【不用怕！我還在！】

Teammate今早whatsapp我，話今日有好多老友記致電嚟中心問候我，再過兩個月就90歲嘅包伯伯最為語出驚人！竟然問Teammate我住邊間醫院？佢想送個果籃俾我！！！

我聽見後，既感慨，又感動！

我心諗：「我值得大家對我咁好嗎？我值得有咁多老人家為我牽掛嗎？」

好對唔住！讓大家擔心喇！

由於手術後傷口復元需要一啲時間，加上不時感到頭暈(可能貧血影響)同腹痛，所以醫生建議我休息一星期，食哂所有藥、覆埋診、攞埋化驗報告；如無意外，下星期二才可正式復工！

坦白講，咁大個女從未試過攞咁長病假！以前唸中學女校嗰七年，我一次醫療休息室都未入過！(醫療休息室通常俾身體不適嘅同學入去小休，好多同學嚟月經或見課堂一悶就會即刻舉手表示身體不適要求入去休息)；唸中大社工嗰三年，我只走過兩次堂，一次趕交功課，一次準備演講！

做咗社工廿二年，我不嬲好少攞病假；反而喺肥媽病危最後嗰兩年，我申請過三次無薪假！過去十四年四個月零廿二日嘅抗戰日子，我曾喺夜空經歷過無數次欺凌、委屈、奚落同傷害，為此我曾攬住肥媽喊過好多次，瞓喺床上嘅肥媽，每次都會同我一齊喊；用手輕拍我嘅背脊，心痛地講：「阿.....肥.....唔.....好.....做.....喇！阿.....媽.....養.....妳！」我聽見喊得更厲害喇！但第二朝一大清早，我又可以如常臉皮厚厚、扮到乜事都冇、繼續精神抖擻去返工，用笑臉迎接每一位服務使用者！

今次入院做手術，其實我真係任性地諗過：「如果醒唔返就好！咁我就可以見返肥媽，唔駛再咁孤單，每日逼自己忙到天黑，日日喺度等日子過！」入院前，細妹寫咗張明信片俾我，幅畫寫住「不用怕，有我在！」，嗰刻我想同佢講，其實我真係一啲都唔驚！因為無論手術成功與否，最壞嘅結果反而能夠促成我心底嘅願望！

不過，當我睇到佢寫俾我嘅文字，加上夜空每一位朋友對我嘅支持，我又覺得自己咁樣諗好似唔係咁好！最普通嘅歌手，都會有鍾意佢嘅粉絲嘛！假假地我都喺夜空真心真意閃爍咗廿二年，加上又係肥媽嘅寶貝二女兒，應該會有啲人唔捨得我啩！

為免讓大家擔心，決定報多次平安！

各位，我OK呀！死唔去！只係不時感到有啲頭暈，下腹內嘅傷口有啲痛，要食抗生素、胃藥、消炎止痛藥、止痛藥同鐵片！

呢兩日我嘅主要工作係食藥、瞓覺同睇書；之前買落好多書，今次可以盡情刨哂佢喇！(圖中只顯示一小部份，我已睇完其中兩本，宜家開始睇另外兩本！)

各位關心我嘅朋友唔駛驚！我仲喺夜空，大家可以喺呢度同我交流；如果要親自見我嘅老友記，就要等多一個禮拜喇！

最後，送多一張書簽俾大家，請大家放大下面張相，望吓右下角嗰張！

再次感謝大家對我嘅愛！我雖然好掛住肥媽，但我一日未死，都會秉承肥媽堅毅不屈嘅精神，繼續竭盡全力，用心走下去！

【龔成問答信箱】（Q22621-Q22640）

Q22621：

老師， 你好！學生有數個疑問，

1. 你上堂曾講數隻房託ETF，
最佳是否 領展0823/陽光0435/
置富0778，那較佳？
還是有其他另一隻呢？
原因？

2. 另外 曾經聽你提到 你會減持水桶1 增持 水桶2，是嗎？為何？ 因年齡？

3. 課堂上 曾聽你多次提過小米1810，你是否認為佢會唔會同 比亞迪1211 一樣數年後 暴升呢？

祝健康！謝謝解答！

龔成老師：

1）領展（0823）、陽光（0435）、置富（0778）算是高質的，你可以考慮這幾隻，都值得投資，可成為投資組合的成員，現價都合理。

如果想增長多D，就領展，因為領展會不斷翻身物業，同時會買賣物業。如果想收息穩健D，就置富（0778），因為佢持有的物業，對象是民生類，受經濟影響相對較少。

其實，你可以睇翻課堂的筆記，買房託如同買樓收租，所以你要研究翻佢持有的物業，就知質素、風險、發展。

2）我當時表述的意思「當我日後年齡慢慢大，就會減持水桶1，增持水桶2」。

這不是今天，而是長遠，原因為財富配置，年輕食進取，年長就保守，所以當年齡慢慢大，就會調整，你可以睇翻第二堂的筆記。

3）小米（1810）有潛力的，我自己都有持貨，長遠正面，但能否象比亞迪（1211）股價升好多，就未知，我只可以話，企業價值前景正面。

佢的產品性價比高，相信在全球好多個國家都會有市場，佢長遠只會進一步增長。

同時，佢建立的平台是佢長遠的增長動力，先賣手機，再利用手機的平台延伸銷售小米家電。長遠正面的。

這股可長線，現價合理區頂，小注分注可以，但唔好入得太急，預佢股價仍波動。$15以下才是便宜區，所以現價不是大手時候。

------------------------------------------------

Q22622：

老師，你在《財務自由行》一書講過財務死胡同，有沒有實質例子供參考?

