【 月升之江 】

茫茫網絡大海，睇劇好講緣份。

首先，要夠得閒。假如同一段時間同步追看一二三四五六套新劇新節目，那怕劇迷朋友或者專業網站再怎樣「嚴重推介」另外七八九十套新作，也只能「齋講唔睇」，否則每天延長至72小時也不會夠用。其次，班底要緊。今時今日睇劇，純粹以演出陣容和實力，作為睇與唔睇的判斷是不夠的，還要看監製、導演、編劇是哪些人，像導演二五和肥波，將黃綺琳創作的劇本拍成影像，才有機會顛覆港劇傳統。第三，改、譯個好名，並非指那些「九唔搭八」，是但噏當秘笈的名字，而是每個字出現都有得解釋，觀眾很快能夠掌握故事重點。第四，集數不要太多，篇幅不要太長，尤其是那些故事過度「發水」拖拉的劇集，實在浪費時間。

這樣便解釋了，為何自從《她很漂亮》（2015）之後，近幾年都沒有好好的看完一套韓劇：故事冗長（特別是第一集，講到一半仍未入正題！）、劇情離地（令到很多香港人誤會韓國人現實中會有這些舉動和想法）、演員太新（沒有睇法，很容易會脫節）……喂～咁你講晒啦！對呀，今時今日點播成為王道，面對作品排山倒海般出現，觀眾自然掌握更大話事權，開劇睇完半集唔對路，點解還不放棄？換句話講，正常情況下，《月升之江》能夠吸引開劇的機會率很低，但早前在「黃Viu煲劇平台」左撳右撳時，基於劇名讀落有點「特別」，不似是一般韓劇的風格而決定「試試佢」，Google一下，導演尹尚浩曾拍過《太王四神記》（2007）和《師任堂》（2017）等古裝劇，又發現原來女主角金所炫早在《懷抱太陽的月亮》（2012）已看過其演出，轉眼她已21歲，亭亭玉立，充滿古典美的輪廓，相當適合駕馭古裝角色，結果以為歷史劇難消化，最後一下子煲了三集，真係有咁OK？

坦白講，現在才看了三集，是否真的OK，言之尚早，身邊有位「韓國專家」講過：「韓劇真係十套有九套都係爛尾！」假若不幸言中，愈睇愈爛，屆時再留言鬧爆本人也不遲，如果平平安安睇到最後一秒鐘，就是閣下時運夠高；何況《月升之江》的劇本採用倒敘法，觀眾很快已知道平岡公主（金所炫飾）喜歡的是溫達（金志洙飾），歷史也有記載，溫達是平原王的女婿，亦即平岡公主的丈夫，雖然劇組一早講明：「本劇以（古書）《三國史記》列傳中，記載的『溫達傳說』為基礎，（惟）迄中登場的人物及事件時期等，均與史實不符」，但有這個家傳戶曉的民間傳說包底，劇情「出事」機會大為降低，難怪當地收視節節上升，最新一集（第4集）AGB收視達10%稱王，當然也有韓國觀眾給負評，孰好孰壞，就要閣下睇完之後再判斷。

韓國KBS2月火劇兼「黃Viu煲劇平台」首部原創韓劇《月升之江》，改編自韓國作家崔始圭的小說《平岡公主》，講述朝鮮三國時代（公元前57年至公元660年）的高句麗（發音：高勾離）第25代君主平原王（金法萊飾），因為誤信桂婁部古雛加（部族首領）高元表等奸臣唆擺，以為延王后（金所炫分飾）與「月光和尚」（趙泰寬飾，是平原王的前將軍）是私情，並誕下「野種」平岡公主，一時「火遮眼」，趁兩母女出巡至順奴部期間，派兵到該部落和伊弗蘭寺大開殺戒。年少的溫達臨危受父親所託，保護平岡公主人身安全，惟逃走期間發生意外，二人分隔，而平岡公主則獲來自神秘殺手組織「天珠坊」救走。

