【龔成問答信箱】（Q22201-22220）

Q22201：

老師求救！

$270入左3690
$545入左700
$270入左9988
$29入左1810
$16.5入左2013
$4入左8083
點算好？

龔成老師：

你選股較集中在新經濟股類別，這是你的核心投資問題，你要注意翻。另外，不少貨都在貴的價格購買，你日後要加強翻企業估值及投資時機能力，或善用分注、月供等投資策略。

騰訊（0700）、阿里（9988）、小米（1810），無問題，就算騰訊回了不少，都有得守。

騰訊（0700）受政策因素影響，中短期弱，企業的賺錢能力會略減，以及企業估值都會略減，不過，政策影響未到核心性，無令到企業無法賺錢，只是賺錢減少。

這企業長遠仍有質素，有發展力的。佢最有價值的，就是「平台」，這亦是現世代好有發展的資產。

佢業務模式係提供平台，如通訊平台、交易平台、入門網站、遊戲平台等，而收入來源則是其廷伸的服務，如增值服務、網絡廣告、電子商務交易等。

過往的業績理想，又身處長遠有增長的行業，加上擁有重要的資產，即龐大的客戶群，將來發展各業務都有相當的優勢，這都是騰訊值錢的地方。不過，政策會令其賺錢能力減，不過，長遠騰訊仍找到賺錢方法，簡單來說，就是現時定了新的遊戲規則，而企業要時間去適應，中短期賺錢能力減，但長遠會慢慢好轉。

現價合理區中間，分注或月供可以。

美團（3690），不建議太大注，微盟（2013）都不建議過多。

中國有贊（8083）較大問題。

佢主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這投資值博率不高，宜減持。

------------------------------------------------

Q22202：

老師，請問你試過蝕到本錢嗎？我現在蝕了1成多了，心情開始影響生活了，如果完全放低唔睇一段時間（2、3個月），是否好危險？

龔成老師：

比亞迪（1211），股價試過由$88跌落$12

當時我打銀行工，月入萬零蚊。由賺幾百萬（賬面）上，去到蝕錢（賬面）。

我並無影響生活，因為我集中分析企業，而不是股價，如果你無法平常心對股價，就只會同一般散戶，永遠同一層次。

你有些概念錯左，我地不是不理股票，我地是不理短期股價，但會關心「企業」。

建議你花時間睇年報，減少時間睇股價。

------------------------------------------------

Q22203：

Sir, 文長，希望你可以比啲意見我

Sir,我係你38班學生, 由半年前向你請教, 跟住好認真咁上你八堂課, 功課做啱晒都好開都好有滿足感, ….. 又就好似你上堂提過一樣, 已經當大家好似朋友咁.

再次多謝你每次好肉緊咁教導我們正確理財知識, 連BREAK都唔休息咁解答學生疑難 (有時都擔心你操勞過度)

我年紀唔細 (50), 老公已經退休, 以下係我二人家庭狀況

現有資產:
現金 約有$0.8M
股票* 約有$0.75M
基金 約有$0.65M (虧蝕中, 打算明年年中免罰息後, 全數取回再作投資)
保險儲蓄+年金+MPF (預計10-15年後, 2人共約有$3M可以購買政府年金, 希望為將來基本支出補底)
已供滿自住物業 (兩房, 樓齡20, 地鐡沿線步行10, 估計現值$8M)

每月淨收入: $40,000 / month
本人希望3年後退休, 之後用兩年時間(i.e. 第4-5年, 慢慢轉晒去水桶3作長線收息. *股票profolio 草擬如下

中長線計劃:
A)預算3年(最長不多於5年)提早退休, 移居馬來西亞 (預算2人日後生活醫療保險等開支約$18,000-$20,000 / month)，

B) 希望從現有資產, 及每月收入 , 投資滾存, 達致以下兩個目的:

i)預留3年後退休時, 動用當$1.2M在當地買一間住宅, 退休用
ii) 其餘每月有被動收入最少有$18,000/month 作為二人生活開支

C) 想盡量10年內唔賣樓, 原因是暫時保留自住物業給家人使用, 或如租出, 大部份租金作為父母養老用.

我知道太遲計劃，所以好希望老師可以幫忙, 抽時間給予意見及指導：

I. 如何運用現有流動資產#1/2/3及現時每月$30,000收入, 在退休前約仍有3年時間, 應如何步署以至有效達至計劃A+B i&ii? 實際上是否可行？

II. 上面草擬嘅stock portfolio , 股票及比例要改進嗎? 15隻會唔會太多? 應如何改善 或 應該部份剔除 (現在15隻都有貨)?

III. 由於距離我退休前仍有3年，如利用自住物業做按揭借出 eg. $2M投資收息股，3年內加大現有資產，又是否可行加快達成目標？你認為這個想法如何？風險會很大嗎?

IV. 其實亦有想過趁現在樓價高，將單位先出售吐現$7-8M（反正已經住咗22年，物業亦升值咗$5M)，改為租住地方等。不過，我又擔心持太多股票會造其他成風險. 你意見如何?

V. 保留物業將來可做逆按揭, 以每月收到款項作為夫婦二人年老時,應付大部份日常開支, 你認為做逆按揭可取嗎?

重覆中長缐計劃，啲points 清楚啲

龔成老師︰

I) 你現時計劃操作模式，大致都可以。但金額上未必足夠，有些地方要再調整一下。

如果你希望3年後每月有1.8萬蚊現金流，以股息率6%計，你需要本金360萬。再加上你置業，和一些置業上雜費，相信最少要500萬才足夠。

以你現時資產2.2M(現金, 持股, 基金)，再每月月供$20000，3年後估計都只會增值至350萬左右，故實行上有點困難。

我可以考慮，現有資產和月供，就主力去累積這個360萬，以換取每月$18000現金流。

而你移居後的新物業資金，就透過賣出現有香港物業去獲得。由於你和你先生已移居，你家人可以搬去較細單位，從而空出這120萬，作你們新居住地置業之用。

II) 以你組合金額計，15隻都勉強可以。現持股都係有質素，但緊記由於你將近退休，你要將水桶1和2慢慢轉去水桶3﹐去為自己創造現金流。

III) 透過借貸投資，從中賺取息差，是可以。

但你要留意，現時按息不高，這策略是可行的。但當未來按息口上升，令息差收窄，就會影響到你回報。

另外，就是虧損的可能，股價是會升跌的，若然買入後股價下跌，你就會出現「賺息蝕價」的情況，那你的計劃就會得不償失。

但現時大市只在合理區，大致收息股在「不處於平宜區」的價位，較難確保不會「賺息蝕價」。

而且，這樣做都會增加你負債水平，而造成風險，你要自己從風險與回報中，作出一個平衡。以你年紀，總負債不要高於總資產50%，會係較安全。

IV) 這個都可以，但我在答案I)的建議，相信會較為穏當。因為畢竟3年唔係一個長時間，再優質股票都會有機會波動，令回報不確定性增加。

而且你咁做，這3年所有資產都會偏晒係股票類。若股市出問題，你成盤計劃就會大受影響。故建議原有物業，暫時不動，令組合較平衡會比較好。

V) 逆按揭都係一個可取方法，只要你物業在你家人居住後，再沒有傳傳承需要，逆按揭都係一個提取穏定現金流的好方法。

------------------------------------------------

Q22204：

龔sir，你好，一直有追隨你的專頁。想你就住我嘅財務狀況和目標比d意見。

現時我和太太35歲，財務狀況：
儲蓄：130萬
股票：40萬 （20萬hsbc, 15萬巴巴，5萬莎莎）
外幣：30萬 （澳元，兩年前兌換率5.8買，無升跌，但有約年息率5％）
自住樓：現值700萬，仍欠320萬貸款
未來儲蓄：預計月儲3萬

我倆目標五年後40歲，打算賣埋樓有其他人生計劃，希望可總共有1200萬資產 （打算賣埋樓）

我有以下計劃，想龔sir比點意見

1. 股票會長放，直至目標：莎莎$4, 匯豐$80, 巴巴$350）,到時40萬股票--＞75萬

2. 樓保守假設樓價不變，仍值700萬（到時欠270萬貸款）,賣左即是有430萬

3. 外幣30萬澳元keep，目標兌換上$7.5，有38萬

4. 130萬，分30萬流動現金（唔會郁），100萬分3注，買入基金 （初步計劃投資中國股票基金及新興市場基金，希望可追落後，感覺現在美國市場太高追，風險大），

目標100萬可增值至200萬

5. 每月儲蓄$30000，會全部月供香港科技指數etf，因睇好未來新經濟產業成長以平均成本法買入（嘗試找在每月相對低點買入），

令原本三年儲蓄180萬儲蓄，目標可增值至250萬

上面計落都只做到75＋430＋38＋230＋250，都係只做到約1000萬目標。

想龔sir比下意見，自問沒有選股票眼光，和太太都傾向保守穩陣，所以才打算以基金及月供方式去增值資產，

我想龔sir特別在第四第五點比下意見，能否有更好增值方法，讓我們達到1200萬目標。以我們投資保守取向，1200萬目標是否不實際？

龔成老師︰

要做到你1200萬目標，又唔可以話完全不可能。但你要從目標與風險中，取個平衡。

1) 其實我地買股票，就係買企業，只要佢質素不變，我地係應該一直持有，讓其為你財富增值，才是正確做法。

因此，我從來都唔會定目標價。只會係佢質素出問題，或者大市好狂熱，股價異常地高，才會減持。

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你35歲，應以增值為主。匯控(0005)只係收息股，不宜持有太多。建議減持部份，換至其他較有增長力股票。其餘2隻，都可以長線持有。

另外，我地唔好成個組合，只集中係2,3隻股票身上。

最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能高於組合30%，同一股不能高於組合15%。要平衡，建立後長期持有，不是買賣賺差價，而是成為你財富組合一部分。

你可以投資平穩增長股+潛力股，以你年紀，比重可以去到各一半，但潛力股風險較高，若你投資經驗較淺，或者不想承受太高風險，就要調低少少個比重。

2) 其實每個人都有自住需要，無自住樓就會承受租金波動風險，你要自己衡量。

3) 在投資的角度，外匯不是最好的投資項目，因為說到尾，這些都只是一些貨幣，即是「政府借據」，貨幣中期會以週期的模式運作，但長期來說，都是貶值收場，因為貨幣只有「交易價值」，並無真正的財富價值。

而我地進行財富增值時，應該集中將資金投放在真正的資產，如物業、車位、優質股等。

4) 可以，但大前題你要對相關市場，有基本認識。同時間，如果你唔識定平貴，就要分注去入市。

你可以衡量基金的投資策略，所投資的資產類別、投資策略、風險程度、市場、費用成本、以及過往的表現(可以睇佢過往5-10年，如果回報係比主要投資市場高，有機會值得繼續投資)。

5) 安碩恒生科技(3067)這類ETF係可以，但唔建議全數投資落去。因為組合除了有增長力外，平衡性都好重要。

因為而一刻你見佢行業係好有潛力，但你唔能夠肯定，會唔會突然出現一些負面因素，影響成個行業發展。因此，我地要分散投資，個別行業唔好佔組合3成以上。

現時大市只在合理區，資金不宜盡用。你每月儲蓄，可以先用一半去月供上述的股票。餘下一半，就等大跌市才出手。

但唔建議你找每月低點，因為係好難，好易出錯。你好簡單咁，每月用同一日入貨(不用理當天價格)，其實已經做到平衡價格波動性風險的效果。

我假設投資回報有10%（連股息再投資），你每月投資$30000 + 現有資產200萬(現金、外幣、股票)，5年後大約會增值至540萬。

再加上你現有物業，相信你增值至1200萬，係可行的。但重點係你要配置好一個適合和平衡的股票/基金組合，才會有機會做到上述預期回報。

------------------------------------------------

Q22205：

Hello, sir!我follow左你專頁好一段時間，我本身一直都缺乏投資概念，唔懂得投資只係儲錢擺響銀行，最近開始定下一啲目標希望增值同滾存財富。

我現時月入約40k，扣除支出家用我保守計可以每月儲到 約25k，儲蓄有現金50萬，另外近期入手左3隻港股。

1830 2手@ 8.5
2196 2手@54.6
9988 2手@206

我想提升自己理財知識，逐步提升持股對現金嘅比例，希望2年內資產值滾存到2百萬，想將來有資本去搞一啲小生意。

1. 想問我組合嘅股票策略可以有哪些地方改進？

2. 因為我有買左幾年儲蓄保險，但我現時想進取一點同彈性大啲，我嘅經紀向我建議買一啲每月派息嘅美國指數基金，強調本金基本上係冇增值但賺息，呢類產品適合我嗎？

我應該有咩地方要留意？

響投資方面真係新手，好多嘢需要學習，謝謝龔成老師，我有買你本書睇，好認同你對財富管理嘅態度，希望學到更多

龔成老師︰

1) 我假設投資回報有10%（連股息再投資），你每月投資$25000 + 50萬儲蓄和持股，2年後大約會增值至140萬。

但2年只係一個好短時間，就算再有質素的股票，都有機會出現波動，影響你回報，你要明白這個風險。。

你現時持有股票，都係有質素和增長力，但佢地都係潛力股，雖然較有增長潛力，同時風險都較高，不宜持有過多。

組合上，可以用平穏增長股和潛力股作配合，各佔5成左右。若你投資經驗較淺，潛力股比重，要再調至3成以下。到你學到一定投資知識，才慢慢調高。

現在你每月先用5成儲蓄，即$12500做月供。其餘先儲起，用一邊月供一邊儲蓄的策略。

現時大市只是合理區，你現有50萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

若你要達至200萬目標，你月供就要加大至$50000，或者將投資年期加長至3-4年，才可以做到。我比較建議加長年期，因為時間較長，最終回報不確定性會較低，成事機會會較大。

