【龔成問答信箱】（Q21341-Q21360）

Q21341：

龔sir 想問下 我投資的士方面 你的意見

我去年11月買入 牌價496萬 牌價+車+息 月供$21,816.16 共300期

其實照乘返，一共要供 $6,544,848

但而家牌價只係維持496萬，其實係呢方面是否已經算負資產？

現在每月租金收入15,000左右，真的有點擔心。
希望得到老師意見！

龔成老師︰

我從概念上解釋翻先。

無論的士牌、買樓、買舖等，大多會用按揭的，即是只用較少的資金，去擁有較大的資產，當然這動作會有支出的，就是「利息成本」。

你上述計算的$654萬，大過$496萬，主要原因是利息的支出，可能你會問，$150萬這麼大的利息支出是否值得？

從金額上很睇很大，但我地在財富世界，並不是單以金額去衡量，而是以「是否為我們創造更多財富」去衡量。

只要最終你的所得大過$150萬的付出，就值得，這就是我經常強調，不要單睇表面的價格，而是要內在價值。

的士牌是資產，只要長遠的升幅及租金回報，能大過這數就得。

用再簡單的計法，就是你借錢的利率，比較一下回報率（租金回報率+長遠牌價升幅），如果後者較大，你問銀行借錢去擁有這個資產，就值得。

但你都要留意，的士牌過往是增值類別，但而家已偏向收息類別(增值都仍有，但不算多)。

本質上，的是牌可以不斷有租金收入，而這個租金都會按貨幣系統的向上，而不斷向上的，但行業近年出現了叫車程式等新的競爭模式，對佢點都有影響。

所以，在長遠計，佢的增長能力只是中等，你可以視佢為收息類的資產，會比較好。

雖然你現時係負現金流，但由於當中部份還款，係還的士牌本金，等同你儲緊資產。所以整體而言，你這個的士牌，都係有持有價值。

但未來新資金，我建議你唔好再入的士牌，畢竟佢增長力唔算好強。以你不足30歲年紀，除非資金非常充裕，否則不宜持有太多。

------------------------------------------------

Q21342：

龔sir, 看了你facebook 一段時間，想問問以下兩隻股票的前景會點同分析一下走勢

2338 濰柴動力 平均買入價 $23.96
8083 中國有贊 平均買入價$3.06

對以上兩隻股票有操作見意嗎？
謝謝你

龔成老師︰

濰柴動力（2338）主要從事生產及銷售柴油機、相關零部件、汽車及其他主要汽車零部件、非主要汽車零部件、進出口和叉車及倉庫技術服務。

其實業務不差，有自己的獨特性，以及過往的增長力不差，生意與盈利都有所增長。

你買入價有少少貴，但又算好多。若你持股佔成個組合只係小部份，長線持有就可以。相反，佔較大比重的話，最好沽少少貨，去降低個風險。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較大，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高。如果你持貨較多，建議沽出部份，去平衡個風險。餘下的持貨，可以守。

------------------------------------------------

Q21343：

有朋友開左間XXX公司，他現在要開門市

如果我投資在這行業，想請教投資在這行業的風險有多大？

他有網店，店名是XXX
看過財務報表，大概毛利是40%。

（老師，請不要公開店名及店鋪類別）

龔成老師：

網店的問題不大，因為成本相對較低，因一去到實體店，就要較小心，因為成本、條款等都多，要有一定的客源，了解市場，先可以行這一步。

這行業我相信都有發展的，你最重睇佢地有無獨特性，如果你作為消費者，有那此因素令你覺得這店比其他是不同，較吸引你？

至於毛利，你最好找翻同行去比較下，先有答案知道，佢地的賺錢能力較高或低。

另外提翻，所有合伙做生意都有風險，好景是問題不大，但總會有不景期，到時總會面對一定的煩事，因此你要有這方面的心理準備。如果佢地是陌生人，你就要更加小心。

------------------------------------------------

Q21344：

hello龔sir
真係好多謝你不停答大家問題
我想問吓有關買樓你有咩意見

我屋企人好似想買自住嘅樓
唔考慮新界

想買700-1500呎
我睇返你答人哋，你好似推薦過西環同啟德，請問我可
以點樣搵到詳細啲嘅方向？
雖然係自住但都想有投資價值。
萬分感激

龔成老師：

西環、啟德、大圍都是不差的地方。

首先你地自住，要方便自己，自己喜歡當區的環境。另外，在投資角度，上述3區都可以的，當你睇樓時，唔建議選太舊，或全新樓（因為一般都較貴）。樓齡適中就可以。

你要具體落區去睇先知。

西環、啟德、大圍，正是香港、九龍、新界，你原本住那一區，就找翻那一區就得。例如你住港島，就找西環，當然可以西環附近的地方。

《5年買樓4部曲》有更具體的買樓分析及策略，可睇睇。

------------------------------------------------

Q21345：

老師，我啱啱睇緊0045 大酒店嘅年報，發現佢嘅資產都好優質，加上起緊三間酒店，同埋財政都好穩健，應該疫後會有得發展。

但而家個價比低位升咗好多，請問現價算唔算太貴，咩價位可以小注入？唔該晒。

龔成老師：

對，大酒店（0045）都有質素的。

佢主要從事酒店相關業務，發展及管理於亞洲、美國和歐洲的酒店、商用及住宅物業，可分為以下業務類別。
　　　　
酒店是業務核心，包括發展、持有及管理世界知名的「半島酒店」，提供出租客房、酒店大樓內商場及辦公室、酒店大樓的餐廳提供餐飲、經營酒店附設的高爾夫球場、酒店物業內零售商店等。

另外亦有商用物業，主要從事出租商用及辦公室物業（非位於酒店物業內者）及非自有酒店內的住宅物業及經營餐廳業務；擁有並管理越南胡志明市的辦公及住宅綜合建築物Ｔｈｅ　Ｌａｎｄｍａｒｋ。

過往都有一定的生意，但盈利就略有波動，不過就好受全球旅遊業的因素影響。

這股增長力不強，雖然有品牌及規模，但不能視為高增長股，可理解為平穩增長股。企業質素都有，但未去到最高級，現價合理的，不過要明白不是高增長類。

你現價分注投資，都得，可長線。

------------------------------------------------

Q21346：

老師你好，我想請問9618，6618兩隻，本身一直持有各一手，這兩隻股有潛力適合再加貨嗎？

合理加貨價大約在多少？另外想問問9633值得入手和現價合理嗎？謝謝

龔成老師：

京東集團（9618）有質素的，如果你現金足，慢慢分注入貨都得，現價合理。

至於京東健康（6618）有質素，風險就會高少少。

佢業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，暫時合理區頂至略貴，所以如投資，只建議你小注，如果出現回落，而你資金足，都可以慢慢加，但風險度就比京東集團高。

另外，唔建議太過集中在同一集團的股票類別。

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。

由於有一定的品牌價值，因此企業質素與發展正面，財務數據不差，生意與盈利都有理想增長，不過上市不久，股價較波動，同時上市前數據可能執靚過，因此要注意風險度。現價合理區頂至略貴。

現價小注投資好了，這股適合長線的。

------------------------------------------------

Q21347：

你好龔成！我睇你facebook決定中長線投資較適合我。我上年分注買入幾手小米，平均價$24.25，小米曾經升至$35，但我無放，到最近又回至$24左右。

一. 我其實是否應在上年股票市場狂熱時放一兩手？這是否我投資經驗不足所致？

二. 如果我先放部分，同一舊錢便可以再投資，再套用至短炒，我總是用同一筆錢進出買賣，這不會比我長線投資時一大筆錢放置著不能動較好嗎？我唔太明白。

希望你能解答，謝謝

龔成老師：

1）無絕對的答案，在理論上，長線持有優質股，會得到最大的回報，你試想想，如果你多年前買入了騰訊（0700）、港交所（0388），如果你經常捉高位賣出，就會錯過了100倍的回報！

當然，你會見到中短期，例如上述小米（1810）的例子，都有可能回落，有時，的確在貴的時候賣出，可能可以得到回報，但就有一個風險，就是賣出後「買唔翻」，如果用這套方法套用在騰訊、港交所就會錯失大賺機會。

當然，你可以取平衡，例如在狂熱期、貴的時候，賣部分，總之，優質股，點都要有基本的貨在手，長線。

2）原理同上面一樣。

但你以為短炒能賺錢，就錯了！

我20年前，都是短炒者，用左幾年，輸足幾年，之後長線投資，就開始不斷賺錢。

其實我當時，用左幾年時間去學短炒，我當時不斷睇書、上堂學短炒，但最後都是輸，可能是我能力不足吧。

但我之後做銀行同證券行，見大部分輸錢的客，都是偏向短炒的。

當然，你問我有無人贏錢，是有的。但就我觀察，長線投資贏錢的人，比短炒的較多。

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特都是反對短炒的。

因此，我相信長線投資，是真正助我地贏錢的方法。

------------------------------------------------

Q21348：

老師我有個心結始終解唔開，因為最近買咗樓，需要將手頭上的股票沽出，本身想長線投資，盈富基金及港鐵，但都要急住放，其他的都有可能要蝕放，覺得很可惜

另外也十分後悔買入屯門碼頭XXX屋苑，雖然本身住屯門，但都覺得比較偏僻，升值能力唔高

龔成老師：

首先，你這動作是「財富配置」，你是將股票這類資產，轉為物業資產，這是一個配置過程，無話可唔可惜的。而你著眼於「蝕放」，同樣是無意義的，這只是一個現金的概念。

至於屯門碼頭XXX屋苑，我睇翻佢的位置，又唔算好差，佢附近有輕鐵站，同時遲D政府話會起屯門南站，預計的落成年份2030年（當然好多變數），對你所選的物業位置，有利的，因此又唔需要太過擔心。

當然，屯門始終與市區有距離，呎價始終不及，但以整體質素來講，我會認為是中等，不是差。加上佢身處邊海邊，環境不差，同時基本配套都足。

------------------------------------------------

Q21349：

老師你好，我最近係到更新緊一d企業既合理價資料，我做到比亞廸既時候遇到啲疑問，我地果時上堂你教攞10年既p/e斬頭斬尾唔要d極端數字，然後攞中間個4個p/e黎計數，但係我斬頭斬尾後

佢既p/e已經係
最低：33.5
最高：140

然後最後計出黎既合理價係$46-$195，我就覺得唔對路，所以想問下係d咁極端既環境下應該點樣篩選p/e黎計數，感謝

2, 而我金界控股就計到$7-$11, 落差會唔會太大

3, 最後有關阿里，或者面對住新企業，係冇太多data既時候，我地應該如何估值?