八年後，平岡公主在養父廉德（鄭殷杓飾）照顧下長大成人，化身「天珠坊」殺手廉佳珍，她早已放下年少時「振興高句麗」、成為首位高句麗女王的理想，時時刻刻都想着復仇，其中一個仇人，正是殺害母后的父親平原王。原本她計劃在松鶴山舉行祭典期間動手，惜行事敗露，並於逃走期間受傷，幸得溫達出手相救，二人終於「團聚」，而往後的劇情如何發展，大家也心中有數，相信離不開平岡公主光復家園，並與溫達經過很多苦難和挑戰後，有情人終成眷屬。

《月升之江》故事背景雖然在古代，但製作團隊搣甩「史味」，無論劇情節奏和拍攝手法（有些慢鏡動作和一鏡過的空間穿越），都參考2020年代的觀賞標準，短短一集（即韓國原裝版的半集，約30分鐘），已詳細交代故事背景和男女主角為何相遇為何分開，沒有拖泥帶水，好些情節設計，如平岡公主的夢境、如廉佳珍與溫達成長後重遇的對話（在樹林裏重遇、溫達為她敷藥），那種輕巧感覺比較少見，已盡量拉近觀眾與古代史題材的距離，也不難發現，他們針對的觀眾群並非老一輩，而是會追星的後生仔女。

然而這種傾向不代表選角上輕率，畢竟平岡公主和溫達的角色設計，本身是充滿故事和悲情，豈能隨意選一些沒有壓場感、無法駕馭角色重量的藝人扮演？所以劇組挑選金所炫和金志洙擔正，頗為正路，兩個人在當今的韓國演藝界皆屬於戲路廣闊之人，演繹水準不會出現很大距離（不妨看看《九家之書》裏，李昇基和秀智），當中金所炫更是「同輩三金」（金裕貞、金賽綸）之中演技最優，只是很多觀眾覺得，金所炫昔日除了《懷抱太陽的月亮》外，好像不太懂揀劇本，才會有點窒礙在幕前的發揮。來到《月升之江》，她既然飾演長大後的平岡公主，也要客串演繹遭殺的延王后，但留意到，金所炫明顯有花過功夫去理解兩個角色的不同，雖然都是性格剛烈，但畫面呈現出來的，是兩種不同的神髓，甚有說服力，算是在演技評核試過關，這一點很重要，換轉很多「戲屎」的藝人去演，效果就會相當平板，兩個角色毫無分別，加快棄劇的意欲。

最後要講講劇名，《月升之江》乍看跟兩位主角沒有關係，原來玄機暗藏在韓文字「달이 뜨는 강」 裏。「달」是 「達」，即溫達，而「강」 是 「岡」，即平岡公主，何解會變成江與月？因為「달」 這字文在中文裏，除了「達」亦可解作「月」，而「岡」跟「江」同音，所以以食字方式帶出「江上生明月」的意思，帶出男女主角雖不在一起，卻互相思念，呼應劇中他倆要排除萬難才能走在一起的情節。

《月升之江》已於「黃Viu煲劇平台」上架：https://bit.ly/2Of6zBu

【 延伸閱讀 】
《女神降臨》自救逆轉命運：http://bit.ly/3c0OiAq

（03032021）

#游大東 #游大東影視筆記 #韓劇 #月升之江 #黃Viu煲劇平台 #ViuOriginal #金所炫 #金志洙 Viu Hong Kong

如果我係佐助型毒撚
雪人應該毒撚型佐助

這三年來做過的事，能令我無悔驕傲嗎？
　

不！傲驕或者都有少少，無悔就絕對講唔上，最後悔嘅，就係識咗一班黐線佬。

呢個社會係歧視毒撚嘅，所以當一個黐線佬單機黐線，我哋叫精神病發作，但當一大班黐線佬集體黐線，我哋就叫維持社會秩序，唔信你望下香港警隊。問題嚟喇，如果係介乎一個黐線佬同一大班黐線佬之間、幾丁毒友喺度互相揈丁丁呢？我哋有組醫學專有名詞去解釋呢個症狀：圍爐取暖。諾貝爾獎得主邱吉爾話過，沒有最黐線，只有更黐線，幾丁毒友搬埋個爐去沙漠圍，啪多幾箱過期靜心口服液都唔撚掂啦。係我唔好，我早就應該聽老母話要帶眼識人，家陣近墨者黑，玩鬆咗個屎忽，真係後悔都無用。

