［吼～～～～］ 你今日整咗光刻機未？

TLDR：我嘅終極目標，就係成為一個普通有錢人，然後同你地一齊去仇視啲超級富豪！

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
仲爭4個勇士！邁向2000人訂！Two thousand people can't be wrong！（扯，幾百萬人冇訂添！）．搵人填埋佢，下一個目標當然係3000！
＝＝＝＝＝＝＝＝＝＝＝＝＝

1. 雖然所謂美股跌300點，但我個美股倉係升嘅。（上星期六篇文公開咗持倉的，當然冇講埋買咗幾多，但你當equal weight都大約計到，事實我都冇任何一隻特多）

2. 不過當然，絶對唔難。首先所謂跌300點，扯，0.8%之嘛。另外，道指之嘛，而講咗N次道指唔科學，人人都知（你唔知我幫你唔到），咁睇標普指數只係跌0.3%，況且Nasdaq仲升少少添

3. （但最好笑，都係個垃圾倉，跑贏晒三大指數，過去一個月都係，真係買到懷疑人生，可惜只係每隻3000港紙，升20%都冇用。想睇名單Patreon有，幾錢買幾多全部有貼的）

4. 但講返，ASML不停新高唔奇（兩年250%呀，「瞓咗身家而家發達了」），極高技術門檻嘛（人地呢啲就真係識tech啦，唔係你啲網友），晶片荒持續，絶對可以加價（當然總有個譜，留意隻嘢都3500億市值，半間Tesla，世界排名頭二十架啦，好Q誇張）。

5. 蘋果不停新高都唔奇，話晒之前都幾落後，況且出新iPhone嘛，新呢部聽聞幾令人期待，況且大家都餓瘋多年，又大把錢（冇得去旅行，政府又派錢，炒股票又贏—咁嘅市都輸錢就更加要訂我Patreon），肯定賣到貴一貴，食水肥一肥—你可以諗下佢啲成本可能只係多咗幾舊水，但可以賣貴幾千。

6. 最神奇頂級超卓嘅，係NetFlix，遲下我會貼個圖。我知，你去Google都得，進軍遊戲業務嘛，最緊要有憧憬。但之前兩次（定三次？）業績後都狂插，而啲數又真係唔得，真係飽和。（我到而家都覺得 Amazon嘅廣告收入多過 NetFlix成間公司係好mind blowing的）（雖然，蘋果齋賣Airpod嘅收入都差不多等於NetFlix成間公司！）

7. 但大佬呀，講咗N次。雖然左翼（膠？）冒起，但美國始終都係Meritocracy，資本主義

8. America doesn't bail out the losers. America was built by bailing out winners. By rigging a nation of the winners, for the winners, by the winners

9. 以前嘅工業家又好，卡耐基 （知係一個人嚟架可？唔止係間演奏廳），JP Morgan（知係一個人嚟架可？唔止係間輪商），洛克斐勒（知係一個人嚟架可？唔止係棟寫字樓），後來投資銀行家，到而家甚麼標基，Steve Jobs，甚至Jeff Bezos Elon Musk

10. 背後，都係同一樣嘢，亦係我買股票最終極嘅理念：

11. 「你咁叻，自己整間公司出嚟丫？」

12. 好多人以為我好串，但天地良心，認識我內嘅人，知道我係李天命講嗰種「寫文串串貢但閂埋門苦讀」嘅人。正因為我勁（！），所以更加知道自己不足。咁總好過啲人，表面就謙卑，內心實在非常自大（＊）

13. There are many guys like you all over the world！我本書有講，我去完Warwick，已經立志唔會去做quant！因為更多肯捱苦嘅勁人（大陸仔，印度仔），完全冇edge的 —而天地良心，Warwick嘅quant都已經唔係頂級啦。

14. 我嗰刻就真係好似高普踢波咁呀！冇錯係嗰個高普（＊＊）

15. 咁你買股票，好簡單一個問題？啲錢我用得叻啲，定人地用得叻啲？咁梗係人地勁過我啦。所以咪打本畀人做生意（請笑，但technically 係咁，你可以買一股匯豐然後落分行同條女講我係你老細，雖然老細有大老細細老細，正如社會上嘅零件有大有細）

