【龔成問答信箱】（Q20001-Q20020）

Q20001：

你好，有樣野想請教，請問你會根據什麼準則，決定賣出股票？

龔成老師：

「企業質素」。

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q20002：

早晨，龔sir，想請教下260蚊入左一手1211，依定跌到咁，如果睇長線係咪應該繼續守，還是應該止蝕等佢返到合理區再買返？

另外都想請教下心態問題，個人對於1211真係做多幾多功課，不論係行業前景、國家政策，以致於公司本身既潛力，我都覺得1211係一間優質公司，我亦都有參考過老師你講既參考價(合理區為120蚊，最多150蚊)

然而前段時間股價真係好似坐火箭咁上，睇勢頭根本冇咩可能去返合理區(120~150蚊)，而且見佢前段時間配股300億比200間機構投資者

配股價為225蚊，當時認為既然咁多機構投資者在研究完呢間公司後都願意比225蚊呢個價錢投資入呢間公司，所以認為只要係長線投資

即使比多少少(260蚊)投資亦都無任何問題，但結果投資左冇幾耐就跌到依家197蚊，其實過程中我睇圖都知道股價跌破左支持位

正常應該要止蝕，但我當時一方面幻想睇圖唔一定百分百正確，另一方面又認同價值投資唔應該睇短期波幅，但結果現實就係越跌越多

老師我投資心態係咪出現左問題

龔成老師：

你一手，持有就得。只是要預中短期仍好波動。

你最大的問題，是企業估值與心態問題。

比亞迪（1211）有潛力，長遠有發展，這點你我都知，問題是估值，就算一隻股票好優質，但在太貴的價位買入，都會大幅減低回報，因此，在合理價買入好重要。

如果無貨好想入，而見到佢處貴的水平，投資者也只能用分注、月供等模式進行。

另外，你比機構投資者影響左，以為佢地買入就應該買入，但其實好多機構投資者分析好短視，不能完全盡信。

另外，你「睇勢頭根本冇咩可能去返合理區」，這是最錯的地方，唔好比短期股價影響，要睇翻企業質素、合理價值。

你「其實過程中我睇圖都知道股價跌破左支持位」，唔好信，我持有這股12年，試過由$88跌到$12，我都長線，如果我用睇圖方法，就唔會賺到10倍回報。（巴菲特都唔信圖，你唔好行錯路）。

------------------------------------------------

Q20003：

你好龔sir ，我手持1357美圖和6060眾安在線。都洩緊錢。有需要放棄重整嗎？謝謝

龔成老師︰

美圖公司（1357）質素一般，風險較高，長遠宜投資其他股。或小小注持有。

眾安（6060）我唔敢話佢無質素，不過，估值是最大的問題，其實到目前為止，佢的實質盈利都十分少，這刻的實質業務價值不大。

但佢做這類互聯網保險公司，的確有潛力，同時背後有支持，所以有發展，這部分產生了「概念價值」。

佢無乜盈利，但市值可以去到數百億，當中大部分都是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

所以，之後的股價，仍存有相當的不確定。但以穩健的投資角度分析，這股過往一直都不平宜。

因此，這類股可能有潛力，但不適合太大注，如果你持有的數目，已佔了你投資組合一大部分的話，最好減持部分，令你的風險減少。

------------------------------------------------

Q20004：

你好 sir ，我過往主攻舊經濟股
最近先開始入3067
我想入多幾隻新潛力股 請問以下股現時入 合理嗎？

比亞迪 我想一手一手入
吉利汽車
美團
福壽園

Thanks

龔成老師︰

比亞迪（1211）現價偏貴，回到$120才算係較合理。唔建議你一手手入，如果真的想入，回翻D先月供好了。

吉利（0175）本身的質素不差，現時價位已經略貴，要回多2,3成才算合理區，才可分注入市。

美團點評（3690）佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，但增長力難免會受影響。

集團過往一直處於燒銀紙階段，至2019年才開始有少量盈利。未來是否維持，暫時都好難講，這類企業不是不可投資，但不能大注。

福壽園 （1448）現價合理區頂部，可分注，但未到好平，故要控制注碼。

------------------------------------------------

Q20005：

龔成sir你好：早前請教過月供股票組合，每月$5000分別：盈富$2000、領展$1500、港鐵$1500...

直至現時一共供了一年半，盈虧分別：盈富+6.33%，領展-10.3%，港鐵+0.27%...

以上組合能夠是否適合繼續月供？或者需要更改組合？請多多拍教，謝謝

龔成老師︰

我地投資重點應放係企業質素，唔好太在意中短期波動。

你月供組合有質素和增長力，若你係年青至中年人士，都係合適的。

若你係偏年青，又相加大增長力，可以考慮換入或加入一隻潛力股。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

------------------------------------------------

Q20006：

龔sir你好，有野問你
我想問下中概股回流上市

咁我地如果睇好果隻股票 係咪可以係美股買左先？
兩者有分別嗎？

等ipo前美股買跟在港股買 有什麼風險問題 會因為回流消息被炒起 買美股買貴左嗎

龔成老師︰

我地決定否投資一隻股票，關鍵位係睇企業質素和前景。因回留而被炒起，這些跟企業本質無關架因素，我地係唔應該考慮。

我應該先考慮這隻企業是否值得投資，之後再審視佢現時估值，是否合理，來決定而一刻是否值得投資。

至於，買美股定港股，除了2地估值和投資費用成本可能有分別外，其實無太大分別。

------------------------------------------------

Q20007：

Hello 龔sir , 我今年26歲.自己啱啱開公司做小生意.收入唔穩定.但係每月至少有2-3萬收入.

每個月會儲起半份糧.擔心父母開始年紀大.到時有咩事負擔唔起醫療開支.

想財富增值但係對投資冇乜方向.應該如何部署投資？

流動資金大概有十萬左右

龔成老師︰

由於你有生意在手，十萬流動資金留住儲用會較好。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20008：

龔老師，我每月可投資$6000，個人沒什麼目標，只想財富增值，希望你能提供些意見。

現時持有：

月供股票：
2 中電：198@$84.6
5匯豐 ：578@$58.7
66 港鐵：529@$42.9
1928金沙：[email protected]
2800盈富：@$26.271
以上全停供了，因為想重整所有組合。

債券：
Ibond 30000

股票：
1398工商 9手@$5.43
5 匯豐1手@$55.7

之前買過270粵海、66港鐵、1928金沙，全部都有斬獲，不過賺了少少就心急就放了，
因為一直買股票都是抱着短線的心態。

以上應繼續持有嗎？現在想再入270、66、1928，及你近較多講的3067。謝謝！

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，要因應番你自已的人生階段。

你現時的持股，係較保守的增值組合。除了中電（0002）、港鐵（0066）、金沙（1928）和盈富（2800）外，其餘都係收息股。

若你想進行增值，未來月供用"平穏增長股"會較好，以下都係合適選擇。但由於你資金唔多，建議$2000月供盈富（2800）+ $1000供多一隻平穏增值股。其餘$3000就儲起，等大跌市機會。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）