2) 其實"保險"主要係用來防守，買足夠保障就可以。儲蓄成份架保險，唔係唔可以買。如果你個人風險承受能力好低，或者完全無投資能力，這類保險都有持有價值。

但始終係財富增值角度，佢幫助好有限，一般我都就唔建議太多。做財富增值，應集中投資在優質資產(如優質股、物業等)，效果才會理想。

而且，你這份基金係以收息為主，我相信唔會有太大增長力。用來做財富增值，就未必適合。

------------------------------------------------

Q22206：

龔成老師，你好。我係初哥，之前考慮左一段時間，用左少少買入一手深圳高速（$7.7買入），但係佢最近都跌，我有嘗試去了解跌既原因。

但係都搵唔到，我應該點樣去搵資料，了解一隻股票既外圍因素

龔成老師︰

就算再優質企業，中短期股價都會有機會波動。原因不一定是本質出問題，可以係一些與其本質無關的因素。

只要長線質素無變，中短期波動我地唔需要理會，長線持有就可以。

深圳高速公路股份（0548）有質素的，這股持有不少有質素的資產，現金流穩定，不過增長力不強。

這股有長線投資價值，收息可以。中短期價格波動，係正常事，唔見佢質素有明顯變差，可持有。但就不要對股價有太大期望。現價合理。

其實你要了解一隻股票，先要了解佢業務係點樣賺錢，這些要睇年報、公司網站等資料。這些資料，在港交所、公司網站、一些財經網，都可以找到。

之後，你要定期留意公司和行業相關新聞，去睇下有無一些事件，對佢"長線"賺錢能力，造成影響。

我地去分析，應該主要集中在企業和行業本身。外圍宏觀經濟因素，不應佔太高比重。

------------------------------------------------

Q22207：

龔成老師，想請教你以下問題。

1. 留意你提到，預計現時為牛市二期。想知下一浪是否必定為牛市三期嗎？還是有機會受各因素影響突然變為熊市？我不太了解牛熊市是否一定順序而行？

2. 坊間預期通脹快來臨而持續多年。想知哪些股票會受惠？哪些類型股票會下跌而不宜沾手？

3. 樓市方面，通脹理應帶動所有民生用品及物價上升、及樓價也因而上升嗎？

龔成老師：

1）現時牛熊分析，已經比過往年代，作用大減。

理論上，會去牛三，但現時我已好少這樣推論，現世代變數多左好多。

在過往年代，一般是順序的，因為會依經濟週期運作，但現世代有好多情況都不是。

你應該集中分析「長遠企業價值」，而不是推算「市況」。

2）如果企業加價能力較弱，本身產品自主能力較弱的，就有可能受影響。不過，我地的分析重點，始終是長遠的企業價值，前景等的因素。

3）理論上係。

當通賬出現，物業這類資產項，價格都會向上，但中短期仍會受經濟、供求、租金回報率等因素影響。

------------------------------------------------

Q22208：

龔成老師你好
電動汽車股具增值潛力

想問一下
點解你會揀買入比亞迪而不是Tesla既？

龔成老師：

比亞迪（1211）與Tesla（TSLA）都是有質素，有潛力的企業，由於同處電動車行業，而這行業的前景均正面，因此，兩隻都有長線投資價值。比亞迪在中國電動車市場、公共交通工具、電池技術方面較強，而Tesla則在外國的電動車市場較強，因此各有優勢。

比亞迪我投資了超過10年，選這股而不選Tesla，是由於過往比亞迪的財務數據較Tesla理想，比亞迪在過往多年，一直都有手機電池、傳統車等業務，為這企業帶來持續的正現金流。相反，Tesla在過往處負現金流狀態，要不斷靠市場集資進行研發，到近年才有正現金流。

投資者選股，選現時已有賺錢業務，有正現金流的企業，會比較穩健，風險度較低。

相反，Tesla過往未有正現金流，風險度會較高，但這類企業，若果能夠由負現金流轉為正現金流，股價的上升幅度可以十分驚人，因此，投資者選那一隻，其中一個因素就是本身的風險承受能力。

------------------------------------------------

Q22209：

老師你好, 好想請教你一個心理嘅問題, 最近我見啲科網股跌得好犀利, 譬如阿里巴巴我留意住佢, 人嘅心理就係咁

當然佢一路下跌嘅時候就會等一等,好似每日都跌啲每日都跌啲,咁唔會下定決心買,但係今朝早我見佢好似有啲止跌回升嘅感覺,跌咗落去又升返琴日嘅價位

咁我就買咗一手好想請教老師其實呢種心態係唔係唔係咁理想?

究竟我哋應該係下跌一路下跌當中捕捉一個價位就買?定抑話要等佢U turn升返少少先至買?

龔成老師：

你現時停留在一般散戶的思維，你唔好理短期股價，你要學憑投資真正賺大錢的人的方法，例如巴菲特的方法。

第一，著重企業價值

第二，不預測短期股價走勢

第三，不要情緒化投資

第四，要以平貴度去進行投資

第五，買入前定好投資策略，不要到時變來變去

------------------------------------------------

Q22210：

Hello. 龔成。想請教一下、如果香港政局不穏或我自覺身處地方政局不穩。現在所持有的股票應該先估出還是繼續看企業現在的質素？

因為萬一有咩事或香港經濟不太自由，無辦法估計所持有的還可否有價值

我現時月供五隻股票每隻1k.
1, 823, 3,66,2800

謝謝你的時間和建議！

龔成老師︰

若你相關資產，係會依然保留在你所講的地方投資，就應該睇企業質素。除非佢政局問題，同時影響到企業本質，否則政局問題應不作考量。

因為股價長遠都係反映企業質素，中國會係未來10年其中一個增長理想經濟體，香港股市中有不少有質素的內地企業，長遠都會受惠。

而且，內地企業需要一個面向世界的集資平台，相信香港唔會去到好極端。

你現時月供股票，係適合你。如果你想增長力再大少少，可以加入少量潛力股，但佢地風險會較高，你要自己衡量。

現時大市只在合理水平，每月資金唔好盡用，要留有部份，等大跌市機會。

潛力股︰中生(1177)、福壽園(1448)、小米(1810)、安碩恒生科技(3067)、港交所(0388)、舜宇光學（2382）、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22211：

龔sir, 早晨！想向你請教一些有關香港樓的問題。

1）我見現在內地有房住不炒政策，加上Facebook google 等有機會撤港，請問分別對香港樓巿有影響嗎？因為擔心這兩個都會令香港樓巿下跌。。

2）我最近想投資買樓收租，雖然見租金回報率不算太高，但仍希望能賺於升值。可是，另一邊又擔心以上的情況會令樓價跌，最後得不償失。。

3）由於預算（約550-650萬）有限，我正考慮沙田第一城，淘大花園，北角/銅鑼灣/灣仔，請問哪個選擇會比較值博？

4）（1）提到的問題對本地地產股會有影響嗎？

問題比較多，謝謝和期待你的回覆

補充一點，我擔心房住不炒的影響是因為有見香港政府與中央的關係越來越密切，政策上有不少都跟中央。。所以擔心香港之後也會推類似。。

龔成老師︰

1) 內地由於部份地區，房價炒至不合理水平，故中央政府才出手干預。好似最近一房多校政策，都係為內地不合理的樓價，去進一步降溫。

但香港房屋政策，未必一定完全跟足內地，因為大家背景和地區條件都不同，好難話完全一樣。但類似調控，係有機會。

而Facebook google 會否撤港，暫時都係未知之數。但有大型企業離開，對香港經濟係不利，樓間會出現影響係唔奇。但長線香港房屋供應失衡，相信出現較大回調，機會較微。

2) 長線樓市係升架機會較大，但你現時資金不多，加上投資樓市值博率不及股市高，故你先投資優質股，會係較好。

3) 地區上，沙田第一城和淘大花園都係較有值博率。但你都要睇翻物業本身質素，價格去作最終衡量。

4) 會，因為佢地除了住宅物業，還有工商用物業。若大型企業離開香港，佢地都會受影響。

------------------------------------------------

Q22212：

老師你好，我現時31歲，月入大概4萬，扣除所有開支每月大概可儲1萬。以下是我現時的資產分佈，想問問你的意見：

- 銀行現金約25萬

- 阿里（9988）100股（買入價 $250）
- 中生（1177）2000股（買入價 $7.5）
- 安碩恆生科技（3067）1000股（買入價 $20）
- 信義光能（968）2000股（買入價 $12.7）
- 舜宇光學科技（2382）100股（買入價 $175）
- 華潤水泥控股（1313）2000股（買入價 $9.19）
- 金沙（1928）800股（買入價 $35）

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你31歲，應以增值為主，建議你用「平穏增長股」 + 「潛力股」作組合，去創造一個增值平台。

你現時持股，係有質素和適合你。但就過份偏重於潛力股(9988, 1177, 3067, 0968, 2382)﹐令風險偏高。

以你年紀，潛力股佔5成好了。若你投資經驗較淺，要再調低少少。

但由於你持股都有質素，你唔需要去沽出。用新資金去慢慢調整翻個比例，咁就可以。

現在你每月先用5成儲蓄，即$5000做月供。其餘先儲起，用一邊月供一邊儲蓄的策略。

大市現處於合理水平，那25萬資金，你可以多用5-10萬，以"分注"形式慢慢入貨。餘下資金和每月儲蓄，就等大跌市機會出現，才大力度掃貨，並長線投資。

------------------------------------------------

Q22213：

謝謝成哥，708 恆大 & 1357 美圖，兩隻股我蝕左投資本金嘅六成，剩返三成（總共得返3萬蚊）

其實真係好少，我睇過兩隻股三個月前都係好爆升，但係而家又跌返差唔多去到一年前嘅低位，我究竟好唔好等呢？

其實而家得返三萬蚊我諗緊不如等半年睇吓佢地變成點？我傻嗎？

好彩我投資左10萬蚊1211 比亞迪，我諗住當長線投資，當時180入，我第日等到過咗250先再放平衡返心態

龔成老師︰

其實唔係所有股票"等"，就代表佢一定會有機會重回買入價。因為無質素的股票，只會越跌越深。

所以，我地係決定是否守的時候，重點一定要睇隻股票有無質素。有的話，守係可以。若果係無，你只會浪費時間成本。你應盡早沽貨，投入其他優質股會較好。

恒大汽車（0708）雖然可能有潛力，但風險高，佢資金投入的確強，大力發展新能源車，但這些仍未有賣產品真正的實力，長遠能帶動多少收入，未知。

由於仍有好多未知數，而股價已經大升左好多（比半年前），因此，這刻要自己衡量風險。

可能佢真的有潛力，但連基本的銷售銷售都未有，我地作為投資者，就好難分析，只可以話佢股價會大上大落。

我唔係話佢無投資價值，只係不確定性較高。

美圖公司（1357）正面，佢過左最差時期，現時正向好。佢主要從事提供在線廣告及其他互聯網增值服務；以及開發、製造及銷售智能硬件產品。

見佢財務數據改善，這企業仍有發展力，有長線投資價值。不過業務變化始終大，不建議大注投資。

這2隻股股票，若你持貨不多，可以守住先，再觀察。相反係持貨比較多，就要沽出部份，去平衡風險。

另外，你唔好停留一般散戶個種"賺差價"想法，諗住升就沽，賺個現金差額回來。

我地真正財富增值，係將只會貶值現金，換成會資產的一個過程。只要資產係有質素，佢就會一直為你增值，你係唔應該賣出。

比亞迪(1211)係有質素的潛力股，係一個唔錯的資產。而且佢現時才在發展階段，未到真正全盛時期，價值未得到完釋放。。建議你一直持有，會對你較有利。

------------------------------------------------

Q22214：

老師你好！想代朋友問問他有40萬，想買些穩定的股票。短時間，大概持3至6個月到，他想知道有何選擇呢？謝謝你

龔成老師︰

其實就算最穏定和優質股票，中短期都一定有波動。

3至6個月係一個好短架時間，我一般建議投資者，持有股票最少3-5年，才可以較有效去平衡價格波動上的風險。

因此，如果只係3至6個月時間，我建議你朋友最多只可做定期存款，唔好以股票作為目標，去做增值。

------------------------------------------------

Q22215：

非常感謝龔成老師的回覆，您給予的投資建議，我會認真考慮。在我以後的投資生崖中，我會更著眼於企業本身的價值之上。

我近日先至在不同的社交媒體上認識到龔成老師您，您在眾多文章中提及過小米跌到24蚊，就可以開始分注吸納、福壽園，跌到7蚊就可以開始分注吸納。

小米、福壽園，最近我都打量著。而阿里，目前200蚊防守性極強。但現在，我會更傾向於觀望或審慎小注分注並長線持有的策略。

我現在先對龔成老師的著作《80後百萬富翁》一書感到興趣，請問有何購買渠道?

可能較為不幸，我在看到襲成老師的回覆前不久，已再度入市，不過是打算小注分注入，並打算長期持有:

-天能動力(819)，14.26買入1手2000股。您之前在2021年4月28日的文章上有提及過天能是有質素的，業務向好方面發展。

我自己亦對天能進行了一些資料搜集。目前是超低市盈率，僅5.38倍，就算相對同業，都是一個極低市盈率水平。

股價現處於52周較低水平，盈利及其増長速度亦相當亮麗。行業前景方面，未來電動車是大勢所趨，動力電池企業的前景更是無可限量。

不過，近日我看過一篇文章，指天能動力在較早之前進行分拆。天能動力將接近貢獻九成利潤的電池研發、製造以及銷售的核心業務分拆予天能股份。

那請問天能動力 (819)，在進行分拆之後，在企業質素以及投資價值上，有否改變過，我是否已跌入低市盈率陷阱?

-深圳國際(152)，10.86買入了兩手1000股。您在較早前有專欄提及過深圳國際，評穩定、高息、有少少增長力。深圳國際一股，我跟長輩研究過之後，是看好的

不過一定要長期持有，到通關之後，好可能會急速增長。

我自己亦對深圳國際做過一些資料搜集，深圳國際，由深圳市政府透過投資公司間接持有，企業本身持有深高速一半股權

經營收路費、港口、物流園業務。另外，我經披露易發現到深圳國際的亮點，發現兩摩、花旗等大行的持有已發行股權的占比好多，約接近六成之多

相對其他內銀股/收息股/公用股，大行持貨一般只有大約十幾％左右，深圳國際在這方面給我安心的感覺。不過，發現2020年的盈利為4007百萬，盈利增長率為負20.19%

請問這只是疫情所造成的現象，對企業質素以及投資價值上，亦沒有影響?

