【龔成問答信箱】（Q22501-Q22520）

Q22501：

老師！有個問題我想問好耐！

我見你講1211 現價偏貴。咁點解你而家唔先賣出？？？

低位再買返（我絕對明白投資要長線）

但亦冇理由睇住股價由最高位跌返落去？長期持有但高位沽貨！咁又如何獲利？

龔成老師：

因為無人知股價走勢。你這句「冇理由睇住股價又最高位跌返落去」，是「預期股價走勢」的思維，即是「散戶思維」。

這種思維，令一般散戶，無法賺到10倍回報，因為佢地見到某股到了高位，就會「賣出等跌先買」，但結果是「賣出後一直升」。

如果我真的賣出比亞迪（1211），但佢股價唔跌，然後佢的企業價值不斷增加，今天的$2XX是貴，但過一年可以變成合理，我就會買唔翻。

企業的平貴，與股價的走勢，中短期可以無關。

你仍停留在「一般人思維」，你以「現金」作貨幣單位，而我以「資產」作貨幣單位。

一般人認為「持有現金」才是有財富，認為「獲利，賣出股票」才能賺錢，但有錢人思維，就明白「現金永遠貶值，持有優質股才是真財富」，根本不用賣出股票。

一般人擔心「如果高位不賣出股票，不賺錢，有機會股價跌翻」。

有錢人擔心「如果賣出優質股，有機會買唔翻，持有貶值的現金根本無用」。

------------------------------------------------

Q22502：

老師，想請教隻完美醫療

1）公司向主席授出購股權是什麼意思呢？對公司前景是好與壞呢？

2）上海市打擊非法美容服務，正路理解是如果完美醫療係正規，理論上是可以打擊其他同行違規對手，有利完美醫療做到寡頭壟斷和汰弱留強，

從而整治行業而令其受惠及增加市場競爭力及份額，實屬利好！但問題是……作為我們散戶及投資者怎樣可以知道完美醫療有沒有違規呢？？

現在我們都只是能看財經新聞消息和媒體報導，雖然暫時未见到上海市政府有點名批評（完美醫療有違規）的報導好似之前騰訊或阿里違規而遭罰款和要求改善和禁令，

但目前這兩個月從高位$10.9下跌至$6.6，會否已經提前有些預兆和隱藏一些殺機呢？

3）之前聽你講過$6是合理區間的頂部，所以我也本來打算準備$6.5左右開始分注入市的（之後近$6再加注），現階段的策略應該是怎樣呢？需要調整嗎？

觀望一下還是照原定計劃進行呢？盼龔sir指點一下！

4）另外你曾說你之前有入貨完美醫療，私人想問下你之前什麼價位入呢？如果以你自己角度，你會用咩價位再加注呢？

純粹想了解和學習多D你個人意見及做法（如果你介意的話可以唔需要講的）

謝謝龔Sir

龔成老師︰

1) 購股權，其實就係一個權證，給予持有者可以在未來時間，用特定價格買入該股。不少上市企業，都會以購股權作為管理層獎勵。

因為購股權的行洗價，是固定的。若日後企業股價提升，即管理層有機會用比市場更平宜的價錢，去買入該股。

其實這個動作，唔代表公司前景是好，定是壞。作為投資者，你只要留意購股權數量，當全數行洗，會佔已發行股量多少。

因為，當行洗購股權時，公司係會發行新股，變相令現有股東的利益被攤薄。以完美醫療(1830)為例，發行的70.9萬份購股權，只佔發行股份的約0.058%，這程度就影響不大。

2) 我地唔係行內專家或者用家，更加唔係企業一份子，的確很難去知佢現時有無違規風險。所以，我地只能用佢過去紀錄和現時質素，去作為參考，例如以現時香港情況去分析。初步睇，個風險唔算好高。

至於點解跌咁多，係因為之前股價太貴，現時純粹只係回調至一個較合理水平，當然，市場對潛在監管有擔心，都是風險。但現價未算平，只係合理區頂位，只宜小注。

3) 估值上無大變，現價係合理區頂位，如果你無貨可以先小注。但由於此股都有一定不確定性，故長線不宜持有過多。

4) 我在$2左右入，暫時唔會再加注。

------------------------------------------------

Q22503：

龔Sir，你好!我現年59岁，仍在工作，現持有以下股票，是否会适，請賜教:-

#00003 (香港中華煤氣) 2100股 @11.86
#00011 (恒生银行) 200股 @144.25
#00012 (恒基地產) 1000股 @28.75
#00066 (地鐵公司) 3,000股 @41.12
#00303 (伟易達) 500股 @60.58
#00435 (陽光房地產基金) 7000股 @3.75

#00548 (深圳高速公路股份) 2000股 @6.88
#00590 (六福集團) 3000股 @18.50
#00778 (置富產業信託) 5000股 @6.99
#00823 (领展房產基金) 600股 @70.60
#01310 (香港寬頻) 2000股 @11.04
#01448 (福寿園) 3000股 @7.70

#01928 (金沙中国有限公司) 1600股 @33.33
#01972 (太古地產) 1000股 @21.68
#02388 (中銀香港) 2000股 @25.58
#02638 (港燈) 2000股 @7.70
#02800 (盈富基金) 5500股 @27.44
#03067 (安碩恒生科技) 1300股 @17.71
#03110 (GX恒生高股息率) 1200股 @28.50

1) 老師，最终#00788 (中國鐵塔) 及#1177(中国生物製药)賣出了，前者蚀约1700元，后者賺了150多元。在这段日子裡我也按您给我的意見，

加持了部份的股票，有時間請您抽空再给我宝贵意見。

2) 老師，按以上这个组合，我这个年纪应否到价時可减持或全賣出#01448(福寿園) #03067(安碩恒生科技)，会否造成组合不平衡呢？

3) 老師，另外我想问问#01928 (金沙中国有限公司)，这年头怎麼不公佈業绩的，这情況会对企業有影响嗎？还可继續投资？

4) 而#01310(香港寬頻)，我也希望到价時賣出，加持组合內其它的股票。

老師，請抽出您的宝贵時間多多指教提醒。

龔成老師︰

1) 現時這個組合，大致上可以。但緊記，這個組合不是永遠適用。你要按自己人生階段，慢慢將收息股比例加重，至退休時應佔100%。

2) 如果佢地去到好貴水平，你就可以減持(現價只是合理區上部，跟好貴還有很遠距離)。或者到你退休前2-3年左右，慢慢分段沽出，換成收息股，咁就可以。

3) 中期報告，佢往都係8月尾先有，至於2020年全年業績己在2021年3月公布。上年受疫情影響，出現虧損，但相信只係影響集團中短期，長線投資價值依然存在。

4) 香港寬頻（1310）主要在香港提供固定電訊網絡服務及國際電訊服務，以及產品銷售。

業務發展不過不失，中短期較一般，之後會好翻D。

整體來說，長線投資仍可，雖然增長力唔算強，但作為收息股係可以。而且你持貨不算多，唔建議你沽出

------------------------------------------------

Q22504：

龔老師你好，我於去年買入了一些股票，部分買入後幾日就可以倒蝕，當時問過老師意見，希望到一定價位後放出，但一直未有機會。

直至近期差不多全倉紅了，而我亦認為月供股較適合我，但希望老師指點一下如何處理持倉的股票，謝謝

京東健康 6618 $146 ，550股
小米 1810 $28.35 ，600股
東亞銀行 0023 $16.8，600股
云想科技 2131 $12.08，1000股
清科創業 1945 $19，800股
中策集團 235 $0.25，20000股

龔成老師︰

你太在意個買入價和帳面數字，完全錯左焦點。

你唔好再用買入價，作為判斷一隻股票優劣的標準。你應著眼佢本身有無質素，如果有，中短期價格波動，令到出現帳面虧損，係無問題，照可以長線持有。

但如果係無質素，就算而一刻是賺定蝕，你都要將佢沽出。重點分析的地方，係企業質素，而非股價上。

小米(1810)係有質素的潛力股，若你係年青至中年人士，這股適合長線持有。

京東健康(6618)、云想科技(2131)和清科創業(1945)唔係話無投資價值，只係不確定性較高，你現時只有好少貨，其實你可以長線持有都得。

但京東健康(6618)就持貨太多，就算一般優質股，我地都唔好持有過多，大約佔組合15%好了，行業上限則為30%，以免出現過度集中性風險。故你要將6618沽少少，換至其他股票，去平衡個組合。

東亞銀行(0023)和中策集團(0235)質素一般，建議你分段慢慢沽出，換至其他優質股。

其實若果你無太多投資知識和經驗，對企業估值，點去定平貴不太了解。先利用月供模式去做增值，可以減低買貴貨風險，對你而言會較理想。

假設你係年青至中年人士，你可以用「平穏增長股」 + 「潛力股」的組合。如果你係偏年青，比例大約可以去到各一半。

但由於「潛力股」有一定波動性，較適宜年青和有投資經驗人士。若你投資取態較保守、經驗較淺或者較接近中年，「潛力股」比重就要相對下調。

現在你每月先用5成儲蓄做月供。其餘先儲起，用一邊月供一邊儲蓄的策略。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

------------------------------------------------

Q22505：

謝謝老師，明白的。如果有一百萬作投資，分注的話，又估計會下跌，是如何分注？

龔老師，我老公叫我全部公積金（4成都係股票）轉現金。我覺得無必要，因為我的股票部份是港股，而且市一定會反彈的。

但是，我快退休，會於明年1月攞番公積金。請問你可以俾我意見嗎？我很不開心，因為工作多年不開心，難得做了決定，現在為賺錢又不退休，非常難受！

我身體不大好，因為多年壓力，不是一般人可以忍受的。

龔成老師︰

若你明年頭就退休，餘下可投資時間不多，公積金組合，真的不宜持有太多股票。你要開始慢慢將佢地換成較保守組合，例如債券、現金類基金。一切以保本為主，之後取回相關資金，再投資收息資產。