緊記，唔好停留係賺少少就沽貨，這種賺差價模式。優質股係需要長線持有，才會達至最理想的增值效果。

------------------------------------------------

Q20009：

龔成老師，你好
本人月入$13000，依家月供緊

2800@$3000
823@$3000
012@2000

然後有幾個問題想老師比下意見

1.上面3隻月供股，我應該供幾耐或者供到幾錢先停

2.然後我手頭上仲有$5000剩，我應該再供其他優質股（例如：3067, 0066 ，1810），
定係留起，等個市跌，入便貨？

3.以我呢個進度，可以5年後儲到100萬嗎？

Thanks龔成老師

龔成老師︰

1） 月供係一個長線計劃，月供最少維持3年，並持有這些股票5年以上，才會有較理想效果。

2） 現時大市只在合理區，資金唔好盡用。這$5000先儲起，等大跌市出現時，可以用來掃貨。

3） 以恆指過去年平均回報10%計（連股息再投資），你每月投資$13000，5年後都有相當機會增值至約100萬。

但你組合上有個問題，就係非常偏重地產股。建議你將其中一隻，轉為其他股票。若你年輕，可轉成潛力股。若你已近中年，可選平穏增長股。

平穏增長股︰金沙（1928）、平安（2318）、中銀（2388）、港鐵（0066）、煤氣（0003）、長建（1038）、粵海（0270）。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

------------------------------------------------

Q20010：

你好龔sir, 我follow 左龔sir一個星期左右，但是已經改變左我嘅思維同行為

非常感謝你！係近呢一年香港發生嘅事令我好灰同覺得無咩前途，完全好似過一日得一日

自從follow左龔sir後，睇左你如何勉勵人，又好用心教人如何投資，如何為自己創造財富

我覺得你非常用心，所以我都開始醒覺我之前一直都浪費緊時間，無好好充實自己同計劃將來

所以我而家都開始改變緊自己既思維同行為，每一日都用一個鐘睇書充實自己

每一天都mark底自己嘅消費，亦開始留意投資資訊加強自己嘅投資知識，亦買左龔sir既書來睇

遲啲會買埋龔sir既網上課程進一步增加投資資識，我相信會學而致用，對我嘅人生會有好既改變

而家每一天都覺得好充實，而且利用每一天既時間來學習，對未來亦充滿希望

我真的非常感謝龔sir！我幾兄弟妺都因為龔sir既感染力而開始學投資，計劃將來可以財務自由

另外我都借機會想請教一下龔sir, 我已經35歲，我老公差不多40歲，我哋兩個每月收入差不多有5萬蚊

除咗交租，保險費，定期儲蓄（重有6年），日常開支同父母家用外，每月有$15000儲，而家月供緊中電

煤氣，呢倆只供左6個月，另外今個月開始供埋地鐵同領展

由於我睇咗龔sir話年輕人應該集中於潛力股，所以下個月我會開始供1686，而每隻股每月都供$2000

由於中電及煤氣都係穩陣收息股，我是否減少一隻，而將啲資金$2000用嚟供多一隻潛力股呢？

想請龔sir指點一下，麻煩晒同非常感謝你的時間！

龔成老師︰

以你年紀，應以增值為主。中電（0002）增長力唔係好強﹐再加上煤氣（0003）同是公用股，太集中單一行業唔係咁理想。

減少一隻與否，你可以睇翻佢地供款，如果加起達組合3成以上，就要調整。

現時，你每月5成儲蓄，可以拿去做月供，其餘先儲起，用一邊月供一邊儲蓄的策略。新意網集團（1686）作月供目標係可以，以下股票都係合適你年紀，可以參考下。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20011：

你好龔Sir. 我未有上過你堂，係最近朋友推薦我follow你同睇你著作，才知道.

有感賺錢能力逐年遞減，實在想用現有資源增值保本，想問問龔Sir意見...

本人剛到41歲，單身，月入$26K.

2017年$390萬買入屯門市中心一單位，按7成，分25年，每月供款$10K左右. 但其實物業一直租出，現租金$11K，正好cover每月供款.

而本人跟父母同住公屋.
因租客可能於3，4月退租，在想:

1. 怕租金回落，未能再以$11K租出單位，而現時銀行息口低，有意收回單位自住，或

2. 單位繼續放租，而自己想租出鰂魚涌或北角細單位，因為office返工係太古，跟老家屯門實太遠，或

3. 售出單位，資金作其他投資用途或換其他較新的大屋苑細單位...因樓齡已33年，好怕會面對大維修，而現估值$460萬。應該如何安排？

另手頭資金約$100萬，分佈如下

-約50萬高息戶口，主要用作供樓還款之用
-約10萬外幣，通常放定期
-約8萬現金流戶口
-其他為股票，分佈如下
: 0001月供了5年（2021年超停供），每月$2500，未能計出均價
: 0883月供了5年（2021年起停供），每月$2500，未能計出均價

: 0005，2手，幾年前買入，唔記得買入價
: 0066，2手，應該$20幾時入貨，唔記得確實買入價
: 0580，3手，$2.11入（之前$2.55出咗2手）
: 1810，3手，$35入
: 1979，1手，$2.45入
: 1093，1手，$8.17入
: 0175，1手，$33.1入

我都係高位入貨，應如何變陣？我係想先放咗0066同剩餘嘅0580...

另外2月份開始，想繼續月供，分佈如下可以嗎？
-2800，$3000
-2269，$2500
-2382，$2500

之前1212我$192入咗1手，hold唔住升勢，好驚，$200已放...我應唔應該月供BYD?

多謝龔Sir提供意見。感激

龔成老師︰

物業方面，除非佢升值潛力好低，否則唔建議你沽出，令自已處於沽空樓市狀態。

而是否另找租用自住單位，這個可以較從你生活角度考慮。但盡可能減少這方面支出，因為這會令你用來增值的資金減少。

投資股票方面，首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

天寶集團（1979）、中海油（0883）質素較一般，不宜持有太多。其餘都有質素，可長線持有。

而月供中，藥明生物（2269）不確定性較高，不宜月供。我唔係話佢無質素，但只宜小注投資，但月供就唔好了，畢竟潛在波動性唔細。你可以用以下平穏增長股代替。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

至於比亞迪（1211）係一隻好有質素和潛力的股票，雖然已經係貴。但只要係有質素，其實我地應該長線咁持有，先至最有利。

若你想月供，我唔建議住，最好回到$120才再開始。

------------------------------------------------

Q20012：

您好，龔成老師。我是您的忠實讀者，深受您一直以來推廣買優質股作投資增值的方針。

自追看您的書和文章以來，改變了我的選股習慣，在生活上出現質量的改變，不再花時間盯著股價炒出炒入，而是花更多心機看財報，研究一間公司的實務。

不過最近在投資路上遇到些策略問題，想請問一下。

我持有農夫山泉（9633）的股票。買入位置並不算太漂亮

在$47元左右，而且只有2手。最近市況回調，我判斷並不是公司質素出現問題，只是升幅太急出現調整。

但我的買入價又不止於低得可以漠視跌幅。我不知道應該先行獲利，以免股票由賺變蝕；還是應該觀察，若然價錢調整到不錯水平而加倉？

由於這種半新股在市場上跑不長，我不太確定如何評定$47元到底是高是低。希望在操作上請教一下。感激！

龔成老師︰

記住，我地持唔持有隻股票，唔好用"買入價"去做決定，應該用佢質素去做考量。

農夫山泉（9633）是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，都有投資價值。但始終上左市唔耐，真實面要慢慢先見到。現時真正用數據唔多，要做個好全面架值，唔容易。

我地可以睇翻佢2019年純利只有約50億，現時市值郤去到3000億。雖然佢有質素，但此刻估值唔平。

如果2手佔你總資金比重唔算高，你可以長線持有。

------------------------------------------------

Q20013：

老師，若果手頭上的舊股票，如318，348，6896等已無咩市場成交，那可怎處理呢？

2800由之前22，23元留意到，但沒有買，現時升至最高峰，是否要待回落後才入較理想?