再次感謝龔成老師的回覆~~~

龔成老師︰

你係分析上，依然係未放開過往短炒的模式。雖然我明白唔係一時三刻可以改變，但你必需要努力去調整。

52周較低水平，係一些技術分析，主要係短炒用。過去股價，跟今天企業質素，未必有好大關聯性。如果你用佢做投資決定，好易會出問題。

天能動力（0819）分拆電池業務上市，對佢價值唔會有影響，佢會係新上市公司的大股東，相關盈利依然會係佢會計帳目當中。

至於佢一直低市盈率，很大程度係因為市場對佢長線賺錢能力有保留。只能說，此股風險本身較大，投資係可以，但緊記不能大注。

深圳國際（0152）有質素，是不差的收息股。

佢主要從事收費公路的開發、營運及管理；物流中心及綜合物流港的建設、營運及管理；提供第三方物流服務、物流資訊及金融服務、港口及相關服務、物流園轉型升級服務。

但留意，集團主要股東係深圳市投資控股有限公司，而非兩摩、花旗。其實一般股東比重，對企業分析上，重要性唔算好大﹐最多只會作為輔助性參考。

由於疫情關係，令到國內不少經濟活動，出現停頓。因此，收入難免受到影響，但這都是中短期因素，長線投資價值依然存在。

集團過往業務穩定，生意與盈利都不差，不過就不是高增長類。這股都有長線投資的價值。

現價合理，投資收息可以。但以你25歲年紀，這類收息股，就不太適合。你應先集中係有增長力股票，去累積一筆財富，到退休時，才換成這類收息股，去創造現金流，而非現在。

------------------------------------------------

Q22216：

唔好意思龔成老師
我有一樣急需請問你的意見

因為我在年初恆騰網絡136炒起時分階段入左好多，平均價係10.81，我最高峰時可以賺$300k但無走，就是因為貪心

現在我手持48000股136，賺面蝕300k左右，眼見他一直跌好像永不翻身咁，恆大又好像沒有起色，真的很擔心

我投資的一百萬股票，有一半就是買了136

請問龔成老師
我現在應該止蝕離場嗎？

龔成老師：

第一，我地應該建立平衡組合，同一行業要少過3成，同一隻股票要少過15%，你出現了集中風險。

第二，恒騰網絡（0136）有危有機類。這些股我地投資的金額，要更少。

佢現時企業盈利不多，但市值極高，市場對「前景」有無限幻想，有時炒作會升好多，但跌都可以好勁。

如果長遠業務成功，可以升得勁，但失敗，會跌得好勁。因此，長線投資不是不可，但只能小注。

現時你最大的問題是集中，因此，要在反彈時減持，餘下先守。

------------------------------------------------

Q22217：

龔sir你好，一直有留意你同睇開你岀既書，本本都令我獲益不少，希望你唔好停下來，繼續讓大家一起進步

有少少問題想請教一下，本人三十四歲，分別係唔同時期投資以下股票：

0005 1200股 均價$59
1038 1125股 均價$49
0066 500股 均價$43.8
9988 300股均價$ 227

Q1:請問呢個組合可以嗎？ 會否太過保守？

Q2:如果賣左0005 轉換其他更優質資產會不會更好，比如Reits 或 地產股 因為香港始終地小人多租金不斷向上，回報會唔會好啲

銀行股賺錢能力如你所講不及以往

我會耐心等候回覆 謝謝

龔成老師︰

多謝你的支持，我有時間，一定會繼續出書，同大家分享更多有關投資的知識。

1) 我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你這個組合，以於有不少比重在匯控(0005)，所以係有點保守。

2) 以你34歲計，應以增值為主。匯控(0005)只係收息股，增長力好一般，唔建議你持有咁多。地產股，係可以考慮。

但房地產信託基金（REIT），就未必太合適。佢原理如同買樓收租，基本上是穩健的。而房託規定要將可分派的90%收入作派息，故利息有一定保證。

而租金長遠一定會上升，故長期持有不錯。但好多房托，其實都無增長力，係純收息，除了領展(0823)適合你外，其餘REITS，在你這年紀暫時不要考慮。

以下是一些有增長力的優質股，你可以將部份匯控(0005)換碼至優質，平穩增長股，及潛力股票，未來新資金，也可以用佢地作為投資目標。

如果你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

若你有一定投資經驗﹐潛力股比重可以相應調高，佔組合約3-5成，視乎你投資經驗多寡和了解這些股票程度而定。

另外，我想提多你一個要點。

任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

特別係銀行業，佢營運模式較特別，風險會比一般行業為高。必需堅守30%這個準則，如果可控制在20%以內，會更好。

另外，指數基金係不受此限。你現時組合總金額不多，有出現過份集中問題，都係正常。但當你組合金額有一定數量，你就要留意，唔好比個別行業/企業，佔太高比重，以免造成不必要的風險。

------------------------------------------------

Q22218：

龔成 你好，一直打算分注VOO同QQQ 定期各買一股 但他們價位一直升

如果現在入市 會是貴價位入嗎？

還是應待他們跌至什麼程度才買入較理想？

龔成老師︰

Vanguard標普500指數ETF〈VOO〉，是追蹤標普500指數的ETF。而Invesco QQQ Trust(QQQ) 是追蹤納斯達克100指數。

2隻都係有質素的ETF，後者增長潛力和風險會較高。但現價都處於合理區頂，至略貴水平。

但由於你係用近似月供的模式去入貨，本身會有平衡價值波動效果，因此你現時已可以開始買入。

除非你本身有一定投資經驗和技巧，否則我唔建議你用平貴去做策略，用你本身計劃定期各買一股，會較好。

但緊記，你這個定期入貨計劃，一定要長期進行，才會有理想效果。最少維持3年，並持有這些股票5年以上。

當然，可以的話，最好一直持有。因為，優質股持有時間越長，財富增值效果就會越理想。

------------------------------------------------

Q22219：

龔成老師，你好！本人今年3x歲，丈夫4x歲，丈夫是西醫，沒有子女。

1. 擁有一個已完成供款，現值$800萬的物業
2. 持有一個寫字樓舖，現值大概$450萬
3. 兩年前，購入一層價值$1,200萬物業，康城樓花，今年年尾收樓，正在供款中。
4. 持有大概40萬匯豐股票，購入價$48元
5. 有400多萬現金

兩三年後，有計劃搬到港島區居住，不知道應該如何處理，現在手頭住宅物業？

這些年，我們忙於工作沒有學習投資知識，對投資一曉不通！我們第一步應該如何投資呢？

謝謝你！

龔成老師︰

我地投資除左講求增值，組合平衡性都好重要。現時你有2個住宅物業，加1個商用單位，其實成個組合嚴重偏向左係物業類。

我比較建議，你用手頭上其中一個物業，去轉換成港島區物業。至於沽出那一個，你可以從佢長線潛力和租金回報率去衡量。

其餘資金，你就用來投資優質股，這樣安排會較理想。

另一個方法，你唔洗沽出現有物業，將佢地放租，以租養樓，從而節省買賣物業之成本。之後，港島區自住房則另外購買。

但這樣做，風險就會較高。因為當你買入新港島區物業後，資產會極之偏重物業類。當物業市場有問題，你成個財富組合，會有嚴重影響，你要自己衡量。

不論你用那一個方法，你都應將每月閒錢和置業後餘下資金，盡力投入優質股，去提高優質股係你財富中的比例，去盡力提高平衡性。

策略上，你可以投資「平穏增長股」和「潛力股」。你每月5成儲蓄做月供。其餘先儲起，用一邊月供一邊儲蓄的策略。

你現時無太多投資經驗，潛力股這類風險較高的股票，你就不要持有過多，最多維持2-3成好了，甚至先集中係平穏增長股類。

到你有一定投資經驗﹐潛力股比重可以相應調高，佔組合約3-5成，視乎你當時投資經驗多寡和了解這些股票程度而定。

現時大市只是合理區，你現有資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

現有匯控(0005)都可以持有，但佢係收息股，就要係收下息，唔好預佢有太大增長力。而且，佢已有一定數量。所以，你暫時唔好增持佢或銀行業股票。

個別企業和行業，不要佔組合15%和30%以上，銀行業更加不要高於組合20%，否則會有過度集中性風險。

------------------------------------------------

Q22220：

龔sir, 你好，求教呀！我同老公因為住屋問題，攪到非常煩惱，想聽聽你的意見。我哋十年前買落2房戶，住到現在，但仔女已步入青春期，

需要各自有自己房間，但3年前我哋將宜家2房戶加按，再加上當時儲蓄，買多咗個1房單位收租，所以宜家煩惱緊應該賣出自住單位，樓換樓呀，

還是自住物業放租，然後再租一個3房單位住呢？

如果樓換樓的話，我哋計過財政上會有壓力，但仔仔已是中三生，有必要同妹妹分開房間。龔sir，請你教教我哋該如何做？

我哋宜家現金只有700k左右，股票只有2800（但冇諗過賣），如果真的要樓換樓的話，計過同區屋苑，最平都要補2百萬現金，仍未計stamp duty, commission payment 等雜費。

龔成老師︰

你有2個方法，第一個方法就係你所講，將現有自住單位放租，之後再另租一個3房單位。好處係你可以保留原有物業，同時也減少了買賣物業的成本。

另一個方法，就係盡沽2個現有單位，去買入一個3房單位自住。這樣做以2間細屋，換一間大屋，相信可以減少你財政上壓力。但中間買賣物業的成本，就會相對較大。

而且，你會失去左一間單位租金的現金流。

至於用邊個方法，你可以睇翻整體財政狀況，邊個方法會較穏當。另外，你都要考量埋現有物業質素。若佢地長線係有增長潛力，你用以租養樓去保留佢地，會比較好。

若投資價值一般，你可以沽出套現，直接買一間大屋，就可以了。

但緊記，你要有信心長線供得起，才好置業，否則用方法1會較好。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q22061-Q22080）

Q22061：

龔sir, 本人52歲，早年對股票市場沒有深入認識，便跟朋友一起買入股票，97年全部變晒蟹貨，朋友話同佢鬥長命，所以全部都沒有放出，

但有些已100合1，變為單位數股票，想放出也蝕手續費。

最近這兩個月開始睇你Facebook, 覺得應該要整合一下手上的股票，不應採取放任不管態度，要選擇一些適合自己年齡的投資組合。想問以下股票是否應全部放出？

0604(深圳控股）
0622(威華達控股）
0697(首程控股）
0759(CEC國際控股）
0887(英皇鐘錶）

0910(中國三迪）
1168(百仕達）
1339(中國人民保險）
1387(中國地利）

1466(錢唐控股）
8173(萬亞企業）
8178(中國訊息）
8311(圓美光電）

手上還有以下賺的股票，是否應繼續持有？

0354(中軟國際）
0700(騰訊）
1810(小米集團）IPO
2158(醫渡科技）IPO
6618(京東健康）IPO

睇左你facebook後，上月買入以下股票。

2382(舜宇光學）月供$2000
2800(盈富基金）月供$2000
6823(香港電訊）2000股

月入3萬，扣除開支後可儲蓄$5000，.流動資金$1,200,000. 應怎樣運用現有資金，來選擇適合的投資組合。

龔成老師︰

我地投資一隻股票，就如投資一間企業。如果你係無質素架股票，不論而一刻係賺定蝕，你都應該要沽出。

唔好諗住同佢鬥長命，因為無質素架股票，可以越跌越深，去到一個低賤的你估唔到的水平。所以要果斷，無質素就要沽出，將資金收回，用於有價值的股票身上，才是正確做法。

另外，你唔好再單係聽朋友講，或者聽消息就去買貨。

我地買入一隻股票，一定要知道佢質素、行業前景、財務狀況等，才去投資。如果你連間公司點賺錢、行內有乜優勢、點解未來有發展和增長潛力，都答唔倒自已，咁就要停一停，唔好投資住。

以你52歲計，現時月供的股票都無問題。至於，你現有持股方面。中國人民保險(1339)有質素，你可以長線持有。

深圳控股(0604)、首程控股(0697)都可持有，但質素較一般，不宜持有太多。

中國軟件國際(0354)、騰訊(0700)、小米(1810)、醫渡科技(2158)、京東健康(6618)係有質素的潛力股，由於佢地風險較高，以你年紀不宜持有太多，最多只可佔組合2成。

其餘股票，質素較弱，甚至係無投資價值，建議最好沽出，換至其他優質股較好。

未來時來，你可以用以下股票作目標，當中以平穏增長股為主力。但隨著年齡增加，慢慢增加收息股的比例。到退休時，你收息股比例，應提升至100%。

現時大市只係合理水平，現金佔比重大約3-5成。你可以睇翻自已現金和股票比重，決定是否再投入更多資金入市。若然係再入市，緊記係分注慢慢入，唔好一次入晒，以減低買貴貨機會。

------------------------------------------------

Q22062：

老師， 8367 倩碧是麻孫樂控股公司，上月見價位低殘，買一百萬股都是十一萬左右。 之後減磅兩次，仍有六十餘萬，繼續揸擔心一天瀉九成。 可以點處理？

龔成老師︰

倩碧控股(8367)集團於香港以「麻酸樂╱嫲孫樂」、「峇峇娘惹」及「泰巷」三個自營品牌經營。另外，有提供特許經營商經營，供中式麵食、泰國菜式，日本菜式及馬來西亞菜式。

此規模唔算大，營業額唔算多，而且有按年下跌的情況。過去企業多年虧損，2021年表面上係轉虧為盈。但實際上，只係公平值變動(一些會計數字，而非實際收入)會造成。

實際上，佢過去4年都係維持虧損狀況(包括2021年)。睇唔倒有乜明顯因素，支持佢近期大升。

遇到這些情況，我地就要好小心。而且企業本身無明顯投資價值，建議盡快沽出較好。

------------------------------------------------

Q22063：

龔成老師，你好呀！之前問過你有關投資股票嘅問題，因為等佢價格高啲先放，所以現在冇變動過。仍然係以下咁：

#1 2500股 $53.5
#2 1000股 $71.5
#941 1500股 $42.5
#291 10000股 $67
#3690 500股 $278
#909 8000股 $53.5

現在問題是我嘅租約差唔多滿，有現金和以上股票200萬左右。請問我應唔應該賣晒啲股票，用我190萬左右嘅錢去做down-payment 買樓，做6成按揭呢？

因為供樓同我現在租金一樣。我想買嘅係一個272呎嘅元朗開放式單位自己住，供樓連管理費會是$12000內。請問我嘅投資方向啱嗎？

因為份工剛剛做，要到出年才有稅單可以做8到9成按揭，又怕出年更貴，應該怎麼樣更好呢？ 麻煩老師解答，萬分感謝！

龔成老師︰

現時貸款息率唔高，其實盡借長線只會貶值的現金。之後，再將空出來的資金做投資增值，咁會較好。

至於明年樓價會點，無人知。但從長線投資角度考慮，你用低成數按揭，長線可以投資資金會縮細，在現時市況，對你係不利。

現時持有股票，都係有質素，長線持有就可以。

明源雲(0909)和美團(3690)不確定性較高，不宜持有太多。

另外，你非常集中係華潤啤酒（0291），佔組合近一半。記住，個別企業和行業，不要佔組合15%和30%以上，否則會有過度集中性風險。

因此，你要沽出停份，去平衡風險。

------------------------------------------------

Q22064：

龔SIR你好~~我係上年PM問你供股既建議，供左大概九個月，一開始你叫我拎5K月供真係好心痛，後來我減少開支再諗辦法做副業，真係比我做到月供5K!!!