16. 股市，就係咁回事。我夾錢人地份生意，當然最後佢分大份我分細份，但冇所謂。我坐順風車，亦唔係free ride（＊＊＊）。

17. 我嘅終極目標，就係成為一個普通有錢人（上級中產定低級富人之類），然後同你地一齊去仇視啲超級富豪！

18. 成件事係咪好正呢！

19. 我識唔識tech？正如因為我唔識，我咪信啲真係識嘅人，而唔係你啲網友咯。CEO收你咁多錢，就係幫你過關斬將，日日爆鑊日日補鑊架啦。然後大股東食大份，你食餅碎。但你在公司涼冷氣睇Patreon時，人地幫你資產增值，不知幾好。

（＊）有好多呢啲例子，好多表面唔覺，有機會再講。

（＊＊）利迷應該知呢個故事，高普後生時去法蘭克福試腳跟操，當時仲有同佢同年，都係19歲嘅慕拿。對，嗰個慕拿。高普見完慕拿踢波後心諗，嘩，人地呢啲就world class，我no class呀。好早就知道自己唔會係個極成功嘅職業球員，早早已經學做教練。當然高普都謙虛，咁在緬恩斯都入唔少波嘅，唔失禮，但當然同慕拿比爭好遠。而慕拿同真係最優秀嘅球星比，又爭一班啦。後生嘅唔會識佢。

（＊＊＊）我提供資金，同埋承受風險，雖然好多人以為呢啲嘢冇意義冇貢獻。但存在即合理，你見到市場係reward呢啲嘢。

＝＝＝＝＝＝＝＝＝＝＝＝＝＝
月頭訂最抵！一週年！比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費100，已經1900人訂！ 畀年費仲有85折，20/40年費VIP 送本人著作一本。
＝＝＝＝＝＝＝＝＝＝＝＝＝＝
仲爭4個勇士！邁向2000人訂！Two thousand people can't be wrong！（扯，幾百萬人冇訂添！）．搵人填埋佢，下一個目標當然係3000！
＝＝＝＝＝＝＝＝＝＝＝＝＝

［今日寫呢啲］週末專題，奈雪的茶。1689個訂閱了，不如月底前做到1700啦，順手賀我生日。反正而家入嗰啲下個月我會退錢。

TLDR：奈雪的茶，市值同隻維他奶差唔多咋！你估係咪真係好好賺？咁當然，你可以覺得隻嘢超抵嘅。大股東賺夠想益你平賣畀你呀可？

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

好啦，隻嘢都抽完，而家先講？係，因為忙。但反正關係不大，你齋係抽隻新股呢，根本唔使咩分析，反正只係玩一日兩日，睇乜都多餘。咪講「供求」，但甚至唔好以為超額幾百倍實升，嗰啲「需求」假嘅，啲友孖展之嘛，佢唔會上市追的。

咁但如果你想知應唔應該第一日沽，可唔可以長期持有，之後追唔追，或者純係想認識多啲間公司，睇下應該點睇招股書，咪睇篇文咯。100蚊都唔使，買幾杯奈雪咋！仲送晒以前嘅幾百篇文（差不多一年！）

首先要講，街外人睇，真係另一回事。唔好用你閣下嘅品味，去判斷啲嘢受唔受歡迎，更加唔好用受唔受歡迎去判斷隻嘢得唔得。首先有啲公司生意好唔好好易睇到（港交所！），但有啲唔係，例如賭廳，賭最大嘅係超級貴賓，你去研究多唔多人，嘥氣。正如ASML SPGI 之類生意好唔好，你街上邊睇得到？

仲有，受歡迎呢啲嘢，好易造出嚟，使錢咪得。受歡迎又未必真係多人幫襯，多人幫襯又未必高收入，高收入又未必高利潤，高利潤又唔等於個估值抵，根本係N咁多樣唔同嘅事

更重要嘅係，好多分析最後都係結果論。做好產品自然會有生意。咁即係冇講過。咩叫好產品？眾所周知，最大市值嘅餐廳，全部都係賣垃圾。麥當勞海底撈大家樂好食咩？即使你講星巴克，在咖啡撚心中，都係垃圾（我就唔識分）。但大公司一定係玩品質控制，行銷，控制成本。同你「煮好啲嘢」完全係兩回事。你要追夢嘅咪小野二郎咁，原宿開間Sushi Bar（＊），一晚做十幾個客算數。但你要上市一定係 味將軍 美心 LVMH。