唔該晒老師

龔成老師：

1）其實估值有好多方法，我在初階班所講的方法，是較為基本的方法，去到進階班，就會再教18種估值方法，而不同的估值方法，如同不同的角度，去衡易一間公司值幾多錢，令企業價值更為立體。而比亞迪（1211）這類潛力股，估值的確會較難。

因此，你上述用的方法，可以作為參考，但不是唯一，同時未必完全適合這股。

當我地為潛力股進行估值，例如同你上述的方法，在計算有代表性的盈利時，就未必用過往的數字，而是較著重將來的盈利情況，以此作為推算。

至於市盈率，你要找一些更能代表到這企業現時經營環境的數據，以及同業的市盈率情況，作為參考，但你都要明白，潛力企業，這種方法都不是絕對準的。

2）金界控股（3918）發展正面，有獨特性，有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值，分注投資可以。另外由於市場新興，在估值上不能太過進取。

你的估值大致合理，現時可以理解為合理區。

3）其實可以參考美股的，因為佢之前已有在美國上市。

當我地面對一些新上市公司（我假設佢無在其他地區上市），我地在分析時，的確會較難，因為佢招股書的數據一定執靚過。所以我地只能作出參考。

另外，我地可以利用同行的情況，去比較難，但你都要明白，新股的估值，特別是潛力類股，會較難，上市初期，往往由於供求失衡而股價上落好大。

------------------------------------------------

Q21350：

唔好意思龔成sir: 我唔係好明您建議的收息股548吾會和我現持有的659撞嗎？（公路股）仲有778、435吾會同12撞嗎？（地產股）

另外659現在的市盈率為141倍係點解呢？對佢長遠阿sir您點睇？對唔住太多問題了，有勞阿sir

龔成老師：

深圳高速公路股份（0548）業務以公路為主，而新創建集團（0659）則只是部分為公路類別。

新創建係一間綜合企業，可分為7大業務：道路、環境、物流、航空、設施管理、建築及交通、策略性投資。當中可分為兩大類，即是基建及服務。

因此，兩者的重覆性，又未算好高。

新創建集團的市盈率高，是由於佢剛過去年度的盈利好低，這主要受疫情及經濟影響，但由於這只是中短期情況，而我地為企業進行分析時，會著重睇企業正常經營年度，因此，這股長遠仍是有質素的。

至於地產股，置富（0778）、陽光（0435）、都是地產類，而恆基（0012）是綜合企業（但地產業務佔比最多），因此，的確會有行業重覆的情況。你預同一行業，最多去到30%，你可以用這個來作參考。

------------------------------------------------

Q21351：

老師，我之前上年3.25入左一手京信通信2342,諗住長揸所以之前炒5G概念時上過3.7我都冇賣，但而家佢不斷跌到破埋2蚊

我知唔應該受短期價格影響，但睇返公司本身我覺得佢暫事增長力不大，所以考慮到增長力同機會成本，我想換去另一隻股票，唔知老師點睇呢?

我而家應唔應該換馬?

如果換的話3662奧園健康又是否值得投資?

龔成老師：

京信通信（2342）主要從事研究、開發、製造及銷售無線電訊網絡優化系統設備、提供相關工程服務，以及提供電信服務及相關增值服務。

現時5G的發展，都會對佢有利，但這股規模唔算好大，因此又未算最強之列。但由於規模細，當企業發展時，潛力較可較大。

質素都算有的，但就不算好強，整體上都有投資的價值。不過睇翻佢最近的業績，又唔算好勁。

此股唔值得太大比重。

由於這股質素未算最高之列，因此，之前當熱炒相關版塊時，的確將佢股價過度推高，處貴水平，現時先算合理翻d，但又未算平，而要上翻去你買入價，短期未必得。如果你持貨較多，建議賣出部分轉其他。

如果不多，你都可以持有，但你預佢增長力又未必好強，除非市場對相關版塊再有炒作，就有機會有較明顯的上升。否則，如果你想財富組合增長力較高，轉其他不是不可。

至於奧園健康（3662）由中國奧園（3883）分拆上市，主要在中國從事物業管理服務及商業運營服務。

例如提供住宅及非住宅物業管理服務（安保、清潔、園藝、維修與維護服務）等，業務穩定，現金流不差，但上市年期不算耐，以及現價合理區中上部。

這股前景是正面的，但平貴問題則要小心，同時不建議太大注。你小注投資都得。

------------------------------------------------

Q21352：

成哥
想問隻1266

第二個問題：想問你會推介邊一個收息股，3988可以嗎？或者會唔會有其他選擇

龔成老師：

西王特鋼（1266）主要從事製造特鋼，產品包括主要用於建築及基建項目的普通鋼產品，以及特鋼產品，亦從事鐵礦粉、球團礦、鋼坯及焦炭等商品貿易，以及銷售鋼渣、蒸汽及電力等副產品。

業務有點波動，過往盈利的上落較大，有時會出現虧損，反映企業對成本較敏感，未能將成本有效轉嫁比買家。企業質素唔算高。

中行（3988）都是不差的收息股，現價合理，可以投資，但唔建議只集中在一隻收息股，最好建立一個「組合」。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

------------------------------------------------

Q21353：

老師，我在下一年大約靠儲蓄和投資，累積到$90萬左右。

我現在租金只需$2000，不用擔心住的問題。所以，我想買樓作投資，始終買樓收租比較穩陣，以及可分散資產風險，不用只集中在股市。但是，我對於房地產投資沒有什麼概念，所以，有兩個問題想請教老師。

第一，我希望將大部份資金投入樓市作投資，購買約$550-600樓。老師您覺得投資樓市，還是應該繼續持有優質股，待資金再滾大才投資樓市？

第二，放租有什麼需要注意？如何確保「安全」放租？老師有冇推薦坊間課程 / 書 / 其他方法可以了解房地產投資更多？特別是關於放租方面的問題

龔成老師：

1）最重要是「平衡」，這是一個財富配置的動作，你要考慮怎樣建立一個風險不高，長遠又有增長力的財富組合。

如果你買樓後，要用盡所有資金，那就會出現集中風險。

因此，最好就是等你有一定資金，又或調整目標物業樓價，等你買完樓後，都仍然有一定的股票及現金在手，就是最好的策略。

如果這刻不足，可考慮利用股票滾大資金先，之後先投資樓市。

2）你可以睇《5年買樓4部曲》，適合你的。

至於最初放租，你最好找一些大型的地產代理幫手，好過自己經一些較細的平台去放租，因為當你同租客有問題出現時，大型地產代理，可以比到較多支援你。

另外，我的網上課程（關於資產配置），都有部分講物業的，你可睇睇。

http://bit.ly/3pP252j

------------------------------------------------

Q21354：

老師你好，股票勝經書本里面提及的覆利息，我理解係將股票發出的股息，再用作買入該股票，是這個意思嗎？

還有一個問題想請教老師，假如a和b是優質股（a，b不屬於同一類型股票），若果本金只有20萬，應該將20萬重注其中一隻，還是將a，b各10萬分配？

龔成老師：

複息由兩部分祖成，第一是股價長期增值，複息回報，第二是派發股息後，將得到的資金再投資該股票。

如果有一筆資金，而AB都是優質股，應該平衡分配。

------------------------------------------------

Q21355：

你好呀老師

領展823 5000股 72蚊
匯豐5 5000股 46.2蚊
瑞聲2018 2000股 40蚊

移動941 1500股 51蚊
電能6 5000股 45.4蚊
贛鋒1772 800股106蚊

持有應該點操作

龔成老師：

如果你年齡唔大，其實唔需要太多收息股。

你上述的組合，基本上都是有質素的，只是部分買入價較貴，不過，我見到收息股類別較多，例如：匯豐（0005）、中移動（0941）、電能（0006），這些股的增長力不強，但收息就無問題，持有與否，其實好睇你年齡與投資風險及目標。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。

例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

因此，如果你年齡唔大，這類股就不用投資太多。

至於領展（0823）、瑞聲（2018），有質素及基本增長力，可持有。

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

其實，你投資的股票，基本上都有質素，但就要在比例上優化，你要考慮你的年齡及風險承受程度、投資目標，去決定長遠的財富組合比例。

------------------------------------------------

Q21356：

老師！想請問一下京東集團9618 及 六福集團 0590，本人9618 100股@385 ，現時賣出京東轉入六福，值搏率是否不高？
感謝您！

龔成老師：

京東（9618）業務有質素，發展仍是正面，不過現價就唔算平。

佢係一間電子商業銷售平台，佢定位為「以供應鏈為基礎的技術與服務企業」，現時是中國第二大電商，有一定的品牌。同時，根據《財富》按收入統計的全球500強排行榜，集團是中國最大的零售集團。

佢目前業務已涉及零售、數位科技、物流、技術服務、健康、保險、物流地產、雲計算、AI和海外等領域，其中核心業務為：零售、數位科技、物流、技術服務四大板塊。

京東已建立自己營運覆蓋全中國的物流基礎設施，以支持電商業務，打造了線上購物體驗，係2017年、2018年、2019年，活躍用戶數達到了2.9億、3.0億、3.6億。可見已建立了一個巨大的網絡。

