【龔成問答信箱】（Q18761-18780）

Q18761：

龔成老師:有一些關於理財投資問題想請教。小妹年有30多，出黎做事近10年，但人工一開始唔高，仲要還學費。

一開始得1萬蚊收入，之後加到兩萬，到而家3萬幾，10年黎，我只係草到30萬(呢兩年先每個月草兩萬，連家用洗一萬)，好後悔過往日子好大洗，又去旅行，又玩呢樣果樣。

搞到自己理財好差，又唔識股票投資，一直覺得草錢最穩陣。

直至我睇左你本書80後百萬富翁後，認為錢係要錢搵錢先有用，睇完本書真係獲益良多，貶值o既野真係唔好keep咁多。

本應我係想keep住每個月草20k ，但我眼前有個offer 係可以有機會去海外居留工作，我知道我出去兩年o既經驗同價值都會提升，我好想去試！

但以當地生活同人工係低過香港呢份幾千蚊，加埋d 稅、家人生活費(幸好唔駛供樓).....，我每個月只可以草到10K(雖然你有話應該係諗左草幾多先)，連埋bonus ，一年大約草到130-150k左右。

我29yrs old 有買儲蓄保險，一年供$12000，65yrs old 預計拎到70萬左右，另外仲有醫療、意外，一年供$13000左右。

想請教老師，如果咁o既情況，我又想低風險有d 被動收入，填補番我草少左o既錢，我係未應該買d 收息股例如盈富（2800）、港鐵（0066）、領展（0823）....

應該拎幾多錢出黎投資? 或者應該買d 咩投資產品呢？

我希望能夠40前草到100萬番黎，唔知有冇可能~~~
謝謝你，老師！

龔成老師：

有心唔怕遲，你現時仍是儲蓄投資的黃金期，只要好好把握，一樣可以完成到好多財務目標。要40歲$100萬，你可以做到的。

另外，我地做決定時，要以「長遠」的目標為基礎，如果你到海外工作，對你長遠發展最好，就要去做，就算佢影響你中短期的計劃都唔緊要，最重要從長期方向著手。

當我地進行人生財富累積，會運用「先增值，後現金流」作方法，年輕人應投資較多增值類資產，而較年長的，則應投資較多保守類項目，因為年輕人的財富系統未成形，同時負擔較少，可承受的風險度較高，所以會著重增值為先。2
例如初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到年紀漸長或已累積了相當財富後，才漸漸轉成收息型股票。

你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

------------------------------------------------

Q18762：

老師急救教, 屋企人需要一畢大資金做手術, 我應該放現時蝕緊錢既優質舊經濟股恆基港鐵領展, 定已經賺左錢既阿里思摩爾新經濟股?

或是我應考慮銀行低息貸款 以確保資金可繼續增值?

龔成老師：

最重要是從「質素」，組合的長遠配置角度出發。

唔好理「買入價」「賺蝕」。

上述的幾隻股，都有質素的，你可以想想長遠的組合比例如何配置。例如新舊經濟比例你長遠的比例，你自己的風險承受能力（新經濟股一般的風險會高少少），以組合的角度，去睇下組合配置點最好，然後賣出相關股票。

至於借貸，這是最後一步，暫時唔太建議。

------------------------------------------------

Q18763：

龔sir , 有你的提醒,睇曬80後百萬富翁,亦報咗股票班。相信40歲亦有心唔怕遲,現在好開心,因自己有以下改變：

1.每日記賬,了解自己消費模式；

2.上個月開始月供股票$9000,包括：盈富、港鐵、領展、小米，有實際行動才重要；

3.儲現金$3000，以備不時之需；

4.盡量減少不必要支出。

財務狀況：穩定職業，月入約5萬，供樓$15000、家用$3000、交通$3000、飲食$5000、保險交稅$7000、其他娛樂、學習、衣服等約$6000。

問題：想請教，如規劃換樓，又唔駛供得咁辛苦。目標係要5年內達500萬買樓首期。

（現有400萬層樓升左約80-100萬，當時1成上車。）
仲有咩可以做，令目標較易達成，謝謝你的幫忙及解答！

龔成老師：

其實你的方向已正確，下一步你要學識運用現金有效投資。

上述的方法，你照進行，同時，你要在月供之餘，留少少現金，儲一些「等機會投資」的現金。月供股票，好處是平均買入價，但缺點是無法捉到較好的買入時機，因此，你要同時留有現金，以把握機會的模式投資。

你其實報左股票班，只要上堂好好學知識，之後就能運用到方法。

另外，你同時可以想方法「增加收入」，例如長遠提高薪金，以及各種增加收入的方法。

你以月供加上把握時機的模式並行，我相信會加快你完成目標的時間。股票班見！

------------------------------------------------

Q18764：

平時聽到有d option方法係: 升的話可以收期權金，跌的話可以買貨。咁樣係咪算係比較高值搏率? 具體做法點做?

用係優質股上面係咪可行?

龔成老師：

唔一定有著數的，你細心想想上述所講的方法，如果企業出現較大改變，假設重大利好因素或重大不利因素出現。

當出現重大利好因素時，股價會大升，而你只能睇少少的期權金，股價大升無你份。

相反，當企業出現重大不利因素時，股價大跌，你就要強行接貨。

細心想，這是一個「風險無限，回報有限」的策略。

------------------------------------------------

Q18765：

Sir, 想問你點睇下年購置 納米樓 上車放租/自住一段時間再放售？滯銷機會大嗎？
新盤果d納米樓

龔成老師：

先講樓市，我相信樓市中短期會跌，始終香港經濟轉弱，但這只是中短期。

長期來說，香港樓市仍是向上的，因為香港樓的長期供應仍是不足。

至於納米樓，我自己有保留，我相信250呎以上的物業，較有基本的質素，納米樓質素始終較弱，如果出現跌市，會有較大的受壓。加上新樓，一向都有較大的溢價。

因此，除非你計算過，呎價、預期租金回報率，較吸引，否則，未必值得投資。

------------------------------------------------

Q18766：

一直都有留意你啲分析，想問下0788中國鐵塔咩位先算系合理價？

同埋我想認真開始學下自己去分析股市，請問咩書適合新手學習，我見之前你都有答過類似問題，都推左好多書比讀者。

我想知道點解分析邊啲系適合投資，或者想分析股市要留意咩因素等等，請問邊本適合啲？

龔成老師：

中國鐵塔（0788）本身有質素、有前景，中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入正不斷增長，盈利都保持向上，但股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