所以，你有冇飲過奈雪，根本無關重要。你覺得好垃圾，who cares？我都唔明超級英雄片有乜好睇，但就係有好多人睇。唔好將自己放到咁大，反正香港得一間分店（日本都有一間！反擊日本成功！）。甚至大陸佬覺得奈雪好唔好，都係who cares．麥當勞大家樂好好食咩？「大家樂請分析員食飯都唔係在大家樂啦唏」

吾友高天佑話齋，呢隻係奶茶第一股。但，唔係奇在賣奶茶可以上市，中國十幾萬萬同胞，一人買一個胸圍都不得了（畢菲特都係咁上下講法）。唔好話賣奶蓋，大把古怪行業都上到市。所以奇怪根本係，做乜咁耐先有第一間奶茶股？真係好好賺？你話呢？

咁有啲人總係覺得好好賺唔使上市，all due respect，有乜公司真係好好賺唔上市？華懋霍英東定Subway Mars？你覺得佢地上市大得過而家啲龍頭？

咁睇數啦，奈雪上限都不過係拎340億市值。好多咩？一間維他奶咁嘅估值咋！（定你覺得好抵？）。係咪即時覺得奇怪？奈雪雖然唔係龍頭，但都二哥啦（大哥你估下係邊間？），先340億市值。你老味海底撈打邊爐賣到2000億市值（仲要高位跌咗一半！高峰時4300億！）。安踏賣鞋賣到5000億市值。覺唔覺得件事有啲問題（咁當然，安踏好似有海外嘅，雖然有人話冇鬼佬買）。

奈雪上限都不過係拎300億市值。Something is wrong la

BTW，話埋你知，奈雪全部店都直營，我都幾意外。因為傳銷同Franchise 係上世紀最仆街但亦最偉大嘅兩種發明，加盟店嘅嘢，利用啲友追夢做老細嘅心態，封晒蝕本門。但奈雪就係冇做。點解？會考Commerce 或而家咩　企會財教嘅基本嘢啦，加盟店咪難控制品質，啲友側邊租多個舖賣煎釀三寶。

仲有，奈雪全部舖都係租嘅。咁又睇你點演繹，香港嘅咪話賺埋都係益地產商，但大陸情況又唔同啦，地產商個巴京拎包華冇咁大。人工成本先最貴，而你奈雪我估總不能叫件大媽去做品員啩（冇飲過，唔好問我）。仲有，冇舖又可以扮asset light model啫

其他嘅，留返文入面講（4000字呀！）。但再講少少。首先你可以估下，奈雪一間舖一日幾多生意？不妨估下。我估冇你想像中咁多，而亦唔關城市事，唔同級別城市都差不多。但500間舖（話開到千幾間！），斬埋就好係嘢。

之但係，總有盡頭嘛。廿幾蚊杯，其實好係嘢！你不如諗下大陸幾錢人工？仲要二線城市喎。「不如真係反攻日本啦，而家得大阪一間」「星巴克都反攻意大利法國啦」「COCO老番屋都開到印度啦」

仲有講埋最後一個迷思，「呢啲咁嘅化學嘢好好賺」「啲茶使幾錢成本？」。Yes and no，當然你可以質疑佢造假數買貴貨（點解咁做？因為十派牙都係自己咯），但既然呢隻放上市，應該當住呢隻真。

事實呢種「呢啲咁嘅化學嘢好好賺」「啲茶使幾錢成本？」我聽咗冇四十年都三十幾年！真的！細個食早餐對面阿叔都係咁講。問題係：咁好賺你唔去開？真喎。以前就話資訊唔流通，而家我知道暴利嘅，點會冇人抄冇人搶？所以呢啲「好好賺」係迷思，你冇其他嘢嘅，兩下就抄到你收皮啦。亦所以點解啲公司要搞咁多行銷，因為貨物易抄，但品味氛圍價值冇咁易抄。
詳情就文入面講，但你不妨估下，到底佢賣一杯奶茶，入面有幾多係材料成本？（唔計員工舖租其他嘢，只講材料）。我估，一定比你想像中高好多！