但記住唔洗一次過轉晒，分段咁去做會較好，可以平衡價格波動風險。

另外，我地唔好估個市走勢，無人可以估到佢中短期，幾時跌，幾時升。我地只會用股票平貴，去定我地投資策略。

現時大市在合理水平，你100萬可以先用30-40萬，慢慢分注買入我之前講的收息股。餘下資金，就等有再明顯回調，才慢慢加注。

配置比例上，唔洗諗得太複雜，平均分配在我推介你的收息股就可以。只要唔好偏重個別企業或者行業，比例控制在分別15%和30%以內，咁就可以。

辛苦日子將會過去，好好配置財富組合，去享受將至的退休人生。

------------------------------------------------

Q22506：

感謝龔sir意見！因為巴菲特都非常推薦投資者購買ETF，所以我想多了解一下ETF，龔sir在你的股票班中只有在初班有提及到ETF，

當中你提到NAV值，因為財經網站上提供的NAV值都是有延誤的，所以必須自行計算現時的NAV值。

我以安碩恒生科技（3067）做例子，想麻煩龔sir你睇睇我有冇計錯。

8/18恒生指數收市價 25867.01
8/16恒生指數收市價 26181.46

8/18 安碩恒生科技 現價 12.97

8/16 安碩恒生科技NAV 13.416

計算恒生指數8/16和8/18的差額
25867.01 - 26181.46 = - 314.45
- 314.45 ÷ 26181.46 = - 0.012 （-1.2%）

恒生指數差額為 -1.2%

再將NAV值 × 恒生指數差額
13.416 × -1.2% = -0.16

13.416 + (-0.16） = 13.256

8/18安碩恒生科技的NAV值是13.256

比較今日收市價12.97，NAV值大於收市價即代表此刻市場低估此ETF價值，是一個買入的訊號。但是我要如何得知此價是應該大手買入還是小注買入呢？

如果我想多了解一下ETF，請問有冇書籍或者網站可以介紹？

謝謝！

龔成老師︰

你唔應該用恆指去計，而要用恆生科指數數去計！

至於當中的計算模式，和得出ETF被市場低估這個結論，係正確。

但係抽取數據作比較時，就有問題。我地係決定用那個數據，同該ETF比較時，要留意有無比較意義。

你現時分析對象係安碩恒生科技(3067)，是30間科技公司的ETF組合。而恆指，則是60間藍籌企業，當中包括科技股以外，多個不同行業。故2者係有根本性的差別，用來比對其誤差，就有失穏當。

你應該用恆指科技指數，去做比對對象。因為3067，就正正係追蹤這個指數。

8/18恒生科技指數收市價 6226.69
8/16恒生科技指數收市價 6420.14

即大約 -3.0%。

而8/18安碩恒生科技股價$12.97，和8/16安碩恒生科技NAV$13.416，差距都是 -3.3%。故ETF3067跟大市，大約只有0.3%的誤差，唔算係好大。

其實一般大型ETF，好少會出現較大誤差的情況。主要係一些冷門和不活躍的ETF，才有機會出現。

如果真係有較大折讓，而個ETF本身都有投資價值。你可以因應當時平貴，去決定注碼。因為我地唔係短炒，這個折讓純粹係多個機會，令你找到別人不為意的平宜貨。

------------------------------------------------

Q22507：

龔sir 你好，已經過左半年，希望老師審視我既投資組合

2800 @ 27.5 2784股
066 @ 44.5 1402股
2388 @ 28.3 1000股
1211 @ 44 205股
1177 @ 7.7 1200股

788 @ 1.28 18000股
178 @ 2.21 6000股
1212 @ 7.6 4000股
1257 @ 3.2 5000股

1972 @ 21.05 1200股
1928@ 27.8 800股
9618 @ 290 50股
3067 @ 13.9 800股

（1） 持股組合有沒有問題？需要改善？

（2） 持股數目會否太多？

（3）月供緊788仲可以繼續？

（4）想往後賣出2388/178，再轉去其他增長股，可以嗎？

（5） 現在科技股有回落，增持3067/9618得唔得

（6）增持1972/1928/1212/1257可以嗎？

謝謝老師指導

龔成老師︰

1) 無問題，你長線持有就可以。

2) 有少少多，最好集中係10隻左右。

3) 可以，但你預佢增長力無以往咁勁，算係潛力股和平穏增長股之間，依然有長線投資價值。

4) 中銀香港(2388)有質素，唔建議咁做。而莎莎(0178)唔係無質素，但比較受經濟週期性影響，不宜持有太多。如果你想換碼，可以等大環境明顯好轉﹐佢有較大回升時，減持少少。

5) 如果你資金較充裕，現時加小注都係可以。但若資金不多，可以等佢地回多少少先，才考慮加注。

6) 這些股票，現價都合理，你最好等佢回到同你上一注，係有10-15%回調幅度，才加注會較好。

另外，中國光大綠色環保（1257）其實本質不差。

睇翻佢的業務情況，長遠發展其實是一個大方向，但佢近年負債有所上升，加上市場擔心佢之後的增長力有所減慢，因此對這股的評價減少左。的確，負債與發展持續性，是這股的風險因素。

長遠來說，這股仍是有投資價值，但不建議太過大注。始終都有風險，同時可能仍會弱一段時期。

------------------------------------------------

Q22508：

龔成老師您好，又想找您問問題。首先，好多謝您回覆所有網友的問題，又會公開俾人睇，您的每個回覆都充滿了正能量，每次我唔開心都會不停睇您的帖子。

我27歲，一事無成，靠努力有4份工，接近番足7日工，每年TOTAL放10全日假都無，雖然D工都係兼職、炒散、正職係低人工的文職，月入都係共$15,000-$17,000左右。

睇左您個page2年左右，由短炒變長渣，由輸好多錢變打和，好多謝您。

現時股票有
12(佔投資組合13%)、
257(佔投資組合7%)、
386(佔投資組合9%)、
728(佔投資組合7%)、
1448(佔投資組合8%)、

1800(佔投資組合6%)、
2388(佔投資組合15%)、
3868(佔投資組合6%)、
3320(佔投資組合6%)、
1(佔投資組合23%)

Total $250,000, 帳面(-5%)

現金$120,000(全數可投資，不用作流動現金)，每月儲$8,300左右，每年股息約$11,000，全數會再作投資

股票好似有D多，但我唔會再買新股，目標係上述10隻股票，平均每隻佔投資組合10%

因為我成日為自己工作好唔開心，所以我目標31歲左右有100萬，之後唔再儲咁多錢，再搵其它開心工作。而果100萬希望之後每年複利息6%增長，

我65歲時就有6,800,000左右，加埋MPF應該有8,200,000，而退休後每年可以用$740,000左右(如果計2021年之後每年3%通帳，我65歲的$740,000即是現時的$240,000)。

如果我現時(27歲)根據每月儲$8,300左右，股票250,000左右，現金120,000左右，再複利息投資上述10隻股票，我31歲時可以有100萬的機會大唔大?

如果我31歲時有100萬，之後不儲蓄但不停複利息增長，我65歲時有6,800,000的機會大唔大?

最後，請問老師有沒有其它財務建議?

萬分感謝，無名的支持者

龔成老師︰

其實你最需要多謝的人，是你自己。因為"改變"唔係一件容易的事，要很大力氣、意志和自律性，才可以做到。

以年均回報6%計，你31歲時100萬，應該在65歲個陣可以升值至720萬。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你27歲這麼年輕的年紀，我會建議先集中係有增長力的優質股(除非你風險承受能力好低)，去累積一筆財富。

而我地以長線平均回報計，每年平均合理增值，大約可以去到10-15%。若以年均10%回報計，你這100萬到65歲，應該已經升值至2000萬以上，故成事機會很大。

我假設投資回報有10%（連股息再投資），你每月投資$8300 + 37萬資產，4年後大約會增值至100萬，配合到你目標。

但較大問題係，你現時持股中，不少是收息股(0728, 3868, 1800,0386)，佢地增長力較弱，主要係收下息，未必可以做到年均10%增長。建議你將部份換碼至以下增長股，同時月供部份，都係以有增長力股票為主。

你可以投資「平穏增長股」和「潛力股」，去創建一個增值平台。你每月5成儲蓄，即是用$4150做月供。其餘先儲起，用一邊月供一邊儲蓄的策略。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

現時大市只是合理區，你現有12萬現金和每月所儲倒的資金，就等大市出現一定程度的下跌，才大力度掃貨，然後長線投資。

到你退休時，將這些股票換成收息資產，去支援你退休生活開支，咁就可以。

------------------------------------------------

Q22509：

阿sir,想問下如果想股換股，因為資金不足

1. 857中石油（賺錢）
2. 788 中國鐵塔 （蝕錢）
3. 9960 康聖環球 （蝕錢）

其實係咪應該將蝕錢的轉倉？如果按質素我覺得可能康聖會係最差？初時諗不如用中石油轉，但如果佢係呢3隻當中最好質素，即佢賺錢能力較強，又冇理由攞佢嚟轉，求賜教，謝謝

阿sir想問呢隻1799可入嗎

龔成老師︰

其實現時係賺錢，定係蝕錢，唔能夠代表佢質素好壞，最終我地都要睇翻佢企業本質而定。

3隻當中，中國鐵塔(0788)最有質素，雖然增長力比以往弱左﹐現算係水桶1至2，但長線投資價值依然存在，建議長線持有。

中石油(0857)都算有質素，但這始終是商品企業，產品沒有差異性，只能賺取合理的利潤，不算是最高質的類別，投資價值中等，這類股不宜持有太多。

石油是商品，當中沒有差異性，佢地要將石油賣出，只能跟國際油價，這令佢處於被動狀態，沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由價佢會比較受油價影響，自主能力不強，加上油價中短期可以好波動。長遠增長力只屬中等，只宜小注投資。