龔成老師：

如果一個人不斷增加「負債」（即是每月持續消耗現金流的項目），如養車，就算加入工都無用，這就會進入每月無法儲錢的情況。相反，一個年輕人若一開始集中累積資產，慢慢就能做到錢搵錢的狀態（資產產生現金流，現金流買更多資產），最後會進入財務自由的狀態。

------------------------------------------------

Q22623：

龔sir你好 如果係65蚊持有滙豐應該點做
大約30000股……
好迷茫

龔成老師：

匯控（0005）賺錢能力與增長力比過往年代弱左，但又未去到完全無質素。銀行業的賺錢能力比過往減左，因此不能視為增長股，但當經濟好轉，始終都會有錢賺，因此都有投資價值。

相信長遠是收息股，但股價增長就有限。

這股都有投資價值的，但就未必值得佔組合比例太多，同時明白佢是收息股，增長力有限。

如果你本身目標是增值，就應該減部分轉其他。

如果這股佔你組合比例較多，都應該減部分，轉其他。

其實，你最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？

即是你想設計一個怎樣的投資組合？長期、優質、平衡、適合你。

------------------------------------------------

Q22624：

老師，有兩個問題想問….

1. 2382 我$145 有貨，想加注應該等咩位置加好？

2. 技術問題，我地如果分三注，理想係每注跌10%加注的，但第三注的10%， 會係第二注加注後總和的10%嗎？

例如我第一注$100， 第二注是$90，第三注會係$81（90*10%）？還是$85.5（95*10%）？

龔成老師︰

1) 舜宇光學科技（2382）現價偏貴，最好等佢回到1,2成，才考慮開始再小注儲貨。如果係月供，現價開始都可以。

2) 最好係用對上一注的價位，去下調10-15%，作為下一注投入的水平參考。

若以下調10%計，即係第一注$100， 第二注是$90，第三注會係$81（90*10%).....。當然，分注有很多方法，有時要到時再調整。

------------------------------------------------

Q22625：

龔sir! 有問題想請教。本人28歲，睇番自己投資組合，發覺潛力股佔左55％，所以想揀多隻平穩增長型去平衡番。我睇中左中國平安2318（組合裡無保險股），但我本身有月供緊平安好醫生1833。

基於佢地都系同一集團，我再買2318合宜嗎？會不會風險大左？但現時佢股價跌左又覺得係好時機買入。

同埋想問買保險股應該點分析行業呢？同銀行股類似嗎？有無特別事要注意？謝謝！

龔成老師︰

對年輕人來說，潛力股55%仍可以，不過當中都不能過份集中同類潛力股。

由於平保(2318)和平安好醫生(1833)係有關聯性，故投資比重不宜過多。

中國平安（2318）有質素的，佢有規模，有品牌，近年的發展都不差，不過，股價有時會有少少波動，這主要受投資市場表現影響。

要分析保險股，其實都幾複雜，簡單會睇佢新業務發展、現有業務狀況。另外，由於佢用浮存金去投資，所以都要睇埋佢投資回報方面。

而且，平保(2318)唔係純保險股，除了壽險和財險這2個主要分部，佢仲有銀行、資產管理、證券等等。

若要認真估值，你係要每個行業咁去睇。除非估值經驗好豐富，否則要完整和準確分析，其實唔容易。

簡單而言，這股有長線投資價值，是平穩增長型。現價算係合理區中下位置，你現時入首注係可以。只要控制好平保比重，不超過組合15%，咁就無問題。

------------------------------------------------

Q22626：

Sir, 上緊進階班中, 但投資實戰上有些迷思.

1. 如收到1000元股息, 股票共投入30000元, 股數1000, 分析個人投資時, 一般會計入股息嗎? (即共$31000 / 1000 = 當平均買入價為 31元)

2. 今年5月時看好3918, 組合上想加入博彩及有寡頭壟斷股, 已設定金額及中途趺5-10%就會加注, 但至上月就買夠, 平均 7.5元, 點知現會再趺;

全世界因疫情暫未有轉好情況, 看來要等疫情好轉後, 這企業才會轉好, 這情況是否耐心等待?

另一角度看, 當時因市場氣氛吸引, 加上計算估值約6.86 – 10.29, 在此範圍內買入, 想知道投資上有沒有做錯?

再另一角度看, 現下跌差不多 30%, 亦不再看好那地方會那麼快復甦, 是否賣出較好, 再買入其他更優質股票? 因這樣一直持有, 可能要數年, 值博率不高.

Thank you Sir.

龔成老師︰

1) 唔會，只會視初期投入的$30000為買入成本。就算你用$1000股息再投資，假設買入了30股。這樣你買入成本，只會變成$30000和1030股，即平均買入價為$29.12。

2) 金界控股（3918）係有質素的，但始終新興市場，因此點都有風險。

佢會因全球的疫情，而影響左生意，但這只是中短期。

長遠計，佢仍然正面，佢之前有項目獲當地政府批准發展5幢建築面積共逾580萬平方呎的物業，包括提供共4700個房間的酒店群、娛樂場所及公寓等。我相信長遠對佢仍正面。

這股股價較為波動，不過都有長線投資的價值，分注投資可以。

你現時平均價，係合理水平，但你預佢中短期一定會好波動，但長線持有係可以。雖然有質素，但始終係市場新興，風險較高，在注碼上緊記不能投資得過多。

你計算合理價都接近，調低多10%會較好。

記住，我地是否持有一隻股票，係用佢質素做分析，而唔係睇佢買入價，你要改變這個"賺差價"的思維。

另外，我地投資唔好估走勢，只會用估值平貴去做決定。此股現價有一定值博率，照持有係可以，除非你持股佔組合較多，否則照守住先。

我地唔會知疫情幾時變好，都唔會知市場幾時會對佢重新估值，令佢真正價值得以反映。可能係明天，可能係幾年後，無人知。

但我地知道的客觀事實，就是其真實價值，未被反映出來。所以長線持有，才是較好做法。

------------------------------------------------

Q22627：

你好，想問吓1799公司前景如何，手上未有貨，幾錢可以入貨？

龔成老師：

新特能源（1799）係太陽能級多晶硅生產商和光伏項目承包商，主要從事中國光伏產業上游和下游環節的業務。

佢除左多晶硅生產外，亦從事電力銷售（透過自有燃煤發電廠供應電力多晶硅生產之用，並銷售多餘電力予當地電網）；工程建設承包（根據ＥＰＣ、ＰＣ或ＢＴ承包模式經營，為光伏及風電項目提供能源解決方案，包括工程設計、諮詢、建設、調試及運維）；逆變器生產（用於光伏項目的一項關鍵部件）及光伏硅片及組件生產。