龔成老師︰

盈富（2800）雖然已經升左唔少，但都算合理區，現價可先入一注。每回調10%左右，就再加注。

黃河實業（0318）從事金融服務業務、證券業務、物業等業務。

此股市值和收入都唔高，而且賺錢能力好一般。過往幾年，佢盈利都好波動，甚至出現虧損。

故投資價值只是一般，長線慢慢換碼至其他優質股較好。

中國智能健康（0348）年年虧損，而且仲出現過"十合一"，好大機會係財技股。此股唔見有投資價值，建議沽出。

金嗓子（6896）近年的盈利有下跌情況，其實佢不是完全無質素，但市場過往對佢有太大期望，但現時見到佢增長力只是一般。

你預這股是收息，以及有平穩增值，可以持有住先。但如果太多貨，就應該賣出一部分。

------------------------------------------------

Q20014：

龔老師你好啊！不知可否幫我解答啲問題？

本人29歲，已婚，兩公婆一個月合共約5萬，從事公務員。持有一物業

樓貸有約220萬，每月還約8200。存款約有60萬。每年兩公婆保險約3萬。

請問應該點樣投資好啲？

龔成老師︰

由於你已有物業，之後的財富配置，應著重股票類別。而存款不要太急用盡，要慢慢分注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀29歲，應用"平穏增長股" + "潛力股"的組合。現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰小米（1810）、中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20015：

老師，你好我從來未買過股票，很想學下投資，目標是5年能賺取100萬，現在有資本50萬，請教可以怎樣投資呢？

龔成老師︰

對新身來說，要5年升一倍，策略上進取點。你可以投資"平穏增長股" 和 "潛力股"，比例各佔一半。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

潛力股︰選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

大市現處於合理區，50萬資金先投入一半，用"分注"形式，慢慢儲貨。餘下一半就等大市出現，才大力掃貨。

這樣安排，相信較大機會令你達成目標。但由於你組合中潛力股佔唔少，佢雖然可提升增長力，同時波動性都會較高，令你最終回報不確性高左，你要明白這個風險。

------------------------------------------------

Q20016：

你好, 龔sir，我持有1797，均價30. X ，但近日一日低過一日，已經52週低，請問龔sir 覺得還有機會回升嗎？

定係止蝕換馬其他股票？謝謝你。

我比股票玩左15年，現在35歲，因為太信消息，亂買股票，手上仲有一大堆以前高位買入的股票

（有啲蝕到手續費都唔夠,都唔寫出來了，總之呢15年都係蝕多，超過6位數字）：
1088 33元 1000股
358 21元 2000股
698 2元 60000股

近2年保守啲
1398 4. 8元 20000股
823 59元 500股
1797 30. X元 2000股
941 49元 2000股

而家就係好擔心隻1797，唔知點好。
請問龔sir我應該之後點買股較好？

龔成老師︰

記住唔好短炒，"52週低"這些技術分析無用，唔好用佢做參考。

我地買入一隻股票，一定要分析佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，就記住先停一停，唔好投資住。

新東方在綫（1797）有潛力的，不過之前股價上得太多，就算現價仍少少貴。佢主力要線上教育。向學生所提供的在線教育課程包括大學教育、Ｋ－１２教育及學前教育。當中，大學及Ｋ－１２教育分部課程均為課外活動性質，不計入大學或中學文憑要求。

大學教育服務主要包括大學考試備考、海外備考及英語學習。Ｋ－１２教育服務包括涵蓋中國小學至高中大部分標準學校學科的校外輔導課程，及提供專為普通高等學校招生全國統一考試而設的備考課程。

長遠的潛力是有的，但股價都升左好多，比較擔心是企業估值問題，始終市場有時會過份樂觀。只可以話，這股潛力是有，若佔你組合唔多，可持有。同時，你預佢股價會較為波動。

中國神華（1088）、江西銅業股份（0358）和通達集團（0698）本質算是不過不失，若佔組合不多，可守住先。

其餘股票無問題，可持有。

整體而言，你無論定平貴和選股上﹐都唔係咁理想。我建議你再投資前，先學好正確投資技巧，咁會較好。

你可以先睇我寫架"80後百萬富翁"、"財務自由行"和"股票勝經"，都適合初學者，相信對你有一定幫助。

------------------------------------------------

Q20017：

老師你好！我想研究股票，但有以下問題，希望你可以指教我

1)點樣可以發掘到潛力股/板塊?

2)點樣可以了解市場情況 (包括現在&未來趨勢)?

3)了解一間公司除睇年報外仲可以有咩方法?

4)而家好多優質股票都偏貴，資金唔多既情況下，係咪要等跌市先好入？

5)有冇咩書籍可以推薦比我？

謝謝老師

龔成老師：

1）要用一套有系統的方法去選股，如果只睇傳媒或別人推介，很多時已經是「升左」，所以，要自己發掘。

例如利用企業的財務指標，產品的增長力，行業的發展等。這是一個好大的題目，你可以睇《選股勝經》。

2）要了解行業、產品，以及大環境的變化，要睇好多資料的，企業年報都有用。

3）年報是最有用的，該公司的年報及對手年報，另外就是網站，以及一些大行報告。

4）對，或首先投資舊經濟類股，因為這類未貴。

5）《股票勝經》《選股勝經》《50優質潛力股》。

------------------------------------------------

Q20018：

老師我想多謝你！

我4年前（35yr)開始讀你的書，後來也上你的堂！雖然我已婚，有2個孩子，月入$26000，已錯失黃金投資時間，但經儲蓄+投資，今年終於有第一個100萬！

目標15年後有400萬

龔成老師：

太好了！加油！

我相信只要保持進步，知識與儲蓄投資同時增加，你要達標無問題的。

------------------------------------------------

Q20019：

Halo 龔sir，我最近學習緊研究資產負債表，發現左樣我覺得幾有趣既野

1. 點解同樣為賭業公司，銀娛既長期負債係會比金沙少咁多，而相反短期負債就係金沙少d？

2. 有冇話長期負債或者短期負債邊樣少d係會好d？

3. 如果見到公司既現金係多過長期負債，咁係咪都代表公司既財政比較穩健？如果唔係既話現金呢項應該同邊樣對比比較適合？

問題有點長，唔好意思！謝謝你！

龔成老師：

1）每間公司的資產負債結構唔同，有時一間公司本身的長債就到期，就會變成短期債，因此不一定能比較的，仲要有好多野要分析。例如大家的發展等。

2）通常長期負債都是為企業長期發展而用的，而短期負債就是給公司營運，如果企業以短期負債去進行長線投資，就會出現了資金的錯配。

3）現金較多當然較穩定。

投資者會分析佢現金的比例是否足夠，最重要是日常的營運，同時會分析佢的現金流情況，這都會影響企業要多少現金去進行營運。

------------------------------------------------

Q20020：

老師你好 最近Saas 類別股票 2013/3888/268 邊隻會比較好？

老師你好 想買3033/3067 建議都持有 還是㨂3067？ 感謝老師

龔成老師：

這3隻都不差，都是有質素有潛力的股。

金山軟件（3888）算是這刻在3隻中無咁貴的一隻，佢主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區頂位，唔建議大注投資。

這股前景正面的。

至於3033/3067，我睇翻佢地的管理費，3067較少，所以選這個較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q19441-Q19460）

Q19441：

老師，我時常記着「當別人恐懼時我貪婪，當別人貪婪時要恐懼」，我明白這個道理。市場高位時，旁人不停賺錢時更加要克制；反之，耐心待跌市時別人恐懼時就是開始入貨的好機會。