康聖環球（9960）質素同樣只算是中等。

佢主要於中國向醫院提供6個主要專科領域（包括血液學、遺傳病及罕見病、傳染病、腫瘤、神經學及婦科）的臨床檢測服務，亦提供ＣＯＶＩＤ－１９相關檢測服務及常規檢測服務。

佢亦向合約研究機構、臨床試驗贊助商、製藥公司及研究機構提供臨床檢測服務、諮詢及評估服務，以及標本儲存服務。佢係在武漢、北京、上海、成都、天津及烏魯木齊設有7個實驗室。

其實質素都有的，但不算好高，企業獨特性未算好強，以及這刻佢在虧損中，往後的發展仍有較多不確定性。這類股都一樣不宜投資太多。

如果你0857和9960持貨佔組合較多的話，你係可以沽少少，換至其他優質股。

但緊記我地創建組合時，唔好太集中係單一股票，要平衡。個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

在創建組合初期，組合金額較少，出現超標都係可以接受。但長線你要參照這指標，去維持組合的平衡性，才算理想。

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22510：

老師你好，現年已經27歲，收入35k-45k左右，感謝老師一直以來的意見，現已累積超過100萬的資產現持有以下資產：

股票約60萬左右；

銀河持有2216 股，平均價為55.5；
港鐵持有1888 股，平均價為41；
中國鐵塔持有56814 股，平均價為1.22；
中生製藥持有6444 股，平均價7.7；
比亞迪持有258 股，平均價為48.5；
錦欣生殖持有1144股，平均價17.3；
盈富基金持有9148 股，平均價25.4；

現金10 萬左右；

派息基金Z07 24萬左右（五年內離場要手續費，所以至少放五年，平均每個月7%息）；

危疾（有儲蓄成份，為期25年）、醫療（消耗）以及儲蓄（為期10年，每月$3000）一年合共保費大約6～7 萬；

央積金大約4 萬（政府每年如果有盈餘會加注幾千，到65歲才能拿）；

1.請問以上股票是否有質素可以持續月供？如仍有質素，以上股票比例上需要調整或加入什麼，可以有更大收益？

2.在以上各方面配置中，老師有什麼建議？（風險承受程度中上）

龔成老師︰

1) 現時股票都有質素，但錦欣生殖(1951)不確定性較高，而且現價偏貴，不宜月供。

比亞迪(1211)現價偏貴，最好回少少先重新月供。但如果真的好想儲貨，同時現金足，現價以小注模式去月供，都可以的。

又或者可考慮GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

2) 以上持股配置，問題不大。只要你跟我建議，調整一下月供計劃，咁就可以。

但你27歲很年青，應以增宜為主，派息基金增長力不高，其實不太適合你。但由於離場要收手續費，你照持有都可以，但唔好再加大投資。

------------------------------------------------

Q22511：

！我已經預留登記了星期六班，希望到時學到知識可以識運用！

龔sir, 可否多問一樣關於派息基金，因為這陣子很多不懂投資的同事/ 準備移民，諗住留筆錢比在港父母的朋友都向保險公司買呢類每月派息的基金當家用比父母。

請問您覺得這類型投資如何？值得作為資產配置的一部分嗎？謝謝

龔成老師︰

這類派息基金，其實分好多種，性質上可以成為退休人士資產組合的其中一員。

但問題係，你要明確知道，這些基金派息率是否保證。另外，基金本身有無賺息蝕價的風險。

用這種方法去支援留港父母生活，係一個方法，但必需了解清楚背後條款，以免失算。

------------------------------------------------

Q22512：

我努力睇你既野.可否分柝我既分配是否有問題. 我覺得無咩收息.....加唔肯定幾多錢入注。

2000sh [email protected]高價今明年內賣?
200sh -9988
200sh -1833需再入注?
600sh -0823 應幾錢再入@59.15/66.45
1000sh [email protected]應幾錢再入

以上兩隻我之前等現在升哂
3000sh -3067
500sh -6993
150sh -2807
20000sh -0788
[email protected]可再入注？

應該入金沙?0548/0778？ 收息?

龔成老師︰

我地投資股票，其實等同投資一間企業。希望透過其自然增長，以達至財富增值的目的。所以，我地投資一定係長線，而唔係短期炒賣，去賺差價。

你上述股票，都係有質素(2807相信係打錯編號)，若你係年青至中年人士，這組合係可以長線持有。

除非佢地去到好貴，或者質素變差，否則係唔需要沽出。因此，你3088照長線持有就可以。

至於平安好醫生(1833)佢有質素，但不確定性大，唔建議持有太多。

而領展(0823)有質素，你每注相距大約10-15%咁入就可以。但留意任何股票，都要控制個比重。同一行業或企業，不要超過組合15%和30%，以免有過度集中性風險。

港鐵(0066)現價在合理區中上部，你有貨在手，除非你資金好充裕，否則等佢有明顯回調才加注，會更好。

ＧＸ中國電車ETF（2845）現價在合理區頂部，暫時不宜大注，你等佢回多10-15%才考慮。

另外，你有個較大問題，就係你而家太偏重左係潛力股(3088, 9988, 1833, 3067, 0788, 2845)，佢地雖然有增長潛力，同時風險都較高，不宜持有過多。

假設你年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。

------------------------------------------------

Q22513：

龔SIR, 想問你關於你當時還在儲貨比亞迪既時候, 你話曾經比亞迪試過由$88跌到$12, 想問你當時有冇諗過自己既決定係錯?

因為 公司股價跌,跌左再溝, 又跌再溝, 有好多時會越溝越錯,所以先了解下你當時對比亞迪既諗法係點? 因為當時0幾年既時候

如果電動車將來因為技術上或者其他原因普及唔到, 好可能對比亞迪尼間公司成個諗法就錯唒, 所以好想知你當時考慮左咩因素去決定繼續增持?謝謝你龔SIR

龔成老師：

睇長遠價值，不是睇短期股價。

十幾年前，我已大量睇電動車行業資料，分析行業及技術發展，我見到電動車的最大問題，就是電池技術與配套。

如果這兩大因素解決，電動車一定能普及，因為佢比用油平好多，同時更環保。

然後，我分析電池技術與配套，這兩大因素，中國的配套在近10年間，不斷建設，例如充電設施等，在全球行得較多，多年前已相信，中國這方面的配套成熟，是遲早的事。

之後就是分析電池。

比亞迪（1211）本身就是造電池起家，之後再造車，是全球擁有較高電池技術的車企，其實佢的電動車，2007年已出產，當時已見到唔算差（雖然與市場化有距離），但佢過往的電池研發好強，因此可以推論，只要比時間佢，電池技術一定會提高，因此成功只是時間問題。

我地分析，一定要著重大方向，多年前，當其他人仍停留在「比亞迪的車會爆炸」，我就是分析，這個爆炸的原因是甚麼，是否核心因素，還是能解決的問題，我以「長遠的角度分析」，而不是這刻，我見到佢受短期不利消息，令股價大跌，就會增持，我從不擔心佢股價跌，因為我集中睇企業。

投資潛力企業，就是「這刻未成熟時買入，耐心持有，等企業成長」，所以，我地的分析點一定是長期。

------------------------------------------------

Q22514：

龔成老師你好，暫時冇乜錢，買住一隻先

3067係咪應該長期持有？

龔成老師︰

安碩恒生科技(3067)可以，這隻股票有質素。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

這基金上落較大，現價大約在合理區頂，因此，這刻不能大注投資。

最好的策略，就是月供，或自行分注小注慢慢收貨（例如每月買一次、或2個月買一次），總之慢慢入，不能用盡現金，原理如同不斷儲貨，這樣就能平均買入價，減少風險。然後就長線持有。

你現先買一隻，係可以。但長線計，我地唔好成個組合，只集中係1,2隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

------------------------------------------------

Q22515：

龔sir, 父母50多歲，冇任何保險，如果基本保險要每人2000蚊一個月左右，係唔係都最好買？

龔成老師︰

其實保險係我地理財中防守部份，主要係將一些健康風險，轉移比保險公司。所以，保障型的保險，我地係需要的。

至於$2000值唔值，你要睇翻本身個保障，係唔係真係切合你家人需要而定。

若係儲蓄類保險，我就不太建議，始終增長力不及優質股。除非你本身好保守，或者完全唔識投資，否則就不太建議。

------------------------------------------------

Q22516：

龔sir，你好！一直有關注你嘅post、YouTube Channel ，每日會花一小時去睇你解答問題同研究點可以令自己在股票市場進步，去學長線投資，

現時手頭上新經濟股比較多，都係年頭高位買入，想請教一下你嘅意見！

本人手持150萬左右現金，尚有250樓按要償還，月入3萬+，目標係3-5年後還清樓按再購入600-800物業，股票資產50萬，另100萬現金流

手持股票如下：

9988@270 400股
700@674 100股
388@499 100股
[email protected] 6000股
[email protected] 100股

[email protected] 7000股
6185@344 200股
[email protected] 5000股
2400@95 600股
[email protected] 3000股