佢經營線上零售，以及電商平台業務，線上零售業務方面，從供應商購買產品，然後直接銷售給客戶，並從24,000多家供應商採購商品。

佢的物流基礎設施佈局覆蓋了中國幾乎所有的區縣，包括遍佈89個城市、累計總建築面積約1,690萬平方米的700多個倉庫，包括京東物流技術開放平台所管理的倉庫面積。

從質素上，這股不差的，現價算是合理區中上部至頂。

其實這股無問題，就算你持有都得，你只是在之前較貴的價位買入，佢並不是質素轉差，只是股價去翻正常的區域。

除非這股佔你組合比例太多，否則，你可持有。

至於六福（0590）有質素的，不過現價的值博率，其實同京東接近，因此不用特別轉。

------------------------------------------------

Q21357：

龔Sir你好！1186中國鐵建 你點睇？

＄5.07入咗3萬股，想呢幾日想入多3萬股

現持：
270x4000股
288x11500股
371x10000股
3033x3000股
1186x30000股

呢個組合有冇問題？

龔成老師：

中國鐵建（1186）質素算是中等，不算好強，但都不差。

如果有分析佢多年的業績，會見到佢生意其實都幾穩定，但就無增長力，至於股本回報率處合理水平。但這股最大的問題，就是負債太多，雖然佢現金流好穩定，但太多負債始終會扣分。

而這一點，亦令佢企業價值不會太高的原因。而現價處於合理水平，但發展力不算強。

你持有是可以的，買入價合理，可長線，但就未必值得持有太多。同時，當你進行投資策略時，唔應該一次過買入得太急。

至於其他股票，基本上都是有質素的，可以持有，萬洲國際（0288）質素唔算差的，但潛力就不算強，只是平穩增值的類別。

有時你見肉價短期上落，都會對佢股價有短期影響，不過，我地分析時，唔好太著重中短期因素，例如短期的肉價格，以及供應等因素，都會對佢中短期有影響，但我地最緊要是分析企業的長期營運模式，發展，而這股正面的，可長線。

這企業過往的生意保持平穩，業務基本上是平穩的，只是因貿易等問題，令股價較為波動，成為這股的風險。

投資這股，可說是平穩增長，以及收下息咁，不要對股價太有期望。

北控水務集團（0371）不差的。

業務不差，但負債較高，影響了企業價值，整體來說，可長線，但唔建議持有太多。

粵海（0270）無問題。

而南方恒生科技（3033）有質素，是潛力基金，可長線，你可持有，但由於潛力類基金股價上落較大，因此又唔建議持有過多。

------------------------------------------------

Q21358：

你好老師，我今年29歲，正在租樓，已婚，有一囡。

將會買樓自住，考慮到底應該用買樓的錢來買樓?還是股票投資好?

樓價因為識買家的關係，比現時市場平15%左右，打算最少會住5-10年

如買樓，手上和每月就沒有閒錢能夠股票投資。
我應該如何選擇買樓還是股票投資?

帶返頭盔，有記錄每日支出，預計到當供樓後，2人每月閒錢有千幾蚊左右，預留小朋友Playground 用 / 疾病 等等。

現時租樓反而會每月多返3千幾4千蚊 可以做股票投資等等。

龔成老師：

如果正常的情況，做好股樓平衡，財富配置是重要的，即是最好的情況，就是你買入物業後，仍有一定的股票、現金剩，令你的財富處於平衡的狀態。

不過，你如果能以較市場平15%的價去買物業，就算做不到上述所講的情況，都值得做。

當然，你要考慮翻物業的質素，起碼不能太差。同時，平15%的定義，是比較同區同類的單位，以佢地的成交價作比較。

因為15%在物業市場是一個可觀的數，就算這動作令你風險度提高，都值得進行。

因此，你可以買入該物業。

但在之後，就要加強力度去進行儲蓄、投資，令你整個財富組合，盡快平衡翻。

------------------------------------------------

Q21359：

老師
怎樣可以
2萬
20萬
變100萬

龔成老師：

要這樣變$20萬、$100萬，當然是一個極高回報，你背後一定會承受好高風險的，因此不建議。

當然，如果集中投資潛力股，並掌握了買賣時機，要找到10倍股，不是不可能，但就要付出相當大的努力，同時要較長時間，等企業成長，先有機會做到。

因此，這是一個不易的回報，建議你調整投資目標，合理翻。同時，可以努力增加知識，以及花更多時間去尋找潛力股，但都要明白風險與回報的概念。

------------------------------------------------

Q21360：

成哥，之前睇你本書嘅推介買咗中生(1177)及同仁堂科技(1666)，但忍唔住有錢賺所以放咗，不過我會等佢回落會再買返。

最近呢兩個月買咗三隻新股諗住長揸，分別係：
百度(9888)->$219
6993(藍月亮)->$15
賽生藥業(6600)->$18.7

但係表現未如理想係咁跌

請問呢3隻股票是否值得長揸？亦是否值得撈底？請賜教！謝謝

龔成老師：

持有優質股，特別是有增長力的，就盡量長線投資，例如中生（1177）這類。

如果你組合無醫藥類，就宜等機會再買翻。

至於你新買入的3股，第一，新股你要留意翻風險，因為我對新股一向較一般，佢地的財務數據往往因為上市而執靚左，加上新上市供求失衡，股價一定好波動，因此要注意風險。

百度集團（9888）有質素，但股價上落大，唔建議持有太大注，現價合理區頂至略貴，如果你想加注，等跌多少少先。這股可長線。

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，你小注持有都可以。但暫時唔好加注了。

賽生藥業（6600）都有發展力。

佢係一家擁有產品開發和商業化集成平台的生物製藥公司，戰略上專注於包括腫瘤及重症感染治療領域。憑藉集成平台，力圖在治療領域開發優質上市產品，包括自有產品日達仙及在研藥物的組合並對其進行商業化。

佢主要從事銷售自有產品日達仙；銷售授權引入產品；及代表業務合作夥伴在中國銷售推廣產品。

佢亦開始開發多種在研候選藥物。目前在研候選藥物組合包括多個已進入II期臨床試驗或更早階段的早期階段候選藥物。

日達仙已獲列入肝癌、胰腺癌及淋巴瘤治療指南，並已獲得多個司法管轄區的批准，包括中國以 及韓國、泰國、阿根廷、意大利、柬埔寨、新加坡、菲律賓及印尼等其他國家。

整體來說，這股都不差，都有投資價值。但業務始終波動，小注持有好了。同時唔建議太急加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q21181-Q21200）

Q21181：

我晤係太清楚：股息率 / 派息率/ 實際派幾多股息 係咪三樣晤同嘅嘢？

如2800.hk 盈富基金 每手1000股 股息率 2.74% 咁即係派幾錢股息？

龔成老師︰

股息率 = 每股派息 / 現時股價 [你現價計的投資金額，所收到的股息百分比]

派息率 = 每股派息 / 每股盈利 [集團會用多少比重的盈利，作為派息之用。]

實際派息 = 每股派息 X 你持有股數 [你實際落袋的錢]

假設，盈富基金(2800)每手500股、每股盈利$5、每股派息$3、現時股價30蚊

股息率 = 每股派息$3 / 現時股價$30 [即係10%派息率]

派息率 = 每股派息$3 / 每股盈利$5 [派息率係60%，即佢每有$1盈利，就會將其中$0.6以股息派發比股東。]

實際派息 = 每股派息$3 X 你持有股數$500 [假設，你收息動作，中間無其他費用成本要扣除，你就會有$1500股息落袋]

------------------------------------------------

Q21182：

龔sir 想請教
1833 （現價$99），
2382 （現價$180）,
66（現價$44.7）

現價屬於合理區頂部嗎？

這3隻的合理價區大概是多少？

龔成老師︰

平安好醫生（1833）、舜宇光學科技（2382）算在合理區頂部，而和港鐵（0066），大約在合理區中上部。

這些股票都有增長力和質素，適合年青至中年人士。

但你要留意，平安好醫生（1833）佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況。你預佢會好波動，此股現價計，只宜小注。

------------------------------------------------

Q21183：

老師，有一事請教一下，以下係我嘅組合，請問現時我應該採取咩策略最好？

1）6690 1000股 31.16入
2）909 1000股 56.85入
3）6865 2000股 31.7入

4）968 2000股 19.1入
5）2333 2000股 26入
6）1357 5000股 3.9入

另外現金有約30萬左右。

龔成老師︰

你現時持有的組合，都係有增長力架股票有質素。若你係年青至中年人士，這組合適合你長線持有。

但你要留意翻，美圖公司（1357）佢雖然過左最差時期，現時正向好。

見佢財務數據改善，這企業仍有發展力，有長線投資價值。不過業務變化始終大，不建議佔比重太高。

現時大市只在合理水平，現金和持股最好係各佔一半。故你可以再入多少少，大約5-10萬，以分注形式去儲貨，會較好。

------------------------------------------------

Q21184：

老師 我啱啱月供股票，每月6000，供緊3328交通銀行同3690美團，意見如何？

謝謝老師

龔成老師︰

美團點評（3690）有潛力的，同時見佢增長都快，算是一隻有危又有機的股票。

由於佢不確定性偏高，作為月供股票，就未必適合。或者唔建議太大注，小注月供都得。

交通銀行（3328）本身質素不差，有一定的規模，在全球都有網絡，本身不會無質素的。

不過，這股增長力不算強，只是一隻收息股，增長力不強。月供係可以，此股會相對適合較年長和保守架投資人士。

建議你，未來組合唔好單單集中係1,2隻股票身上。我地要建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

------------------------------------------------

Q21185：

成老師，本人32歲，與女友同齡，兩人月入共7萬。上年購入現在自住的一間約800萬私樓，尚欠樓按380萬。買樓後的一年逐月建倉買入股票，現值60萬，現金還有30萬，股票倉如下：

1177 $7.1*5000
1317 $2.29*24000
0823 $59*500
0016 $91*500
0012 $29.2*1000

3988 $2.62*15000
0011 $117*300
0636 $24.2*1000
0941 $46.9*1000
0788 $1.25*40000

0857 $4.33*16000
0178 $2.33*22000
6618 $70.6*50
2238 $7.1*4000
3067 $17.67*200

1）請問股票組合買入價如何？適合我的年紀嗎？需要精簡一點去集中投資嗎？

2）我的策略是在每個月買入特價的股票，結果存了十多隻股票，請問如何抉擇集中投資還是分散投資？

3）請問為何中人壽比友邦及平保，市值差得這麼遠？前者是長期落後，後者節節上升

4）現時還可以投資車位嗎？

多謝閣下寶貴時間解答

龔成老師︰

1） 以你現時32歲計，應以增長為主要目標。中行（3988）、中國移動（0941）都係收息股，增長力不高，唔適合你。

中石油（0857）質素中等，京東健康（6618）則波動性較高，2者都不宜持貨過多。另外，你組合最好維持10隻以內，會較理想。

2） 我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

簡單咁講，就係分散不同行業的優質股，當中關聯性較少，就可以做到分散風險。

3） 市值只係一種參考，一隻股票值唔值得投資，都係要睇佢本身質素而定。

中人壽（2628）質素係有，但有下滑架情況，已經無以往咁優質。所以，市場比佢架估值都低左，因而你會見倒平安（2318）一直升，但中人壽（2628）就停滯不前。

中人壽整體質素算係中等，不宜持有太多。

4） 現時車位租金回報率唔好高，約只有3%，吸引力只屬一般。

------------------------------------------------

Q21186：

成SIR你好! 我都係80後, 但一直都無咩投資, 係十幾年前買過幾十蚊港交所, 就唔知點解放左, 就到而家都無再玩股票, 一直都抱住得過且過生活, 勁hea!