見到有正數增長真係好開心(大概8%)!! 呢一年努力抗疫唔出街，總共儲左10零萬(拎左8萬左右投資)，自己做副業賺左萬零蚊,

雖然好少錢，拎去入左一手IBOND打算賺少少，錢搵錢呢個感覺真係好好。

加上好好運咁逆市升職，加左家用比父母，佢地又開心左～我覺得自己好適合做月供，個心好定，唔洗成日望住個市影響心情！可以用多D時間專注正副職/讀書。

本來手上有5萬左右現金，不過拎左去大學交學費， 再學埋電單車， 比我用晒了…而家無錢入市啦, 只可以月供， 不過D錢投資自己身上我覺得值得既!

未來打算加大個月供計劃！每個月總共可以儲1萬至1萬3～

而家調整緊個計劃，想問下你既意見～

1. 我應該繼續用5K月供,定加到6K?

2. 月供2800 價位約$27, 我可唔可以停左等到價位回落先再供?用筆錢供其他股票?

3. 如果已經有1810, 1211, 9988, 2158, 6618呢幾隻股票係手, 我應唔應該供3067?

9988而家月供緊, 其他暫時無供. 1810, 1211等價位低先再供. (暫時主力供823, 9988, 1177, 2638, 2800)

4. 最近考左電單車牌, 打算買車送外賣/送貨之類.（期望每月賺多$3-5K, 因為我係女仔, 第一比人話危險, 二黎比人笑我無出息, 但我唔理旁人既眼光, 我要賺錢呀!!!!)

a. 假設我手上有四萬現金:
i. 直接全數買車
ii. 兩萬蚊去分注月供股票, 留兩萬係手, 用信月卡分期12個月供車, 利息大約0.15-0.18% . 如果供股票想揀2638, 打算派息可以cover信用卡大部份既利息.

5. 思想上唔夠進取, 唔敢100%拎晒去買潛力股, 所以揀月供2638, 咁樣係咪好蝕底呀?

多謝老師花時間睇我既問題!!

龔成老師︰

現時你理財方向，都正確，要保持住。同時，你努力學習，去提升自己投資知識。

1) 如果每月係可以穏定儲到$12000，你就應將月供加大至$6000

2) 唔建議，首先，我地只會係去到好貴架水平，才會考慮減供款或停供。但現價計，盈富(2800)只在合理水平，不需要調整供款。

另外，你投資經驗不多，我唔建議你咁快自行決定調整供款策略。因為如果你調整時機不對，會大大影響長線平均價格效果，令長線回報受影響。

除非你對定平貴，係好有信心。否則一直不理價格，去長線月供，反而對你係最有利。

3) 港燈(2638)係收息股，增長力不高。你現時29歲，應以增值為主，故此股不適合你作為月供目標。

至於安碩恒生科技(3067)，你去月供係可以。只要你科技股(9988, 1810, 3067)，唔好佔超過組合3成。同時間，潛力股(1810, 1211, 9988, 2158, 6618, 3067, 1177)唔好高於組合4-5成，咁就可以。

小米(1810)現價略貴，但月供還是可以。而比亞迪(1211)現價係貴，月供最好等回到$17X才考慮。

4) 其實工作，都無性別之分。你唔洗太理別人眼光，做正確的事，永遠都是對的。

以利息率計，用分期買車，再去投資收息股，係會較理想。但你要明白，股票始終會有價格波動，有機會賺息蝕價，你要明這個風險。

另外，你都要了解清楚，這個是否真正總年息，會否有其他潛在費用，才去做決定。

5) 我地投資，除左年紀係考慮因素外，投資經驗和風險承受能力，都係一個考慮。所以，無話絕對的對與錯，重點係是否適合你。

以你年紀，港燈(2638)的確會係較保守。但要去到100%潛力股，你個組合風險，又會出現過高情況。

你可以用一半平穏增長股，一半潛力股作組合，這樣組合平衡性會較好。

平穏增長股︰盈富(2800)、金沙（1928）、恆基（0012）、平安(2318)、中銀（2388）、港鐵（0066）、長建(1038)、粵海(0270)、領展(0823)、希慎(0014)、太古地產(1972)

或潛力股︰比亞迪(1211)、中生(1177)、福壽園(1448)、小米(1810)、安碩恒生科技(3067)、港交所(0388)、阿里（9988）、騰訊（0700）、ＧＸ中國電車基金（2845）、三星FANG ETF（2814）。

------------------------------------------------

Q22065：

龔Sir，感謝你在股票班最後一堂的個人分享，聽到我眼濕濕。實在太有共鳴，亦自愧不如。

我嘅成長環境同老師你有啲似，都係成長於公屋家庭，居住環境擠逼，由於長期缺乏私人空間，非常渴望擁有自己居住的房屋單位，

但礙於香港樓價高企，個人經濟能力有限，一直處於半放棄（人生）狀態。

自愧不如的是比老師你行慢好多好多步。老師在十多歲嘅時候已經定下目標，立定決心，付出超乎常人嘅努力，28歲嘅時候賺到第一個100萬，反觀現時27歲嘅自己才剛剛起步。

不智嘅我都曾經怪責父母嘅不努力，甚至抱怨不想被生下來，傷害了彼此。

現在明白父母給予自己最寶貴的禮物是生命，財務知識可以自己學，錢應該自己搵，人生掌握在自己手中，將來由自己親手構建。

當人立志成為優質股、潛力股、倍升股，定必增長迅速，回報驚人。深願能夠運用所學，日後向老師你匯報成果。

龔成老師︰

你現在才27歲，現在努力去做好財富增值，未算遲。這是你最大的本錢，只是你這刻努力，一定能完成到目標！

其實，好多外在的客觀環境，唔到我地去改變。但我地可以改變自己，調整自己的心態。

你唔好覺得不如我，我都只係一個普通人，我做到的事，你都可以做得到，只要你相信自己。

上完課程後，你就當係一個新起點。努力去為自己人生定好計劃，比心機學好理財，相信很多你過往覺得的「不可能」，都會慢慢變成為看得見的「無限可能」。

同學，加油!

------------------------------------------------

Q22066：

老師，上年開始FOLLOW你的PAGE，亦很同意要買優質企業的看法。我亦已閱讀了你的4-5本書籍，亦閱讀了格雷厄姆、彼得林區、巴菲特的一些書籍。

透過購買優質股，我曾經浮收益超過6位數，我非常感謝！

然而，今年分析了968 後，認為該股是優質，故分注入了3手，分別是15、13及12，然而卻不斷下跌，收益不斷減少，令我反思是否應該斬倉...亦令我覺得不應該持續望住股票...希望將來可以好似老師甘可以令利財產增值。謝謝老師

老師，均價13.8入了3手968 信義光能，請問是否應止蝕？

老師，一直都想入完美醫療，但見佢業績持續向好，股價亦不斷上升。想問下老師，此隻股是否仍然5蚊左右才是合理區頂？

龔成老師：

其實，你保持用「價值投資法」就得，但要留意，這是長期性的，你中短期會有好多考驗。

信義光能（0968）是有質素的股，但你犯了幾個錯。

第一，你在貴的價位買入。

第二，你每次買入價相差太近，起碼要有10%以上，如果股價較波動的類別，要差15%。

第三，你應該等回去合理區先分注加注。

第四，你唔應該因為「股價下跌，就認為企業質素轉差」。

這股可以守的，但就要耐心點，如果你持貨不過多，無問題。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

業績前計佢$4是合理區頂，業績後股價升左好多，雖然我之前好大機會會調高佢合理價值，不過，現價都有少少貴。

所以，如果無貨，你可考慮回少少，先小注，然後等跌多d先正式分注投資。

------------------------------------------------

Q22067：

Coinbase我係咪應該放手？

龔成老師︰

Coinbase Global Inc（COIN）雖然有獨特性，但真正的長期價值有多少，根本好難估。

佢係加密經濟技術供應商，佢從平臺上的交易中產生大量交易費用的凈收入，以區域來講，佢大部分收入來自美國，其次是世界其他地區。

要分析佢的價值，就要睇翻虛擬貨幣長遠發展。以本質來說，虛擬貨幣是人為創造出來的，絕對不是「資產」，有沒有真正的價值，如何定義真正的價值，未知，亦令COIN的價值，變成未知數。

長遠的價值，取決於「有多少人用」，如果長遠好多人用，的確可能有高價值。但如果無人用虛擬貨幣，這公司都無價值。

因為分析長遠是否好多人用，是非常困難，因此，當中存有相當的風險，當然，潛力同樣都大。

若你只係好少注，同時又睇好虛擬貨幣長遠發展，你可以守。若佢佔你組合較多，最好沽出部份，去平衡風險。

------------------------------------------------

Q22068：

您好，龔sir.，我想問您對Pre IPO有了解嗎？

我朋友佢話私募基金的回報高過股票，她提及到她將20萬本金放在系一個私募基金的項目裡，三到四個月連埋本金已賺40萬，她問我有冇興趣？

因為我的投資都是放系股票，對於Pre IPO相關資訊真是不太了解，而且回報率禁高，會不會有很大風險呢？

因為我聽她講就好似好低風險，但我始終都不太相信。按常理，高回報就高風險，但她提及的IPO好似有點有悖常理，所以想請教一下您，謝謝！

龔成老師︰

Pre IPO就係指企業在上市前(即IPO前)，進行的集資。

由於正式上市申請，係需要一段時間，有些企業就會用這個方法，去提前得到一些資金，用作上市前支援營運之用。

而Pre IPO基金多數會在上市時，就沽出這些股票獲利。由於上市前，一般估值較低，故潛在升幅會較大。一般這類股票基金，投資時間都唔長，可能講緊只係1,2年時間。

但你有留意我FB，我經常都會話，唔太建議投資IPO。因為可以參考數據好少，好難進行一個合理估值。而且好多時，企業真正表現，要1,2年先會睇得到，故投資風險會較大。

Pre IPO是未正式發表上市的企業，其可參考資訊，就更加少。甚至連佢最終能否上市，都會係一個問號。

我唔係話這類基金，全無投資價值。但你要明白當中潛在風險唔細，是否值得投資，你要自己衡量。

當然，我不是話這類項目不值得投資，只是「有風險，有回報」的類別，你要明白這點。

就算你最終決定投資，你都要控制注碼。永遠我地都要係「先知風險，後想回報」。

------------------------------------------------

Q22069：

老師你好！我跟咗你嘅投資方法三年，而家手上有超過一半係潛力股。我有限住自己每個月至少要供幾多錢，但有時手上嘅股票價格又偏貴唔想再入住，久而久之就越買越多隻股票，而家已經有14隻。

除咗股票數量太多之外，有時咁啱果個月得某一隻股票係合理價我就會買晒佢，好似而家9988已經佔我嘅投資18%。

我知道老師講過單一股票唔好超過15%，但而家佢係喺我手上已有嘅股票中價格最合理嘅。我唔想再增加股票嘅數量，但又無理由買其他貴貨。

龔成老師：

如果你出現愈買愈多的情況，反映你買入前，無經過仔細思考、研究，小心作決定，我在股票班，會派一份6頁紙的「企業評估表」

要求學員，每次買股票之前，都要填好先買，目的是希望令佢地，確保買入的都是有質素的股，以及睇得好準先會買。

阿里（9988）這刻，你只有不要再增持，到之後你有資金，慢慢配置到其他股票，阿里的%自然會減少。這動作不用急，長遠進行就得。

------------------------------------------------

Q22070：

老師你好，我兩三個月前開始見到你FB, 見到你教投資，有看你回答大家嘅問題，睇咗你嘅80後百萬富翁，而家睇緊股票勝經，

我47歲，有幫爸爸和女兒投資，持有以下股票。另外1063唔識點處理，結果而家價值得返$300幾，而家見到6808又跌到$5個幾，應該繼續長遠持有還是換出？

請你指導吓，謝謝老師！

本人持人
1. 9988 阿里爸爸 200股 $245.80
2. 9618 京東 500股 $397.40
3. 3690 美團 400股 $389.80
4. 0909 明源雲 2000股 $54 + 1000股 $45.80
5. 2013 微盟 4000股 $26.05

