台灣女星伊能靜（藝人哈林及藝人庾澄慶前妻）早前接受訪問，大講自己嘅愛情觀、家庭觀等心路歷程，但就無端端拎梅姐抽水，引發網民鬧爆。 佢喺訪問講到應該先找自我價值，定係先找愛嘅問題，佢話：「如果你先完成自我價值，那很慘，因為你的事業已經到頂，那就會像梅艷芳。因為她一輩子都在尋找愛，連她最後都瘦成那樣，她在台上都要穿著白紗。」 . . 梅姐喺逝世前舉行演唱會，最後一幕著住白婚紗，佢當時提到原來十幾年前已經買定嫁妝，不過驚用唔著，所以好想試吓喺演唱會戴住嫁妝，著住婚紗比歌迷睇。當時 Wyman 聽完好感動，填咗《嫁妝》送比佢，但梅姐其後與世長辭，最後歌詞輾轉由 Kelly 主唱。 今次伊能靜無啦啦抽梅姐水，被大批網民鬧爆，指關佢屁事。梅姐徒弟譚耀文亦有回應事件，叫網民唔好勞氣：「人嘅修養和情操高低立即可見！梅姐嘅情操高到係屬天降之大任，巨人、巨星級氣度，仁義、濟世、成就卓越，一生忠誠奉獻畀每一位親朋好友和梅迷，所以直至今天還深愛梅姐的人仍數以千萬計甚至億億聲。以梅姐嘅氣度應該都係笑一笑就算，然後梅迷一齊跟住一人笑一聲，咁就已經不得了！起碼她今日知道每當受到傷害時還是那麼多人仍然在守護她、支持她這以經很足夠！」