其實過往的生意與盈利唔算好突出，同埋有D波動，只是近期新能源有炒作，佢都炒起左。實質支持係咪好大，未知。但建議保守少少，暫時這股投資值博率不高。

------------------------------------------------

Q22628：

龔成你好， 這是我現時持有的股票，想問下你的意見。可以點樣優化我的股票組合？

0011
0435
0778
1177
1928
2800
8109
9888
9988

另外我應該再爭持9988嗎？ 因為佢係我既投資比例已佔很多，比起爭持9988，定應選擇投資點700 騰訊？

我是一個投資小白，感謝你讓我明白投資的重要性， 我都好想快點賺到我的第一個一百萬

*8109 係我十年前剛買股票聽人講的教訓，我只放係度提醒自己

龔成老師︰

你現時持有股票(除了8109)，都係有質素，若你係年青至中年人士，係合適的。恆生(0011)、陽光(0435)和置富(0435)增長力較弱，主要係收息，若你偏向年青，不建議持有太多。

另外，我地持股除左講質素外，都會考慮到平衡性。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

你現時阿里(9988)佔比已經好重，不要再加注。至於騰訊(0700)現價在合理區中間，係可以入貨水平。

但由於你本身已有不少科技行業股票(9988, 9888)，再增持會令你太集中科技類，而造成風險。

如果你好想入騰訊(0700)，你可以考慮沽少少阿里(9988)，來換碼至騰訊，這樣會較穏當。

------------------------------------------------

Q22629：

想問什麼是平台股?

龔成老師︰

現時你聽到的平台股，相信都是指一些電商平台相關股份，例如阿里巴巴(9988)、騰訊(0700)、美團(3690)、滴滴出行等等。

由於近期中央出手打壓，令不少相關平台股都出現明顯下跌。

但我地作為理性投資者，係這個時候應該理性分析，到底中央係這些新政策裡面，有多大程度影響這些企業，而這些影響，又是否長線?

如果只係中短期影響，我地就唔洗過份在意。相反，如果係有較長線影響，特別係一些核心性問題，我地就要調整估值和注碼，甚至調整成個投資策略。

------------------------------------------------

Q22630：

龔sir，近排入左隻光大綠色，之後同一位前輩討論，該前輩都係信奉價值投資，而且徧保守。結果佢問左一堆關於光大綠色業務同收入嘅問題，

但我嘗試從公司資料，官網同年報都揾5到一d好有説服力嘅答案，令我懷疑自己係咪入錯貨，所以嚟請教龔sir你嘅意見。該前輩對光大綠色的質疑如下:

1. 佢讀書時都接觸過能源相關產業，都知道生物質能依回事，但按佢所認知，生物質能嘅效率很低，可5可以有效發電賣電營利都係問題，年報d數字，

業務描述可能只係個美好嘅故事，嚟氹投資者入局。

2. 佢話公司資料無詳細提及所有客戶資料同相關收入，感覺主要客戶只有地方政府，雖然環保係一個大方向，但由於政策會變，

地方政府未必肯長期燒錢維持d無實際作用嘅項目(特別指生物質綜合利用)。而間公司無咩其他主要客戶，萬一將來政策改變就會對公司營收造成極大影響。

3. 最後，佢提及中國雖然係農業大國，但趨勢相信係由農業轉變成農產品/食品加工業，因為利潤同發展較好。另外沙漠化加上碳中和相關政策會令植樹造林係大趨勢。

最後因農業改革同植樹造林會令生物質原材料不斷減少，因此對其業務長遠帶嚟負面影響。

喺度先謝過龔sir

龔成老師︰

1) 太科學上的知識，我都解答唔到。有時我地分析企業，未必能100%完全理解當中運作，因為我地無可能成位每一行業的專家。

但我地可以從一些數、表現、同行比較等，去大致得出佢架質素。雖然無法100%，但有時都可以找到一個，令人覺得相對穏當的答案。

睇翻佢過去多年，生物質綜合利用項目在營運收益上，都有一定增長。由於唔係1,2年，而係一個較長時間，我地會假設佢這個營運模式，係無問題。

2) 一般企業，都唔會完整列出所有客戶名單，係商業考量和私隠問題。但我地可以知道，2020年最大客戶係政府機構，佔營業額19%，頭5大客戶，則佔營業額43%，唔算過份集中。

好似光大綠色(1257)這類企業，以政府客戶為主導，其實係正常。當然內地政策變動，會為集團造成風險。但綠色能源和危廢處理，依然係大方向。

而且，集團在這方面，都有一定技術和優質，因此長線發展係正面。

但由於行業算係較新，加上政策風險問題，你會見佢市盈率係好低。某程度是反映，市場對佢營運模式，都尚有一定保留。因此，此股可以投資，但宜小注。

3) 你前輩的擔心，不無道理。但由於中國食物需求，依然未能做到100%自給自足，政府長遠都唔希望要依賴外國入口。故農業發展，相信會維持正面。

而且，集團除了生物質業務外，佢都努力發展危廢處理，去散收入來源，平衡風險。

整體而言，集團長線發展算正面，但風險略高，不宜大注投資。

------------------------------------------------

Q22631：

感謝龔sir回覆，但＃2845同＃3067暫時都未有息。。。＃3067已經有3000股了

對於小朋友來講，唔係應該搵啲高息股咩？我成日都唔明點解有人講，炒股唔係賺股息，點解呢？

不過我都會聽龔sir建議主力擺左2800度，學你話齋，小朋友有長時間增值。。。

但我個人黎計，出糧戶口有003 每月供緊$1000，都已經有2千幾股了，想轉供其他，我應該都會聽龔sir教供2845了，但2845太貴。都唔知供幾耐先會有一手

龔sir你講得啱，我個人好心急

龔成老師︰

首先，我地真正投資增值，唔係做炒股這些短線操作。而係長線持有一些優質企業，透過佢地成長，以達至財富增值目的。

至於你要做增值，定係賺股息，就要睇你現時所處的人生階段。若你係退休人，因為已經無收入，所以我地就應以收息為主，用意係透過股息和利息收入，去支援退休生活。

相反，好似你這些較年青人士，其實應以增長為主，努力去累積一筆資金。到退休時，就用這筆資金換成收息資產，去創造現金流。

GX中國電車(2845)和安碩恒生科技(3067)都係潛力股，由於這些公司都在高速發展，所以好少會派息，因為佢地會將賺到的錢，重新投入業務上發展，去爭取更大回報。