6. 2318 中國平安 2000股 $97.15 + 500股 $89.10
7. 1211 比亞廸股份 500股 $150.80 + 500股 $147.30
8. 6808 高鑫零售 3000股 $10.20
9. 3738 阜博集團 1000股 $32
10. 1398 工商 19000股 $5.73
11. 1063 新確科技 60000股 $1.38

爸爸80歲
1. 2888 渣打 300股 $105 + 300股 $77.80
2. 0003 中華煤氣 2000股 $14.88 + 100股 送嘅
3. 2318 中國平安 1000股 $95.70 + 500股 $91.30

用女兒利是錢幫佢投資
1. 2800 盈富 500股 $25.88
2. 3067 安碩恒生科技 200股 $17.83

龔成老師︰

我地投資增值會運用「先增值，後現金流」作方法，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

由於你地3個人的人生階段不同，所以投資方法和目標，都會有分別。

先講你女兒，佢年輕，可以增長為主。你現時這個組合，已經係可以。

若你想增長力較高，可以多儲安碩恒生科技(3067)。但此股波動性會較大，要睇翻你自已風險承受能力。

至於你父親，由於已經係退休人士，重點唔會再係增值部份，應以收息股為主。透過股息的現金流，去支援佢退休生活上支出。

渣打集團（2888）質素只是一般，建議換碼。而煤氣(0003)和平安(2318)都有質素，可持有。

未來若你加大你父親投資，應集中收息股。以下都係有質素的收息股，你可以從中參考一下。

目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

至於你本人組合，以你47歲計，增長係需要，但要慢慢轉得保守點。

高鑫零售(6808)質素較中等，不宜持有太多。

新確科技(1063)主要於香港從事電話及相關產品之設計及銷售等業務。

這股規模細，加上多年出現虧損，暫時睇唔倒有投資價值，建議你沽出。

中國平安(2318)、工行(1398)有質素，可持有。

較大問題，係潛力股類股票(9988, 9618, 3690, 0909, 2013, 1211, 3738)你持有太多。以你年紀，最多只可以佔4成，而且要慢慢開始下調至2成。

現有持股，可以唔洗沽。但將來，你投資上應較集中平穏增長股部份，令組合風險水平，慢慢回復平衡。

現時大市只在合理區，資金唔好盡用。最好留有部份，等大跌市出現時，可以用來掃貨。

------------------------------------------------

Q22071：

老師最近睇緊千萬富翁， 內容話到如果依家工作發展前景有限 就要轉工轉職位 尋求突破。

關於哩點 我想問下 如果我覺得我依家工作唔會有好大突破

但係我本身工作經驗唔多同時又岩岩得到哩份工冇耐， 咁嘅情況下要繼續留待 或者 搵機會轉工會好d？

龔成老師：

你要以5年、10年，作為思考的單位，現時的工作，對你長遠有無用？

如果無用，就要轉，轉是大方向，但是否這刻轉，或一年後轉，就要睇你自己的情況。

如果你本身工作經驗唔多，就可以先在現時工作，做1年先，等你有工作經驗先轉。又或者，你繼續翻現時工作，同時，尋找自己想發展的工作，如果找到，就辭工。

總之，你要思考你的大方向。然後就要想想，現時選擇那些工，最有機會完成到你的大方向。

------------------------------------------------

Q22072：

你好，我見恆安國際1044 數據都不差，現價入是否值得長線渣？

Pe 純利 股東資金回報都好
唯早前亦回購了數次

龔成老師：

對，恆安國際（1044）的財務數據不差的，不過，企業的發展與增長力就不強，佢主要業務為在中國生產，分銷及銷售個人衛生用品，零食產品及護膚產品。

恆安擁有多個品牌，如「心相印」、「安而康」、「品諾」、「安爾樂」等，而業務大致可分為紙巾產品、衛生巾產品、一次性紙尿褲產品、零食產品。

恆安具有品牌，又處於增長中的市場，前景不俗，故此企業為不錯的優質股。不過，市場競可能令毛利略為受壓，但相信隨著此企業發展更多較高毛利產品，影響不算大。

長遠來說，恆安仍有一定的前景，故有投資價值的。成本上升，令佢略有風險。整體而言，有長線投資價值，現時大約在合理區中間。

------------------------------------------------

Q22073：

龔成老師，請問5M可以買什麼樓來放租？可以考慮那些區域？6年後退休，現在應否做按揭？謝謝！

龔成老師︰

其實無話特定乜野樓會較好，藍籌屋苑會加分，尺寸最好近300呎，符合一個家庭基本需要。

你要睇翻該物業的質素，呎價，預期租金回報率，特別是利用「呎價，預期租金回報率」去比較同區同類單位，以確定該物業的平貴水平。

另外，你再要審視其升值潛力，未來地區上、交通上、生活等等的配套發展，才去下一個結論，咁會較好。

現時息口低，承做按揭，再用多出資金去投資，相信會較好。

但由於你已近退休之年，按揭未必批倒好長年期，故壓力測試上，可能要求會因此而高左。在選擇物業時，你要考慮埋這因素，具體你要問清楚地產經網、銀行，了解清楚先。

------------------------------------------------

Q22074：

老師你好，我黎緊有計劃生完2胎就辭職，因為無人湊BB。你會建議我現階段應該點樣投資？

(先生份糧 + 被動收入可以支撐大部分家庭開支) 我之前買既增長股依家都係負數居多，現階段我應該考慮買返d內銀/ 公用股 收息嗎？

或係我應該買3067/2845 呢類etf嗎？ (手上大約有10萬可投資)

龔成老師︰

我地投資，係應先處理好防守部份(日常生活)，才去進攻(財富增值)。

由於你會做全職媽咪，家庭收入會少了一部份，故首要任務，是要先做到收支平穏。因此，現時支援緊你日常基本開支的收息股，我建議你就唔好變動。

若收支平衡上，依然有一定缺口，你可以將部份平穏增長股，轉移至收息股，去增加家庭現金流。

若已經大致收支平衡到的話，你那些平穏增長股，照持有就可以，讓其繼續為你財富增值。除非佢質素係有問題，否則唔好太在意中短期波動，一直長線持有就可以。

至於3067/2845這類較有增長力的潛力股，到你家庭收支平衡之餘，每月都可以空出一定資金，才作考慮。

至於你手上10萬，我建議你留在身邊，作為應急錢，會較為理想。

------------------------------------------------

Q22075：

你好老師，萬分感謝你的回覆和提供詳細的資訊及分析！

不好意思，這麼遲回覆你，因技術性問題今日先開通富途牛牛戶口。

交代小小我的個人資料，我現43歲，自住物業沒有按揭(已供完)，有物業放租(但租金全數比按揭，按揭還有8年)，現60萬現金，

另20萬要6年後先可取出(兒子出世時買的小狀元儲蓄保險)，現每月可儲HKD13000，現計劃分階段投入20萬作投資股票。

如我選擇五隻平穩增長股作為我開始、首次投資股票，我會以"分注"形式，以下每隻股票先買一手，然後留意價位再每手每手入?

1）盈富(2800)
2）金沙(1928)
3）中銀(2388)
4）港鐵(0066)
5）粵海(0270)

這樣可行嗎？以上這5隻股長揸的話最少多少年較好？這5隻股現在入貨是合理區嗎？

另想問中國鐵塔00788你點睇？

謝謝老師！麻煩晒你！感謝

龔成老師︰

你現時已持有2個物業，成個組合係物業類比重好高。未來時間，應集中投入股市，令組合更平衡。

以你年紀，都有一定增值需要，你現時這個組合係可以。如果你想再進取少少，可以加入少少潛力股。

潛力股︰安碩恒生科技(3067)、比亞迪(1211)、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園(1448)、ＧＸ中國電車基金（2845）、三星FANG ETF（2814）。

但你要留意翻，部份潛力股已有輕微過熱情況。只有安碩恒生科技(3067)、ＧＸ中國電車基金（2845）、 騰訊（0700）、阿里（9988）、中生製藥（1177）、福壽園(1448)勉強算在合理區頂部，可分注入貨，其餘要等等。

至於你目標的5隻平穏增長股，都在合理區，現價可以先入一注。每再回10-15%，就再加注，直至資金用完。

另外，每月儲起的$13000，都可以做月供股票。每月先用一半儲蓄做月供，另一半就儲起，等大跌市機會。

中國鐵塔（0788）不是無質素的。始終中國的3大電訊巨頭，都是佢的主要客戶，以及大股東，當5G發展，佢一定會受惠，因此前景仍然正面。

佢現時的收入都增長，盈利都保持向上，但增長比之前略減，加上股本回報率不高，是這股較弱的地方。若分析佢市盈率，會見到現時仍然處較高水平，反映佢雖然股價回落左唔少，但仍然未到平。

這股算是合理價。長遠仍算有發展力，可長線。不過，潛力度比過往略減。

這股都適合你年紀，現價可以分注入貨。

------------------------------------------------

Q22076：

你好，老師，有個方法想問你可唔可行，小弟有一層自住樓，已供完，銀行估值600萬，現想加按360萬，分10年還，連本金利息400萬

我計劃：

買1隻穩陣收息股100萬(做膽)，買10隻穩陣不同行業優質股做腳20萬x10隻，淨番60萬一半定下期一半慢慢還款，用曬之後將1隻腳賣走，用來還款，用曬再賣，用曬再賣咁

(當然首選揀隻賺的腳賣啦)10年後，淨反個膽100萬

這方法可行嗎？可以叫做無本生利嗎？

10年叫做無本賺100萬

謝謝老師解答

龔成老師︰

現時息率低，透過借貨去投資，從而賺取息差，係可以。

但有兩大風險，你一定要明白。

第一，借貸創造，表面上無本生利，但實質有風險的，你負債增加，風險會增加。

另外，如果你投資的股票不幸股價下跌，你就會出現「賺息蝕價」，對你不利。

同時間，如果日後加息，又或你收息股的派息減少，都會令你得到的息差回報收窄，你的回報會減少。

所有借貸投資，都不是無本生利，而是背後承受了一定的風險，我不是叫你不能做，而是做進行前，一定要明白當中風險，不要視為穩賺項目。

第二個風險，就是你個配置，有問題。

首先，任何股票、任何行業，我們都不應太過集中，因為一個行業就算更有優勢，也有機會面對行業週期及突發風險，太集中會對你整個財富組合不利。

因此，你要建立一個平衡的投資組合，當中有不同的類別、不同的行業，這是最好的平衡風險方法。相同行業不可佔組合多於30%，而單一企業不要高過15%。

你膽拖這種模式，個膽一定會超過這個標準，令你出現過度集中性風險。

另外，定期本身回報不高，很大機會回報低於你本身借貨利息。變相，你已有一部份貸款，係無效率地運用，拖低了整個組合回報。

若你想用個定期，去平衡個組合風險。我建議你直接不借定期個部份資金，反而仲有利。

餘下資金，我建議你投資一些「平穩增值股」+「收息股」。

平穩增值股，例如盈富（2800）、金沙（1928）、長建（1038）、中銀（2388）、港鐵（0066）、恆基（0012）、平安(2318)、粵海(0270)、領展(0823)。

同時，可以建立一個收息股的組合，目標是5%、6%的股息率的收息股，例如港燈（2638）、深高速（0548）、香港電訊（6823）、工行（1398）、恆生（0011）、置富（0778）、陽光（0435）。收息基金(3110)，都可以。

另外，有些更有超過8%的高息股，但股價就略有風險，你可以小注考慮，例如佐丹奴國際（0709）、中石化（0386）、互太紡織（1382）等（記住，股價略波動，不能太過大注）。

若你想組合增長力高一些，可以較集中「平穩增值股」。相反你想平穏少少，可以集中係「收息股」。

但成個計劃，你要明白一點。你係投資緊股票，就算最穏陣架收息股，都會有波動，有機會出現賺息蝕價情況，故你計劃係唔會100%穏賺。

而且，現時大市只在合理區，唔算係好平，這個風險就會更高。

現時大市只是合理區，你借款得來資金，可以先投入一半，用"分注"形式，慢慢買貨。餘下一半就等大市出現一定程度的下跌，才大力度掃貨，然後長線投資。

投資增值，其實唔洗諗到好複雜。只要你用我上述計劃，並長線持有這些優質股，其實已經很大機會，得到一個唔錯回報。

------------------------------------------------

Q22077：

你好 老師，又想麻煩你提點下我。

手頭只有各一手而已

-小米
-3067
-6618

我有10萬

1/ 應該繼續集中月供現有嘅小米，3067 ？

2/6618應該keep定放？其實擺起度都無所謂作長線？

3/ 依家手頭嘅好偏埋一邊 或應入手其他類別 （福壽園/金沙/銀娛/中電/地鐵/領展/比亞迪電子/700）

4/ 新能源股 可以建議邊啲我去study多啲？

再次感謝

龔成老師︰

1) 你現時3X歲，雖然投資上可以進取少少，但都不建議全部買晒潛力股。

佢地雖然有增長潛力，同時風險都較高，不宜持有過多。

以你年紀，潛力股可佔約5成，餘下應用以下平穏增長股。若你投資經驗較淺，潛力股比重，要再調至3成以下。到你學到一定投資知識，才慢慢調高。

未來時間，你就要加大翻平穏增長股部份，令組合更平衡。以下平穏增長股，現價都在合理水平，可以分注入貨。

平穏增長股：盈富(2800)、金沙（1928）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）、長建(1038)

月供你可以小注潛力股，較大注係平穏增長股，就可以做到平衡效果。

2) 京東健康（6618）有質素，這股可長線。

其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大。但由於你只係小注，照持有就可以，但暫時唔好加注了。