你以為食水好深？我覺得唔係。拿，星巴克就真係杯嘢入面大約10%係材料錢—唔係你以為係乜？sorry破壞你童年。其實你杯咖啡，絶大多數去晒：人工—我總不能整件大媽同你Hello Ivan，租，稅，仲有賺你嗰份。「最仆街係個杯呀餐巾呀分分鐘貴過啲咖啡豆，下次記住拎多幾張返公司炆屎」

講遠咗，星巴克入面，10%係材料錢？咁奈雪呢？梗係唔止。但你可以估下幾多。

咁即係買唔買得過？咁就睇文咯。但你睇估值大約知。我當星巴克，1330億市值（美金啦），265億生意，36億純利。或者想睇大陸嘅，海底撈，2000億市值（港紙），290億收入，23億利潤（人仔）。

咁奈雪呢？咪話上限340億市值。你仲要預佢升喎！計下數咯。一年幾錢生意？文入面話你知（其實招股書都有），或者用心算。500間舖。然後頭先咪叫你估下每間每日做幾多生意咯。

＝＝＝＝＝＝＝＝＝＝＝＝＝＝
2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

（＊）OK，估都估到佢間嘢唔係在原宿，原宿只有龍蝦包同學生妹。呢句去原宿開間sushi bar係歌詞，小野二郎梗係開銀座，去銀座你就知自己窮。真係的，我在大阪福岡甚至京都食米芝蓮兩星都仲覺得唔貴 — 去銀座就知自己窮，都係去返嘉湖銀座算。

［維基自肥計劃］王維基個package 畀人vote down咗，5億港紙就咁見財化水。但，乜水投反對票？

TLDR：衰咗，但至少畀你見到，唔係打籠通嘅。當然只爭300萬票，0.3%股數，3000萬唔夠，肯定唔順超，但希望在人間，今年已經畀舊年接近好多。咩人反對？其實應該問，點解同2020比，贊成票多咗8000萬？留意下，2020年5.15批9000萬股，舊年股東會時股價4蚊，而家9蚊。

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝

1. 唔知大家有冇去過股東會，我都去過下。香港嘅股東會呢，十居其九大家最關心就係食嘢，以前有啲公司，去翠亨村有飯食都試過。我亦食過麗晶大賓館嘅自助餐。

2. 但後來「投資平民化」，傳媒報道，以前少數人玩嘅股票遊戲，變咗有晒攻略。咪吸引晒一大堆師奶，點心黨。唔係佢地特別叻，只係佢地特別得閒。當時集體式經營，有班師奶阿叔，有晒日程表，三點去邊食，四點去邊食，邊個商場有免費車都睇埋。星期六日佢地就去啲輪商講座呀，然後就去樓盤銷售呀咁。真係以為香港係索馬里飢荒。

3. 我自己見過嘅，搶嘢食已經係小事。啲友係直頭拎走！點拎走？放入喼！甚至連啲一包包嘅奶精，啲友都掃入喼。

4. 傳媒去報，仲要人人通風報信，拎完著數仲要放上網話畀人知。咁就必然玩爛個遊戲，呢啲絶對係香港精神。

5. 後來就醒啦，喂，既然公司平時請開財經公關，「咁不如叫埋佢地檔駕啦」。結果攔阻呢啲食嘢黨嘅責任，就落咗去啲弱質纖纖嘅後生女仔（多數係女）身上。往往就由佢地分西餅畀你，唔好自己拎。等於你去酒店自助餐食刺身 食燒牛肉咁，畀你啲友自己拎，就變咗《合家歡》嘅許冠文咁，成舊燒牛肉一嘢拮走架啦（不過《合家歡》諷刺大陸人，我樓上講嘅絶大多數係香港人，反而啲財經公關就唔少係港漂）

6. 正經講，股東會呢，好多正經事做嘅。早排Exxon埃克森美孚，就輸咗個proxy fight，有兩件「激進投資者」選咗做董事。最過癮係你唔好以為佢地買好多貨狙擊Exxon，原來只係渣住0.02%，5000萬美金（公司市值2500億），但有人投票支持。

