【 莫文蔚20年後推出《婦女新知》續集 】 _ 將於周五晚（11/6）在紅館舉行的《絕色莫文蔚世界巡迴演唱會香港站2021》，莫文蔚（Karen）早前在邵氏影城綵排時已預告，會為香港觀眾度身訂造不一樣的「終極歌單」，「今次返香港，好多之前冇機會唱嘅廣東歌都會擺入去今次呢個騷，所以Rundown會有好多調整，差唔多一半嘅歌，係喺之前嘅40幾場都冇唱過。」為迎接演唱會開鑼，從今日開始，我會挑選五首Karen精選廣東歌，由她分享當年跟創作相關的經歷與回憶。 第一首是由蔡一智作曲、黃偉文填詞的《婦女新知》。 _ 「今日我嚟教大家整甜品／ 首先用滾水沖開Expresso粉／ 再擺啲Lady Fingers落去浸到腍／ 另一方面將啲蛋白攪一陣／ 起泡就加啲Kahlua再攪勻／ 最後兩樣倒埋一齊整到一層層／ 恭喜你咁就完成咗個Tiramisu／ 一個世界馳名嘅意大利甜品 _ 繼1999年的《回家》EP之後，Karen翌年再推出《KAREN MOK》EP，收錄《A Brand New Day》、《北極光》、《水色》、《吸煙不吸煙》和《婦女新知》五首歌，當中《婦女新知》是當年少數以全粵語Rap出來的廣東歌，突顯Karen於本地樂壇的偏鋒格調。 _ Karen說：「《婦女新知》係得意嘅，我又未試過Rap，所以當年收到呢首歌嘅時候，會問：得唔得㗎？唔知㗎喎！咁就試下啦！成件事係好玩，因廣東話嘅Rap（當年）已經少啲，仲要Rap嘅嘢係好過癮，最正嘅就係Wyman（黃偉文）將整Tiramisu嗰段嘢（食譜）寫咗落去，因為我真係識整Tiramisu。」 _ 「故事係我初初返香港入行嗰陣就已經識Wyman，嗰陣時佢仲係（商台）DJ，因為我喺意大利讀書嘛，大家都對我嘅讀書生活好好奇，跟住我話當年一去到意大利，第一樣嘢學識嘅，就係啲同學仔教我整Tiramisu，我就將（過程）形容咗畀Wyman聽，點知佢一直記住呢件事，到（多年後）佢寫呢首歌畀我，就將呢樣嘢寫咗入去，當年Tiramisu喺香港仲係好罕有，加上首歌係透過買嘢去表達同一個男人嘅關係，又有形容港女（作風），成件事真係好精彩。」 _ 事隔超過20年，《婦女新知》竟然推出續集 ── 《婦女新知2021》，由李一丁與鄧東城（East City）作曲；黃偉文填詞；Karen與李一丁和Edward Chan聯合監製。第一集《婦女新知》歌詞圍繞當下時代女性的生活與心態，懂得炮製Tiramisu，最喜歡購物，有事就會食、買、瞓，更會放大愛情，希望找個「好男人」，20年後，大家都變中女了，到底有何轉變？這一點正正是《婦女新知2021》的創作基礎。 _ Wyman覺得，來到2021年，這班女生廚藝應該更上一層樓，會懂得烹調豉油雞，物慾方面，已不再是買得多，而是要買得精，思想依然獨立自主，當然也會比舊時更愛自己，再也不是愛情至上。Karen看過歌詞，覺得Wyman一矢中的：「首歌未必係我自己嘅完整寫照，反而我最想講時下女性心態係點。」 _ 至於MV由「也文也武」監製及拍攝（Wy Chan執導），配合歌詞意思，以誇張手法，用上色彩斑斕的顏色拼湊出炫目感覺，而Karen則以多個搶眼造型登場，包括鮮豔奪目的浴袍、高衩長裙及低胸連身裙look配以假髮造型，性感非常。Karen解構造型：「（雖然）時下好多女性有咗自己伴侶，但唔一定已經成為家庭主婦，內心仍然好貪靚，對保持美態仍然有份渴望，廚藝又會大躍進，呢個MV就係想展現女性嘅呢一面出嚟。」 _ 由於要不停轉妝轉換造型，又要就位拍攝，以便後製時以3D畫面加工，同一天又需兼顧拍攝演唱會片段，結果團隊花了20小時才完成MV拍攝，但Karen仍然相當享受：「好耐未試過咁多咁大膽咁千變萬化嘅造型喺我嘅MV出現，幾個造型都好繽紛好特別好過癮，即使拍攝時間好長，但出嚟效果好滿意、好值得。」特別留意其中兩款（圖一及三）造型，Karen分別穿上Dolce & Gabbana 2021年春夏季的花布長袍配吊帶泳衣，以及一襲暗桃紅色Bra Top晚裝長裙，相當搶鏡。 _ （10062021） _ #游大東 #游大東影視筆記 #莫文蔚 #黃偉文 #廣東歌 #karenmok #10062021 #婦女新知 #dolcegabbana