👻鬼節有好多禁忌🚫 例如 唔好坐尾班港鐡 唔好靠牆行或站立 之類 有個幾有趣 唔好凌晨時剃毛 因為人嘅毛髮代表「精氣神」，如果鬼節凌晨剃，會損害自身「精氣神」，令靈體嘅陰氣容易入侵。 #農曆七月十四 #信不信由你 #鬼節快啲返屋企 📸 @2ezen

「佢唔敢報警，於是每晚都偷偷哋打畀你，向你求救…但你無聽電話。」阿公：「最後，有一晚佢終於頂唔順，被母親虐打至死。」 「但…佢點解可以喺我屋企出現？」我。 「雖然至今科學仍然解釋唔到鬼魂嘅存在，亦無任何儀器可以探測靈體位置，但有好多研究都指出，靈體嘅能量可以影響到電器嘅運作，所以我估計呢個女仔死咗之後，唯一可以去嘅地方就係經由電話到達你屋企。當然啦，實際操作係非常唔科學，但靈體本來就係一樣唔科學嘅存在。」阿公。 所以個女仔就喺客廳用內線呼叫功能，就係想話我知佢嚟咗。就算我好快就搬咗屋，佢都一直跟住我，仲住咗喺我體內，不斷想同我溝通，但我咁多年嚟都一直忽略佢… 「咁點解突然間我又會意識到佢存在？」我。 「因為…佢喺你體內愈耐，你同佢嘅頻率開始同化，佢亦能夠進一步控制你嘅心智。而家有兩個方法，第一個就係將佢抽出你體內，再幫佢投胎。但如果佢唔肯離開嘅話，我就要將佢消滅。」阿公。 就喺呢個時候，我見到阿公手上嘅紅線突然繃緊，好似有魚上釣咁，紅線不斷竄入我體內，幸好阿公喺最後關頭用力拉住條紅線。 「佢住咗喺你體內太耐，入面已經變成佢嘅主場，條紅線好快就頂唔住。」阿公另一手拎起一張符紙，用手指沾上紅色硃砂，喺符紙上面畫咗一道五雷轟頂符。 「等等，我有冇方法可以同佢溝通？」我。 「佢一直住喺你體內，你只需要用意念，就可以同佢溝通到…」阿公補充：「不過時間無多，如果被佢掙脫條線，就算有符咒，我都打唔中佢。」 我凝聚心神，閉起雙眼，嘗試同個女仔溝通。但其實我都唔知可以講啲乜，先會令個女仔願意乖乖投胎，畢竟多年前係我無聽電話間接害死佢，話唔定佢附喺我體內，係為咗報仇都唔定… 「你錯啦，我一啲都無憎過你。」 突然間，喺我腦海浮現咗一把女仔聲，係佢…我竟然真係可以同佢溝通到。 「但我間接害死妳，其實妳憎我都好合理，但我真係無心，我唔知玩電話會搞成咁。」 「就算你有冇打到電話畀我，都改變唔到任何嘢。相反，我仲想多謝你。」女仔。 「多謝我？點解？」 「我由細到大都不停被母親打我，喺學校從來無人願意同我玩，老師發現我身上有傷痕，母親就直接幫我退學，退學之後就一直被困喺屋企，係你畀機會我見識呢個世界。但……」 我聽到個女仔嘅抽泣聲，我仲感受到佢嘅恐懼、悲傷、懊悔，好似一道河流咁喺我體內流動。 「我好驚，我唔想走，我驚下一世都會遇到一個唔錫我嘅媽咪。」 原來，個女仔反抗唔畀阿公幫佢投胎，唔係為咗報仇，只係驚下一世，呢個世界都對佢咁殘忍。 「有冇方法…」我講到一半就被阿公打斷。 「你諗都唔好諗啊，一個軀體無可能共存兩個魂魄。」 「咁你可唔可以保證，下世佢會得到幸福？」 「就算我保證佢下世幸福，都係呃你。」 「咁……」 「雖然我唔能夠保證，但你可以。」阿公。 「我？！」 「今世你同個女仔結緣，佢下世一定會同你重遇，到時只要你成為佢嘅貴人，你就可以確保佢幸福。」阿公。 當阿公講完呢句，我再次用意念同個女仔溝通，就喺條紅線就嚟斷嘅時候，個女仔終於肯乖乖投胎。 「不、不過阿公…你幾乎成隻手塞咗入我個口，請問係咩意思？」我個口擘到幾乎甩骹。 「頭先你條紅線斷咗，好彩我快手捉住線尾咋！」阿公。 「但個女仔而家點？」 「放心，我知道佢肯投胎，只要我幫佢做超渡，咁就無事。」阿公將條紅線抽返出嚟之後，立即開壇作法。 儀式結束之後我問阿公：「個女仔嘅靈體係咪已經離開咗我身體？」 「係，佢已經同你完全分離咗，進入投胎嘅程序。」阿公。 聽到呢一句，我忍唔住不停喊，因為面對個女仔嘅慘劇，我乜都做唔到。我摸摸胸口，我依然感覺到，個女仔嘅眼淚，仲留喺我身體入面。 呢件事之後，我就同豆姐一齊咗。佢話一個人會為咗其他人而流淚，就一定可以令身邊嘅人幸福。 講嘢咁玄，應該係得到阿公嘅遺傳… 故事後仲有小彩蛋，我最後同個女仔講過乜？ 會留喺《阿公講鬼4：魑魅》公開！ ７月中出版： 留言「買」我inbox 你