7. 香港地嘛，股東會除咗食嘢，有時有其他嘢嘅。但有時咪啲小股東自己發表下偉論，台上啲大孖沙咪忍你，畀你講飽佢，最後一樣達到目的。

8. proxy fight？都有，但好多係換管理層呀，拆骨呀，提名董事呀咁。遠有大劉狙擊嘉道理半島酒店，而根本「華置」本身都係狙擊返嚟，原本愛美高吊扇嘛。近嘅，東亞銀行或者中巴咯。

9. 但，proxy fight去搞薪酬，仲要搞到嘅，就真係比較少見。反正大家都覺得，啲乜乜薪酬委員會都係圍威喂，上午就你批我，食完飯下午換間公司就我批你，啲獨立非執董更加係拎完錢出都未必出現。

10. 但實情都唔係咁嘅，你見，真係會畀人vote down的。證明個制度仲未完全搵笨。

11. 兩單前事，第一單係呢個獎勵股份，係打算發畀王維基嘅，總共4600萬股，嘩，真係5億嘢，一年都成億。霍建寧舊年都不過係拎億幾港紙，all due respect，長和系幾多市值，HKTV幾多？長和系一年賺幾錢，HKTV又一年有幾錢賺？

12. 另外，2020年 2月疫情剛爆，HKTV受追捧，股價大升，公司即時就批咗新股，連登仔鬧到九彩。5.15．9000萬股，佔擴大後股本9.9%，即係原本8.2億股，變做9.1億股。當時經UBS，批畀不少於六個專業投資者。咁可能係啲大戶或基金，冇現真身的（實情都唔係好多錢）。

13. 記住呢9000萬股，股東會年年6月開，咁今年同舊年嘅股數，係多過前年（2019）的。

14. 先講啲橡皮圖章嘢，普通重選董事呀，通過財務報表呀之類。2019 年股東大會，4.3億贊成，反對票1萬股（唯獨有條友88萬股反對，但都只係極細數%）。

15. 到2020 年，4.9億贊成，1100萬股反對（2.5%）。留意因為已經批咗新股，股數多咗。反對票係多咗，但贊成票多得仲多，所以似乎不能話嗰班接貨嘅就係反對同你搞局。仲有留意，薪酬個投票（每一項分開投）3700萬股反對（7.4%）。

16. 今次呢，贊成嘅5.1億票，6300萬股反對（11%）。見到反對票多咗好多的。

17. 至於戲肉，王維基嗰5億獎品，記住，大股東（王維基自己）及關連人士（佢表哥）冇得投。

18. 2020年都有投類似嘅嘢，但係N年前嘅option了，當時500萬股贊成，8700萬股反對，你見係大比數反對的。

19. 相反，今次呢5億獎品，8300萬股贊成，8600萬股反對。就真係只差少少。300萬票，3000萬港紙唔夠，0.3%總股本。王維基應該講晒粗口了。真係出錢搵個人頭買都得啦，但點會早知。

20. 你比較返兩年，反對票都係咁上下多，但贊成票多咗好多。係咪嚟自接新股嗰堆友？未必一定，但可能性唔低，睇數字都吻合。畢竟有邊啲人會8000萬股而舊年未出現？況且股東會投票多數都係基金。咁但你問，做乜佢地2020年又唔贊成？

21. 好簡單，因為，2020年6月仲坐緊艇！當時股價係4蚊多啲。記唔記得成堆係5.15接貨？潛水嘅梗係唔高興。但而家？今年起起跌跌，今年買嘅輸錢多。但從冇低過9蚊。5.15拎貨嗰班，執唔少啦。

22. 拿！Andrew Wiles呀！我交行貨都寫呢啲呀！到我出返關仲得了？！快啲支持Patreon啦。

＝＝＝＝＝＝＝＝＝＝＝＝＝＝
月頭訂最抵！2021比別人知得多。subscribe now（https://bityl.co/4Y0h）。Ivan Patreon，港美市場評點，專題號外，每日一圖，好文推介。每星期6篇，月費80，半年已1600人訂！ 畀年費仲有85折
＝＝＝＝＝＝＝＝＝＝＝＝＝＝