所以，你投資這類潛力股，目標唔會放係股息度，而係係佢增長能力度。

由於這類潛力股波動性好大，雖然長線會升，但中短期點都會有一定波動性。如果你年紀大，快要退休，或者可投資年期較短，就不太適合。

相反，小朋友有好長時間去投資，可以足夠等到企業將佢質素，全面反映係股價上，所以投資盈富(2800), 安碩恒生科技(3067), GX中國電車(2845)都係可以。

煤氣(0003)和GX中國電車(2845)都係有質素，後者增長潛力高，但風險都高，你要自己衡量。

雖然GX中國電車(2845)現價唔平，但月供可以拉平均個價，所以唔算大問題。反而我擔心你會自己去定平貴，或者可能見某股票無乜升，供一陣又停，轉來轉去。

因為月供其實係要你"定期定額"去供特定股票，長線去供先做到平均價格效果，講緊係至少3年以上，並持有5年。

雖然股價貴時，我地的確可以減少供款。但問題係，若果你判斷錯誤，好大機會你最終回報，會受到嚴重影響。如果你投資技巧唔高，只要隻股票有質素，我建議你不理價格，一直長線供，反而會對你最有利。

------------------------------------------------

Q22632：

龔成老師， 我最近有一個好苦惱的問題，看唔清，想聽聽你既專業意見。之前未必想係香港買樓，但考慮到來緊五年都係香港，所以都想買樓，住左三年升。

我最近見到個樓盤我好鐘意，亦都覺得好理想： 長沙灣the campton. 想買400呎左右或以上既都要9百至1000萬，首期需約二百萬左右。

但無可奈何，不計我股票資產。我和男朋友二人最多可以比到150萬左右。我打算放晒手頭上的股票，當做首期，我會沽清所有。而我一年大約可以儲到三十萬左右，

我覺得一下子用盡，後再儲錢，唔太難。 因為份工年年都有加人工，一個月約五萬左右，個人和家庭開支約兩萬。 你覺得賣晒所有股票值唔值？

因為我個人就唔係好想，因為當中長期hold 住，我知會有高回報，以下為我所有的股票。

小米 平均成本 $26.1 1200單位
安碩 平均成本 $14.37 500
煤氣 平均成本 $10.68 5738
地鐵 平均成本 $39.8 2500
完美 平均成本 $5.11 17000
太古 平均成本 $22.24 2000
港燈 平均成本 $8.05 7000
HSBC $81.4 400
恒生 $183.3 300
建行 $8.6 2000

如果我唔放股票既，你覺得我有無需要放左某啲佢，集中幾隻，因為依家感覺好散下～ 我知要分散投資～ 但好似分得太多

因為真係好鐘意果個物業，覺得地理位置都好好，好驚自己做左唔理性既野，所以想來問下你意見

十分感謝老師，已報進修班，因為唔想係現場透漏太多個人資料，所次message 你。

龔成老師︰

首先，要盡沽股票，去投入一個物業，會令成個組合偏晒係物業一方，造成風險，最好唔好咁做。

因為我地無人知，未來幾年樓時係唔係一定升得快過股市，如果係相反，你就會因為而個動作，而減弱左財富增值效率。

另外﹐你5年後都會移民，其實我唔太建議投資樓市，除非你個物業係會保留，用來之後放租，就另作別論。(不過個呎價唔平，租金回報率未必好理想，你要研究清楚。)

因為除左我講，唔知樓市定股市升得快之外，係香港每次做物業買賣，成本都好高昂。你一來一回，其實唔見左好多錢。

所以，如果你好鐘意，我建議你租住就算。餘下5年，好好用你的優質股，去進行增值，相信會較好。

若然你真係堅持要買的話，你可以優先沽出一些增長力無咁高的股票，包括港燈(2638)、匯控(0005)、恆生(0011)和建行(0939)。

其次就係佔比較重的完全醫療(1830)和煤氣(0003)，可以沽部份，其餘就長線持有。

如果你放棄置業，你現時投資組合，大致無問題。除了港燈(2638)、匯控(0005)、恆生(0011)和建行(0939)係收息股，增長力不高，以你31歲計，不宜持有太多。

另外，完美醫療(1830)佔比太重，建議沽少少，換至其他有增長力股票較好。

記住任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

------------------------------------------------

Q22633：

Hello 龔老師! 你好! 现手上有90%也是hold 股票，大多也是不差股票，不知賣出，或是作長期收息股吧？因本人年纪近50，是否該賣出30% 留下現金。现仍有工作，未退休。

謝謝给点意見!!