但這數月開始追你的FB和 睇你幫網友解答的無數問題, 就開始覺得自己要開始認真去投資, 就算我投資廿年, 我都未到退休年齡, 如果投資正確, 我都應該可以好舒服咁退休,什至提早退休再去享受世界! 希望而家先投資唔會太遲啦~

1. 我想請教一下, 以下的投資方案得唔得?
- 每月供$3000盈富2800
- 現有200股 3067（@17.5）, 計劃每隔兩三個月買一手
- 現有港幣約12萬, 外幣約12萬.
想用約8萬港幣買一手0001長和 + 1手1830必瘦站 + 1手1833平安好醫生 + 1手2382舜宇光學

2. 必瘦站, 平安好醫生, 舜宇光學 現價是否太貴?

3. 長和早幾年有16X, 近幾年維持$50-$60左右, 成SIR你認為佢有無機會再升返上去?

4. 現有1手 1972太古地產, 值唔值得之後再慢慢入多幾手? 定分散買其他例如港燈?

5. 同仁堂, 中藥龍頭咁滯, 但股價持續十幾年都係$4-$5, 現在買唔買得過?
感謝成SIR!

龔成老師︰

由港交所（0388）這個例子，你可以睇到，其實只要長線持有一隻優質股，個平均回報係會好唔錯。

你是一位80年人士，都算係偏年青，只要正確方法去做增值，依然會有唔錯架效果。

1） 以你年紀計，這些有增長力的股票，都係適合的。

外幣方面，如果無實際用途，最好換回港幣，用來投資增值。

現時大市算係合理水平，股票和現金最好各佔一半。所以，每月儲蓄唔好盡用，要留有部份。同時現有資金，都可以跟這個50/50比例，慢慢進行配置。

2） 舜宇光學（2382）算係合理區頂，至略貴。而必瘦站（1830）要回多1,2成，才算較合理。

至於，平安好醫生（1833）長遠有發展力。

佢係中國領先的一站式醫療健康系統平台，透過「移動醫療+AI」，為每個家庭提供一位家庭醫生，為每個人提供一份電子健康檔案、一個健康管理計畫。

平安好醫生係中國互聯網醫療健康市場的先行者，以平均月活躍客戶，以及在線諮詢量計，是中國最大規模的互聯網醫療健康平台。

企業的業務有潛力，本身有優勢，大環境的配合，都成了這企業的機遇，前景正面，不過財務數據未算好理想。

雖然長遠的企業價值向上，但股價在中短期，可以十分波動，因為市場以「前景」作估值，故此變化必然很大。好難得出平貴的準確數，只能估估下，作參考。

因此，低風險者未必適合投資，若投資者考慮這股，亦不能大注投資，買入後就耐心長線持有，等待這企業改變整個行業的情況，現價算合理區頂。但好波動，你直接入貨的話，只能小注，或者用月供儲貨都可以。

3） 長和（0001）有質素的，由於歐洲弱，相信佢中短期仍會較一般，不過，長遠會慢慢好轉。

但這股並不是高增長，收息及少少增長力。要回到這個水平，可能要較長時間。此股唔係大升類別，但作為平穏增長股，係一個唔錯架選擇，現價合理，可分注。

4） 太古地產（1972）都有質素的，算係平穏增長類別，都適合你。現價合理，有長遠投資價值。

而港燈（2638）就係純收息股，增長力唔會太高， 以你年紀，唔建議持有太多。

5） 同仁堂科技（1666）仍有質素的，不過增長力比過往略減。

佢係一家集產供銷一體的高科技現代化中藥企業，通過了澳大利亞ＴＧＡ和國家ＧＭＰ認證，企業通過了質量體系認證。

佢生產六味地黃丸、感冒清熱顆粒、牛黃解毒片等著名產品。

過往生意不差，不過增長力有所減少，由於近年賺錢能力減左，股價所以向下。其實長遠仍有發展的，但就唔值得投資太大注，當小注等佢回勇不是不可。

------------------------------------------------

Q21187：

你好，龔成老師，有個好消息最近已搵到新工作，呢段時間一直睇你之前嘅書同埋文章 ，就係想準備有穩定工作之後進行適當投資。

所以希望先儲錢，然後進行月供股票。我現時每個月大概一萬9千，扣除其他洗費一個月大概可以儲起4000-5000。

而家計劃希望每月可以多兩萬蚊投資進帳。咁我分析嘅計劃如下,，希望老師可以畀啲意見：

盈富（2800） $2000
比亞迪（01211）或 舜宇光學（02382）
銀娛（00027） 或港鐵 ， 會選擇其中兩個各$1500

之後如果有多餘資金，會想入手福壽園（01448）
唔知以上嘅計劃係咪正確適合我現在的狀況

而我亦會選擇證券行因為收費較低， 因為我亦相信香港嘅監管應該唔錯。
多謝老師嘅時間！

龔成老師︰

恭喜你! 在投資和新工作上，都要保持努力。

你以上投資選股都可以，若你係年青至中年人士，這個組合和配置係合適的。

但我地一般合理投資回報，係講緊每年10-15%。若你希望以現時投入，獲得每月額外2萬投資進帳，好難做到。建議你按部就班，用優質股慢慢為你財富增值。

你選股方面，比亞迪（1211）現價偏貴，你最好等佢回到$120才月供，或者可以用ＧＸ中國電車基金（2845）暫時代替。

至於銀娛（0027）或港鐵（0066）都可考慮，你按自己喜好選就得。

而福壽園（1448），你的策略可以，但由於現價唔算平，所以要控制注碼，同時都要留有一定的現金。

至於用銀行定證券行，正如你所講，香港監管係唔錯，2者都可以。主要考慮翻邊個方便你自已，和收費問題就得。

------------------------------------------------

Q21188：

成哥，你好！我想問下 1）長城汽車，2）中國航空，3）農夫山泉前景如何。

1）28蚊入左之後係咁插，最低見過19.x，真係心都離一離，係近排炒消息升返D, 你認為
我應該止蝕定繼續長揸？

2）買佢係因為等全球復飛嘅時候可以爆升，你認為合理嗎？ （買入價6.65～6.7）

3）見佢係高位6x跌到落黎43.4就入左，開初都有賺，但放左業績之後就跌到落38.x，你認為
（半年內）有冇機會上返買入價？
萬分感謝

龔成老師︰

1） 首先，當股價下跌，你一定要了解當中的原因。基本上，股價中短期上落好正常。若無一些影響企業核心質素，咁就無問題。

長城汽車（2333）有質素的，業務都不差，不過，過往的增長力不算好強，長遠業務發展雖然正面，但未必是潛力型。這股都有長線投資價值，可以持有。

2） 中國航空工業國際（0232）主要主要從事通用航空飛機活塞發動機及備件的設計、開發及生產、以及提供活塞發動機的售後市場服務及支援。

航空業復甦，的確會對相關企業正面影響。但我地投資與否，除左睇行業本身狀況，都要對企業本身質素，進行考量。

睇翻集團過去數年﹐多年出現虧損，可見佢估值較差，唔係單純因為疫情所致。暫時唔見有明顯投資價值，故不建議你投資此股。

3） 中短期架股價走勢，無人知。我地持唔持有一隻股票，應從長線投資角度去考慮。

農夫山泉（9633）有質素的。

是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。佢係中國擁有10個區域取水許可證，並在其周邊建立生產基地。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，的確有吸引力的，不過，我一向都新股半新股都無興趣，因為真實面要慢慢先見到。此股可投資，但只建議小注，同時你要明白當中的風險。

由於有一定的品牌價值，因此企業質素與發展正面，財務數據不差，生意與盈利都有理想增長，不過上市不久，股價較波動，同時上市前數據可能執靚過，因此要注意風險度。

這股適合長線的，只要佔你組合唔係好多，就無問題。

------------------------------------------------

Q21189：

老師，你好！

１）我之前 3898 分別係$39.5 & $44.5 高追, 我相信佢長遠有價值,, 但我唔識計佢值幾多,佢一直都跌,請問你有咩建議可以卑我呢?