3) 係偏向左潛力股，故應加大平穏增長股，去平衡翻個組合。

4) 信義光學(0968)和福萊特玻璃（6865）你可以研究下，但現價都在略貴水平，回多1成左右，值博率會較高。

------------------------------------------------

Q22078：

老師你好，我係投資新手，20歲。我看好未來奢侈品會有更大的市場，所以想投資相關股票，但香港相關股份較少。

我留意到美國有一隻LV ADR股票，LV集團覆蓋性廣，有品牌價值，全球通關後預期業績也會有增長，股價也每年穩步上升中，想問可以以分注買入的方法每月購入嗎？

除奢侈品股，我也看好未來醫美板塊，科技板塊和新能源板塊的發展，想問大方向正確嗎？我應該如何開始部署這些板塊的資產呢？有什麼股份老師比較推介？

謝謝，希望老師能抽空解答

龔成老師︰

LVMH Moet Hennessy Louis Vuitton SE(LVMUY)是一家法國的奢侈品集團，業務涉及六個領域：葡萄酒及烈酒、時裝及皮具、香水及化妝品、鐘錶及珠寶、精品零售及其他業務。

企業有一定品牌，都有投資價值。但畢竟業務以消費類奢侈品為主，較受經濟大環境，盈利會較波動。

這股票都有投資價值，但現價唔平，最多只宜好小注。利用月供儲貨，會較好。

至於你所講的板塊(醫藥業會係重點，醫美都有市場，但無醫藥類咁高潛力)，都係有潛力，同時會係未來大方向之一。

以下都是一些我較睇好的相關行業潛力股，你可以參考下。

潛力股︰安碩恒生科技(3067)、信義光能(0968)、阿里（9988）、騰訊（0700）、舜宇光學（2382）、小米（1810）、中生製藥（1177）、ＧＸ中國電車基金（2845）、三星FANG ETF（2814）。

你現時無投資知識和經驗，對企業估值，點去定平貴未必會太了解。所以你先利用月供模式，去做增值，可以減低買貴貨風險，對你而言會較理想。

你每月大約用一半儲蓄月供，另一半就儲起，等大跌市機會。

另外，潛力股雖然有增長潛力，同時風險都較高，不宜持有過多。

以你20歲年紀，潛力股可佔約5成，餘下應用以下平穏增長股。但由於你投資經驗較淺，潛力股比重，先用3成以下這個指標。到你學到一定投資知識，才慢慢調高。

餘下投資比重，你就配置在平穏增長股上，會令你組合更平衡。

------------------------------------------------

Q22079：

你好啊，龔成老師，我今年27歲，月入兩萬，每個月儲$5000，無月供股票。現時手頭上持有呢三隻股票：

1）中國移動0941 $47.9：1000
2）龍光集團3380 $11.7：2000
3）香港寬頻1310 $9.3：1000

因為我以前係短炒輸過錢，所以我現在就吾想再走回頭路。就想試下建個收息倉，慢慢打造被動收入。

但我見龔成老師通常都叫學員「先增值、後收息」咁我現在呢個想法是否太慢或者吾適合現在的我？求老師賜教

龔成老師︰

短炒係一個不正確投資方法，就算全球投資最賺錢的巴菲特，都唔會做短炒。

其實投資股票，就係等同投資一間企業，只要係有質素，你長線持有比時間佢自行增值，咁已經會有唔錯的回報。

我經常都會叫讀者和股票班同學，用「先增值，後現金流」作方法，去做投資增值。

意思係，初期投資較有潛力的股票，令財富較快增值，當增值到一定金額後，可開始將財富分配至平穩增值型股票，然後到已累積了相當財富後，才漸漸轉成收息型股票，為自已創造穏定現金流。

你27歲，就應以增值為主。中國移動(0941)和香港寬頻(1310)係收息股，增長力欠奉，不適合你。但由於持股不多，你可保留，但不要再加注。

龍光集團(3380)適合你，都有增長力，但負債佢比較多，風險會略高。現貨可持有，但暫時不要加注。

你現時這個組合，增長力太低。未來時間，我建議你用「平穏增長股」 + 「潛力股」作組合，去創造一個增值平台。

現在你每月先用5成儲蓄，即$2500做月供。其餘先儲起，用一邊月供一邊儲蓄的策略。

月供方面，你可以選擇投資在平穏增長股或潛力股。

至於餘下的現金，就等機會，當大市出現一定程度的下跌，就可以動用現金去投資，在平宜價加大力度掃貨，然後長線投資。

另外，你現在還很年青，應盡力去做去財富累積部份。我建議你每月最好可以空出一半薪金，去做月供，咁會較理想。

------------------------------------------------

Q22080：

龔成老師您好，本人之前高位買了中國財險（2328), 一路坐艇, 暫時賬面蝕了幾萬蚊。請問你覺得這股票前景如何，應繼續持還是換另一只股票。

本人心水完美醫療(1830)。求指導

龔成老師︰

中國財險（2328）主要於國內為各界客戶提供多種財險產品，包括機動車輛保險、企業財產保險和家庭財產保險。

過往的生意與盈利都不差，不過就無乜增長動力，質素算是中等。這股都可長線，不過就重收息，唔好對股價有太大期望。

若佢只係佔你組合不多，你可以持有。但若較多，你可以沽少少，去平衡翻個風險。

完美醫療（1830）長遠有發展，本身有一定的質素。

睇翻之前的疫情，佢身處的行業受影響，但佢的現金流及財務數據都唔算差，這點可以想象到，當正常的經營環境，佢的生意一定唔錯。

加上佢的野心愈來愈大，本身有一定的技術，同時不斷將香港的業務模式複製到其他海外地區，我見佢加強了發展其他地方，因此發展不差。

這股有長線投資價值。

之前公佈業績理想，但業績後股價升左好多，雖然我在業績後調高左佢企業估值，加上管理層加大了企業發展的力度，前景正面，但現價點都都有少少貴。

所以，如果無貨，可考慮回少少，先小注，然後等跌多d先正式分注投資。如果本身有貨，就長線持有，但這刻就不要心急加注。

----------------------------------------------

若你有問題想向本人發問，可在龔成的fb專頁中（www.facebook.com/80shing）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。

【龔成問答信箱】（Q20221-Q20240）

Q20221：

成哥，想請教你關於股票的買賣時機和持有股票的時間,及我的遠景

1.我不做短炒，但又覺得長線投資有點遙遠，我想改變策略做中線投資，不知道成哥對中線投資而獲利有什麼看法？

2.我自己中線投資買入時機的策略：（i）據我翻查過往股災的紀錄:
(a)1994~1995年 總跌幅為45.3%
(b)1997~1998年 總跌幅為61.1%
(c)2000～2005年 總跌幅為54.7%
(d)2007~2008年 總跌幅為66.6%
(e)2010~2011年 總跌幅為35.3%
(f)2015~2016年 總跌幅為36.1%
(g)2018~2018年 總跌幅為26.7%
（h)2019~2020年 總跌幅為30.2%

以上數據2018年為小型股災總跌幅為26.7％。我想在股災時分注買入，而不做月供。若我計算恆指從頂位回落25％成為我分注的第一注，其後恆指回落10％我再入第二注，如此疊加。反之，若恆指跌20多％後幾個月不跌反升進入牛市一期，我便一口氣買入，以上的做法如何？

3.我中線投資賣出時機的策略:
(i)投有股票時間:
我持有股票時間短至1年，長至3年，3年內必定清倉，一股不留。

(ii)賣出股票時間:

(a)當從股災見底一刻計算持有股票至1年然後沽出30％的股票。這樣做是想取回本金兼些微利潤。

(b)在1年至2年間內觀察市場氣氛，然後沽清50％股票。這樣做是考慮市場進入牛市二期，快三期的情況而考慮的。

(c)現時只剩20％股票，假設遇上股災就由佢坐艇，如冇既，3年內清倉。以上做法又何?

4.其實股災每2～3年就來1次，按照我上方策略，賣出後再買入唔係更賺嗎？成哥你話賣出後味必有機會買入，其實意思是買入便宜價吧？假設買唔到便宜價，合理區也可以吧。

成哥你也在書中寫出比亞迪的天堂與地獄，由88蚊回落至12蚊，其實冇賣出味賺唔到？

假設88蚊賣出，佢唔落番12蚊，佢落番30幾蚊對當時來說也是合理價吧？在股災前賣出其後再買入不是更好嗎？

當然，冇人知股災幾時來臨，但猜得較接近總是可以吧。賣出後再買入頂多利潤賺少左，但又唔駛承受股災帶來的風險，為何不做呢？我不是挑你機，我當然沒有資格，只是帶出我想法。

成哥繼續努力，永遠支持成哥您！

龔成老師：

1）我之前做過銀行同證券行，見長線客始終賺錢較多，短炒客較難賺錢。

另外，如果你分析全球真正賺錢的投資者、經金經理，佢地都唔短炒，都是長線投資的，巴菲特都反對短炒。

因此，你應該全力長線。如果想中線，真的小部分好了。

2+3）你這樣的推論，會出現了一個盲點，就是表面過去式的推論。

例如你去賭場，見到連續10局，都會大小大小這樣運作，你就將10局套用永遠。你會說服自己，這套模式能運用到過往所有時間（但其實是你由當中的所有時間去抽出數據，當然能應用到），但到第11局，是這些數據以外的，能否應會，無人知。

其實你這類想法，我在20年前已做了唔少研究。技術分析的原理，就是統計學，我數學科是「A」的，我20年前花了大量時間研究，結果，用了幾年，輸足幾年！

你回歸翻「企業價值」面，平貴，是最好的方法。你睇下全球邊個投資者最賺錢？佢點解唔用這些方法？點解？？？

4）我地可以計平貴，有時在貴的時候賣出，等跌的確有賺，但最大的問題是，好多野好難預測。

當時比亞迪（1211）$88是貴，賣出，等跌買入，的確有賺，如果佢企業價值增加，佢股價的確不會支持到$88。

但如果好似近年，佢的業務開始增長，全球都開始用電動車，佢上到$100最初是貴的，但由於企業價值有增長，慢慢又變成合理，如果用你的方法，就會在$100賣出了。

你試想想，如果用你的方法，在過往，港交所（0388）、騰訊（0700）在這麼多年，股價上升100倍時，你的方法能賺到多少？可能連一倍都賺唔到。你怎樣能賺到100倍，就是「唔好賣」。

------------------------------------------------

Q20222：

老師，我唔係好理解到點解美債上升，對納斯達克指數同科技股會有咁大嘅影響？

龔成老師：

關鍵是企業估值，當我地進行估值時，會以無風險利率作為其中一個估值因素，當無風險利率上升時，企業價值會受影響。由於科網股的現金流集中在較後段的年期，所以當估值運用折現率時，對佢地的價值影響，會比傳統企業更大。

當然，要正式計企業的價值，過程比較複雜，好難三言兩語就講到，就算在我的股票班，都要講5小時，裡面會講3種估值方法，有難有易，但同學都用到的。

簡單來說，你要考慮企業的生意、盈利、現金流、資產、負債等財務數據，同時要比較行業，考慮這企業的經營情況，之後的環境又會如何。這都是計算的基礎。

例如，我地會考慮佢有多少生意，有多少盈利、現金流，有多少資產，從而計算該業務值多少錢，同時會推算將來的盈利情況，去推算這企業長遠的價值。

如果要深入計算，基本上要好仔細的研究企業，要分析好多財務數據用比率，先至有較完整的答案。

------------------------------------------------

Q20223：

想分享因為平時返工冇時間睇市
5 年前蝕左5 萬之後一直冇再玩股票

10 月開始因為在家工作又玩返
最初好易賺錢
買穩陣野都賺到一萬幾千
但最近，日日睇住個市

覺得身心健康都變得好差
花好多時間睇人分析
但賺得唔多
甚至而家一手坐艇股....

我32 歲月入60000
供樓10000
有積蓄約70 萬現金 30 萬股票

但真係唔敢大部分錢都放在股票....
我決定下月開始月供
823 2800 每樣2500 替代日日甘捕市了....

請問老師仲有冇邊隻建議供？

同埋有冇邊啲潛力股？
我睇你2019-20 的50 隻潛力股
好多都倍升 甚至幾倍升了 ....
現價是否太遲？

謝謝老師你

龔成老師：

其實日日睇住個市，未必賺錢的，我過往做過10年銀行與證券行，我見到好多短炒客都是輸，長線投資者就贏。

所以，你現時長期月供，是正確的做法，原理是儲優質股，成為你財富的一部分。這樣壓力較少，財富長期增長乜較多。

其實你這個年齡，是財富增值的黃金時期，要好好把握，盡你一切的力量去儲蓄、投資、學投資知識。

你可以投資「平穩增值股」+「潛力股」，不過，由於潛力股要求你有一定的投資知識，因此這刻不用急著投資，你可以集中在平穩增值股先，潛力股小注好了。做月供股票。

你可以考慮盈富（2800）。

另外再加：銀娛（0027）、恆基（0012）、港鐵（0066）、平安（2318）、粵海（0270）、領展（0823）、希慎（0014）、太古地產（1972）等，你可以了解下這些股票，然後從中選股。

潛力股，則可考慮：安碩恆生科技ETF（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177），但就要明白波動性比上述會高左，同時風險大左，你要自己平衡。部分要等回少少先入。總之買入的比例宜比平穩增長股為少。

現時大市處合理區，可以一邊投資一邊留現金，而餘下現金的運用，就是等大跌市時出手，如果你能在這段時間學好選股等技巧，到大跌市時就能把握機會，財富增值會更明顯。

------------------------------------------------

Q20224：

你好老師，本人26歲，月入15萬，已有現金340萬，是投資新手，剛買左00941 -5000股和9633 -2000股 和00175 -1000股，想在一年內多200萬，

可以如何分配？
謝謝你

龔成老師︰

我地一般目標，係年均回報10-15%，要1年內提升多200萬，用股票就未必適合。但長線計，我都建議你用部份資金去投資優質股，為自已增值。

當我地進行人生財富累積時，會運用「先增值，後現金流」方法。年輕人應著重於增值類資產，而較年長的，就應著重保守類別。因年輕人財富系統未成形，同時負擔較少，可以承受較高風險，所以應以增長為先。

例如初期投資較有潛力股票，令財富增值較快，到一定金額後，可轉較平穩增值的股票。最後有相當財富時，才換成收息股去為自已創造穏定現金流。

你現時的年齡，是財富增值的黃金時期。策略上，你可以投資"平穏增長股" 和 "潛力股"。中國移動（0941）係收息股，無乜增長力，不宜持有太多。你先用每月5成儲蓄做月供，其餘先儲起，用一邊月供一邊儲蓄的策略。