龔成老師︰

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

由於你已近退休之年，你要將開始審視手上股票，將一些較高風險的持股，慢慢轉成收息類股票(而唔係轉成現金)。

因為你退休時，就會靠收息資產(如收息股、年金、A級債券、收息產品等)創出的現金流，去支援你退休生活。

所以，你唔洗沽出持股換現金。純粹係睇翻你組合，有無調整投資選股的必要，咁就可以。

如果你尚有5年左右，才正式退休，你現時組合，可以持有一些平穏增長股和收息股。但若你只有1-2年就退休，收息股應佔大部份。

到退休時，收息股佔比應為100%。

------------------------------------------------

Q22634：

銀行股：工商 1398
地產股：恆基 12 領展 823 置富778
物管股：雅生活 3319
保險股：中國平安2318
公用股：電訊 6823 粵海270
醫療股：中生製藥1177
ETF:盈富 2800 安碩 3067

以上持股共30萬左右，單一股票不超過5萬元，另外還有20萬現金想投資，本人30歲，請問有沒有什麼建議和改進？

自上年follow 你的page後，已經買左你6本著作閱讀，十分欣賞年報勝經，這本書是我個人認為學習得最多的（可能是第一本看）好認同你的投資方法，謝謝你。

龔sir你好，多謝你的教導，每天睇你的專頁已成為習慣

龔成老師︰

先多謝你支持我的書和專頁，如果你對估值有興趣，可以睇埋《股票勝經》和《選股勝經》。

當然，最理想係上我股票班，因為課堂中會較具體教你點去運用不同方法選股和估值，而且絕大部份內容，在書中都無提及。如果你想認真學好投資，建議你抽時間來上堂。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你30歲，應以增值為主，建議你用「平穏增長股」 + 「潛力股」作組合，去創造一個增值平台。

你上述持股，都係有質素，可長線持有。但工行(1398)、置富(0778)、香港電訊(6823)都係收息股，增長力唔高，主要只係收下息。以你年紀，不宜持有太多。

現時大市只在合理水平，資金不宜盡用。建議你餘下20萬，等大跌市出現，才去掃貨。

另外，你可以考慮用每月儲蓄，去進行月供股票，去加快資產累積速度。

策略上，你每月5成儲蓄做月供。其餘先儲起，同樣都係等大跌市機會出現，才出手掃平貨。

你可以考慮一些優質的平穩增長股，再加潛力股。潛力股，可選：安碩恒生科技(3067)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。如果有投資美股，可投資QQQ。但佢地波動性和風險會較高，你要自己平衡。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

------------------------------------------------

Q22635：

呀Sir您好呀 我係之前報過您投資班既學生。我想同你分享下宜家我既情況。

其實我宜家暫時係做緊啲短期兼職，同時做緊保險，收入不穩定，但好彩係搵到番黎既我都可以至少儲到6-7成，我平時冇乜駛費，又有記帳習慣，

之前大學幾年搵搵下，宜家有$200000現金，同一份$200000的儲蓄保險，黎緊希望繼續係保險呢行做好，如果真係唔得，先轉。

呀Sir，我真係好想好似你咁財務自由，上完您堂之後，都買左唔少股票

9988 @$203 1手
2638 @$7.83 1手
1928 @$27.6 1手
1810 @$28.7 1手
1448 @$7.45 1手

1177 @$6.95 1手
285 @ $40 1手
270 @11.12 1手
月供VOO @385.75 5股

我想請教呀Sir您 呢個組合 您覺得可以嗎？

我諗住港股暫時咁樣擺係到，長揸果啲股票，同時繼續月供VOO，長遠應該可慢慢致富

我今年23歲. 我同我自己講28歲我要有$100萬. 我真係希望可以做到. 呀Sir，根據我宜家呢份保險工作同買股票既情況. 您可唔可以指點迷津，比啲建議我？

唔該您多謝您呀Sir.

龔成老師︰

以你23歲年紀，這個組合係可以。但港燈(2638)係收息股，增長力唔會明顯，主要係收下息，你現貨可持有，但暫時唔建議你加注。

我假設投資回報有10%（連股息再投資），你現時投資組合約值10萬+20萬現金，5年後大約會增值至48萬。

如果想達至你的財務目標，你每月月供金額要有最少$8000，才會較大機會做到100萬目標。

月供方面，除了保持月供VOO外，你都可以考慮加入其他「平穏增長股」 + 「潛力股」作組合，去創造一個增值平台。

僎設你係月供$8000，你每月先用$4000做月供(連埋VOO計)，其餘$4000儲起，用一邊月供一邊儲蓄的策略。

月供方面，你可以選擇投資在平穏增長股︰指數基金、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)。

潛力股︰安碩恒生科技(3067)、中生(1177)、福壽園(1448)、小米(1810)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。如果有投資美股，可投資QQQ。

現時大市只是合理區，你現有20萬資金可以再投入多5-10萬，用"分注"形式，慢慢買貨。餘下資和每月所儲倒的資金，就等大市出現一定程度的下跌，才大力度掃貨，然後長線投資。

另外，係財富增值時，"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而工作上，你應該才剛剛畢業，其實可以多作不同嘗試，慢慢去找到適合自己的路。保險都係一個值得一試的行業，你可以看看自己是否適合這份工作，加油!

------------------------------------------------

Q22636：

Sir!成手恆大中國，蝕到入肉。同版塊的融創中國8月11號除淨，唸緊換唔換馬！股息派成$2，好似好吸引！但問題現在內房版塊比政策打到咁，又驚中伏！

驚收完股價急插，因為融創都係3幾蚊炒上去。所以想聽下你意見。現在持恆大中國25萬股，均價$8.3

唔該呀sir，現在帳面虧損35%

龔成老師︰

你對派息運作，似乎有點誤解。

如果你要收到股息，必需在「除淨日」前一天，依然持有股票。「除淨日」，其實就是用來確認那些股東收到這權益的日子。等到「除淨日」當天才買，派息就唔會有你份。

「除淨日」那天，股價就會扣除派息部份，例如原來股價$10，派息$1。那麼「除淨日」就會將股價，從$10下調至$9，以反映派息動作。

「派息日」，就係合資格股東，正式收到股息的日子。

由於「除淨日」股價會下跌。而下跌比重同收到息係一樣，所以只係左手交右手動作，你唔會在此期間因買/沽貨，出現任何著數。

至於換不換碼，你要睇翻企業本身質素。

融創中國（1918）業務不差，有規模、品牌、銷售網絡，但同時有一定風險。

這股同中國恒大（3333）一樣，負債偏高。無事就無事，有事就似中國恒大（3333）咁大件事。(當然負債水平，恆大比融創高得更多。)

