計。但我知道長此下去，並不是辦法。

在股票方面，因家人早年投資遭遇滑鐵盧，我對投資無信心，而且我工作繁忙，較難“睇住個市”，因此毫無投資經驗。最近，我買左置富產業信託（1,000股，7.05買入），僅此而已。

長遠而言，我想透過投資收息及賺錢，希望於40歲時，擁有每月10萬現金流。

就我現時資金及財產，應開始投資股票（藍籌、公用股、地產股、收租股？），或買樓收租？兩者應如何分配，作投資規劃？

至於年金，第10年應該會回本，屆時應否由年金繼續滾存，或提取作投資？

有勞老師指點迷津，十分感激！

龔成老師：

我地進行理財，要建立一個攻守兼備的組合，而你現時最大的問題，就是進攻方面不足。

我地理財，就是建立一個平衡、優質的財富組合，我會建議你增加「優質股」、「物業」，以這兩個作為增值的核心。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

由於你投資經驗不多，我會建議你投資一些較穩健的股票，同時，以月供模式，原理就是不斷儲優質股。每月投資$40000。

到你有一定的經驗及知識時，可以動用現金作一手手模式投資。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。做月供股票，每月$5000
。

你可以考慮盈富（2800）$20000。

另外再加4隻（每隻$5000）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

另一方面，你可以留意香港的物業，可以投資一層作收租，香港經濟轉弱，1、2年內樓市可能會跌（相信不會大跌，最多小回），而長遠會向上，你可以留意下物業。

------------------------------------------------

Q16492：

老師，本人一路都有讀你出嘅書，早前根據自己嘅分析同埋老師嘅推薦入了

銀河娛樂、金沙中國、中國人壽、阿里健康

中國人壽嘅市盈率市帳率分別只有7 同埋 1 ，賺錢能力非常唔錯，分析埋年報同埋各方面因素，我因為佢在便宜區，老師點睇？

阿里健康主要做醫療分銷，其獨特之處因為本身阿里巴巴已經係一個獨特國際品牌，喺國內佔有一席位

雖然佢頭兩年新公司未能賺錢，但係最新嘅公布佢已經接近收支平衡，正在穩步上揚發展，唔知老師點睇？讀者上

龔成老師：

上述4隻股，都是有質素的，長線投資無問題，但有幾點要留意。

首先，兩隻都是賭業股，你要計翻佢這兩股佔組合的比例，唔好將資金過度集中在單一行業，要建立一個平衡的組合。

另外中國人壽（2628）是不差的股，但保險股計算估值會比較複雜，市盈率只是其中一個方向。同時，近年平保（2318）的質素有比中國人壽強的情況。

至於阿里（9988）有潛力，但這刻未算平，因此，不能太過大注。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16493：

龔成老師,我係早前上完你班既學生。好多謝你係班上所教既知識，我感覺到你對增值財富既熱誠，亦感覺到你很用心教學。

1. 我很想上你進階班，但平日班時間對我有點困難，加上讀過初班我更明白一星期上2堂我未必完全能掌握到課堂所教既知識，請問會有星期六班嗎？

2.老師認為每個人可以都做到財務自由嗎？我快將40了，但一直儲蓄不多，只有大概40萬的基金儲蓄，去年投資失利讓我蝕很多錢，現在流動資金只剩10萬左右。可幸的我沒有太大的家庭負擔，我月入大概2萬，扣除家用和保險和其他洗費，一個月還剩8000左右。我還可以財務自由嗎？