好多股票都係高位買入，組合亦比較亂，想問應該如何再配置？等升返還是放部分等底位再吸納？

最後想同你講聲多謝，一直keep住睇你嘅post 令我自己都不斷去學習，以前上網無所事事咁過，依家會多思考點去進步，令將來的生活變得更輕鬆，

我相信越努力越幸運，多謝你令我思考點去做個有錢人，而唔係單單停留喺「想成為有錢人」嘅階段，呢啲都係睇你post學返嚟，哈哈，再次衷心謝謝你花時間睇我嘅留言

龔成老師︰

我地持有一隻股票與否，只會睇佢長線質素。同時我地唔會因為買貴左，就先沽出，等平D買翻。因為中短期走勢好難估，會受很不多因素影響，有些因素甚至係同企業本質無關。

如果你而家沽左，無人可以保證佢係唔係會再回，佢可能一直升，咁你就要用更高成本，才可以買回這隻優質股。

你現時持股，都係有質素，應長線持有。但有個較大問題，就係比較偏重潛力股。佢地雖然有增長潛力，同時風險都較高，不宜持有過多。

同一行業佔組合的比例，不宜多過30%，如果你上述有些行業過了這比例，就要減持。

另外，見你不少股都在貴的價位買入，你要大幅強化企業估值及投資時機的能力，又或日後多用分注、月供等投資策略。

如果你係年青至中年，潛力股可佔約4-5成，餘下應用以下平穏增長股。若你投資經驗較淺，潛力股比重，要再調至2-3成以下。到你學到一定投資知識，才慢慢調高。

現貨可以不用沽，但未來時間，你就要加大翻平穏增長股部份，令組合更平衡。以下平穏增長股，現價合理，已可分注。

另外，微盟集團（2013）、心動公司(2400)、康希諾生物(6185)和中國飛鶴(6186)不確定性較高，不宜持有太多。

現時大市在合理水平，你可以多用30-40萬，買入一些平穏增長股。餘下資金，我地就等大跌市，才出手掃貨。

至於物業投資方面，現時按息很低，你唔洗急住清還樓按，反而應該用資金去投資，爭取更大回報。

而投資第二個物業時，緊記要確定買樓同時，你留有一定優質股作增值。否則，你成個財富組合，就會偏晒去物業個邊，造成過度集中性風險。

記住，投資路上係要一直保持學習，長線回報才會好。加油!

------------------------------------------------

Q22517：

老師，可唔可以講解下1825同2944。如果跌到0會點架？

龔sir, 我最終賣咗0136， 另外一隻1825，止蝕離埸，蝕左20万

好彩還有隻1211 保住，15x-17x 入手，入咗6 手，仲有D小注0285，1830，2388， 3319，3918 ， 坐艇。我以後都聴晒你講。

龔成老師︰

美臻集團（1825和2944）過往業務一般，之前因為有炒作，現在只係回調翻去較合理水平。不過以業務發展來分析，這股的投資價值，只是一般般。

正常股票唔好跌到零，點到有些剩餘價格。但由於這股質素好一般，你沽出都係可以。長線換至其他優質股，回報會更好。

至於餘下持股，都係有質素，你可以長線持有。

但組合現時較偏重左係潛力股(1211, 0285, 1830, 3918)，而且非常集中比亞迪系股票，佢地雖然有增長潛力，同時風險都較高，不宜持有過多。

若你偏年青，潛力股可佔約5成，餘下應用以下平穏增長股。若你投資經驗較淺或較近中年，潛力股比重，要再調至3成以下。

未來時間，你就要加大翻平穏增長股部份，令組合更平衡。

------------------------------------------------

Q22518：

你好龔Sir ，你對ESG 投資有咩睇法？邊隻股票好值得投資

龔成老師︰

ESG，就代表環境、社會及管治。是近年多左人討論的一個項目。

這部份係一些非會計上的因素，而這些因素，係有機會影響企業長線經營和發展。

投資者過往選擇投資項目，主要係分析企業長線盈利表現。但近年已開始愈來愈重視ESG，企業能否在賺錢之餘，對社會和環境作出一定貢獻。

而且，全球法律改變，人們對環境關注度增加，都令企業對ESG的實踐造成推動力。但現時亞洲ESG未算好普及，主要都係一些歐洲企業，佢地對ESG關注度會較高。

其實我地係分析企業時，除了財務數據，我地都會分析企業和相關行業本質，如果ESG因素係對企業有長線影響，我地都應該將佢加入估值考量之列。

而我分析無特別用ESG表現，去做分類。但ESG比較多人關注會係綠色能源，你可以向這方向找投資機會。

------------------------------------------------

Q22519：

你好， sir 1.其實700 我453入貨有無錯？

1.其實700 我453入貨有無錯？
2.下一级支持位在哪？
3.rsi 好似無乜用
4.牛熊分析恒指没乜用
5.恒指25000是否有支持？
6. 700,6618那個較好可以吸？

Thx you

可否比d意见

我又放左

龔成老師︰

1) 騰訊（0700）你買入價合理，但你預佢中短期會較弱，長線持有就可以。

2) 我唔會睇支持位，只會睇企業質素，去決定長線持有，還是要沽出。

3) RSI係一些技術分析，只係短炒架人用。我唔建議你用短炒方法去投資，因為中短期會受好多因素影響，只有長線持有，才可以有效反映企業價值出來。

你見全球最賺錢的投資人巴菲特，去都係只會長線持有優質股，唔會做短炒或者用技術分析。

4) 牛熊分析，可以作參考，但實際用途唔大。因為其走向不一定順序的，因為有好多外在因素影響，我不會用「預期」的方法，去估股市、股價點發展，

我只會用「測量狀態」這方法，分析現時處甚麼位置，從而作出策略，但就不會預測。

5) 25000點算係合理區較底位置，有一定值博率。但都要睇翻個別企業平貴，因為大市在合理水平，唔代表企業都一定係合理價，有權可以係好貴。

6) 騰訊（0700）算係合理區中部，而且整體質素都較高，值博率會較高。而京東健康（6618），不確定性較大，無貨現價可小注，但長線不宜佔組合太大比重。

------------------------------------------------

Q22520：

抱歉老師，我發現自己打錯字…是0688 （中國海外）15.3入2000股

不過謝謝老師的詳細解答 我是因為看過老師在fb的發文或閲讀過老師的書籍才有些少能力判斷某些公司的前景。縱然現在大市回落一些，但仍然二千元盈利。

我家人説很多人在這段時間都是虧損 所以還得感謝老師

其實建行是我還在在學期間聽信祖母的意見買入的 現在 家人也建議我待它升回6.X元時便會沽出所以股分。我也有這樣的打算

因為在學期間沒有很多的收入，不太敢輸錢。所以只是把積蓄放在一些收息股上

龔成老師︰

中國海外發展（0688）不是無質素，在發展商來講，不算最強，長遠有平穩增長的能力，前景都可以。

睇翻佢的財務數據，基本上都是正面的，但生意增長力不是好強，見佢過往的生意都只是平穩，而整體都有投資價值的。

可以視這股為平穩型的企業，中短期可能因樓市一般而股價一般，但長遠，仍是可以的，你可以持有。

至於投資初期，買一些波動性較細的收息股，其實都係可以。但由於建行(0939)你持貨都唔少，為免佢過度拖低你組合增長力，你都係沽少少，換至其他我之前建議的優質股，咁會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q18841-Q18860）

Q18841：

你好，唔明你點解成日叫人供盈富，回報應該唔高？

龔成老師：

其實盈富基金的作用，是「平衡組合」，我見你好執著盈富回報率，但盈富原理就是持有50隻股，目的就是分散風險，好多時只要求基本的回報就得，你唔好太執著這些野。

我過往做了10年銀行及證券行，見好多散戶自行選股，都是輸多贏少，反而長期月供盈富的一群，是有錢賺的，並不是太錢，但比起大部分虧損的散戶，這算是不差的成績。我地投資，「適合」自己都好重要。

好果你想有較高增長，可考慮月供安碩恒生科技（3067），當然3067的風險比2800大。

這基金追蹤恆生科技指數之表現，而恆生科技指數，都是一些有質素的潛力股，例如阿里（9988）、騰訊（0700）、小米（1810）、美團（3690）等的新經濟類公司，長遠有潛力。所以有長線持有價值。由於基金有30隻股票，比起單一股票，風險能減低。

不過，現價都唔平，大約在合理區頂，因此，這刻不能大注投資。最好的策略，就是月供，或自行分注小注慢慢收貨，原理如同不斷儲貨，這樣就能平均買入價，減少風險。然後就長線持有。

------------------------------------------------

Q18842：

老師:你好, 最新才於網上認識看你的資訊, 買了本80後.. 不過不太識選股, 炒來炒去都左手交右手咁, 想學習你長線投資增加收入

以50萬部署較進取的股票組合 ,可否建議現時可選擇哪些股份投資. 謝謝

龔成老師：

短炒唔會賺錢的，你之後調整翻，集中翻長線投資就得。我地投資的原理，就是將現金轉換成優質股，建立一個長線的財富組合，這是一個配置的過程。

有質素及有增長力的股票，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比較高左，有風險，你要自己平衡。

不少都要等回少少先入，因為部分仍貴。

上述可以是方向，但就唔好心急一次過入，要慢慢分注，或等。

另外唔建議組合全部集中在這類高增長，建議加入一些較平穩的類別，例如盈富（2800）。可以平衡你整個財富組合。

------------------------------------------------

Q18843：

謝謝老師，但想追問下銀河娛樂00027同金沙中國1928這2隻，為什麼老師您選的是金沙中國？

還有一隻2883中海油田服務想老師分析下俾啲建議，我6.3入左5手

老師我看完您的年報勝經了，好深奧，我現在還沒看致富藍圖和股票勝經，準備看過再回來再看一次

龔成老師：

銀娛（0027）金沙（1928）兩隻都是優質股，你投資任何一隻都可以，可長線。銀娛增長力較高，金沙較穩健及派息高，由於我想在組合中，增加一些較平穩的股票作配置，因此最後選了金沙。

中海油田服務（2883）質素中等，未算強。

佢係中國近海市場最具規模的綜合型油田服務供應商。
佢的服務貫穿海上石油及天然氣勘探，開發及生產的各個階段。業務分為物探勘察服務、鑽井服務、油田技術服務及船舶服務。