考慮到佢的質素、發展能力，這股算是合理價。

由於這股有發展力，可長線。

但如這刻買入，分注入可以的。

你睇《股票勝經》，最適合你的。

------------------------------------------------

Q18767：

龔成老師，我看完你那兩本著作了，真的獲益良多，真的很感激你無施的付出。

最終我都買了一層$790萬的兩房樓，月供$26000，租金收入每月$16000。我自己繼續租住3房套，租$26000。

我現在是否應該以你所講，股樓並行的方法去賺取更多財富來填補我每月付出$26000的租金和額外補貼的那$10000呢？

即是最好有收入或收息，可以彌補$36000的支出。我43歲這個年齡究竟應該要投資較為進取博倍升股，還是收息股呢？

有什麼股票適合我？

我如何利用呢15年時間，讓我可以財務自由呢？

謝謝老師

而家還有的股票，我應該再買入多些煤氣還是買第二隻？

龔成老師：

股樓並行是好方法，因為這在財富配置中較平衡，同時能享受兩種資產的優點。不過，你唔需要刻意為創造足夠支付供款的金額，而去投資收息股。

最重要是睇翻你的人生階段，你43，財富仍有增長力，其實唔需要太集中投資收息股。可以在這刻投資平穩增長股，令財富有所增值。

煤氣（0003）是有質素的股，不過只是平穩增長，你唔需要太過集中這股，你可以同時投資其他股，以及在組合中，加少少潛力股。

你可以考慮盈富（2800）、銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

如果想增長力高少少，可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、比亞迪（1211）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。

------------------------------------------------

Q18768：

我想問有關支出和負債既定義？窮爸爸富爸爸中，購買房地產供款是負責，那租樓支出是屬於支出還是負債？

就算租樓不是欠銀行錢，但還需每月支出。所以想知支出和負債的定義？怎樣才算知出？怎樣才算負債？

食一餐飯，一次性既支出不等於負債？電話費和租金每個月都必須支出是否=負債？

龔成老師：

租樓支出是負債，因為出現了「持續性」的支出，任何一個項目，只要持續取走你現金流，就是負債。

其實，你大約明白就得，唔需要太執著在字面上的意思，佢最重要是帶出，我地凡增加「持續性支出」的項目時，都要小心，因為佢不斷會出現負現金流，令我地離財務自由遠左。同時，令我地每月可投資金額少左。

------------------------------------------------

Q18769：

老師，想請教：

1. 如果想買600萬樓，600萬樓屬唔屬於細價樓，應該個部署係點? 先買再細價樓，再買600萬樓還是怎樣?

2. 其中一part 講到不要係經紀面前亮底牌，咁如果經紀問我budget 預算幾多，應該點答係最適合

另外，想問睇你邊本書可以學分析股票質素

另外邊本書能學習分析股票平貴
謝謝

龔成老師：

1）過往$400萬以下是細價樓，現時可理解$400萬、$500萬，都可算是細價樓。

如果你想買$600萬樓，唔建議買$400萬再轉$600萬，因為你的買賣成本會好高，唔值得，你不如耐心少少儲資金，一次過買入$600萬樓仲好。

2）如果你唔識下供款及按揭等，而你需要經紀幫手，你就要同經紀講具體情況。如果你自己已好清楚，你就可以講少D心目中金額比經紀聽。

你可以睇《股票勝經》《選股勝經》。

------------------------------------------------

Q18770：

老師，聽了你的建議後3868在2.7時入了6000股，覺得還未入夠，本想再分階段入，但現在升得有點誇張，應該再入嗎？謝謝老師～

龔成老師：

信義能源（3868）有質素，佢主要於中國經營太陽能發電場業務，並向國家電網的當地附屬公司銷售電力。而佢派息高的，因為管理層話會用高派息政策。

投資價值都有，但不能過度集中，因為佢業務都有風險的，要注意股價波動，如分注長線都可以投資。現價合理區頂。

如果你現時佔組合%已有一定數量，就唔好加。如果未算多，就等回少少先加。

------------------------------------------------

Q18771：

龔成兄，本身打算去你上堂，但都係冇期。唯有買你啲著作睇住先學住先。

想講就係我終於開咗間online shop,起碼自己可以自律地學習和思考如何做，但成績未算成功未回本，真的要多多努力。

問題1：你覺得HSBC有冇機會翻生，自從不派息後就每況越下，遠景也不算好，尤以政治因素？

2 ： 比亞迪上到100以上，如果現在入會否太高位，你認為現在合理價應該幾多？

龔成老師：

加油！網上的市場其實好大，但你要找到自己的獨特性，以及吸引人之處。

1）匯控（0005）賺錢能力與增長力的確弱左，但又未去到完全無質素，近期股價受壓，除左佢經營環境影響，佢派息問題都是因素，因為市場一向理解這股是「收息股」。

我從股息角度分析這股。

相信長遠是收息股，但股價增長就有限。可以先從佢近年唔派息及財務情況分析。

首先睇翻佢財務數據唔算話特別差（但當然不好），近期停派息，主要原因係接獲英倫銀行透過審慎監管局發出的書面通知，要求匯豐取消派息。

所以，在派息方面，佢並不是自己好唔得，而去到要唔派息，而是因應翻英國監管局要求，才這樣做，所以，雖然是不好的利息，但不是核心性不利。

停派息對收息股從來都不是好事，但在這全球經濟咁差時候，為集團預留一筆資金備用，對集團和股東都是有利的。

在全球經濟環境影響下，集團中短情況相信都會維持波動，未來再停派息也說不定。但我地投資應該要集中考慮翻佢長線因素，雖然預期匯豐中短期表現會受壓，但長線來說，並不是零質素（當然，質素比過往差左）。而銀行業的賺錢能力，已不及過往年代。