２）有長輩係早好多年前幾乎用所以存款去買 0005,買入價＄130, 一直以股息過活

但近年股息股價都不理想，甚至無股息，生活拮据，但佢不懂股票，覺得股價同當年差太遠不願放出，即使放又唔知點做， 買返咩類型股票

請問老師有咩建議可以卑到佢呢?
感謝老師的時間！！

龔成老師︰

1） 中車時代電氣（3898）係中國鐵路車載電氣系統供應商及集成商。

佢的產品可分為兩大類：（１）車載電氣系統：包括列車牽引變流器、輔助供電設備與控制系統、列車行車安全裝備。（２）電氣元件：包括電力半導體元件、傳感器及其他相關產品。

佢主要客戶為鐵道部及其地方鐵路局、中國主機廠及城軌運營商。

佢向主機廠及城軌運營商提供新造機車車輛的車載電氣系統，以及向鐵道部的地方鐵路局及城軌運營商提供作維修及更替用途的車載電氣系統。

業務不是無質素，但增長力一般是較大的問題，企業價值無乜向上，盈利亦很普通。

整體質素只是中等，增長力不強。若你持貨不多，可照長線持有。但持貨比較多的話，最好沽出部份，換碼至其他優質股，咁會較好。

（2）至於你長輩方面，其實睇翻匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

用佢作為收息股係可以，相信派息方面，會慢慢回復較正常水平。由於你長輩目標係收息，故唔需要太在意個股價波動，長線持有就可以。

但成個收息組合，唔可以只有單一隻股票，咁會太高風險。要做一個全面組合，包括不同行業架優質收息股，才算係理想。

所以，如果佢太過集中在匯豐一隻股票，可以放部分轉其他，如果佢唔想這刻賣，可以等匯豐股價過多1年，經濟好翻D，銀行股經營環境好翻D，到時股價上翻D時，轉其他股。

你可以建議佢，建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）或收息基金（3110）都可以。

若能承受到風險，有些更有超過8%、10%的高息股，但股價就略有風險，要自行衡量，佐丹奴國際（0709）、中石化（0386）、互太紡織（1382）等（記住，股價略波動，只能小注）。

但要留意，現時股價只是合理區，未到平宜，因此買入時宜分注，同時不能用盡現金。

------------------------------------------------

Q21190：

你好龔sir，我本身入左3333恆大物業18蚊，仲有6993藍月亮16.8，因為都跌緊請問可以等佢升返？

定止蝕換馬？感謝！

龔成老師：

中國恒大（3333）業務本身不算差，但中央有時會出打擊樓市政策，加上佢本身負債極高（這是最大問題，風險太高），相信會對佢有一定的影響。

你預佢中短期都會波動，但如果你只是小注持有，勉強可以，但都要明白風險。如果大注宜減。

至於藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，仍略貴，風險比恆大低，但同樣不建議太大注，如果你小注可守。

------------------------------------------------

Q21191：

請問老師6993藍月亮，302中手遊，你點睇呢2隻股？

書本里面提及賭業是穩賺行業，1383太陽城有投資價值嗎？

龔成老師：

藍月亮（6993）有質素的。

佢有「中國P&G」之稱，成立於1992年，擁有衣物清潔護理、個人清潔護理和家居清潔護理三大系列共73個品種的產品。

佢係中國洗衣液有龍頭地位，加上毛利率高，賺錢能力強。睇翻佢之前的資料，以零售額計算，藍月亮在洗衣液市場、濃縮洗衣液市場及洗手液市場的市佔率均為第一，分別為24%、28%、17%。

整體有質素與發展力，不過現價唔平，之前貴，現價算是合理區頂，你長線持有可以。

中手游（0302）主要於中國從事手遊發行及遊戲開發業務。佢提供多種類型的手遊，包括ＣＣＧ（可收集卡牌遊戲）、ＲＰＧ（角色扮演遊戲）、ＭＭＯＲＰＧ（大型多人網絡角色扮演遊戲）、ＳＬＧ（模擬遊戲）等。

過往生意不差，有持續的生意與盈利增長，財務數據初步正面。

不過，上市年期不算長，這會令財務數據代表性較低，同時，行業業務波動，不確定性大，都令這股造成風險。這股如果你投資不過多，小注投資都可以，始終不是無質素。

至於太陽城集團（1383）主要在中國從事物業開發、物業租賃及管理、酒店與綜合度假村管理及顧問服務、銷售旅遊相關產品以及提供旅遊代理服務。

開賭的確是好賺，但不一定是每個範疇及每間公司都好睇，持有賭牌的當然好賺，例如金沙（1928）、銀娛（0027）。

太陽城集團，當睇翻佢過往經營數據，當澳門賭場人人賺錢（疫情前時代），太陽城卻出現虧損！反映經營方面有問題，因此，這股唔建議投資。

------------------------------------------------

Q21192：

老師你好，從上年剛疫情開始看到你fb，決心做好理財及做一些兼職額外增加收入，終於儲到人生的第一個十萬！！

很感謝你，雖然我知道十萬不是很多，但對於過往月光族的我來說，已經進步了很多 （講緊2020年因為疫情，我身處的美容業是重災區，我上年只返了大概半年工，停業期間是無薪假的）

有很多問題想問你：

1）這十萬，我該如何部署投資？ 已經做了月供股票每月3000

$1000 2800
$1000 1810
$1000 1211

2）其實我還有一些銀行貸款的，每月供$1500左右，尚餘本金$28000 ，我應該提早還款還是將錢投入股票，增值後再還款？

3）我現時的工作是美容顧問，收入不穩定，有時可以月入三萬，條數差時可以只有萬幾人工，而且做得不是很開心，可能我天生不是很進取的人，不會太chur客，加上上司不是很支持我，有時都感到很大壓力。

我的目標是成為營養師，所以一直都在進修中，現時亦攻讀了online degree ，這是我一直會前進的目標。

那麼老師你認為我應該繼續留在現有的工作，為了有時賺多點？ 還是退一步，找其他較穩定的工作，或者做回美容師，然後一路讀書一路有穩定收入較好？

抱歉老師，問題比較多
謝謝你

龔成老師：

先恭喜你！第一個$10萬好重要的，之後的財富就會繼續增長，你已經方向正確，保持進行就得。

1）現時月供的，都有質素，可以保持，長期進行就得。但要留意，你現時月供的2隻，都是潛力類別，這樣會較高風險，因此，建議你之後，加大其他類別的月供，以平衡組合。

2）如果銀行貸款的利息較高，就應該先還錢，減少利息上的開支。

3）你長遠你營養師是大方向，這段時間，就保持工作，加上讀online degree，如果你支出不是好大，其實可以轉去同營養師有關的職業，可能這刻未有專業資格而人工較低，但對你長遠發展可能更加有利，預早認識相關行業。

記住，所以野都是為長遠目標而行的，你用5年、10年這方向想想，就知這刻應該做甚麼。

------------------------------------------------

Q21193：

還想問，當你比亞廸由88跌到12時，你怎知道 或 為何有信心這股一定會升回88以上？

因為你看公司每年毛利純利，股東資金回報等，知道盈利是沒問題？

龔成老師：

所謂的股價，是這刻二手市場的成交價，而我的著眼點，不是當時的$12，而是比亞迪（1211）這企業長遠的發展，這類潛力企業，一定有高有低，有時研發及產品出問題。

但我地要從長遠的角度分析，視點是5年、10年，而我分析到這企業會在行業中行前，而這行業普及時遲早的事，即是佢的發展更強大，都是遲早的事，這就是我當時的分析點。

分析潛力企業，往往不是分析當刻的財務數據，而是研發、將來的市場情況等。

------------------------------------------------

Q21194：

老師，看完你書後想看看賭業股個價抵唔抵入，看能否在疫後受惠，你怎看？

但問題幾間大賭股都沒了市盈率看，為什麼？

龔成老師：

賭業當然是有質素的行業，長遠一定有賺錢，不過現時已比上年疫情時升了唔少，上年時平，現時是合理，銀娛（0027）、金沙（1928），現價合理區中上部。

至於你話市盈率，因為佢地上年度虧損。

而我地分析時，不止要分析一年數據，要分析多年，要分析「正常經營環境」下的營運情況、財務數據。

------------------------------------------------

Q21195：

我今年43歲，十年前移民加拿大，現在政府工作，有兩個小朋友！現在每月儲$500加幣，其中$400放在穩定mutual fund，$100放在股票戶口，我想問你點睇well health? 可否月供嗎？

我想問你會唔會開網上課程？

龔成老師：

Well Health有潛力的，見到李嘉誠都有入股。

佢通過人工智能和大數據等科技手段提高診所的效率，致力于將加拿大極度分散的初級醫療市場帶入數字時代。

Well Health能够為診所提供它們無法獨立承擔成本的軟件工具，這能提高它們的運營效率，進而改善結果，以及縮短患者的等待時間。

醫生可以加入公司不斷擴張的診所網絡，合作方式可以是簽署收入分成協議，或者是直接爲該公司的電子病歷軟件支付服務費。

相信長遠有發展力，不過我唔清楚現時估值，你要自行控制注碼，平衡風險。

我最近同天窗出版社，合作開辦左一個網上課程，題目是關於「資產配置」的，即是講述各種資產與投資工具的特性、投資價值、在財富組合中的角色，至於股票內容就唔算多。你有興趣可睇睇：

http://bit.ly/3pP252j

課程按「人生階段」、「財富累積」、「資產特徵」設計，更有給年輕人、已婚人士、退休人士的精明理財建議。

完成課程後，你會學到：

✓財富系統概念，不再被炒差價的框框束縛；
✓股票、基金、債券、的士牌等資產的運用和買賣技巧；
✓懂得分辨資產質素和平貴，在最合適的時機買賣；
✓如何以最低的價錢，買到最具升值潛力的物業
✓致富3部曲，如何從當下這刻開始啟動！

至於股票班，由於內容太重要，只有實體班，唔會開網上課程。

因為之前實體股票班試過比人偷拍，之後放左上網賣，最後要搞到報海關先處理到，好煩。所以，網上類的教學，都好擔心有偷拍問題，風險太高，因為好多課堂內容，都唔想太公開，只想自己學生知，所以暫時都唔會搞。

------------------------------------------------

Q21196：

你好，請問保險股前景點樣?
2318同2628邊隻較好?
謝謝!