雖然佢都有一定的規模，但卻不是最高質素的企業，這是由於佢的產品自主力較弱。

石油是商品，當中沒有差異性，佢地要將石油賣出，只能跟國際油價，這令佢地處於被動狀態。沒有價格自主的能力，這令佢地的獨特性有限。這類商品企業，都可投資，但就要明白不是最高質的企業。

由於質素中等，唔建議大注投資，但相信油價上翻佢會上升的。

《年報勝經》是較深的，建議你先睇《股票勝經》，打好基礎先。

------------------------------------------------

Q18844：

成哥 你好，請問移卡作為長線你默睇

同埋1317楓葉教育

龔成老師：

移卡（9923）是有風險，有潛力的類別。

首先，佢的業務為一站式支付服務，包括基於應用程序的支付服務及傳統支付服務，並支持逾500款發卡機構的移動應用程序，以支付為基礎的科技平台。

其中包括微信支付、支付寶或雲閃付，涵蓋了中國大多數的電子錢包。

另外，佢業務亦有科技賦能商業服務，即是提供商戶ＳａａＳ產品（包括實時庫存管理、消費者關係管理、智能訂單管理及全方位僱員管理）、營銷服務（包括量身定製的精準營銷及客戶忠誠度計劃電子工具），以及金融科技服務（包括助貸服務、委託貸款及保險轉介服務）等增值服務。

睇翻佢的財務數據，增長快速，但業務變數大，行業有不確定性，估值上比較難，這一定會令股價上落大，這刻仍唔平，投資值博率只是一般。

你預佢有潛力，同時有風險，如果控制注碼，都可以小注投資。

至於楓葉教育（1317）本質不錯的，但增長力在近年的國策下，的確弱左，長遠仍是正面的。教育股之前熱炒，然後就因政策等風險而冷卻，慢慢由高位回到正常水平。

由於市場擔心企業之後的增長力，令這股的股價較弱。因為佢過往增長快，但在政策風險下，最影響的不是現時的業績，而是之後的發展，令增長力減慢。

以一間平穩增長的企業來計，現價已是合理價，現時可以理解為合理區中下部，但就唔建議投資太多。

------------------------------------------------

Q18845：

請問老師課程是實體上課嗎？有沒有機會可以同時有視像上課呢？因為我在新界工作，要七點去到灣仔有點難度呀！

又請問老師對我來說值唔值得買柏傲莊的細單位來投資呢？

龔成老師：

我有可能在下年，開一個有關於資產配置的網上課程。

至於股票班，由於內容太重要，暫時唔會。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

柏傲莊，地點有質素，我在《5年買樓4部曲》都有講述香港其中我幾個睇好的地區，大圍是其中一個。

可以投資的，當然要睇呎價。

------------------------------------------------

Q18846：

老師我想請教你一個問題

我而家有屋住、唔使供、有一個女（已長大）咁我自己2016年買咗間細屋平租比自己人、仲要供的、而家自己人準備唔租

你覺得我應該繼續放租定賣咗去、攞D錢放入收息股、錢滾錢好呢，請老師解答

龔成老師：

從方向上，賣出物業再將資金投資收息股，是可以的，因為這會增加你的現金流，始終現時收息股回報率，高過收租回報，因此投資收息股，在配置上是較好的。

不過，由於香港買樓物業的成本高，你賣出後，未必買得翻，因此你決定是否行這一步，要從長遠的財富配置角度分析，唔好只是睇這刻的情況。

你要從長遠角度分析，自己是否不需要這物業。

------------------------------------------------

Q18847：

老師，之前你講過我既投資太過單一,著重左物管同內房,所以單一風險過高。但如果我現在加入一d未有投資過同之前未有留意既股又是否有點兒兒戲?

我聽到投資自己較為熟悉的板塊是比較好。你會唔會有咩板塊會推介初學者入手?

龔成老師：

你投資前，一定要完全了解，要熟識的項目，同時要有質素，不能為投資而投資，在你了解、優質的前題下，就可以進行財富配置，令你的財富組合更平衡。

如果你未能認識，最簡單就是投資ETF，盈富（2800）、安碩恆生科技ETF（3067），已經能助你風險分散，而你買入時，要慢慢分注，或月供。

------------------------------------------------

Q18848：

老師你好 我今日先第一日第一次買股票⋯ 我買左隻6860 其實我都唔識睇都唔明點解會咁多資金流入 啲人話會反彈 是嗎？

我本小所以想買下仙股試下⋯呢隻ok？

龔成老師：

指尖悅動（6860）係中國一家手機遊戲發行商，主要向遊戲開發商提供一站式解決方案，包括遊戲的營銷等，睇翻佢亦通過第三方授權及委託第三方開發之方式從事遊戲開發業務。

業務有波動的風險，這是行業的特性，會令股價較波動，對類股對投資新手並不適合。而佢整體的質素亦只是一般般。

另外，你買股票是買入一間企業，資金流只是影響中短期股價的因素，根本無分析價值，你行錯晒方向。

------------------------------------------------

Q18849：

龔成老師你好，我今年36歲，對股票不熟悉，用了多年的積蓄買了自己2199，可惜蝕了

請問老師我應該怎樣做？
應該捨棄，還是繼續等待？

龔成老師：

相信你現時過度集中在這股，這是投資的大忌，因為我地投資，並不是「博」，而是建立一個平衡的組合，在可承受風險程度下，去盡力爭取回報。

因此，單一行業只能佔股票組合的30%，單一企業只能佔15%。

維珍妮（2199），其業服務主要為研發；設計與製造貼身內衣和功能性運動類產品。

過往業務大致平穏增長，整體賺錢能力唔算好強，算係不過不失。負債過高，會係一個扣分位。

整體而言，質素算係中等，有投資價值，但不宜佔比重太高。

你絕對唔好再加注，之後就算等佢業務環境好轉，希望過1、2年後，經濟好轉D，佢業務好翻D，到時你就減持部分，平衡風險，餘下的就再到時睇情況去守。

------------------------------------------------

Q18850：

龔SIR你好! 最近才認識和留意你的文章,希望你可花一點時間看看或給一些小小意見就好了.

我今年已經34歲,早在十多歲的時候因經濟問題無法繼續升學, 以往對金錢概念沒太多,一直就是先解決現在的狀況.

所以,至今我沒累積很多財富,現金只有40萬左右. 其實一直我也有個留學夢,不過計算過一年可花費HKD20萬就卻步了.

因要在這個疫情放棄一份收入不錯的工作, 年紀也不小了. 當我想到這裡就會想: 可以早點明白金錢的重要就好了. 現在我都是一點點學理財. 由於對數字不敏感,往往我都是"婆仔"式投資.

做些保險儲蓄, 買了1手0005而已. 雖然如此,但我對留學這件事還未想放棄,利用疫情這段GAP的時間,希望善用多1年時間累積多點資金再看看這個夢是否想繼續.

希望你可以給我一點意見去怎樣處理財富較為有效, 至少留學回港後還可支撐一點時間來找工作. 謝謝你的時間! 祝安康!

龔成老師：

你要做兩樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。《股票勝經》適合初階者的。

同時，我建議你大量增加理財知識，這對你長遠好有用。

投資，是一個配置的過程，你要建立一個平衡的組合，投資優質股，長期持有，當中要「平衡」，不能只集中個別股。

第二，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

其實，你34歲，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你有基本知識後，可以再考慮以下股票：

銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18851：

你好 有關1044 報表想請教

係morningstar 睇到 1044由2010年到2020年 revenue, operating income, net income, EPS 都穩定上升, ROE更是年年20%,
為何股價10年間都係橫行？

謝謝！

龔成老師：

恆安國際（1044）不差的，佢主要業務為在中國生產，分銷及銷售個人衛生用品，零食產品及護膚產品。

你見佢股價增長不強，主要是過往市場對佢有太大期望，因此一早已反映左佢的價值。到近5年，你見佢的生意與盈利，雖然都有增長，但力度不算強，因此市場對佢的估值都有所調整。

------------------------------------------------

Q18852：

我想問龔sir，點樣由短炒變成長線當中嘅重要秘訣係咩？

因為我都明白，但尼方我點樣轉變自己嘅心態?

另外想問龔sir長期持有嘅意思係最少持有五年，咁如果本身資金唔多，好難達成財務自由？

因為5年時間要好有耐性，如果係持有2年以上算係長遠投資？

同埋會唔會目標價？

龔成老師：

我1999年開始投資，頭幾年短炒同用技術分析，輸得多，開始問自己，其實呢種方法得唔得？雖然人人用，但未必真係得。

之後，我再睇更多成功投資者、基金經理的書，發現佢地都唔會用短炒！

我之後就開始用長線投資，最初都有少少忍唔到，但當我不斷睇成功投資者的書時，就愈提自己要堅持。之後開始訓練自己唔好睇股價，例如一個月唔睇股價，學心理因素的訓練。

最重要是大市上落，股價上落，你要好平常心，唔好比佢影響，呢一點好難，但你訓練1、2年都可做到，香港散戶基本上做唔到呢點，所以佢地輸多贏少。

最好當然持有5年，但你都可以試下訓練2年先。

你有一些核心概念錯左，就是認為要賣出先可以做到財務自由，你仍停在現金概念，同一般散戶一樣，建議你睇《財務自由行》《股票勝經》，清楚翻現世代的財富系統先。

------------------------------------------------

Q18853：

我想問盈富其實買月供股定買一手好？
定因為係當長期用 買月股係再長線啲？ 定其實都係一樣

咁嘅話我先買一手會唔會回報一咁多

另外潛力股嘅意思係睇一啲新加入嘅股票睇有無得升?
定宜家現有嘅當例如騰訊再睇佢係咪有得升？ 咁係買一手定月供比較適合。謝謝

龔成老師：

月供會比較好。

月供股票就是你每月將現金，買入某一隻或多隻股票，慢慢咁樣儲貨。坊間不少銀行都有提供月供股票服務，你先開證券戶口，然後登記做月供股票。

形式就是每月投入相同的金額，買入同一隻或多隻股票，並持續進行。

例如，每月以相同金額$10,000 買入盈富基金（2800），假設第一個月股價為$25，就能買入400股；第二個月升至$35，就能買入286 股；第三個月跌回$30，就能買入333股。