作為收息股係可以，概念上，就是放棄中短期股息，而預期將來慢慢回到正常狀態，只要你投資組合唔好太偏重單一隻匯豐或銀行業就無問題（同時，不能集中在銀行股）。

記得，唔好佔比太重就得。同時明白這只是收息股，唔好對股價有太大期望。同時不能持有太多。

2）暫時睇，仍是$80以下較合理，不過貨要觀察，要睇佢實質業務的發展有幾勁。最好起碼等$100以下先考慮，如果真的好想入，就月供好了。

------------------------------------------------

Q18772：

龔成老師，以下係我係股票市場經歷過兩件最錯的事，關於我的賭徒心態同關於股票群組的。因為最近看了一些報道，有感而發，所以希望同你分享，同時我寫低用黎警惕自己。

追返你某舊post, 原來有人同我一樣係282 高追而輸錢。我一開始時贏，但吾識走，後來跌，吾憤輸，諗住博返彈，點知佢吾彈，佢係咁跌我係咁加注，加左十幾注，結果兩日後先識得如夢初醒。

我好想搵快錢，入左幾個股票群組。其實知道好多係騙案，但諗住set 好系統5-8%自動止蝕就冇事。諗住會有得執。

有一次避過左80幾%的跌幅，以為自己好醒。我仍然好小心，每次都細細注。

第一兩次係贏到小小，但之後幾次好像都知道有人set 自動止蝕咁，每次都回落到剛好我定的止蝕位就返彈，然後那個老師在群裏說要把定系統止跌的人離群，說會影響股價、說執行力不足、不信任之類... 真的不知道他們點樣操控股價

這些雖說是交流群，但我問一些比如圖表的技術問題，也回覆：不用問，跟著操作就可以。 這樣我覺得好像要被人操控一樣，就冇心機再跟，賺也賺不到很多，其實最終係輸的，但主要係跟著這些群咩得著都冇。

這兩個我錯在股票市場的事係同時發生，只係發生係短短一兩個星期內，慶幸我唔係好老，輸咁多錢心臟仲頂得住。唔敢同身邊任何人講，到現在我仍然心有餘虧。

曾經覺得自己不論事業、專業領域、人工都比別人優勝，但點解看著幾個舊同學都兩三個大物業了，我還只是努力供緊一個小物業。比較之下我諗點解我手上的資產會比下去，覺得是有什麼不對。

我不繼在網上搜可以至富之路，有緣之下我也找到了你的FB，覺得你的投資理念同巴菲特有點相似，所以就一直追讀，然後覺得很多都很有道理。

也追看你同其他網友的留言，感受到你有真心幫人（是有感動到啦）。有些理論是明白了，但做起上來卻有點困難。我會努力，至富為目標。

這個幾月，我開始了每天記帳嘅習慣，還把之前所有股票交易都記錄下來，我希望我所有嘅消費支出同埋每一筆股票交易，我之後都可以作為檢討，每次睇到282和一堆妖股的損失會有所警戒。

以我的年紀，現在才開始學習投資是有點遲了，我希望從現在起我能夠持之以恆地努力，追回我以前所浪費了的時間。

衷心多謝你有耐心地看完我的長編感言。希望下次有機會再來同你分享的是我的投資成長路。

龔成老師：

每個投資者都會經歷這類錯誤，我都試過，20年前，我都是短炒者，技術分析者，用左幾年，輸足幾年，之後長線投資，就開始不斷賺錢。

我好後悔當時浪費左幾年去學這些分析技術，我當時不斷睇書、上堂學短炒，但最後都是輸，好後悔，只怪我當時無知。

之後做銀行同證券行，見大部分輸錢的客，就是短炒的一群！這是我10年見到的情況，這是行內的秘密，根本大家都知短炒者一定輸，但業界一定唔會講！

另外，如果你分析全球真正賺錢的投資者、經金經理，佢地都無人短炒，都是長線投資的，巴菲特更講明反對短炒，反對技術分析。

只要我地細心少少去想，都會明短短炒根本賺唔到錢。長線先至係王道。

另外，現時的股票群組，大多都有騙子在其中，你永遠唔知佢底牌是怎麼，因此根本無得玩，建議你離開所有群組。

你早D經歷錯，這是好事，之後保持進步就得，我都是當時經歷過，之後每次買股票都會那小心，要自己做好研究先入市，要自己寫一份報告比自己，好確定值得買，先會買入。

我相信你長遠財富能穩步增長，加油！

------------------------------------------------

Q18773：

老師，我終於的起心肝入左數報讀你既股票課程，好期待呀！

我現時有200萬，60萬係股票（有12，66，1928，788，285，9988， 1038，823，700，1810），最多投資放左係9988度，其他一直無用黎投資，因為看好阿里爸爸， 1211， 388如果每個月買一手9988同1211，這個方法可行嗎？

因為之前成日一次入幾手會有機會面對高位入貨既問題，同埋完全無收集優質股既概念，入完一次就放左係度，無辦法累積更多好既優質股！ 所以想問下你每個月入一手咁樣既方式可行嗎？

謝謝老師，期待上堂時可以學到更多

龔成老師：

你現時持有的，都是有質素的股票，你可以長線持有。

至於一手手入的模式，其實與我平時鼓勵人月供股票，都是類似的，原理就是不斷儲貨，首先，一定要優質股。

另外，你要控制金額，因為有些股如每一手的金額較大，你就要留意下股價，如果股價太高，就要停一停，又或隔耐少少先入。

以「收集優質股」模式，方向是正確。

以你現時的現金情況，仍可入貨，但由於上述你想入的幾隻股都貴，因此最好等等，或真的少少注入。我比較建議你等一等，同時上完堂先決定會較好。

------------------------------------------------

Q18774：

老師，多謝你嘅認真回答，同時一直都好想多謝你.