我深深明白亦非常同意應該要長線持有優質股。但是如果明知道熱潮後有回落，那是不是需要在高位先放出然後待回落再買？？

這一點有時真的想不通⋯⋯⋯⋯⋯

謝謝解答！

龔成老師：

我地原則上，是長線持有股票，同時集中持有優質股，這點是不變的。

當然，有時當佢處於貴的時候，我地都有可能賣出，但我不建議全部賣，只建議賣出部分，因為當你賣出優質股後有機會買唔翻的！

所以，我建議點都要有優質股在手，就算貴，都只賣部分，盡量不要賣全部。

你這一句：「我深深明白亦非常同意應該要長線持有優質股。但是如果明知道熱潮後有回落，那是不是需要在高位先放出然後待回落再買」。

最大最大的問題，就是「明知」。

真的是明知嗎？

好多人會估大市將會升或跌，但最後都估錯，記住，唔好有「明知會跌」這總想法，好危險。

就算這刻真的貴，股市可以再貴，如果企業價值不斷上升，之前的貴過2年就可能合理。

港交所由幾蚊上市，不斷創新高，好多人在當中都認為「明知佢會跌，要盡快賣出」，佢地錯過了賺100倍的機會。

有D香港人，在過往樓市不斷上升時，因為「明知」樓市會跌，所以賣出自住樓，到最後永遠買唔翻。

------------------------------------------------

Q19442：

你好龔sir,我為左自己定下了個人目標為三年後有50萬資產

現有10萬元資產包括：
領展 300股
盈富 1500股
中國生物製藥 2000股
眾安 400股
$10000 現金

每月可儲$5000-$7000

1. 我點做先可以三年後完成目標，係米無咩可能做到？

2. 而家有既股票係米太散？ 洗唔洗集中一點？

3. 我想問新手應該睇股票勝經先定80後百萬富翁先？

多謝龔Sir

龔成老師︰

1） 以恆指平均年回報10%計，月儲$7000 + 本金10萬，大約可增值至40萬。

但由於3年唔算長時間，會有機會出現波動，令你最終回報的不確定性增加，你要知這個風險。

2） 唔算散，你每月儲$7000可先用一半做月供。餘下一半和1萬現金，就等大跌市。

你可考慮用$2000供盈富（2800），再加一隻潛力股$1500，好似安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）都可以。

3） 其實初學者，我建議2本都要睇。

另外想提你，眾安（6060）這類股，好難玩的，因為多年都在燒銀紙，就算近年才初見盈利。但都仍未能確定長線情況，這類股要估值好難。

因此，股價一定好波動，所以組合中不宜有太多。

------------------------------------------------

Q19443：

HI 龔成
我有一個比較複雜既證券戶口問題。

我本身持有以下股票
1177 2手
788 6手
2018 10手
883 6手
1398 13手
5 6手
3 5手
405 5手

全部都捱價中，一直想溝貨，但係現用的倉有存倉費及最低佣金費。雖然這些費用不算多，但長遠就以存倉費一年己被收300，我覺得不合理，假設長期持有，同時每年又被扣300，這些也是成本。同時，溝貨的話又被收最低佣金費。

我見有別間收費是不設最低收款額及存倉費，我打算在新的戶口溝貨，一心以現金儲有資產這信念。

以下我遇到的情況，應該怎樣好？
1）全部股票轉倉。蝕轉倉的手續費。
2）舊倉KEEP住，新倉溝貨。慢慢減持舊倉。

龔成老師︰

1） 其實存倉費佔整體成本好少，我唔會特別理。而我自己每年買賣次數係好少，優質股我買完就長放係度，所以佣金費高低影響唔大。

如果是我，就無必會做轉倉這個動作。

2） 你分開2個戶口，反而令整體成本多左。如果你真係想轉，最好一次過處理，選定以後用邊個。

另外，我想清楚"溝貨"與"分注"的分別。溝貨指是愈跌愈入，同時不理企業質素，不理自己的設定金額，盲目去入。

分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。但若果係"溝貨"，就不是再入貨，因為再平，都只會令你增加風險。

------------------------------------------------

Q19444：

想與你分享一個好消息，剛完成月結，剛好衝破一百萬關口，而且比30歲的目標還提早了半年達成，多謝你所教的方法，亦都有幸成為你第N+1個達成這個目標的學生。

為了第二個一百萬，思考了下列的問題，希望可以指引一下我

1.第二個一百萬的目標設定為三年至三年半是否合理?第一個一百萬要5年，用乘的方法的話，第二個所要的時間假定為第一個的60-70%。

人工17K+3-4K pt(將來半年會上堂，預計減半)每月可儲10K。

2.資產分配方面，現金有30萬，股票70萬，其中包括一些之前買落的蟹貨(現值都有約4萬)，理智上明知清左佢地應該好些，總是不肯下定決心，甚至[陪]到我上到100萬...。

雖然黎緊會清左佢地，可是不夠理智這一點將會是接下來要改善的地方。要如何才能好像你這樣呢?

3.購置物業方面，因人工不高，按揭不會有太多的成數，也暫沒有購買的必要，所以暫不考慮。

不過，只要人工不高，便等於要動用大部分現金作首期才能置業，但樓價會同時上升，這便變了死胡同或者要起碼到150-200萬才能考慮?
多謝你。

龔成老師：

恭喜你！我記得當年我月結計到自己身家超過$100萬，都好開心的！第一個$100萬是最開心！

因為第一個是最難，之後反而錢滾錢的力量較大，會更加順利。

1）合理，但當然無絕對的答案，你只要保持進行之前所做的事。同時，由於你現時資金大左，每1%的回報差都會大左，因此，你應該投入更多時間去研究股票，提高回報率。

2）你要理性，這是成功投資者好重要的因素。

我會以更長遠的角度分析，例如5年、10年，現有資產怎樣幫我建立更多財富，如果該股的增長力不強，即是無作用，那就應該盡快賣出，轉其他。

唔好比過往的所謂買入價，影響左你，最重要分析佢將來會增值多少。

3）可以到近$200萬先考慮，因為股票的增長力較高，你利用股票增長去追物業，比起太急投資物業，會較好。

------------------------------------------------

Q19445：

早晨龔sir, 我就黎睇完你既股票勝經, 有個問題想請教你。

你話當股市越熾熱，個個都買股票貪婪既時候就係我地要遠離股市既時候。你覺得而家美股係咪呢個情況？我睇左好多間公司都係2020年3月後直線上升咁，身邊好多朋友都開始炒美股。

我暫時仲係增加投資知識既階段，未敢入場住，但見隻隻都升到飛天. 你覺得我應該點做

龔成老師：

2020年3月，當時是恐慌期，正正是《股票勝經》所講的買入時機，你可以睇翻書中的要點，因此，當時不少股都處平的狀態。所以，你會見到股價不斷向上，這是不少市場都有這情況。