選股上，你可以投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、粵海（0270）、領展（0823）。

增長力較強的，可選安碩恒生科技（3067）、阿里（9988）、騰訊（0700）、港交所（0388）、舜宇光學（2382）、小米（1810）、中生製藥（1177）、福壽園（1448）。但佢地波動性和風險會較高，你要自己平衡。

現時大市只是合理區，你現有340萬資金可以先投入一半，用"分注"形式，慢慢買貨。餘下一半和每月所儲倒的資金，就等大市出現一定程度的下跌，才大力度掃貨，然後長線投資。

------------------------------------------------

Q20225：

龔sir你好，我是新手學投資，上星期31.450購入1手中芯國際，尋日收市突然跌到去26

本人睇好中國芯片都會有長遠既發展，我係咪應該止蝕離場？

另外有購入小米和京東健康，依兩股都睇好，都係諗住長擺，新手黎講我係咪唔識分配投資，thx

龔成老師︰

首先，我地投資會因應年紀，去選股。若你係較年輕，上述股票都可以。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

雖然近期以由高位$4X，回調到$2X，現時市盈率已經去到8X倍，依然係貴架水平。此股質素和吸引力一般，如果佢佔你組合比重唔高，可以守。

而京東健康（6618），業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但要做估值好困難，佢未有盈利之餘，不確定性都大，但市值欲去到5000億以上。

只能說，而價計依然唔平。若你只是小注，就無問題。若太大注，最好沽出部份去平衡風險。

小米（1810）長線持有，係可以。

------------------------------------------------

Q20226：

你好阿sir, 我手上有00066，02800，00823，09633，01833，01810，09988， 之前一手手買，各一至兩手貨。現考慮月供方法投資，每月用3k

1）比亞迪潛力空間係咪大過騰信，邊個好D？2）想買一手02382 or 03067, 邊個潛力大D？謝謝解答先。

女，37歲thank you

龔成老師︰

1） 其實2隻都係好有優質和發展潛力，但比亞迪（1211）會較高。

比亞迪（1211）現價偏貴，回到$120才較合理。而騰訊（0700），則要回多1、2成左右，才算合理水平。

2） 舜宇光學科技（2382）如果你睇好手機鏡頭發展，可以投資此股。但現價偏略貴。

而安碩恒生科技（3067）係一籃子科技股組合，較具分散風險能力。現價在合理區頂部至略貴，可小注入貨。月供，慢慢分注入。

月供組合方面，平安好醫生（1833）係潛力股，但就屬於較高風險的類別，我自己會比較怕投資這類。

業務上，佢地的確是高增長，同時業務有發展潛力，但睇翻佢地的財務數據，此股好難估值，你投資都可以，但小注好了。小注月供都可。

------------------------------------------------

Q20227：

龔sir, 你好～小妹一直係你fans，家中已集了多本你出版的書，如50值博倍升股、五年買樓四步曲....當中五年買樓四步曲，睇了一次又一次。

最近遇到一個難題，前年買了沙田第一城放租，現在差不多三年，第一城依三年可以説是易放租，租金可以頂到按揭每月供款

但最近考慮到第一城樓齡真係太高

如果持有多十年廿年，其升值及租務能力未必大，所以考慮轉投資啟德新盤，但那裏租金回報又不大，請問此刻是否應該樓換樓？

另外，想問下龔sir, 我的投資組合是否正確？本人35歲，收入穩定，現持有$70萬現金，$30萬股票：

港鐵 $41.5兩手
騰訊 $519 一手
領展$63.5 兩手
中移動 $47 一手
長江基建 $38.5 一手
長實集團 $47.4 一手
中國平安 $82.9 一手
盈富基金 $24 兩手
阿里巴巴 $205 兩手

麻煩龔sir提供意見，謝謝！Jennisa Chou

龔成老師︰

在整個新界區，沙田物業質素算較高。雖然佢有一定年期，但這類大型屋苑保值能力較強。而且位置較近市區和東九，該區新供應又唔算多，都係利好因素。

而啟德位於東九，都有一定潛力。但新盤一般定價都會較貴，投資價值會低左。暫時你可以保留沙田物業，啟德就等佢價格有回調，才再作考慮。

你現時持股都有質素，而且都有一定增長力，適合你。除了中移動（0941），佢主要係收息，增長力較一般，唔建議加注。

另外，長和系股票都有質素，但增長力不算強，你原有貨持有就得，但就不用加注。

現時大市在合理區，股票和現金最好各一半。你可以再投資多少少資金，加大股票比例，咁會較好。

------------------------------------------------

Q20228：

龔老師，你好我今年31歲，剛開始投資，之前間唔中都有買下股票，但唔多

現在手上有10手匯豐，而每個月大約可以有8000蚊既儲蓄

想短期目標3年100萬

我見老師你大多數介紹人先月供2800作開始，我是否應將10手匯豐轉來投資其他？

如果轉出來，我可以會選擇分散投資或是集中一兩隻股就好？如果1772/9922

果啲值唔值得長線投資？然後再每月月供5000盈富/領展？謝謝龔老師解答

想補充，現在31歲先都想投資，會唔會太遲？目標係想37歲之前買400萬以下既樓宇

現在其實手上也有20萬現金可作投資，謝謝！

龔成老師︰

31歲開始投資，都唔算太遲，依然有一定時間去做增值。

以你情況，可以利用"平穏增長股" + "潛力股"作增值組合。匯控（0005）係收息股，增長力唔高，只宜持有小注。你應將大部部份，換至以下股票，長線會較有利。

策略上，現在你每月5成儲蓄，去做月供，其餘先儲起，用一邊月供一邊儲蓄的策略。

月供方面，你可以選擇投資在平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

或潛力股︰中生（1177）、福壽園（1448）、小米（1810）、安碩恒生科技（3067）、港交所（0388）、阿里（9988）、騰訊（0700）。

至於20萬現金和每月一半儲蓄，就等機會，當大市出現一定程度的下跌，就可以動用現金去投資，在平宜價加大力度掃貨。相信這安排，可以較有效助你儲到置業資金。

至於，九毛九（9922）上市年期唔算耐，分析比較難，因為財務數據少，好難做到準確的估值。

佢係內地中式快時尚餐飲品牌管理及運營者，佢係內地所有中式快時尚餐飲餐廳收入中排名第三，於華南地區則排名第一。

可見，在業務上、品牌上、市佔率上都不差。現時運營269間餐廳，以及管理41間加盟餐廳，而「九毛九」及「太二」為佢的兩個主力品牌。

睇翻佢的財務數據，唔差的，不過以佢2019年賺1億計，市值郤去到400億﹐明顯係貴。雖然這股都有長線投資的價值，有貨就持有，無貨，就唔太建議這刻追。

贛鋒鋰業（1772）是潛力股，但估值較難，分析時的確資料較少。由於上市年份少，我地較難有長期數據分析。

佢為鋰化合物、金屬鋰及鋰電池等鋰資源生產商，業務涵蓋上游鋰資源提取、鋰化合物深加工、金屬鋰生產、鋰電池生產及鋰二次利用及回收。集團提供涵蓋五個主要類別逾40種鋰化合物及金屬鋰產品。

其實佢的產品應用都廣泛，包括電池相關產品、化學品、藥品及新材料等，而客戶主要包括電池材料公司、電池製造商、化學品製造商、製藥公司及電子器件製造商。產品主要於中國、韓國、日本及新加坡等十多個國家出售。

我相信佢長遠有潛力，有長線投資價值，問題只是平貴度的問題。現價略貴，小小注好了，之後等佢回落先正或入，始終行業有一定的變化。

------------------------------------------------

Q20229：

龔成老師，我是你今期投資班的學生，以往一直不懂理財

很慚愧地和一班後生仔上完幾堂後，終於鼓起勇氣寫信請教你︰

我今年41歲，儲蓄有230萬，有穩定收入（公務員），月入八萬，扣除開支後

每月可儲蓄4萬元。我是孤兒，不需要供養父母，自己也沒有家庭，但至今仍未置業。
我想請問︰

（1） 如果只是買樓自住，現在是入市好時機嗎？如果屬自住

我是否不用把租金回報率下跌列入重要考慮因素？我可否視物業為優質股票一樣，可能買貴但不會買錯？

（2） 如果我現在買樓，我應否把230萬全數用於首期及買樓相關開支（如裝修等費用）

然後用每月的儲蓄（供樓後大概3萬）作投資股票之用？還是撥出多一點現金來購入股票資產？

（3） 根據你課堂所教的水桶模式買股法，我的歲數應為40/40/20，但根據我的實際情況

我可否調高水桶1或2的比率？
期待你的回覆。

龔成老師︰

1） 租金回報可以係其中一個考慮因素，另外交通便利性，同區配套和未來發展等，都是相關因素。

想知平貴，你可以跟同區相類似樓盤作比較。現時香港樓價唔算平，但作為自住居所，最重要係"供得起"。

香港樓市，中短期會有少少上落（但不會大跌），長遠會向上。

首先要睇經濟基本面，如果經濟持續地差，失業率上升，樓市終會向下，這會對樓市有中期性的影響，不過，就算跌，都不會大跌，最多只是小跌，如果經濟差的情況不是太大，甚至不跌，這是由於背後的需求大。

在長遠計，我仍相信樓市在長遠計，因供求關係，仍是向上多。因為現時香港買樓的需求仍大，而長期供應不足，加上政府往後施政只會更加困難，好多所謂的大計劃都未必能夠實行，又或最後規模細左。

另一方面，需求大，我見唔少適婚年齡的朋友，都正等機會買樓，但未買樓，這些是「潛在需求」，過往每年不斷累積，只要樓市跌少少，就會有需求走出來，這令樓市不能大跌。

另外，樓市另一作用是「投資」，現時的租金無大跌情況，以投資回報率的角度分析，樓價都不會大跌，因此樓市平穩。

長遠計，租金及樓價會平穩，有少少向上，但不是倍升，不會好似過往般倍升，而是平穩向上。

2） 我地投資組合除左要係優質資產外，多樣性都好重要。

如果你現時完全無股票係手，唔建議全部用晒去買樓。要留有部份，分去投資股票作增值，咁會較好。

所以，適當運用按揭，不要用盡現金，才是更好的方法。

3） 其實水桶模式比例係一個參考，你可以因應自已情況，再作出調整。但當然，唔可以調整得過份進取。

同時你要明白，水桶1要求你有一定的投資實力，這方面你要自己衡量翻。

------------------------------------------------

Q20230：

龔sir,呢排見好多人甚至係財經界人仕，話即將冧市，現時恆指30000點算好高嗎？

以及美股的GameStop事件，都會是冧市先兆嗎？

本人持有
788。20000股@1.53
981。1000股@31.9
520。8000股@18.6
9988。400股@241

持股策略需要改變嗎？

龔成老師︰

首先，我地投資唔好去"估走勢"，應用估值平貴，去定買賣策略。

現時大市只在合理區，雖然部份新經濟股，有輕微過熱架情況。但整體大市水平，尚算合理。

呷哺呷哺（0520）都有質素，但近年增長有所放緩，不宜持有太多。

而且，我地投資時唔可以太集中單一企業，相同行業不可佔組合多於3成，而單一企業不要高過15%，否則會有過度集中風險。此股最好沽出部份，換至其他股票，去平衡翻個組合。

中芯國際（0981）本質不過不失，雖然仍每年的生意都有增長，但盈利就有波動，反映雖然大環境的市場在增長中，但佢的成本與售價，就未必在佢掌握的範圍，最後造成盈利波動的結果。

雖然這股都有前景，但以佢面對的情況，但好難將佢定義為好優質的股票，只屬中等。再加上中美問題，令不確性增加左。因為有些舉措，未知會否對集團發展，造成長線影響。

雖然近期以由高位$4X，回調到$2X，現時市盈率已經去到8X倍，依然係貴架水平。此股質素和吸引力一般，如果佢佔你組合比重唔高，可以守。

另外，中國鐵塔（0788）和阿里（9988）有質素，如果你係較年輕，可持有。

------------------------------------------------

Q20231：

龔sir你好，我今年40歲，由工作而來一直無理會份MPF，全部放了在增長基金，最近睇返份MPF發現升了不少，想請教老師，我如何管理我份MPF，再可在退休有更好的回報呢？是否需要升市時轉回部份做穩定基金？還是按年齡調整風險？

補充：我在醫院工作，兩年前轉做長工，醫院為我轉供公積金，不需再供MPF

謝謝老師！

龔成老師：

由於強積金比我地平時的投資，更為長線，所以強積金在配置上，唔需要經常轉來轉去。你只要簡單按翻你的人生階段，去配置進取/平穩/保守，已經是大方向。

現時你年齡40歲，財富仍有增長力，你可以有一半或以上，持有原本基金，餘下就轉到較低風險類別。

------------------------------------------------

Q20232：

龔sir, 想問下點睇2158同8083？

龔成老師：

醫渡科技（2158）有潛力的。可長線。

提供基於大數據和人工智能（AI）技術的醫療解決方案。集團主要向醫療行業的主要參與者（如醫院、製藥、生物技術及醫療設備公司、研究機構、保險公司、醫生和患者以及監管機構及政策制定者）提供服務和合作。

根據大行報告，於2019年，集團收入在中國所有醫療大數據解決方案提供商中排名第一，在中國醫療大數據解決方案市場中的市場份額為5.0%。

睇翻大行對佢2020-23年預測，收入和毛利增長分別為73%和83%，增長力唔錯。

佢平台有一定擴張性，長遠受惠更多醫療保健客戶使用平台。不過公司客戶過度集中，以及依賴公共部門。

但佢依然係在燒銀紙狀態，係一個扣分架地方。整體算係有質素，但要注意風險，投資時唔建議大注。

現價貴，回翻多D先考慮。

中國有贊（8083）集團主要於中國從事經營電商業務及支付服務業務，業務分類如下：

（１）電子商貿：透過電商品牌「有贊」提供各種有關虛擬批發及零售之線上及線下解決方案及服務，如「有
贊微商城」

以有「有贊零售」等ＳａａＳ軟體產品及人才服務、面向開發者的「有贊雲」ＰａａＳ雲服務、面向品牌商的「有贊推廣」與「有贊分銷」、以及面向消費者的「有贊精選」與「有贊微小店」。