我人生第一次係今年4月, 因為你嘅介紹, 買入比亞迪. 同時亦成為咗我人生第一隻倍升股!

我覺得我冇嘢叻， 最叻就係畀我遇到一個好有心嘅人。 老實說 其實一年前已經add咗你facebook ，但係一直都覺得買股票係賭錢 ，投機嘅行為， 所以一直只是隔岸觀火 。

但係藉住你認真有心的解答網友問題 ， 學到好多知識 ,亦都重新讓我了解什麼是投資 .我對你眼光及為人都好有信心！( 甚至比比亞迪更多)無言感激！

龔成老師：

太好了，比亞迪（1211）其實我講左好多年，由2016年《50優質潛力股》已推，我自己都持貨10年，現時終於有初步收成。就算你想賣出，都要持有一部分，長線。

其實，香港有些投資者都有選股能力，但要佢地長線，耐心持有，實在太難，但這才是真正的投資方向。

好，你現時保持正確的投資方向，我相信長遠對你財富有最大影響。保持進步啦！

------------------------------------------------

Q18775：

老師，我六月開始買入美股FUTU，因為身邊多左人投資用富途。

然而自美股大市上一波震盪FUTU就陰d陰d跌，我明白熊市對證券商影響都大，想問下老師應該放出股票之後牛再入返，但同時唔想放棄優質股。感謝老師

龔成老師：

我自己無特別研究FUTU，只能比一些初步分析。

佢係一家在線經紀商，提供一d一站式的在線投資服務，通過平台Futu NiuNiu提供服務，包括香港、美國、美國、美國、中國大陸的市場數據、交易服務，以及新聞等等。

佢憑經紀傭金及手續費服務，去產生收入。相信長遠有發展，不過現價就唔算平。

你唔需要太會中短期的股價上落，最重要是長遠的企業發展，當然，如果你確定這股長遠有質素，有潛力，就持有。

------------------------------------------------

Q18776：

老師，黎緊就快上你堂，十分期待，最近又買左本年報勝經開始睇緊。

1. 想問下係上堂之前/上堂期間會唔會有咩準備功夫可以做等自己可以更well prepared for 投資股票？
2. 因為最近買左物業，所以冇咩現金係手 扣埋每月供樓同雜費 每個月最多只能儲$5000左右 本身打算將哩$5000都月供股票 但好似有啲冒險 變相冇現金係手...所以最後冇做到月供股票

你覺得我以上做法正確嗎？

3. 但我又心急想快啲可以開始累積到財富，所以個心情有啲矛盾 成日都想入市 都又唔知應唔應該咁做

因為最近股市開始回翻 不過好似仍未到大手入市既時機 但老師經常強調股價/大市走勢係冇得估 究竟會唔會再跌都係未知之數 但如果唔跌就會錯過左入市既時機...

所以我一路都唔知幾時入市係最好
我心態上應該點樣去調節？

4. 依我哩個情況我打算先儲現金 到大約儲到10萬現金先開始做月供 我估計如果慳啲洗應該出年4-5月會儲到哩筆錢

如果中間上堂真係發掘到潛力股 可能會一手手咁買入 個現金流會比較易控制到
你覺得此舉可行嗎？

問題有啲多，老師如果得閒可以俾啲意見
十分感謝

龔成老師：

1）你上課之前，多睇理財、股票類的書，睇《股票勝經》，留意一下財經新聞，到時就較易跟到。

2）你點都要留有現金，唔好太進取，理財講配置、平衡，先想風險後想回報。你暫時儲現金先，上完堂有具體策略先投資。

3）第一，平常心面對大市，唔好比心理因素影響左，成功投資者，「理性」是好重要的。第二，中短期大市上落好正常，我地最重要是著重長期的配置。

4）可以，你可以用$10萬作目標。如果中途有些優質股大跌，出現機會，你再一手手買入，是可以的。

------------------------------------------------

Q18777：

首先好多謝你回覆，現金有80萬請教要怎樣投資，之前買股票蝕咗10幾萬，謝謝

龔成老師：

其實要睇翻你的年齡、風險承受程度。

我地不是炒炒賣賣，而是進行財富配置，原理就是將你的$80萬現金，配置成為一個財富組合，長線持有。在你可承受風險的狀況下，合理地爭取回報。

你可以考慮平穩增長股+收息股。

你可以考慮盈富（2800）、銀娛（0027）、恆基（0012）、中銀（2388）、港鐵（0066）、煤氣（0003）、粵海（0270）、領展（0823）、港交所（0388）、希慎（0014）、太古地產（1972）等。

同時可以投資部分收息股，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、匯豐（0005）、置富（0778）、陽光（0435）都可以。

你可以了解下這些股票，然後從中選股。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q18778：

老師，我一直都有將小朋友啲利是錢儲起，我想幫小朋友增值，方便的話比啲意見

現時手上有$58000+4兩金粒，另有已供緊教育基金，仲有5年供完。

另外小朋友加埋每月可儲$1500

今日睇完選股勝經，內文提及比亞迪電子，即諗起以前（大約2011年）老闆個女婿當時不停買入比亞迪電子，以我所知都投資左7位數字

因為當年呢隻股波動比較大，老闆不停叫女婿唔好買，唔值得投資，老闆本身都有買賣股票，但都只屬短炒，只可以話係投機

但女婿係一直持有，跟你既理念一樣，買股票等於買企業，只要係優質，比啲耐性，資產就像雪球一樣

龔成老師：

小朋友果度，你可以持有黃金及基金，另外，可以長期供指數基金，例如每月供$3000盈富（2800）就得，長期進行，如果想進取少少，就加入安碩恒生科技（3067），長遠的增長力不差。