有見及此，我要另外撰文逐個鞭屍。為免 too long didn’t read，有興趣嘅朋友自己碌落啲啦。
　

一直有人問小弟（到底呢個句式我用咗幾多次？好心唔好成日扮晒有好多人走過嚟問我嘢啦死毒撚！）點解咁耐以嚟都無同曼波雪條合作。首先你哋要搞清楚，唔係咁耐以嚟都無合作，係咁耐以嚟你哋都未有得聽啫。由開 Channel 一週年構思到兩週年，再製作到三週年，時光這個壞人終於批准我喺遲咗13日嘅情況下放呢隻歌出嚟同大家見面，真係謝天謝地。舊年玩30日歌單嘅時候提過，小弟最初係想喺有生之年將「雪人」放入詞，後來食撚錯咗藥先用咗嚟做高登名同筆名，如今終於撥亂反正，足見主耶穌對我嘅恩典，阿門。

講開又講，Manball 同 Mercury 收到詞後都問我係咪食錯藥。嚴格嚟講，前者只係喺心裡問，後者問埋出口，Meanne 就直接去咗問曹宏威。我唔明喇，點解唔可以係之前三年嚟做嗰21隻歌嘅時候我都 keep 住食錯藥，今日終於唔記得咗食呢？我無食錯藥！我不知幾正常呀！
　

僅以此作送畀所有未黐夠線嘅黐線佬，特別係 Tommy Wiseau。

---------------------------

（以下內容冗長沉悶，並涉及大量粗鄙劣拙的小圈子語言，敬請家長及浸大校方留意。）
　

最近咁啱睇咗《荷里活爛片王》（The Disaster Artist），順手睇埋14年前嘅爛片經典《瘟室》（The Room）。

電影本身無咩發人深省的大道理，只係輕輕帶出咗一個問題：你為誰而創作？Tommy 仔憑住災難級嘅藝術思維，拍出一部柒到觀眾要恥笑嘅電影，為咩呢？老實講，拍嘢可以柒得過笑波子嘅人，根本就係神指派下凡嘅勇者。最難能可貴嘅係，Tommy 仔唔似王晶、Logan Paul 嗰類專門挑戰創作水平同觀眾容忍程度下限嘅垃圾創作人，佢係真心有抱負、有熱誠去拍部電影出嚟，只不過天分同熱誠唔相稱，結果將悲情故事拍成瘋狂喜劇啫。如果 Tommy 仔唔係個天真到有幾分低能、仲要隨時都拎到600萬美金出嚟燒嘅人，你唔會相信「夢想」兩個字原來可以擲地有聲。但又係同一個老問題：為咗夢想，你可以去到幾盡？

電影尾段講到 The Room 首映禮後，觀眾劣評如潮，但掌聲當動。Tommy 仔行上台，講咗一句：“This movie never happen without my best friend Greg.” 大師又好，爛片王又好，無人陪佢哋發癲，世界又點知佢哋真係癲？
　

呢三年嚟，要多謝（鞭屍）嘅人實在有好多，好多亦都已經多謝過好多次，但一直都無機會正正式式做一次呢件事，噉不如由頭嚟一次丫。
　

歌詞之所以有別於新詩，關鍵就係旋律同音樂。我知道我就噉 post 啲改編歌詞出嚟，下場會同貼喺燈柱上面寫住「死臭雞蔡X蓮欠債唔還錢落地獄」嗰類街招無咩分別，所以先硬住柒頭皮想令啲歌詞有聲。多謝所有喺呢條 channel 出過聲嘅主唱人，其實小弟真係無嘢可以回報你哋，出現喺呢度既無人氣亦無迴響，你哋依然無揸過流灘（就算有都唔好話我知，thanks），又唔同小弟計較。可能喺觀眾眼中，錄一首四分幾鐘嘅歌同行入K房拎起碌嘢鳩歌一曲無咩分別，但我好清楚錄歌要花幾多心機喺入面。燒咗你哋咁多時間同心血去完成小弟一堆又一堆自私兼小家嘅心願，講起都覺得慚愧。
　