你最重要是分析平貴，優質。現時的市況，有少少貴，部分股過熱，因此你應該投資一些無咁熱的股。

同時，如果你完全無貨，一直等，又不建議，所以，最簡單是投資一些指數基金，如果你睇好美股，可投資VOO，追蹤標普500指數，你分注入就得。

點解我成日叫人分注入或月供，就是平均買入價風險，同時可以避免一直等待。

------------------------------------------------

Q19446：

龔成老師，你好!~依幾個月開始follow你facebook，之後買左80後百萬富翁黎睇，發現自己起步得太遲~

我30幾歲，已婚有一子，家庭月收入約80k，有一自住物業，月供18k，仲有約400萬先供完~

另外係XX買左每月派息基金，每月約派息3-4000，打算用依4000蚊黎月供股票，依個做法可行嗎？

1. 如果供2000盈富，1000領展，1000雅生活，依個組合ok ma？

2. 我地儲多二年錢，應該可以買第二層樓細價樓收租，用D租黎供樓，會大風險嗎？

3. 我自己每月儲到10k，應儲起黎作第二樓層首期，定點樣運用好呢？

4. 我地本身已買保險，現金儲備應該有幾多先叫穩健呢？

謝謝老師，希望可以得到你解答

龔成老師：

雖然方法不是不可，但未必是最好的做法，但如果你認為這總買派息基金，然後月供股票的方法，較適合你的風險度，都可以進行的。

其實，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

1）可以，都是有質素的，可長線。

2）其實唔需要太急買第二層，這動作會令你財富太集中在物業類，因此可等你有較多財富才進行這動作。希望做各類資產都有，而不是只集中在物業。

3）可以投資股票，令財富有更好的增長。

4）最少3-6個月的基本開支。同時要留部分資金等投資機會。

------------------------------------------------

Q19447：

老師，想問下 中電 算係收息股定平穩增長股 同埋 我月供計劃 有冇好太問題

4000元2800
1500元0823
1500元0002
求老師指點

龔成老師：

中電（0002）是收息股，加少少增長力。

你上述月供的，都是有質素的，可以長線保持進行，是平穩增長模式，當然增長力就不算好強。

另外，建音你同時留有某部分現金，等機會投資。這樣並行的策略較好。

------------------------------------------------

Q19448：

龔成老師我今年33歲，自从睇左你FB先知道，長線的重要性同埋我依家睇緊年報勝經。我手上有3隻股

中國鐵塔（788）5手@1.45
中興通訊（763）1手@18.9
中國移動（941）1手@47.7

手上有現金3萬，想買其他股，同埋月供$2000的話，應該買晒盈富基金嗎？我目標在1年儲多20萬，謝謝

龔成老師：

先講你上述股票，太過集中在同一類別，你會出現集中風險。上述股不是無質素，你可以持有，但之後最好增加其他類別的股票。

手上的資金$3萬，暫時唔好心急動用，等大市回翻D先用。

另外，當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你投資盈富（2800），可以，但應該同時投資其他潛力股。你33歲，仍是增長的時期。

------------------------------------------------

Q19449：

龔成老師，我看完你的「80後百萬富翁」和「股票勝經」，其他作品也準備看，想問1928受新冠肺炎影響

賭收咁差都30幾蚊，現價算貴嗎？想下個月開始做月供，還是再等佢跌下？

龔成老師：

金沙（1928）現價合理。當我地投資及計算企業價值時，會著重長期的因素。

因此，金沙中短期雖然不利，但疫情總會過去，因此你現時開始月供，無問題。當然，你不能用盡資金，要同時留有現金。

------------------------------------------------

Q19450：

老師你好 今年26歲由3年前開始睇你既書 搵到覺得識合自己既方向 備戰半年到就開始入市

當中經歷中美貿易戰同COVID-19 賬面一度出現虧損 但是有緊守到價值投資既準則 現在賬面總值已經升值一倍有多 突破人生第一個一百萬

目標係一直享受複利既好處直到財務自由 題外話係比起巴菲特 我更中意彼得林區既書

龔成老師：

太好了！我記得我當年有第一個$100萬都好開心！

你保持進步就得，之後的錢會以更高速成長。

我地投資，唔好太著重短期回報，一定要睇長。

其實巴菲特的書都是其他作者寫的。佢兩個都是高手，都值得學習，可以配合運用的。

------------------------------------------------

Q19451：

老師，想同你分享好消息，按照進度，我同女朋友將會在兩個月內（市況好的話一個月）達成100萬淨資產的目標！

如你所講，知識同回報成正比，你嘅12本大作我都有睇晒，獲益良多！

我運用書上嘅投資心法，嚴選幾隻優質潛力股作長線投資。另外我和媽媽建立的退休組合亦因為比亞迪爆升而賺了不少，一年半已累積了23萬股票資產。

我已經當你係半個師父
雖然我仲未抽到時間上你堂

龔成老師：

太好了！

我相信你地都付出了一定的努力，無論是儲錢，還是增加知識，這是你地應得的。男女朋友能有共同目標，往往效果會更好，你地可以再定出不同的共同目標。

總之，保持知識增長，財富都會不斷增加！

------------------------------------------------

Q19452：

老師~我依家睇緊你既一本年報勝經,學緊如何睇主席報告分析股票,但佢有時一d文字藝術都要分析下。

我有個關於溝貨既問題想問下,我有個朋友之前有買3662奧園健康,好似9月嗰陣物管股炒到好勁,佢已經開始入從7蚊開始

之後應該每跌一成佢都會入,依家應該買左10萬元以上3662,之前我有提過佢唔好再買物管股,之後會再跌短時間都唔會升上去。你是否不建議不停地溝貨?

佢諗住如果一升就可以賺得最多,這樣的想法。我自己之前都買左2168,蟹左。我估應該要等一段長時間先會升番,龔sir你建唔建議放左一部分?

之前講到我買左831,佢賣左ok店之後想發展網上平台,依家香港疫情問題會不會對佢有d有利既因素?

龔成老師：

其實溝貨最大的問題是「超出預期的買入金額」，我平時叫人同「分注買入」，原理是先定出一筆資金，這是入貨的上限，然後就分注入，這是整個策略。

而溝貨則是無預算無策略，將買入的資金不斷增加，這當然會提高風險。

同埋，「諗住如果一升就可以賺得最多」，這是有問題的想法。

我經常講，我地要「先想風險，後想回報」，我地要建立一個平衡的組合，同時在資金方法要控制適當，之後先穩中求勝。

佳兆業美好（2168）由佳兆業集團（1638）分拆上市，整體都有質素的，有長線投資的價值。不過規模不大，母公司不算強，因此估值不會太高。

睇翻佢的財務數據，正面，生意與盈利有不差的增長，現金流強，有長線投資。

現價合理，不過行業股價上落較大，要注意風險，同時這股規模唔算大，因此唔值得太大注。

你唔應該以中短期股價去衡量佢的價值，應該以質素，以及這股在你組合的角色，去衡量應該持有多少。

利亞零售（0831）出售香港「ＯＫ便利店」業務，作價２７﹒９億元現金，交易完成後，擬向股東派發特
別現金股息每股３﹒８５元。利亞零售預期出售收益約２９億元。

利亞零售表示，便利店業務主要以密集運營模式服務香港市場，並且由於其覆蓋之產品種類繁多，因此涉及相對龐大的物流營運設置以及供應鏈基礎設施。

另一方面，剩餘集團的品牌（聖安娜、Ｍｏｎ　ｃｈｅｒ和Ｚｏｆｆ），其實都適合利用互聯網及線上平台，對中等收入客戶群更具吸引力，並且更少依賴物流設置以及供應鏈基礎設施。