（２）第三方支付服務。

（３）一鳴神州：提供第三方支付系統解決方案及銷售綜合智能銷售點裝置。

（４）一般貿易。

近年業務發展快速，生意增長力，不過，現時估值高，業務變化較，整體有好大的不確定性。加上佢過往在核數師報告出現過「保留意見」，盤數可能有古怪，雖然已是數年前的事，但都會扣分。

佢不是無潛力，但風險較高，這刻投資值博率不高。

------------------------------------------------

Q20233：

龔Sir,想請問838和1753現價值得持有投資嗎？

另外龔Sir,黎緊下個月有機會撈底買入股票作投資嗎？

龔成老師：

億和控股（0838）無研究。

初步睇佢的業務與過往財務數據，只是一般般，現價吸引力一般。

兌吧（1753）主要係中國從事用戶運營軟件即服務平台，以及互動式效果廣告等業務，不過這刻仍處虧損狀態，只可以話分析不易，有危有機類。

這都是潛力股，但風險較高，其實佢生意增長不差，只是未進入收成期，如果你睇好，小注投資可以。

另外，無人能估到大市的升跌，我地只能搞翻企業的平貴去決定買賣的力度。

所以，你最好平衡投資，部分要持有優質股，部分留現金等機會。

------------------------------------------------

Q20234：

老師，最近好多朋友都建議股票，基金投資要「泊岸」，因為有些新經濟股已瘋狂破新紀錄。

兼且首富李先生已在英國發展「小香港」，所以佢哋都會起程，認為香港無希望啦。

想了解一下投資去向？自己深信老師的長線投資理念，因早前短炒帶來痛苦體驗，決定長守。但係自己既貪心又擔心，明白未到收成期，不要理會情緒先生主導。
如你所說投資最終目的是想賺大錢，希望藉這次機會能改善自己財政狀況。

若然李先生撤資香港，我這小市民要怎樣計劃未來？長遠要投資股票在那一版塊？本人都有1038，只是仍然未到家鄉。

睇咗你最新分析，我的1211佔比已超過安全比例。但若能承受風險，是否不用理會。

不過真心不知道自己可以承受多少？

原來有錢賺都會這樣子不安，老師你真係好厲害。

我今日去書局買一本你的書給我的姨甥女，希望佢對財富增值多一些概念。

我相信這樣可以令家人和朋友早一些達至財務自由，不用終日埋頭苦幹換來卑微收入。Work hard Play hard.

謝謝您。

龔成老師：

我地最重要是建立一個長期的「財富組合」，要優質，要平衡，要適合你的年齡與風險承受程度，新舊經濟各類股都要有。

同一行業不能太多，同一股不能太多。要平衡，建立後長期持有，不是買賣賺差價，而是成為你財富組合一部分。

如果你認為香港股市較集中，可以同時投資美股，最簡單就是買ETF，例如：VOO、QQQ，令你的組合更為平衡。

你要從概念上，明白「平衡配置」。

至於比亞迪（1211），當我地分析是否過了適當比例時，會以長期股價作準，因此不要短期就調整，要長期。如果你能承受風險，持有都可以的。

希望書本，能提高你同姨甥女的財務知識，大家加油！

------------------------------------------------

Q20235：

老師，想問問我想買呢6隻收息股以達到每個月有息收，你覺好唔好?

1310、778、11、2638、303、883

預計每個月收息$2744，以目前股價投資大約$45000。
唔該老師

龔成老師：

可以。

上述都是有質素的股票，業務基本上都穩定，派息理想，收息可以的。這是一個不差的組合，能平衡風險，以及有穩定股息。

雖然增長力不強，但以收息為目標，可以。現價合理，可投資。

你日後如果有更多資金，打算加入更多收息股，可考慮：ＧＸ恒生高股息率（3110），這是一個收息基金，你都可以參考下。

------------------------------------------------

Q20236：

老師你好 ，我見你成日都會話投資係2800到穩陣 我就有個疑問

以我個人見解，無論升幅同息口都唔夠內銀穩陣，如果以供股形式去投資，股息都用黎抵消晒每月手續費

點解會推薦呢隻，就以今年股災表現，由低位去反現價都係3成，而內銀表現相約

息口還要高，2800升幅係食恒指，而內銀比重都高，2者相比下。應如何取捨

龔成老師：

因為盈富（2800）這是一個「平衡組合的工具」，當中有50隻成份股，對股票組合有平衡作用。

內銀是單一行業，如果你只投資內銀，就會出現行業集中風險，萬一中國出現了金融系統風險，內銀會有較大損失。而盈富有不同類別的股票，始終會較平衡。

可能你見過往表現差不多，但我地分析時，唔能夠只考慮「過往出現的情況」，而是要考慮「各種有可能出現的情況」。

我地投資，一定是「先想風險，後想回報」。

------------------------------------------------

Q20237：

你好，請問388和700邊一個好呢？
買入位是幾多好？

龔成老師：

兩隻都有質素，都有增長力，不過，兩隻都略貴。騰訊（0700）增長力會略高。

你預兩隻都是回1、2成會合理翻D，但就唔知見唔見到，所以，如果想入，可月供，或回少少小注，等跌再加。

------------------------------------------------

Q20238：

想問一問龔成老師對以下四隻股票有咩睇法😖

1）9988 佢個股價岩岩升返上去 初初好驚 其實我覺得佢個股價托得一陣 會再跌 但我知佢有實業 差極有譜
但依然心情好矛盾 原本我set左$300樓上放 依家似乎好遙遠 跌低過$200應該放左佢定買入溝淡佢？

我擔心既係唔知政府只係想罰下佢定針對佢 但針對佢都唔出奇？我200尾買入。想聽下龔成老師你對9988既睇法
佢係咪真係大到倒不下？京東同佢都平排啦個地位？

2）3690 佢仲有冇潛力沖多次過$300？

3）9991 最擔心係佢 倉庫失火兼大股東阿里巴巴出事 網站上話佢集多項服務於一身 冇人代替到
我先買 依家諗唔到佢有咩好處 所以用溝淡方法都擔心 係咪應該放左佢？

4）1137 我覺得佢有潛力發展同佢會uptodate改良營銷方法所以買佢 我預佢會去到$16-$20
但佢反覆徘徊係$10-$13 擔心自己睇法係咪錯左？

唔好意思我呢個新手 心情太矛盾太多問題🙏

龔成老師︰

首先，我想你明白"溝貨"與"分注"的分別。

溝貨是指愈跌愈入，同時不理企業質素，不理自己的設定金額，盲目去入。分注則是「一早定好買入策略，一早定好本金總數，並以有策略的模式進行」。

如果你係"分注"的話，你可因應平貴和質素，去進行。若是"溝貨"，就不是再入貨，因為再平，都只會令你增加風險。

你能分辨清楚的話，有助你更準確去做投資決定。

1） 我地投資係睇長線，唔好太在意個買入價，佢只係心理因素。長線企業質素，才是我地考慮是否持有的重點，。

阿里巴巴（9988）近期面對內地監管可能收緊，風險度增加左。早前螞蟻金服因貸款業務問題，被叫停上市。中央就是擔心這些小型信貸增長過快，但監管又未及銀行嚴緊，會危害實體經濟。

但內地唔係想佢唔賺錢，只係想規管佢。由於佢本身己建立一個完善的業務，因此本身是無得輸，只是賺多賺少架問題。

此股質素依然存在，但你預佢增在力會弱左，但依然值得長線持有。

京東（9618）同佢地位接近，有機會出現同樣情況。但投資上，阿里會較為穏健，而京東潛力較大，但風險也較高。

2） 美團點評（3690）都有質素，佢業務巨大，同時增長快，是有危有機的股票。但近期反壟斷政策，相信會對佢有一定影響。但影響有幾大，暫時無人知。

但相信只係會加強規管，而唔會係出現大改革，整體質素預期唔會大變，要上翻去應該都可以，但增長力一定會比以往慢左。

集團過往一直處於燒銀紙階段，至2019年才開始有少量盈利。未來是否維持，暫時都好難講。這類企業不是不可投資，但不能大注。

3） 寶尊電商（9991）主要在天貓、京東、拼多多、微信小程序、小紅書、抖音及快手等平台以三種業務營運模式為品牌合作夥伴提供電商服務。

提供商為品牌提供IT解決方案、網店運營、市場營銷、客戶服務及倉儲配送等電商服務。初步睇佢業務都有吸引地方，但整體賺錢能力唔算話好強，質素算係中等。

以佢2019年純利不足3億，但現時市值郤有200億，明顯係貴。如果你持貨不多，可以守。但此刻加注，我就不建議。

4） 香港電視（1137）業務有前景，但有兩點存有風險的。

第一，佢都會依靠人的因素，王維基成為了公司最值錢的資產，佢的想法好多，有生意頭腦，但我對這類太依靠個人的企業，不建議太過大注。

第二，這企業現時搞網購，有增長力的，但同時存有一定的未知數。疫情過後的增長力會否減慢？

另外就是估值方面，我都好難講這刻的估值，只能話唔算平。此股可投資，但不確定性較高。若你持貨不多，就無問題。

------------------------------------------------

Q20239：

老師現在我有
1810小米10000股$16.5
7000股$23
6618京東健康500股$180
700騰訊100股567.5
883中海油20000股$7.2
9988阿里爸爸200股$285

1.京東健康高追左、會否升番$180？止蝕定溝貨？

2.小米應否放d？

3.現組合可否比d意見？

4.還有什麼股票好似小米咁可以翻倍？
老師真係好多謝你😘😘能夠令到我賺錢、不過真係要好堅持

因為好驚到時小米會比大陸或美國制裁會跌返落去😔而比人話點解嗰陣時賺錢唔放。

龔成老師︰

1） 由京東（9618）分折出來京東健康（6618）其業務主要提供線上線下的醫藥出售和健康管理服務，業務布局包括醫藥電商、互聯網醫療、智慧醫療解決方案、健康服務等4個大板塊。

京東健康旗下京東大藥房，更是內地線上線下收入規模最大的零售藥房。其互聯網醫院，日接診量超過10萬次。

質素上，京東健康是有的。但由於估值難，不確定性大，同時暫時計唔平。所以，此股只宜佔組合小部份。

2） 小米（1810）你可考慮賣出部份，原因唔係佢質素有問題。純粹係佢你組合比重太高，個別企業佔組合最好維持15%以內。起碼去翻25%先。

你現時超過一半，會有過度集中風險。如果佢萬一出問題，你成個組合就會嚴重地受影響。

至於佢會唔會因政治或政策，而影響長線發展，無人會估倒。但此刻所見，佢係有一定質素和發展潛力，值得長線持有。

3） 中海油（0883）質素只係中等，唔建議持有咁多。

而你組合極偏重潛力股，就算你好年青，都應該加入適量平穏增長股（佔組合最少一半），去加強組合平衡性。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、粵海（0270）。

4） 其實不少潛力股，都有機會倍升。但部份現價偏貴，未係投資時候。而且你組合波動性已經好高，投資唔係買晒全部高質增長股就可以，都需要一個平衡健全的組合。

建議你先調節好個"潛力股"和"平穏增長股"個比重，咁會較穏當。

------------------------------------------------

Q20240：

我早幾個月開始睇到你個page.對股票無咩認識.10月開始左月供.供左3個月

比亞迪電子285
平均38.6 月供1500

中國生物制藥1177
平均7.7 月供1500

小米1810
平均25月供1500

買左10000股788中國鐵塔
1.35入

買左8000股1830必瘦站
2.4入

我想問下呢個組合可以嗎？

1810同285係咪都係偏貴？我仲應唔應該繼續月供定暫時停咗月供呢兩隻先會好啲？

我見788宜家不停跌。我應該守住先唔好理定係放左去好呀？

想入多一隻.想問下龔sir點睇藍月亮6993？
可能太多問題.唔該哂龔sir

龔成老師︰

月供可以幫你拉平均個買入價，基本上你一直月供就可以。但時間必需夠長，最少供3年和持有5年，才有較明顯效果。

你組合中全部都係潛力股，就算你好年青，能承受較高風險。現時比重都過高，我假設你係年青人，個比例最好係"平穏增長股"和"潛力股"各半。

未來你要慢慢調節翻個比重，否則組合個波動性會太大。

平穏增長股︰盈富（2800）、金沙（1928）、恆基（0012）、平安（2318）、中銀（2388）、港鐵（0066）、煤氣（0003）、長建（1038）、領展（0823）、希慎（0014）、太古地產（1972）

中國鐵塔（0788）有質素，你唔洗太在意佢中短期波動，一直持有就可以。不過增長力比過往弱左。

藍月亮（6993）有質素，佢有中國P&G之稱。成立於1992年，擁有衣物清潔護理、個人清潔、家居清潔三大系列。

佢係內地洗衣液龍頭，加上毛利率高，賺錢力強。睇佢之前數據，以零售額計，其洗衣液、濃縮洗衣液和洗手液，市佔率都是首位。分別佔市場24%、28%、17%。

整體質素係有，發展都正面。但現價唔平，現時入貨，風險唔細。

----------------------------------------------

若你有問題想向本人發問，可在龔成的fb專頁中（龔成）inbox龔成，但要注意如無特別聲明，有可能將問答放上網，當然，會將發問者的身份，以及有關個人資料的部分刪去。

另外，我所給予的各種意見，只是供大家參考，當中無任何銷售及推介，不涉及任何利益，其實大家應該要有獨立分析的能力，我只是給予一些方向及純參考模式。

由於提問人數眾多，見諒無法即日回覆，如果是普通的提問，預起碼要7天以上才能回覆，若然是較複雜的提問，起碼要10天才能回覆，希望各位能諒解。