Himz，你係呢條 channel 嘅開荒牛，通常破處嗰下都特別刻骨銘心。其實我哋理應早就相識，但緣分呢家嘢就係咁仆街㗎啦，就算我哋早啲熟絡，我都未必有資格同你合作，依家都總算係不遲亦不早啩？

Looper 兄、柒叔，我次次都搵你哋唱啲騎呢怪雞主題，搞到你哋有份參與嘅作品變晒砲灰，真心好對唔住。請你哋畀多少少時間小弟，我相信始終有一次我哋嘅合作會中。

Binary 兄，我哋由喺膠登錄下歌仔，去到終於一齊做歌，其實都唔算經歷咗好多，但每次同你傾計都好似搵返個老朋友一樣。放心，唔係笑你老，純粹想兜個圈讚我自己心境年輕啫。

花生兄，小弟到依家都唔敢相信我有同你合作過。作為最後一個有機會同你合作嘅改詞撚（《心聲的引子》唔算數吧？），我想話，攪屎棍真係好正，你哋千祈唔好放棄。

KingBeck，小弟寫廣東話改詞，從來都無諗過會有香港以外嘅人類留意到，多謝你帶小弟衝出香港。衷心祝福你嘅新旅程順利愉快，但記得千祈唔好放低音樂啊！No music no life！

傷爺、無丁，文字係無辦法講出小弟對你兩位嘅愛，要知道盲嘅都睇得出，呢條 channel 有一半人走入嚟都係為咗聽你兩個。多謝兩位喺無數夜深為小弟做心理輔導，又從來唔干涉小弟寫啲咩狗屎垃圾。
　

當然唔少得要多謝所有幫過小弟寫字幕嘅朋友仔，特別係齊下巴打。小弟兩度請你一齊玩，唔單只係因為你係我朋友，仲係因為你對你自己手字好執著。做自己喜歡嘅事情就應該執著到底，呢點係你啟發我嘅。我甚至懷疑，你可能係呢三年嚟影響得我最深嘅朋友，縱使我哋唔算有太多一齊玩嘅機會。（事實證明小孩子唔打機係會損害朋友之間嘅友誼，煩請所有家長立即注視呢個嚴峻嘅社會議題。）只可以話，你出現喺我嘅生命，遠比你手字出現喺我啲創作嚟得珍貴。我知丫，你實係當我鳩噏緊。
　

睇到呢度都仲未撳下面條 link 嘅你，我想話你知，你嘅人生真係好枯燥。
　

多謝所有無出現過喺我 channel 入面但同我呢三年內發生過關係嘅變態佬。首先多謝咁多位戇鳩詞撚，我無諗過寫改詞真係可以呃飯食，呃到你哋出嚟一齊食飯、飲酒、講詞經。水兄、梁夕、凱笑兄、流觴師傳、DC 兄，搵你哋出嚟吹水總係吹到唔捨得停，希望你哋個老婆都係噉。OK 爺、Lomin 大佬，你兩個話我知今日嘅年輕人仍然好有想法，仍然好值得敬重。多謝山卡啦幫我改名做程嘉洋。多謝其他只係喺網上神交過嘅高手同詞撚，單機無雙、一聲冷笑、纏玉兄、小淇兄、QBear、困獸鬥、沙爹嘔、手指有愛液，以及所有一直為改詞默默努力嘅詞撚、歌手、剪片手、混音師等等。多謝 Mustc 喺我仲未知想點玩落去嘅時候已經唱小弟嘅詞。就係因為有你哋一齊玩，先可以玩得咁開心咁過癮。#metoo