總結這三個月，投入了的資金為$30,000，累積股票為1019股，平均買入價為$29.4。

由於月供股票每月投入的金額相同，因此當股價上升時，買入的股數自然減少，而當股價下跌時，就自然會買入較多股數，如同自行調節一樣。

要注意的是，由於每月持續投入資金，因此一定要選優質股，長線投資，同時要以儲股票的概念進行，最少持續供3 年以上，之後持有5年以上。

潛力股，即是有較高增長的企業，佢地的業務處較高增長階段，股價會有理想增長，不過，由於市場變化一般較大，所以股價的波動都會較大。

------------------------------------------------

Q18854：

我睇完龔sir 既股票勝經，黎緊會睇你介紹既窮爸爸富爸爸，再睇你既選股勝經同年報勝經，我經常睇你facebook,覺得你講得好岩，我都想學到你咁叻，一向都唔睇書，宜家開始裝備自己

我成本書，現金流折現法呢part唔明，見到你講已經簡化左，我都理解唔到

龔成老師：

加油！其實我18歲時，都是零理財投資知識，都是當時狂睇書，知識不斷累積翻來，無人一開始就識，我只是過往多年努力的成果。

現金流折現法，其實好深的，你唔明都正常。

所有資產，都有當中的價值，我地都可以計出來，不過計算過程較複雜，同埋沒有絕對的計法，而現金流折現法就是其中一種，你可以理解，就是將這資產，往後產生的現金流相加，但由於錢是會貶值的，因此，就要將將來的錢，變成今天價值去計。

就算在我的股票班，都要花一定的時間去講，同學先明，你有概念就得。

------------------------------------------------

Q18855：

想問成哥，我成日見到你話留有現金等大市跌入貨，但我想問如果大市一路上升，咁我儲既現金又可以點做，係拎去投資定係應該繼續放喺度等，定係有其他方法？

另外通常我買一隻潛力股或平穩增長股應該係投資幾耐先睇到比較明顯既成果而去決定放唔放？你講既長線通常係幾耐？

雖然我都想上你既堂，不過而家要返學就吾到時間，我有買你既書睇，股票勝經、80後百萬富翁、財務自由行 呢3本，呢3本睇既次序應該點排？

龔成老師：

我地唔能夠100%現金的，我地會分析大市的平貴度，決定現金的比例。例如現時的大市，大約處於合理區，你要有一定的持貨，同時有一定現金。

當你每月有收入，就要部分入貨，部分留有現金。

至於留低的現金，就是等大跌市先會入。

因此，如果你這刻太多現金，其實都要適度買入優質股。

長線投資，一般指5年，最少3年。

你可以順次序睇：《80後百萬富翁》《股票勝經》《財務自由行》。

------------------------------------------------

Q18856：

我呢家27歲月入大概68k，手頭上資金因為以前亂洗同投機失利得200k到，計哂以下供保險，一個月儲到大概25-30k

其他資產：

保險既基金ard85k（月供2500有環球、美股、債券等等，算係進取既增值組合）

十年期儲保300k（供佐兩年，年供150k，因為之前某d原因買唔到有保險成分既product，預一舊錢將來做medical reserve）

十年期人壽80k（供佐4年，年供20k）

想係3年內儲夠1-1.5m買樓結婚，想問下點plan投資好？

龔成老師：

我地理財，最重要是攻守兼備，你現時已有適當的防守部分，餘下的就是進攻。

不過，由於你3年內希望用資金，因此又唔能夠太過進取，建議你集中投資平穩增長股，小注潛力股，相信這是較平衡及適合你的組合。

你可以做月供股票，每月$15000，又或自行分注投資。

你可以考慮盈富（2800）$6000。

另外再加2隻（每隻$3000）：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可加1隻（$3000），考慮：阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

我相信你要完成目標是可以的。

------------------------------------------------

Q18857：

龔成老師你好！我是一個70後，剛看完你的《80後百萬富翁》，明白了創富的重要性，雖然遲咗少少，但希望可以追得返，最後能達到財務自由。

我一直都有儲蓄，但可惜沒有創富，大部份儲蓄都只是放在定期，現在存款有數百萬。明白到分注投資可以減低風險，但以我現在的情況，怎樣分注才合適呢？

每月用固定儲蓄存款定時購入一些平穩增長股？謝謝老師指教！

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你是70後，財富仍然有增長力，但就不能太進取，應該要以「平穩增長」作為核心。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

上述股，你可以分注去入，慢慢將資金，轉為優質股的組合，例如每個月入一次，分注去人，將買入價平均。盈富可較多。

你可以將$100萬，分開1、2年去入。餘下資金，就等機會先入。

------------------------------------------------

Q18858：

龔sir你好，我想問一下富途證券行內的基金好唔好買得過？

我係90後 如果買基金 現在開始買A股基金 港股基金 美股基金 還是債券基金 還是混合型基金比較好？？

龔成老師：

基金有好多好多，你最重要了解佢的投資策略，持有的資產是否有質素，過往的表現時否能跑贏大市。

你可以投資一些ETF，管理費最少，同時只要有股票戶口就可以買賣，盈富（2800）、安碩恒生科技（3067）、南方Ａ５０（2822）、VOO、QQQ，都是可取之選，你可以分注投資或月供。

------------------------------------------------

Q18859：

老師，我最近重新檢視過我的財務狀況，發現我的保險保障並不足夠，聯絡了我的保險經紀

他建議我買一些定期的醫療和人壽保險以及終身的危疾保險，終身的危疾保有多次性的賠償（復發條款），似乎保障較足，但費用比定期的貴很多（所有的保費加起來會佔現在的人工（稅後）大約8.5%）

我上網看了很多資料，說保費佔收入的10-15%算是合理，但對於危疾險，有些人建議買定期的，有些則建議買終身的，兩者似乎都有道理

所以反而不懂選擇，想請問老師這方面會否有一些建議呢？先謝謝你了

想報你股票班，但出年的roster 還未出，想請問如果到時有些堂不能上的話，能否安排補課呢？

龔成老師：

保險，最重要是你的「需要」，因此每個人都不同，保險的原理，就是將的不想面對的風險，轉嫁比保險公司。

在理財上，我地應該買保險的，因為有防守作用，不過，足夠就得，不用太多。

至於危疾，如果你本身都認為自己想長期將這個風險轉移，就買終生。

股票班，我有補堂機制的，你某一堂上唔到，下次開班時，就可以補翻比你。我差不多每個月都會開一班，總之你預早通知我地同事就得。

------------------------------------------------

Q18860：

你好，龔成。我有以下股票。是否可繼續持有？及可否每隻評論一下買入之價值，是否合理、便宜、或較高？

1） 9988 $172.50
2） 27 $45
3） 1928 $ 28.20
4） 939 $5.49
5） 700 $352
6) 2628 $13
7) 1299 $48
8) 2018 $40
9) 2382 $80

因為本人主力都是買返藍籌股，大部份都是跌市時才買。謝謝回覆

龔成老師：

現時持有的，都是有質素的股票。

阿里（9988）、騰訊（0700）有增長力，可長線持有，現價唔算平。

瑞聲（2018）、舜宇光學（2382）有質素，但中短期較波動，長遠正面，現價合理區中上部。

友邦（1299）、中國人壽（2628）不差的，但增長力中等。建行（0939）只是收息股，無乜增長力。3隻大致都合理。金融類股唔好持有過多。

銀娛（0027）、金沙（1928），有質素，現價合理，可長線。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q16521-Q16540）

Q16521：

龔成老師，希望你能解答以下問題：

1）你是如何確定自己對企業的價值估計作出正確的計算？並且堅定不移地抱牢股票？

2）即使最好的投資人也會經常犯錯，可否分享一些你在使用價值投資法時犯下的錯誤？

3）你是如何確保自己能夠在正確的時間持續做出正確的事？

4）你會否考慮在星期日開班？

龔成老師：

1）企業估值只是一個概念，因為計算的方法有好多，同時沒有絕對的方法，這不是數學般（1+1=2），當中涉及一些主觀的預期，因此，不會絕對確定的。

我會盡量用幾種估值方法去進行估值，希望有更為立體的結果，但都會明白，無絕對的答案，因此都會考慮當中的不確定性及風險。

2）當然會有錯。所以我會建立一個平衡的股票組合，當中有不同類別的股票，因為我不是「賭一博」，而是明白每間企業都有風險。

我過往試過投資一間在大陸做廠的股票，因為當時見佢平，但其後佢股價向下，我發現佢獨特性不強，同時當年（10年前）中國成本不斷增加，佢無法將成本轉嫁比客戶，令企業盈利受壓，最後止蝕賣出。