龔成老師：

中國平安（2318）會較中國人壽（2628）好。

中國人壽並不是無質素，不過增長力唔強。同埋企業的賺錢能力不及過往年代。

相信這股唔會再大跌，但要佢大升都不易，長線持有價值都算有，但暫時唔好對股價有太大期望。

反而中國平安近年做得更好，佢有質素，佢有規模，有品牌，近年的發展都不差，不過，股價有時會有少少波動，這主要受投資市場表現影響。

這股有長線投資價值，是平穩增長型，分注投資都可以。

------------------------------------------------

Q21197：

老師，之前睇左你在牛牛節目嘅分享

跟你嘅posts大概4-5年, 知道你揸1211好耐, 但今次至知原來10年, 仲今次至知原來1211試過10幾元升上80幾元又跌番10幾元你都無放。

我21元入吉利,本已經高位跌落來至入, 入左㸃知仲跌, 無走學你話長揸, 升上30幾, 好開心, 㸃知最近跌低去番19, 又非常後悔...覺得應該高位放, 低位再入過...

其實. ...長揸, 吾放, 到想掉動大筆資金來買樓時, 又適逢股價跌番低位就真係似乎錯過良機？？
請龔sir有空指教吓

龔成老師：

你要克服心理問題，你現時的心態，仍停留在一般散戶的心態，如果你想在股市真正贏錢，就要學投資大師，不要學散戶。

投資大師只著重「企業」，不著重當刻股價，你現時被當刻股價上落影響，明顯已經錯左！

好多人事後孔明，以為能捕捉過往股價，但真的能捉到嗎？其實好難好難！

吉利（0175）有質素的，你長線就得。

但要提翻你，我地投資股票，一定要長線，5年是經常事，最少都3年，如果你想快速滾大買樓，就要調整一下心態。

------------------------------------------------

Q21198：

龔sir！！又係我啦！上年我辭左職多謝過你開拓左我對理財既思維，我依家每日都覺得好開心好有動力！

上年23歲生日前我立左目標要搵到第一個一百萬，自己將副業變左全職打理後有一排壓力都真係好大，開支大左但收入好似無咩增長。身邊朋友又話女仔咁辛苦做咩，搵個好老公咪得。

雖然灰左一段時間，但總算跨過左個難關，的確人既潛能係要逼既。雖然我唔反對我朋友所講伴侶重要性，但我覺得一件事還一件事，投資自己先係最重要。

我一直同屋企人住係公屋，我都曾經好自卑，屋企人從不理財，係月光族，依家兩老退休了都無好多積蓄。

上過你課程，睇過你書我反而「強逼」番父母每個月係我比既家用裡面扣除部分左月供：$3000盈富$2000港鐵$2000領展。仲買左本簿仔比佢地每日寫低用左幾多錢，交功課比我睇，佢地話好得意好開心每個月真係洗少左好多

最後我地離開左公屋呀，雖然我只係買左一間舊樓既細單位，但勝在上手業主全新裝修過節省唔少裝修錢。我相信呢個只係其中一個milestone，我會繼續努力希望真係5年內買到我既dream house。

要贏！

多謝既說話希望你唔好嫌多，因為你，當然我自己都有努力啦，啟蒙左我，我相信自己未來會更好的！老師，你也會的，謝謝你

龔成老師：

我相信尋找自己的夢想、事業發展，與找另一半，是無衝突的。

同時，心態上唔應該有「依靠別人，我不想努力了」的心態，我地做好自己最重要，其他人往往只是輔助。

加油！你的方向正確，同時心態很好，你23歲，已經有這種心態，可以預計你將來有可定的成就。

記住，成功的路不是直線，當中一定有相當的困難，但只要你保持正面心態，就一定能成功。

恭喜你成功置業，我會等你更多好消息，加油！

------------------------------------------------

Q21199：

你好！如果睇好電動車板塊，請問應該買比亞迪定2845 ETF 較好？咩嘢價位適宜買入？

另外，中銀香港近日績後股價報跌，請問是否現價可買入定選中國銀行息率較高？

龔成老師：

GX中國電車（2845），這基金的目標是追蹤Solactive中國電動車指數NTR「相關指數」表現緊密相關的投資回報。

持股中最重就係比亞迪A股（002594），以及與中國電動車產業有關的股票，中國因為能源問題，長遠一定要發展電動車，這是大方向，故此股有一定投資價值。

由於近期不少車股被炒起，此股現價略貴。無貨可以現時入少少，到有明顯回調才再慢慢加注。

潛力度是有的，但會比較波動，如投資宜慢慢分注，可長線。

中銀香港（2388）係本地銀行股裡面，是較有質素的一隻，有長線投資價值。唔需要太理會中短期情況。

不過，整個銀行業的賺錢模式已有減弱，無以前咁好賺，之後主力是收息及平穩增長模式。現價合理。

中銀香港有增長力，而中行（3988）就集中收息，要睇你的投資目標。

------------------------------------------------

Q21200：

如果我現在差不多30歲 是否該選擇3319？另外請問823和3319是否都屬同一類 是物管？

現在科技股很多都下跌 是否應該開始物色優質科技鼓？謝謝

龔成老師：

雅生活服務（3319）適合30歲這年齡人士投資的，佢本質不錯，佢無論在業務本質、規模、品牌、財務數據、前景，都是理想的，反映這企業有一定的質素。

加上這企業的背景因素，以及行業的發展，相信這企業的前景不差，有長線投資的價值。

整體是有長線投資價值的。現價合理區中上部，不過股價都會有時出現波動，投資宜分注進行。

佢是物業管理，領展（0823）是收租，不同類的。

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟，不同行業，不用類股都要有。

而同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20001-Q20020）

Q20001：

你好，有樣野想請教，請問你會根據什麼準則，決定賣出股票？

龔成老師：

「企業質素」。

首先你要明白一個概念，我地持有一隻股票與否，關鍵位是企業質素、前景，不要被買入價影響。買為我地買股票就是買企業。

買入價，你的賺蝕，只是一個心理因素，該企業長遠的發展，才是我地是否值得持有的重點。

如果企業有質素，但股價短期下跌，就不用擔心。

如果企業無質素，但你現時蝕錢中，繼續持有只會令你財富繼續貶值，因此要賣出。

如果企業質素轉差，就有可能要減持，因為這股佔你組合的比例，未必值得太多。

------------------------------------------------

Q20002：

早晨，龔sir，想請教下260蚊入左一手1211，依定跌到咁，如果睇長線係咪應該繼續守，還是應該止蝕等佢返到合理區再買返？

另外都想請教下心態問題，個人對於1211真係做多幾多功課，不論係行業前景、國家政策，以致於公司本身既潛力，我都覺得1211係一間優質公司，我亦都有參考過老師你講既參考價(合理區為120蚊，最多150蚊)

然而前段時間股價真係好似坐火箭咁上，睇勢頭根本冇咩可能去返合理區(120~150蚊)，而且見佢前段時間配股300億比200間機構投資者

配股價為225蚊，當時認為既然咁多機構投資者在研究完呢間公司後都願意比225蚊呢個價錢投資入呢間公司，所以認為只要係長線投資

即使比多少少(260蚊)投資亦都無任何問題，但結果投資左冇幾耐就跌到依家197蚊，其實過程中我睇圖都知道股價跌破左支持位

正常應該要止蝕，但我當時一方面幻想睇圖唔一定百分百正確，另一方面又認同價值投資唔應該睇短期波幅，但結果現實就係越跌越多

老師我投資心態係咪出現左問題

龔成老師：

你一手，持有就得。只是要預中短期仍好波動。

你最大的問題，是企業估值與心態問題。

比亞迪（1211）有潛力，長遠有發展，這點你我都知，問題是估值，就算一隻股票好優質，但在太貴的價位買入，都會大幅減低回報，因此，在合理價買入好重要。

如果無貨好想入，而見到佢處貴的水平，投資者也只能用分注、月供等模式進行。

另外，你比機構投資者影響左，以為佢地買入就應該買入，但其實好多機構投資者分析好短視，不能完全盡信。

另外，你「睇勢頭根本冇咩可能去返合理區」，這是最錯的地方，唔好比短期股價影響，要睇翻企業質素、合理價值。

你「其實過程中我睇圖都知道股價跌破左支持位」，唔好信，我持有這股12年，試過由$88跌到$12，我都長線，如果我用睇圖方法，就唔會賺到10倍回報。（巴菲特都唔信圖，你唔好行錯路）。

------------------------------------------------

Q20003：

你好龔sir ，我手持1357美圖和6060眾安在線。都洩緊錢。有需要放棄重整嗎？謝謝

龔成老師︰

美圖公司（1357）質素一般，風險較高，長遠宜投資其他股。或小小注持有。

眾安（6060）我唔敢話佢無質素，不過，估值是最大的問題，其實到目前為止，佢的實質盈利都十分少，這刻的實質業務價值不大。

但佢做這類互聯網保險公司，的確有潛力，同時背後有支持，所以有發展，這部分產生了「概念價值」。

佢無乜盈利，但市值可以去到數百億，當中大部分都是概念價值，而這個價值值多少錢，其實無人知，市場對這價值的看法不一，同時經常改變，所以令股價大上大落。

所以，之後的股價，仍存有相當的不確定。但以穩健的投資角度分析，這股過往一直都不平宜。

因此，這類股可能有潛力，但不適合太大注，如果你持有的數目，已佔了你投資組合一大部分的話，最好減持部分，令你的風險減少。

------------------------------------------------

Q20004：

你好 sir ，我過往主攻舊經濟股
最近先開始入3067
我想入多幾隻新潛力股 請問以下股現時入 合理嗎？

比亞迪 我想一手一手入
吉利汽車
美團
福壽園

Thanks

龔成老師︰

比亞迪（1211）現價偏貴，回到$120才算係較合理。唔建議你一手手入，如果真的想入，回翻D先月供好了。

吉利（0175）本身的質素不差，現時價位已經略貴，要回多2,3成才算合理區，才可分注入市。

美團點評（3690）佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，但增長力難免會受影響。

集團過往一直處於燒銀紙階段，至2019年才開始有少量盈利。未來是否維持，暫時都好難講，這類企業不是不可投資，但不能大注。

福壽園 （1448）現價合理區頂部，可分注，但未到好平，故要控制注碼。

------------------------------------------------

Q20005：

龔成sir你好：早前請教過月供股票組合，每月$5000分別：盈富$2000、領展$1500、港鐵$1500...