因為這部分是長線的，因此你只要不斷投入，長線持有，投資一些長遠有價值的項目就得。

比亞迪電子（0285）能夠持有10年，相信回報已經好多，這股絕對值得繼續持有，就算想賣出，部分好了，點都要有貨持有。

其實香港人好有趣，見到最賺錢的人的方法，如巴菲特，明知是最賺錢的，但唔用。卻偏偏用一些短炒，未見過有人賺大錢的方法。

其實我地投資真的好簡單，跟最賺錢的人學就得，這是有腦的人都明的事。

------------------------------------------------

Q18779：

其實徐淨後係咪一定會跌？

果本80後的百萬富翁，係咪各大書局都有得賣？

龔成老師：

理論上「係」，這是自然調整，你當一間公司，現時值$100億，佢派走左$10億現金，你之後買這公司，當然只會值$90億。

但佢如果除淨後市值上到$120億，這代表除淨後，因為其他因素令佢上升左$30億。

書本在三聯、商務、誠品都有得賣。若你見唔到，問下職員就得（又或向職員訂都可以）。

------------------------------------------------

Q18780：

呀sir我想問埋比亞迪，之前平均價51蚊買，升到102既時候我放左一半，而家佢一路升到接近130，感覺放早左好多

現價其實係咪已經好貴呢？我是否應該放埋餘下一半？
我現時1211仍然維持少量月供，持貨佔投資總額大概一半

龔成老師：

記住，無人能預測到股價，無人知$100是頂，還是$200是頂，所以我先建議「升一倍，賣一半」，這是對大多數散戶較適合的方法，因為較為平衡。

你預下的貨就持有。我自己暫時無放，建議你點都有一定的貨，長線持有。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q12421-Q12440）

Q12421：

成哥，我賣左層居屋，買左層私樓，要還600萬，還30年。我睇到你話借錢買樓，如理財不善，都係唔會創造到財富。

宜家我地供樓每月還27k 股票投資10k現金儲蓄5k ，其實已經佔我地家庭收入60% 。我嘅想法係供樓嘅錢都係儲蓄投資嘅一部分，我呢個想法正確嗎？

我地仲有無其他野可以做？我地黎緊嘅理財重點應放喺邊呢？

龔成老師：

嚴格來說，自住樓不能視為「真資產」，你現時供樓，每月都要支付支出，主要可以分為「真正的供款」、「還息」，只有前者，先可以視為儲蓄的部分。

當然，現時低息環境，對你的影響不大，但若果將來加息，甚至去到真正的高息環境，對你就有真正的影響。

你這刻可以做的，就是好好利用餘下儲蓄，去滾大財富，你每月保持「股票投資10k現金儲蓄5k」，適合的，就算你有資金，這刻亦不用提早還款（因為仍低息）。

你利用月供等方法，投資平穩增值股，盡力將財富滾大，並保持儲蓄。

到了多年後，相信你財完富都滾存到一定的水平，如果到時是高息環境，你就可以利用滾大的資金，去還部分款，令你「還息」部分減少。

如果從到時利息仍不高，而你又有一定的資金，你可以選投繼續投資股票滾大財富，如果到時樓市不貴，你亦可以投資多一層樓，只有「優質股」、「收租樓」我地才定義為資產項。

------------------------------------------------

Q12422：

龔成老師：你好！ 近來經朋友介紹睇老師的文章， 發現老師的意見比其他的評論員中肯有見地, 分析亦詳細。所以想請教老師：

本人是80後準媽咪，上年年中開始月供股票， 一個月$2500. 近來想多供$1000-1500幫將出世的小朋友儲蓄一筆學費/ 現金， 想問下列幾隻是否有潛力長期月供持有

1. 港鐵 （066）現在是否合適月供？
因現時價位是$5X左右有點貴。 請問建議月供多少？另外 , 長遠來看是否有機升過 $60同長期持有？

2. 特步（1368）
現在這類運動用品股向上升， 會否帶動其他同業向上？ 特步公司發展是否有潛力長期持有？ 如果長期持有年期要多久見成效？

3. 另外， 如果想平均風險成本， 除下列月供持有股外， 可另加什麼股票平衡風險？ 如果黃金ETF / 有色金屬， 基建股 （燃氣/ 鋼鐵/水泥）是否可選？ 有那幾隻股可考慮入手？

現手上有一小筆港元現金做定期。 非常感謝老師！

月供：939 、2800、6、823

另持有
788- 1手
11- 1手 （$202 入了1 手， 現在一直未回本）
1177- 1手

龔成老師：

1）港鐵（0066）當然是優質股，這股絕對值得長線投資，現價在合理區的上部，其實你以月供的模式就得，唔需要等佢跌先開始，因為月供本身是一個分注投資的模式，能將買入價有效平均，因此，只要你長線月供，基本上已經可以開始。

