【我在雷曼的最後日子——睇住佢點冧】［特約分享］
見雷曼兄弟倒閉10周年，人寫我又寫，想去分享下雷曼兄弟一個小職員喺雷曼倒閉前後嘅一啲經歷。

2003年雷曼兄弟喺香港嘅辦公室只有一層半太古廣場，去到2008年倒閉嘅時候辦公室面積已經倍增到有四層IFC二期，同兩層萬宜大廈，可想而知當時嘅發展速度有幾快。當時，銀行業嘅監管比較寬鬆，新產品新市場嘅開發真係好好玩…今日話要做越南證券，聽日又話要做巴基斯坦衍生工具…以今日嘅監管環境，我肯定所需要嘅人力物力一定比以前多幾倍，仲要慢好多。

雷曼兄弟亞洲到2007年嘅時候，淨係證券部門唔計ECM嘅全年收入已經去到八億幾九億美元。以一個唔夠500人嘅團隊來講係非常可觀。喺亞洲，當生意一切都上晒軌道嘅時候，喺2007年尾JP Morgan收購Bear Stearns 就敲響左警鐘。我哋開始意識到投行其實唔係冇可能摺埋嘅。喺身邊做金融嘅朋友開始旁敲側擊咁問我公司嘅情況。尤其係一啲係私人銀行工作嘅朋友尤其擔心，因為雷曼所發行嘅批發及零售衍生產品非常之受歡迎。當時嘅市佔率排頭三位。佢哋嘅客人開始擔心產品嘅抵押品。其實去到2008年頭，雷曼兄弟係嗰方面嘅銷售已經少咗好多，因為私人銀行客戶對雷曼嘅財務狀況已經有所懷疑。容許我分享少少對於當時監管structured notes 的觀察，香港SFC 其實早於2005年頭已經意識到其風險，並且約見左好幾間大行嘅衍生工具部門主管，以了解structured notes 嘅運作。不過當時佢哋嘅重點，就擺咗喺對沖，對市場嘅影響，SFC 睇唔到，又或者可以話，全個市場都睇唔到，抵押品嘅風險。不過都唔可以怪曬佢哋，始終當時大行嘅衍生工具部門主管大部份都係Ivy League 嘅PhD，同埋喺華爾街做咗好多年衍生工具，而當時SFC 監管部門嘅對頭人，大部份都係Big Four 出嚟嘅。始終唔係一個level playing field。

講返自己，我個仔係喺2008年5月出世。仲記得嗰仔出世前，我同雷曼亞太區個CFO同證券部個COO，上咗北京見CSRC同SAFE，要求加大個QFII額度。我地見完官之後返返落嚟，我就去咗放paternity leave 嗱。當我放完假返番公司想問下QFII嘅情況，就發覺個CFO已經離職去咗間俄羅斯投行工作，而個COO 又唔聽電話又唔覆電郵，過多兩個星期先知道佢已經被裁。當下，我即刻聞到有囉味，不過都已經冇乜嘢可以做，只可以繼續坐喺度，每日睇CNBC睇吓有乜發展(內部通訊永遠都話公司嘅財務狀況非常好，短期票據又有幾多倍over-subscribed)。

一直去到九月頭，情況急轉直下，去到中秋節前一兩個禮拜開始，聽到越來越多行唔肯同雷曼做交易，雷曼股價由高位過百元，跌到得返四、五蚊(我記得當時有個吋吋地嘅同事，喺隻股票反彈過$7嘅時候，大大聲喺trading floor話自己入咗貨賺咗…希望最後佢有沽到啦)。

去到中秋節前嘅星期五，大概放工時候，我就真真正正意識到雷曼兄弟真係會接埋嗱⋯⋯我當時係坐喺一個、喺雷曼做咗10幾年嘅同事旁邊，突然間我見到債券部個阿頭，由佢個辦公室，走去我同事身邊同佢握手道別及交換電話(佢係從來唔會行過哩證券部)。其實，當時大家對雷曼兄弟會被拯救已經冇乜期望。

當年嘅中秋節過得好愉快，因為當年係我第一年做爸爸過嘅中秋節。去到星期一中秋節假期嘅早上，打開電視從新聞上見到紐約嘅同事，已經由辦公室抬着紙皮盒離開公司。我當日就帶咗兩三個大袋返公司執拾私人物件，因為唔知道禮拜二開工嘅時候，究竟入唔入到辦公室…返到公司立即碰到人事部主管，我即刻問佢今個月有冇糧出。人事部主管同我講佢都唔知，真諷刺，大家都好無奈。

到禮拜二早上，同事魚灌返到辦公室開工。我仲記得喺樓下大堂等lift嘅時候，旁邊BNP嘅員工，都對我地都投以同情嘅目光。我哋順利入到辦公室不過已經無事忙，冇野要做。亞太區CEO即刻開咗個town hall，佢話管理層正努力拆件賣雷曼喺各個地區嘅業務。幸運地，帕克萊買咗雷曼美洲嘅業務，野村就買咗雷曼歐洲同亞洲嘅業務。From hindsight，雷曼嘅員工其實相對地幸運因為係金融海嘯一到嘅時侯，我哋早已經搵到落腳點。

金融海嘯已經過咗10年，當年嘅同事大部份仍然係金融業工作，有部份轉左去基金管理及企業銀行工作，有部份又轉左去啲完全唔相關嘅行業，譬如有個senior sales trader 依家喺英超做球探，有個sales 就轉左去FBI 到做..... 無論如何，我都好珍惜當時嗰種過山車式嘅經歷，我喺度祝福大家繼續平平安安。

作者當時係喺雷曼兄弟亞太區證券部銷售及交易部副總裁

#金融海嘯十周年
#toobigtofail
#Ikillyoulater