3）首先要了解整個情況，分析分面，了解不同決定的可能性，而當分析完後，就是耐心等時期，這沒有絕對的答案，但知識與經驗就是最有助決定的核心。

4）因為場地問題，暫時未必，但都會研究下。

------------------------------------------------

Q16522：

龔成老師你好，今年26歲，啱啱碩士畢業開始揾工，遇啱疫情難揾工，揾到一份約15000嘅工作，打算短期返住先

希望邊做邊轉第二份月入較高嘅工，目前沒有儲蓄，同男朋友目標係盡快儲到40萬，同男朋友結婚，想請教老師以下問題：

1. 沒有儲蓄的我應該幾時開始進行月供股票較好？（先儲到一筆錢再開始還是一拿到薪水馬上開始？）

2. 除了月供股票外，有沒有其他我地可以做嘅穩健投資策略？

3. 老師建議你的著作閱讀順序係點呢？

多謝老師您抽空解答，希望之後可以報讀到您嘅班，對投資有更多了解。

龔成老師：

1）如果你現時完全無股票資產，你可以等你儲到基本的現金後就開始進行月供，基本現金就是你的備用現金，例如$20000（每個人都不同）。

2）你可以自行分注投資股票，例如每隔2、3個月入一手盈富（2800），這都是簡單的累積財富方法。

3）你可首先睇：

《80後百萬富翁》
《股票勝經》
《財務自由行》

之後再睇其他。

書本在三聯、商務、誠品都有得賣。由於部分書在一些書店已斷，所以若你見唔到，問下職員就得（又或向職員訂都可以）。

以下是我的11本書：

《80後百萬富翁》（第7版）
《80後2百萬富翁》（第3版）
《80後3百萬富翁》（第2版）
《財務自由行》（第5版）
《大富翁致富藍圖》（第4版）
《50優質潛力股》（第3版）
《50穩健收息股》（第3版）
《50值博倍升股》（初版）
《股票勝經》（第3版）
《選股勝經》（第2版）
《年報勝經》（第2版）

好，希望遲D股票班見到你！

------------------------------------------------

Q16523：

龔sir, 本人較睇好大灣區發展，想入手相關的中小型內房股，請問龍光3380、奥園3883（最近有沽空機構狙擊）、時代中國1233、易居控股（2048）質素如何，那些較穩健可作長線大額投資。謝謝解答。

龔成老師：

這些內房不是無質素，但部分的負債高，風險會略高，你要明白這點。

中國奧園（3883）負債極高，要較小心。

易居控股（2048）規模太細，風險略高。

龍光（3380）與時代中國控股（1233）算是較平衡，你都可以考慮。但由於負債始終不低，因此注碼上不能過多。

------------------------------------------------

Q16524：

龔成老師，我現在的情況，每月儲5000
有4萬蚊儲蓄，三萬去左股票度

買了中國銀行、交通銀行同匯控

話說已經接近三十歲，但覺得得幾萬蚊太小了。
請問我可以點幫d錢繼續增值？thanks

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，匯豐（0005）、中行（3988）以你的年齡來說，並不適合。交通（3328）算是勉強可以，但都不建議持有太多。

另外，你集中在同一行業，會出現集中風險，要調整翻。

其實，你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$4000。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16525：

老師你好本人30歲

現時有價值約50萬的月供股票(6隻股票，主力:盈富)
及8萬現金

打算利用8萬做中線投資

下列那一隻如果現時較值得考慮？
還是現階段應該保留現金？

0778置富產業
1883中信電訊
2007碧桂園

謝謝指教﹗

龔成老師：

因為你現金的比例不算多，現時大市未算好平，你最好持有現金。

至於上述3隻股票，置富（0778）較有投資價值，但現時你的現金比例，可以等佢大跌先考慮。

------------------------------------------------

Q16526：

你好 龔Sir,我27歲月入$28,000
先生32歲月入$52,000
現可以月儲$15,000

上年買佐自住2房樓(先生名) 月供$23,000
現金有$600,000 + 800股匯控 (@$50.75)

希望5年內可以有一間3房自住單位加一間1/2房細單位收租作長遠投資。想問現時應該如何令資產增值?

1. 如果想投資，現時股票市場仍可入手嗎?應該如何分配？

2. 如果樓價回落，買細單位做9成按揭。數年後再賣其中一間物業作首期換3房單位，可行嗎？

3. 另外 聽佐你新城財經台訪問 我之前都有留意平安好醫生 想問而家價位 仍然值得投資嗎?謝謝！

龔成老師：

1）可以，現時股市大致在合理區，你可以投資，但由於未算好平，因此，唔能夠用盡現金，你可以將$30萬資金，分3-6個月去分注買入優質股，作長線投資，餘下資金就等機會。

另外，匯豐（0005）只是收息股，你地年齡應以增值為主，你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

2）要出現明顯回落，起碼去到跌2、3成，先會考慮這動作。

因為你地本身已有物業，再買物業的逼切性不大，同時會令你的財富過度集中在物業，因些，再買細價樓，要大跌才會，正常情況不會。

3）現時的價值略貴，這股雖然有潛力，但建議回落1成先開始分注，同時總投資金額不能過多。

------------------------------------------------

Q16527：

老師你好！
想問下我應該怎樣投資？

背景，今年35歲，有兩小朋友現租住大單位月租2萬頭，家庭收入9萬，月儲18000。和太太各持有一物業，分別為市價 (A)600萬 (B)450萬，現放租。

現金50萬
股票10萬

1. 想賣走A單位留B收租，買大單位約1千萬，但會用盡現金。

或是我應該繼續租大單位，AB單位收租，合適時繼續放賣賺錢？

2. 我應該還可怎樣增值資產？
謝謝

龔成老師：

1）這是一個財富配置的問題，如果你賣A買大單位，你持有的總物業面積會增加左，擁有資產項多左，不過，由於你是自住，現金流會因此而少左。

從長遠的角度，賣A買大單位，會略好。但這就建基在樓價仍會長期向上。

如果樓價平穩，你這刻保持現狀，較能累積更多的現金與股票。

2）如果你賣A買大單位，你只能在之後，更努力儲錢然後進行投資，你35歲，仍是可承受風險，可投資較有增長力的股票。

如果你保持現狀，則要好好利用$50萬，先利用這部分作增值，投資「平穩增長股」+「潛力股」。利用股票將財富增值。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16528：

老師 我都想學投資 但唔知應該點做
我今年20歲 做緊份工月入14000-16000左右

每個月儲到8000-10000 不過唔知應該點去運用儲左既錢
本來想買財務自由行睇 但書局賣晒

龔成老師：

你要做三樣野，第一，增加知識，你要學理財及投資的知識，記住，投資並不是坊間的炒炒賣賣，你要從書本或課堂上認真學習。

《股票勝經》《財務自由行》都是入門書，適合你的。如果見唔到，你就主動向職員問，可能分店有。

第二，了解銀行及證券行，去開一個證券戶口，並準備做月供股票。

其實兩者都可以，銀行就較方便，但手續費就較貴，證券行收費就較平。你可以先了解下不同的收費。

第三，將每月的部分資金，去做月供股票，供盈富（2800）。對初階投資者來說，月供股票是一個很好的累積財富方法，因為可避免你一次過在高位買入的風險。

原理如同儲錢，不過就不是儲現金，而是儲股票。計劃要長期進行。

另外，盈富是一個組合，適合絕大部分人投資，風險不高，長期儲貨可助你財富平穩增值，記住要長線持有。

你可以考慮盈富（2800）$2000。

另外再加1、2隻（每隻$1500）：銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等，你可以了解下這些股票，然後從中選股。

如果你不懂股，就集中供盈富$5000。

當你在做上述三件事的同時，開始學下股票，了解下那些股票適合你自己。上述只同你簡單供盈富，當你過半年，有知識及少少經驗後，就可以利用你手上的資金，其中一部分，去投資股票。

------------------------------------------------

Q16529：

老師 如果我將10-20萬一次過，係股市最悲觀嘅時候，買股票長線投資，同我每個月供股 最大嘅分別會係邊到？

龔成老師：

你一次過買，可以捕捉到較平的時候，令你買入成本較低，長遠的投資回報就會增長，至於月供，由於買入價平均，因此在最平的時候，不是入好多貨。

但一次過買都有缺點。

第一，你要等大跌先有機會，但這個機會是否會出現？無人知，如果最後無出現，就會浪費了資金的機會成本。

第二，當你一次過買入，以為是平的時候，但原來之後睇翻，發現是買貴貨，反而月供，平均入平，會更好。因為要分析大市冷熱及平貴，並不是每個人都掌握得到，未經過學習，往往會出錯，這點要留意。

------------------------------------------------

Q16530：

老師，您好！
不好意思，我又想請教一下：

1. 如果我月供金額至$14000，分別買以下4隻股票(各$3500)會否太多太散？

- 2800
- 0066
- 0012 or 1972
- 2388

2. 你提過0066和0012都是地產股，會否太徧重於地產類別？

3. 我對香港前景頗為悲觀，以上股票除了2800都著重香港，應否改些中國股票？如果應該，有沒有推介可長遠月供的？

4. 如果月供，0012, 1972 還是823會較好？
謝謝！祝假期愉快！

龔成老師：

1）唔會散。這幾隻都是有質素的股票，你可以進行，最好盈富（2800）的金額較多。

2）有少少，不過港鐵（0066）是運輸+地產，所以算是半隻地產股，而恆基（0012）除了地產又有其他業務，佢與港鐵合共供款比例不過多就無問題。

3）你應該加入領航標普五百（3140），這是追蹤美股指數的，你可以投資以分散「香港相關」風險。同時令組合更加環球化。

4）其實都是好優質，恆基會比較平衡。

------------------------------------------------

Q16531：

成哥，請問1177。現市盈率成六十幾。，我買左50手，係11.45入。。現價成14.9

1)我明白，買股等於買企業原理。。現在有點忐忑，放唔放好，定放左啲先？

2)1177派紅股，所有價除淨晒。。到時我有7萬5股，果日當14蚊除淨價，我成本價應由11個幾去到7個幾。。若現價14蚊除淨去到9個幾，，到時我該如何計畫下一步

3）我唔想由11個幾升到14個幾由跌番11個幾樓下，條大數有成十幾萬係我面前，唔想過眼雲煙。。。時間我唔想浪費

成哥。請給意見，謝謝

龔成老師：

中生製藥（1177）是有質素的股，同時增長力強，我自己都持有這股。這股值得長線的，只是現價平貴的問題。

1）由於現價已貴，要睇下這股佔你的組合比例，如果比例太高，不如賣出3分1，這樣你可以算是較平衡的做法。

2）總之這是左手數與右手數的問題，唔需要比這因素影響你之後的策略，除淨前後是完全一樣的。

3）如果你擔心，可以賣出3分1。甚至賣出一半，餘下就繼繼持有。無人知中短期股價，會跌翻真的唔出奇，但優質股，點都值得有一些貨，我地應該長線持有。

------------------------------------------------

Q16532：

龔sir 你好,最近經常留意你page,多謝你經常喺度分享你嘅投資心得，我都有啲理財問題想請教你

本人30歲，有一層供完既樓，預計五年後想買多一層物業，暫時現金持有二千萬，有一千五做了定期，另股票：

0005-10000股65
1383-120000股1.73
9938-70000股0.5
9988-3800股204
823-2400股67.2
2018-2000股37.5
1928-1000股45