2）特步國際（1368）不錯的，這股有質素，但業務就會有少少不確定性，令股價略有風險，你預長線3-5年會較好，這股只要不太大注投資，可以的。

3）最好是加上盈富（2800）因為這本身是一個50隻股票的組合，將盈富加進你財富組合，會令你組合更平衡。

至於定期，要睇翻佔你總財富的比例多少，如果較多，就可以將部分，分注投資盈富，如果不算多，就持有現金先。

------------------------------------------------

Q12423：

你好！我近年都有拜讀你的著作和看你facebook的資訊，獲益良多！

近來見到哈爾濱電氣（1133）私有化失敗，股價跌了很多，有評論員分析說股價已跌過了資產淨值。

請問這樣的情況值得投資嗎？我看你沒有怎麼說過這間企業，請問1133本身的企業質素可以嗎？謝謝！

龔成老師：

哈爾濱電氣（1133）的股價，的確低過了資產的淨值，但我地以資產價值作為衡量平貴時，只能作為輔助分析。

因為資產包括了很多機器、設備、廠房，而這個所謂的資產價值，其實只是一個會計上的價值，真正賣出時，價格可能遠低過這個金額。

這企業本質一般，現時的確唔貴，但你預佢增長力都不強，投資價值中等，如果要之後股價有較大的回升，就只有佢業務情況好轉，否則單靠計算資產，無助佢上翻去。

------------------------------------------------

Q12424：

冠君 6.49 有兩手
請問現入置富好

定冠君
冠君現
REITs

龔成老師：

入置富（0778）會較好，冠君（2778）本質都不差，持有的物業都是好優質的，但問題是佢持有的物業數目少，有集中的情況，同時客戶有集中情況。

就以「花園道3號」來講，當中有過半的客戶，行業都是集中在金融業，這會帶來集中風險。

當然，你持有這股無問題，但如果想加，加置富會更好，因為可以令你的組合更加平衡，風險減少。

------------------------------------------------

Q12425：

你好！龔成老師，我大量一持有1917，蝕了很多。請問有冇機會返身？我應該點做？請老師指點

龔成老師：

豆盟科技（1917）這類上市不久的科網股，風險會好高，根本好難分析到佢之後的業務發展，雖然增長力強，但不確定性大，所以，只適合小注投資，如果你太大注，建議你賣出一部分先，以減少風險。

------------------------------------------------

Q12426：

你好！想代男朋友詢問以下管理財務知識，我們兩個一直都以番工賺錢為主要理財方式，但不幸地都同時失業。。

失意之時機緣巧合遇到你寫的書，覺得很有道理而開始學習投資。。。想請教你以下意見，指點迷津！

男朋友現在快40歲，早前月入2萬，剛剛被裁掉無業，每月亦因供樓而有hkd 35000的支出（含近1萬債項及1萬mortgage)....

最近早前買下的保險開始回錢，現有現金10萬左右，請問應該選擇用該10萬還清債務抑是購買股票？另外亦想問最近有哪些比較穩陣的優質股票可以選擇？

謝謝！我們很希望能夠早日達至財務自由，因為債務已經困了男朋友快10多年.... 感激不盡！

龔成老師：

債務可以分為好債與壞債。

首先，你要在負債中取平衡，不能過多，因為過多一定會為你帶來風險，另外，每月還款要在可負擔的範圍，如果過多，就要作出調整。

至於好債與壞債，好債就是指能為你創造財富的債務，例如該債支付的利息好少，而你將這筆資金用作投資，而投資的回報率遠遠高過利息，這就是好債

至於壞債，就是利息高，沒有投資創富效果的債務，這些負債要盡快還清。

建議你地從基本的理財知識開始學習，一步步學投資，建立平衡的財富組合。

------------------------------------------------

Q12427：

成哥，最近睇緊你本股票勝經，書中講到要了解股災。

我想問如果我持有優質股，假如出現股災，我應該賣出 定係繼續持有等佢升返。抑或可以點做？

龔成老師：

首先，我地買股票就是買企業，因此當股災發生時，我地要了解股災對經濟及企業的影響，當時股災的原因，優質企業，可能業務本質（長期），根本無受到影響，所以當股價下跌時，心理會要以平靜的心態去面對。

另外，要學懂會短期或長期因素，到時市場上會有很多不利消息，但如果只是短期，你應該繼續持有該優質股。同時，若果該股的股價下跌至平宜區，這時就是掃貨的機會，但你要明白，買入後有機會再跌不過長遠就會慢慢上翻。

------------------------------------------------

Q12428：

老師想問下，問題1，本人一直留意港鐵（66）,領展（823），想趁低吸納，這類型超優質股，股價好似只升不跌，還屢創新高，究竟買e類股票可以有咩策略，兩隻既股價係咪處於偏貴水平？

問題2，領展同港鐵e類股票有冇試過大跌過？係咪只會穩健上升？唔似騰訊（700）咁大起大落，

問題3，想問信義光能（968）現價貴嗎，
多謝老師

龔成老師：

1）港鐵（0066）與領展（0823）是好優質的股，之前升較多，近期算是回翻少少，我地最緊要是分析佢的質素與平貴。

港鐵現價在合理區較上部，分注投資仍然可以，至於領展，雖然近年回左少少，但仍在略貴水平，只能月供。

由於這兩股都是好優質的股，要等佢大跌亦不易，所以好多時只能用一些平衡投資的策略。

2）中間都有跌過，例如金融海嘯港鐵都有一定的調整，至於領展，就真係未見佢有較大的調整。所以這些股，月供最好，因為你等低位，可能永遠等唔到。

3）信義光能（0968）主要從事生產及銷售太陽能玻璃產品，以及發展及經營太陽能發電場，基本正面的。

這股前景都正面，現價合理，但不確定較大，存有風險，所以不應太大注投放這股。

------------------------------------------------

Q12429：

如果354長線ok ma？

龔成老師：

中國軟件國際（0354），這企業本質不差，但要留意，佢太多收入來自華為，這是核心風險，因為這是客戶集中的問題。至於華為近期的中美因素，從而影響到這股，大部分都是中短期，當然有一些會發展至長期性。

華為現時面對的，大多數都是中短期風險，當然，無人知最後的結果會點，但佢現時的市佔率已好勁，反映佢的產品唔差，點都有市場，這令佢慢慢會受其他國家歡迎，只是政府比較怕佢，但市場的力量最後都會大於政府。

中國軟件國際，長遠仍正面，但無可避免存有風險，你在投資時注意翻，例如分注，控制注碼，同時明白這股股價較為波動。

------------------------------------------------

Q12430：

龔老師，最近看到你的著作，改變了我的投資觀念。根據你的建議，今個月開始打算月供$8000股票，$4000@盈富基金(2800)、$2000＠中銀香港(2388)、@2000比亞迪(1211)

本人有以下問題想請教你:

1. 為什麼銀行股中你會推薦中銀香港2388?