但始終賣左資產後，發展只是一般，同埋之後好睇佢資金的運用情況，現價合理區中上部，投資價值只是中等。

要留意，唔好只貪佢特別息，派息後股價會除淨，自然下跌翻，而特別息只有一次，之後唔會有的。

------------------------------------------------

Q19453：

你好，我試問你請教，因我們聾人們用手語溝通或用筆談，我們是新手，所以很開心看到fb多人問你，我找你請教。

不幸被拉我們入群組認識股票，喊叫我們試下，第一次買1376可賺3百幾元，第二次買1953可賺2百幾元，在今年8月25日第三次買1894買入5.43第四天很快下跌

現在0.19，我們傷心了，未沽出，我們心想等升上可拿回。請問有沒有機會等一年？兩年？令1894升上嗎？
買了三股共8萬幾元，也有買了一股27300元

龔成老師：

我建議你們增加投資知識，《股票勝經》適合你們的，同時不要再相信這些投資群組，要有自己的獨立分析能力。

往後投資，要買一些大型的優質企業，長線持有，如不懂，就投資盈富（2800）。

恒益控股（1894）每年的營業額很少，盈利不多，加上中期業績盈利大跌，因此投資價值不高。

這股要升到$1以上，不容易。因為企業本身的增長力不強，無獨特優勢。

------------------------------------------------

Q19454：

你好，想請教：

1）希望你可以簡單講下係用乜嘢方法令自己由百萬富翁變成千萬富翁呢？當中過程用左幾多年時間？

2）請問你現時的現金流，在股息、收租物業/鋪位/車位等，比重係點？因為想知道點取得平衡

3. 2021年，老師覺得邊幾隻有機會成為倍升股呢？

龔成老師：

1）大約用了6-8年時間。主要是投資，股票增值，同時其他收入增加左，我開發了打工以外的收入，過往只靠打工，之後不斷開發其他收入，例如出書、做生意、教班等，當其他收入增加，就亂去銀行工，全力發展其他事業。

2）你預我大部分是股票，之後到物業，餘下是現金。

3）由於2020年新經濟股已有少少熱，所以2021年反而唔好太過進取，加上疫情減去令新經濟股的動力減左，因此應該建立平衡組合。同時留意翻D舊經濟類。

------------------------------------------------

Q19455：

成哥，睇完你本身書，你點睇樓齡？有一些大型屋苑，樓齡快超過40年，你認為我們應該選擇這些樓齡大，但是是大型屋苑還是比較新的半新樓？

龔成老師：

最好的樓齡在30年以下，除了考慮本身維修因素外，你都要考慮若果日後賣出，下一手的買家會怎樣買，如果下一個買家認為質素唔好，自然會影響你物業的價值。

當然，本身的維修質素有好大影響，大型屋苑如果各方做得好，其實市場價值仍會好高。所以，觀察維修保養，有無做大維修，都是要考慮的因素。

------------------------------------------------

Q19456：

老師你好。 我今年32歲
請問我的強積金投資組合，有一半在保證基金，好嗎？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你32歲，可以進取少少。你保證基金的比例50%，太高。你可以減少至20%以下，甚至0%。

將資金轉去均衡基金、亞太股票、中國股票。你年輕，可承受風險，可以進取少少，加上複息原理，你年輕增長力高，長遠有著數。

------------------------------------------------

Q19457：

老師，領展，我用 2012-2019年 市賬率 去估值，睇到 1.23-1.316 係 合理價

但 衣家 領展 68.9 （股價）除 77.609 （每股賬面淨值）= 0.89 （市賬率）

但於合理市賬率，甘係咪 代表 係平位？

龔威老師：

如果你記得我上堂講過，領展（0823）比起其他房託較為進取，佢唔單計持有物業，同時會買賣。如果你睇翻第4堂筆記，地產發展商的市賬率，都出現一個持續下跌的情況，不過我地擔心佢谷大左賬面值，而領展都有少少這種情況。

當我地見到有可能出現這情況，市賬率運用時就要小心，可能用的年份只能較近期，或作出一些調整。

而我見你用1.23-1.316，其實有少少高估，最好調低翻15%。

至於你計算方面，用佢股價，除以每股賬面淨值，正確。之後再比較翻合理範圍。所以你方向正確。

------------------------------------------------

Q19458：

龔sir，不好意思，我數學邏輯不太好，在閱讀中遇到問題，盼賜教

第6版 財務自由行/第249頁
不明解以下2點：

1）每月的供款就會為$19700
不應是（$270萬 x 1.03利率）/ 14年 / 12月 = $16553？

2）樓價由$300萬跌至$150萬，但資本上卻是由$30萬增值至$150萬？感謝

龔成老師：

1）因為「供款」是包左每月要還的本金，以及要比的利息，即是你每月供樓，其實都是包左這兩個數。你可以上一些銀行的網站有按揭計算機，能計到這數的。

2）因為每月都會還本金，而書的例子是14年就能還清本金，即是完全擁有物業，因此，最後就是完全擁有該樓，而該樓價值$150萬，所以擁有$150萬財富。

------------------------------------------------

Q19459：

成哥，我想問1d關於買樓既問題。

我宜加26歲，儲到31萬，人工＄24000，目標下年每月儲大概＄15000，如果想2023年置業，仲有3年時間畀自己。

假設人工每年加4％，到2023年應該有＄26.x K。如果想買400萬的樓，我預計股票固報（15%/year)連儲到既錢2023年年頭會有80幾萬。加上家人可以借50萬畀我，共130萬。

上網做過壓力測試，如果到時2023年人工有＄26.x K，其實我係咪首期要儲到150萬先穩陣買樓？（130萬首期，再借7成按揭(人工要求$26.5k)，20萬作後備之用）。

其實我想借足8成，除左擔保人外仲有冇其他方法，因為父母都係做兼職，銀行應該唔接納。

希望成哥可以指點下，等我目標更加清晰。

唔知條數計得岩唔岩？

龔成老師：

大約計算正確，不過到時買入前要再計清楚。

其實最好都是用擔保人，但具體銀行接受擔保人收入的定義，你可以再問清楚，只要有收入證明或有交稅，都會接受的。

另一方法就是提高你的收入，你現時26歲，好年輕，思維可以闊少少，唔好只打算永遠做一份工，可能改變有突破。同埋思維上，唔好比一層樓永遠困死你的青春。

------------------------------------------------

Q19460：

老師想請教
BTC是否最好唔好touch？

龔成老師：

虛擬貨幣，是人為創造出來的，絕對不是「資產」，有沒有真正的價值，如何定義真正的價值，我有相當的疑問。

這些人為創造的貨幣，因為關注度由很少變得大，價格會大升，但這背後是否有真正的支持，我不知道。只能說，投資這些貨幣，投機味好重，可能大賺，亦可能蝕到一文不值，因為，當中有沒有價格，我不知道。

但這不代表佢無價值，佢可能好勁，只是我自己不知佢好勁定好差。

佢長遠的價值，取決於「有多少人用」，即是說，雖然無真實價值，但可以有「交易價值」，如果長遠好多人用，的確可能有高價值。

因此，這些虛擬貨幣，由於我無法作出專業分析，所以，我不會投資。

但如果你分析到佢長遠的交易大，大家都持續關注，就有價值，就值得你投資。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q15301-Q15320）

Q15301：

龔老師..很不幸在這個困難時間被公司炒了..雖然現在積極搵工,但我覺得短期內要再搵一份差唔多工種有困難......

因此想問問現在該用咩心態去面對?

還好之前有儲落一些現金大約15萬元. 這畢金錢該怎樣好好使用呢? 謝謝老師指導

一直都有保持月供,每月4000元是否該暫定一下?