而且，近期中央有時會出打擊樓市政策，相信會對佢有一定的影響。此股都有投資價值，但只宜小注，可以，但都要明白風險。

至於中國恒大（3333），負債問題唔細。現時風險很高，你最多只可以小注持有。

若現時持股佔你組合好高，我建議沽出部份，換碼至其他類。

------------------------------------------------

Q22637：

龔先生你好，本人50歲，有一個約850萬物業已供完。強積金及基金約400萬 (中/高風險收益基金為主)。股票約120萬(中風險龍頭股為主)，另現金約200萬。

希望約五年後退休。全球放水估計未來通脹將會加劇，如何運用二百萬現金？有咩高見？

其餘嘅配置有冇問題？

另外想請教你對基金同股票有咩睇法？ 有啲朋友講，買基金不如自己買股票，唔使畀保險公司賺，又唔洗綁死咁多年。

龔成老師︰

由於你距離退休尚有5年，都可以進行適度增值，但選項就要相對保守。

其實基金，唔一定無投資價值。你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

另外，你現時基金風險水平，其實係有點高。因為係你退休時候，我地係會將這些有增長力資產，轉換成收息類資產，用來創造平穏現金流(如股息、利息收入)，去支援退休生活。

所以，建議你將高風險基金，部份換至一些風險較低基金或優質股。其實最簡單，就係買指數基金。

而現有資金，你可以將佢地投資一些「平穩增值股」+「收息股」。若你想進取少少，可以較集中「平穩增值股」。相反，則以收息股作為主力。

平穩增值股，例如長建（1038）、中銀（2388）、港鐵（0066）、恆基（0012）、粵海（0270）、領展(0823)。如果有投資美股，可投資VOO。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）、高息基金（3110）都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）、富豪產業（1881）等（記住，股價略波動，不能太過大注）。

大市現處於合理水平，那200萬資金，你可以多用50-80萬，以"分注"形式慢慢入貨。餘下一半就等大跌市機會出現，才大力度掃貨，並長線投資。

到你退休前一年，就慢慢將你增長類資產，換成收息類資產，去為退休創造一個收息組合，咁就可以。

------------------------------------------------

Q22638：

老師你好，我之前誤打誤撞買股票，輸咗好多錢，差不多輸咗有20萬 ，我而家對股票完全冇期望，但係手上仲有以下股票，

可唔可以俾啲意見我睇吓我手上股票應該要長期揸住定係沽出？

66號，共有835股 @46.536 （月供$1500）
788號，共有4000股 @2.084
823號，共有835股 @76.805 （月供$1500）
2800號，共有835股 @27.888 （月供$1500）
9988號200股 @188.72

龔成老師︰

你必先要了解翻，自己輸左20萬的原因。係買錯股、買貴貨、定係誤把短炒當投資? 你要了解清楚自己問題所在，避免將來再發生。

我地做財富增值，最重要不是睇「賺蝕」，不是睇「買入價」，而是睇質素。質素不好，增長力弱，就有可能賣出，蝕都要賣。

你要分析「之後的組合情況」，不是過去，是將來。應該持有那些優質股，比例如何，能為你帶來怎樣的長期財富。

你要分析你的投資目標，你想潛力股的比例多少？平穩股的比例多少？組合風險程度如果？即是你想設計一個怎樣的投資組合？長期、優質、平衡、適合你。

你現時持有股票，都係有質素，只係中國鐵塔(0788)買入價偏貴，但由於有質素，你照長線持有就可以。

這個組合，算係一個增長型配置，若你係年青至中年人士，這個組合係可以。

若你投資經驗不多，建議你先維持用月供方法去儲貨，以減低買貴貨的風險。另外，現時大市只係合理區，每月儲蓄唔好盡用，要留有部份，用來等大跌市機會。

------------------------------------------------

Q22639：

龔sir，想問下如何分辦股票的股價是便宜或贵？是否處於合理區？

龔成老師：

要計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q22640：

你好成哥，我今年36歲，單身

最近想開始學投資增值，希望60歳可以有3-5萬現金流，想下個月開始買入以下5隻股票，（2007，3988，6823，0823，303）平均每月可投資$12000以上，你覺得可行嗎？

我目前收入$40000，但之前經歷生意失敗，輸咗幾百萬，所以冇乜積蓄，仲有你覺得我應該先儲首期買樓定收息增值好？謝謝

龔成老師︰

每個人都有自住需要，但現時香港樓唔平，大致在合理區頂至略貴。如果你係無買自住屋的迫切性，建議你先用優質股去增值，會較好。

若你希望60歳退休時，每月有3-5萬蚊現金流，以股息率6%計，你需要本金600-1000萬。

故你現時要做，就係透過一些有增長力股票(而非收息股)，去先累積起這筆財富。到足夠時，才慢慢換成收息股，去創造現金流，支援退休生活。

你上述提到的股票，都有質素，領展(0823)係合適。但中行(3988)、香港電訊(6823)、偉易達(0303)係收息股，增長力唔高，唔適合。

碧桂園(2007)，業務都算不差，但負債高，風險略高，雖然都可考慮，但不宜大注。

你現時無投資知識和經驗，對企業估值，點去定平貴未必會太了解。所以你最好先利用月供模式，去做增值，可以減低買貴貨風險，對你而言會較理想。

策略上，你可以投資「平穏增長股」和「潛力股」。你每月5成儲蓄，即是最少用$6000做月供。其餘先儲起，用一邊月供一邊儲蓄的策略。

選股上，你可以投資在平穏增長股，加少少潛力股。

由於你投資知識不高，因此可較集中在平穩增長類股，至於潛力股，只宜小小注(不多於3成)。最好是你先提高投資知識，等到你有一定知識和經驗，才慢慢增加潛力股比例(大約5成)。