2. 本人希望買一些穩健收息股，現價709處於低位，派息比起其他收息股如工商銀行高很多，但不見很多人推薦，原因何在？

3. 從生活選股方法，個人發現HKTV(1137)業務開始增長，網購將來亦必定務過傳統實體店，而且暫時沒有競爭對手，你覺得它是一隻潛力優質股嗎？

謝謝！祝投資順利！

龔成老師：

首先，你上述的分配不差，你照著這分配去進行月供，長線投資就得。但要留意，你仍要每月留有一定的現金，作等機會之用。

1）中銀香港（2388）是香港的3間發鈔銀行之一，同時更是當中唯一的中資，這反映佢有獨特的地位，當中國有金融業務、人民幣等想在香港發展時，就會用中銀作為平台，之前的人民幣香港清算行就是。

2）所有都都是都相對的，佐丹奴國際（0709）是不錯的收息股，但業務有略波動的風險，加上增長力方面則較弱，這令投資者比佢的估值較低，令股息率較高，整體上，這股有投資價值的。

睇翻佢的財務數據，可以見到佢近幾年的生意幾乎無增長，雖然盈利有上升，但不多，只是一些基本的增值。同埋，佢的派息比率好高，作為收息當然不錯，但你可以見到，管理層將大部分所賺到的盈利，都用作派息，保留盈餘好少。

即是管理層都無乜心想發展，只想守住原有的地盤就算。所以，這股的增長力有限。所以如果只是收息，佢可以的，但收息股，你就唔好著重股價，只理收息就得。

3）香港電視（1137）有潛力的，我相信佢業務仍有增長力，但現時的估值唔平同時佢業務始終有不確定性，因此你可以小注投資長線持有。

------------------------------------------------

Q12431：

你好，本人今年五十四歲，家庭月入約四萬八，不需供樓，現金大約四十萬，大部份在定期。

三個月前才開始月供股票，月供三千元共六隻股，港鐵，領展，中電，煤氣，盈富，友邦。

現想供多一些，請問這組合可以嗎？本人不求發達，只求穩健增長。謝謝

龔成老師：

你上述所選的，都是有質素的股票，你只要長期月供就得，雖然股價中短期都會有上落，但唔洗理，保持長線投資就得。

這組合可以助你的財富平穩增值，同時適合你的年齡。

另外，建議你多增加投資知識，在選股、企業估值、投資時機上落功夫，對你長遠財富有好大影響。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q12432：

老師。想問下投資方面點安排，現時24歲 月入24k

資產分佈如下：
現金 17萬
3手比亞迪電子(1211)@$12.65

現時每月$6,000月供股票：領展823@$2000 / 金沙1928@$2000 / 港鐵66@$2000

每月可儲16k，未來5年最大既洗費係買居屋既首期(預30-40萬)

1. 現時黎講，應唔應該加大月供金額去到$9k-10k?每月就儲現金$7k? 即股票：現金既儲蓄比例6:4？

2. 月供股票組合應唔應該進取少少？想買埋銀河但咁既話就會太集中賭業股

3. 之前屋企人上網比人叫左買高奧士國際(8042)，係$0.65高位買左10萬股，依家跌到1/10都冇。

呢隻唔係優質股，加上後來你分享話8字頭既股係比人炒起，我就更加覺得屋企人比人呃。咁既情況，應唔應該忍痛止蝕？定有機會反彈？

謝謝！

龔成老師：

1）可以加大。

因為現時你的財富比例中，現金仍佔較大的部分，你可以加大月供的金額，以平衡組合的情況，你可以加入盈富（2800）去進行月供。

2）都可以，只要你建立一個平衡的組合就得。

3）高奧士國際（8042）上市不久就出了一份虧損的業績，其實都估到發生咩事，小股東好難玩，持有這股只會更不利，賣出是最好的策略。

如果家人唔想忍痛賣，就這刻先賣一半先，之後再賣餘下的貨。

我唔知會唔會反彈，但只是這股本質不佳，長遠持有對小股東都不利。

------------------------------------------------

Q12433：

成哥你好 本人月入3萬 剛出來工作1年多 每月家用1萬 、生活開支5000、學費貸款每月2000左右還6年（免息）還有上一買了一份保險1年交3萬元左右（人壽/醫療各一半）。

