由「想做新一代宇宙天團但仲未係」的「騎呢組合」ERROR主持的ViuTV搞笑節目《ERROR自救TV》，隊中四子（華Dee、肥仔、保錡與193）每集都出盡奶力，務求令觀眾笑到標眼水，不過將於周一晚（15/6）播出的第六集，竟然會一反常態勁嚴肅，事關這集的嘉賓，是綽號「薯片叔叔」的前財政司司長曾俊華。 _ 令不少支持者疑惑的是，縱觀ERROR於市場上的地位和叫座力，與曾俊華之間的距離隨時闊過太平洋，何解「薯片叔叔」會答允亮相？原因非常簡單，自從2017年完成特首選戰後正式退出官場後，曾俊華於2019年4月宣布加入第一間獲發虛擬保險牌照的保險公司（保泰人壽）擔任資深顧問兼廣告代言人，而該品牌正是今次節目的冠名贊助，故所有安排都來得順理成章。 _ 說回節目。叫ERROR搞笑當然沒難度，認真訪問嘛.....經過製作團隊反覆思考之後，決定派出一直被認為沒有內涵及MK的保錡，與曾俊華面對面訪問，旨在提升個人修養。由於這位嘉賓級數實在太勁，保錡不容有失，他透過WhatsApp憶述，「我研究咗份稿幾日呀，因為份稿改咗好多次！另一方面，因為佢哋話個訪問係好嚴肅，但我做節目，其實唔想只係嚴肅，我有認真諗過啲問題，睇下點樣可以做到認真得嚟又有啲綜藝感。」 _ 據了解，拍攝當日，平日嘻嘻哈哈的保錡，在鏡頭前不斷唉聲嘆氣，雙腳不停發抖，緊張到傻：「為咗節目效果，Writer（撰稿員）同導演話曾俊華『嬲嬲哋』，話我唔認真，搞到我有啲緊張，但事實上係我都真係有少少緊張，因為我做每一件事都係用盡力去做。」保錡在節目中指今次錄影前驚到想嘔，但實情是跟衣著有關 ── 平日衫鬆褲鬆，今勻卻以啡色三件頭西裝Look上陣，仲要打埋呔：「點解會想嘔？因為食完Lunch，件衫又好緊。」難怪曾俊華也忍不住揶揄他一句：「好少見你着得咁靚仔！」 _ 訪問中，曾俊華盡顯幽默和寸嘴本色，保錡處於「捱打」狀態，當他問熱愛劍擊的曾俊華：「你玩嘅劍叫咩名？」，「薯片叔叔」秒速回應：「劍咪劍囉！」，令保錡非常尷尬，一同接受訪問的保險品牌創辦人顏耀輝見狀決心解圍，指曾俊華有出書，可以贈一本給保錡，相當抵死的保錡先答「唔使！」，旋即改口話「好啊！」，豈料曾俊華再向保錡「插一刀」說：「你未必睇得明噃！」 _ 曾俊華幕前表現寸嘴，但保錡指對方真人其實相當友善：「我覺得佢好Nice，同埋真係好玩得，我覺得而家好少前高官咁貼地囉，例如同佢傾食蟲，佢真係話想研究下食蟲。之後佢又講下自己耍劍同有夾BAND，我發現佢同我都幾似，佢都係玩音樂，又喺電台開咪（商台《薯片鬚Music》），佢真鍾意做音樂，所以我都幾開心。」 _ （15062020） _ #游大東 #游大東影視筆記 #曾俊華 #error自救tv #ERROR #吳保錡 #何啟華 #梁業 #郭嘉駿 #保泰人壽 #bowtie #15062020 #viutv @k_p0k1 @error.weare @vincitang @bowtiehongkong @johntsangpage @pokipokiland @deegor_hkwa @fatboyip @deniskwok193