直至現時一共供了一年半，盈虧分別：盈富+6.33%，領展-10.3%，港鐵+0.27%...

以上組合能夠是否適合繼續月供？或者需要更改組合？請多多拍教，謝謝

龔成老師︰

我地投資重點應放係企業質素，唔好太在意中短期波動。

你月供組合有質素和增長力，若你係年青至中年人士，都係合適的。

若你係偏年青，又相加大增長力，可以考慮換入或加入一隻潛力股。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

------------------------------------------------

Q20006：

龔sir你好，有野問你
我想問下中概股回流上市

咁我地如果睇好果隻股票 係咪可以係美股買左先？
兩者有分別嗎？

等ipo前美股買跟在港股買 有什麼風險問題 會因為回流消息被炒起 買美股買貴左嗎

龔成老師︰

我地決定否投資一隻股票，關鍵位係睇企業質素和前景。因回留而被炒起，這些跟企業本質無關架因素，我地係唔應該考慮。

我應該先考慮這隻企業是否值得投資，之後再審視佢現時估值，是否合理，來決定而一刻是否值得投資。

至於，買美股定港股，除了2地估值和投資費用成本可能有分別外，其實無太大分別。

------------------------------------------------

Q20007：

Hello 龔sir , 我今年26歲.自己啱啱開公司做小生意.收入唔穩定.但係每月至少有2-3萬收入.

每個月會儲起半份糧.擔心父母開始年紀大.到時有咩事負擔唔起醫療開支.

想財富增值但係對投資冇乜方向.應該如何部署投資？

流動資金大概有十萬左右

龔成老師︰

由於你有生意在手，十萬流動資金留住儲用會較好。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。除了盡力儲蓄、投資、學投資知識外。也要把握這個黃金時間，做好財富增值部份。

策略上，你可以投資"平穏增長股" 和 "潛力股"。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20008：

龔老師，我每月可投資$6000，個人沒什麼目標，只想財富增值，希望你能提供些意見。

現時持有：

月供股票：
2 中電：198@$84.6
5匯豐 ：578@$58.7
66 港鐵：529@$42.9
1928金沙：[email protected]
2800盈富：@$26.271
以上全停供了，因為想重整所有組合。

債券：
Ibond 30000

股票：
1398工商 9手@$5.43
5 匯豐1手@$55.7

之前買過270粵海、66港鐵、1928金沙，全部都有斬獲，不過賺了少少就心急就放了，
因為一直買股票都是抱着短線的心態。

以上應繼續持有嗎？現在想再入270、66、1928，及你近較多講的3067。謝謝！

龔成老師︰

我地投資會運用「先增值，後現金流」作方法，初期應投資較多增值類資產，較後期則應投資較多保守類項目。所以係分配投資項目時，要因應番你自已的人生階段。

你現時的持股，係較保守的增值組合。除了中電（0002）、港鐵（0066）、金沙（1928）和盈富（2800）外，其餘都係收息股。

若你想進行增值，未來月供用"平穏增長股"會較好，以下都係合適選擇。但由於你資金唔多，建議$2000月供盈富（2800）+ $1000供多一隻平穏增值股。其餘$3000就儲起，等大跌市機會。

平穏增值股︰盈富（2800）、港鐵（0066）、金沙（1928）、煤氣（0003）、恆基（0012）、中銀香港（2388）、長建（1038）、粵海（0270）、領展（0823）、希慎（0014）、太古地產（1972）

緊記，唔好停留係賺少少就沽貨，這種賺差價模式。優質股係需要長線持有，才會達至最理想的增值效果。

------------------------------------------------

Q20009：

龔成老師，你好
本人月入$13000，依家月供緊

2800@$3000
823@$3000
012@2000

然後有幾個問題想老師比下意見

1.上面3隻月供股，我應該供幾耐或者供到幾錢先停

2.然後我手頭上仲有$5000剩，我應該再供其他優質股（例如：3067, 0066 ，1810），
定係留起，等個市跌，入便貨？

3.以我呢個進度，可以5年後儲到100萬嗎？

Thanks龔成老師

龔成老師︰

1） 月供係一個長線計劃，月供最少維持3年，並持有這些股票5年以上，才會有較理想效果。

2） 現時大市只在合理區，資金唔好盡用。這$5000先儲起，等大跌市出現時，可以用來掃貨。

3） 以恆指過去年平均回報10%計（連股息再投資），你每月投資$13000，5年後都有相當機會增值至約100萬。

但你組合上有個問題，就係非常偏重地產股。建議你將其中一隻，轉為其他股票。若你年輕，可轉成潛力股。若你已近中年，可選平穏增長股。

平穏增長股︰金沙（1928）、平安（2318）、中銀（2388）、港鐵（0066）、煤氣（0003）、長建（1038）、粵海（0270）。

潛力股︰安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

------------------------------------------------

Q20010：

你好龔sir, 我follow 左龔sir一個星期左右，但是已經改變左我嘅思維同行為

非常感謝你！係近呢一年香港發生嘅事令我好灰同覺得無咩前途，完全好似過一日得一日

自從follow左龔sir後，睇左你如何勉勵人，又好用心教人如何投資，如何為自己創造財富

我覺得你非常用心，所以我都開始醒覺我之前一直都浪費緊時間，無好好充實自己同計劃將來

所以我而家都開始改變緊自己既思維同行為，每一日都用一個鐘睇書充實自己

每一天都mark底自己嘅消費，亦開始留意投資資訊加強自己嘅投資知識，亦買左龔sir既書來睇

遲啲會買埋龔sir既網上課程進一步增加投資資識，我相信會學而致用，對我嘅人生會有好既改變

而家每一天都覺得好充實，而且利用每一天既時間來學習，對未來亦充滿希望

我真的非常感謝龔sir！我幾兄弟妺都因為龔sir既感染力而開始學投資，計劃將來可以財務自由

另外我都借機會想請教一下龔sir, 我已經35歲，我老公差不多40歲，我哋兩個每月收入差不多有5萬蚊

除咗交租，保險費，定期儲蓄（重有6年），日常開支同父母家用外，每月有$15000儲，而家月供緊中電

煤氣，呢倆只供左6個月，另外今個月開始供埋地鐵同領展

由於我睇咗龔sir話年輕人應該集中於潛力股，所以下個月我會開始供1686，而每隻股每月都供$2000

由於中電及煤氣都係穩陣收息股，我是否減少一隻，而將啲資金$2000用嚟供多一隻潛力股呢？

想請龔sir指點一下，麻煩晒同非常感謝你的時間！

龔成老師︰

以你年紀，應以增值為主。中電（0002）增長力唔係好強﹐再加上煤氣（0003）同是公用股，太集中單一行業唔係咁理想。

減少一隻與否，你可以睇翻佢地供款，如果加起達組合3成以上，就要調整。

現時，你每月5成儲蓄，可以拿去做月供，其餘先儲起，用一邊月供一邊儲蓄的策略。新意網集團（1686）作月供目標係可以，以下股票都係合適你年紀，可以參考下。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

餘下的另一半現金，我地就等機會，當大市出現較大回調，就加大力度掃貨，然後作長線投資。

------------------------------------------------

Q20011：

你好龔Sir. 我未有上過你堂，係最近朋友推薦我follow你同睇你著作，才知道.

有感賺錢能力逐年遞減，實在想用現有資源增值保本，想問問龔Sir意見...

本人剛到41歲，單身，月入$26K.

2017年$390萬買入屯門市中心一單位，按7成，分25年，每月供款$10K左右. 但其實物業一直租出，現租金$11K，正好cover每月供款.

而本人跟父母同住公屋.
因租客可能於3，4月退租，在想:

1. 怕租金回落，未能再以$11K租出單位，而現時銀行息口低，有意收回單位自住，或

2. 單位繼續放租，而自己想租出鰂魚涌或北角細單位，因為office返工係太古，跟老家屯門實太遠，或

3. 售出單位，資金作其他投資用途或換其他較新的大屋苑細單位...因樓齡已33年，好怕會面對大維修，而現估值$460萬。應該如何安排？

另手頭資金約$100萬，分佈如下

-約50萬高息戶口，主要用作供樓還款之用
-約10萬外幣，通常放定期
-約8萬現金流戶口
-其他為股票，分佈如下
: 0001月供了5年（2021年超停供），每月$2500，未能計出均價
: 0883月供了5年（2021年起停供），每月$2500，未能計出均價

: 0005，2手，幾年前買入，唔記得買入價
: 0066，2手，應該$20幾時入貨，唔記得確實買入價
: 0580，3手，$2.11入（之前$2.55出咗2手）
: 1810，3手，$35入
: 1979，1手，$2.45入
: 1093，1手，$8.17入
: 0175，1手，$33.1入

我都係高位入貨，應如何變陣？我係想先放咗0066同剩餘嘅0580...

另外2月份開始，想繼續月供，分佈如下可以嗎？
-2800，$3000
-2269，$2500
-2382，$2500

之前1212我$192入咗1手，hold唔住升勢，好驚，$200已放...我應唔應該月供BYD?