而bb下個月出世，現有現金7萬左右 持有2388 2手（買入價30.86）和1398 4手（平均買入價6.16）。

想問下我應該如何投資儲蓄會比較好，還有什麼好的建議 謝謝

龔成老師：

因為你有小朋友出世，開支會增加，因此短期內都應該集中持有現金先，這刻唔需要心急投資。

至於你手上的股票，可以持有，都是有質素的股票，但就太集中在銀行類別，如果之後增持股票，應增持其他類別的股。

你等小朋友出世，各方都安頓好後，再計算每月能儲到多少資金，到時可以做月供股票，盈富（2800）都是一個選擇。

------------------------------------------------

Q12434：

龔老師你好。請問6811太興值得投資嗎？合理價太概幾多？謝謝。

龔成老師：

太興集團（6811）本質不差的，但近年香港的種種事件都會對佢有影響，但相信是中短期影響，長遠的核心未受影響。

但這些不利因素，都會對佢估值有少少減左，以現價計算，在合理區中部，分注投資，長線持有都得，始終都有品牌價值。

------------------------------------------------

Q12435：

龔sir
對未來十年的樓市有什麼看法？

龔成老師：

香港樓仍然有需求大，供應不足的問題，雖然中短期可能有上落，但長遠仍是偏向上的，但由於現時樓價已不平，因此不會大升，只會平穩向上。

我身邊仍有不少的朋友，結婚後仍要與其中一方父母同住，佢地都想買樓，只是等待中，這反映物業的需求仍然好大。

加上市民與政府對立增加，大嶼山計劃一定受阻，又或要更長時間先可以完成，這一定令樓市的供應繼續不足。

------------------------------------------------

Q12436：

老師，煤氣的前景如何？持有二萬股！
可再加注嗎？

龔成老師：

煤氣（0003）前景正面，國內的發展很好，同時投資仍在進行中，相信長遠仍會不錯，但現時的股價已經有少少貴，如果你本身有貨，可以持有，但就未必要心急加注。

你可以分注小注，又或以月供的模式去加，同時不能太集中在單一股票，而是建立一個平衡組合。

------------------------------------------------

Q12437：

我同男朋友係澳門人係香港工作.
依家租緊200呎唐樓, 我地就星期一至四先係香港, 所以細細地方住都ok

不過屋主佢依家賣左比發展商, 所以我地又要搬了!

所以就諗到個想法, 不如買間3XX呎舊樓, 再間兩間獨立房, 租一間出去.

但始終舊樓, 我又怕升值能力唔大. 望有發展商收購有可能嗎?

我地手頭只有100萬左右(有需要都可以問問屋企人借幾十萬), 所以錢就唔多, 你認為呢個方法可行嗎?
定係都係乖乖地租番算呢?

P.S. 我地係澳門已經有一屠5百幾萬新樓供緊, 租緊比人. 每月供緊16000左右.

Thank you so much!

龔成老師：

如果要玩間房呢類的投資，有管理上會比一般的物業煩如果長遠你有可能返過澳門長住，這類的物業模式，未必適合。

同時，住這類物業的租客，會乜人都有，部分人完全唔會受惜你的裝修，你預要花錢持續管理。所以，你要想清楚這類物業是否真正適合你。

至於等發展商收購，全港50年樓齡的物業有幾千幢，從機會率角度，成功比發展商睇中的其實好少，唔好以這個為投資的因素。

由於你始終澳門香港兩邊走，租樓反而會更有彈性，手頭上的資金可考慮投資股票等其他類別的資產。

------------------------------------------------

Q12438：

龔Sir 您好！去年家人買了以下股票，手上並沒有其他貨，請問以下手上的這三隻股票值得持有嗎？謝謝！

* 6881 中國銀河 10000股@6.95
* 6030 中信証券 2000 股@22.5
* 390 中國中鐵(基建) 2000 股@6.13

龔成老師：

中國銀河（6881）質素中等，佢這類行業，業務會比較波動，睇翻佢過往的財務數據，生意同盈利都有上落較大的情況，因此股價上落較大，未必適合太大注持有。

如果這股佔投資組合比例過多，建議在反彈時先減部分，餘下再等下一個投資市場旺的時期先賣。

中信証券（6030）都有類似的情況，業務本身不算差，但就有週期問題，這點令佢股價較為波動，同樣不建議太大注。

你地同時持有這兩股，會出現行業集中風險情況，要注意翻，可能要賣出部分，將資金轉到其他類別股，例如盈富（2800），組合會更加平衡。

至於中國中鐵（0390），本質不算差的，有投資價值。但唔好預佢的增長力好強。睇翻佢的業務同財務數據，生意同盈利都處於穩定狀態，但增長力唔算強。

所以長線睇，佢有投資價值，但增長只是平穩。佢過往股價曾在2015年大升大跌，這只是炒一帶一路，但之後回復原狀，因為這因素只能為佢帶來平穩增長，而不是高速增長。這股都可以持有的。

------------------------------------------------

Q12439：

龔成老師 !你好!

近日有留意你的影片,再過多9個月本人就30歲了! 每月27500 打工資金儲了60萬 覺得做人好失敗

我對投資0知識,就連去開個戶口都怕呢樣怕果樣,/_\ 希望透過你的建意 怎樣可以提升儲蓄

龔成老師：

你能夠儲到$60萬，其實已經不錯，可能你個人比較偏向低風險，所以我地在投資策略上，都唔能夠進取，特別是你無投資經驗及知識。

如果你這$60萬在中短期無用，你可以將其中的$30萬，投資股票，但這刻暫時不要一手手入，等你有一定的經驗及知識先。

你可以先去做「月供股票」，每月月供盈富基金（2800），$5000，原理就是每個月都儲盈富，而盈富就是一個50隻股票的組合，不用選股，本身有平衡風險的作用，因此最適合你。

你可以先去開左個證券戶口先，同時登記做月供股票。

------------------------------------------------

Q12440：

龔老師你好，本人已41歲，單身，月入約16k左右，因為年青時冇增值自己，只做基層工作流動性大冇乜前途，而且大洗，只靠保險公司的儲蓄計劃儲錢每月大約2300，每月需上繳家用5000。

本人都有買以下股票：

0003 有1210股 買入價 16.98
0006 有500股 買入價 70.7
0321 有2000股 買入價 6.19

1128 有800股 買入價 17.38
1299 有200股 買入價 77.45
1929 有200股抽新股入手，1800股買入價 8.39

2638 有500股抽新股入手
6823 有1000股 買入價 9.98
6886 有200股 抽新股入手

請問我有邊股票需要賣掉同埋想開始月供股票，睇中恆地同埋地鐵，應點分配人工去供呢？
多謝老師解答

龔成老師：

上述所持有的，大部分都是有質素的股票，都可以持有。德永佳集團（0321）正面對下跌的經營環境，雖然派息不錯，但長遠的發展有限，這類股不能大注。

另外你公用股的比例較多，但由於當中都是有質素的，因此你可以持有，但之後就未必適合增持太多。

港鐵（0066）由於有地產業務，因此唔算純公用，你可以投資，月供適合。至於恆基（0012）都適合月供。你可以每隻月供$1500。

----------------------------------------------

多謝各位提問，若然你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網的，當然，會將發問者的身份，以及有關個人的部分刪去。

另外，由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。