【玩電話】（３） 「我唔喺外面，我喺你裏面。」 我本能反應縮起頸捂住耳仔，但聲音喺我腦海入面發出，我無辦法阻止個女仔繼續講嘢。過咗咁多年，個女仔把聲一啲都無變，我嗰刻驚到即刻衝咗出門口，因為我直覺覺得自己一個留喺屋入面，個女仔就會現身。 我住喺旺角，當年仲有行人專用區嘅舊式唐樓，嗰棟大廈無升降機，我唔理安全連爬帶滾咁跑落街。 「我住咗喺你腦入面好多年，你一直都無應我。」 「就好似以前咁，你一直無聽我電話。」 「得返你會陪我玩。」 半夜嘅旺角街頭寂靜得同平時截然不同，我不斷搏命跑，但仍然逃唔過女仔嘅聲音。我喺條街度大叫，最後跑到一個公園度坐低，位置喺以前嘅家樂坊。嗰個公園夜晚會有露宿者，我嘅叫聲嚇醒咗佢哋。 佢哋被我嘈醒之後發狂咁鬧我，但我反而行咗入公園，希望佢哋嘅吵鬧聲，令我聽唔到個女仔把聲。 結果，我嗰晚有屋企唔返，瞓咗一晚公園直到，天亮先敢返屋企。 我有懷疑過自己精神有問題，因為我唔係經常都聽到個女仔把聲，但自從上次佢話自己住喺我身體入面，我就一直唔敢瞓覺，成日瞓到一半就扎醒，我甚至用盡各種方法令自己唔會瞓覺，例如用冰水洗頭，或者狂飲咖啡，結果令到我嘅精神愈來愈差… 有一段時期，因為個腦完全運作唔到，寫出嚟嘅嘢連自己都覺得好垃圾，驚畀讀者話我所以唔敢貼出嚟，但另一方面出版社嘅截稿時間又到。 嗰晚，我終於都頂唔住，趴喺電腦面前瞓著咗，我都唔知自己瞓咗幾耐，當我醒返之後，見到部電腦嘅攝錄鏡頭開住咗，螢幕一直顯示住我個樣。 我嚇咗一跳，立即閂返個鏡頭，但我發現電腦桌面有個影片檔案，睇返時間係我瞓著咗嗰時錄影嘅。 我深呼吸一口氣打開嗰個檔案，影片有四個鐘咁耐，即係由我瞓覺開始就一直影住我，畫面睇落無任何特別，我一直都趴喺度瞓緊，於是我飛去後面睇，發現去到中斷，我坐咗起身，成個人湊近個鏡頭，對住個螢幕笑，然後有把女仔聲不斷講：「哥哥…哥哥…哥哥…」 我全身都起晒雞皮，有一瞬間下意識覺得「死喇，我頂唔住。」有啲嘢衝破咗臨界點，隻耳仔開始耳鳴，周圍都變得好嘈，衣櫃、洗手盆、馬桶、房門…成間屋所有嘢都喺同一時間發出噪音。 喺無辦法之下，我再次衝咗落街，但今次同上次唔同，我開始不受控制，連我自己都解釋唔到，嗰刻點解要不停鬧啲途人。 當時已經天光，係返工時間，我係咁叫周圍嘅人收聲，我淨係覺得成個世界都好嘈。最後有個女途人行埋嚟，拉咗我埋路邊。 「睇車啊，馬路嚟㗎。」女途人。 「收聲啦！走開啊！」我。 而家諗返起呢件事，會覺得好神奇，但我記得非常清楚。我唔知點解佢要講呢句說話，我淨係知道佢講完呢句說話，我就立刻靜咗。 佢望一望周圍：「你係咪想食雪糕啊？」佢指住架雪糕車。 呢個女途人，就係我而家嘅老婆，豆姐… 我問過佢：「如果我係痴線佬，妳會好危險。點解妳唔驚？」 豆姐答我：「你點知我係正常？」 不過呢個唔係一個愛情故事，所以都係講返我身體入面嗰隻女鬼。豆姐無帶我去睇醫生，而係搵佢阿公。 佢阿公以前喺鄉下做道士，做咗幾十年，落到嚟香港先發現，周街都係工廠，汽車，上班族，原來呢個社會已經唔再需要道士。 阿公第一眼見到我，就知道我被靈體上身，而且唔係一段短時間。 「被鬼上身唔係感冒，唔會休息幾日就自然好，反而靈體會植根得愈來愈深。」 我心諗今次慘喇，個女仔喺我體內住咗十幾年…我只好如實同阿公講返細個玩電話時發生嘅事。 「夠喇，你講到唔清唔楚咁，我自己問佢。」阿公燒咗一道紅色符，再放落杯水入面，但佢無叫我飲杯符水，而係用條紅繩浸落杯水度，然後叫我擘大口。 「忍一忍，少少辛苦。」阿公講完呢句就將條紅繩放入我口，我感覺到條繩好似有生命咁沿住喉嚨好快咁爬入我體內。 我以為捉鬼會好似電影咁用符同桃木劍，估唔到阿公好似喺我體內釣魚咁都捉到個女鬼。 阿公開始唸咒，另一隻手按喺我胸口。幾分鐘之後，阿公就同我講：「個女仔…係被佢母親禁錮咗好耐。」 我記得細個第一次同佢玩電話嗰陣，個女仔講過一句：「媽咪返嚟啦。」就收咗線。 「佢唔敢報警，於是每晚都偷偷哋打畀你，向你求救…但你無聽電話。」阿公。 「最後，有一晚佢終於頂唔順，被母親虐打至死。」 故事結局彩蛋會留在小說《阿公講鬼４：魑魅》公開！ 7月中出貨！現已預售！ 留言「買」我inbox 你