#好得閒先睇
#有姐姐先睇
#我寫俾自己睇
#無眼睇
.

本來，我家姐姐合約在5月19日完成。
但5月機票開始緊張，於是......
.

5月5日 成功買到6月1日Philippines Airlines 回鄉
5月8日 根據網上資訊，填一大堆表格，直接網上申請外傭延期居留
5月19日 收到入境處電郵，通知必須親自把正本文件繳交到灣仔
5月21日 Philippines Airlines 通知航班取消
5月22日 姐姐親自到灣仔入境處繳交文件
5月29日 姐姐取回證件，親自從入境處取得延期居留至7月31日
6月7日 成功買到 7月5日 AirAsia 回鄉
6月11日 AirAsia 通知航班取消
6月14日 成功買到 7月9日 Cathay Pacific 回鄉
7月3日 Cathay Pacific 通知航班取消
7月8日 成功改到 8月18日 Cathay Pacific 回鄉
7月28日 姐姐再次依據電郵指示到入境處繳交文件（因為要再補充新加的承諾書），並吩咐不需要排隊，只需要把文件放在dropbox 就可以離開
8月4日 收到入境處電郵，『又』叫姐姐親自把正本文件繳交到灣仔才可以簽發延期居留到10月31日 （下？但係佢所有文件已經在入境處？！連續打電話去入境處，不果，無助）
8月6日 Cathay Pacific 通知航班取消
.

當中全部表格／文件／書信，還有對AirAsia的投訴（上到消費者委員會）由我負責，同一時間，到處尋找新姐姐。
.

我。無。力。嘞。
.
.
#好彩我多時間留喺屋企
#搵新工人搵咗三個月
#OK終於搵到
#本來下星期返工
#而家唔知

咪以為班工人姐姐喺香港打幾年工就可以返鄉下起屋，當中有唔少工人姐姐慘被剝削，而更令人遺憾嘅係，面對家傭被剝削嘅處境，我哋嘅特區張建宗司長喺同家務工代表會面果陣就俾出個四個字：

「無能為力」。

呢句「#無能為力」，相信係特區政府面對香港房屋、教育、甚至 #武漢肺炎 疫情嘅一個寫照。

《點解外傭做「下欄」？因為你班香港中介抽得狠呀！》

我喺國際人權機構工作幾年間，曾經處理過外籍家務工的權利倡議；而作為家務工僱主，我亦都獲Mission for Migrant Workers頒發「友善家庭僱主」Happy Home 認證 。作為倡議者同僱主，都講吓香港嘅外藉家務工近況。

我主編的國際特赦組織香港分會《人權》第六期，講及外籍家務工的狀況。

（ https://issuu.com/aihk/docs/aihk_humanrights_06 ）

又點解，佢哋要喺星期日做「下欄」嘢「賺錢」？

以印尼嚟香港嘅外藉家務工為例，係必須經過中介公司立約。如果唔係，印尼領事館係唔會發出認可文件，俾印尼籍家務工拎到入境處發出嘅家務工簽証。

問題嚟喇：你以為香港嘅Agent只係收你9900蚊就完？錯了。印尼唔少嘅Agent攀山涉水，去到落後村落搵年青嘅人游說佢哋出國打風流工，唔洗10年就可以回鄉起屋。唔少少女聽咗之後，就去大城市嘅Agent公司報到。

誰不知，呢啲Agent等人齊後就又拉又鎖，要脅佢哋簽價值約14000HKD嘅「培訓合約」；俾唔起錢？就要脅埋你簽借據，等你有工之後先開始還。唔上堂？你就要俾離開費用，對佢哋嚟講都係天價。加上印尼Agent同香港Agent又有合作協議，將呢啲「培訓費」紀錄帶到香港Agent到。更慘嘅係，雖然香港法例唔容許中介收取多於月薪10%嘅中介費，但因為呢份只係「培訓費」，而且係由印尼簽發。香港嘅Agent係技術上去「關心」姐姐還款冇犯法。

故此，你每個月俾一個家務工4630HKD果陣，佢哋頭3個月係近乎「食白果」的。如果工人冇分期還「培訓費」，就會透過Agent同「財仔」去「關心」，有時甚至去到姐姐嘅印尼老家討價。呢個亦係點解外籍家務工喺周末聚集嘅地方，都有好多匯錢舖同「財仔」嘅原因。當香港人以為求職同培訓應該係自願同免費果陣，對家務工嚟講其實唔係必然。

印尼政府曾經喺Erwiana 被虐事件後講過改革制度，但實際上嘅執行根本係冇分別。請印傭仲係必須要經Agent，印尼姐姐每次轉新僱主都要俾多一次「培訓費」，無間地獄。又根據2016年Justice Centre研究，喺香港約35%外籍家務工係孭緊3個月月薪嘅債務。

呢個咁剝削嘅制度，被聯合國形容為現代奴隸（Modern Day Slavery）。其實，只要特區政府確認《基本法》下認可嘅國際勞工公約內嘅第189號公約（ILO C189），再進行本地立法；唔洗問請北京批准，就可以有法理基礎去禁止香港接收呢被剝削家務工，杜絕中介嘅食物鏈。但我哋嘅特區張建宗司長喺同家務工代表會面果陣就俾出個四個字：

「無能為力」。

香港約有38萬外籍家務工，我當佢哋一個月做26日，每日做8個鐘，佢哋嘅人工只係香港人拎最低工資，做同等工時嘅68%。更甚嘅係，有定務工佢哋工時就長過拎最低工資嘅香港人工資一倍。佢哋喺香港做夠一世都冇居留權，比起果啲靠錢嚟香港拎3粒星嘅殘體普通話優越4+3，呢班人真係肯融入同幫咗真‧香港人好多。最少，佢哋嘅出現可以令到本地女性投入勞動市場，而唔係搶我哋香港人嘅飯碗。

拎最低工資生活嘅香港人，多數都係做清潔。清潔工為幫補家計，做「下欄」賺錢都可以話係日常。即使清潔工拎紙皮同金屬去回收，多數嘅主管都係「隻眼開隻眼閉」。咁外籍家務工呢？有時佢哋會拎僱主棄置嘅物品寄返去家鄉，又或者喺香港搜羅家鄉需要嘅物品做代購。喺佢哋聚集嘅地方，通常都會見到專長運貨到印尼同菲律賓嘅物流公司。

我哋尚且接受清潔工做「下欄」幫補，咁點解我哋唔接受家務工做同樣嘅嘢？

（相片：Rob Godden/Rights Exposure Under CC-BY-SA 4.0 https://www.rightsexposure.org/portfolio）