之後多謝膠登音樂台。好多人唔知道小弟當初喺嗰邊玩過，係呀，「出詞發燒友」呀，個名勁尷尬嗰件蛋散呀。小汀、Tommy，你哋係全地球頭兩個願意將小弟嘅拙作製作出嚟嘅人，嗰一刻我就好似一出世擘開眼就見到老母微笑嘅塞竇窿一樣，終於知道世界上係有人在乎我。請原諒我無同你哋一齊捱落去，我認我係不孝子，毛都未生到條就想飛，但你哋都繼續支持我鼓勵我，令我真心相信小汀會係一個好老竇。父親節快樂啊。
　

多謝豬鼻，雖然同你嘅合作啱啱先開始，但我哋好似已經識咗好耐噉。其實你做到嘅嘢絕對比你想像中多，唔好再睇死自己喇。BTW，個海軍仲有無搵你？
　

多謝心事台五條友（呢度無人知道你哋係乜水㗎喇，自己對號入座啦）。呢四年我成日彈出彈入，又好似好嫌棄你哋噉，但你哋點都會搵返我返嚟。我都知有時我係個好難被理解嘅人，因為我自己都唔係好理解，多得你哋仲有耐性收留我呢條撚樣。特別要多謝 Harry，如果唔係你煽風點火，又幫我做晒所有前期功夫，成條 channel 根本唔會出現。你成日好擔心你隻雪人公仔（icon 嗰隻）幫唔到我走得更遠，但我想同你講，我已經走得更遠。
　

唔好話我知你仲睇緊呢篇垃圾呀。珍惜光陰啦，年青人。
　

仲有兩個人。

一個係插畫巴打 Mercury。總有人會以為小弟係有心走「藝術路線」，但都係嗰句，小弟從來唔覺得自己係做緊藝術，呢啲錯覺完全係出自你一個人嘅努力。兄弟嘅嘢唔使下下講出口，亦都唔太需要旁人理解，我哋兩個明白就夠喇。Next。

另一個唔開名喇。我知你好憎我多謝你，但我鍾意呀，吹咩？包括你在內，基本上無人可以理解你一直以嚟嘅鼓勵對我有幾大意義。或者喺其他人眼中，我哋係兩個完全唔同世界嘅人，但我同你都知道，就算我哋行緊兩條睇落唔交疊嘅路線，事實上都係同一條路線，只不過係喺各自嘅舞台上做自己最擅長嘅事。出面嗰啲負皮、指控、壞印象，同我眼中嘅你從來都係兩回事，我更加相信你唔會屈服於呢啲 bullshit 之下。可以同你一齊努力一齊玩，係我呢世仔到目前為止最光榮嘅事。
　

仲睇緊？成個網媒生態畀你搞彎晒喇！
　

當然仲要多謝終於可以正式合作嘅 Manball。由我屎忽痕打上你個台度鳩噏一整個深宵，到後來無所不談，都係我做咗改詞之後最意外嘅收穫。曾經有朋友送過小弟一句：「帶刺的你，其實最善良。」我總覺得你比我更有資格收養呢句說話，希望自此之後你可以同真嗣BB互拮。（嗱，唔好 #metoo 我呀！已經寂寂無名㗎喇！Tag埋就身敗名裂㗎喇！）得喇，請食飯丫嘛，知㗎喇。

最後最後最後，再一次感謝所有一路上支持小弟嘅聽眾們，你哋當中有啲仲成為我好朋友，有個仲幫我寫埋字幕，實在無言感激。
　

點解我好似講緊遺言噉？我曾經同 Mercury 草擬過一個 channel 未來發展藍圖，提議呢條 channel 做到第25隻歌就關門大吉，而當時嘅諗法係，你哋依家聽到嘅呢隻就係第25隻歌。藍圖歸藍圖，發展大計早就同鄭若驊一樣，僭建到不知廉恥。但我仍然想將呢隻歌當係最後的歌，送返畀我呢班可愛嘅戰友們。沒有你們，我甚麼都不撚是。多謝你哋。

（論文字數：3603）