最近跌市，想問下以我現在持有現金應該拿多少出來

分配投資股票市場更好，因為過往只懂放現金在銀行做定期，想買1928，175，1055應該咩價位入算平，我想一手手入不想月供，感謝

月入六-十萬，亦買了一份儲蓄保險，三年後供完，希望做到50歲前退休，希望請教點你理財心得，thx

龔成老師：

如果你打算5年後才增持物業，現時在一定的時間，可以投資股票作為增值。加上你年輕，同時現金比例仍好多，這刻仍利用股票為財富作增值。

至於現時的持股，匯豐（0005）不應持有太多，特別是你這個年齡。

太陽城集團（1383）質素不太好。

華和控股（9938）持有價值不太高。

至於其餘幾隻無問題。

至於你想買入的股票，金沙（1928）與吉利（0175）可入，你可以加入盈富（2800）與其他優質股，因為你這刻現金比例太多，應該增持股票。而中國南方航空股份（1055）投資價值則一般。

------------------------------------------------

Q16533：

本人今年27歲，月入4萬6，因為公務員關係所以有互助社儲蓄計劃，月供5千，年複息計每年都有2.3%-6%，不過剛剛起步，之後打算增加儲蓄額至1萬-1萬5。

作為一個投資理財新手，認為自己暫時未適合接觸股票，所以打算選擇一些風險介乎股票和儲蓄計劃之間的投資工具，有了解過基金和月供保險等，但一直都未有意屬的選擇。

所以打算請教老師，我應該多點什麼範疇的投資產品？或者老師你覺得有什麼理財工具適合我？

龔成老師：

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股只能小注。

因此，你上述的公務員儲蓄計劃，你可投資，但不用太多，留資金去做增值。我地理財，要做到攻守兼備，你這計劃是防守部分，而保險也是防守部分，夠就得，唔好過多。

你要預留資金進攻。

當然，你這刻可能投資經驗不多，所以不宜太進取，但都可投資一些平穩增長類的股票，例如盈富（2800），我相信好適合你。

你可以月供或自行分注。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q16534：

師兄 想問下泥2隻股富力地產（2777）華潤地產（1109） 點睇 最近開始學習

麻煩晒師兄

龔成老師：

富力地產（2777）業務都算不差，生意保持理想的增長，但負債問題令人擔心。中國樓市過往向好，利用高負債去賺錢無問題，但當出現樓市逆轉，對佢就有較大的打擊。

因此，當外圍因素、中國經濟、樓市較為波動，就會令佢的股價出現較大的上落，因此買入這股要分注，同時不宜太大注。

華潤置地（1109）正面的，佢係華潤集團旗下的地產業務旗艦，是中國內大型綜合型地產開發商，主要業務為物業發展、投資及管理、建造及裝修的服務。

規模與業務等各方面都不差，但負債高則是風險所在，雖然國內好多同行都有這情況，這企業已經不算嚴重。

不過，從風險角度分析，負債始終會令這公司扣分，因此投資時不能太大注。整體都有投資價值的。現價合理，分注就得。

------------------------------------------------

Q16535：

老師 點睇1.GX中國云計 和 2. GX中國生科呢兩隻ETF?

佢們年費用0.68每年, 不算太高. 如果我睇好云計算同生物醫藥呢兩個版塊

但資金不足以分散買多隻股票, 呢兩隻ETF是否可取的長線投資標的? 謝謝

龔成老師：

ＧＸ中國雲算（2826）之投資目標為追蹤中國雲端運算指數ＮＴＲ之表現。ＧＸ中國生科（2820）基金之投資目標為追蹤中國生物科技指數ＮＴＲ之表現。

這兩個都是高增長的行業類別，我自己都睇好的，加上投資基金比單一股票，有更大的風險分散能力，我相信可以作長線投資，但買入時最好分注，因為這兩個行業的估值變化都大，價格上落會較高。

------------------------------------------------

Q16536：

成哥，你好。
請問你如何看待手遊股呢？想問下你的意見

我以前就好中意玩手機遊戲，例如王者榮耀，還有一些畫風好漂亮的女仔換衫劇情遊戲。我開始留意到一隻（06820）Friendtimes 的手遊股。

我看了他們的年報，每年都有利潤。設計既遊戲素質都幾吸收，官網表示會繼續發行新遊戲，主要是女性玩家市場。

多謝成哥解答，本人是澳門人，感謝你寫的書，淺白易明，期待你來澳門開班。

龔成老師︰

手遊業務本質的不確定性大，軟件和遊戲都是變化較大的行業，這種不確定性可以令企業好勁或好弱，因此你要明白這點風險。

FRIENDTIMES（6820）係是中國的手機遊戲開發商、發行商及營運商，專注於女性玩家的手機遊戲。

除發行自主開發的遊戲外，佢亦通過第三方分銷平台發行及營運第三方開發的遊戲，以及授權第三方發行商於海外市場發行及營運集團的遊戲。

見佢增長快速，佢這類公司的風險高，加上上市不久，根本不知佢的真實情況。因此，這股業務有發展，但同樣有風險，如果小注，都可考慮慮

我間中都會有係澳門開班，你可以留意我FB公布。有可能在第四季。

------------------------------------------------

Q16537：

你覺得HKTV值得投資嗎? 它集資投放在電子商貿易，你認為發展潛力大嗎?

龔成老師︰

香港電視（1137）業務有前景，但有兩點都存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

另外，這企業現時搞網購，有增長力的，但同時存有一定的未知數。

佢多年來不斷在燒銀紙，不斷等收成，雖然佢的業務的確增長中，但無人知幾時會有真正的盈利，同埋無人知真正的結果會點。所以，這股只適合小注投資。

------------------------------------------------

Q16538：

你好!大約幾個月前我以$67.50入了平安好醫生200股。
請問怎麼處理?（不急用錢）

龔成老師︰

平安好醫生（1833）係潛力股，我在《50優質潛力股》2020年版，都有講述這股，長遠有一定的發展力，你可以持有，長線無問題。

當然，你預期佢股價上會較為波動。

------------------------------------------------

Q16539：

龔sir 請問你點睇1478

龔成老師︰

丘鈦科技（1478）業務都幾波動，不是無潛力，但背後有風險，我有必要講多幾句。

這股之前好波動，其實呢隻股本身唔算差，前景不過不失，但市場估值的變化就相當大，當企業有不同的消息，都會對股價有一定的影響。

這股在2017年被市場視為一隻超高增長股，但後來發展佢的增長力無想象咁勁，所以大幅回落。

佢雖然有技術，但賺錢能力相當不穩。就以上年的中期業績來說，毛利大幅下跌9成，相當不利。但近年又好翻d。

這反映佢的賺錢能力，其實唔太穩定，過往環境好時，市場不會見到這情況，但環境逆轉，手機市場轉弱，這企業就成為較大影響的企業。

到了近期，手機市場轉好，佢又好翻d。

所以，這股是業務較波動的類型，本質不差，但風險較高，加上股價波動較大，投資可以，但一定要控制注碼。

------------------------------------------------

Q16540：

龔sir,我想問銀行借10萬，投資股票，分36個月還，預計總還款額110080，我月入14000到

每月還款3000幾，主要想趁宜個時期趁早入場，你覺得可唔可行？

另外想問下嘉里物流636如何？

龔成老師：

借貸投資，當我地進行時，第一要睇「息差」，例如借的息為「2%」，之後將資金投資收息股，約收「5%」的股息，息差為「+3%」。這的確過了第一關。

第二關，就是虧損的可能，股價是會升跌的，若然買入後股價下跌，你就會出現「賺息蝕價」的情況，那計劃就會得不償失。

當我地進行上述模式時，要好大程度確保價格上不會損失，將「賺息蝕價」的可能性減少。

但現時恆指未算好平，你如何確保不會「賺息蝕價」？

即是說，這些借貸投資不是不能用，而是要過幾關才能用，要較有把握才會用。

我會建議你，想方法增加收入，加大儲蓄，相信是這刻較好的做法。

嘉里物流（0636）這股不差的，佢本身由嘉里建設（0683）分拆上市，係亞洲的物流服務供應商，主要從事綜合物流及國際貨運業務，亞洲、澳洲、歐洲及南北美洲的３５個國家及地區設有逾400個業務點。

業務以第三方物流服務供應商身份為世界各地的製造商、零售商及其他客戶提供綜合物流服務，包括主要在亞洲提供廣泛的物流服務，如倉儲及增值服務、陸運及配送、退貨管理及各種配套服務。

另外，亦有從事國際貨運：提供的國際貨運服務絕大部份位於亞洲區內以及亞歐大陸之間，涉及空運、海運及跨境陸運服務。

現時的經濟及疫情，對佢都有一定的影響，而市場對佢的估值都會因而減少。

其實現價處合理區中下部，以長線投資的角度，有值博率的。成交少並不會影響企業價值，只會影響股票的流動性，但只要是長線投資，這問題不大。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。