龔成老師：

首先，要睇翻你洗費、負擔、相關工作尋找預期時間，要先預好一定的現金。

我地理財，一定是先想防守，之後才想進攻，如果有需要，就停一停月供，唔好投資住，這方面要你自己衡量。

另外，在這段時間保持正向心態，多睇正面書、做運動、保持找工作。同時，可以好好把握這個「機會」，我好相信，每一次一D好困難的時候，其實都是上天比你一個突破的機會，你要思考自己長遠的發展，5年後、10年後，然後這一刻要做D咩，一步步完成目標。

這是一個「機會」，你要好好把握！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15302：

龔成老師 你好，有幸能參與你首次舉辦的進階班，自2019年5月完成初班後，自己跟隨老師教的方法去選股同估值，在分析中明白到自己的不足，例如：在企業評估表內一項「財務狀況是否穩健」已經另我「kick住係到」

因為當時我並未有足夠的財務數據知識，到上完進階班，已經更能掌握到如何分析，同埋分析企業上更立體，加上學習你教導投資上的思維，我較以前更有信心，因為掌握的東西多左，所以我覺得進階班十分有價值。

體會到老師好用心編制進階課程，整體來講我是跟到進度，而較難的部分就係年報分析同估值，感到在果幾堂課上只吸收到6-7成，可能自己數理及會計底子差，明白真係要溫書同實際自己計下先會理解多點，所以0黎緊都會再向老師請教。

另外，記得你初班講過一個有經驗的投資者最少起碼經歷一個經濟周期，而今次進階班剛剛遇到肺炎事件影響全球，正正經歷風暴，更有幸從中遇到你的指導，學到在大風大浪都唔怕既策略、思維、甚至情緒，我真心體會到有危就有機。

老師在facebook曾分享自己會以一個雙贏的方向去賺錢，上完初班及進階班後，我完全能夠感受到老師呢個理念係實行到，你確實幫到我思維上及財務上有所增值。

我會繼續以「財務自由」為大目標，不斷學習。
學到老師你成功方法，正正鼓勵到我有信心，感到自己都可以成功！

最後肺炎疫情仍然嚴峻，老師你都要保重身體！

龔成老師：

好高興課程可以比到你實際的幫助，這是我一直希望的，我唔想單單是賺錢，而是雙贏！比到你知識，你自己都能有財富增值！

累積財富是一個長期過程，當中要不斷學習，股市有贏有輸是好正常，但最緊要有進步，我自己都是不斷這樣累積經驗。

進階班比初班會深少少，但我相信你努力溫書，跟翻
筆記要求你做的學習模式，其實會有好大進步！

我好希望你可以有財富及知識上的提升，多年後，見到你的財富大幅提升，我相信我的努力會好的價值！加油！我相信總有機會再見到的！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15303：

你好！我想宜家開始月供一隻Reits長線收息

想請問現價買領展定置富比較好？
Thank you!

龔成老師：

兩隻都是有質素的房託，都可以長線投資。

因此，要睇你的投資目標，如果你想增值多D，就領展（0823），如果想收息較強，股息較穩定，就置富（0788）。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15304：

老師，可否研究下872？

龔成老師：

啟迪國際（0872）質素不佳，雖然生意有增長，但經常出現虧損，投資價值不高。就以2019年上半年度，佢的虧損擴大4成。

當然，見佢生意有增長，而智能輔助駕駛系統及其他汽車元件的部分不差，這個業務部分，有可能帶動佢增長，不過，從整體分析，這刻仍有好多不確定因素。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15305：

老師，想問下你對買樓的建議！ 近排睇緊港島一個單位，好近地鐵站，可是比較單位比較少，只有212呎，開價280萬。

我一直好想買樓，放租岀去，長遠黎講物業好似係最好既資產，計過條數都供到。 但就唔識決定應該買，定還是繼續買股票回報會更好？

因為樓齡都有47年，好似無乜升值潛力。 又有人話過左2年，樓價會跌2成，因為一個週期到左。可是買左樓，放係股票增值既現金就會少左。

可以指教一下嗎？謝謝！

龔成老師：

港島是不差的投資區域，因為長遠的供應有限，樓價一定有支持，不過，212呎是較一般的物業，因為這樣物業，對於家庭的作用不算好大，無論是將來出租或賣出，市場需求都不是太大的類別。

加上樓齡47年，假設你買入後，想賣出，下一手買家要買50年樓，你在樓價上不會有著數，同時要面對維修問題，所以，整體的投資價值，只算一般。

我相信香港樓市，中短期會向下，因為經濟差，而長遠則會向上，因為始終長期供應不足。

這類單位，會偏向「非平不買」，你可以等樓市跌多少少，如果到時你大力還價又中到，就買，否則不要心急。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15306：

老師，我想問遠大醫療512 前景會唔會比綠葉製藥比較好？

公司中期純利增長超過七成；绿葉製藥中期純利三成以上。公司現在估值會唔會太貴？我是否應該選擇綠葉製藥比較好？

兩間公司股價波動也大。我睇過兩間公司年報的藥物銷售帶動公司經營活動現金流。

負債比率：遠大醫療過去有下降趨勢。反而，綠葉製藥有上升趨勢。最後，你會不會有考慮出版公司橫向方式的書籍。

龔成老師：

遠大醫藥（0512）係中國從事製造及銷售醫藥製劑及醫療器械、生物技術產品及營養產品、精品原料藥和其他產品。

佢旗下公司係中國最大之安乃近製藥商之一，其另一產品替羅非班作為治療心血管疾病之主要抗血小板藥品主導中國醫療市場。

另外，兩種藥品重酒石酸腎上腺素及重酒石酸去甲腎上腺素已通過美國食品及藥物管理局鑒定，並出品至美國市場。

除左財務數據分析，我地都要分析佢本身的產品及發展，整體上，遠大醫藥發展較正面，相信比綠葉製藥（2186）好的。雖然估值上，遠大比綠葉略貴，但我地分析點，一般以質素行先。

至於書方面，要研究下。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15307：

你好 龔成老師
最近發現美股 都有優質股 而入場費俾港股低
你認為我應唔應該持有美股？
P.S 我係一個投資新手

龔成老師：

美股當然都有優質股，都是可以考慮的。

但要留意，我地投資，一定要對企業有「完全的認識」，能掌握到企業的情況，先可投資，港股美股都有一些有質素的企業，但一定要先仔細分析。至於入場費，不是影響投資與否的因素。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15308：

老師，其實我心中仍然有樣嘢想搵出一個突破

坦白說 ，我現時嘅職業係酒店相關 係酒店呢行做左五年 用四字形容 「吃力不討好」人工非常低 所以我之前問你應該讀唔讀part time degree呢個問題 我心中當然有一個明確的答案

與此同時 我成日睇你d post 見到好多同我差不多年紀嘅讀者人工都幾高 呢一點 令我成日問自己點解 我到而家 人工都可以咁低 我真係好想揾到突破
但我真係諗唔到idea

but anyway，好多謝老師之前俾我嘅建議

龔成老師：

你要好好利用時間，提高自己的「身價」，在每日翻工的同時，問下自己，自己的能力及身價有否進步？

有些工種，年資長短與人工無太大關係，這類工，你要思考是否值得長遠去做。同時，同一個職位留太耐，都未必是好事。

如果你心中有方向，就要做，把握機會令自己進步，有時路，要跳左出去，先知點行法。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15309：

老師，剛看到「年報聖經」中談及（潮流企業），香港電視（1137）算唔算係一個例子？上星期一特別抽高可唔可以用以下概念解讀？

1）王生公報已買口罩機為利好消息
2）股票因利好消息認為企業有前景
3）股票上揚破52週高位
4）配股後雖然股東權益少左，但因套現主要為業務擴展，所以都算是利好的消息
5）但此企業尚未係可投資企業，因連續4年都係虧損
6）企業開始轉虧為盈時便是可以投資信號之一

龔成老師：

《年報勝經》所講的情況，正是這樣。

書中形容當近期發生一些潮流，例如飲食潮流，就會好多相關企業，目的就是把握高位集資的機會。

而香港電視（1137）上述的情況，就是這類模式，所以，當我地見到短期裡，企業因為某些潮流（但只是短期），而有較大的上升，我地會比較小心。

你分析時，唔好太著重中短期的利壞消息，以及這類中短期的分析，要睇長期。

業務上，佢是是潛力股，但這股的財務數據變化大，估值好難，這是最大的風險。

市場對佢的估值都不一，這一定會令股價變化有很大的波動。往往只能用一些預期的模式去進行估值，例如預期3年後的盈利情況。

因此，這類股不是不可投資，但不建議大注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15310：

請問老師 海螺創業前景理想嗎? 現價合理?