餘下的另一半現金，我地就等機會，當大市出現較大回調，就加大力度掃貨，然後作長線投資。

我假設投資回報有10%（連股息再投資），你每月投資$12000，24年後大約會增值至1300萬，故這樣安排相信很大機會達至你的財務目標。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

《條𡃁仔醒啊》
時下嘅細蚊仔到底興啲乜？對於我呢亭週六、日嘅全職老豆黎講，又點會唔知呀？本來，我想同大家介紹一個既經濟又實惠，而最重要係能夠「燒時間而又不燒錢」嘅玩意嘅。但後來我唸深一層，成件事其實係有少少伏！

話說响AEON嘅兒童部，有部幪面超人機。部機玩咩？其實係用你條team嘅三個超人黎同電腦對打。贏左唔會有獎品，輸左志在過吓癮。而最抵玩嘅係：部機係免費嘅，玩幾多次都得。但亦因為咁，所以經常都要排隊。以星期六嘅下晝兩點為例丫，就要預返20分鐘先玩到一局喇。

部機賺咩？咪就係賺你唔夠打喇，咪要買卡囉，即係買啲攻擊同防守嘅點數都爆晒燈嘅卡。你要便宜玩嘅就買「抽包」，25蚊三張，但你知啦，呢個世界平野係無好嘅；咁咪奢侈玩囉，有得揀款嘅，每張由幾十到幾百蚊不等。黎到呢度，你可能仲覺得無野：一百幾十，而且豐儉由人啫！

拿，你咁諗係無錯嘅。就等如你買個包包俾老婆，正路都係豐儉由人架，但問題係呢個世界唔淨只得你老婆一個係女人呢。你試下遇著啲好名牌，而又強烈地熱衷比較嘅女人响佢身邊，就壞架啦嘛。就好似剛剛我陪牛、熊仔排隊玩嘅時候，就發生左件咁既事，而令我驚嘆世途嘅險惡喇。

你知啦，排成20分鐘隊，無咩好做，前前後後就固之然會social起上黎架啦：你問下我有咩卡，我又問下你响邊度買呀咁。咁啱响我地後面有個肥仔，佢拿住本簿仲厚過黃頁，入面張張都金光閃閃，一睇就知係買架啦！我好奇地問佢：𡃁仔，你咁多錢嘅？佢話：我老豆買俾我架。

呢個時候，隔離有個坐底F.3嘅男仔黎搭訕，佢話：「呢的咪『成功需父幹』囉！」哇，我簡直嘆為觀止，目瞪口呆，一介𡃁仔竟然明白到咁深奧嘅哲理同人生既奧義！Anyway，我當笑料一則嘅啫，牛仔都無扭我。佢仍然安安樂樂咁用緊佢之前用零用錢換返黎果三張卡打到不亦樂乎。

😏

#ganbarizingcard #maskedrider

突然睡覺前 youtube popup 近兩年前在波士頓錄過的片。社運初期，還未有肺炎，現在回望內容絕對正確，令我特別深深感動! 和你重溫對我影響極大的《巴菲特的五個名言》:

正面思維，有危有機《巴菲特的五個名言》

「商舖老千， 氹人落水。」「 仲叫人買，香港都咁亂，走都走唔切，你想爭落周身債 ? 」

#李根興最喜愛的李小龍名句，#掘井故事，#巴菲特的五個名言

依家我又嚟咗Boston Harvard 讀書，一個叫做 Owner President Management Renew 嘅課程，我後面呢條叫 Charles River， 令我諗起一個由細到大我都聽過，好簡單，但影響我好深嘅故事。

從前有兩個人， 又細到大，一起身都沿住兩條唔同嘅路去條河度飲水。 雖然條河啲水就越飲就越乾。一個唔理， 就繼續日日行去飲。另一個，就日日行去之前都會沿途搵到位掘個窿。 雖然成日畀人笑死佢戇居， 掘來做乜呀， 前面咪有水飲囉。 佢就唔理，就日日都堅持掘少少掘少少。 

終於有一日條河乾咗，一個就渴死咗，另一個就就終於掘咗個井繼續有水飲。故事帶出乜嘢理念?

我明，呢個故事嘅道理個個都可能聽過，但試問，有幾多人又能夠真正做到呢? 日日掘，不斷掘， 天陰、天晴、下雨都要掘。你又有無掘呢? 

上星期我先至同我嘅同事/老婆分享咗呢個故事。 我話而家香港咁亂，我哋做商舖基金嘅，一定會受影響。 但就係因為亂，我哋嘅步伐更加唔好亂。 我繼續會日日睇舖，日日錄片，日日搵租客，日日諗下點樣幫間舖增值。日日掘井。無論人哋點睇我哋，99%嘅人當我哋白痴， 慳番啦，只要1%嘅人支持我哋已經足夠。做生意，最怕嘅就係99%嘅人唔 care about 你，而最後嗰1%嘅人都唔記得你，then you become no body. 玩完! 

股神巴菲特 Warren Buffett 有5個quotes 好影響我:

(5) We simply attempt to be fearful when others are greedy and to be greedy only when others are fearful. (在別人貪婪的時候恐懼，在別人恐懼嘅時候貪婪。)

當全世界都覺得唔好買鋪嘅時候，可能係買舖最好時機。 依家唔係賣鋪嘅時候，而家係買舖嘅時機。5至10年你睇返我呢句說話，你會明。

(4) Risk comes from not knowing what you're doing. (風險，就係當你唔知道自己做緊乜嘅時候。) 掘井一樣，唔好亂咁掘，周圍掘。 搵到個啱嘅位置，係你嘅 passion, capability 同埋 profit potential 嘅中間重疊位， 就不斷重複地掘落去。

如果你今日投資/買舖， 只係純粹博一博，依家風頭火勢，的確好大風險。 如果你知道邊個位有發展潛力，點樣搵到個好租客，點樣幫佢做多啲生意，點樣exist plan去賣咗間舖，唔怕買。Risk comes from not knowing what you're doing. If you know, go for it. 