多謝龔Sir提供意見。感激

龔成老師︰

物業方面，除非佢升值潛力好低，否則唔建議你沽出，令自已處於沽空樓市狀態。

而是否另找租用自住單位，這個可以較從你生活角度考慮。但盡可能減少這方面支出，因為這會令你用來增值的資金減少。

投資股票方面，首先你要明白一個概念，我地持有一隻股票與否，關鍵位是企業質素、前景，不要被買入價影響。買入價只是一個心理因素，如果企業核心因素未被影響，我地係唔需要理會。

天寶集團（1979）、中海油（0883）質素較一般，不宜持有太多。其餘都有質素，可長線持有。

而月供中，藥明生物（2269）不確定性較高，不宜月供。我唔係話佢無質素，但只宜小注投資，但月供就唔好了，畢竟潛在波動性唔細。你可以用以下平穏增長股代替。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）。

至於比亞迪（1211）係一隻好有質素和潛力的股票，雖然已經係貴。但只要係有質素，其實我地應該長線咁持有，先至最有利。

若你想月供，我唔建議住，最好回到$120才再開始。

------------------------------------------------

Q20012：

您好，龔成老師。我是您的忠實讀者，深受您一直以來推廣買優質股作投資增值的方針。

自追看您的書和文章以來，改變了我的選股習慣，在生活上出現質量的改變，不再花時間盯著股價炒出炒入，而是花更多心機看財報，研究一間公司的實務。

不過最近在投資路上遇到些策略問題，想請問一下。

我持有農夫山泉（9633）的股票。買入位置並不算太漂亮

在$47元左右，而且只有2手。最近市況回調，我判斷並不是公司質素出現問題，只是升幅太急出現調整。

但我的買入價又不止於低得可以漠視跌幅。我不知道應該先行獲利，以免股票由賺變蝕；還是應該觀察，若然價錢調整到不錯水平而加倉？

由於這種半新股在市場上跑不長，我不太確定如何評定$47元到底是高是低。希望在操作上請教一下。感激！

龔成老師︰

記住，我地持唔持有隻股票，唔好用"買入價"去做決定，應該用佢質素去做考量。

農夫山泉（9633）是中國包裝飲用水及飲料的龍頭企業，旗下品牌包括農夫山泉、東方樹葉、尖叫等。

其產品覆蓋包裝飲用水、茶飲料、功能飲料及果汁飲料等類別。根據弗若斯特沙利文報告，2012年至2019年間，連續八年保持中國包裝飲用水市場佔有率第一的領導地位。

業務上，都有投資價值。但始終上左市唔耐，真實面要慢慢先見到。現時真正用數據唔多，要做個好全面架值，唔容易。

我地可以睇翻佢2019年純利只有約50億，現時市值郤去到3000億。雖然佢有質素，但此刻估值唔平。

如果2手佔你總資金比重唔算高，你可以長線持有。

------------------------------------------------

Q20013：

老師，若果手頭上的舊股票，如318，348，6896等已無咩市場成交，那可怎處理呢？

2800由之前22，23元留意到，但沒有買，現時升至最高峰，是否要待回落後才入較理想?

龔成老師︰

盈富（2800）雖然已經升左唔少，但都算合理區，現價可先入一注。每回調10%左右，就再加注。

黃河實業（0318）從事金融服務業務、證券業務、物業等業務。

此股市值和收入都唔高，而且賺錢能力好一般。過往幾年，佢盈利都好波動，甚至出現虧損。

故投資價值只是一般，長線慢慢換碼至其他優質股較好。

中國智能健康（0348）年年虧損，而且仲出現過"十合一"，好大機會係財技股。此股唔見有投資價值，建議沽出。

金嗓子（6896）近年的盈利有下跌情況，其實佢不是完全無質素，但市場過往對佢有太大期望，但現時見到佢增長力只是一般。

你預這股是收息，以及有平穩增值，可以持有住先。但如果太多貨，就應該賣出一部分。

------------------------------------------------

Q20014：

龔老師你好啊！不知可否幫我解答啲問題？

本人29歲，已婚，兩公婆一個月合共約5萬，從事公務員。持有一物業

樓貸有約220萬，每月還約8200。存款約有60萬。每年兩公婆保險約3萬。

請問應該點樣投資好啲？

龔成老師︰

由於你已有物業，之後的財富配置，應著重股票類別。而存款不要太急用盡，要慢慢分注。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

以你年紀29歲，應用"平穏增長股" + "潛力股"的組合。現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）或

潛力股︰小米（1810）、中生（1177）、福壽園（1448）、安碩恒生科技（3067）、港交所（0388）、阿里（9988）、騰訊（0700）。

現時大市只是合理區，你現有60萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20015：

老師，你好我從來未買過股票，很想學下投資，目標是5年能賺取100萬，現在有資本50萬，請教可以怎樣投資呢？

龔成老師︰

對新身來說，要5年升一倍，策略上進取點。你可以投資"平穏增長股" 和 "潛力股"，比例各佔一半。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

潛力股︰選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。

大市現處於合理區，50萬資金先投入一半，用"分注"形式，慢慢儲貨。餘下一半就等大市出現，才大力掃貨。

這樣安排，相信較大機會令你達成目標。但由於你組合中潛力股佔唔少，佢雖然可提升增長力，同時波動性都會較高，令你最終回報不確性高左，你要明白這個風險。

------------------------------------------------

Q20016：

你好, 龔sir，我持有1797，均價30. X ，但近日一日低過一日，已經52週低，請問龔sir 覺得還有機會回升嗎？

定係止蝕換馬其他股票？謝謝你。

我比股票玩左15年，現在35歲，因為太信消息，亂買股票，手上仲有一大堆以前高位買入的股票

（有啲蝕到手續費都唔夠,都唔寫出來了，總之呢15年都係蝕多，超過6位數字）：
1088 33元 1000股
358 21元 2000股
698 2元 60000股

近2年保守啲
1398 4. 8元 20000股
823 59元 500股
1797 30. X元 2000股
941 49元 2000股

而家就係好擔心隻1797，唔知點好。
請問龔sir我應該之後點買股較好？

龔成老師︰

記住唔好短炒，"52週低"這些技術分析無用，唔好用佢做參考。

我地買入一隻股票，一定要分析佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，就記住先停一停，唔好投資住。

新東方在綫（1797）有潛力的，不過之前股價上得太多，就算現價仍少少貴。佢主力要線上教育。向學生所提供的在線教育課程包括大學教育、Ｋ－１２教育及學前教育。當中，大學及Ｋ－１２教育分部課程均為課外活動性質，不計入大學或中學文憑要求。

大學教育服務主要包括大學考試備考、海外備考及英語學習。Ｋ－１２教育服務包括涵蓋中國小學至高中大部分標準學校學科的校外輔導課程，及提供專為普通高等學校招生全國統一考試而設的備考課程。

長遠的潛力是有的，但股價都升左好多，比較擔心是企業估值問題，始終市場有時會過份樂觀。只可以話，這股潛力是有，若佔你組合唔多，可持有。同時，你預佢股價會較為波動。

中國神華（1088）、江西銅業股份（0358）和通達集團（0698）本質算是不過不失，若佔組合不多，可守住先。

其餘股票無問題，可持有。

整體而言，你無論定平貴和選股上﹐都唔係咁理想。我建議你再投資前，先學好正確投資技巧，咁會較好。

你可以先睇我寫架"80後百萬富翁"、"財務自由行"和"股票勝經"，都適合初學者，相信對你有一定幫助。

------------------------------------------------

Q20017：

老師你好！我想研究股票，但有以下問題，希望你可以指教我

1)點樣可以發掘到潛力股/板塊?

2)點樣可以了解市場情況 (包括現在&未來趨勢)?

3)了解一間公司除睇年報外仲可以有咩方法?

4)而家好多優質股票都偏貴，資金唔多既情況下，係咪要等跌市先好入？

5)有冇咩書籍可以推薦比我？

謝謝老師

龔成老師：

1）要用一套有系統的方法去選股，如果只睇傳媒或別人推介，很多時已經是「升左」，所以，要自己發掘。

例如利用企業的財務指標，產品的增長力，行業的發展等。這是一個好大的題目，你可以睇《選股勝經》。

2）要了解行業、產品，以及大環境的變化，要睇好多資料的，企業年報都有用。

3）年報是最有用的，該公司的年報及對手年報，另外就是網站，以及一些大行報告。

4）對，或首先投資舊經濟類股，因為這類未貴。

5）《股票勝經》《選股勝經》《50優質潛力股》。

------------------------------------------------

Q20018：

老師我想多謝你！

我4年前（35yr)開始讀你的書，後來也上你的堂！雖然我已婚，有2個孩子，月入$26000，已錯失黃金投資時間，但經儲蓄+投資，今年終於有第一個100萬！

目標15年後有400萬

龔成老師：

太好了！加油！

我相信只要保持進步，知識與儲蓄投資同時增加，你要達標無問題的。

------------------------------------------------

Q20019：

Halo 龔sir，我最近學習緊研究資產負債表，發現左樣我覺得幾有趣既野

1. 點解同樣為賭業公司，銀娛既長期負債係會比金沙少咁多，而相反短期負債就係金沙少d？

2. 有冇話長期負債或者短期負債邊樣少d係會好d？

3. 如果見到公司既現金係多過長期負債，咁係咪都代表公司既財政比較穩健？如果唔係既話現金呢項應該同邊樣對比比較適合？

問題有點長，唔好意思！謝謝你！

龔成老師：

1）每間公司的資產負債結構唔同，有時一間公司本身的長債就到期，就會變成短期債，因此不一定能比較的，仲要有好多野要分析。例如大家的發展等。

2）通常長期負債都是為企業長期發展而用的，而短期負債就是給公司營運，如果企業以短期負債去進行長線投資，就會出現了資金的錯配。

3）現金較多當然較穩定。

投資者會分析佢現金的比例是否足夠，最重要是日常的營運，同時會分析佢的現金流情況，這都會影響企業要多少現金去進行營運。

------------------------------------------------

Q20020：

老師你好 最近Saas 類別股票 2013/3888/268 邊隻會比較好？

老師你好 想買3033/3067 建議都持有 還是㨂3067？ 感謝老師

龔成老師：

這3隻都不差，都是有質素有潛力的股。

金山軟件（3888）算是這刻在3隻中無咁貴的一隻，佢主要從事遊戲研發及提供網絡遊戲、手機遊戲及休閒遊戲服務；提供雲存儲及雲計算服務；設計、研發及銷售推廣辦公軟件產品及服務。

業務有質素，長遠發展力不差，不過擔心股價較為大上大落，現價合理區頂位，唔建議大注投資。

這股前景正面的。

至於3033/3067，我睇翻佢地的管理費，3067較少，所以選這個較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。