另外已經報讀了老師五月的投資基礎班 相信絕對物有所值

龔成老師：

海螺創業（0586）前景正面，佢整體的發展不差，生意與盈利都有理想增長，財務數據理想，負債不多。雖然股價升左唔少，但由於盈利有實質上升，因此仍未算貴，只算合理區中上部。

股票班絕對可以大幅提高你的投資實力，5月見！

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15311：

龔老師你好，我現在月供股有三隻:港鐵供:$2000,盈富供$1000.建行供:$2000，現在經濟下降，收入也差了很多。
我這個組合可以繼續供下去嗎:我才供了三個月
麻煩你了。非常感謝你能經常回信息俾我

龔成老師：

你這個組合所供的，都是有質素的股票，可以保持進行。

不過，要睇翻你自己的財務情況，我地理財，要做到攻守兼備，所以你要留有一定的備用現金，足夠你3個月的支出。

所以，你要平衡情況，如果現金不足就停一停，如果有足夠現金就保持進行。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15312：

Hi~最近看富爸爸的書，佢經常反對長期投入股市中，建立股票、債券、etf組合等，你對此有冇特別看法？佢不停重提反對長線投資股票令我有d不解

龔成老師：

因為佢是以投資地產起家的。

一般人投資基金、ETF，是一些穩健的增長方法，佢反對的原因其實有3個，第一，財富增長力及現金流，不及佢的方法。第二，一般人投資知識不足，大多虧損，因此佢反而投資股市（因為大部分先知識的人都輸）。第三，一般人只懂「短炒」，而佢強調要留意現金流，而並不是「賺差價」。

其實最重要是第一點，因為佢利用借貸投資物業的方法，財富有很快的累積，可以不斷將物業增加，但香港，這個模式已不行，因為買第二層要比高稅，大大影響回報。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15313：

Halo想問你點睇0097，1810、981，178？

龔成老師：

恒基發展（0097）不差的，但只是收息，唔好預有增長力。

小米集團（1810）其實有潛力的，但業務就比較波動，估值亦較難，這股可以投資，但只能小注。

中芯國際（0981）雖然有增長力，但現價貴。

莎莎國際（0178）中短期一定弱，但長遠質素仍在，現價在合理區中下部。不過，始終有風險，因此，不建議大注。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15314：

想問你之前有咩著作會出？

同埋你出左D咩作品？我暫時已買百萬富翁1，2，3集股票勝經，50穩健收息股及大富翁致富藍圖！我想問我仲有幾多本屬於你嘅書係咪買㗎？

係想問你之後有咩書會出？

龔成老師：

以下是我的11本書：

《80後百萬富翁》（第7版）
《80後2百萬富翁》（第3版）
《80後3百萬富翁》（第2版）
《財務自由行》（第5版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（初版）
《股票勝經》（第3版）
《選股勝經》（第2版）
《年報勝經》（初版）

書本在三聯、商務、大眾、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

另外，今年會在年中，出一本關於買樓的書，年尾，出關於致富概念的書。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15315：

老師，其實0788 PE=70

要怎樣從PE 知道隻股價是否處於合理水平

龔成老師：

中國鐵塔（0788）有質素的。

這股本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

點解可以咁高市盈率，因為市場預期佢的盈利會有理想上升，而的確，佢的增長不差的。

考慮到佢的質素、發展能力，這股算是合理區中上部。

由於這股有發展力，可長線。

但如這刻買入，分注慢慢入，可以的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15316：

龔sir 本人28歲 想請教MPF投資選擇既策略應該係點?

龔成老師：

由於強積金是超長期的投資，我地只要好簡單咁人生階段、風險承受能力去配置就得。例如年紀較輕就進取，中年就平衡分配，年長就保留，咁就得。

因此，如果你現時28歲，仍可以進取的，可以將較多資金，投資在較為進取的類別，少少在平衡組合，咁已經得。同埋，強積金唔需要經常轉來轉去的。

我由初踏出社會開始，都是100%恆指的。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15317：

老師你好，今日＄11.34入了金界控股，請問目標價是多少？另外一隻2680創陞＄4元入，現一直跌是否要止蝕走？謝謝抽寶貴時間解答

龔成老師：

我地決定繼續持有一隻股票與否，最重要睇企業的質素、前景，買入價不是關鍵。

金界控股（3918）是有質素的股票，可長線，暫時無特別目標價，這是增長股，你可以長線持有，但不建議持貨過多，因為佢始終處於新興市場。

至於創陞控股（2680）業務不穩，出現虧損，風險比較高，加上現價仍貴，賣出較好。你可以先賣出一半，餘下等有較大反彈再去出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15318：

您好，龔成老師，想請教一下，240和610有如何睇法，我有親友在這建築公司工作，之前聽到消息該公司接了明日大嶼工程

但因社會事件而影響，我合共有十多萬該公司股票，現價格下滑，想再買貨，您意見如何？

龔成老師：

明日大嶼的變數實在太多，唔好單憑這類消息就投資。

較穩健的做法，是假設佢在無發展明日大嶼的情況下，是否值得投資，以及估值多少。

利基控股（0240），本質不算差，但近年的盈利有下跌情況，如果以長期估值計，現價算是合理，但你要佢上翻高位，不是短期事，如果貨不多，可持有，勉強守，但太多貨應該減持部分。而不建議加注。

至於惠記集團（0610），相對較好，現價合理，可以持有。如果這股佔你財富組合不多，加少少可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15319：

龔Sir你好！讀過你部分著作後，明白了不應炒股，但始終對股票市場沒有太多經驗不知如何下手。

因家人有30萬現金想投資股票，本來有用當中部份金錢買入2800，但見近來時局不穩定，加上本金不是自己

所以決定先放貨拿回本金，一來一回反變成沒賺沒蝕，所以想請教該如何為家人這畢資金部署？
先感謝

龔成老師：

其實，你唔需要太著重中短期的股市情況，我地要長線投資，著重的是長遠的企業發展，中短期問題總會有，但轉來轉去不是上策。

可能你偏向保守，不如建立一個「收息股組合」，對於你家人的本金會較好。

你可以將$15萬，建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

Q15320：

你好，龔成老師，本人持惠理806 3年，有35000股，平均買入6.57,現4.75,請教我應該再入定等升後放？吾想放甘耐，謝謝

龔成老師：

惠理集團（0806）的質素只屬中等，相信你持有，都只會平穩，唔好預期有太大的增長。不過這股始終不是無質素，因此，在方向上，你可暫時持有，但就可等機會，分注賣出。

-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\-\

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。