(3) No matter how great the talents or efforts, some things just take time. You can't produce a baby in one month by getting nine women pregnant. 無論點叻，有啲嘢係需要時間。如果你有睇我嘅《十大創業忠告》，5 years，大方向啱嘅就 give it at least 5 years。我2001年創業開始接觸「舖」，到依家18年啦。

我好幸運，我有兩個好好嘅創業 advisors，我阿爸同阿哥 Steven。 佢哋成日同我講:「 根興，做任何生意同投資，都要量力而為，有持久性。 唔好一個浪襟埋嚟，就失蹤咗。 要因應時勢作出改變， 但唔係好似邊個邊個咁，一時就日日見報， 傳奇幾百億身家，一時就玩失蹤。大上大落，甚至乎好似神童輝(羅兆輝)，上埋天堂，人間消失。 」做生意，要經得起考驗。時間會證明一切。

(2) The best investment you can make is an investment in yourself. The more you learn, the more you'll earn. 最好嘅投資，就係在自己身上，增長知識。 亦都因為咁，我不斷提醒自己要進修學習。 唔好人云亦云，要自己有獨立思維。

(1) The difference between successful people and really successful people is that really successful people say no to almost everything. (成功及最成功嘅人分別就係最成功嘅人對絕大部分嘅事情都係 say No. )

由2009年我買第一間街舖開始，除咗幾千萬以內香港嘅地舖，我全部都 say No. 依家好多大家族，大基金，搵我開 seperate account 同佢哋買舖，我都一樣 say no. 如果你睇緊呢條片，諗住搵我seperately 幫你買舖， 你慳番啦。 因為除咗我哋公司嘅唯一一隻「旗艦基金」以外， 你唔會見到我個名買住宅，買車位，買工廈，買office。 我自己亦都唔會以個人身份去買舖，為免同公司嘅基金有衝突。 因為我相信做人做生意，做一樣嘢，做好佢，已經足夠。 我同全公司講，香港有十萬街舖， 我哋目標就係個fund要own咗當中1%，即係1000間，最有質素啲舖。未有第一千間前，乜都唔駛唸。大家專注做好佢。要搵 Blue Ocean, 就係要識 say NO，say 得快狠準! 

投資要分散，做生意要專注。李小龍名言，亦都係掛喺我公司office嘅唯一名言: "I fear not the man who has practiced 10,000 kicks once, but I fear the man who has practiced one kick 10,000 times." 

我知大家呢刻心情都唔好，但無論是市況點亂， 都要練好功夫， 繼續掘井。 有危就有機。 你個井又掘成點呢?  知道邊度掘，日日掘，專注掘。記住感恩過去，珍惜現在，對未來抱著希望，嗰個感覺真係好正!  

Summary: 

Warren Buffett 5 Quotes: 

(5) We simply attempt to be fearful when others are greedy and to be greedy only when others are fearful.

(4) Risk comes from not knowing what you're doing.

(3) No matter how great the talents or efforts, some things just take time. You can't produce a baby in one month by getting nine women pregnant.

(2) The best investment you can make is an investment in yourself. The more you learn, the more you'll earn.

(1) The difference between successful people and really successful people is that really successful people say no to almost everything.

Bruce Lee Quote :

"I fear not the man who has practiced 10,000 kicks once, but I fear the man who has practiced one kick 10,000 times."

#巴菲特的五句名言

清水灣燒烤場金塔遍地，集體撞鬼後身體如火燒！泰國高僧唸經感應怪事！(恐怖在線重溫 第2226集)

第2226集 (12 May 2017)
燒烤場三人集體撞鬼

恐怖在線 www.edmondpoon.com
逢星期一至五 晚上十一點半到凌晨一點

每日免費收睇直播
視像月費重溫$40
聲音月費重溫$30

相關影片:
1. 可能你冇諗到人臨終前除咗醫院呢個地方一樣猛鬼〈恐怖在線〉[嘉賓 戚法誠師傅]第3181集 2021-01-11 (https://www.youtube.com/watch?v=6yzyX1z3K3Q)
2. AP靈探後撞鬼身體出詭異狀況師傅即場判斷 〈恐怖在線〉[嘉賓 劉定立師傅 @AP人生 ​] 第3192集 2021-01-26 (https://www.youtube.com/watch?v=H2OZqiAiuwE)
3. 灣仔三里屯餐廳靈異廁所！家中煮食險失火，女靈體從睡夢中叫醒！(恐怖在線重溫 第2220集) (https://www.youtube.com/watch?v=Ca2YkMpfyyY)



#恐怖在線 #潘紹聰 #清水灣 #StayHome #WithMe #跟我一樣 #宅在家

小賢講左幾日話想食芝士牛肉漢堡，依個小朋友成日一諗起想食咩就發作，立即吩咐我地去跟進同研發，所以呢～佢就立即打電話俾爸爸買漢堡包，再Order媽咪我買配料，睇佢嘅落力程度就知佢幾想食啦！哈哈！我就配合下你做埋你助手吧！條件係整埋俾媽咪食OK!!?

#芝士牛肉漢堡 #小賢廚房 #KatyBeauty

✦－－－－－－－－－－－－－－－－－－－－－✦

♡♡ Katy生活碎碎唸 ♡♡
Facebook | https://www.facebook.com/katybeautyfanpage
Instagram | http://instagram.com/lovekatybeauty

✦－－－－－－－－－－－－－－－－－－－－－✦
For collaboration pls contact Debbie 93410237
✦－－－－－－－－－－－－－－－－－－－－－✦
This video is NOT sponsored
✦－－－－－－－－－－－－－－－－－－－－－✦

youtube png from pngtree.com
Image by rawpixel.com
Music by Reggie San Miguel - Holiday - https://thmatc.co/?l=32104E75

為我的頻道提供字幕！謝謝你喔！
https://goo.gl/Vzgdyg

Thanks for watching ٩꒰｡•◡•｡꒱۶
See you on my next video♥