龔成老師：

1）我目標是2021年，點都搞一次星期六的進階班，但時間未定，不過會有的。因為一搞就10堂，即是2、3個月時間，所以安排較難，但點都想搞一次。

2）我相信大部分人都可以，不過要睇佢肯唔肯付出，我地進行的是「先苦後甜」的過程，不過卻成功換到往後的自由。

你的情況不差，但要保持努力，保持現時的儲蓄，同時小心用資金去投資，只投資優質股，建立平衡組合，同時耐心等時機才出手。

其實你已學到課程知識，下一步就是運用問題，學員較難克服的，就是心理，因為課程講的是知識，但當你地感受時，就是另一回事，你要好好做到這點。

------------------------------------------------

Q16494：

老師您好 想請問一個問題，我的保險經紀介紹左一個儲錢派息比我，派3代，譬如我每月供4000，供5或者10年

第11年開始派錢每年大約3萬，一直派到我仔嘅孫，肯定息唔拿會越滾越大。

還是每月投資月供股票好？都是大約4000左右每月
感謝您 祝安康！

龔成老師：

理財是一個配置的問題，你要建立一個平衡的組合，要做到攻守兼備。

上述的產品，是持續現金流，風險類不算高的產品，回報率不算高，但就有防守的功用。至於月供股票，回報會較高，但不確定性較大，風險會較高。

因此，上述產品你可以購買，這在財富配置中有作用，不過這些產品不用買得多，適當就得，而餘下的資金應該用作進攻。

------------------------------------------------

Q16495：

你好龔成老師！我今年28歲，每月可儲到$14000，手上有40萬，當中只有5萬買了以美股作投資的派息基金。其餘的30萬做了定期。

本身沒咩研究投資，年近聽同事介紹過老師的優質股概念，就開始了解多了。

想問短期內入手以下的組合：
1038 一手
1972 二手
2800 一手
778 一手
823 一手

請問組合合適嗎？
價位又合理嗎？
謝謝

龔成老師：

你年輕，其實應該增值多一點，因為你可承受風險，同時年輕時睛富增長期。

因此，你唔應該做太多定期，同時應該加大力度投資增值項目。

至於你想買入的股票，都是有質素的，可以投資，現時在合理區，只要你唔好用盡現金，就可以買入。

但組合太過重於地產相關股，這會出現行業集中的風險，你最好增加盈富（2800）及其他行業的比例，減少地產比例。

------------------------------------------------

Q16496：

龔成老師請問瑞金礦業（246）
持有股票是否一無所有？

龔成老師：

瑞金礦業（0246）我無研究過，不清楚佢具體的情況，而我已無法在財經網站找到相關資料。

我只能在網上，見到佢之前被港交所取消上市地位，即是由「上市公司」，變成「私人公司」。你擁有的股權仍在，只是無上市，不過，你無法賣出股票，除非佢有人肯收你的股票。

另外，這類除港交所取消上市地位，一般的價值都很低，你最好唔好有特別期望。

------------------------------------------------

Q16497：

老師你好，我今年26歲，在接觸老師寫既大富翁及年報分析此等書著都獲益良多。

今年開始每月都放$8000月供。但有時卻想不通，如若股市一直供一直升 是否變為越供越貴？自己會否越買越貴？多謝老師解答

龔成老師：

你的想法有對有不對。

如果企業本身的價值無變，當股價一直向上時，你的確會愈買愈貴，所以，月供股票其實都可以彈性處理，在升得太多，處貴時，就可以停一停。

不過月供的特點是將買入價平均，一定有平或貴的時候，但長期就是合理價，所以，除非你好明確見到貴，否則一直供都得。

另一點，就是關於企業價值，當一間企業的價值不斷向上，股價向上是正常，這沒有貴。因此，當你見到股價不斷向上升，如果企業價值有實際向上，有真正的業務支持，其實你無買貴貨，只要長期月供就得。

我會建議你一邊做月供，一邊留部分現金，這樣會最為平衡。

------------------------------------------------

Q16498：

龔成老師你好，本人31歲。一年前才還清債務，想急起直追。現時月入23k,月儲1萬元。手頭現金有4萬左右，擁有以下股票：

1810 1手
1876 1手
2800 1手
3319 2手
6889 3手
7200 1手

接按況我適合選用什麼的投資策略？我參考你的書提到水桶投資法，如年輕可投放在潛力和增平穩增值股上，對嗎。如打算再購入盈富基金和金莎中國，可取嗎？

龔成老師：

你仍年輕，只要每月能保持儲到$1萬，保持合理投資，長遠仍可累積到一定的財富。

現時你持有的股票，基本上都是有質素的，DYNAM JAPAN（6889）增長力不算強，不宜持有太多，ＦＬ二南方恒指（7200）這類放大恆指回報的ETF，有利有弊，回報與風險都會增加，你要明白這點。另外，這基金都會有潛在成本的。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先。

你可以考慮盈富（2800）。

另外再加：金沙（1928）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q16499：

你好，經過半年時間
2800、1113、823、66

各已供7000，共28,000
另有可用作投資金額52,000
每月可儲10,000

我認為仍有再新一輪跌幅但又不確定，請問應如何步署？
想請教3條問題

1. 應否加大供款？應該全部加還是哪一個？

2. 較早前推介1448,1211，應選那一個比較好？

3. 現時情況應該繼續儲現金，還是已經可以分注進場？
謝謝你

龔成老師：

1）照我初步計算的現金與持貨比例，你的現金比例唔算多，其實保持現時的供款已可，現金就暫時持有先，唔好太急用盡。現金就等機會先。

2）比亞迪（1211）的投資值博率較高，$40以下是初步的便宜價，$4X則分注小注入。

3）你保持現時的月供金額就得，儲下現金先，如果大市進一步下跌就可以把握到機會。

------------------------------------------------

Q16500：

龔sir，點樣可以去判斷大市幾時係屬於便宜區、合理區等等。

同埋想知投資同留現金嘅比例係幾多先適合我？另外龔sir嘅邊本書比較適合我睇去學習投資知識？謝謝你

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

如果要深入計算，基本上要好仔細的研究企業，要分析好多財務數據用比率，先至有較完整的答案。

以現時的大市情況，3成左右是適合的現金水平。

你可首先睇：

《80後百萬富翁》
《股票勝經》
《財務自由行》

之後再睇其他。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。